ᐊᑕᓃᑦ ᐂᑉᐸᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᕼᐋᓯᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ

¹ ᐊᖓᔪᖅᑳᕐᔪᐊᑉ ᐲᑲᐅᑉ ᕆᒪᓔᐊᐅᑉ ᐃᕐᓂᖓᑕ ᐊᐅᓚᑦᓯᓂᖓᑕ ᐃᓴᕆᐊᓕᒥᐅᓄᑦ ᐊᕐᕌᒍᐊᑕ 17ᖓᓐᓂ, ᐂᕼᐊᔅ ᔫᑕᒥᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᔫᑕᒧᑦ.

² ᐂᕼᐊᔅ ᐊᕐᕌᒍᖃᕐᓗᓂ 20ᓂᒃ ᔨᕉᓴᓕᒥᐅᓄᑦ ᐊᖓᔪᖅᑳᕐᔪᐊᕆᔭᐅᓕᓚᐅᕐᐳᖅ ᐊᕐᕌᒍᓂᒃ 16ᓂᒃ. ᐊᑕᓂᐅᑉ ᒎᑎᒥ ᓵᖓᓂ ᓈᒻᒪᒋᔭᐅᔪᒥᒃ ᐱᐅᓯᖃᓚᐅᓐᖏᓚᖅ, ᓯᕗᓕᕕᓂᕐᒥᓂᒡᓗ ᑍᕕᑎᒥᒃ ᒪᓕᓚᐅᕋᓂ.

³ ᐃᓴᕆᐊᓕᒥᐅᓪᓕ ᐊᖓᔪᖅᑳᕐᔪᐊᕆᖃᑦᑕᕐᓯᒪᔭᖏᑎᑐᑦ ᐃᓕᖅᑯᓯᖃᑐᐃᓐᓇᓚᐅᕆᕗᖅ ᐊᒡᓛᑦ ᐃᕐᓂᕐᒥᓂᒃ ᑐᓂᕐᕈᓯᓚᐅᕐᐳᖅ ᒎᑎᓐᖑᐊᓄᑦ. ᐊᑕᓂᐅᑉ ᓇᕐᕈᓇᕐᓂᕋᓚᐅᕐᑕᖏᑦ ᐃᓅᖃᑎᒌᒡᔪᐊᓄᑦ ᐊᑐᕐᑕᐅᑎᓪᓗᒋᑦ ᐃᓴᕆᐊᓕᒥᐅᓄᑦ ᓄᓁᕐᑕᐅᓚᐅᕐᑐᑦ ᐃᓄᖏᑕ ᐃᓕᖅᑯᓯᕕᓂᖏᑦ ᓄᓇᒋᔭᐅᖁᔭᐅᔪᒧᑦ ᑎᑭᑉᐸᓕᐊᑎᓪᓗᒋᑦ.

⁴ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᑦ ᐳᕐᑐᔪᓃᑦᑐᑦ ᓇᐹᕐᑐᐃᓪᓗ ᑐᖑᔪᕐᑐᓕᒫᑦ ᐊᑖᓂ ᐂᕼᐊᓯ ᑐᒃᓯᐊᖃᑕᐅᓚᐅᕐᐳᖅ ᑐᓂᕐᕈᓯᖃᑕᐅᖃᑦᑕᕐᓗᓂᓗ.

⁵ ᕆᔨᓐ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐲᑲᓗ ᕆᒪᓔᐊᐅᑉ ᐃᕐᓂᖓ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᑲᑐᑦᔨᓪᓗᑎᒃ ᐅᓇᑕᕆᐊᓚᐅᕐᐳᑦ ᔨᕉᓴᓕᒥᒃ ᐊᕙᓗᓯᒪᓕᕐᓗᒍᓗ ᐅᓇᑕᕐᑎᖁᑎᒥᓄᑦ, ᑭᓯᐊᓂᓕ ᓵᓚᖃᕈᓐᓇᐃᓕᓚᐅᕐᐳᑦ ᐂᕼᐊᔅᑯᓐᓂᒃ.

⁶ ᑍᑦᓱᒪᓂᐅᑎᓪᓗᒍᑦᑕᐅᖅ ᐄᑐᒥᒥᐅᑦ ᐊᖓᔪᖅᑳᕐᔪᐊᖓᑦ ᕆᔨᓐ ᐅᓇᑕᕐᓂᒃᑯᑦ ᓵᓚᖃᕐᓗᑎᒃ ᐃᓚᑎᒥᐅᓂᒃ ᑎᒍᓯᓚᐅᕐᐳᑦ, ᔫᑕᒥᐅᓪᓗ ᑕᕝᕙᓃᑦᑐᑦ ᕿᒫᓚᐅᕐᐳᑦ ᐃᓚᑎᒥᑦ, ᐄᑐᒥᒥᐅᓪᓗ ᑕᕝᕙᓂ ᓄᓇᑖᓚᐅᕐᐳᑦ, ᐅᓪᓗᒥᒧᑦ ᓱᓕ ᑖᓐᓇ ᓄᓇᒋᕚᑦ.

⁷ ᐂᕼᐊᔅ ᐅᖃᕆᐊᕐᑐᕐᑎᕐᓯᕗᖅ ᑎᒡᓚᑦ-ᐰᓕᓴᒧᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᒫᒃ ᐅᖃᐅᑦᔭᐅᖁᓪᓗᒍ: “ᑭᒡᒐᕆᒐᕕᖓ ᐃᕐᓂᕆᔭᐅᔪᑐᑦ ᐃᓕᖕᓄᑦ ᑍᒤᓐᓇᒪ, ᕾᓗᑎᑦ ᓴᐳᑎᔭᕐᑐᓚᐅᓐᖓ ᓯᕆᐊᒥᐅᑦ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᖕᓂᑦ ᐅᕙᓐᓂᒃ ᑖᒃᑯᐊᒃ ᑲᑐᑦᔨᓪᓗᑎᒃ ᐅᓇᑕᕆᐊᕐᓯᒪᖕᒪᑎᒃ.”

⁸ ᐂᕼᐊᔅ ᑲᑎᑦᓯᓪᓗᓂ ᓯᐅᓪᕕᕆᓂᒃ ᒎᓗᓂᒡᓗ ᐊᑕᓂᐅᑉ ᐃᒡᓗᖓᓂᑦ ᐊᖓᔪᖅᑳᕐᔪᐊᓪᓗ ᐃᒡᓗᒥᐅᑕᖏᓐᓂᒃ ᐃᓚᓐᓂᕐᓴᐅᑎᒋᓪᓗᒋᑦ ᑐᔫᑎᒋᕔᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ.

⁹ ᑎᒡᓚ-ᐰᓖᓴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐂᕼᐊᓯᐅᑉ ᐱᔪᒪᔭᖓ ᒪᓕᒡᓗᒍ ᐅᐸᒍᑎᕗᖅ ᐅᓇᑕᕐᑎᖁᑎᓂ ᐅᓇᑕᕆᐊᕐᑎᓪᓗᓂᒋᑦ ᑕᒫᓯᑰᓯᒥᒃ, ᓵᓚᖃᕐᓗᓂᓗ ᓄᓇᓖᑦ ᑎᒍᕔᑦ ᐊᖓᔪᖅᑳᕐᔪᐊᖅ ᕆᔨᓐ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑐᖁᑕᐅᑎᓪᓗᓂᐅᒃ ᐃᓄᖏᑦ ᑎᒍᓪᓗᓂᒋᑦ ᐊᐅᓪᓚᕈᑎᕔᑦ ᑭᕆᒥᐅᓄᑦ, ᑎᒍᓯᒪᓂᐊᓕᕐᓗᒋᑦ.

¹⁰ ᐂᕼᐊᔅ ᑕᒫᓯᑰᓯᒧᐊᕋᒥ ᑎᒡᓚᑦ-ᐰᓕᓴᒥᒃ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᑲᑎᓯᔭᕐᑐᕐᓗᓂ, ᑐᓂᕐᕈᓯᕐᕕᒃ ᑕᕝᕙᓃᑦᑐᖅ ᑕᑯᒐᒥᐅᒃ ᐊᑦᔨᖓᓂᒃ ᓴᓇᓐᖑᐊᕐᓯᒪᔪᒥᒃ ᐊᐅᓪᓚᕐᑎᑦᓯᕗᖅ ᑐᓂᕐᕈᓯᕐᑎᑦᓯᔨᒧᑦ ᔪᕅᐊᒧᑦ ᖃᓄᐃᓕᖓᓂᖓᓂᒃ ᓴᖅᑭᔮᕐᑎᑦᓯᑦᓯᐊᕐᑐᒥᒃ.

¹¹ ᑐᓂᕐᕈᓯᕐᑎᑦᓯᔨ ᔪᕅᐊ ᐊᑦᔨᑦᓯᐊᖓᓂᒃ ᑐᓂᕐᕈᓯᕐᕕᓕᐅᕐᐳᖅ ᐂᕼᐊᔅ ᑕᒫᓯᑰᓯᒥᑦ ᐅᑎᓚᐅᖏᓐᓂᖓᓂ ᐱᔭᕇᕐᑕᐅᑎᓪᓗᓂᐅᒃ.

¹² ᐂᕼᐊᔅ ᑕᒫᓯᑰᓯᒥᑦ ᐅᑎᕋᒥ ᑕᑯᕗᖅ ᑐᓂᕐᕈᓯᕐᕕᖕᒥᒃ ᐱᔭᕇᕐᓯᒪᑦᓯᐊᓕᕐᑐᒥᒃ, ᒪᔪᐊᕐᕕᒋᓪᓗᒍᓗ ᐅᐸᒃᐹ.

¹³ ᑕᕝᕙᓂᓗ ᑐᓂᕐᕈᓯᕐᐳᖅ ᐃᑯᐊᓚᑎᓪᓗᒍ ᑐᓂᕐᕈᑎᐅᔭᕆᐊᓕᖕᒥᒃ, ᓂᕿᑐᐃᓐᓇᕐᒥᒡᓗ ᐃᑯᐊᓚᔪᒥ ᑐᓂᕐᕈᑎᐅᕙᒃᑐᒥᒃ ᐃᒥᒐᒃᓴᒥᒡᓗ ᕔᓂᒥᒃ ᑐᓂᕐᕈᓯᕐᐳᖅ ᐃᓚᒌᑦᓯᐊᕐᓂᕐᒨᖓᔪᒥᒡᓗ ᑐᓂᕐᕈᓯᕆᓪᓗᓂ.

¹⁴ ᑐᓂᕐᕈᓯᕐᕕᒃ ᑲᓐᓄᔭ ᐊᑕᓂᕐᒧᑦ ᐊᑐᕐᑐᒃᓴᓕᐊᕆᓯᒪᔪᖅ ᑐᒃᓯᐊᕐᕕᒃᔪᐊᑉ ᑐᓂᕐᕈᓯᕐᕕᐅᓪᓗ ᓄᑖᑉ ᐊᑯᓐᓂᖓᓃᑐᖅ ᐂᕼᐊᓯᐅᑉ ᓄᒃᑎᕐᐹ ᑐᓂᕐᕈᓯᕐᕕᐅᑉ ᓄᑖᑉ ᑲᖏᐊᓄᐊᕐᓗᒍ.

¹⁵ ᐂᕼᐊᓯᐅᑉ ᑐᓂᕐᕈᓯᕐᑎᑦᓯᔨ ᔪᕅᐊ ᐅᖃᐅᑎᕚ, “ᑐᓂᕐᕈᓯᕐᕕᐊᓗᖕᒥᒃ ᓄᑖᒥ ᑐᓂᕐᕈᓯᖃᑦᑕᖁᔨᕗᖓ, ᐃᑯᐊᓚᓗᒍ ᑐᓂᕐᕈᓯᐅᑎᒃᓴᖅ ᐅᓪᓛᒃᑰᕐᑐᕐᓯᐅᑎ, ᓂᐊᖂᔭᒃᓴᓂᒡᓗ ᑐᓂᕐᕈᓯᕈᑎ ᐅᓐᓄᒃᑰᕐᑐᕐᓯᐅᑦ ᐊᖓᔪᖅᑳᕐᔪᐊᓪᓗ ᐃᑯᐊᓚᓪᓗᒍ ᑐᓂᕐᕈᓯᕈᑎᒃᓴᖓ ᓂᐊᖂᔭᒃᓴᓂᒡᓗ ᑐᓂᕐᕈᓯᕈᑎᒃᓴᖓ ᐃᑯᐊᓚᔪᒥᓗ ᑐᓂᕐᕈᓯᐅᑎᒃᓴᖅ ᐃᓅᓕᒫᑦ ᐱᓪᓗᒋᑦ, ᓂᐊᖂᔭᒃᓴᓂᒃ ᕔᓂᓂᒡᓗ ᐃᒥᒐᒃᓴᓄᑦ ᑐᓂᕐᕈᑕᐅᓲᑦ, ᐃᑯᐊᓚᓗᑎᒃ ᑐᓂᕐᕈᓯᐅᑏᑦ ᐊᐅᖏᑦ ᓯᕐᐸᕐᓴᐅᑕᐅᓯᒪᓕᑦ ᑐᓂᕐᕈᓯᕐᕕᖕᒧᑦ; ᑭᓯᐊᓂᓕ ᑐᓂᕐᕈᓯᕐᕕᒃ ᑲᓐᓄᔭᖅ ᐊᑐᖃᑦᑕᕐᓂᐊᕐᐸᕋ ᓇᓗᓇᕐᑐᓂᒃ ᖃᐅᔨᓇᓱᐊᕆᐊᖃᓕᕌᖓᒪ.”

¹⁶ ᔪᕅᐊᓗ ᐱᓂᐊᓚᐅᕐᐳᖅ ᐊᖓᔪᖅᑳᕐᔪᐊᑉ ᐂᕼᐊᓯᐅᑉ ᐅᖃᐅᓯᖏᑦ ᒪᓕᒡᓗᒋᑦ.

¹⁷ ᐊᖓᔪᖅᑳᕐᔪᐊᑉ ᐂᕼᐊᓯᐅᑉ ᐲᔭᕐᑕᐅᑎᑉᐹ ᐃᓕᔨᕕᒃ ᑬᓪᓗᐊᕐᑕᐅᕙᒃᑐᖅ ᐊᑕᓂᐅᑉ ᐃᒡᓗᖓᑕ ᐃᓗᐊᓂ, ᐅᐊᓴᕐᕕᐅᔧᓪᓗ ᖄᖓᓃᑉᐸᒃᑐᑦ, ᐃᒪᖃᐅᑎᕐᔪᐊᖅ ᑲᓐᓄᔭ ᐲᕐᑕᐅᑎᒃᑭᕚ ᐃᒧᒃᓯᐅᒐᓐᖑᐊᓪᓗ ᐊᖑᓴᓪᓗᓐᖑᐊᖏᑦ 12 ᑲᓐᓄᔭᐅᖕᒥᔪᑦ ᐃᒪᖃᐅᑎᐊᓘᑉ ᐊᑖᓃᐸᒃᑐᑦ, ᐃᓂᓕᐅᕐᑕᐅᑎᓪᓗᒍᓗ ᐅᔭᕋᖕᒥᒃ ᖁᐊᕐᑎᓯᒪᔪᓂᒃ.

¹⁸ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᖁᕕᐊᒋᔭᐅᔪᒪᒐᒥ, ᐂᕼᐊᓯᐅᑉ ᐲᔭᕐᑕᐅᑎᒃᑭᕚ ᐊᖓᔪᖅᑳᕐᔪᐊᑉ ᐃᒃᓯᕙᐅᑕᕐᔪᐊᖃᕐᕕᖓᑕ ᓇᑎᐅᔭᖓ ᐊᑕᓂᐅᑉ ᐃᒡᓗᖓᓃᑦᑐᖅ, ᐊᖓᔪᖅᑳᕐᔪᐊᒧᓪᓗ ᐃᑎᕐᑕᕐᕕᐅᕙᒃᑐᖅ ᑐᒃᓯᐊᕐᕕᒡᔪᐊᒧᑦ ᒪᑐᔭᐅᑎᓪᓗᓂᐅᒃ.

¹⁹ ᐊᖓᔪᖅᑳᕐᔪᐊᑉ ᐂᕼᐊᓯᐅᑉ ᐱᓂᐊᕐᓂᕆᓯᒪᔭᓕᒫᖏᑦ ᑎᑎᕋᕐᑕᐅᓯᒪᕗᑦ ᔫᑕᒥ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᑦ ᐅᓂᒃᑳᕐᑕᐅᓯᒪᕕᖏᓐᓂ.

²⁰ ᐂᕼᐊᔅ ᑐᖁᖕᒪᑦ ᐊᖓᔪᖅᑳᕐᔪᐊᑉ ᐃᓗᕕᕐᑕᐅᓯᒪᕕᒋᔭᖏᓐᓂ ᐃᓗᕕᕐᑕᐅᓚᐅᕐᐳᖅ ᑍᕕᑎᐅᑉ ᐃᒡᓗᒐᓴᖏᓐᓂᒃ ᑍᔭᐅᔪᓂ; ᐃᕐᓂᖓᑕ ᕼᐃᓯᑬᐊᐅᑉ ᑭᖑᕝᕕᓕᓚᐅᕆᕚ ᐊᖓᔪᖅᑳᕐᔪᐊᖑᓕᕐᓗᓂᓗ.