ᐊᑕᓃᑦ ᐂᑉᐸᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦᕼᐃᓯᑬᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ ᑯᕉᓂᑲ ᐂᑉᐸᖏᑦ 29:1-2 ; 31:1 1 ᕼᐆᓯᐊᑉ ᐄᓚᑉ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ ᐱᖓᔪᒋᓕᕐᑕᖓᓂ ᕼᐃᓯᑬᐊ ᐂᕼᐊᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᔫᑕᒧᑦ. 2 ᐊᕐᕌᒍᖃᓕᕐᓗᓂ 25ᓂᒃ ᐊᖓᔪᖅᑳᕐᔪᐊᓚᐅᕐᐳᖅ ᔨᕉᓴᓕᒥ ᐊᕐᕌᒍᓂᒃ 29ᓂᒃ. ᐊᓈᓇᖃᓚᐅᕐᐳᖅ ᐊᐰᒥᒃ ᓴᑲᕅᐊᐅᑉ ᐸᓂᖓᓂᒃ. 3 ᐊᑕᓂᐅᑉ ᓵᖓᓂ ᓈᒻᒪᒋᔭᐅᔪᒥᒃ ᐱᐅᓯᖃᓚᐅᕐᐳᖅ, ᓯᕗᓕᕕᓂᕐᒥ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᓕᖅᑯᓯᕆᓚᐅᕐᑕᖓᓂᒃ ᒪᓕᒃᑲᒥ. 4 ᒎᑎᓐᖑᐊᓄᑦ ᑐᒃᓯᐊᕐᕕᐅᖃᑦᑕᕐᑐᓕᒫᑦ ᐲᔭᓚᐅᕐᐰᑦ, ᒎᑎᓐᖑᐊᓕᐊᕆᔭᐅᓯᒪᔪᓪᓗ ᐅᔭᕅᑦ ᐅᕐᕉᕋᕐᑎᓚᐅᕐᐰᑦ, ᒎᑎᓐᖑᐊᕆᔭᐅᕐᓗ ᐊᓯᕋᒥᒃ ᑍᔭᐅᔪᖅ ᓯᖁᒥᑉᐹ. ᒨᓯᓯᐅᓪᓗ ᖁᒡᓗᒋᐊᓐᖑᐊᖅ ᑲᓐᓄᔭᖅ ᓇᑉᐸᐅᑎᓚᐅᕐᓯᒪᔭᖓ ᓯᖁᑦᑎᕐᑕᐅᑎᓪᓗᒍ, ᐊᑎᖃᕐᑎᑕᐅᓚᐅᕐᑐᖅ ᓂᕼᐅᓯᑕᓐᒥᒃ; ᑍᑦᓱᒪᓂᐅᑎᓪᓗᒍ ᐃᑯᐊᓪᓚᑦᓯᓪᓗᑎᒃ ᐳᔫᕐᑎᑦᓯᓂᒃᑯᑦ ᑐᒃᓯᐊᕐᕕᐅᖃᑦᑕᓕᓚᐅᕐᒪᑦ ᐅᐱᒍᓲᑎᐅᓪᓗᓂ. 5 ᐊᖓᔪᖅᑳᕐᔪᐊᖅ ᕼᐃᓯᑬᐊ ᐊᑕᓂᕐᒥᒃ ᑕᑎᖃᑦᓯᐊᓚᐅᕐᐳᖅ ᐃᓴᕆᐊᓕᒥᐅᑦ ᒎᑎᖓᓐᓂᒃ; ᔫᑕᐅᓪᓗ ᐊᖓᔪᖅᑳᕐᔪᐊᕆᖃᑦᑕᕐᓯᒪᔭᖏᓐᓂᒃ ᐊᑦᔨᒋᔭᐅᓚᐅᓐᖏᓚᖅ, ᓯᕗᓕᕆᓯᒪᑦᔭᖏᓐᓄᑦ ᑭᖑᓂᖓᒍᓪᓗ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᓄᑦ. 6 ᐊᑕᓂᕐᒥᒃ ᑕᑎᖃᑦᓯᐊᓚᐅᕐᒪᑦ ᓈᓚᑦᓯᐊᖏᓐᓇᕐᓗᓂᓗ; ᒪᓕᑦᓯᐊᓚᐅᕐᐳᕐᓗ ᐊᑕᓂᐅᑉ ᐱᖁᔭᖏᓐᓂᒃ ᒨᓯᓯᒃᑯᑦ ᑐᓂᑦᔪᑎᒋᓚᐅᕐᑕᖏᓐᓂᒃ. 7 ᐊᑕᓂᐅᑉ ᓇᔪᓚᐅᕐᐹ; ᐱᓂᐊᕐᓂᓕᒫᒥᒍᓪᓗ ᐱᔪᓐᓇᓯᐊᓚᐅᕐᐳᖅ ᐱᓇᓱᐊᕐᑕᒥᓂᒃ. ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᓚᓕᐅᕐᓯᓚᐅᓐᖏᓚᖅ ᓈᒻᒪᒋᓇᒍᓗ ᐱᐅᓯᕆᔭᖓ ᑐᓂᓯᒪᕕᒋᔪᒪᓚᐅᓐᖏᓛ. 8 ᐱᓕᔅᑍᓂᒥᐅᑦ ᓵᓚᒋᓚᐅᕐᐰᑦ ᓄᓇᓕᖁᑎᖏᓪᓗ ᑎᕐᓕᓈᕐᓗᒋᑦ ᐊᓯᕈᕐᐰᑦ ᓄᓇᓕᖁᑎᖏᑕ ᒥᑭᓐᓂᕐᐹᖏᓐᓂᑦ ᐊᖏᓂᕐᐹᖏᑦ ᑎᑭᓪᓗᒋᑦ, ᒑᓴ ᑎᑭᓪᓗᒍ ᓄᓁᓪᓗ ᖃᓂᒋᔮᓃᑦᑐᑦ ᐱᖃᓯᐅᑎᓪᓗᒋᑦ. 9 ᕼᐃᓯᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ ᓯᑕᒪᖓᓐᓂ, ᐊᖓᔪᖅᑳᕐᔪᐊᑉ ᕼᐆᓯᐊᑉ ᐄᓚᐅᑉ ᐃᕐᓂᖓᑕ ᐊᐅᓚᑦᓯᓂᖓᑕ ᐃᓴᕆᐊᓕᓂᒃ ᐊᕐᕌᒍᐃᑦ 7ᒋᓕᕐᑕᖓᓐᓂ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓵᓪᒪᓃᓴ ᐃᓴᕆᐊᐊᓕᓂᒃ ᐊᕙᑕᖏᕐᓯᓯᒪᓪᓗᓂ ᐊᔪᓕᕐᑎᑦᓯᓯᒪᓕᓚᐅᕐᐳᖅ ᓴᒥᐊᕆᐊᒥᐅᓂᒃ. 10 ᐊᕐᕌᒍᐃᑦ ᐊᔪᓕᕐᑎᑕᐅᓯᒪᓂᖏᑦᑕ ᐱᖓᔪᒋᓕᕐᑕᖓᓂ ᓴᒥᐊᕆᐊ ᑎᒍᔭᐅᓕᓚᐅᕐᐳᖅ ᓵᓚᐅᒐᒥ ᐊᓯᕆᐊᒥᐅᓄᑦ. ᑕᒪᓐᓇ ᑍᒤᓚᐅᕐᐳᖅ ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐊᐅᓚᑦᓯᓂᖓᑕ 6ᖓᓐᓂ, ᕼᐆᓯᐊᓪᓗ ᐊᐅᓚᑦᓯᓂᖓᑕ 9ᒋᓕᕐᑕᖓᓐᓂ ᓴᒥᐊᕆᐊ ᓵᓚᒋᔭᐅᓚᐅᕐᐳᖅ. 11 ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑦ ᑎᒍᓪᓗᓂᒋᑦ ᐊᐅᓪᓚᕈᑎᕔᑦ ᐊᓯᕆᐊᒧᑦ ᓄᓇᓕᖁᑎᒥᓗ ᐃᓚᖏᓐᓄᑦ ᓄᓇᑖᕐᑐᕐᑎᓪᓗᓂᒋᑦ, ᐃᓚᖏᑦ ᕼᐋᓚᒥᐅᓂ, ᐃᓚᖏᑦ ᑰᑉ ᕼᐂᐸᒥᒃ ᑍᔭᐅᔪᑉ ᖃᓂᒋᔭᖓᓂ ᓄᓇᓕᖕᓂ ᐊᑎᖃᕐᑐᓂ ᒎᔭᓂᒥᒃ, ᐃᓚᖏᓪᓗ ᐃᒡᓗᒐᓴᒡᔪᐊᓂ ᒥᑏᔅᒥᒃ ᑍᔭᐅᔪᓂ. 12 ᐊᑕᓂᕐᒥᒃ ᒎᑎᒥᒃᑕ ᓂᐱᖓᓂᒃ ᓈᓚᓚᐅᖏᒻᒪᑕ, ᐊᖏᖃᑎᒌᒍᑎᒋᓯᒪᔭᒥᖕᓂᒃ ᓯᖁᒥᑦᓯᓚᐅᕐᒪᑕ, ᐱᖁᔭᓕᒫᓂᒃ ᒨᓯᓯᒃᑯᑦ ᑐᓂᔭᐅᓚᐅᕐᑐᓂᒃ ᐊᑕᓂᐅᑉ ᐱᔨᖓᒍᑦ; ᓈᓚᒍᓐᓃᓚᐅᕐᒪᑕ ᐊᑕᓂᐅᑉ ᓂᐱᖓᓂᒃ ᒪᓕᒐᑎᒡᓗ ᐱᖁᔭᖏᓐᓂᒃ. ᐊᓯᕆᐊᒥᐅᑦ ᓵᓚᖃᕋᓱᐊᕐᓂᖓᑦ ᔨᕉᓴᓕᒻᒥᒃ ᑯᕉᓂᑲ ᐂᑉᐸᖏᑦ 32:1-19 ; ᐂᓮᐊᓯ 36:1-22 13 ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐊᐅᓚᑦᓯᓂᖓᑕ ᐊᕐᕌᒍᖏᑕ 14ᖓᓐᓂ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓯᓇᑯᕆᐅᑉ, ᔫᑕᐅᑉ ᐃᒡᓗᒐᓴᒡᔪᐊᖏᓐᓂᒃ ᐱᔭᐅᑦᔧᕐᓯᒪᔫᒐᓗᐊᓂᒃ ᐅᓇᑖᕆᐊᕋᒥ ᓵᓚᒋᕔᑦ. 14 ᐊᖓᔪᖅᑳᕐᔪᐊᖅ ᕼᐃᓯᑬᐊ ᐅᖃᐅᑦᔭᐅᔭᕐᑐᕐᑎᑦᓯᕗᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᓚᑮᓯᒦᑦᑐᒥᒃ ᓯᓇᑯᕆᑉᒥᒃ, “ᑕᒻᒪᕐᓯᒪᓐᓂᕋᒪ; ᐅᓇᑕᕐᑕᐅᔪᒪᔪᓐᓃᕐᐳᒍᑦ, ᐊᑭᓕᐅᑕᐅᖁᔭᕐᓂᒃ ᐊᑭᓖᓂᐊᕐᐳᒍᑦ.” ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑭᐅᓚᐅᕐᐳᖅ 300ᓂᒃ ᓯᐅᓪᕕᕆᓂᒃ ᐱᑎᑕᐅᔪᒪᓪᓗᓂ 30ᓂᒡᓗ ᒎᓗᓂᒃ. 15 ᕼᐃᓯᑬᐊᐅᑉ ᐊᐅᓪᓚᕐᑎᑦᓯᕕᒋᕚ ᓯᐅᓪᕕᕆᓕᒫᓂᒃ ᓇᒡᕚᕈᓐᓇᕐᑕᒥᓂᒃ ᑐᒃᓯᐊᕐᕕᒡᔪᐊᒥᑦ, ᒎᓗᓂᒡᓗ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᑭᑐᔪᒃᓴᔭᓂᒃ ᐱᒃᑯᕕᖓᓃᑦᑐᓕᒫᓂᒃ. 16 ᕼᐃᓯᑬᐊᐅᑉ ᐊᑕᓂᐅᑉ ᐃᒡᓗᖓᑕ ᐅᒃᑯᐊᖏᑕ ᒎᓘᓂᓕᒪᖏᑦ ᐲᔭᓚᐅᕆᕔᑦ ᐅᒃᑯᐊᖃᕐᕕᖓᑕᓗ ᓴᓂᕌᓂ ᓇᐸᔪᖏᒃᑕ ᒎᓘᓂᓕᒫᖏᑦ ᐲᔭᖃᓯᐅᑎᓪᓗᒋᑦ ᐊᐅᓪᓚᕐᑎᑉᐰᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ. 17 ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑎᓕᓯᕗᖅ ᐅᓇᑕᕐᑎᖁᑎᒥᓂᒃ ᐅᓄᕐᑐᓂᒃ ᓚᑮᓯᒥᑦ, ᐅᐸᒍᑎᑎᓪᓗᓂᒋᑦ ᐊᖓᔪᖅᑳᕐᔪᐊᕐᒥᒃ ᕼᐃᓯᑬᐊᒥᒃ ᔨᕉᓴᓕᒦᑦᑐᒥᒃ, ᑖᒃᑯᐊ ᐅᓇᑕᕐᑎᒐᓮᑦ ᐊᖓᔪᖅᑳᒻᒪᕆᐅᓂᕐᐹᓄᑦ ᐅᐸᒃᑕᐅᕗᑦ. ᔨᕉᓴᓕᒧᑦ ᑎᑭᐅᑎᒐᒥᒃ, ᐊᓐᓄᕌᓕᐅᕐᑏᑦ ᐱᓇᓱᐊᕆᐊᕐᕕᖓᑕ ᐊᖅᑯᑎᖓᓄᐊᕐᓗᑎᒃ ᓄᖅᑲᕐᐳᑦ ᑕᓯᓕᐊᕆᔭᐅᓯᒪᔪᑦ ᑰᓕᐅᕐᑕᓯᒪᓂᖏᑕ ᓴᓂᐊᒎᕐᑐᒃᑯᑦ. 18 ᐊᖓᔪᖅᑳᕐᔪᐊᑉ ᕼᐃᓯᑬᐊ ᐂᔭᐅᖁᕚᑦ ᑕᑯᔪᒪᓪᓗᒍ, ᐊᖓᔪᖅᑳᖁᑎᖏᑦ ᐱᖓᓱᑦ ᕾᕗᑦ, ᐃᓔᐊᑭᒻ ᕼᐃᓪᑬᐊᐅᑉ ᐃᕐᓂᖓ, ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᑲᒪᔨᒻᒪᕆᐅᔪᖅ, ᓯᑉᓇᓗ ᐊᖓᔪᖅᑳᕐᔪᐊᑉ ᐃᖅᑲᕐᑐᐃᔨᖏᑕ ᑲᒪᔨᒻᒪᕆᖓᑦ, ᔪᐊᓗ ᐊᓴᐸᐅᑉ ᐃᕐᓂᖓ ᐊᖓᔪᖅᑳᕐᔪᐊᑉ ᑎᑎᕋᕐᑎᖏᑕ ᑲᒪᔨᒻᒪᕆᖓ. 19 ᐊᓯᕆᐊᒥᐅᑦ ᐊᖓᔪᖅᑳᖁᑎᖓᑦᑕ ᑎᑭᓯᒪᔪᑦ ᐃᓚᖓᑦ ᐅᖃᕐᐳᖅ, “ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑐᑭᓯᔪᒪᓂᕋᕐᓗᓂᐅᒃ ᓱᒧᑦ ᐊᖓᔪᖅᑳᕐᔪᐊᖅ ᕼᐃᓯᑬᐊ ᐱᔪᓐᓇᕋᓱᒋᓕᕐᒪᖔᑦ. 20 ᐃᓱᒪᒐᓗᐊᕐᐳᑎᑦ ᐃᓱᒪᒃᓴᕐᓯᐅᑦᓯᐊᕐᓗᑎᑦ ᐱᓇᓱᐊᕐᓂᕋᕐᓗᑎᑦ ᐱᔪᓐᓇᑦᓯᐊᕐᓂᕋᕐᓗᑎᓪᓗ ᐅᓇᑕᐅᑎᑎᒍᑦ ᑭᓯᐊᓂ ᑕᒪᒃᑯᐊ ᐅᖃᐅᓯᑐᐃᓐᓇᐅᕗᑦ ᐱᓂᐊᕐᓂᕐᑕᖃᕋᑎᒃ, ᑭᓇᒥᒃ ᐃᑲᔪᕐᑎᒃᓴᕐᑖᕋᕕᑦ? ᐅᕙᑦᑎᓐᓂᒃ ᐊᑭᕋᕐᑐᕋᓱᒃᐲᑦ? 21 ᐄᑦᔨᑉᑎᒥᐅᓂᒃ ᐃᑲᔪᕐᑎᖃᕐᓂᐊᕋᓱᒋᒐᓗᐊᕐᑐᑎᑦ ᓱᓪᓗᓕᖕᒥᒃ ᐊᔭᐅᑉᐱᐊᖃᕋᓱᐊᕐᑐᑎᑐᑦ ᑍᒤᓐᓂᐊᕐᐳᑎᑦ ᓇᑲᑉᐸᑦ ᐊᒡᒐᑎᑦ ᑲᐱᓂᐊᕐᐳᑦ. ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᑍᒫᒃ ᐱᐅᓯᖃᕐᒪᑦ ᑕᑎᒋᔭᐅᓇᓱᐊᓕᕌᖓᒥ.” 22 ᓱᓕ ᐅᖃᕐᓗᓂ, “ᐅᕝᕙᓗ ᐅᖃᐅᑎᓂᐊᕐᐱᖓ ᐊᑕᓂᕐᒥᒃ ᒎᑎᑦᓯᓐᓂᒃ ᑕᑎᒃᓴᖃᕐᓂᕋᕐᓗᑎᑦ? ᐊᖓᔪᖅᑳᕐᔪᐊᖅ ᕼᐃᓯᑬᐊ ᐲᔧᓚᐅᓐᖏᓛᖅ ᐊᑕᓂᕐᒧᑦ ᑐᒃᓯᐊᕐᕕᐅᕙᒃᑐᓂᒃ, ᔫᑕᒥᐅᑦ ᔨᕉᓴᓕᒥᐅᓪᓗ ᐅᖃᐅᑎᓪᓗᓂᒋᑦ ᔨᕉᓴᓕᒻ ᑐᓂᕐᕈᓯᕐᕕᖁᑎᖓᓂ ᑭᓯᐊᓂ ᑐᒃᓯᐊᖃᑦᑕᕐᓂᐊᓕᕐᓂᕋᕐᓗᓂᒋᑦ? 23 ᐊᖏᖃᑎᒌᒍᑎᓕᐅᕈᓐᓇᕐᐳᖓ ᐊᓯᕆᐊᒥ ᐊᖓᔪᖅᑳᕐᔪᐊᑦᑕ ᐊᑎᖓᓂ, ᕿᒻᒥᕐᔪᐊᓂᒃ 2000ᓂᒃ ᑐᓂᔪᓐᓇᕐᐸᒋᑦ ᑍᒫᓪᓗᐊᖅ ᐅᓄᕐᑎᒋᔪᓂᒃ ᐊᖑᑎᓯᐊᕈᓐᓇᕈᕕᑦ ᑖᒃᑯᓇᓂ ᐃᑭᒪᔪᓐᓇᕋᔭᕐᑐᓂᒃ. 24 ᐊᖓᔪᖅᑳᕐᔪᐊᖑᒐᓗᐊᕐᓗᑎᑦ ᐊᖓᔪᖅᑳᑦᑕ ᐱᔨᖏᑕ ᐱᔪᓐᓇᖏᓐᓂᕐᐹᖓᓂᒡᓘᓐᓃᑦ ᓇᓪᓕᐅᒻᒪᑎᖏᓐᓇᕕᑦ, ᓱᓕ ᓂᕆᐅᒐᓱᐊᕐᐳᑎᑦ ᐄᑦᔨᑉᑎᒥᐅᓄᑦ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᓂᒡᓗ ᐱᑎᑕᐅᓂᐊᕋᓱᒋᓪᓗᑎᑦ. 25 ᓄᓇᑦᓯᓐᓂᒃ ᐅᓇᑕᕐᓂᒃᑯᑦ ᓵᓚᖃᕐᓯᒪᓇᓱᒋᖏᓐᓇᑦᑎᒍᑦ ᐊᑕᓂᐅᑉ ᐱᔪᓐᓇᕐᑎᑦᓯᓂᖓᒍᑦ ᑭᓯᐊᓂ? ᐊᑕᓂᕐᒧᑦ ᐅᖃᐅᑎᔭᐅᓯᒪᓂᕗᑦ ᒪᓕᒡᓗᒍ ᓄᓇᖁᑎᑦᓯᓐᓂᒃ ᐊᓯᕈᐃᔭᕐᑐᓚᐅᕐᐳᒍᑦ.” 26 ᑕᕝᕙ ᐃᓔᐊᑭᒻ ᕼᐃᓪᑬᐊᐅᑉ ᐃᕐᓂᖓᑕ, ᓯᑉᓇᓗ, ᔪᐊᓗ, ᕌᑉᓴᑭ ᐅᖃᐅᑎᕚᑦ, “ᐊᕋᒤᑎᑐᑦ ᐅᕙᑦᑎᓐᓄᑦ ᐅᖃᓪᓚᒋᐊᖃᕐᐳᓯ ᑐᑭᓯᐊᒐᑦᑎᒍ; ᕼᐄᐳᕉᑎᑐᑦ ᐅᖃᓪᓚᖏᓪᓗᓯ ᒪᑯᐊ ᐃᓄᐃᑦ ᑐᑭᓯᐊᖕᒪᑕ ᐅᖃᓪᓚᒃᑕᑦᓯᓐᓂᒃ.” 27 ᕌᑉᓴᑭᐅᓪᓕ ᑭᐅᕔᑦ, “ᐃᓕᑦᓯᓐᓄᑦ ᐊᖓᔪᖅᑳᓯᓗ ᐊᖓᔪᖅᑳᑦᑎᓐᓄᑦ ᑕᒪᒃᑯᓂᖓ ᐅᖃᐅᓯᒃᓴᖃᕐᕕᐅᔪᑑᓇᓱᒋᕕᓰ? ᐊᖓᔪᖅᑳᒪ ᐅᖃᐅᑦᔨᖁᓚᐅᕐᐹᖓ ᐃᓄᖁᑎᓕᒫᑦᓯᐊᓯ ᑐᓴᖁᓪᓗᒋᑦ ᑕᒪᒃᑯᓂᖓ, ᐃᓕᑦᓯᑐᑦᑕᐅᖅ ᐊᓇᕐᒥᖕᓂᒃ ᓂᕆᔭᕆᐊᖃᕐᓂᐊᕐᒪᑕ ᐃᑎᕈᒥᖕᓂᒡᓗ ᐃᒥᕐᓗᑎᒃ.” 28 ᑕᕝᕙ ᐊᖓᔪᖅᑳᖅ ᓂᐱᖅᑯᕐᑐᓪᓗᓂ ᕼᐄᐳᕉᑎᑐᑦ ᐅᖃᕐᐳᖅ, “ᓈᓚᒃᓯᐅᒃ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᓯᖏᑦ! 29 ᐊᖓᔪᖅᑳᕐᔪᐊᖅ ᖃᐅᔨᒪᖁᔨᕗᖅ; ‘ᐊᖓᔪᖅᑳᕐᔪᐊᑦᓯᓐᓄᑦ ᕼᐃᓯᑬᐊᒧᑦ ᓴᒡᓗᕿᑕᐅᓯᒪᖁᓇᓯ, ᑖᑦᓱᒧᖓ ᓴᐳᑎᔭᐅᔪᓐᓇᕐᓂᐊᖏᓐᓇᑦᓯ ᐅᕙᓐᓂᑦ. 30 ᕼᐃᓯᑬᐊᐅᓪᓗ ᐊᑕᓂᕐᒥᒃ ᑕᑎᖃᖁᔨᓂᖓ ᐅᒃᐱᕆᓕᕐᑍᓕᓯᐅᑦ, ᐊᑕᓂᕐᒧᑦ ᐱᐅᓕᔭᐅᓂᐊᕋᓱᒋᓗᓯ ᐃᓱᒪᖃᕆᐊᖃᖏᓐᓇᑦᓯ, ᐊᓯᕆᐊᒥᐅᑦ ᐅᓇᑕᕐᑎᖁᑎᖏᑦ ᐊᑕᓂᐅᑉ ᓄᖅᑲᕐᑎᓐᓂᐊᖏᒻᒪᒋᑦ ᓵᓚᖃᖁᓇᒋᑦ ᐃᓕᑦᓯᓐᓂᒃ.’ 31 ᕼᐃᓯᑬᐊ ᓈᓚᒃᑍᓕᓯᐅᒃ; ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐃᒡᓗᒐᓴᖕᓂᑦ ᐊᓂᑐᐃᓐᓇᖁᕚᓯ ᖁᓄᖏᓪᓗᓯ: ‘ᑕᕝᕙ ᐸᐅᕐᖓᓂᒃ ᕔᓂᒃᓴᓂᒃ ᓇᖕᒥᓂᖅ ᐱᕈᕐᓰᕕᖁᑎᑦᓯᓐᓂᑦ ᓂᕆᔪᓐᓇᕐᑎᑕᐅᓂᐊᕐᐳᓯ, ᓇᐹᕐᑐᖁᑎᑦᓯᓗ ᐱᕈᕐᑐᖏᓐᓂᒃ ᓂᕿᖃᕈᓐᓇᕐᓗᓯ, ᐃᒥᕐᑕᕐᕕᖁᑎᑦᓯᓐᓂᓪᓗ ᐃᒥᖃᕈᓐᓇᕐᓗᓯ. 32 ᐊᖓᔪᖅᑳᕐᔪᐊᑦᑕ ᓄᓇᑖᕐᑎᓐᓂᐊᕐᐹᓯ ᓄᓇᑦᓯᑐᑦ ᑍᒫᒃ ᐊᔪᕐᓴᕐᓇᖏᑦᑐᒥᒃ ᐸᐅᕐᖓᓂᒃ ᐱᕈᕐᓰᕕᒃᓴᕐᑕᖃᑦᓯᐊᕐᑐᒥᒃ, ᓂᐊᖂᔭᒃᓴᓂᒡᓗ ᐱᕈᕐᑐᖃᑦᓯᐊᕐᑐᒥᒃ ᓇᐹᕐᑐᖃᕐᓗᓂᓗ ᐅᕐᓱᒃᓴᓕᖕᓂᒃ ᕼᐊᓂᖃᑦᓯᐊᕐᓗᓂᓗ, ᐊᖓᔪᖅᑳᕐᔪᐊᑦᑕ ᐱᔪᒪᔭᖓ ᒪᓕᒡᓗᒍ ᐊᖏᕐᓂᐊᕈᑦᓯ ᑐᖁᕋᕐᑕᐅᖏᓪᓗᓯ ᐃᓅᑎᑕᐅᓂᐊᕐᐳᓯ. ᕼᐃᓯᑬᐊᒧᑦ ᓯᓔᕐᕆᔭᐅᑦᑍᓕᒋᑦᓯ ᐊᑕᓂᕐᒧᑦ ᓴᐳᑎᔭᐅᓂᐊᕐᓂᕅᓂᖓᓄᑦ. 33 ᖃᐅᔨᓚᐅᕐᓯᒪᕕᓯ? ᐃᓅᖃᑎᒌᒡᔪᐊᓂᒃ ᒎᑎᒥᖕᓄᑦ ᓴᐳᑎᔭᐅᔪᓂᒃ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐱᔪᓐᓇᕐᓂᖓᓂᑦ? 34 ᓇᐅᒃ ᑍᒪ ᕼᐊᒫᑎᒃᑯᑦ ᐋᕐᐹᒃᑯᓪᓗ ᒎᑎᖓᑦ? ᓇᐅᒃᑍᒪ ᓯᑉᕼᐊᕋᕔᒻᑯᑦ, ᕼᐄᓇᒃᑯᑦ, ᐂᐅᐊᒃᑯᓪᓗ ᒎᑎᖏᑦ, ᓴᒥᐊᕆᐊᕐᒥᐅᓪᓗ ᓴᐳᑎᔭᐅᔪᑦ ᖃᐅᔨᓚᐅᕐᐱᓯᐅᒃ? 35 ᖃᖓ ᑖᒃᑯᐊ ᓄᓇᓖᑦ ᒎᑎᒥᖕᓄᑦ ᓴᐳᑎᔭᐅᑎᓪᓗᒋᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐱᔪᓐᓇᕐᓂᖓᓂᑦ ᖃᐅᔨᓚᐅᕐᓯᒪᕕᓯᐅᒃ? ᑕᒪᒃᑯᐊ ᑍᒤᑉᐸᑕ ᖃᓄᐃᒻᒪᑦ ᔨᕉᓴᓕᒻ ᓴᐳᑎᔭᐅᔪᓐᓇᕋᓱᒋᕕᓯᐅᒃ ᐊᑕᓂᕐᒧᑦ?’” 36 ᐃᓄᐃᑦ ᑐᓵᔪᑦ ᓂᓪᓕᕐᑐᖃᓚᐅᓐᖏᓚᑦ, ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᑍᒫᒃ ᐱᖁᓚᐅᕐᒪᒋᑦ ᑭᐅᒪᓇᓱᐊᕐᑐᖃᖁᓇᒍ. 37 ᑕᕝᕙ ᐃᓔᐊᑭᒻ ᕼᐃᓪᑬᐊᐅᑉ ᐃᕐᓂᖓ, ᐊᖓᔪᖅᑳᕐᔪᐊᑉ ᐃᒡᓗᖓᓂ ᑲᒪᔨᒻᒪᕆᐅᔪᖅ, ᓯᑉᓇᓗ ᐊᖓᔪᖅᑳᕐᔪᐊᑉ ᐃᖅᑲᕐᑐᐃᕕᖓᓂ ᑎᑎᕋᕐᑎᒻᒪᕆᐅᔪᖅ ᔪᐊᓗ ᐊᓴᐸᐅᑉ ᐃᕐᓂᖓ ᕼᐃᓯᑬᐊᒧᐊᕐᐳᑦ, ᐊᓐᓄᕌᒥᖕᓂᒃ ᐊᓕᒃᓯᓯᒪᓪᓗᑎᒃ, ᐅᓂᒃᑳᕐᕕᒋᓪᓗᒍᓗ ᕋᑉᓴᑭᐅᑉ ᐅᖃᐅᓯᕆᔭᖏᓐᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society