ᐊᑕᓃᑦ ᐂᑉᐸᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐆᓯᐊᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ

¹ ᐊᖓᔪᖅᑳᕐᔪᐊᑉ ᐂᕼᐊᓯᐅᑉ ᐊᐅᓚᑦᓯᓂᖓᑕ ᔫᑕᒥ ᐊᕐᕌᒍᐃᑦ 12ᖓᓂ, ᕼᐆᓯᐊ ᐄᓚᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥᐅᓄᑦ. ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 9ᓂᒃ ᓴᒥᐊᕆᐊᒥ.

² ᐊᑕᓂᐅᓪᓗ ᓵᖓᓂ ᐊᔪᕐᑐᓕᓚᐅᕐᐳᖅ, ᓯᕗᓂᖓᓂ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᓂᑦ ᐊᔪᕐᑐᓕᓂᕐᒥ ᐃᓅᓇᓱᐊᑐᐃᓐᓇᖏᓐᓂᕐᓴᐅᒐᓗᐊᕐᓗᓂ.

³ ᓵᓪᒪᓃᓴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᓕᓚᐅᕐᐳᖅ ᑖᑦᓱᒧᖓ; ᐊᖓᔪᖅᑳᕐᔪᐊᖅ ᕼᐆᓯᐊ ᓵᓚᐅᒐᒥ, ᐊᑭᓕᕐᓱᐃᖃᑦᑕᕆᐊᖃᓕᓚᐅᕐᐳᖅ ᐊᕐᕌᒍᑕᒫᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓄᑦ.

⁴ ᐊᕐᕌᒍᐃᑦ ᐃᓚᖓᓐᓂ ᕼᐆᓯᐊ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓲᒥᒃ ᐊᑎᓕᖕᒧᑦ ᐃᑲᔪᕐᑕᐅᔪᒪᑦᔪᑎᓕᐅᕐᐳᖅ ᐃᔨᕋᕐᑐᕐᓗᓂ, ᐊᓯᕆᐊᒥᐅᓄᑦ ᐊᑭᓕᕐᑐᐃᓂᕆᕙᒃᑕᓂ ᐊᕐᕌᒍᑕᒫᑦ ᓄᖅᑲᕐᑎᓪᓗᓂᐅᑉ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᓵᒪᓃᓴᐅᑉ ᑕᒪᓐᓇ ᖃᐅᔨᒐᒥᐅᒃ ᕼᐆᓯᐊ ᑎᒍᔭᐅᑎᓪᓗᒍ ᐊᓄᓪᓚᒃᓰᕕᖕᒧᑦ ᐴᕐᑕᐅᑎᑉᐹ.

ᓴᒥᐊᕆᐊᒥᐅᑉ ᓵᓚᒋᔭᐅᓂᖓᑦ

⁵ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑦ ᓄᓇᓕᒫᖓ ᓵᓚᒋᓪᓗᒍ ᑎᒍᓚᐅᕐᐹ, ᓴᒥᕆᐊᒥᐅᓪᓗ ᐃᒡᓗᒐᓴᒡᔪᐊᖏᑦ ᐊᕙᑕᖏᕐᓗᒋᑦ ᐊᔪᓕᕐᑎᓯᒪᓚᐅᕐᐰᑦ ᐊᕐᕌᒍᓂᒃ ᐱᖓᓱᓂᒃ.

⁶ ᕼᐆᓯᐊ ᐊᕐᕌᒍᓂᒃ 9ᓂᒃ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᓴᒥᐊᕆᐊᒥᐅᑦ ᓵᓚᒋᒐᒥᒋᑦ ᑎᒍᓚᐅᕐᐰᑦ ᐃᓄᖏᑦ ᐊᐅᓪᓚᕈᑎᓪᓗᓂᒋᑦ ᓄᓇᑖᕐᑎᑉᐰᑦ ᐊᓯᕆᐊᑉ ᓄᓇᓕᖏᑦᑕ ᐃᓚᖏᓐᓂ ᕼᐋᓚᒥᒃ, ᐃᓚᖏᓪᓗ ᕼᐂᐸᒥ ᑰᑉ ᓯᓈᓃᑦᑐᒥ ᒎᔭᓂᐅᑉ ᓄᓇᖓᓂ, ᐃᓚᖏᓪᓗ ᒥᑏᔅᒥᐅᑦ ᐃᒡᓗᒐᓴᖏᓐᓂ.

⁷ ᓴᒥᐊᕆᐊᒥᐅᑦ ᓵᓚᐅᓚᐅᕐᐳᑦ ᐊᔪᕐᑐᓕᓚᐅᕋᒥᒃ ᐊᑕᓂᕐᒧᑦ ᒎᑎᒥᖕᓄᑦ, ᓴᐳᑦᔨᔨᒋᓚᐅᕐᑕᒥᓂᒃ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓂᑦ ᐰᕉᒥᑦ, ᐊᐅᓪᓚᕐᑎᑦᓯᔨᒋᓚᐅᕐᑕᒥᖕᓂᓪᓗ ᐄᑦᔨᑉᑎᒥᐅᑦ ᓄᓇᖓᓐᓂᑦ, ᒎᑎᓐᖑᐊᓄᑦ ᑐᒃᓯᐊᖔᖃᑦᑕᓕᕐᓗᑎᒃ.

⁸ ᒪᓕᓕᕐᓗᑎᒃ ᓄᓁᑦ ᑎᑭᑕᖏᑕ ᐃᓄᖏᓐᓄᑦ ᐃᓕᖅᑯᓯᕆᔭᐅᓚᐅᕐᑐᓂᒃ ᒎᑎᐅᑉ ᓯᖏᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᑕ ᐃᓕᖅᑯᓯᕐᑖᕆᔭᐅᑎᓯᒪᔭᖏᓐᓄᑦ.

⁹ ᐃᓴᕆᐊᓕᒥᐅᑦ ᐱᓂᐊᓚᐅᕐᒪᑕ ᐊᑕᓂᐅᑉ ᓈᒻᒪᒋᓐᖏᑕᖏᓐᓂᒃ ᐃᔨᕋᕐᑐᕐᓗᑎᒃ. ᐃᒡᓗᒐᓴᒡᔪᐊᖁᑎᓕᒫᒥᖕᓂᒃ ᒎᑎᓐᖑᐊᒥᖕᓄᑦ ᑐᒃᓯᐊᕐᕕᒃᑕᖃᕐᑎᑦᓯᓚᐅᕐᒪᑕ, ᐃᒡᓗᒐᓴᖏᓐᓂᑦ ᒥᑭᓐᓂᕐᐹᓂᑦ ᐃᒡᓗᒐᓴᒡᔪᐊᑦ ᐊᖏᓂᕐᐹᑦ ᑎᑭᓪᓗᒋᑦ.

¹⁰ ᒎᑎᓐᖑᐊᓕᐊᕆᓯᒪᔪᓂᒃ ᓇᑉᐰᓯᒪᓚᐅᕐᐳᑦ ᐱᖑᐃᑦ ᐳᕐᑐᓂᓕᒫᖏᓐᓂ, ᓇᐹᕐᑐᐃᓪᓗ ᐊᑖᓐᓂ ᒎᑎᓐᖑᐊᑉ ᐊᓯᕋᐅᑉ ᐊᑦᔨᖏᓐᓂᒃ.

¹¹ ᑐᓂᕐᕈᓯᕐᕕᖕᓂ ᒎᑎᓐᖑᐊᓄᑦ ᐃᑯᐊᓚᑎᑦᓯᕗᑦ ᐴᔪᕐᑎᑦᓯᓪᓗᑎᒡᓗ, ᐃᓅᖃᑎᒌᒡᔪᐊᓄᑦ ᒎᑎᐅᑉ ᓯᖏᑕᐅᑎᓚᐅᕐᑕᖏᑕ ᐃᓴᕆᐊᓕᒥᐅᓄᑦ ᐃᓕᖅᑯᓯᕕᓂᖏᓐᓂᒃ ᐊᑐᕐᓗᑎᒃ. ᐊᑕᓂᐅᑉ ᓂᓐᖓᒍᑎᒃᓴᖏᓐᓂᒃ ᐱᓂᐊᕐᓂᖃᓚᐅᕐᐳᑦ ᓈᒻᒪᒋᓐᖏᑕᖏᓐᓂᒃ ᐱᓇᓱᐊᕐᓂᕐᒥᖕᓄᑦ.

¹² ᐊᑕᓂᐅᓪᓗ ᐱᖁᔭᖓᓂᒃ ᑍᒤᓕᐅᓂᕐᒧᑦ ᓯᖁᒥᑦᓯᓚᐅᕐᐳᑦ, ᐅᖃᐅᑎᓯᒪᓚᐅᕐᒪᒋᑦ, ᒎᑎᓐᖑᐊᓄᑦ ᑐᒃᓯᐊᕐᕕᖃᕐᑐᒃᓴᐅᖏᓐᓂᖏᓐᓂᒃ.

¹³ ᐊᑕᓂᐅᑉ ᐅᖃᕐᑎᓂ ᑎᓕᕙᓚᐅᕋᓗᐊᕐᐰ ᐃᖅᑬᑎᑦᓯᔭᕐᑐᕐᑎᓪᓗᓂᒋᑦ ᐃᓴᕆᐊᓕᒥᐅᓂᒃ ᔫᑕᒥᐅᓂᒡᓗ, ᐅᖃᕐᓗᓂ, ᐃᓕᖅᑯᓯᕆᔭᓯ ᓈᒻᒪᖏᑦᑐᑦ ᕿᒪᒡᓗᒋᑦ ᐱᖁᔭᒃᑲ ᒪᓕᒐᒃᓴᕆᕙᓯ ᓯᕗᓕᕕᓂᑦᓯᓐᓄᑦ ᑐᓂᔭᐅᑎᓚᐅᕐᑕᒃᑲ ᒪᓕᒃᑕᐅᖁᓪᓗᒋᑦ ᐃᓕᑦᓯᓐᓄᑦᑕᐅᖅ ᐅᖃᐅᓯᕆᔭᐅᑎᓯᒪᔭᒃᑲ ᒪᓕᒃᑕᐅᖁᓪᓗᒋᑦ ᐱᔨᒋᔭᒃᑲ ᐅᖃᕐᑎᖁᑎᒃᑲᓗ ᐊᖅᑯᑎᒋᓪᓗᒋᑦ.

¹⁴ ᓈᓚᒍᒪᓚᐅᓐᖏᓚᓪᓕ, ᓯᕗᓕᕕᓂᖏᑕ ᓯᑎᔫᓂᕆᓚᐅᕐᑕᖏᑎᑐᑦ ᑍᒤᓐᓇᒥᒃ, ᐅᒃᐱᕈᓱᓚᐅᓐᖏᓚᑦ ᐊᑕᓂᕐᒥᒃ ᒎᑎᒥᖕᓂᒃ.

¹⁵ ᒪᓕᒃᑕᐅᖁᔭᖏᓐᓂᒃ ᒪᓕᒍᒪᓚᐅᓐᖏᓚᑦ ᓯᕗᓕᕕᓂᖏᑕ ᒎᑎᒥᒃ ᐊᖏᖃᑎᒌᒍᑎᓕᐅᕐᓯᒪᓂᖏᓐᓂᒃ ᑲᔪᓯᑎᑦᓯᓚᐅᓐᖏᓚᑦ, ᐃᓂᕐᑎᕆᑦᔪᑎᖏᓪᓗ ᓈᓚᓚᐅᓐᖏᓔᑦ. ᑐᒃᓯᐊᕐᕕᖃᖔᓕᕐᓗᑎᒃ ᒎᑎᓐᖑᐊᓂᒃ ᓱᓕᖏᑦᑐᓂᒃ ᓇᖕᒥᓂᖅ ᓱᓕᔪᓐᓃᕐᑎᓚᐅᕐᐳᑦ, ᐃᓅᖃᑎᒌᒡᔪᐊᓂᒃ ᐊᑕᓂᕐᒥᒃ ᐅᒃᐱᕆᔭᖃᖏᑦᑐᓂᒃ ᒪᓕᖃᑕᐅᑐᐃᓐᓇᓕᕐᓗᑎᒃ, ᐊᑕᓂᐅᑉ ᒪᓕᒃᑕᐅᖁᓚᐅᓐᖏᑕᖏᓐᓂᒃ.

¹⁶ ᐊᑕᓂᐅᑉ ᒎᑎᖓᑦᑕ ᐱᖁᔭᖏᓐᓂᒃ ᒪᓕᒍᓐᓁᓚᐅᕐᐳᑦ, ᓴᓇᓚᐅᕐᐳᑦ ᒪᕐᕉᖕᓂᒃ ᑐᒃᑐᕙᓐᖑᐊᖕᓂᒃ ᑐᒃᓯᐊᕐᕕᒋᔭᒃᓴᒥᖕᓂᒃ, ᓴᓇᓚᐅᕆᕗᑦ ᐊᕐᓇᐅᑉ ᒎᑎᓐᖑᐊᑉ ᐊᓯᕋᐅᑉ ᐊᑦᔨᖓᓂᒃ ᓴᓇᓐᖑᐊᕐᓯᒪᔪᒥᒃ, ᐅᓪᓗᕆᐊᓄᓪᓗ ᑐᒃᓯᐊᕐᐸᒃᑭᓪᓗᑎᒃ ᒪᓕᒐᖃᕐᓗᑎᒡᓗ ᒎᑎᓐᖑᐊᒥᒃ ᐰᓕᒥᒃ.

¹⁷ ᐃᑯᐊᓚᑎᓪᓗᒍ ᑐᓂᕐᕈᓯᕐᕕᖕᓂ ᑐᓂᕐᕈᓯᖃᑦᑕᓚᐅᕐᐳᑦ ᐃᕐᓂᕐᒥᖕᓂᒃ ᐸᓂᖕᒥᖕᓂᒡᓗ, ᐊᖓᒃᑯᓂᒡᓗ ᑕᑎᖃᖃᑦᑕᕐᓗᑎᒃ ᐃᒻᒥᖕᓂᒃ ᑐᓂᓯᒪᓂᖃᓚᐅᕐᐳᑦ ᐱᐅᖏᑦᑐᓂᒃ ᐱᓂᐊᕐᓂᐅᔪᓄᑦ ᐊᑕᓂᐅᑉ ᓵᖓᓂ ᓂᓐᖓᒍᑎᒋᔪᓐᓇᕐᑕᖏᓐᓂᒃ.

¹⁸ ᐊᑕᓂᐅᑉ ᐃᓴᕆᐊᓕᒥᐅᑦ ᓂᓐᖓᒡᕕᒋᓚᐅᕐᐰᑦ ᓇᔪᕈᒪᔪᓐᓃᕐᓗᓂᒋᓪᓗ, ᔫᑕᐅᑉ ᑭᖑᕚᖏᑦ ᐃᓚᓕᐅᕐᓯᒪᔭᑐᐊᕆᓕᕐᓗᓂᒋᑦ.

¹⁹ ᔫᑕᒥᐅᑦᑕᐅᖅ ᒪᓕᑦᓯᐊᕐᓗᑎᒃ ᐃᓅᓚᐅᓐᖏᓚ ᐊᑕᓂᐅᑉ ᒎᑎᖓᑦᑕ ᒪᓕᒃᑕᐅᖁᔭᖏᓐᓂᒃ, ᒪᓕᖃᑕᐅᓯᑐᐃᓐᓇᕐᓂᑰᖕᒥᒐᒥᒃ ᐃᓴᕆᐊᓕᒥᐅᑦ ᐃᓕᖅᑯᓯᕐᑖᕆᓯᒪᔭᖏᓐᓂᒃ.

²⁰ ᐊᑕᓂᐅᑉ ᐃᓴᕆᐊᓕᐅᑉ ᑭᖑᕚᓕᒫᖏᑦ ᖁᔭᓈᓚᐅᕐᐰᑦ, ᐅᖁᒤᒃᓴᕐᓇᕐᑐᓂᒃ ᐊᑑᑎᑎᓚᐅᕐᐰᑦ ᐊᑭᕋᕐᑐᕐᑎᖏᓐᓄᑦ ᓇᒡᓕᓂᖃᖏᑦᑐᓄᑦ ᐱᓇᓱᐊᕐᕕᐅᑎᓪᓗᓂᒋᑦ ᐃᓚᒋᔪᒪᔪᓐᓃᓚᐅᕐᐰᑦ.

²¹ ᐊᑕᓂᐅᑉ ᐊᕕᑎᓯᒪᓕᕐᒪᒋᑦ ᐃᓴᕆᐊᓕᒥᐅᑉ ᔫᑕᒥᐅᓪᓗ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕐᑖᕐᐳᑦ ᔨᕆᐳᐊᒻᒥᒃ ᓂᐹᑎᐅᑉ ᐃᕐᓂᖓᓂᒃ, ᔨᕈᐳᐊᒻ ᐃᓴᕆᐊᓕᒥᐅᑉ ᐊᑕᓂᕐᒥᒃ ᕿᒤᑎᒋᐊᓪᓚᑐᐃᓐᓇᓚᐅᕐᐰᑦ ᐊᔪᕐᑐᓕᓂᕐᒥ ᐃᓅᓯᖃᕐᑎᓪᓗᓂᒋᑦ.

²² ᐃᓴᕆᐊᓕᒥᐅᑉ ᔨᕈᐳᐊᒻ ᐊᔪᕐᑐᓕᑦᔪᑎᖏᓐᓂᒃ ᒪᓕᑐᐃᓐᓇᓚᐅᕐᐳᑦ, ᖃᕿᐊᓕᕈᒪᓇᑎᒡᓗ.

²³ ᐊᑕᓂᐅᑉ ᓇᔪᕈᒪᔪᓐᓃᓚᐅᕐᐰᑦ, ᐅᖃᕐᑎᒥᒍᑦ ᖃᐅᔨᑎᒋᐊᕐᓗᓂᒋᑦ ᐅᖃᐅᑎᕙᓚᐅᕋᓗᐊᕐᓗᓂᒋᑦ. ᐃᓴᕆᐊᓕᒥᐅᑦ ᓄᓇᒥᖕᓂᑦ ᐊᐅᓪᓚᕈᑦᔭᐅᓚᐅᕐᐳᑦ ᐊᓯᕆᐊᒧᐊᕐᑎᑕᐅᓪᓗᑎᒃ ᑕᕝᕙᓂᓗ ᓄᓇᖃᓕᕐᓗᑎᒃ ᐅᓪᓗᒥᒧᑦ.

ᐊᓯᕆᐊᒥᐅᑦ ᓄᓇᑖᕐᓂᖓᑦ ᐃᓴᕆᐊᓕᒥ

²⁴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓄᓇᖁᑎᒥᓂᑦ ᐹᐱᓘᓂᒥᐅᑦ, ᑰᓴᕼᐊᒥᐅᑦ, ᐊᕙᒥᐅᑦ, ᕼᐊᒫᑎᒥᐅᑦ, ᓯᑉᕼᐊᕋᕔᓐᒥᐅᓪᓗ ᓄᓇᑖᕐᑎᑉᐰᑦ ᓴᒥᐊᕆᐊᒥ ᐃᓴᕆᐊᓕᒥᐅᑦ ᐊᐅᓪᓚᕈᑎᓚᐅᕐᑕᓂ ᑖᒃᑯᓄᖓ ᐃᓇᖏᕐᑕᐅᑎᓪᓗᓂᒋᑦ ᓄᓇᖁᑎᑖᕐᑐᕐᑎᑉᐰᑦ ᓄᓇᒋᓂᐊᓕᕐᓗᒋᑦ.

²⁵ ᓄᓇᑖᕐᐸᓪᓕᐊᓕᕐᑎᓪᓗᒋᑦ, ᐊᑕᓂᕐᒥᒃ ᐅᐱᒋᔭᖃᖏᒻᒪᑕ, ᒎᑎᐅᑉ ᐃᓚᖏᑦ ᐅᒋᐊᕐᑕᐅᑎᑉᐰᑦ ᓛᔭᓄᑦ ᐃᓔᓐᓇᕋᓗᐊᖏᑦ ᑐᖁᑕᐅᓚᐅᕐᐳᑦ.

²⁶ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᔭᐅᕗᖅ, “ᐃᓅᖃᑎᒌᒡᔪᐊᑦ ᓴᒥᐊᕆᐊᒧᑦ ᓄᓇᑖᕐᑎᓚᐅᕐᑕᑎᑦ ᓄᓇᐅᑉ ᑕᐅᕙᑦᓱᒪ ᒎᑎᖓᑦᑕ ᐱᖁᔭᖏᓐᓂᒃ ᖃᐅᔨᒪᖏᒻᒪᑕ ᒎᑎᐅᑉ ᓛᔭᓄᑦ ᐹᔭᕐᑕᐅᑎᓪᓗᒋᑦ ᐃᓚᖏᑦ ᑐᖁᕋᕐᑕᐅᓯᒪᓕᕐᐳᑦ.”

²⁷ ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ, ᑐᓂᕐᕈᓯᕐᑎᑦᓯᔩᑦ ᐃᓚᖓᓐᓂᒃ ᑕᐅᕗᖓ ᐊᐅᓪᓛᖁᔨᓕᕐᐳᖅ ᑎᒍᔭᐅᖃᑕᐅᓚᐅᕐᑐᑦ ᐃᓚᖏᓐᓂᑦ, ᐊᔪᕆᕐᑐᐃᖁᓪᓗᒍ ᐃᓄᖕᓂᒃ ᓄᓇᒋᓕᕐᑕᖓᑦᑕ ᒎᑎᖓᑕ ᐱᖁᔭᖏᓐᓂᒃ.

²⁸ ᐃᓴᕆᐊᓕᒥᐅᑦ ᑐᓂᕐᕈᓯᕐᑎᑦᓯᔨᖓᑦᑕ ᐃᓚᖓᑦ ᐊᐅᓪᓚᕈᑦᔭᐅᖃᑕᐅᓂᑯ ᓴᒥᐊᕆᐊᒥᑦ ᐱᑎᓕᒥ ᓄᓇᑖᕐᑎᑕᐅᕗᖅ, ᐃᓄᖕᓂᒡᓗ ᐊᔪᕆᕐᑐᐃᓕᕐᓗᓂ ᖃᓄᖅ ᐊᑕᓂᕐᒥᒃ ᐅᐱᒋᔭᖃᕆᐊᖃᕐᓂᖏᓐᓂᒃ.

²⁹ ᐃᓅᖃᑎᒌᒡᔪᐊᑦ ᓴᒥᐊᕆᐊᒧᑦ ᓄᓇᑖᕐᑐᕕᓃᑦ ᓇᖕᒥᓂᖅ ᒎᑎᓐᖑᐊᕆᔭᒥᖕᓂᒃ ᓴᓇᖃᑦᑕᑐᐃᓐᓇᓚᐅᕐᐳᑦ, ᐃᓂᖃᕐᑎᓪᓗᒋᓪᓗ ᓴᒥᐊᕆᐊᒥᐅᑦ ᒎᑎᓐᖑᐊᓄᑦ ᑐᒃᓯᐊᕐᕕᒋᖃᑦᑕᕐᑕᕕᓂᖏᓐᓂ, ᐃᓅᖃᑎᒌᒡᔪᐊᓕᒫᓪᓗ ᓄᓇᒋᔭᒥᖕᓂ ᒎᑎᓐᖑᐊᖃᕐᕕᖕᒥᖕᓂᒃ ᐊᖅᑭᒃᓯᓯᒪᔪᐃᓐᓇᐅᓚᐅᕐᐳᑦ.

³⁰ ᐹᐱᓘᓂᒥᐅᑦ ᒎᑎᓐᖑᐊᖃᓚᐅᕐᐳᑦ ᑍᔭᒥᖕᓂᒃ ᓴᑰᑎ-ᐱᓈᔅ; ᑰᓵᒥᐅᑦ ᒎᑎᓐᖑᐊᖃᓚᐅᕐᐳᑦ ᐊᑎᖃᕐᑎᑕᒥᖕᓂᒃ ᓂᕐᒐᐅᓪᒥᒃ, ᕼᐊᒫᑎᒥᐅᑦ ᒎᑎᓐᖑᐊᖃᓚᐅᕐᐳᑦ ᐊᑎᖃᕐᑎᑕᒥᖕᓂᒃ ᐊᓰᒪᒥᒃ.

³¹ ᐊᐅᐃᒥᐅᑉ ᒎᑎᓐᖑᐊᖃᓚᐅᕐᐳᑦ ᑍᔭᒥᖕᓂᒃ ᓂᑉᕼᐋᑦᔨᒥᒃ ᑖᕐᑖᒡᒥᒡᓗ; ᓯᑉᕼᐊᕋᕔᑎᒥᐅᑉ ᕿᑐᕐᖓᒥᖕᓂᒃ ᑐᓂᕐᕈᓯᖃᑦᑕᓚᐅᕐᐳᑦ ᐃᑯᐊᓪᓚᑎᓪᓗᒍ ᑐᓂᕐᕈᓯᕐᕕᖕᓂ ᒎᑎᓐᖑᐊᒥᖕᓄᑦ ᐋᑕᕆᒥᓚᒃ-ᒧᑦ ᐋᓇᒥᓕᒃᒧᓪᓗ.

³² ᑖᒃᑯᐊ ᑐᒃᓯᐊᕐᐸᒃᑲᓗᐊᕐᓗᑎᒃ ᐊᑕᓂᕐᒧᑦ, ᓂᕈᐊᕐᓯᓯᒪᖃᑦᑕᓚᐅᕐᐳᑦ ᑐᓂᕐᕈᓯᕐᑎᑦᓯᔨᐅᖁᔭᒥᖕᓂᒃ ᐃᓄᑐᐃᓐᓇᕐᓂᑦ ᐱᓯᒪᔪᓂᒃ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᓂ ᑐᓂᕐᕈᓯᕐᑎᑦᓯᔨᐅᓂᐊᕐᑐᓂᒃ ᑐᒃᓯᐊᓕᕌᖓᑕ.

³³ ᐊᑕᓂᕐᒧᑦ ᑐᒃᓯᐊᖃᑦᑕᕋᓗᐊᕐᓗᑎᒃ ᒎᑎᓐᖑᐊᕆᔭᒥᖕᓄᓪᓕ ᑐᒃᓯᐊᖃᑦᑍᓐᓇᓚᐅᕐᐳᑦ, ᐃᓅᖃᑎᒌᒡᔪᐊᑦ ᓄᓇᑐᖃᓖᑦ ᐱᐅᓯᑐᖃᖏᑦ ᒪᓕᒡᓗᒋᑦ.

³⁴ ᑍᒫᒡᓗ ᐅᓪᓗᒥ ᑎᑭᓪᓗᒍ ᐱᐅᓯᑐᖃᕐᒥᖕᓂᒃ ᒪᓖᓐᓇᓚᐅᕐᐳᑦ. ᐊᑕᓂᕐᒥᒃ ᑐᒃᓯᐊᕐᕕᖃᕈᒪᓚᐅᓐᖏᓚᑦ ᐱᖁᔭᖏᓐᓂᒡᓗ ᒪᓕᒍᒪᓇᑎᒃ ᔧᑰᑉ ᑭᖑᕚᖏᓐᓄᑦ ᒪᓕᒃᑕᐅᖁᓚᐅᕐᑕᖏᓐᓂᒃ, ᑍᓕᓚᐅᕐᑕᖓᓂᒃ ᐃᓴᕆᐊᓕᒥᒃ.

³⁵ ᐊᑕᓂᐅᑉ ᐊᖏᖃᑎᒌᖕᓂᕐᒥᒃ ᐋᖅᑭᒃᓯᖃᑎᒋᓚᐅᕐᒪᒋᑦ ᐅᖃᐅᑎᓪᓗᓂᒋᓪᓗ: “ᒎᑎᒥᒃ ᐊᓯᓐᓂᒃ ᑐᒃᓯᐊᕐᕕᖃᕐᑐᒃᓴᐅᓐᖏᓚᓯ, ᐹᒻᒪᒃᑎᕐᕕᒋᓗᒋᑦ ᐱᔨᑦᓯᕐᑕᒃᓴᕆᓐᖏᓚᓯ ᑐᓂᕐᕈᓯᕐᕕᒋᓇᒋᓪᓘᓐᓃᑦ.

³⁶ ᐊᑕᓂᖅ ᓯᕘᕋᒋᓯᐅᒃ, ᑖᑦᓱᒪ ᐊᐅᓪᓚᕐᑎᓚᐅᕐᒪᓯ ᐄᑦᔨᑉᑎᒥᑦ ᐱᔪᓐᓇᕐᓂᕐᔪᐊᒥᓄᑦ ᑕᓕᕐᒥᓄᓪᓗ ᐃᓵᖓᔫᖕᓄᑦ, ᑖᓐᓇ ᓯᕘᕋᒋᓯᐅᒃ, ᐹᒻᒪᒃᑎᕐᕕᒋᓯᐅᒃ ᑐᒃᓯᐊᕐᕕᒋᓗᒍᓗ, ᑖᑦᓱᒧᖓᓗ ᑐᓂᕐᕈᓯᕐᓗᓯ.

³⁷ ᒪᓕᑦᓯᐊᕋᓱᐊᕐᑐᒃᓴᐅᕗᓯ ᐱᐅᓯᐅᖁᔭᓐᓂᒃ, ᐱᓂᐊᕐᑕᐅᖁᔭᓐᓂᒡᓗ, ᐱᖁᔭᓕᐊᕆᓯᒪᔭᓐᓂᒡᓗ, ᒪᓕᒐᒃᓴᓕᐊᕆᓯᒪᔭᓐᓂᒡᓗ ᑎᑎᕋᕐᑕᐅᑎᓯᒪᔭᓐᓂᒃ, ᐊᓯᓐᓂᒃ ᒎᑎᖃᕋᓱᐊᕐᑐᒃᓴᐅᓐᖏᓚᓯ.

³⁸ ᐊᖏᖃᑎᒌᒍᑎᓕᐊᕆᓚᐅᕐᑕᕗᑦ ᐳᐃᒍᒐᒃᓴᕆᓐᖏᓚᓯ ᒎᑎᒋᔭᐅᔪᓂᒃ ᐊᓯᓐᓂᒃ ᐅᐱᒋᓗᒋᑦ ᑐᒃᓯᐊᕐᕕᖃᕐᑐᒃᓴᐅᓐᖏᓚᓯ.

³⁹ ᐃᒫᖔᕐᓕ ᐊᑕᓂᖅ ᒎᑎᓯ ᓯᕘᕋᒋᓗᒍ ᑐᒃᓯᐊᕐᕕᒋᔭᒃᓴᕆᕙᓯ, ᑖᑦᓱᒪ ᑕᕝᕙ ᐊᑭᕋᕐᑐᕐᑎᓕᒫᑦᓯᓐᓂᑦ ᐱᐅᓕᓂᐊᕐᐹᓯ.”

⁴⁰ ᑭᓯᐊᓂᓕ ᓈᓚᒍᒪᓚᐅᓐᖏᓚᑦ, ᑲᔪᓯᑐᐃᓐᓇᕐᓗᑎᒡᓗ ᐱᐅᓯᕆᔭᑐᖃᕐᒥᖕᓂᒃ.

⁴¹ ᑍᒤᒻᒪᑦ ᑖᒃᑯᐊ ᐃᓅᖃᑎᒌᒡᔪᐊᑦ ᐊᑕᓂᖅ ᓯᕘᕋᒋᓚᐅᕋᓗᐊᕐᐹᑦ, ᒎᑎᓐᖑᐊᒥᖕᓄᓪᓗ ᑐᒃᓯᐊᖃᑦᑕᓚᐅᕆᕗᑦ; ᑍᒫᒃᑕᐅᖅ ᐅᓪᓗᒥᒧᑦ ᑎᑭᓪᓗᒍ ᑭᖑᕚᖏᑦ, ᑭᖑᕚᖏᑕᓗ ᑭᖑᕚᖏᑦ ᑕᒪᑐᒥᖓ ᑲᔪᓯᒪᕕᖃᕐᐳᑦᑕᐅᖅ.