ᐊᑕᓃᑦ ᐂᑉᐸᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓔᑦᔭᐅᑉ ᕿᓚᓕᐊᕈᑦᔭᐅᓂᖓ

¹ ᐊᑕᓂᐅᑉ ᐃᓔᑦᔭᒥᒃ ᕿᓚᓕᐊᕈᑦᔨᕕᒃᓴᖓ ᐅᓚᓗᔭᒃᑯᑦ ᖃᒡᓕᓕᕐᑎᓪᓗᒍ, ᐃᓔᑦᔭᓗ ᐃᓔᓴᓗ ᒋᐅᓪᒐᐅᓪᒥᓐᖔᕐᓗᑎᒃ ᐱᓱᖃᑎᒌᓚᐅᕐᐴᒃ.

² ᐃᓔᑦᔭᐅᑉ ᐃᓔᓴ ᐅᖃᐅᑎᕚ, “ᑕᒫᓂᒋᑦ, ᐊᑕᓂᐅᑉ ᐱᑎᓕᒧᐊᖁᖕᒪᖓ.” ᐃᓔᓴᐅᓪᓕ ᐅᖃᐅᑎᕚ, “ᐊᑕᓂᖅ ᐃᓅᖕᒪᑦ, ᐃᕝᕕᓪᓗ ᐃᓅᓂᕐᓂ, ᕿᒪᖕᓂᐊᓐᖏᓚᒋᑦ.” ᑕᕝᕙ ᑕᒪᕐᒥᒃ ᐱᑕᓕᓕᐊᓕᕐᐴᒃ.

³ ᒎᑎᐅ ᐱᔪᖃᓛᕐᑐᒥᒃ ᐅᖃᕐᑎᖏᑦ ᐱᑎᓕᒦᑦᑐᑦ ᐃᓔᓴ ᐅᐸᒡᓗᒍ ᐅᖃᐅᑎᕚᑦ, “ᖃᐅᔨᒪᕖᑦ ᐊᖓᔪᖅᑳᑦ ᐊᑕᓂᕐᒧᑦ ᐅᓪᓗᒥ ᐂᔭᐅᓂᐊᕐᓂᖓᓂᒃ?” ᐃᓔᓴᐅᑉ ᑭᐅᕔᑦ, “ᖃᐅᔨᒪᔪᖓ, ᐅᖃᐅᓯᕆᑦᑍᓕᓯᐅᒃ.”

⁴ ᐊᒻᒪ ᐃᓔᑦᔭᐅᑉ ᐃᓔᓴ ᐅᖃᐅᑎᓕᕆᕚ, “ᐃᓔᓵ ᑕᒫᓃᒋᑦ, ᐊᑕᓂᐅᑉ ᔨᕆᑯᒧᑦ ᐂᖁᖕᒪᖓ.” ᐃᓔᓴᐅᑉ ᑭᐅᕚ, “ᐊᑕᓂᖅ ᐃᓅᖕᒪᑦ, ᐃᕝᕕᓪᓗ ᐃᓅᓂᕐᓂ ᕿᒪᖕᓂᐊᓐᖏᓚᒋᑦ.” ᑕᒪᕐᒥᒃ ᐊᒻᒪ ᔨᕆᑯᓕᐊᓕᕆᕘᒃ.

⁵ ᐊᒻᒪ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᔨᕆᑯᒦᑦᑐᑦ ᐃᓔᓴ ᐅᐸᒡᓗᒍ ᐅᖃᐅᑎᕚᑦ, “ᖃᐅᔨᒪᕖᑦ ᐊᖓᔪᖅᑳᑦ ᐊᑕᓂᐅᑉ ᐅᓪᓗᒥ ᐊᐅᓪᓚᕈᑎᓂᐊᕐᒪᒍ?” ᑭᐅᒋᕔᑦ, “ᖃᐅᔨᒪᕗᖓ, ᐅᖃᐅᓯᕆᑦᑍᓕᓯᐅᒃ.”

⁶ ᐃᓔᑦᔭᐅᑉ ᐊᒻᒪ ᐅᖃᐅᑎᓕᕆᕚ, “ᑕᒫᓂᒋᑦ, ᐊᑕᓂᐅᑉ ᑰᖕᒧᑦ ᔪᐊᕐᑕᓂᓕᐊᖁᖕᒪᖔ.” ᐃᓔᓴᐅᑉ ᑭᐅᕚ, “ᐊᑕᓂᖅ ᐃᓅᖕᒪᑦ, ᐃᕝᕕᓪᓗ ᐃᓅᓂᕐᓂ, ᕿᒪᖕᓂᐊᓐᖏᓚᒋᑦ.” ᑕᕝᕙ ᑕᒪᕐᒥᒃ ᐱᓱᖃᑎᒌᓕᕐᐴᒃ.

⁷ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦᑕ ᐃᓚᖏᑦ 50ᑎᐅᓪᓗᑎᒃ ᒪᓕᒃᐳᑦ ᐅᖓᓯᒡᓗᑎᒃ ᓵᓐᖓᓪᓗᑎᒃ ᑖᒃᑯᖕᓄᖓ, ᐃᓔᑦᔭᐅᑉ ᐃᓔᓴᐅᓪᓗ ᓇᔪᕐᑕᖓᑦᑕ ᑰᑉ ᔪᐊᕐᑕᓂᐅᑉ ᓯᓈᓄᐊᕐᓗᑎᒃ ᓄᖅᑲᕐᐳᑦ.

⁸ ᐃᓔᑦᔭᐅᑉ ᐅᓕᓂ ᐲᕐᐹ, ᐃᒧᓚᐅᕐᓗᒍ, ᐃᒪᖅ ᑖᑦᓱᒧᖓ ᑏᒐᕐᐹ, ᑎᒐᕐᒪᒍᓗ ᐃᒪᖅ ᐊᕙᒻᒧᑦ ᐃᕐᐸᕐᐳᖅ, ᐃᕐᐸᕐᒪᑦ ᑖᒃᑯᐊᒃ ᐃᒤᕐᓯᓐᓂᖓᒍᑦ ᓴᓗᐊᖓᔪᒃᑯᑦ ᑰᑉ ᐊᑭᐊᓄᑦ ᐃᑳᕐᐴᒃ.

⁹ ᐃᑳᕇᕋᒥᒃ, ᐃᓔᑦᔭᐅᑉ ᐃᓔᓴ ᐊᐱᕆᕚ, “ᐅᖃᐅᑎᔪᓐᓇᕐᐱᖔ ᓱᓇᒥᒃ ᐱᑦᔪᑦᔭᐅᔪᒪᖕᒪᖔᕐᐱᑦ ᐃᓕᖕᓂᒃ ᕿᒤᑎᑕᐅᓚᐅᖏᓐᓂᓐᓂ?” ᐃᓔᓴᐅᑉ ᑭᐅᕚ, “ᑭᖑᕐᖑᑦᔨᔪᒪᔪᖓ ᐊᓂᕐᓂᕐᐲᑦ ᒪᕐᕈᐃᕐᑐᓪᓗᐊᕐᓗᓂ ᓇᔫᑎᓂᖓᓂᒃ.”

¹⁰ ᐃᓔᑦᔭᐅᑉ ᑭᐅᕚ, “ᐱᔭᕐᓂᖏᑦᑐᒥᒃ ᐱᔪᒪᔭᕐᓂᒃ ᐅᖃᐅᑎᕙᕐᒪ, ᑍᒤᒃᑲᓗᐊᕐᑎᓪᓗᒍ ᑕᐅᑐᒍᓐᓇᕐᓂᐊᕈᕕᖓ ᐊᐅᓪᓚᕈᑦᔭᐅᓕᕐᑎᓪᓗᖓ ᐃᓕᖕᓂᑦ, ᐱᔪᒪᔧᑦ ᐱᓂᐊᕐᐸᑦ, ᑕᐅᑐᒍᓐᓇᖏᒃᑯᕕᖓᓕ, ᐱᓂᐊᓐᖏᓔᑦ.”

¹¹ ᓱᓕ ᐱᓱᒃᓗᑎᒃ ᐅᖃᖃᑎᒌᒃᑎᓪᓗᒋᒃ, ᑕᑯᒋᑦ, ᓴᖅᑭᑦᑐᖃᑳᓪᓚᒃᐳᖅ ᕿᒧᒃᓯᐅᑎᒥᒃ ᐊᒃᓴᓗᐊᓕᖕᒥᒃ ᐃᑯᐊᓚᔪᒥᒃ ᕿᒻᒥᕐᔪᐊᕐᑕᖏᓪᓗ ᐃᑯᐊᓚᔪᑦ ᐊᖅᑯᓵᕐᒪᒋᒡᓗ ᑖᑦᓱᒧᖓ ᐊᕕᑎᑕᐅᕘᒃ. ᐃᓔᑦᔭᓗ ᕿᓚᓕᐊᕈᑦᔭᐅᕗᖅ ᐅᓚᓗᔨᕋᕐᒧᑦ.

¹² ᐃᓔᓴᐅᓪᓗ ᑕᑯᒐᒥᐅᒃ ᓂᐱᖅᑯᕐᑐᓪᓗᓂ ᕾᒐᓛᕐᐳᖅ, “ᐊᑖᑖᒃ! ᐊᑖᑖᒃ! ᐃᓴᕆᐊᓕᒥᐅᑦ ᕿᒧᒃᓯᐅᑎᖏᑦ ᕿᒻᒥᕐᔪᐊᒦᑦᑐᖁᑎᖓᓗ!” ᐃᓔᓴᐅᓪᓗ ᑕᑯᒃᑲᓐᓂᕈᓐᓃᕐᐹ, ᐊᓐᓄᕌᓂ ᓇᖕᒥᓂᖅ ᐊᑐᕐᑕᓂ ᐊᓕᒃᐹ ᒪᕐᕉᓕᓪᓗᒍ.

¹³ ᐃᓔᑦᔭᐅᑉ ᐅᓕᓂ ᑲᑍᓐᓂᕐᒪᒍ ᑎᒍᓪᓗᒍ ᐅᑎᓕᕐᐳᖅ. ᔫᑕᓂ ᑎᑭᓐᓇᒥᐅᒃ ᑰᑉ ᓯᓈᓂ ᓇᖏᓕᕐᐳᖅ.

¹⁴ ᐅᓕᒃ ᑲᑍᕋᑖᕐᑕᖓ ᑎᒍᓪᓗᓂᐅᒃ ᑖᑦᓱᒧᖓ ᐃᒪᖅ ᑏᒐᕐᐹ, ᐅᖃᕐᓗᓂᓗ, “ᓇᐅᒡᓕ ᑍᒪ ᐊᑕᓂᖅ ᐃᓔᑦᔭᐅᑉ ᒎᑎᖓ?” ᐃᓔᓴᐅᑉ ᐃᒪᖅ ᑏᒐᕐᒪᒍ ᐃᒪᖅ ᐊᕙᒻᒧᑦ ᐃᕐᐸᕐᐳᖅ, ᐃᓔᓴᓗ ᐃᑳᕐᐳᖅ.

¹⁵ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᔨᕆᑯᒥᑦ ᐱᓯᒪᔪᑦ ᑕᐅᑐᒃᑲᒥᒃ ᐅᖃᓕᕐᐳᑦ, “ᐊᓂᕐᓂᖅ ᐃᓔᑦᔭᒦᓚᐅᕐᑐᖅ ᐃᓔᓴᒦᓕᕐᐳᖅ.” ᐹᕆᐊᕐᑐᕐᓗᓂᑦᔪᒃ ᓵᖓᓄᐊᕐᓗᑎᒃ ᒪᓂᖅᑲᒧᑦ ᐹᒻᒪᒡᕕᒋᕚᑦ.

¹⁶ ᑖᒃᑯᐊ ᐅᖃᕐᐳᑦ ᐃᓔᓴᒧᑦ, “ᑕᑯᒋᑦ, ᐱᔪᓐᓇᑦᓯᐊᕐᑐᓂᒃ 50ᓂᒃ ᐊᖑᑎᖁᑎᖃᕋᑦᑕ ᐊᖓᔪᖅᑳᕐᓂᒃ ᕿᓂᕆᐊᕈᓐᓇᕐᐳᑦ, ᐊᑕᓂᐅᑉ ᐊᓂᕐᓂᖓᑕ ᐱᒐᒥᐅᒃ ᓇᒧᑦ ᖃᖅᑲᐅᑉ ᖄᖓᓄᑦ ᓇᕐᓴᒧᓪᓘᓐᓃᑦ ᑲᑕᒃᑎᑕᕕᓂᕆᑐᐃᓐᓇᕆᐊᖃᕐᒪᒍ.” ᐃᓔᓴᐅᑉ ᑭᐅᕔᑦ, “ᕿᓂᕆᐊᕐᑎᓐᖏᓪᓗᒋᑦ.”

¹⁷ ᐊᔪᐃᓐᓈᕆᓕᕐᒪᑦᔪᒃ, ᐃᓔᓴ ᑲᓐᖑᓲᑎᑐᐃᓐᓇᓕᕋᒥ ᐅᖃᐅᑎᓕᕐᐰᑦ, “ᐊᑏ, ᕿᓂᕆᐊᓕᕐᓕᑦ.” ᐊᓱᐃᓛᒃ ᐊᖑᑎᓂᒃ 50ᓂᒃ ᕿᓂᕆᐊᕐᑎᑦᓯᕗᑦ ᐅᓪᓗᓂᒃ ᐱᖓᓱᓂᒃ ᕿᓈᔭᕋᓗᐊᕋᒥᒃ ᓇᓂᓐᖏᓛᑦ.

¹⁸ ᐃᓔᓴᒧᑦ ᐅᑎᕐᒪᑕ, ᔨᕆᑯᒦᑎᓪᓗᒍ ᐅᖃᐅᑎᕔᑦ, “ᕿᓂᕆᐊᖁᓇᓯ ᐅᖃᐅᑎᓚᐅᕋᓗᐊᕐᐸᑦᓯ!”

ᐃᓔᓴᐅᑉ ᑲᒪᓇᕐᑎᑦᓯᓂᖓ

¹⁹ ᐃᓔᓴ ᐊᖑᑎᓄᑦ ᔨᕆᑯᒥᐅᓄᑦ ᐅᐸᒃᑕᐅᕗᖅ ᐅᖃᕐᓗᑎᒡᓗ, “ᑕᑯᒋᑦ, ᓄᓇᕗᑦ ᓄᓇᑦᓯᐊᕚᓘᒐᓗᐊᕐᓗᓂ ᑭᓯᐊᓂ ᐃᒪᑦᑕ ᐱᐅᖏᓐᓂᑯᖓᓄᑦ ᕿᑐᕐᖓᒃᓴᕆᔭᐅᔪᑦ ᐃᓅᔪᓐᓇᖃᑦᑕᖏᒻᒪᑕ.”

²⁰ ᑕᕝᕙ ᐃᓔᓴᐅᑉ ᐅᖃᐅᑎᕔᑦ, “ᒪᒃᑲᐅᔭᑯᓗᖕᒥᒃ ᓄᑖᒥᒃ ᑕᕆᐅᕐᒥᒃ ᐃᓗᓪᓕᕐᓗᒍ ᕾᑦᓯᓚᐅᕆᑦᓯ.” ᐃᓔᓴᐅᑉ ᑍᒤᓕᖕᒪᒋᑦ ᑐᓂᓯᕕᐅᕗᖅ.

²¹ ᑕᕝᕙ ᑰᒐᓛᒧᑦ ᐂᕗᖅ ᓄᓇᐅᑉ ᐃᓗᐊᓂᑦ ᑰᒃᑐᒧᑦ ᑕᕆᐅᕐᓗ ᑰᒐᓛᒧᑦ ᑲᑕᒐᕐᑎᑉᐹ, ᐅᖃᕐᓗᓂᓗ, “ᐃᒫᒃ ᐊᑕᓂᖅ ᐅᖃᕐᐳᖅ, ᐃᒪᖅ ᑕᒪᓐᓇ ᐃᒪᑦᓯᐊᕙᓐᖑᕐᑎᑉᐸᕋ ᑐᖁᑎᑦᓯᖃᑦᑕᒃᑲᓐᓂᕐᓂᐊᕈᓐᓃᕐᐳᖅ ᓄᓇᒥᒡᓗ ᐱᕈᕕᐅᔪᓐᓁᓕᑎᑦᓯᕙᒍᓐᓃᕐᓗᓂ.”

²² ᐅᓪᓗᒥᒧᑦ ᑎᑭᓪᓗᒍ ᐃᒪᖓᑦ ᐃᒪᑦᓯᐊᕙᐅᖏᓐᓇᓕᕐᐳᖅ ᐃᓔᓴᐅᑉ ᐅᖃᐅᓯᕆᔭᖏᑦ ᒪᓕᒡᓗᒋᑦ.

²³ ᑕᕝᕙᓐᖓᑦ ᐱᓪᓗᓂ ᐃᓔᓴ ᐱᑎᓕᒧᐊᕐᐳᖅ ᐊᖅᑯᑎᒃᑯᑦ ᐃᓄᑑᓪᓗᓂ ᐱᓱᒃᑎᓪᓗᒍ, ᓄᓇᓕᖕᓂ ᐃᓅᓱᒃᑐᓄᑦ ᐅᐸᒃᑕᐅᓪᓗᓂ ᒥᑕᐅᑎᒋᔭᐅᓕᕐᐳᖅ ᐅᖃᐅᑦᔪᕈᓘᔭᕐᑕᐅᓪᓗᓂᓗ, ᐅᖃᕐᓗᑎᒃ, “ᒥᖅᑯᐃᕐᓯᓂᓖᒃ ᐊᕗᓐᖓᓕᕆᑦ, ᐊᕗᓐᖓᓚᐅᕆᑦ ᒥᖅᑯᐃᕐᓯᓐᓂᓖᒃ!”

²⁴ ᓵᕝᕕᒋᓪᓗᓂᒋᑦ, ᐊᑦᑕᕆᓇᒋᑦ ᓱᐊᒃᐰᑦ ᐊᑕᓂᐅᑉ ᐊᑎᖓᓂ ᖃᓄᐃᓕᔭᐅᖁᓪᓗᓂᒋᑦ. ᑕᕝᕙ ᐊᒃᓵᖕᓂᒃ ᒪᕐᕉᖕᓂᒃ ᓇᐹᕐᑐᓂᑦ ᓴᖅᑭᑦᑐᖃᕐᓗᓂ ᑖᒃᑯᐊ ᐃᓅᓱᒃᑐᑦ 42ᖑᔪᑦ ᑕᒪᕐᒥᒃ ᐅᒋᐊᕐᑕᐅᕗᑦ.

²⁵ ᑕᕝᕙᓐᖓᓪᓗ ᖃᖅᑲᒧᐊᕐᐳᖅ ᑳᕐᒥᐊᓕᒧᑦ, ᑭᖑᓂᖓᒍᓪᓗ ᓴᒥᐊᕆᐊᒧᑦ ᐅᑎᕆᕗᖅ.