ᐊᑕᓃᑦ ᐂᑉᐸᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᒫᓇᓯᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ

¹ ᒫᓇᓯ 12ᓂᒃ ᐊᕐᕌᒍᖃᕐᓗᓂ ᔫᑕᒧᑦ ᐊᖓᔪᖅᑳᕐᔪᐊᓐᖑᓚᐅᕐᐳᖅ, ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᐊᕐᕌᒍᓂᒃ 55ᓂᒃ. ᐊᓈᓇᖄᓚᐅᕐᐳᖅ ᕼᐃᐱᓯᐸᒥᒃ ᐊᑎᓕᖕᒥᒃ.

² ᐊᑕᓂᐅᑉ ᓵᖓᓂ ᓈᒻᒪᖏᑦᑐᓂᒃ ᐱᓂᐊᓚᐅᕐᐳᖅ, ᐃᓅᖃᑎᒌᒡᔪᐊᑦ ᐊᑕᓂᐅᑉ ᐊᐅᓪᓚᕐᑎᓚᐅᕐᑕᖏᑕ ᐃᓕᖅᑯᓯᕆᓚᐅᕐᑕᖏᓐᓂᒃ ᓇᕐᕈᓇᕐᑐᓂᒃ ᐱᓂᐊᓚᐅᕐᒪᑕ ᐃᓴᕆᐊᓕᒥᐅᓂᑦ ᓄᓁᑕᐅᓚᕐᑐᓂᒃ.

³ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᑦ ᓴᓇᔭᐅᑎᒋᐊᓪᓚᓚᐅᕐᐰᑦ ᐊᑖᑕᖓᑕ ᕼᐃᓯᑬᐊᐅᑉ ᓯᖁᑦᑎᓚᐅᕐᑕᖏᑦ; ᑐᓂᕐᕈᓯᕐᕕᒡᓂᒡᓗ ᓴᓇᔭᐅᑎᑦᓯᕗᖅ ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᕕᐅᕙᒃᑐᓂᒃ, ᒎᑎᓐᖑᐊᓪᓗ ᐊᓯᕋᐅᑉ ᐊᑦᔨᖓᓂᒃ ᓴᓇᔭᐅᑎᑦᓯᒋᓪᓗᓂ, ᐊᖓᔪᖅᑳᕐᔪᐊᑉ ᐂᕼᐊᐱᐅᑉ ᓴᓇᔭᐅᑎᓯᒪᔭᖓᑕ ᐊᑦᔨᖓᓂᒃ, ᒫᓇᓯ ᑐᒃᓯᐊᕐᕕᖃᖃᑦᑕᓕᓚᐅᕆᕗᖅ ᐅᓪᓗᕆᐊᓕᒫᓂᒃ, ᐱᓇᓱᐊᕐᕕᒋᓪᓗᒋᓪᓗ.

⁴ ᒎᑎᓐᖑᐊᓖᑦ ᑐᓂᕐᕈᓯᕐᕕᖏᓐᓂᒃ ᓴᓇᔭᐅᑎᑦᓯᒋᕗᖅ ᐊᑕᓂᐅᑉ ᐃᒡᓗᖓᓂ, ᐊᑕᓂᐅᑉ ᐅᖃᕐᓯᕆᓚᐅᕐᑕᖓᓂ, “ᔨᕉᓴᓕᒥ ᐊᑎᕋ ᐃᓕᓯᒪᓂᐊᕐᐸᕋ.”

⁵ ᐊᑕᓂᐅᑉ ᐃᒡᓗᖓᓂ ᐃᒡᓗᕈᓯᖏᖕᓂ ᒪᕐᕉᖕᓂᒃ ᑐᓂᕐᕈᓯᕐᕕᓕᐅᕐᐳᖅ ᐅᓪᓗᕆᐊᓕᒫᓄᑦ ᑐᒃᓯᐊᕐᕕᒋᕙᒃᑕᒥᓂᒃ.

⁶ ᐃᕐᓂᕐᒥᓂᒃ ᐃᑯᐊᓚᑦᓯᓪᓗᓂ ᑐᓂᕐᕈᓯᓚᐅᕐᐳᖅ, ᓇᓗᓇᕐᑐᓂᒡᓗ ᖃᐅᔨᒪᑦᔪᑎᖃᕋᓱᒃᐸᒃᓗᓂ, ᐊᖓᒃᑯᓂᒡᓗ ᑕᑎᖃᕐᐸᒃᓗᓂ, ᑐᖁᖓᔪᓂᒡᓗ ᖃᐅᔨᒪᓂᕋᕐᑎᓂᒃ ᐃᑲᔪᕐᑎᖃᕋᓱᒃᐸᒃᓗᓂ. ᐊᖏᔪᒥᒃ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ, ᓂᓐᖓᒃᓮᒍᑎᓂᒡᓗ ᐊᑕᓂᕐᒥᒃ ᐱᓇᓱᐊᕐᓗᓂ.

⁷ ᒎᑎᓐᖑᐊᑉ ᐊᓯᕋᐅᑉ ᐊᑦᔨᖓᓂᒃ ᓴᓇᓯᒪᔪᒥᒃ ᐋᖅᑭᒃᑕᐅᑎᑦᓯᓯᒪᓚᐅᕐᐳᖅ ᐊᑕᓂᐅᑉ ᐃᒡᓗᖓᓂ, ᐊᑕᓂᐅᑉ ᑍᕕᑎᒥᒃ ᐃᕐᓂᖓᓂᒡᓗ ᓲᓗᒨᓂᒥᒃ ᐅᖃᐅᑦᔨᑦᔪᑎᒋᓚᐅᕐᑕᖓᓂᒃ ᐅᖃᕐᓗᓂ, “ᐅᕙᓂ ᐃᒡᓗᒥ ᔨᕉᓴᓕᒻᒥᓗ ᓂᕈᐊᕐᓯᒪᔭᓐᓂ ᐃᓴᕆᐊᓕᒥᐅᑦ ᑭᖑᕚᕇᖏᑕ ᓄᓇᒋᔭᓕᒫᖏᓐᓂᑦ, ᐊᑎᕋ ᐃᓂᖃᕐᑎᓐᓂᐊᕐᐸᕋ ᐃᓱᖃᖏᑦᑐᒧᑦ;

⁸ ᐃᓴᕆᐊᓕᒥᐅᑦ ᐃᑎᒐᖏᑦ ᐊᐅᓪᓚᖃᑦᑕᖁᔪᓐᓃᕐᓂᐊᕐᐸᒃᑲ ᓄᓇᒋᓕᕐᑕᖓᓂᑦ ᓯᕗᓕᕕᓂᖏᓐᓄᑦ ᑐᓂᑦᔪᑎᒋᓚᐅᕐᑕᓐᓂᒃ ᓄᓇᒋᔭᐅᖁᓪᓗᒍ, ᐱᖁᔭᓕᒫᓐᓂᒃ ᒪᓕᑦᓯᐊᕐᓂᐊᕐᐸᑕ ᐊᑐᕐᑕᐅᖁᓚᐅᕐᑕᓐᓂᒃ ᑖᒃᑯᓄᖓ, ᐱᖁᔭᓕᒫᓂᒡᓗ ᐱᔨᒪ ᒨᓯᓯᐅᑉ ᐱᖁᔨᑦᔪᑎᒋᓚᐅᕐᑕᖏᓐᓂᒃ ᑖᒃᑯᓄᖓ.”

⁹ ᑖᒃᑯᐊᓕ ᓈᓚᓚᐅᓐᖏᓚᑦ, ᒫᓇᓯᐅᑉ ᐊᔪᕐᑐᓕᓐᓇᕐᑐᓄᑦ ᑕᓯᐅᓚᐅᕐᒪᒋᑦ ᐱᐅᖏᓐᓂᕐᓴᒧᑦ ᓄᓇᑖᕆᓯᒪᔭᖏᑕ ᐃᓄᒋᓚᐅᕐᑕᖏᑕ ᐱᓂᐊᕐᓂᕆᓚᐅᕐᑕᖏᓐᓂᑦ ᐊᑕᓂᐅᑉ ᓯᖏᑕᐅᑎᓚᐅᕐᑕᖏᓐᓂᑦ ᐃᓴᕆᐊᓕᒥᐅᓄᑦ ᓄᓇᑖᕆᔭᐅᕙᓪᓕᐊᓕᕐᑎᓪᓗᒍ.

¹⁰ ᐊᑕᓂᖅ ᐅᖃᕐᑎᒥᒍᑦ ᐅᖃᓚᐅᕐᐳᖅ,

¹¹ “ᔫᑕᐅᑉ ᐊᖓᔪᖅᑳᕐᔪᐊᖓ ᒫᓇᓯ ᓇᕐᕈᓇᕐᑐᕐᔪᐊᓂᒃ ᐱᓇᓱᐊᕐᓯᒪᖕᒪᑦ, ᐊᒧᕅᑎᒥᐅᑦ ᐃᓕᖅᑯᓯᕆᓯᒪᔭᖏᓐᓂᑦ ᐱᐅᖏᓐᓂᕐᓴᓂᒃ ᐱᓂᐊᕐᓯᒪᕗᖅ, ᒎᑎᓐᖑᐊᖃᖃᑦᑕᕐᓂᕐᒥᖕᓄᑦ ᔫᑕᒥᐅᓂᒃ ᐊᔪᕐᑐᓕᑎᑦᓯᓯᒪᖕᒪᑦ.

¹² ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓᑦ, ᑕᑯᒋᑦ, ᑲᑉᐱᐊᓇᕐᑐᒥᒃ ᐱᓇᓱᐊᕈᒫᕐᐳᖓ ᔨᕉᓴᓕᒥᐅᓄᑦ ᔫᑕᒥᐅᓄᓪᓗ ᐱᐅᓐᖏᓗᐊᕐᓂᖓᓄᑦ ᑐᓴᕐᑐᑦ ᑕᑕᒥᓯᒪᔪᒫᕐᐳᑦ.

¹³ ᔨᕉᓴᓕᒥᐅᑦ ᓱᒋᐊᕈᒫᕐᐸᒃᑲ ᓴᒥᐊᕆᐊᒥᐅᓂᒃ ᓱᒋᐊᕐᓯᓚᐅᕐᓂᑦᑐᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓᑦ ᐂᕼᐊᑉ ᑭᖑᕚᖏᓪᓗ ᐊᑕᕆᓇᒋᑦ ᓱᒋᐊᕐᓯᓚᐅᕐᓂᑦᑐᑦ. ᔨᕉᓴᓕᒻ ᐊᓪᓚᕐᑎᕈᒪᕙᕋ, ᓂᕐᕆᑏᑦ ᐊᓪᓚᕐᑎᕐᑕᐅᓪᓗᓂ ᓴᓗᒻᒪᕐᑕᐅᕙᖕᓂᖓᑐᑦ ᓴᓗᒻᒪᕐᑕᐅᔭᕇᕋᒥ ᐳᓯᑎᑕᐅᔪᑎᑐᑦ.

¹⁴ ᐊᒥᐊᒃᑰᔫᒐᓗᐊᑦ ᕿᒤᓐᓇᕐᓗᒋᑦ ᖁᔭᓈᕈᒫᕐᐸᒃᑲ, ᐊᑭᕋᖏᓐᓄᑦ ᑐᓂᑦᔪᑎᒋᓗᒋᑦ ᐃᓱᒤᓐᓇᕐᕆᑎᐅᓗᑎᒃ ᓵᓚᒋᔭᐅᔪᒫᕐᒪᑕ ᓄᓇᖓᑦ ᓱᓁᕈᑦᔭᐅᑦᓯᐊᕐᓗᓂ ᑎᒎᖅᑬᕕᐅᑎᑦᓱᒫᕐᐸᕋ.

¹⁵ ᑍᒤᓕᐅᕐᕕᒋᔪᒪᕙᒃᑲ ᐃᓄᖁᑎᒃᑲ ᐊᔪᕐᑐᓕᓯᒪᖕᒪᑕ ᐅᕙᓐᓄᑦ ᓂᓐᖓᒍᑎᒃᓴᓂᒡᓗ ᐱᓇᓱᐊᖏᓐᓇᕐᒪᑕ ᑍᒪᓐᖓᑦ ᓯᕗᓕᕕᓂᖏᓐᓂᒃ ᐊᐅᓪᓚᕐᑎᑦᓯᓂᕆᓚᐅᕐᑕᒪ ᐄᑦᔨᑉᑎᒥᑦ, ᐅᓪᓗᒥᒧᑦ ᑎᑭᓪᓗᒍ.”

¹⁶ ᒫᓇᓯᐅᓪᓗ ᐸᓯᔭᒃᓴᐅᓂᖃᖏᑦᑐᓂᒃ ᐃᓄᐊᕐᓯᒪᔭᖏᑕ ᐅᓄᕐᓂᑯᖏᓐᓄᑦ, ᔨᕉᓴᓕᐅᑉ ᐃᓱᐊᓂᑦ ᐃᓱᐊᓄᑦ ᓈᔨᓯᒪᓚᐅᕐᐳᑦ, ᐊᔪᕐᑐᓕᑎᑦᓯᓯᒪᓂᖓ ᔫᑕᒥᐅᓂᒃ ᐱᒐᓗᐊᕐᒥᑎᓪᓗᒍ, ᐊᑕᓂᐅᑉ ᓵᖓᓂ ᓈᒻᒪᖏᑦᑐᓂᒃ ᐱᓂᐊᓚᐅᕐᒪᑕ.

¹⁷ ᒫᓇᓯᐅᑉ ᐱᓂᐊᕐᓂᕆᓚᐅᕐᑕᓕᒫᖏᑦ ᑎᑎᕋᕐᑕᐅᓯᒪᕗᑦ, ᐊᔪᕐᑐᓕᓂᕆᓚᐅᕐᑕᖏᓪᓗ, ᔫᑕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᕕᖏᓐᓂᒃ.

¹⁸ ᒫᓇᓯ ᑐᖁᖕᒪᑦ ᐃᓗᕕᕐᑕᐅᕗᖅ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐱᕈᕐᓰᕕᖓᓂ ᑍᔭᐅᔪᒥ ᐆᔭᐅᑉ ᐱᕈᕐᓰᕕᖓᓂᒃ; ᐃᕐᓂᖓᑕ ᐋᒪᓐ ᑭᖑᕝᕕᕐᓗᓂᐅᒃ ᐊᖓᔪᖅᑳᕐᔪᐊᓐᖑᕆᕗᖅ ᑭᖑᓂᖓᓂ.

ᐋᒪᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ

¹⁹ ᐋᒪᓐ 22ᓂᒃ ᐊᕐᕌᒍᖃᓚᐅᕐᐳᖅ ᔫᑕᒧᑦ ᐊᖓᔪᖅᑳᕐᔪᐊᓐᖑᕐᓗᓂ, ᐊᐅᓚᑦᓯᓚᐅᕐᐳᕐᓗ ᔨᕉᓴᓕᒥ ᐊᕐᕌᒍᖕᓂᒃ ᒪᕐᕉᖕᓂᒃ. ᐊᓈᓇᖃᓚᐅᕐᐳᖅ ᒥᓱᓕᒦᑎᒥᒃ ᐊᑎᖃᕐᑐᒥᒃ ᕼᐊᕉᓯᐅᑉ ᐸᓂᖓᓂᒃ, ᓄᓇᓕᖕᓂᑦ ᔮᑦᐸᒥᑦ ᐱᓯᒪᔪᖅ.

²⁰ ᐊᑖᑕᕕᓂᕐᒥᑐᑦ ᒫᓇᓯᑐᑦ ᐊᔪᕐᑐᓕᓂᕐᒥ ᐃᓅᓯᖃᓚᐅᕆᕗᖅ ᐊᑕᓂᐅᑉ ᓵᖓᓂ.

²¹ ᐊᑖᑕᒥ ᐃᓕᖅᑯᓯᕆᓚᐅᕐᑕᓕᒫᖏᓐᓂᒃ ᒪᓕᑐᐃᓐᓇᓚᐅᕋᒥ, ᑐᒃᓯᐊᕐᕕᖃᖃᑦᑕᕐᓗᓂᓗ ᒎᑎᓐᖑᐊᓄᑦ ᐊᑖᑕᖓᑕ ᑐᒃᓯᐊᕐᕕᒋᖃᑦᑕᕐᑕᕕᓂᖏᓐᓄᑦ,

²² ᐊᑕᓂᖅ ᐃᓱᒪᒋᓚᐅᓐᖏᓛ ᓯᕗᓕᕕᓂᖏᑕ ᒎᑎᖓᑦ, ᐊᑕᓂᐅᓪᓗ ᐱᓂᐊᕐᑕᐅᖁᔭᖏᓐᓂᒃ ᐱᓇᓱᐊᓚᐅᓐᖏᓚᖅ.

²³ ᐋᒪᓐ ᐊᖓᔪᖅᑳᑯᑎᖏᑕ ᐃᓄᐊᕈᒪᓪᓗᒍ ᐃᓱᒪᒌᓐᓇᓕᕋᒥᑦᔪᒃ, ᑐᖁᑕᐅᑎᑉᐹᑦ ᐊᖓᔪᖅᑳᕐᔪᐊᑉ ᐃᒡᓗᖓᓂ.

²⁴ ᔫᑕᒥᐅᓪᓕ ᐊᖓᔪᖅᑳᕐᔪᐊᕐᒥᒃ ᐋᒪᓐᒥᒃ ᑐᖁᑦᓯᔪᕕᓂᓕᒫᑦ ᑐᖁᑕᐅᑎᓪᓗᒋᑦ, ᐃᕐᓂᖓᓂᒃ ᔫᓮᐊᒥᒃ ᐊᖓᔪᖅᑳᕐᔪᐊᓐᖑᕐᑎᑦᓯᓚᐅᕐᐳᑦ.

²⁵ ᐋᒪᐅᓪᓕ ᐱᓂᐊᕐᓂᕆᓯᒪᔭᓕᒫᖏᑦ ᑎᑎᕋᕐᑕᐅᓯᒪᕗᑦ ᔫᑕᒥᐅᑦ ᐊᖓᔪᖅᑳᕐᔪᐊᕆᓯᒪᔭᖏᑕ ᐅᓂᒃᑲᐅᑕᐅᕕᖏᓐᓂ.

²⁶ ᐋᒪᓐ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᐃᓗᕕᒃᓴᓕᐊᕆᓯᒪᔪᒥ ᐆᔭᐅᑉ ᐱᕈᕐᓰᕕᖁᑎᖓᓃᑦᑐᒥ; ᐃᕐᓂᖓᓗ ᔫᓮᐊ ᑭᖑᕝᕕᐅᑎᓪᓗᓂ ᐊᖓᔪᖅᑳᕐᔪᐊᓐᖑᕐᑎᑕᐅᕗᖅ.