ᐊᑕᓃᑦ ᐂᑉᐸᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᕼᐊᐱᐅᑉ ᑭᖑᕚᖏᑕ ᑐᖁᕋᕐᑕᐅᓂᖏᑦ

¹ ᓴᒥᐊᕆᐊᒥ ᐂᕼᐊᑉ ᑭᖑᕚᖃᓚᐅᕐᐳᖅ 70ᓂᒃ ᔨᕼᐆ ᑎᑎᕋᕐᐳᖅ ᔨᔭᕆᐅᓪᓕᐅᑉ ᐊᖓᔪᖅᑳᖏᓐᓄᑦ ᓯᕗᓪᓕᕐᑎᒋᔭᐅᔪᓄᓪᓗ ᐂᕼᐊᐱᐅᓪᓗ ᕿᑐᕐᖓᖏᑕ ᑲᒪᔨᖏᓐᓄᑦ ᑎᑎᕋᕐᑕᓂᓗ ᐊᐅᓪᓚᕐᑎᓪᓗᓂᒋᑦ ᓴᒥᐊᕆᐊᒧᑦ. ᑎᑎᕋᕐᑕᖏᑦ ᐃᒫᒃ ᐅᖃᐅᓯᖃᕐᐳᑦ,

² “ᑎᑎᖅᑲᑦ ᑖᒃᑯᐊ ᐃᓕᑦᓯᓐᓄᑦ ᑎᑭᑐᐊᕐᐸᑕ ᐊᖓᔪᖅᑳᑦᓯ ᐃᕐᓂᖏᓐᓂᒃ ᐱᓯᒪᒐᑦᓯ, ᕿᒧᒃᓯᐅᑎᖃᕋᑦᓯ ᕿᒻᒥᕐᔪᐊᖃᕐᓗᓯᓗ, ᐃᒡᓗᒐᓴᒡᔪᐊᖁᑎᓯᓗ ᐱᔭᐅᑦᔧᕐᓯᒪᖕᒪᑕ ᐅᓇᑕᐅᑎᖃᑦᓯᐊᕐᓗᓯᓗ.

³ ᐊᖓᔪᖅᑳᑦᓯ ᐃᕐᓂᖏᑕ ᐃᓚᖓᓐᓂᒃ ᐱᔪᓐᓇᑦᓯᐊᕐᑐᒥᒃ ᐊᖓᔪᖅᑳᑦᓯᓐᓄᑦ ᐱᔪᒥᓇᕆᔭᐅᒐᔭᕐᑐᒥᒃ ᓂᕈᐊᕐᓗᓯ ᐊᑖᑕᖓᑦᑕ ᐃᒃᓯᕙᐅᑕᕐᔪᐊᖓᓂᒃ ᐃᓂᑖᕐᑎᓕᕐᓯᐅᒃ ᐊᖓᔪᖅᑳᕆᓕᕐᑕᑦᓯ ᐃᒡᓗᖓ ᓴᐳᑎᓯᒪᓇᓱᐊᕐᓯᐅᒃ.”

⁴ ᑖᒃᑯᐊᓕ ᓯᕗᕌᓂᖃᓕᕐᐳᑦ ᐅᖃᕐᓗᑎᒡᓗ, “ᐊᖓᔪᖅᑳᕐᔪᐊᒃ ᒪᕐᕉᒃ ᓵᓚᖃᕈᓐᓇᓚᐅᖏᑉᐸᑎᑦ ᐅᕙᒍᓪᓕᑭᐊᕐᖎ ᐱᔪᓐᓇᕐᓂᐊᓐᖏᓚᒍᑦ?”

⁵ ᑕᕝᕙ ᐊᖓᔪᖅᑳᕐᔪᐊᑉ ᐃᒡᓗᖓᓂ ᐊᖓᔪᖅᑳᑦ, ᐊᐅᓚᑦᓯᔩᓪᓗ ᓯᕗᓕᕐᑏᓪᓗ ᑲᒪᔨᐅᔪᓪᓗ ᑭᐅᑦᔪᑎᒥᖕᓂᒃ ᔨᕼᐆᒧᑦ ᐋᑕᐅᑎᑦᓯᕗᑦ, “ᐃᓕᖕᓄᑦ ᐱᔨᐅᒐᑦᑕ ᐊᑐᖁᔭᕐᓂᒃ ᐱᓇᓱᐊᕈᒪᕗᒍᑦ, ᐊᖓᔪᖅᑳᕐᔪᐊᓐᖑᕐᑎᑦᓯᔪᒪᓐᖏᓚᒍᓪᓕ, ᐃᕝᕕᑦ ᐊᑲᐅᓂᕐᐹᖑᓇᓱᒋᔭᕐᓂᒃ ᐱᓇᓱᐊᓕᕆᑦ.”

⁶ ᑕᕝᕙ ᔨᕼᐆᑉ ᑎᑎᕋᕐᕕᒋᒃᑲᓐᓂᕐᐰᑦ ᐅᖃᐅᓯᖃᕐᑐᓂᒃ ᐃᒫᒃ: “ᐅᕙᓐᓂᒃ ᑕᐱᖃᕈᑦᓯ ᓈᓚᒍᒪᒍᑦᓯᓐᖓᓗ, ᐊᖓᔪᖅᑳᕆᓚᐅᕐᑕᑦᓯ ᐃᕐᓂᖏᑦ ᓂᐊᖁᐃᕐᑕᒃᓴᕆᕙᓯ ᔨᔭᕆᐅᓪᒧᑦ ᑲᑎᔭᕐᑐᕐᓂᐊᕐᐸᑦᓯᓐᖓ ᖃᐅᒃᐸᑦ ᑍᒤᓪᓗᐊᓕᕐᐸᑦ.” ᐊᖓᔪᖅᑳᕐᔪᐊᑉ ᐃᕐᓂᖏᑦ 70 ᐃᒡᓗᒐᓮᑦ ᐊᖓᔪᖅᑳᖏᓐᓄᑦ ᓇᔪᕐᑎᒋᔭᐅᓪᓗᑎᒃ ᐱᕈᕐᓴᔭᐅᓚᐅᕐᒪᑕ.

⁷ ᔨᕼᐆᑉ ᑎᑎᕋᖏᓐᓄᑦ ᑎᑭᑕᐅᒐᒥᒃ ᑖᒃᑯᐊ ᐊᖓᔪᖅᑳᕐᔪᐊᑉ ᐃᕐᓂᖏᑦ 70 ᐃᓘᓐᓇᑎᒃ ᑐᖁᑕᐅᑎᑉᐰᑦ ᓂᐊᖁᖏᓪᓗ ᐴᖅᑲᕐᓗᒋᑦ ᐃᕕᒐᕐᓄᑦ, ᔨᕼᐆᒧᑦ ᑐᔫᑎᒋᕔᑦ ᔨᔭᕆᐅᓪᒦᑦᑐᒧᑦ.

⁸ ᔨᕼᐆᒧᑦ ᐅᖃᕆᐊᕐᑐᕐᑐᒧᑦ ᐅᐸᒃᑕᐅᓪᓗᓂ ᐅᖃᐅᑦᔭᐅᕗᖅ, “ᐊᖓᔪᖅᑳᕐᔪᐊᑉ ᐃᕐᓂᖏᑦᑕ ᓂᐊᖁᖏᑦ ᑎᑭᐅᑦᔭᐅᕗᑦ!” ᑕᕝᕙ ᔨᕼᐆ ᐅᖃᐅᑦᔨᕗᖅ, ᒪᕐᕈᐃᓕᓗᒋᑦ ᖃᓕᕇᒡᓗᑎᒃ ᑲᑎᑕᐅᓕᑦ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖓᓄᑦ ᑍᒤᓕᖓᔪᒃᓴᐅᕗᑦ ᖃᐅᒃᐸᒧᑦ ᐅᓪᓛᒧᑦ ᑎᑭᓪᓗᒍ.

⁹ ᑍᒤᒻᒪᑦ ᐅᓪᓛᖑᓕᕐᑎᓪᓗᒍ, ᐊᓂᒐᒥ ᓇᖏᓕᕐᐳᖅ, ᐅᖃᕐᓗᓂᓗ ᐃᓄᓕᒫᓄᑦ, “ᐸᓯᔭᒃᓴᐅᓐᖏᓚᓯ. ᐅᕙᖎᓐᓇ ᐊᖓᔪᖅᑳᕋ ᐊᑭᕋᕐᑐᓚᐅᕋᒃᑯ ᑐᖁᑦᓱᒪᓪᓗᒍ; ᐅᑯᐊᓕ ᑭᓇᒃᑯᓐᓄᑦ ᑐᖁᑕᐅᓐᓂᕐᐹᑦ?

¹⁰ ᖃᐅᔨᒪᓕᕆᑦᓯ, ᐊᑕᓂᐅᑉ ᐅᖃᐅᓯᕆᓯᒪᔭᓕᒫᖏᑦ ᐂᕼᐊᑉ ᐃᓚᓕᒫᖏᑦ ᐱᓪᓗᒋᑦ ᐊᑕᐅᓯᕐᒥᒡᓘᓐᓃᑦ ᓱᓕᖏᑦᑐᖃᕐᓂᐊᓐᖏᓚᑦ, ᐊᑕᓂᖅ ᐱᓇᓱᐊᕐᓯᒪᕗᖅ ᐅᖃᐅᓯᕆᓚᐅᕐᑕᓕᒫᓂ ᒪᓕᒡᓗᒋᑦ ᐱᔨᒥᒍᑦ ᐃᓔᑦᔭᒃᑯᑦ.”

¹¹ ᑍᒤᒻᒪᑦ ᔨᕼᐆ ᑐᖁᑕᐅᑎᑦᓯᓚᐅᕐᐳᖅ ᐂᕼᐊᑉ ᐃᓚᓕᒫᖏᓐᓂᒃ ᐊᒥᐊᒃᑯᑕᖃᕐᓇᒋᑦ ᔨᔭᕆᐅᓪᒥ, ᐊᖓᔪᖅᑳᖁᑎᕕᓂᖏᓪᓗ ᐃᓚᓐᓇᕆᔭᖏᓪᓗ ᑐᓂᕐᕈᓯᕐᑎᑦᓯᔨᖁᑎᖏᓪᓗ ᑕᒪᕐᒥᒃ ᐊᒥᐊᒃᑯᖃᕐᑎᓚᐅᓐᖏᓔᑦ.

¹² ᔨᕼᐆ ᐊᐅᓪᓚᓕᕆᕗᖅ ᓴᒥᐊᕆᐊᒧᐊᕐᓗᓂ. ᐱᑦ-ᐃᑭᑦᒧᑦ ᑎᑭᑉᐳᖅ ᓰᐱᓕᕆᕕᖕᒧᑦ,

¹³ ᔨᕼᐆᓗ ᐊᕼᐊᔧᐊᐅᑉ ᐃᓚᒋᔭᖏᓐᓂᒃ ᑲᑎᑦᓯᕗᖅ ᔫᑕᒥᐅᓄᑦ ᐊᖓᔪᖅᑳᕐᔪᐊᖑᓚᐅᕐᑑᑉ, ᐊᐱᕆᕔᓪᓗ, “ᑭᓇᒃᑰᕕᓰ?” ᑖᒃᑯᐊ ᑭᐅᕚᑦ, “ᐊᕼᐊᔧᐊᒥᒃ ᐃᓚᖃᕐᐳᒍᑦ ᑕᒪᐅᓐᖓᕐᓯᒪᕗᒍᑦ ᑲᑎᓯᔪᒪᓪᓗᑕ ᐊᖓᔪᖅᑳᕐᔪᐊᑉ ᕿᑐᕐᖓᖏᓐᓂᒃ ᓄᓕᐊᕆᓚᐅᕐᑕᖓᑕᓗ ᐊᓈᓇᖓᓂᒃ.”

¹⁴ ᔨᕼᐆᑉ ᑎᒍᔭᐅᖁᕔᑦ ᐆᒪᑎᓪᓗᒋᑦ, ᑕᕝᕙ ᑎᒍᔭᐅᕗᑦ ᑐᖁᕋᕐᑕᐅᓪᓗᑎᒡᓗ ᐃᑎᕐᓴᒥ ᐱᑦ-ᐃᑭᑦᒦᑦᑑᑉ ᖃᓂᒋᔭᖓᓂ. ᑲᑎᓪᓗᒋᑦ ᐊᖑᑏᑦ ᑐᖁᕋᕐᑕᐅᔪᑦ ᐅᓄᕐᓂᖃᕐᐳᑦ 42ᓂᒃ ᑖᒃᑯᐊᓗ ᐊᒥᐊᒃᑯᖃᕐᑎᓐᖏᓔᑦ.

¹⁵ ᑕᕝᕙᓐᖓᑦ ᐱᓪᓗᓂ ᔨᕼᐅᓇᑕᑉᒥᒃ ᕆᑳᐱᐅᑉ ᐃᕐᓂᖓᓂᒃ ᑲᑎᓯᕗᖅ, ᐸᕆᐊᕐᓯᒪᔪᒥᒃ ᑖᑦᓱᒥᖓ, ᔨᕼᐆᑉ ᑲᑎᒐᒥᐅᒃ ᐊᐱᕆᕚ, “ᐅᕙᓐᓂᒃ ᑕᐱᖃᕐᐲᑦ, ᐅᕙᖓᑦᑕᐅᖅ ᐃᓕᖕᓂᒃ ᑕᐱᖃᕈᒪᒐᒪ?” ᔨᕼᐅᓇᑖᐅᑉ ᑭᐅᕚ, “ᐋ ᑕᐱᖃᕐᐳᖓ ᐃᓕᖕᓂᒃ.” ᔨᕼᐆ ᐅᖃᐅᑎᕚ, “ᑍᒤᓕᖓᒍᓐᓄᑦ ᐊᒡᒐᑎᑦ ᐃᓴᓚᐅᒃᑭᑦ.” ᐃᓴᖕᒪᒍ ᐊᒡᒐᖏᑎᒍᑦ ᑎᒍᓪᓗᒍ ᕿᒧᒃᓯᐅᑎᒥᓄᑦ ᐊᒃᓴᓗᐊᓕᖕᒧᑦ ᐃᑭᑎᑉᐹ.

¹⁶ ᔨᕼᐆᑉ ᐅᖃᐅᑎᕚ, “ᒪᓕᒡᓗᖓ ᐊᑕᓂᕐᒧᑦ ᐱᓇᓱᐊᕐᕕᖃᒻᒪᕆᒍᒪᓂᕋ ᑕᑯᓂᐊᕋᕕᐅᒃ.” ᑕᕝᕙ ᕿᒧᒃᓯᐅᑎᒥᓂ ᐊᒃᓴᓗᐊᓕᖕᒥ ᐃᑭᒪᖃᑎᒋᓕᕐᐹ.

¹⁷ ᔨᕼᐆ ᓴᒥᐊᕆᐊᒧᑦ ᑎᑭᓐᓇᒥ ᐂᕼᐊᑉ ᕿᑐᕐᖓᖏᑦ ᐊᒥᐊᒃᑰᔪᓕᒫᑦ ᑐᖁᕋᕐᐰᑦ ᐃᓘᓐᓇᑎᒃ ᓄᖑᓪᓗᒋᑦ ᐊᑕᓂᐅᑉ ᐅᖃᐅᓯᕆᓯᒪᔭᖓ ᐃᓔᑦᔭᒃᑯᑦ ᒪᓕᒡᓗᒍ.

ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᐸᒃᑐᑦ ᑐᖁᑕᐅᓂᖓᑦ

¹⁸ ᔨᕼᐆᓪᓗ ᐃᓄᓕᒫᑦ ᑲᑎᖁᕔᑦ, ᐅᖃᐅᑎᓪᓗᒋᓪᓗ: “ᐂᕼᐊᑉ ᐰᓕᒥᒃ ᐱᔨᑦᓯᓚᐅᕐᐳᖅ ᒥᑭᔪᒥᒃ, ᔨᕼᐆᓕ ᐰᓕᒥᑦ ᐊᖏᓂᕐᓴᒥᒃ ᐱᔨᑦᓯᕐᓂᐊᕐᐳᖅ.

¹⁹ ᒫᓐᓇ ᐰᓕᐅᑉ ᓇᓚᐅᑦᑍᔪᖁᑎᓕᒫᖏᑦ, ᐅᕙᓐᓄᑦ ᕾᖁᔭᐅᓚᐅᕐᓕᑦ, ᑭᒡᒐᕐᑐᕐᑎᓕᒫᖏᑦ, ᐊᔪᕆᕐᑐᐃᔨᖁᑎᓕᒫᖏᓪᓗ, ᓇᓪᓕᐊᓐᓂᒡᓘᓐᓃᑦ ᕾᑦᑍᓕᔪᖃᕐᓂᐊᕋᓂ: ᑐᓂᕐᕈᓯᕆᐊᖃᕋᒪ ᐊᖏᔪᒥᒃ ᐰᓕᒧᑦ; ᓇᓪᓕᐊᑦ ᐅᐸᒃᑍᓕᓂᐊᕐᑐᖅ ᑖᓐᓇ ᑐᖁᑕᐅᓂᐊᕐᐳᖅ.” ᔨᕼᐆᓕ ᑍᒤᓕᐅᕐᐳᖅ ᐱᓐᖏᓯᕐᑐᕐᓗᓂ, ᐰᓕᒧᑦ ᑐᒃᓯᐊᕐᐸᒃᑐᓕᒫᑦ ᑐᖁᑦᓱᒪᓪᓗᒋᑦ.

²⁰ ᔨᕼᐆᓗ ᐅᖃᕐᐳᖅ, “ᐅᓪᓗᒥ ᓇᓗᓁᕐᓯᓕᕆᑦᓯ ᐰᓕᒧᑦ ᐅᓪᓗᕐᓯᐅᕐᕕᒃᓴᒥᒃ ᐃᑦᔪᕐᓁᑎᓪᓗᒍᓗ!” ᑕᒪᓐᓇᓗ ᑲᔪᓯᑎᑕᐅᕗᖅ.

²¹ ᔨᕼᐆᓗ ᑎᓕᓯᕗᖅ ᐃᓴᕆᐊᓕᒥᐅᓕᒫᓂᒃ: ᐰᓕᒧᑦ ᑐᒃᓯᐊᕐᐸᒃᑐᓕᒫᑦ ᑕᕝᕗᖓ ᕾᖁᓪᓗᒋᑦ, ᑍᒤᒻᒪᑦ ᓇᓪᓕᐊᓐᓂᒡᓘᓐᓃᑦ ᕾᖏᑦᑐᖃᓚᐅᓐᖏᓚᖅ, ᑕᕝᕙ ᐰᓕᐅᑉ ᐃᒡᓗᖁᑎᖓᓄᑦ ᐃᑎᕐᐳᑦ; ᐃᒡᓗᓗ ᑕᑕᑕᐅᓪᓗᓂ ᐃᓱᐊᓂᑦ ᐃᓱᐊᓄᑦ.

²² ᐃᒡᓗᒥᓗ ᑕᕝᕙᓂ ᐊᓐᓄᕌᓕᕆᔨᐅᔪᖅ, ᐰᓕᒧᑦ ᑐᒃᓯᐊᕐᐸᒃᑐᑦ ᐊᓐᓄᕌᒃᓴᖏᓐᓂᒃ ᕾᑦᓯᖁᕚ, ᐊᓐᓄᕌᒃᓴᖏᓪᓗ ᕾᑕᐅᕗᑦ.

²³ ᑕᕝᕙ ᔨᕼᐆ ᐃᒡᓗᒧᑦ ᑕᕝᕗᖓ ᐃᑎᕐᐳᖅ, ᔨᕼᐅᓇᑕᑉ ᕆᑳᑉ ᐃᕐᓂᖓ ᐃᑎᖃᑎᒋᓪᓗᒍ, ᐰᓕᒧᓪᓗ ᑐᒃᓯᐊᕐᐸᒃᑐᑦ ᐅᖃᐅᑎᕔᑦ, ᕿᓂᖁᓪᓗᒋᑦ ᐊᑕᓂᕐᒧᑦ ᑐᒃᓯᐊᕐᐸᒃᑐᓂᒃ ᑕᕝᕙᓃᑦᑐᖃᖁᓇᒍ, ᐰᓕᒧᑦ ᑐᒃᓯᐊᕐᐸᒃᑐᑦ ᑭᓯᐊᓂ ᑕᕝᕙᓃᖁᓪᓗᒋᑦ.

²⁴ ᑕᕝᕗᖓᓕ ᐃᑎᕋᒥᒃ ᑐᓂᕐᕈᓯᕆᐊᕐᑐᓕᕐᓗᑎᒃ ᑐᓂᕐᕈᑎᒃᓴᓂᒡᓗ ᐆᑕᒃᓴᓂᒃ ᓇᒃᓴᕐᓗᑎᒃ, ᐊᖑᑎᓂᒃ 80ᓂᒃ ᐃᒡᓘᑉ ᓯᓚᑖᓃᓐᓂᐊᕐᑐᓂᒃ. ᔨᕼᐆᓗ ᑎᓕᓯᓯᒪᓚᐅᕐᐳᖅ ᐅᖃᐅᑎᓯᒪᓪᓗᒋᓪᓗ: “ᓇᓪᓕᐊᑦ ᑕᕝᕗᖓ ᐃᑎᕐᑎᓚᐅᕐᑕᒪ ᐃᓚᖓᓐᓂᒃ ᕿᒪᒃᓯᓗᓂ ᐊᓐᓁᔭᐅᔪᖃᕐᐸᑦ ᑖᓐᓇ ᐊᓐᓁᔪᖅ ᐃᓅᓯᕐᒥᓂᒃ ᐊᑭᓖᓂᐊᕐᐳᖅ!”

²⁵ ᔨᕼᐆᓕ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ ᑐᓂᓯᔭᕇᕋᒥ, ᐅᓇᑕᕐᑐᒃᓴᓄᑦ ᐊᖓᔪᖅᑳᖏᓐᓄᓪᓗ ᐅᖃᕐᐳᖅ, “ᐃᑎᕐᓗᓯ ᑐᖁᕋᕐᑍᓐᓇᕆᓕᕐᓯᒋᒃ; ᓇᓪᓕᐊᓐᓂᒡᓘᓐᓃᑦ ᐊᓂᔪᖃᕐᑍᓕᓕ!” ᑖᒃᑯᐊ ᐃᑎᕋᒥᒃ ᓴᕕᒡᔪᐊᒧᑦ ᑐᖁᕋᕐᐰᑦ; ᑎᒥᖏᓪᓗ ᓯᓚᒧᑦ ᐊᓂᑕᐅᕗᑦ. ᑕᕝᕙ ᐃᒡᓗᒐᓴᖕᓄᑦ ᐰᓕᒧᑦ ᑐᒃᓯᐊᕐᕕᐅᕙᒃᑐᓄᐊᕐᐳᑦ,

²⁶ ᒎᑎᓐᖑᐊᕆᔭᐅᔪᓪᓗ ᓇᐸᔪᑦ ᓴᓇᓯᒪᔪᑦ ᑕᕝᕙᓃᑦᑐᑦ ᐰᓕᐅᑉ ᐃᒡᓗᖁᑎᖏᓐᓂᑦ ᐊᓂᑎᑉᐰᑦ, ᐃᑯᐊᓪᓚᒡᓗᒋᓪᓗ.

²⁷ ᐰᓕᓐᖑᐊᓪᓗ ᓇᐸᔪᑦ ᓯᖁᑦᑎᕐᐰᑦ, ᑐᒃᓯᐊᕐᕕᖏᓪᓗ ᓯᖁᑦᑎᕐᓗᒋᑦ, ᐃᓂᒋᔭᖏᓪᓗ ᐊᓇᕆᐊᕐᑐᕐᕕᓐᖑᕐᑎᑕᐅᓚᐅᕐᐳᑦ ᐅᓪᓗᒥᒧᑦ ᑎᑭᓪᓗᒍ.

²⁸ ᑍᒫᒃ ᑕᕝᕙ ᔨᕼᐆᑉ ᐰᓕᒧᑦ ᑐᒃᓯᐊᕐᐸᒃᑐᑦ ᓄᖑᑕᐅᑎᓚᐅᕐᐰᑦ ᐃᓴᕆᐊᓕᒥ.

²⁹ ᔨᕼᐆᓕ ᔨᕈᐳᐊᒻ ᓂᐹᑦ ᐃᕐᓂᖓᑕ ᐊᔪᕐᑐᓕᑦᔪᑎᒋᕙᓚᐅᕐᑕᖏᓐᓂᒃ ᕿᒤᓚᐅᓐᖏᓚᖅ, ᐃᓴᕆᐊᓕᒥᐅᓪᓗ ᐊᔪᕐᑐᓕᑎᓚᐅᕐᐰᑦ ᑐᒃᓯᐊᕐᓂᖃᕐᑎᓚᐅᕐᒪᒋᑦ ᐃᒻᒧᒃᓯᐅᒐᓐᖑᐊᕐᒧᑦ ᒎᓗᒧᑦ. ᑕᒪᓐᓇ ᓄᖅᑲᕐᑎᓚᐅᖏᒻᒪᒍ ᐱᑎᓕᒥ ᑖᓐᒥᓗ.

³⁰ ᔨᕼᐆ ᐊᑕᓂᐅᑉ ᐅᖃᐅᑎᓚᐅᕐᐹ, “ᐱᓇᓱᐊᑦᓯᐊᓚᐅᕋᕕᑦ ᐊᑲᐅᒋᔭᕋ ᒪᓕᒡᓗᒍ ᓵᓐᓂ ᐂᕼᐊᑉ ᐃᓚᒋᔭᖏᑦ ᐱᓪᓗᒋᑦ ᐱᓂᐊᕈᒪᔭᒃᑲᓗ ᐱᓇᓱᐊᓚᐅᕋᕕᒋᑦ, ᑭᖑᕚᑎᑦ ᐃᓴᕆᐊᓕᒥ ᐊᐅᓚᑦᓯᔪᒫᕐᐳᑦ ᑭᖑᕚᕕᑦ ᓯᑕᒤᖏᑦ ᑎᑭᓪᓗᒋᑦ.”

³¹ ᑭᓯᐊᓂᓕ ᔨᕼᐆ ᐆᒻᒪᑎᓕᒫᒥᓄᑦ ᐊᑕᓂᕐᒧᑦ ᐊᖏᕐᓯᒪᓂᖃᓚᐅᓐᖏᓚᖅ ᖃᕿᐊᓕᕈᑎᖃᓚᐅᖏᓐᓇᒥ ᔨᕈᐳᐊᒻ ᐊᔪᕐᑐᓕᑦᔪᑎᒋᓚᐅᕐᑕᖏᓐᓂᑦ, ᐃᓴᕆᐊᓕᒥᐅᓪᓗ ᐊᑦᔨᖏᓐᓂᒃ ᐊᔪᕐᑐᓕᑎᓕᓚᐅᕆᕔᑦ.

ᔨᕼᐆᑉ ᑐᖁᓂᖓ

³² ᑍᑦᓱᒪᓂ ᐊᑕᓂᐅᑉ ᐃᓴᕆᐊᓕᒥᐅᑦ ᓄᖑᐸᓪᓕᐊᑎᓚᐅᕐᐰᑦ, ᕼᐊᔧᐅᓕ ᐃᓴᕆᐊᓕᒥᐅᓂᒃ ᓵᓚᖃᓚᐅᕐᒪᑦ ᓄᓇᓕᖁᑎᖏᓐᓂᒃ ᐊᕕᒃᑐᕐᓯᒪᐅᕐᑐᓂᒃ.

³³ ᔪᐊᕐᑕᓂᐅᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᑦ ᒋᓕᐊᒥᐅᓕᒫᑦ ᒑᑎᐅᓪᓗ ᑭᖑᕚᖏᑕ ᓄᓇᖏᑕ ᐃᓗᐊᓃᑦᑐᑦ ᕉᐱᓂᒥᐅᑦ ᒫᓇᓯᒥᐅᓪᓗ ᐊᕈᐃᕆᒥᑦ ᐋᕐᓄᓂᒥᐅᓄᑦ ᒋᓕᐊᑎᒥᑦ ᐹᓴᓂᒧᑦ.

³⁴ ᔨᕼᐆᓕ ᐊᐅᓚᑦᓯᓪᓗᓂ ᐱᓂᐊᕐᓂᕆᖃᑦᑕᕐᓯᒪᔭᖏᑦ ᐊᓯᖏᓪᓗ ᐱᔭᕇᕐᓯᒪᔭᖏᓪᓗ ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑦᑕ ᑎᑎᕋᕐᑕᐅᓯᒪᕕᖏᓐᓂ.

³⁵ ᔨᕼᐆ ᑐᖁᓚᐅᕐᐳᖅ ᐃᓗᕕᕐᑕᐅᓪᓗᓂᓗ ᓴᒥᐊᕆᐊᒥ. ᐊᖓᔪᖅᑳᕐᔪᐊᖑᓂᖓᓗ ᑭᖑᕝᕕᕐᑕᐅᓚᐅᕐᐳᖅ ᐃᕐᓂᖓᓄᑦ ᔨᕼᐅᐊᕼᐊᔨᒧᑦ.

³⁶ ᔨᕼᐆ ᓴᒥᐊᕆᐊᕐᒥᐅᓄᑦ ᐊᖓᔪᖅᑳᕐᔪᐊᕆᔭᐅᓚᐅᕐᐳᖅ ᐊᕐᕌᒍᓂᒃ 28ᓂᒃ.