ᐊᑕᓃᑦ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓔᑦᔭᐅᓪᓗ ᐊᕼᐊᔧᐊᐅᓪᓗ ᐊᖓᔪᖅᑳᕐᔪᐊᑉ ᐱᐅᓯᕆᔭᕕᓂᖏᒃ

¹ ᐂᕼᐊᑉ ᐃᓅᔪᓐᓃᕐᓯᒪᓕᕐᑎᓪᓗᒍ, ᒧᐊᐱᒥᐅᑦ ᐊᑭᕋᕐᑐᓕᓚᐅᕐᐳᑦ ᐃᓴᕆᐊᓕᒥᐅᓄᑦ.

² ᐊᕼᐊᔧᐊᓕ ᓴᒥᐊᕆᐊᒥ ᐊᓃᕋᔮᕐᕕᖕᒥᓂ ᖁᑦᓯᒃᑐᒥᑦ ᐃᔪᒃᑲᕐᓗᓂ ᐋᓐᓂᕐᐳᖅ, ᐋᓐᓂᕋᒥ ᓇᓪᓚᖓᓕᕐᐳᖅ ᐋᓐᓂᐊᓪᓗᓂ; ᐅᖃᕆᐊᕐᑐᕐᑎᑦᓯᔨᒥᓂᒃ ᑎᓕᓯᕗᖅ ᐅᖃᖁᓪᓗᒋᑦ ᐃᒫᒃ, “ᐃᑯᕋᓐᒧᐊᕐᓗᓯᒃ ᒎᑎᖓᑦ ᐱᐅᓪᓯᐹᐱ ᑐᑭᓯᓂᐊᕐᕕᒋᔭᕐᑐᒃᓯᐅᒃ, ᖃᐅᔨᕕᒋᓇᓱᐊᕐᓗᒍ ᐋᖅᑭᖕᓂᐊᕐᒪᖔᕐᒪ ᑕᒪᑐᒪᓐᖓᑦ ᐋᓐᓂᐊᓂᓐᓂᑦ.”

³ ᐊᑕᓂᐅᓪᓕ ᐂᖏᓕᖓ ᐃᓔᑦᔭᒧᑦ ᐅᖃᕐᐳᖅ ᑎᔅᐰᑎᒥᐅᑕᕐᒧᑦ, “ᒪᑭᓪᓗᑎᑦ, ᓴᒥᐊᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᓕᔭᖏᒃ ᐸᕐᕆᐊᕐᓗᒋᒃ ᐊᐱᕆᒃᑭᑦ, ‘ᐃᓴᕆᐊᓕᒥ ᒎᑎᑕᖃᕈᓐᓃᕐᒫᑦ ᐃᑯᕋᓐᒥᐅᑦ ᒎᑎᖓᓐᓂᒃ ᐱᐅᓪᓯᐹᐱᒥᒃ ᖃᐅᔨᓇᓱᐊᕆᐊᕐᑐᕐᐱᓰᒃ?’

⁴ ᒫᓐᓇ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, ‘ᐃᒡᓕᕐᒥᑦ ᓇᓚᕕᒋᔭᕐᓂᑦ ᒪᑭᒃᑲᓐᓂᕐᓂᐊᓐᖏᓚᑎᑦ, ᑐᖁᑐᐃᓐᓇᕐᓂᐊᓕᕐᐳᑎᑦ ᑕᕝᕙᓂ.’ ” ᑕᕝᕙ ᐃᓔᑦᔭ ᐊᐅᓪᓚᕐᐳᖅ.

⁵ ᐊᖓᔪᖅᑳᕐᔪᐊᑉ ᑎᓕᔭᖏᑦ ᐊᖓᔪᖅᑳᕐᔪᐊᕐᒧᑦ ᐅᑎᕇᕐᒪᑎᒃ ᐊᐱᕆᕚᒃ, “ᖃᓄᐃᒻᒪᑦ ᐅᑎᕇᕐᐱᓰᒃ?”

⁶ ᑖᒃᑯᐊ ᑭᐅᕚᑦ, “ᐊᖑᒻᒧᑦ ᐸᕐᕆᐊᕐᑕᐅᖅᑲᐅᒐᓐᓄᒃ, ‘ᐅᖃᕐᓗᓂᓗ, ᐊᖓᔪᖅᑳᕐᔪᐊᕐᒧᑦ ᑎᓕᓯᓚᐅᕐᑐᒧᑦ ᐅᑎᕐᓗᓯ ᐃᒫᒃ ᐅᖃᐅᑎᓯᐅᒃ, ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥ ᒎᑎᑕᖃᕈᓐᓃᕐᒫᑦ ᐃᑯᕋᓐᒥᐅᑦ ᒎᑎᖓᓐᓂᒃ ᐱᐅᓪᓯᐹᐱᒥᒃ ᖃᐅᔨᓇᓱᐊᕐᕕᖃᕆᐊᕐᑐᕐᐱᓰ? ᑍᒤᒻᒪᑦ ᐃᒡᓕᖅ ᓇᓚᕕᒋᔧᑦ ᒪᑭᕝᕕᒋᒃᑲᓐᓂᑦᔮᔪᓐᓃᕐᐸᑦ, ᑐᖁᑐᐃᓐᓇᕐᓂᐊᓕᕋᕕᑦ ᑕᕝᕙᓂ.’ ”

⁷ ᐊᖓᔪᖅᑳᕐᔪᐊᑉ ᐊᐱᕆᕔᑦ, “ᖃᓄᖅ ᑕᐅᑦᑐᖃᕐᐹ ᑍᓐᓇ ᐊᖑᑦ ᐃᓕᑦᓯᓐᓂᒃ ᐸᕐᕆᐊᕐᓗᓂᒃ ᑍᒪᓐᓇ ᐅᖃᕐᑐᕕᓂᖅ?”

⁸ ᑖᒃᑯᐊ ᑭᐅᕚᑦ, “ᐊᖑᑦ ᑍᓐᓇ ᐊᓐᓄᕌᕐᓯᒪᔪᖅ ᒥᖅᑯᓕᖕᓂᒃ, ᑕᑦᓯᖃᕐᑐᖅ ᐊᒥᕕᓂᕐᒥᒃ.” ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐃᓔᑦᔭᐅᕗᖅ ᑎᔅᐰᑎᒥᐅᑕᖅ.”

⁹ ᐊᖓᔪᖅᑳᕐᔪᐊᖅ ᑕᕝᕙ ᑎᓕᓯᕗᖅ ᐅᓇᑕᕐᑎᖁᑎᒥ ᐊᖓᔪᖅᑳᖓᓐᓂᒃ 50ᓂᒃ ᐅᓇᑕᕐᑐᒃᓴᓂᒃ ᐃᓚᖃᕐᑎᓪᓗᒍ, ᐅᓇᑕᕐᑐᒃᓴᑦ ᐊᖓᔪᖅᑳᖓᑦ ᐃᓔᑦᔭᒧᑦ ᑎᑭᓐᓇᒥᒃ, ᐃᒃᓯᕚᕐᑎᓪᓗᒍ ᐱᖑᐊᕐᔫᑉ ᖄᖓᓂ ᐅᖃᐅᑎᕚ, “ᒎᑎᐅᑉ ᐃᓄᖁᑎᖓ, ᐊᖓᔪᖅᑳᕐᔪᐊᑉ ᕾᖁᖕᒪᑎᑦ.”

¹⁰ ᐃᓔᑦᔭᐅᓪᓕ ᐅᓇᑕᕐᑐᒃᓴᑦ ᐊᖓᔪᖅᑳᖓᑦ ᑭᐅᕚ, “ᒎᑎᒧᑦ ᐃᓄᖁᑎᒋᔭᐅᒍᒪ, ᐃᑯᒪᒥᒃ ᕿᓚᖕᒥᑦ ᑲᑕᒃᑐᖃᓕᕐᓕ ᐃᓕᖕᓂᒃ ᐅᓇᑕᕐᑐᒃᓴᖁᑎᖕᓂᒡᓗ 50ᓂᒃ ᐃᑯᐊᓪᓔᓂᐊᕐᑐᒥᒃ.” ᑕᕝᕙ ᐃᑯᒪ ᕿᓚᖕᒥᑦ ᑲᑕᒃᐳᖅ ᐅᓇᑕᕐᑐᒃᓮᑦ 50 ᐊᖓᔪᖅᑳᖓᓪᓗ ᐃᑯᒪᒧᑦ ᑐᖁᑕᐅᕗᑦ.

¹¹ ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᐃᓔᑦᔭᒧᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᐅᓇᑕᕐᑐᒃᓴᖁᑎᖏᑦ 50 ᐃᓚᒋᓪᓗᒋᑦ, ᐅᓇᑕᕐᑐᒃᓮᓪᓗ ᐊᖓᔪᖅᑳᖓᑦ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᐊᖓᔪᖅᑳᕐᔪᐊᖅ ᐱᖁᔨᖕᒪᑦ ᑐᐊᕕᕐᓗᑎᑦ ᕾᓚᐅᕆᑦ!”

¹² ᐃᓔᑦᔭᐅᓪᓕ ᑭᐅᕚ, “ᒎᑎᒧᑦ ᐃᓄᖁᑎᒋᔭᐅᒍᒪ, ᕿᓚᖕᒥᑦ ᐃᑯᒪᒥᒃ ᑲᑕᒃᑐᖃᓕᕐᓕ ᐃᓕᖕᓂᒃ ᐅᓇᑕᕐᑐᒃᓴᖁᑎᖕᓂᒡᓗ 50ᓂᒃ ᐃᑯᐊᓪᓔᓂᐊᕐᑐᒥᒃ.” ᑕᕝᕙ ᒎᑎᐅᑉ ᐃᑯᒪᖁᑎᖓ ᕿᓚᖕᒥᑦ ᑲᑕᒃᐳᖅ ᐅᓇᑕᕐᑐᒃᓮᑦ 50 ᐊᖓᔪᖅᑳᖓᓪᓗ ᐃᑯᒪᒧᑦ ᑐᖁᑕᐅᕗᑦ.

¹³ ᓱᓕ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᐱᖓᔪᒋᓕᕐᑕᖓᓐᓂᒃ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ ᐅᓇᑕᕐᑐᒃᓴᓂᒃ 50ᓂᒃ ᐃᓚᖃᕐᑎᓪᓗᒍ. ᑖᓐᓇᓕ ᐅᓇᑕᕐᑐᕐᓮᑦ ᐊᖓᔪᖅᑳᖓᑦ ᐃᓔᑦᔭᐅᑉ ᓵᖓᓄᑦ ᓰᖁᕐᓗᓂ ᐃᓚᓐᓂᕐᓴᕐᕕᒋᓪᓗᒍ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᐃᓅᓯᕋ ᐅᑯᐊᓗ ᐅᓇᑕᕐᑐᒃᓮᑦ ᐱᔨᒋᔭᕕᑦ ᐃᓅᓯᖏᑦ ᐊᓐᓂᕆᒃᑭᑦ.

¹⁴ ᑕᑯᒋᑦ, ᐅᓇᑕᕐᑐᒃᓮᑦ ᐊᖓᔪᖅᑳᖏᒃ ᒪᕐᕉᒃ ᐅᓇᑕᕐᑐᒃᓴᖁᑎᖏᓪᓗ ᐃᑭᑕᐅᓪᓗᑎᒃ ᕿᓚᖕᒥᑦ ᑐᖁᖕᒪᑕ, ᐃᓅᓯᕗᓪᓕ ᐊᓐᓂᕆᓚᐅᒃᑭᑦ.”

¹⁵ ᐊᑕᓂᐅᑉ ᐂᖏᓖᖓᑕ ᐃᓔᑦᔭ ᐅᖃᐅᑎᕚ, “ᓯᕘᕋᖏᓪᓗᑎᑦ, ᑖᒃᑯᐊ ᒪᓕᓕᒃᑭᑦ.” ᐃᓔᑦᔭᓗ ᒪᑭᓐᓇᒥ ᒪᓕᒡᓗᒋᑦ ᐅᑎᖃᑎᒋᕔᑦ ᐊᖓᔪᖅᑳᕐᔪᐊᕐᒧᑦ.

¹⁶ ᐊᖓᔪᖅᑳᕐᔪᐊᕐᓗ ᐅᖃᐅᑎᕚ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᑎᓕᓯᓚᐅᕋᕕᑦ ᖃᐅᔨᓇᓱᐊᖁᓪᓗᒋᑦ ᐃᑯᕋᓐᒥᐅᑦ ᒎᑎᖓᓐᓄᑦ ᐱᐅᓪᓯᐹᐱᒧᑦ, ᒎᑎᑕᖃᕈᓐᓃᕐᒫᑦ ᐃᓴᕆᐊᓕᒥ ᖃᐅᔨᓇᓱᐊᕐᕕᒃᓴᒥᒃ? ᑍᒤᒻᒪᑦ ᐃᒡᓕᖅ ᓇᓚᕕᒋᔧᑦ ᓇᔪᐃᓐᓇᕐᓗᒍ ᑐᖁᔪᒫᓕᕐᐳᑎᑦ.’ ”

¹⁷ ᐊᑕᓂᐅᓪᓗ ᐅᖃᕐᑕᖓ ᐃᓔᑦᔭᒃᑯᑦ ᒪᓕᒡᓗᒍ ᑐᖁᕗᖅ. ᐊᕼᐊᔧᐊ ᐃᕐᓂᖃᓚᐅᖏᒻᒪᑦ, ᓄᑲᖓ ᔪᕌᒻ ᐊᖓᔪᖅᑳᕐᔪᐊᓐᖑᕐᐳᖅ ᑖᑦᓱᒪ ᐃᓂᖓᓂ, ᐊᕐᕌᒎᑉ ᐂᑉᐸᕆᓕᕐᑕᖓᓂ ᔨᕼᐅᕌᒻ ᔨᕼᐆᓴᐸᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥᐅᓄᑦ.

¹⁸ ᐊᕼᐊᔧᐊ ᐊᖓᔪᖅᑳᕐᔪᐊᖑᑎᓪᓗᒍ ᐱᓂᐊᕐᓂᐅᔪᕕᓃᑦ, ᖃᓄᐃᓕᐅᖃᑦᑕᕐᓯᒪᓂᖓᓗ ᐊᖓᔪᖅᑳᕐᔪᐊᖑᓪᓗᓂ ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ ᐃᓴᕆᐊᓕᒥᐅᑦ ᑎᑎᖅᑲᖁᑎᖏᓐᓂ.