ᐊᑕᓃᑦ ᐂᑉᐸᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐊᓯᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ

¹ ᔨᕼᐅᐊᓯᐅᑉ ᐊᖓᔪᖅᑳᕐᔪᐊᖑᓂᖓᑕ 7ᖓᓐᓂ. ᔪᐊᓯ ᐊᖓᔪᖅᑳᕐᔪᐊᓐᖑᕐᐳᖅ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 40ᓂᒃ ᔨᕉᓴᓕᒻᒥ. ᐊᓈᓇᖓ ᐊᑎᖃᕐᐳᖅ ᔨᐰᔭᒥᒃ ᐱᐊᕐᓯᐸᒥᐅᑕᖅ.

² ᔨᕼᐅᐊᓯ ᐱᓂᐊᕐᓂᖃᓚᐅᕐᐳᖅ ᒎᑎᐅᑉ ᓵᖓᓂ ᓈᒻᒪᒋᔭᐅᔪᒥᒃ ᐊᔪᕆᕐᑐᐊᖑᓚᐅᕋᒥ ᔨᕼᐅᐃᐊᑕᒧᑦ ᑐᓂᕐᕈᓯᕐᑎᑦᓯᔨᒧᑦ.

³ ᒎᑎᓐᖑᐊᓄᑦ ᑐᒃᓯᐊᕐᕕᐅᖃᑦᑕᕐᑐᑦ ᐲᔭᕐᑕᐅᓚᐅᓐᖏᓚᑦ ᓱᓕ. ᐃᓄᐃᓪᓗ ᒪᓕᒃᑐ ᑕᒪᒃᑯᓂᖓ ᑐᓂᕐᕈᓯᕆᐊᕐᑐᖃᑦᑍᓐᓇᓚᐅᕐᐳᑦ ᐳᔫᕐᑎᑦᓯᔭᕐᑐᕐᐸᒡᓗᑎᒡᓗ.

⁴ ᔨᕼᐅᐊᓯᐅᑉ ᑐᓂᕐᕈᓯᕐᑎᑦᓯᔩᑦ ᐅᖃᐅᑎᕔᑦ, “ᑲᑎᑕᐅᓕᑦ ᑮᓇᐅᔧᑦ ᑐᓂᕐᕈᑕᐅᖃᑦᑕᕐᑐᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓄᑦ. ᑮᓇᐅᔧᑦ ᑐᓂᔭᐅᖃᑦᑕᕐᑐᑦ ᐃᓄᐃᑦ ᓈᓴᕐᑕᐅᓂᖏᓐᓂ ᐊᖏᕈᑎᓕᐅᕐᑐᓄᓪᓗ ᑐᓂᔭᐅᖃᑦᑕᕐᑐᑦ, ᑐᓂᓯᔪᒪᔪᓄᓪᓗ ᑐᓂᔭᐅᖃᑦᑕᕐᑐᑦ.

⁵ ᑐᓂᕐᕈᓯᕐᑎᑦᓯᔩᑦ ᐊᑐᓂᑦ ᑎᒎᕐᓯᓕᑦ ᑮᓇᐅᔭᓂᒃ ᑮᓇᐅᔧᕐᕕᖃᑦᑕᕐᑐᓂᑦ ᐊᑐᕐᑕᐅᓗᑎᒡᓗ ᐊᑕᓂᐅᑉ ᐃᒡᓗᖓᑕ ᓯᖁᑦᑎᕐᓯᒪᓂᖏᑕ ᓴᓇᔭᐅᒃᑲᓐᓂᕈᑎᒃᓴᖏᓐᓄᑦ.”

⁶ ᔨᕼᐅᐊᓯ ᐊᕐᕌᒍᓂᒃ 23ᓂᒃ ᐊᖓᔪᖅᑳᕐᔪᐊᖑᓯᒪᓕᕋᓗᐊᕐᑎᓪᓗᒍ ᓱᓕ ᑐᓂᕐᕈᓯᕐᑎᑦᓯᔩᑦ ᐊᑕᓂᐅᑉ ᐃᒡᓗᖓᑕ ᓴᓇᔭᐅᓂᒃᓴᖓᓂᒃ ᐱᒋᐊᓚᐅᓐᖏᓚᑦ.

⁷ ᑕᒪᓐᓇ ᐱᓪᓗᒍ ᐊᖓᔪᖅᑳᕐᔪᐊᑉ ᔨᕼᐅᐊᓯᐅᑉ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕐᑎᑦᓯᔨᐅᖃᑎᖏᓪᓗ ᐊᐱᕐᓱᕐᐰᑦ ᐅᖃᕐᓗᓂ, “ᖃᓄᐃᒻᒪᑦ ᐊᑕᓂᐅᑉ ᐃᒡᓗᖓ ᓯᖁᑦᑎᕐᓯᒪᓂᖏᑦ ᓱᓕ ᓴᓇᔭᐅᕙᓪᓕᐊᓐᖏᓛᑦ? ᑮᓇᐅᔭᓂᒃ ᐃᓕᐅᖅᑬᕕᖁᑎᑦᓯᓐᓂᑦ ᐱᖃᑦᑕᕐᓂᐊᕈᓐᓃᕐᐳᓯ ᐊᑕᓂᐅᑉ ᐃᒡᓗᖓ ᓴᓇᔭᐅᒃᑲᓐᓂᕈᑎᒃᓴᖏᓐᓄᑦ ᐊᑐᕐᑕᐅᖔᖃᑦᑕᕐᓂᐊᕐᒪᑕ.”

⁸ ᑐᓂᕐᕈᓯᕐᑎᑦᓯᔩᑦ ᐊᖏᖃᑎᒌᒃᐳᑦ ᑮᓇᐅᔭᓂᒃ ᑲᑎᕐᓱᐃᖃᑦᑕᕈᒪᔪᓐᓃᕐᓗᑎᒃ ᐃᓄᖕᓂᑦ ᓇᖕᒥᓂᕐᓗ ᑲᒪᔪᑑᔪᒪᓐᖏᓛᑦ ᐊᑕᓂᐅᑉ ᐃᒡᓗᖓ ᓴᓇᔭᐅᓂᒃᓴᖓᓂᒃ.

⁹ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᐃᒃᓯᕕᖕᒥᑦ ᐱᕗᖅ ᒪᑐᖓᒍᑦ ᐊᖕᒪᕐᓗᓂᐅᒃ ᑐᓂᕐᕈᓯᕐᕕᐅᑉ ᓴᓂᐊᓄᑦ ᐃᓕᕚ, ᑐᒃᓯᐊᕐᕕᒡᔪᐊᕐᒧᑦ ᐃᑎᕐᐸᓪᓕᐊᕕᐅᑉ ᑕᓕᕐᐱᐊᓄᑦ. ᑐᓂᕐᕈᓯᕐᑎᑦᓯᔨᓄᑦ ᑲᒪᔨᐅᔪᖅ ᐃᑎᕐᕕᖓᓂ ᐃᓕᓯᖃᑦᑕᕐᓂᐊᕐᑎᓪᓗᒍ ᐃᒃᓯᕐᕕᖕᒧᑦ ᑮᓇᐅᔭᓂᒃ ᑐᒃᓯᐊᕐᕕᒡᔪᐊᕐᒧᑦ ᑐᓂᔭᐅᔪᓂᒃ.

¹⁰ ᐃᒃᓯᕐᕕᒃ ᑮᓇᐅᔭᓂᒃ ᐃᓕᐅᖅᑬᕕᐅᔪᖅ ᑕᑕᑦᑖᕌᖓᑦ ᑮᓇᐅᔭᓕᕆᔨᐅᑉ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖓᑦᑕ ᑎᒍᓪᓗᒋᑦ ᓇᒃᓴᕐᐸᒃᐰᑦ ᐃᒃᐱᐊᕐᔪᖕᓄᓪᓗ ᐴᖅᑲᕐᐸᒃᓗᒋᑦ.

¹¹ ᑮᓇᐅᔧᑦ ᑲᑎᕐᓱᕐᑕᐅᔪᑦ ᓈᒻᒪᒃᓯᔭᕌᖓᑕ ᐊᑕᓂᐅᑉ ᐃᒡᓗᖓ ᓴᓇᔭᐅᓂᖓᓄᑦ ᐱᓇᓱᒃᑎᐅᔪᑦ ᑲᒪᔨᖏᓐᓄᐊᕐᑕᐅᕙᒃᐳᑦ. ᐱᓇᓱᐊᕐᑐᓄᓪᓗ ᐊᑕᓂᐅᑉ ᐃᒡᓗᖓᑕ ᓴᓇᔨᖏᓐᓄᑦ ᑖᒃᑯᐊ ᐊᑭᓕᕐᑐᐃᑦᔪᑕᐅᕗᑦ, ᕿᔪᓕᕆᔨᓄᑦ ᐋᖅᑭᒃᓱᐃᔨᓄᓪᓗ.

¹² ᐊᑕᓂᐅᑉ ᐃᒡᓗᖓᑕ ᐊᑭᓐᓇᖓᓂᒃ ᐃᓕᐅᖅᑬᔩᑦ ᐅᔭᕋᖕᓂᒡᓗ ᓇᑲᑎᕆᔩᑦ ᐱᓇᓱᐊᕈᑎᒃᓴᒥᖕᓂᒃ ᐊᑕᓂᐅᑉ ᐃᒡᓗᖓᑕ ᓴᓇᔭᐅᓂᖓᓄᑦ ᐊᑭᓕᕐᑐᕆᐊᓕᓕᒫᑦ ᐊᑭᓕᕐᑕᐅᔪᓐᓇᓚᐅᕐᐳᑦ.

¹³ ᑮᓇᐅᔧᑦ ᑐᒃᓯᐊᕐᕕᒡᔪᐊᒧᑦ ᑐᓂᔭᐅᔪᑦ ᐊᑐᕐᑕᐅᓚᐅᓐᖏᓚᑦ ᐴᒍᑕᓕᐅᕐᑎᓄᑦ ᓯᐅᓪᕕᕆᓂᒃ. ᖃᐅᒻᒪᖅᑯᑏᓪᓗ ᒪᓂᖏᓐᓂᒃ ᐋᖅᑭᒃᓱᐃᑦᔪᑎᓄᑦ ᐃᒪᕐᑎᕆᐅᑎᓂᒃ ᐴᒍᑕᓕᐅᕐᑎᓄᑦ ᑎᑦᑐᓚᐅᑎᓕᐅᕐᑎᓄᓪᓗ ᐊᓯᖏᓐᓄᓗ ᑐᒃᓯᐅᕐᕕᒡᔪᐊᑉ ᐱᐅᒃᑯᑎᒃᓴᖏᓐᓄᑦ ᒎᓗᓄᑦ ᓯᐅᓪᕕᕆᓄᓪᓗ.

¹⁴ ᐊᑭᓕᕐᑐᐃᑦᔪᑎᐅᓚᐅᕐᐳᓪᓕ ᐊᑕᓂᐅᑉ ᐃᒡᓗᖓᑕ ᓯᖁᑦᑎᕐᓯᒪᓂᖏᑕ ᓴᓇᔭᐅᒃᑲᓐᓂᕆᐊᖃᕐᓂᖓᓄᑦ.

¹⁵ ᑮᓇᐅᔧᑦ ᐊᐅᓚᑕᐅᓂᖏᑦ ᖃᐅᔨᓴᕐᑕᐅᖃᑦᑕᕆᐊᖃᓚᐅᓐᖏᓚᑦ ᐊᑭᓕᕐᑐᐃᑦᔪᑕᐅᔪᑦ, ᓴᓇᔪᓄᑦ ᐊᐅᓚᑦᓯᔩᑦ ᓈᒻᒪᑦᓯᐊᕐᑐᒥᒃ ᑮᓇᐅᔭᓂᒃ ᐊᐅᓚᑦᓯᓚᐅᕐᒪᑕ.

¹⁶ ᑮᓇᐅᔧᑦ ᑐᓂᕐᕈᑕᐅᔪᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᓄᑦ ᐊᔪᕐᑐᓕᓂᕐᒧᓪᓗ ᐃᓱᒪᒋᔪᓐᓁᕐᑕᐅᔪᕐᓯᐅᑏᑦ ᑐᒃᓯᐊᕐᕕᒡᔪᐊᕐᒧᑦ ᑐᓂᕐᕈᑕᐅᓚᐅᓐᖏᓚᑦ ᑐᓂᕐᕈᓯᕐᑎᑦᓯᔨᓄᑦ ᑭᓯᐊᓂ ᑐᕌᖓᓚᐅᕐᒪᑕ.

¹⁷ ᑍᑦᓱᒪᓂᐅᑎᓪᓗᒍ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᕼᐊᔧᐅᓪ ᐅᓇᑕᕆᐊᕐᑐᓚᐅᕐᐳᖅ ᒑᑎᒥᐅᓂᒃ ᓵᓚᒋᓪᓗᒋᓪᓗ ᑎᒍᕔᑦ, ᑖᒃᑯᓂᖓᓗ ᑎᒍᓯᒐᒥ ᔨᕉᓴᓕᒥᐅᓂᒃᑕᐅᖅ ᐱᓇᓱᐊᕈᒪᓕᓚᐅᕆᕗᖅ.

¹⁸ ᔨᕼᐅᐊᓯᐅᓪᓕ ᔫᑕᐅᑉ ᐊᖓᔪᖅᑳᕐᔪᐊᖓᑦᑕ ᓯᕗᓕᕕᓂᖏᑕ ᔨᕼᐆᓴᐸᑦᑯᑦ ᔨᕼᐅᕌᒥᐅᓪᓗ, ᐊᕼᐊᔧᐊᐅᓪᓗ ᐊᑕᓂᖅ ᐱᓪᓗᒍ ᑲᑎᕐᓱᕐᑕᕕᓂᖏᑦ ᐱᔪᒥᓇᕐᑐᑦ ᓇᖕᒥᓂᕐᓗ ᑲᑎᕐᓱᐊᕕᓂᓂ ᒎᓗᐃᓪᓗ ᐊᑕᓂᐅᑉ ᐃᒡᓗᖓᓃᑦᑐᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓃᑦᑐᑦ, ᑐᔫᑎᒋᕔᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕼᐊᔧᐅᓪᒧᑦ, ᑖᒃᑯᓂᖓᓗ ᐱᑎᑕᐅᒐᒥ ᔨᕉᓴᓕᒥᐅᓂᒃ ᑲᒪᓇᓱᐊᕈᓐᓃᓚᐅᕐᐳᖅ.

¹⁹ ᔪᐊᓯᐅᑉ ᐱᓂᐊᕐᓂᕕᓂᓕᒫᖏᑦ ᐊᐅᓚᑦᓯᑎᓪᓗᒍ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐱᓂᐊᕐᓂᕕᓂᖏᑕ ᑎᑎᕋᕐᑕᐅᓯᒪᕕᖏᓐᓂ.

²⁰ ᔪᐊᓯᐅᑉ ᐊᖓᔪᖅᑳᖁᑎᖏᑕ ᐊᑭᕋᕐᑐᓕᕋᒥᑦᔪᒃ ᑐᖁᑕᐅᑎᓚᐅᕐᐹᑦ ᓄᓇᒥ ᐱᐊᓯ ᒥᓗᒥ, ᓮᓚᒧᓐᖓᐅᒋᐊᑉ ᐊᖅᑯᑎᖓᓃᑦᑐᒥ.

²¹ ᑖᒃᑯᐊ ᐊᖓᔪᖅᑳᖁᑎᖏᑦ ᑐᖁᑦᓯᓚᐅᕐᑐᑦ ᐅᑯᐊᖑᕗᑦ ᔪᓴᑲᕆ ᓯᒥᐊᑎᐅᑉ ᐃᕐᓂᖓ ᔨᕼᐅᔭᐸᓗ ᓲᒥᕆᐅᑉ ᐃᕐᓂᖓ, ᔪᐊᓯ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᓯᕗᓕᕕᓂᖏᑕ ᐃᓗᕕᖃᕐᕕᖏᓐᓂ ᑍᕕᑎᐅᑉ ᐃᒡᓗᒐᓴᖏᓐᓂ, ᐃᕐᓂᖓᑕᓗ ᐊᒪᔧᐊᐅᑉ ᑭᖑᕝᕕᓚᐅᕐᐹ ᐊᖓᔪᖅᑳᕐᔪᐊᖑᓂᖓ.