ᐊᑕᓃᑦ ᐂᑉᐸᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓔᔭᐅᑉ ᐊᖓᔪᖅᑳᖑᓂᖓ ᔫᑕᒥ

¹ ᐊᑕᓔᐊ ᐊᕼᐊᔧᐊᐅᑉ ᐊᓈᓇᖓ ᖃᐅᔨᓕᕋᒥ ᐃᕐᓂᖓᑕ ᐃᓅᔪᓐᓃᕐᓂᖓᓂᒃ, ᐊᖓᔪᖅᑳᕐᔪᐊᑉ ᕿᑐᕐᖔᓕᒫᖏᑦ ᑐᖁᕋᕐᑕᐅᑎᓕᕐᐰᑦ.

² ᔨᕼᐅᓰᐸ ᐊᖓᔪᖅᑳᕐᔪᐊᑉ ᔪᕌᒻ ᐸᓂᖓ ᐊᕼᐊᔧᐊᐅᑉ ᓇᔭᖓ, ᐃᔨᕋᕐᑐᕐᓗᓂ ᔪᐊᓯ ᐊᕼᐊᔧᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᑉ ᕿᑐᕐᖓᖏᓐᓂᑦ ᑎᒍᕚ ᑐᖁᕋᕐᑕᐅᖏᓐᓂᖏᓐᓂ ᐊᕝᕗᑎᑎᓪᓗᒍ ᐊᑕᓔᐊᒥᑦ ᐃᔨᕐᐹ. ᑖᓐᓇ ᑐᖁᑕᐅᓚᐅᓐᖏᓚᖅ.

³ ᔪᐊᓯ ᐰᕆᔨᖓᓗ ᐃᔨᕐᑕᐅᓯᒤᓐᓇᓚᐅᕐᐴᒃ ᐊᕐᕌᒍᓂᒃ 6ᓂᒃ ᐊᑕᓂᐅᑉ ᐃᒡᓗᖓᓂᑦ ᐊᑕᓔᐊᐅᑉ ᐊᐅᓚᑦᓯᔨᐅᓂᖓᓂ.

⁴ ᐊᕐᕌᒍᐃᑦ 7ᖓᓐᓂ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᐊᖓᔪᖅᑳᕐᔪᐊᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᑦ 100ᓄᑦ ᑳᕆᑎᔅᓂᒃ ᑍᔭᐅᔪᑦ ᖃᐅᔨᓴᕐᑎᖁᑎᖏᓪᓗ ᕾᖁᕔᑦ ᐊᑕᓂᐅᑉ ᐃᒡᓗᖓᓄᑦ; ᐅᖃᕕᒡᓗᑎᒡᓗ ᐊᖏᖃᑎᒋᕔᑦ ᐊᑕᓂᐅᑉ ᐃᒡᓗᖓᓂ, ᑕᑯᑎᓕᕐᓗᒋᓪᓗ ᐊᖓᔪᖅᑳᕐᔪᐊᑉ ᐃᕐᓂᖓᓂᒃ ᔪᐊᓯᒥᒃ.

⁵ ᐅᖃᐅᑎᕔᓪᓗ, “ᐃᒫᒃ ᐱᓇᓱᐊᕐᓂᐊᕐᐳᓯ, ᐱᖓᓲᓕᖅᑲᖓᓗᓯ ᐊᕕᒃᑐᕐᓯᒪᓗᓯ ᓴᐸᑎᐅᓕᕐᐸᑦ, ᐃᓚᖏᑦ ᖃᐅᔨᓵᖃᕐᑐᒃᓴᐅᕗᑦ ᐊᖓᔪᖅᑳᕐᔪᐊᑉ ᐃᒡᓗᖃᕐᕕᖓᓂᒃ,

⁶ ᐃᓚᖏᓪᓗ ᖃᐅᔨᓵᖃᕐᓗᑎᒃ ᓲᕆ ᐃᑎᕐᑕᕐᕕᒡᒥᒃ, ᑖᒃᑯᐊ ᐱᖓᔪᐃᖏᑦ ᑐᒃᓯᐊᕐᕕᒡᔪᐊᕐᒥᒃ ᖃᐅᔨᓵᖃᕐᓂᐊᕐᐳᑦ ᐃᓇᖏᕐᑕᐅᑎᓗᑎᒃ.

⁷ ᑖᒃᑯᐊ ᒪᕐᕈᐃᑦ ᖃᐅᔨᓴᕐᑏᑦ ᓴᐸᑎᐅᓕᕌᖓᑦ ᓄᖅᑲᖓᑬᓐᓇᕐᐸᒃᑑᒐᓗᐊᑦ, ᓄᖅᑲᖓᖏᓪᓗᑎᒃ ᖃᐅᔨᓴᑐᐃᓐᓇᓛᕐᐳᑦ ᐊᖓᔪᖅᑳᕐᔪᐊᑉ ᓇᔪᕐᑕᖓᓂᒃ ᐊᑕᓂᐅᑉ ᐃᒡᓗᖓᓂ.

⁸ ᐊᖓᔪᖅᑳᕐᔪᐊᑉ ᐊᕙᑖᓃᖏᓐᓇᕐᑐᒃᓴᐅᕗᑦ ᐅᓇᑕᐅᑎᓂᒃ ᑎᒍᒥᐊᕐᓗᑎᒃ. ᖃᒡᓕᓗᐊᕐᑐᖃᕐᐸᑦ ᑖᑦᓱᒧᖓ ᑐᖁᑕᐅᔪᒃᓴᐅᕗᖅ. ᐊᖓᔪᖅᑳᕐᔪᐊᖅ ᓇᒧᑐᐃᓐᓇᖅ ᐂᔭᕌᖓᑦ ᒪᓕᒃᑕᐅᖏᓐᓇᕐᑐᒃᓴᐅᕗᖅ.”

⁹ ᑕᕝᕙ ᐅᓇᑕᕐᑎᓄᑦ ᐊᖓᔪᖅᑳᑦ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐊᑐᕐᑕᐅᖁᔭᖏᑦ ᒪᓕᑦᓯᐊᕐᓗᒋᑦ ᐱᓇᓱᐊᓚᐅᕐᐳᑦ. ᐅᓇᑕᕐᑎᖁᑎᑎᒃ ᐊᑐᓂᑦ ᐱᔭᒃᓴᖏᓐᓂᒃ ᓇᓗᓁᕐᓯᕕᒋᕔᑦ ᓴᐸᑎᐅᓕᕐᐸᑦ ᐱᓇᓱᐊᕐᓂᐊᕐᑐᑦ ᓄᖅᑲᖓᓂᐊᕐᑐᓪᓗ ᓇᓗᓁᕆᐊᕐᑐᖃᑦᑕᕐᐳᑦ ᔨᕼᐅᐃᐊᑕᒧᑦ.

¹⁰ ᔨᕼᐅᐃᐊᑕᐅᑉ ᐅᓇᑕᕐᑎᓄᑦ ᐊᖓᔪᖅᑳᖑᔪᑦ ᖃᓗᒋᐊᓂᒃ ᐊᒡᕖᕋᐅᑎᓂᒡᓗ ᐱᑖᕐᑎᑉᐰᑦ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐱᕕᓂᖏᓐᓂᒃ ᐊᑕᓂᐅᑉ ᐃᒡᓗᖓᓃᑦᑐᓂᒃ.

¹¹ ᐅᓇᑕᕐᑏᑦ ᖃᐅᔨᓴᕐᑎᐅᑎᑕᐅᔪᑦ ᐅᓇᑕᐅᑎᓕᔭᕐᓗᑎᒃ ᐃᓂᒋᔭᕆᐊᖃᓚᐅᕐᑕᒥᖕᓃᑉᐳᑦ ᐊᖓᔪᖅᑳᕐᔪᐊᑉ ᐊᕙᑖᓂ ᑐᓂᕐᕈᓯᕐᕕᐅᑉ ᓴᓂᐊᓂ ᐊᑕᓂᐅᑉ ᐃᒡᓗᓕᒫᖓᓂ. ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐅᓐᓄᐊᓪᓗᐊᑉ ᓇᓛᓄᑦ ᑎᑭᐅᓯᒪᓪᓗᑎᒃ.

¹² ᔨᕼᐅᐃᐊᑕᐅᑉ ᐊᖓᔪᖅᑳᕐᔪᐊᑉ ᐃᕐᓂᖓ ᓴᖅᑭᑎᓪᓗᓂᐅᒃ ᐊᖓᔪᖅᑳᕐᔪᐊᕐᓯᐅᑎᒥᒃ ᓇᓴᕐᐹ; ᑐᓂᓪᓗᓂᐅᒡᓗ ᐊᖏᖃᑎᒌᒃᓯᒪᓂᖏᑕ ᓇᓗᓁᕐᑕᐅᑦᔪᑎᖏᓐᓂᒃ ᐊᖓᔪᖅᑳᕐᔪᐊᖑᓕᕐᓂᖓᓗ ᓇᓗᓁᕐᓗᒍ ᐅᕐᓱᒧᑦ ᓂᐊᖁᐊᒍᑦ ᑯᕝᕕᕆᕚᑦ; ᐃᓄᐃᑦ ᐸᑦᑕᒃᑐᕐᓗᑎᒃ ᓂᐱᒋᒃᑑᓪᓗᑎᒃ ᓂᓪᓕᐊᕗᑦ, “ᐊᖓᔪᖅᑳᕐᔪᐊᖅ ᐊᑯᓂ ᐃᓅᓕ!”

¹³ ᐊᑕᓔᐊ ᑐᓵᓕᕋᒥ ᐃᓄᐃᑦ ᐅᓇᑕᕐᑏᓪᓗ ᓂᐱᖏᓐᓂᒃ ᑕᑯᔭᕐᑐᕐᐳᖅ ᐃᓄᖕᓂᒃ ᐊᑕᓂᐅᑉ ᐃᒡᓗᖓᓃᑦᑐᓂᒃ.

¹⁴ ᑕᑯᒐᒥᓗ ᐊᖓᔪᖅᑳᕐᔪᐊᕐᒥᒃ, ᓇᖏᕐᑐᒥᒃ ᓇᐸᔪᐊᓗᐃᑦ ᓴᓂᐊᓂ ᐱᐅᓯᕆᔭᐅᓲᖅ ᒪᓕᒡᓗᒍ. ᐅᓇᑕᕐᑏᑦ ᐊᖓᔪᖅᑳᖏᑦ ᓱᐴᒐᕐᑏᓪᓗ ᓴᓂᐊᓂ ᓇᖏᕐᓗᑎᒃ, ᐃᓅᓕᒫᓗ ᓇᑭᑐᐃᓐᓇᖅ ᐱᓯᒪᔪᑦ ᑕᕝᕙᓃᑉᐳᑦ ᖁᕕᐊᓱᒃᑐᐊᓘᓪᓗᑎᒃ ᓱᐴᒐᕐᓂᒡᓗ ᓂᓪᓕᐊᑎᑦᓯᓪᓗᑎᒃ. ᐊᑕᓔᐊᐅᓪᓗ ᐊᓐᓄᕌᓂ ᐊᓕᒃᐰᑦ ᓂᐱᑭᑦᑑᓪᓗᓂᓗ ᐅᖃᕐᐳᖅ, “ᐊᑭᕋᕐᑐᕐᑎᐅᕗᓯ! ᐊᑭᕋᕐᑐᕐᑎᐅᕗᓯ!”

¹⁵ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨᐅᑉ ᐊᖓᔪᖅᑳᑦ ᐅᓇᑕᕐᑎᓄᑦ 100ᐅᓈᕐᑎᕐᑐᓄᑦ ᐅᖃᐅᑎᕔᑦ ᑎᒍᔭᐅᖁᓪᓗᒍ ᐅᓇᑕᕐᑎᖁᑎᖏᓐᓄᑦ ᑖᑦᓱᒥᖓᓗ ᐃᑲᔪᕐᑐᕋᓱᐊᕐᑐᑦ ᑐᖁᑕᐅᖃᑦᑕᖁᕔᑦ. ᐅᖃᐅᑎᓯᒪᓚᐅᕋᒥᒋᑦ ᐊᑕᓔᐊ ᑐᖁᑕᐅᖁᓇᒍ ᐊᑕᓂᐅᑉ ᐃᒡᓗᖓᑕ ᐃᓗᐊᓂ.

¹⁶ ᑕᕝᕙ ᐅᓇᑕᕐᑏᑦ ᑎᒍᕚᑦ ᕿᒧᒃᓯᐅᑎᓄᑦ ᐃᑎᕐᕕᐅᓲᒧᑦ ᐊᖓᔪᖅᑳᕐᔪᐊᑉ ᐃᒡᓗᖓᓄᐊᖓᔪᒧᑦ ᑎᑭᓐᓇᒥᒃ ᑕᕝᕙᓂ ᑐᖁᑕᐅᕗᖅ.

¹⁷ ᔨᕼᐅᐃᐊᑕ ᐊᖏᖃᑎᓕᐅᕈᑎᒥᒃ ᐋᖅᑮᕗᖅ ᐊᑕᓂᕐᒧᑦ ᐊᖓᔪᖅᑳᕐᔪᐊᕐᒧᓪᓗ ᐃᓄᖕᓄᓪᓗ ᐊᑕᓂᖕᒧᑦ ᐃᓄᖁᑕᐅᖏᓐᓇᖁᓪᓗᒋᑦ. ᐊᖏᖃᑎᓕᐅᕈᑎᓕᐅᕆᓪᓗᓂᓗ ᐊᖓᔪᖅᑳᕐᔪᐊᕐᒧᑦ ᐊᑕᓂᕐᒧᓪᓗ ᐃᓄᖁᑕᐅᖏᓐᓇᖁᓪᓗᒋᑦ. ᐊᖏᖃᑎᓕᐅᕈᑎᓕᐅᕆᓪᓗᓂᓗ ᐊᖓᔪᖅᑳᕐᔪᐊᑉ ᐃᓄᖁᑎᖏᑕᓗ ᐊᖏᓯᒪᖃᑎᒌᒍᑎᒋᓂᐊᕐᑕᖓᓐᓂᒃ.

¹⁸ ᐃᓄᓕᒫᑦ ᓇᑭᑐᐃᓐᓇᖅ ᐱᓯᒪᔫᑦ ᐰᓕᐅᑉ ᑐᒃᓯᐊᕐᕕᒡᔪᐊᖓᓄᑦ ᐂᓪᓗᑎᒃ ᒎᑎᓐᖑᐊᖅ ᐅᕐᕈᑎᑉᐹᑉ, ᑐᓂᕐᕈᓯᕐᕕᒃᑕᖏᓪᓗ ᓴᓇᓐᖑᐊᕐᓯᒪᔪᓪᓗ ᓯᖁᑦᑎᕐᑕᐅᕗᑦ. ᒫᑖᓂ ᑐᓂᕐᕈᓯᕐᑎᑦᓯᔨᐅᔪᖅ ᑕᕝᕙᓂ ᑐᓂᕐᕈᓯᕐᕕᐅᑉ ᓴᓂᐊᓂ ᑐᖁᑕᐅᕗᖅ. ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᐅᓇᑕᕐᑎᓂᒃ ᖃᐅᔨᓴᕐᑎᐅᓂᐊᕐᑐᓂᒃ ᑎᓕᓯᕗᖅ ᐊᑕᓂᐅᑉ ᑐᒃᓯᐊᕐᕕᒃᔪᐊᖓᓂ.

¹⁹ ᑖᒃᑯᐊ ᕾᖁᕔᑦ ᐊᖓᔪᖅᑳᖑᔪᑦ ᐅᓇᑕᕐᑎᓄᑦ ᑳᕆᑎᔅᓄᑦ 100ᐅᓈᕐᑎᕐᑐᓄᑦ, ᖃᐅᔨᓴᕐᑎᐅᓂᐊᕐᑐᓪᓗ ᐊᖓᔪᖅᑳᕐᔪᐊᕐᒧᑦ ᐃᓄᓕᒫᓄᓪᓗ. ᔪᐊᓯ ᐊᖓᔪᖅᑳᕐᔪᐊᖑᓕᕐᑐᖅ ᑐᒃᓯᐊᕐᕕᒡᔪᐊᒥᑦ ᐊᓂᖃᑎᒋᕚᑦ, ᖃᐅᔨᓴᕐᕕᐅᑉ ᐃᑎᕐᕕᖓᒍᑦ ᐊᖓᔪᖅᑳᕐᔪᐊᑉ ᐃᒡᓗᖃᕐᕕᖓᓄᐊᕈᑎᕚᑦ. ᑕᕝᕙᓂᓗ ᐃᒃᓯᕙᐅᑕᕐᔪᐊᒥᓄᑦ ᐃᖏᑉᐳᖅ.

²⁰ ᐃᓄᓕᒫᓪᓗ ᓇᑭᑐᐃᓐᓇᖅ ᑎᑭᓯᒪᔪᑦ ᖁᕕᐊᓱᒃᐳᒃ; ᐃᒡᓗᒐᓮᓪᓗ ᐃᓱᒫᓗᒍᓐᓃᕐᐳᑦ, ᐊᑕᓔᐊᐅᑉ ᑐᖁᑕᐅᓚᐅᕐᓂᖓᓄᑦ ᐊᖓᔪᖅᑳᖃᕐᕕᐅᑉ ᐃᓗᐊᓂ.

²¹ ᔨᕼᐅᐊᓯ ᐊᖓᔪᖅᑳᕐᔪᐊᓐᖑᕐᐳᖅ ᐊᕐᕌᒍᖃᕐᓗᓂ 7ᓂᒃ.