ᐊᑕᓃᑦ ᐂᑉᐸᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦᐅᓮᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥ ᑯᕉᓂᑲ ᐂᑉᐸᖏᑦ 26:1-23 1 ᔨᕈᐳᐊᒻ ᐊᖓᔪᖅᑳᕐᔪᐊᖑᓂᖓᑕ ᐃᓴᕆᐊᓕᒥᐅᓄᑦ 27ᖓᓂ, ᐊᔭᓁᐊ ᐊᒪᔧᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᔫᑕᒧᑦ. 2 ᐱᒋᐊᓚᐅᕐᐳᖅ 16ᓂᒃ ᐊᕐᕌᒍᖃᕐᓗᓂ, ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᔨᕉᓴᓕᒥ ᐊᕐᕌᒍᓂᒃ 52ᓂᒃ. ᐊᓈᓇᖓ ᐊᑎᖃᕐᐳᖅ ᔨᑯᓔᐊᒥᒃ ᔨᕉᓴᓕᒥᐅᑕᐅᓪᓗᓂ. 3 ᐊᑖᑕᒥ ᐊᒪᔧᐊᐅᑉ ᐃᓕᖅᑯᓯᖓ ᒪᓕᒃᑲᒥᐅᒃ ᐊᑕᓂᐅᑉ ᓈᒻᒪᒋᔭᖓᓂᒃ ᐱᓇᓱᐊᓚᐅᕐᐳᖅ. 4 ᑭᓯᐊᓂ ᒎᑎᓐᖑᐊᓄᑦ ᑐᒃᓯᐊᕐᕕᐅᖃᑦᑕᕐᑐᑦ ᐲᔭᓚᐅᓐᖏᓔᑦ; ᐃᓄᐃᓪᓗ ᑐᒃᓯᐊᕐᕕᖃᕐᓂᖓ ᑲᔪᓯᑐᐃᓐᓇᓚᐅᕐᐳᖅ ᑐᓂᕐᕈᓯᖃᑦᑕᕐᓂᖓᑦ ᒎᑎᓐᖑᐊᓄᑦ ᐴᔪᕐᑎᑦᓯᖃᑦᑕᕐᓂᖓᓪᓗ. 5 ᐊᑕᓂᐅᑉ ᐊᒪᓮᔭ ᐅᕕᓂᕐᓗᖕᓇᕐᑐᒥᒃ ᐋᓐᓂᐊᕐᑖᕐᑎᓚᐅᕐᐹ ᐅᕕᓂᕐᓗᖕᓇᕐᑐᒥᒡᓗ ᐋᓐᓂᐊᕾᓐᓇᕐᓗᓂ ᑐᖁᑐᐃᓐᓇᓚᐅᕐᐳᖅ. ᑍᒤᑦᑑᓕᕐᓗᓂ ᐃᒡᓗᒥᓂ ᐃᓅᑐᓕᓚᐅᕐᐳᖅ. ᐱᔭᒃᓴᒥᓂᒃ ᐱᓇᓱᐊᕈᓐᓁᕐᓗᓂ, ᐃᕐᓂᖓ ᔫᑕᒻ ᐃᓄᖁᑎᖏᓐᓂᒃ ᐊᐅᓚᑦᓯᔪᑑᓕᓚᐅᕐᐳᖅ. 6 ᐊᔭᕅᐊᐅᑉ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᕆᖃᑦᑕᕐᓯᒪᔭᖏᑕ ᐅᓂᒃᑳᕐᑕᐅᓯᒪᕕᖏᓐᓂ. 7 ᐊᔭᕅᐊ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᐊᖓᔪᖅᑳᕐᔪᐊᓄᑦ ᐃᓗᕕᕐᓯᕕᖕᒥ ᑍᕕᑎᐅᑉ ᐃᒡᓗᒐᓴᖏᓐᓂᒃ ᑍᔭᐅᔪᓂ, ᐃᕐᓂᖓᓗ ᔫᑕᒻ ᐃᓇᖏᓪᓗᓂ ᐊᖓᔪᖅᑳᕐᔪᐊᖑᓕᓚᐅᕆᕗᖅ. ᓴᑲᕅᐊᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᐃᓴᕆᐊᓕᓄᑦ 8 ᐊᖓᔪᖅᑳᕐᔪᐊᑉ ᐊᔭᕅᐊᐅᑉ ᐊᐅᓚᑦᓯᓂᖏᑕ 38ᖓᓐᓂ ᔫᑕᒥ, ᓴᑲᕅᐊ ᔨᕈᐳᐊᒻ ᐃᕐᓂᖓ ᐊᖓᔪᖅᑳᕐᔪᐊᖑᓕᓚᐅᕆᕗᖅ ᐃᓴᕆᐊᓕᓄᑦ, ᓴᒥᐊᕆᐊᒥᐅᓄᑦ ᐊᖓᔪᖅᑳᕐᔪᐊᕆᔭᐅᓚᐅᕐᐳᖅ ᑕᖅᑭᓂᒃ 6ᓂᒃ. 9 ᐊᑕᓂᐅᑉ ᓵᖓᓂ ᐊᔪᕐᑐᓕᓂᖃᓚᐅᕐᐳᖅ ᓯᕗᓕᕆᓚᐅᕐᑕᒥᑐᑦ, ᐊᖓᔪᖅᑳᕐᔪᐊᑉ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᒃ ᓴᒃᑯᐃᓯᒪᓚᐅᖏᓐᓇᒥ ᐃᓴᕆᐊᓖᑦ ᐊᔪᕐᑐᓕᓂᕐᒥ ᐃᓅᑎᓚᐅᕐᐰᑦ. 10 ᓴᓗᒻ ᔭᐲᓯᐅᑉ ᐃᕐᓂᖓᑕ ᐃᔨᕋᕐᑐᕐᓗᓂ ᐊᑭᕋᕐᑐᐊᕆᓕᕋᒥᐅᑦ ᓴᑲᕅᐊ ᑐᖁᑕᐅᒃᑲᕐᐹ, ᓄᓇᒥ ᐃᑉᐱᓕᒥ, ᐃᓂᖓᓂᓗ ᐊᖓᔪᖅᑳᕐᔪᐊᓐᖑᖔᕐᓗᓂ. 11 ᐊᖓᔪᖅᑳᕐᔪᐊᑉ ᓴᑲᕅᐊᐅᑉ ᐱᓂᐊᕐᓂᕕᓂᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᐅᑉ ᐊᖓᔪᖅᑳᕐᔪᐊᕕᓂᖏᑕ ᐅᓂᒃᑳᕐᑕᐅᓯᒪᕕᖏᓐᓂ. 12 ᐊᑕᓂᐅᑉ ᐅᖃᐅᓯᕆᓯᒪᔭᖓ ᔨᕼᐆᒧᑦ ᓇᓚᐅᑦᓯᓕᓚᐅᕐᐳᖅ, “ᑭᖑᕚᕕᑦ ᓯᑕᒤᖏᑦ ᑎᑭᓪᓗᒋᑦ ᐃᓴᕆᐊᓕᒥᐅᓄᑦ ᐊᐅᓚᑦᓯᔨᐅᔪᒫᕐᐳᓯ.” ᓴᓗᒥᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ 13 ᐊᖓᔪᖅᑳᕐᔪᐊᑉ ᐅᓮᐊᐅᑉ ᐊᐅᓚᑦᓯᓂᖓᑕ 39ᖓᓐᓂ ᔫᑕᒥᐅᓄᑦ, ᓴᓗᒻ ᔭᐲᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓕᓚᐅᕆᕗᖅ ᐃᓴᕆᐊᓕᒥᐅᓄᑦ. ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᓴᒥᐊᕆᐊᒥᐅᓄᑦ ᑕᖅᑭᒥᒃ ᐊᑕᐅᓯᕐᒥᒃ. 14 ᒥᓇᕼᐃᒻ ᒑᑎᐅᑉ ᐃᕐᓂᖓ ᑎᕐᔭᒥᑦ ᐱᓪᓗᓂ ᓴᒥᐊᕆᐊᒧᐊᕐᓗᓂ ᓴᓗᒻᒥᒃ ᑐᖁᑦᓯᓚᐅᕐᐳᖅ ᔭᐲᓯᐅᑉ ᐃᕐᓂᖓᓂᒃ, ᐃᓇᖏᕐᓗᓂᐅᒡᓗ ᐊᖓᔪᖅᑳᕐᔪᐊᖑᓕᓚᐅᕐᐳᖅ. 15 ᓴᓗᒻᒥᐅᓪᓗ ᐱᓂᐊᕐᓂᕕᓂᖏᑦ ᑎᑎᕋᕐᑕᐅᓯᒪᕗᑦ, ᑲᑐᑦᔭᐅᓪᓗᓂᓗ ᑐᖁᑕᐅᔪᒪᓂᕕᓂᖓ ᑎᑎᕋᕐᑕᐅᓯᒪᒋᕗᖅ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓯᒪᕕᖏᓐᓂ. 16 ᑍᑦᓱᒪᓂᐅᑎᓪᓗᒍ ᒥᓇᕼᐃᒻ ᑎᕐᔭᒥᓐᖔᕐᐸᓪᓕᐊᓪᓗᓂ ᓴᒥᐊᕆᐊᒧᐊᓕᕋᒥ ᓄᓇᓖᑦ ᐊᖅᑯᓵᕐᑕᓂ ᑕᐳᐊᒥᐅᑦ ᐃᒡᓗᒐᓴᖏᑦ ᐃᓄᖕᓂᓪᓗ ᓄᓇᖓᑕᓗ ᖃᓂᒋᔭᖓᓅᕐᑐᓕᒫᑦ ᐊᓯᕈᓚᐅᕐᐰᑦ ᐃᒻᒥᖕᓂᒃ ᑐᓂᑦᔪᑎᒋᑐᐃᓐᓇᕈᒪᓚᐅᖏᒻᒪᑕ, ᐊᒡᓛᑦ ᓄᑕᕋᒃᓴᓕᓕᒫᑦ ᓈᖏᑦ ᓰᖄᑦᑕᓚᐅᕐᐰᑦ. ᒥᓇᕼᐃᒻ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ 17 ᐊᖓᔪᖅᑳᕐᔪᐊᑉ ᐊᔭᕅᐊᐅᑉ ᐊᐅᓚᑦᓯᓂᖓᑕ 39ᖓᓂ ᔫᑕᒧᑦ, ᒥᓇᕼᐃᒻ ᒑᑎᐅᑉ ᐃᕐᓂᖓ ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᓴᒥᐊᕆᐊᒥᐅᓄᑦ, ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᐊᕐᕌᒍᓂᒃ 10ᓂᒃ. 18 ᐊᑕᓂᐅᑉ ᓵᖓᓂ ᐊᔪᕐᑐᓕᓂᕐᒥ ᐃᓅᓚᐅᕐᐳᖅ; ᐊᖓᔪᖅᑳᕐᔪᐊᑉ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖏᓐᓂᒃ ᕿᒤᓚᐅᓐᖏᓚᖅ ᐃᓅᓂᓕᒫᒥᓂ ᐃᓴᕆᐊᓕᒥᐅᓪᓗ ᐊᔪᕐᑐᓕᓂᕐᒦᑎᓚᐅᕐᐰᑦ. 19 ᐴᓪ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐃᓴᕆᐊᓕᒥᐅᑦ ᓄᓇᖁᑎᖓᓄᐊᓚᐅᕐᐳᖅ ᓵᓚᖃᕈᓐᓇᕐᓂᖓᓗ ᓯᕘᕋᒋᔭᐅᓚᐅᕐᐳᑦ; ᐊᖓᔪᖅᑳᕐᔪᐊᑉ ᒥᓇᕼᐃᒻ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐴᓪ 76,000ᐸᐅᓂᒃ ᓯᐅᓪᕕᕆᓂᒃ ᑐᓂᓯᕕᒋᕚ, ᐱᔪᓐᓇᕐᓂᖃᕐᑎᑕᐅᓂᕆᔭᓂ ᓄᓇᖁᑎᒥᓄᑦ ᐃᑲᔪᕐᑐᕐᑕᐅᖁᓪᓗᒍ. 20 ᒥᓇᕼᐃᒻ ᑮᓇᐅᔭᓂᒃ ᑲᑎᕐᓱᐃᔪᓐᓇᓚᐅᕐᐳᖅ ᐃᓴᕆᐊᓕᒥᐅᑦ ᐊᒃᓱᐃᑦᑐᖁᑎᖏᑦ ᐊᑐᓂᑦ 50ᓂᒃ ᓯᐅᓪᕕᕆᓂᒃ ᑐᓂᕐᕈᓯᕐᑎᓪᓗᓂᒋᑦ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᓄᓇᒥᓄᑦ ᐅᑎᑐᐃᓐᓇᓕᓚᐅᕐᐳᖅ, ᐃᓴᕆᐊᓕᒥᐅᑦ ᓄᓇᖓᓃᒍᓐᓃᕐᓗᓂ. 21 ᐊᖓᔪᖅᑳᕐᔪᐊᑉ ᒥᓇᕼᐃᒪᐅᑉ ᐱᓂᐊᕐᓂᕕᓂᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓯᒪᕕᖏᓐᓂ. 22 ᒥᓇᕼᐃᒻ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᓯᕗᓕᕕᓂᖏᑕ ᐃᓗᕕᕐᑕᐅᓯᒪᕕᖏᓐᓂ, ᐃᕐᓂᖓ ᐱᑲᕼᐂᐊ ᐃᓇᖐᓪᓗᓂ ᐊᖓᔪᖅᑳᕐᔪᐊᖑᓕᓚᐅᕆᕗᖅ ᐃᓴᕆᐊᓕᒥᐅᓄᑦ. ᐱᑲᕼᐂᐊᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ 23 ᐊᖓᔪᖅᑳᕐᔪᐊᑉ ᐊᔭᕅᐊᐅᑉ ᐊᐅᓚᑦᓯᓂᖏᑦᑕ 50ᖓᓐᓂ ᔫᑕᒧᑦ, ᐱᑲᕼᐂᐊ ᒥᓇᕼᐃᒪᐅᑉ ᐃᕐᓂᖓ ᐃᓴᕆᐊᓕᒧᑦ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᓴᒥᐊᕆᐊᒥ, ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᐊᕐᕌᒎᖕᓂᒃ ᒪᕐᕉᖕᓂᒃ. 24 ᐊᑕᓂᐅᓪᓕ ᓵᖓᓂ ᐊᔪᕐᑐᓕᓚᐅᕐᐳᖅ; ᔨᕈᐳᐊᒻ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᑦ ᕿᒤᓚᐅᖏᓐᓇᒥ ᓇᐹᑎᐅᑉ ᐃᕐᓂᖓᑕ, ᐃᓴᕆᐊᓕᒥᐅᓂᒃ ᐊᔪᕐᑐᓕᓂᕐᒥ ᐃᓅᑎᑦᓯᓚᐅᕐᐳᖅ. 25 ᐱᑲᕼᐂᐊᐅᑉ ᐊᖓᔪᖅᑳᖁᑎᖓᑦᑕ ᐃᓚᖓᑦ ᐲᑲ ᕆᒪᓔᐊᐅᑉ ᐃᕐᓂᖓ, ᐃᔨᕋᕐᑐᕐᓗᓂ ᑐᖁᑦᓯᔪᒪᓕᓚᐅᕐᐳᑦ, ᐊᖑᑎᓂᒃ 50ᓂᒃ ᒋᓕᐊᑎᒥᐅᑕᕐᓂᒃ ᐃᓚᖃᕐᓗᓂ, ᐱᑲᕼᐂᔭᒥᒃ ᑐᖁᑦᓯᓚᐅᕐᐳᑦ ᐊᖓᔪᖅᑳᕐᔪᐊᑉ ᐃᒡᓗᖓᓂ ᓴᒥᐊᕆᐊᒥ, ᐃᓂᖓᓂᓗ ᐊᖓᔪᖅᑳᕐᔪᐊᓐᖑᕐᓗᓂ. 26 ᐱᑲᕼᐂᐊᐅᑉ ᐱᓂᐊᕐᓂᕕᓂᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓯᒪᕕᖏᓐᓂ. ᐲᑲᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᐃᓴᕆᐊᓕᒥᐅᓄᑦ 27 ᐊᖓᔪᖅᑳᕐᔪᐊᑉ ᐊᔭᕅᐊᐅᑉ ᐊᐅᓚᑦᓯᓂᖏᑕ ᐊᕐᕌᒍᐃᑦ 52ᖓᓐᓂ ᔫᑕᒧᑦ, ᐲᑲ ᕆᒪᓔᐊᐅᑉ ᐃᕐᓂᖓ ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᓴᒥᐊᕆᐊᒦᓪᓗᓂ, ᐊᕐᕌᒍᓂᒡᓗ 20ᓂᒃ ᐊᖓᔪᖅᑳᕐᔪᐊᖑᓚᐅᕐᐳᖅ. 28 ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ; ᓯᕗᓕᕕᓂᕐᒥ ᐊᖓᔪᖅᑳᕐᔪᐊᑉ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖏᑦ ᕿᒪᓚᐅᖏᒻᒪᒋᑦ, ᐃᓴᕆᐊᓕᒥᐅᓪᓗ ᐊᔪᕐᑐᓕᓂᕐᒦᑎᓚᐅᕐᐰᑦ. 29 ᐲᑲ ᐊᖓᔪᖅᑳᕐᔪᐊᖑᑎᓪᓗᒍ ᐃᓴᕆᐊᓕᓄᑦ, ᑎᒡᓚᑦ-ᐰᓕᓴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓵᓚᖃᕐᓂᕐᒥᓄᑦ ᓄᓇᓕᖕᓂᒃ ᑎᒍᓯᖃᑦᑕᓚᐅᕐᐳᖅ, ᐂᔮᓐᒥᐅᓂᒃ, ᐊᐱᐅᓪ-ᐱᑦ-ᒫᑲᒥᐅᓂᒃ, ᔭ-ᓄᐊᒥᐅᓂᒃ, ᑭᑎᔅ-ᓯᒥᐅᓂᒃ ᕼᐂᔭᒥᐅᓂᒡᓗ, ᒋᓕᐊᑎᐅᑉ ᓄᓇᓕᖏᑦ, ᒐᓕᓖᓪᓗ, ᓈᑉᑕᓕᒥᐅᓪᓗ ᐃᓄᖏᓐᓂᒃ ᑎᒍᓯᓪᓗᓂ ᐊᓯᕆᐊᒧᑦ ᐊᐅᓪᓚᕈᑎᓚᐅᕐᐰᑦ. 30 ᕼᐆᓯᐊ ᐄᓚᐅᑉ ᐃᕐᓂᖓ ᑲᑐᑦᔨᖃᑎᖃᕐᓗᓂ ᑐᖁᑦᓯᔪᒪᓕᓚᐅᕐᐳᖅ ᐊᖓᔪᖅᑳᕐᔪᐊᕐᒥᒃ ᐲᑲᒥᒃ ᕆᒪᓔᐊᐅᑉ ᐃᕐᓂᖓᓂᒃ, ᑐᖁᓐᓇᒥᐅᒡᓗ ᐃᓂᖓᓂ ᐊᖓᔪᖅᑳᕐᔪᐊᓐᖑᖔᓚᐅᕐᐳᖅ, ᔫᑕᒥᐅᑉ ᐅᓮᐊᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ 20ᖓᓂ ᔫᑕᒧᑦ. 31 ᐲᑲᐅᑉ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓯᒪᕕᖏᓐᓂ. ᔫᑕᒥᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ ᑯᕉᓂᑲ ᐂᑉᐸᖏᑦ 27:1-9 32 ᐊᖓᔪᖅᑳᕐᔪᐊᑉ ᐲᑲᐅᑉ ᕆᒪᓔᐊᐅᑉ ᐃᕐᓂᖓᑕ ᐊᐅᓚᑦᓯᓂᖏᑕ ᐊᕐᕌᒍᖓᑕ ᐂᑉᐸᖓᓂ ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᑎᓪᓗᒍ, ᔫᑕᒻ ᐅᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᔫᑕᒧᑦ. 33 ᐊᕐᕌᒍᖃᕐᓗᓂ 25ᓂᒃ ᐊᖓᔪᖅᑳᕐᔪᐊᓐᖑᓚᐅᕐᐳᖅ, ᐊᐅᓚᑦᓯᓚᐅᕐᐳᕐᓗ ᔨᕉᓴᓕᒥ ᐊᕐᕌᒍᓂᒃ 16ᓂᒃ. ᐊᓈᓇᖃᓚᐅᕐᐳᖅ ᔨᕉᓴᕼᐊᒥᒃ ᔭᑑᒃᒥᒃ ᐊᑖᑕᖃᕐᓗᓂ. 34 ᐊᑖᑕᒥ ᐅᓮᐊᐅᑉ ᐃᓕᖅᑯᓯᖓᓂᒃ ᒪᓕᑦᓯᐊᕋᒥ ᐊᑕᓂᐅᑉ ᓵᖓᓂ ᓈᒻᒪᒋᔭᐅᔪᒥᒃ ᐱᐅᓯᖃᓚᐅᕐᐳᖅ. 35 ᑭᓯᐊᓂ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᑦ ᐲᔭᓚᐅᓐᖏᓔᑦ; ᐃᓄᐃᓪᓗ ᒎᑎᓐᖑᐊᓄᑦ ᑐᓂᕐᕈᓯᖃᑦᑕᓚᐅᕐᐳᑦ ᐴᔫᕐᑎᑦᓯᕙᒡᓗᑎᒡᓗ. ᔫᑕᒥᐅᓪᓕ ᐊᑕᓂᐅᑉ ᐃᒡᓗᖓᑕ ᐅᓐᓄᐊᓪᓗᐊᖓᑕ ᓇᓛᓃᑦᑐᖅ ᐃᑎᕐᑕᕐᕕᒃ ᓴᓇᔭᐅᑎᓚᐅᕐᐹ. 36 ᔫᑕᒥᐅᑉ ᐱᓂᐊᕐᓂᕆᔭᕕᓂᓕᒫᖏᑦ ᑎᑎᕋᕐᑕᐅᓯᒪᕗᑦ ᔫᑕᒥ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᑦ ᐅᓂᒃᑳᕐᑕᐅᓯᒪᕕᖏᓐᓂ. 37 ᔫᑕᒻ ᐊᖓᔪᖅᑳᕐᔪᐊᖑᑎᓪᓗᒍ ᐊᑕᓂᐅᑉ ᑎᑭᑕᐅᑎᓚᐅᕐᐹ ᕆᔨᓐᒧᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐲᑲᒧᓪᓗ ᕆᒪᓔᐊᐅᑉ ᐃᕐᓂᖓᓄᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑖᒃᑯᐊᒡᓗ ᐅᓇᑕᕆᐊᓚᐅᕐᐳᑦ ᔫᑕᒥᒃ. 38 ᔫᑕᒻ ᑐᖁᓚᐅᕐᐳᖅ ᐃᓗᕕᕐᑕᐅᓪᓗᓂᓗ ᐊᖓᔪᖅᑳᕐᔪᐊᓄᑦ ᐃᓗᕕᕐᓯᕕᐅᕙᒃᑐᒧᑦ ᑍᕕᑎᐅᑉ ᐃᒡᓗᒐᓴᒡᔪᐊᖏᓐᓂᒃ ᑍᔭᐅᔪᓄᑦ; ᐃᕐᓂᖓᓗ ᐂᕼᐊᔅ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑖᑦᓱᒪ ᐃᓂᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society