ᐊᑕᓃᑦ ᐂᑉᐸᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᖅ ᔨᕼᐅᕼᐊᔾ ᐃᓴᕆᐊᓕᒥ

¹ ᔪᐊᓯᐅᑉ ᐊᖓᔪᖅᑳᕐᔪᐊᖑᓂᖓᑕ 23ᒋᓕᕐᑕᖓᓂ ᐊᕼᐊᔧᐊᐅᑉ ᐃᕐᓂᖓᑕ ᔫᑕᒥ ᐊᖓᔪᖅᑳᕐᔪᐊᖑᔫᑉ, ᔨᕼᐅᐊᕼᐊᔾ ᔨᕼᐆᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥ ᓴᒥᐊᕆᐊᒦᑦᑐᒥ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 17ᓂᒃ.

² ᐊᑕᓂᐅᑉ ᓵᖓᓂ ᐱᓂᐊᕐᓂᖃᓚᐅᕐᐳᖅ ᐱᐅᖏᑦᑐᒥᒃ, ᔨᕈᐳᐊᒻ ᐊᔪᕐᑐᓕᓂᖓ ᒪᓕᒡᓗᒍ ᓂᐹᑎᐅᑉ ᐃᕐᓂᖓᑕ, ᑖᑦᓱᒪ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᒪᒋᑦ; ᐊᔪᕐᑐᓕᓂᕐᒥᒡᓗ ᕿᒤᓚᐅᕋᓂ.

³ ᐊᑕᓂᐅᓪᓗ ᐃᓴᕆᐊᓕᒥᐅᑦ ᓂᓐᖓᐅᒪᕝᕕᒋᓕᓚᐅᕐᐰᑦ, ᐊᑯᓂᓗ ᕼᐊᔧᐅᓪᒧᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᕐᓂᖓᓄᓪᓗ ᐱᓐ-ᕼᐊᑖᑦᒧᑦ ᓵᓚᒋᔭᐅᓯᒪᑎᓚᐅᕐᐰᑦ.

⁴ ᑕᕝᕙ ᔨᕼᐅᐊᕼᐊᔨᐅᑉ ᐊᑕᓂᖅ ᑐᒃᓯᐊᕐᕕᒋᖕᒪᒍ, ᐊᑕᓂᐅᑉ ᑐᓴᕐᐹ ᑐᒃᓯᐊᕐᓂᖓᓂᒃ; ᖃᐅᔨᒪᒐᒥ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑦ ᐊᖏᔪᒥᒃ ᐅᖁᒤᒃᓴᕐᑎᓚᐅᕐᒪᒋᑦ.

⁵ ᑍᒤᒻᒪᑦ ᐊᑕᓂᐅᑉ ᐃᓴᕆᐊᓕᒥᐅᑦ ᓴᐳᑦᔨᔨᒃᓴᖓᓂᒃ ᑎᓕᓯᕕᒋᓚᐅᕐᐰᑦ, ᓯᕆᐊᒥᐅᓄᑦ ᑎᒍᒥᐊᕐᑕᐅᔪᓐᓃᖁᓪᓗᒋᑦ; ᑕᕝᕙ ᐃᓴᕆᐊᓕᒥᐅᑦ ᐅᑎᕈᓐᓇᕐᓯᓚᐅᕐᐳᑦ ᓄᓇᒋᕙᓚᐅᕐᑕᒥᖕᓄᑦ ᐊᖏᕐᕋᕐᓯᒪᔪᓐᓇᓕᕆᓪᓗᑎᒃ.

⁶ ᔨᕈᐳᐊᒻᓕ ᐃᓚᖏᑕᓗ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᒃ ᓴᑯᑦᓯᓚᐅᓐᖏᓚᑦ, ᐃᓴᕆᐊᓕᒥᐅᓂᒃ ᐊᔪᕐᑐᓕᓂᕐᒥ ᐃᓅᑎᑦᓯᑦᔪᑎᒋᓚᐅᕐᑕᖏᓐᓂᒃ, ᐃᓴᕆᐊᓕᒥᐅᑦ ᑲᔪᓯᑐᐃᓐᓇᓚᐅᕐᐳᑦ ᑕᒪᑐᒧᖓ, ᓇᐸᔪᐊᓗᒡᓗ ᒎᑎᓐᖑᐊᑉ ᓇᓗᓁᒃᑯᑕᖓ ᐊᓯᕋᒥᒃ ᑍᔭᐅᔪᖅ ᓴᒥᐊᕆᐊᒥ ᓇᐸᑎᑕᐅᖏᓐᓇᓚᐅᕐᐳᖅ.

⁷ ᔨᕼᐅᐊᕼᐊᔨᐅᑉ ᐅᓇᑕᕐᑎᖁᑎᖏᑦ ᐊᒥᐊᒃᑯᑐᐊᖃᓚᐅᕐᐳᑦ 50ᓂᒃ ᕿᒥᕐᔪᐊᓕᖕᓂᒃ, 10ᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓃᑦᑐᓂᒃ 10,000ᓂᒡᓗ ᐅᓇᑕᕐᑎᓂᒃ ᐱᓱᒃᑎᓂᒃ; ᓯᕆᐊᒥᐅᑦ ᓄᖑᕋᓚᐅᕐᒪᒋᑦ ᓯᖃᓕᓯᔨᓄᑦ ᓯᖃᓪᓕᔭᐅᔪᑎᑐᑦ ᓱᓇᐅᒋᔭᐅᒐᑎᒃ.

⁸ ᔨᕼᐅᐊᕼᐊᔨᐅᑉ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐱᓂᐊᕐᓂᕆᖃᑦᑕᕐᓯᒪᔭᖏᑕ ᑎᑎᕋᕐᑕᐅᓯᒪᕕᖏᓐᓂ.

⁹ ᔨᕼᐅᕼᐊᔨᐅᑉ ᓯᕗᓕᕕᓂᓂ ᐃᓚᒋᓪᓗᒋᑦ ᒥᕐᖑᐃᕐᓯᖃᑎᒋᕔᑦ, ᐃᓗᕕᕐᑕᐅᓯᒪᕗᕐᓗ ᓴᒥᐊᕆᐊᒥ; ᐃᕐᓂᖓᑕᓗ ᔪᐊᓯᐅᑉ ᐃᓇᖏᓚᐅᕐᐹ ᐊᖓᔪᖅᑳᕐᔪᐊᖑᓂᖓ.

ᔨᕼᐅᐊᕼᐊᔨᐅᑉ ᐊᖓᔪᖅᑳᕐᔪᐊᖑᓕᕐᓂᖓ ᐃᓴᕆᐊᓕᒥᐅᓄᑦ

¹⁰ ᔪᐊᓯᐅᑉ ᔫᑕᒥᐅᓄᑦ ᐊᖓᔪᖅᑳᕐᔪᐊᖑᓂᖓᑕ 37ᖓᓐᓂ. ᔨᕼᐅᐊᓯ ᔨᕼᐅᐊᕼᐊᔨᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᓄᑦ ᓴᒥᐊᕆᐊᒥ ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 16ᓂᒃ.

¹¹ ᐊᑕᓂᐅᑉ ᓵᖓᓂ ᓈᒻᒪᖏᑦᑐᓕᓚᐅᕐᐳᖅ ᔨᕈᐳᐊᒻᓗ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖏᑕ ᐱᐅᓯᕆᔭᖏᓐᓂᒃ ᒪᓕᑐᐃᓐᓇᓚᐅᕆᕗᖅ ᐃᓴᕆᐊᓕᒥᐅᓂᒃ ᐊᔪᕐᑐᓕᓂᕐᒥ ᐃᓅᑎᑦᓯᓂᕆᓚᐅᕐᑕᖓᑐᑦ, ᕿᒤᓯᒪᓚᐅᖏᓐᓇᒥ.

¹² ᔪᐊᓯᐅᑉ ᐊᖓᔪᖅᑳᕐᔪᐊᖑᓪᓗᓂ ᐱᓂᐊᕐᓂᕆᖃᑦᑕᕐᓯᒪᔭᖏᑦ ᐊᑑᑎᖃᑦᑕᕐᓯᒪᔭᖏᓪᓗ ᐅᓇᑕᖃᑎᖃᖃᑦᑕᕐᓯᒪᓂᖏᓪᓗ ᐊᒪᔧᐊᒥᒃ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᑕᒪᕐᒥᒃ ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑦᑕ ᐱᓂᐊᕐᓂᕆᓯᒪᔭᖏᑕ ᑎᑎᕋᕐᑕᐅᓯᒪᕕᖏᓐᓂ.

¹³ ᔪᐊᓯᐅᑉ ᓯᕗᓕᕕᓂᖏᑕ ᐃᓗᕕᕐᑕᐅᕕᒋᓯᒪᔭᖓᓂ ᐃᓂᖃᖃᑕᐅᕗᖅ ᔨᕈᐳᐊᒧᓪᓗ ᐊᖓᔪᖅᑳᕐᔪᐊᖑᓂᖓ ᐃᓇᖏᕐᑕᐅᓯᒪᕗᖅ ᔪᐊᓯ ᐃᓗᕕᕐᑕᐅᓯᒪᕗᖅ ᓴᒥᐊᕆᐊᕐᒥ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐃᓗᕕᕐᑕᐅᓯᒪᕕᒋᔭᖏᓐᓂ.

ᐃᓔᓴᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑐᖁᓂᖓ

¹⁴ ᐃᓔᓴ ᖃᓂᒪᓕᓚᐅᕐᐳᖅ ᑐᖁᑦᔪᑎᒋᓂᐊᓕᕐᑕᒥᓂᒃ. ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᐊᓯᐅᑉ ᑕᑯᔭᕐᑐᓚᐅᕐᐹ ᑕᑯᒐᒥᐅᒡᓗ ᕿᐊᑦᔪᑎᒋᕚ, ᐅᖃᐅᑎᓪᓗᒍᓗ, “ᐊᑖᑖᒃ, ᐊᑖᑖᒃ! ᐃᓴᕆᐊᓕᒥᐅᑉ ᕿᒧᒃᓯᐅᑎᖁᑎᖓᑦ ᕿᒥᕐᔪᐊᖁᑎᖓᓪᓗ!”

¹⁵ ᐃᓔᓴᐅᑉ ᐅᖃᐅᑎᕚ, “ᐱᑎᒃᓯᒥᒃ ᖃᕐᔪᓂᒡᓗ ᑎᒍᓯᓗᑎᑦ”; ᔨᕼᐅᕼᐊᔨᓗ ᐱᑎᒃᓯᒥᒃ ᖃᕐᔪᓂᒡᓗ ᑎᒍᓯᕗᖅ.

¹⁶ ᐃᓔᓴᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᓕᕐᐹ ᐱᑎᒃᓯ ᕿᓗᓕᕈᒃ, ᐃᓔᓴᐅᑉ ᐊᖓᔪᖅᑳᕐᔪᐊᖅ ᐊᒡᒐᖏᑎᒍᑦ ᐊᒃᑐᕐᐹ.

¹⁷ ᐅᖃᐅᑎᓪᓗᒍᓗ, “ᐃᒐᓛᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᒪᑐᐃᕈᒃ,” ᒪᑐᐃᕐᒪᒍᓗ ᐃᓔᓴᐅᑉ ᐅᖃᐅᑎᕚ, “ᐱᑎᒋᐊᓕᕆᑦ.” ᐱᑎᒋᐊᕐᐳᖅ ᑕᕝᕙ. ᐱᑎᒋᐊᕐᒪᑦ ᐃᓔᓴ ᐅᖃᕐᐳᖅ, “ᐊᑕᓂᐅᑉ ᓴᐳᑦᔨᓂᖓᑕ ᖃᕐᔪᖓ, ᖃᕐᔫᕗᖅ ᓯᕆᐊᒥᐅᓂᒃ ᓵᓚᖃᕐᓂᐊᕐᑐᖅ! ᐱᓇᓱᐊᕐᓂᖓᓐᓂᑦ ᑖᑦᓱᒧᖓ ᓯᕆᐊᒥᐅᑉ ᐱᒋᐊᕐᑕᒃᓴᕆᕙᑎᑦ ᐊᐱᒃᒦᑦᑐᓕᒫᑦ ᓄᖑᓪᓗᒋᑦ.”

¹⁸ ᐃᓔᓴᐅᑉ ᐅᖃᐅᑎᕚ, “ᖃᕐᔪᓂᒃ ᑎᒍᓯᓚᐅᕆᑦ!” ᖃᕐᔪᓂᒃ ᑎᒍᓯᖕᒪᑦ ᐅᖃᑎᓕᕆᕚ, “ᐊᑏ ᓄᓇ ᑖᒃᑯᓄᖓ ᐱᑎᒃᓵᓚᐅᕈᒃ”; ᐱᖓᓱᐊᕐᑎᕐᓗᓂ ᐱᑎᒋᐊᕋᒥ ᓄᖅᑲᕐᐳᖅ.

¹⁹ ᒎᑎᐅᑉ ᐃᓄᖁᑎᖓᑕ ᐃᓔᓴᐅᑉ ᐊᑲᕆᔪᓐᓃᕐᐹ ᐅᖃᐅᑎᓪᓗᓂᐅᒡᓗ, “ᓄᓇ ᐱᑎᖃᑦᑕᕆᐊᖃᕐᑕᕋᓗᐊᑦ ᑕᓪᓕᒤᕐᓱᕐᓗᑎᓪᓘᓐᓃᑦ ᐱᖓᓲᔪᕐᑐᕕᒡᓗᑎᓪᓘᓐᓃᑦ; ᑕᕝᕙ ᓯᕆᐊᒥᐅᑦ ᓵᓚᒋᒐᔭᓚᐅᕐᐸᑎᑦ ᓄᖑᓪᓗᒋᓪᓗ. ᑭᓯᐊᓂᓕ ᐱᖓᓱᕕᑐᐃᓐᓇᕐᓗᑎᑦ ᓵᓚᒋᓛᓕᕐᐸᑎᑦ.”

²⁰ ᐃᓔᓴ ᑐᖁᖕᒪᑦ ᐃᓗᕕᕐᑕᐅᕗᖅ. ᓄᓇᖓᑦ ᐃᓄᐊᕐᑎᓄᑦ ᒧᐊᐱᒥᐅᓄᑦ ᑎᑭᑕᐅᕙᓚᐅᕐᐳᖅ ᐅᐱᕐᖔᑕᒫᑦ.

²¹ ᐅᓪᓗᐃᑦ ᐃᓚᖓᓐᓂ ᐃᓴᕆᐊᓕᒥᐅᑍᑦ ᐃᓅᔪᓐᓃᕐᑐᕕᓂᕐᒥᒃ ᐃᓗᕕᕐᓯᓇᓱᒃᑎᓪᓗᒋᑦ, ᑎᑭᑕᐅᕗᑦ ᐃᓄᐊᕐᑎᓄᑦ: ᑎᑭᑕᐅᓕᕋᒥᒃ ᐃᓗᕕᕐᓂᐊᕐᑕᒥ ᑎᒥᕕᓂᖓ ᐃᓕᔭᐅᕗᖅ ᐃᓗᕕᖓᓄᑦ ᑲᑍᑐᐃᓐᓇᕐᓗᒍ ᕿᒪᒃᓯᕗᑦ ᑎᒥᕕᓂᖅ ᐃᓔᓴᐅᑉ ᑎᒥᕕᓂᖓᑕ ᓴᐅᓂᕕᓂᖏᓐᓄᑦ ᐊᒃᑑᑎᒐᒥ ᐆᒻᒪᕐᐳᖅ, ᐆᒻᒪᕋᒥᓗ ᓂᑯᕕᑉᐳᖅ.

²² ᕼᐊᔧᐅᓕ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑉ ᓵᓚᒋᓯᒤᓐᓇᓚᐅᕐᐰᑦ ᔨᕼᐅᐊᕼᐊᔨ ᐊᖓᔪᖅᑳᕐᔪᐊᖑᓂᓕᒫᖓᓂ ᐃᓴᕆᐊᓕᒥᐅᓄᑦ.

²³ ᐊᑕᓂᐅᑉ ᐱᑦᓯᐊᕐᕕᒋᓚᐅᕐᐰᑦ ᐃᓚᑦᓱᒋᓪᓗᒋᑦ ᐃᓱᒪᒋᑦᓯᐊᓚᐅᕐᐰ ᐊᖏᖃᑎᒌᒍᑎᓕᐅᕐᓯᒪᓂᓂ ᐱᑦᔪᑎᒋᓪᓗᒍ ᐂᑉᕋᕼᐋᒧᑦ, ᐂᓴᑭᒧᑦ, ᔧᑯᒧᓪᓗ. ᐅᓪᓗᒥ ᑎᑭᓪᓗᒍ ᓱᓕ ᐊᓯᕈᕐᑕᐅᖁᓐᖏᓔᑦ ᕿᒪᒍᒪᓇᒋᓪᓗ ᓇᔪᐃᓐᓇᕈᒪᓚᐅᕐᐰᑦ.

²⁴ ᕼᐊᔧᐅᓕ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑐᖁᓚᐅᕐᐳᖅ, ᐃᕐᓂᖓᑕ ᐱᓐ-ᕼᐊᑖᑎᐅᑉ ᐊᖓᔪᖅᑳᕐᔪᐊᖑᓂᖓ ᐃᓇᖏᓚᐅᕐᐹ.

²⁵ ᔨᕼᐅᐊᓯ ᔨᕼᐅᕼᐊᔨᐅᑉ ᐃᕐᓂᖓᑕ ᐱᓐ-ᕼᐊᑖᑎᐅᑉ ᕼᐊᔧᐆᑉ ᐃᕐᓂᖓᑕ ᓄᓁᑦ ᑎᒍᓯᒪᔭᕕᓂᖏᑦ ᓵᓚᒋᓪᓗᒍ ᐅᑎᕐᑎᓕᓚᐅᕆᕔᑦ ᐊᑖᑕᖓ ᔨᕼᐅᐊᕼᐊᔨ ᐊᖓᔪᖅᑳᕐᔪᐊᖑᑎᓪᓗᒍ ᐋᑕᐅᑦᔪᑎᒋᓚᐅᕐᑕᕕᓂᖏᑦ ᐅᓇᑕᕐᓗᑎᒃ ᓵᓚᐅᒐᒥ. ᔪᐊᓯᐅᑉ ᐱᖓᓱᐊᕐᑎᕐᓗᓂ ᓵᓚᒋᖃᑦᑕᓚᐅᕐᒪᒍ ᓄᓇᖁᑎᒃᒋᔭᓂ ᑎᒍᔭᐅᓯᒪᓚᐅᕐᑐᑦ ᐅᑎᕐᑎᐅᖅᑲᓚᐅᕐᐰᑦ.