ᑯᕆᓐᑎᐊᒥᐅᓄᑦ ᐂᑉᐸᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

᙭ᔅᑑᓯᒥᐅᑦ ᑐᓂᕐᕈᓯᕐᓂᖓᑦ

¹ ᖃᐅᔨᒪᖁᕙᑦᓯᓕ ᙭ᔅᑐᓯᒥᐅᑕᐅᖃᑎᒃᑲ, ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᐅᒃᐱᕐᑑᖃᑎᒌᓄᑦ ᓴᖅᑭᑎᑕᐅᓯᒪᔪᒥᒃ ᒫᓯᑑᓂᐊᒦᑦᑐᓄᑦ.

² ᐅᖁᒤᑦᑐᓄᑦ ᐊᖏᔪᒥᒃ ᐆᒃᑐᕐᑕᐅᒐᓗᐊᕋᒥᒃ; ᖁᕕᐊᓱᖕᓂᕐᔪᐊᖃᕐᐳᑦ, ᐊᔪᕐᓴᕐᑐᒻᒪᕆᐅᒐᓗᐊᕐᓗᑎᒡᓗ ᐊᓐᓂᕈᓱᖏᑦᓯᐊᕐᓗᑎᒃ ᑐᓂᓯᑦᓯᐊᓚᐅᕐᐳᑦ.

³ ᑐᓂᔪᓐᓇᕐᑕᒥᖕᓂᒃ ᑐᓂᓯᕗᑦ, ᓇᓗᓁᕐᓯᔪᓐᓇᕐᐳᖓᓗ, ᑐᓂᔪᓐᓇᕐᑕᒥᓘᓐᓃᑦ ᐅᖓᑖᓄᑦ ᑐᓂᓯᓚᐅᕐᐳᑦ, ᑎᓕᐅᕐᑕᐅᓇᑎᒃ ᐃᓱᒪᒥᖕᓂᒃ.

⁴ ᐃᓗᖏᕐᑐᕐᓗᑎᒃ ᑐᓂᕐᕈᑎᒥᖕᓂᒃ ᐱᖁᓚᐅᕐᐹᑎᒍᑦ ᐃᑲᔪᖃᑕᐅᔪᒪᓪᓗᑎᒃ ᐃᑦᔪᕐᓁᑎᑕᐅᔪᓄᑦ.

⁵ ᑕᒪᑐᒥᖓ ᓂᕆᐅᒋᓐᖏᑕᑦᑎᓐᓂᒃ ᐱᓚᐅᕐᐳᑦ, ᓯᕗᓪᓕᕐᒥᒡᓕ ᐊᑕᓂᕐᒧᑦ ᑐᓂᖅᑳᕐᐳᑦ ᑭᖑᓂᖓᒍᓪᓗ ᐅᕙᑦᑎᓐᓄᑦ ᑐᓂᕗᑦ ᒎᑎᐅᑉ ᐱᖁᔨᓂᖓ ᒪᓕᒡᓗᒍ.

⁶ ᑍᒤᒻᒪᑦ ᑍᑑᓯ ᐃᓇᓚᐅᕐᐸᕗᑦ, ᑕᒪᑐᒥᖓ ᐱᒋᐊᕐᑎᑦᓯᓚᐅᕐᑐᖅ ᑲᔪᓯᑐᐃᓐᓇᖁᓪᓗᒍ, ᐃᓕᑦᓯᓐᓂᒃ ᐃᑲᔪᕐᓗᓂ ᐱᓇᓱᐊᑦᓯᐊᕐᓂᕐᒥᒃ ᐱᔭᕇᕐᓯᖁᓪᓗᒍ.

⁷ ᑕᒤᓐᓂᒡᓕ ᐊᔪᕐᓴᓐᖏᓚᓯ, ᐅᒃᐱᕐᓂᒃᑯᑦ, ᐅᖃᓪᓚᖕᓂᕐᒥᒃ, ᖃᐅᔨᑎᑕᐅᓂᕐᒥᒃ, ᐃᑲᔪᕈᒪᑦᓯᐊᕐᓂᕐᒥᒃ, ᐅᕙᑦᑎᓐᓂᒡᓗ ᓇᒡᓕᒍᓱᖕᓂᕐᒥᒃ; ᑍᒫᒃᑕᐅᖅ ᑕᒪᓐᓇ ᐱᓇᓱᐊᑦᓯᐊᕐᓂᖅ ᐃᓕᑦᓯᓐᓄᑦ ᑲᔪᓯᑎᑕᐅᖁᕙᕋ.

⁸ ᑕᒪᑐᒥᖓ ᐃᓕᑦᓯᓐᓄᑦ ᐱᖁᔭᓕᐅᕋᓱᐊᓐᖏᓚᖓ, ᐊᓯᓯᓕ ᑲᔪᖏᑦᓯᐊᕐᓗᑎᒃ ᐱᓇᓱᐊᑦᓯᐊᕐᒪᑕ ᓇᒡᓕᖕᓂᓯ ᓱᓕᑦᓯᐊᕐᒪᖔᑦ ᐆᒃᑐᑐᐃᓐᓇᕐᐸᕋ.

⁹ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᖃᐅᔨᒪᒐᑦᓯᐅᒃ, ᐊᔪᕐᓴᖏᒃᑲᓗᐊᕐᓗᓂ, ᐊᔪᓴᑑᓕᓚᐅᕐᒪᑦ ᐱᑦᔪᑎᒋᓪᓗᓯ, ᐊᔪᕐᓴᓕᕐᓂᖓᓄᑦ ᐊᔪᕐᓴᕈᓃᕐᑎᑕᐅᖁᓪᓗᓯ.

¹⁰ ᐃᓱᒪᒋᔭᕋᓕ ᓴᖅᑭᑉᐸᕋ ᑕᒪᑐᒧᖓ: ᐊᕐᕌᓂ ᐱᒋᐊᓚᐅᕐᑕᓯ ᒫᓐᓇ ᐱᔭᕇᕈᑦᓯᐅᒃ ᐊᑲᐅᓂᕐᓴᐅᕗᖅ ᐱᒋᐊᑐᐃᓐᓇᓚᐅᓐᖏᓚᓯ ᑐᓂᓯᔪᒪᓂᖃᖅᑳᓚᐅᕐᐳᓯᓕ.

¹¹ ᒫᓐᓇ ᐱᓇᓱᐊᕐᓂᓯ ᐱᔭᕇᑦᓯᐊᓕᕐᓯᐅᒃ ᑲᔪᖏᑦᓯᐊᕐᓂᓯ ᑐᓂᓯᓂᓯᓗ ᐊᑦᔨᒌᑦᓯᐊᖁᓪᓗᒋᒃ ᐱᔪᓐᓇᕐᑕᓯ ᒪᓕᒡᓗᒍ.

¹² ᑐᓂᓯᔪᒪᓂᕐᑕᖃᕐᐸᑦ, ᐃᓅᑉ ᑐᓂᕐᕈᑎᖓ ᐃᓚᓕᐅᕐᑕᐅᓂᐊᕐᐳᖅ ᑐᓂᓯᔪᒪᓂᖓ ᒪᓕᒡᓗᒍ, ᐱᖃᖏᓐᓂᖓ ᒪᓕᖕᓇᒍ.

¹³ ᐅᖃᓐᖏᓚᖓ ᐊᓯᓯ ᐅᕿᒡᓕᑎᑕᐅᑎᓪᓗᒋᑦ ᐅᖁᒤᒃᓴᕐᑎᑕᐅᖔᖁᓪᓗᓯ,

¹⁴ ᐊᑦᔨᒌᖁᓪᓗᓯᓕ ᒫᓐᓇ ᐊᔪᕐᓴᖏᓐᓇᑦᓯ ᐃᓕᑦᓯᓐᓂᑦ ᐱᖃᕐᑎᑕᐅᖁᓪᓗᒋᑦ ᐱᔭᕆᐊᖃᕐᑕᖏᓐᓂᒃ, ᑍᒫᒃᑕᐅᖅ ᐱᔭᕆᐊᖃᓕᕈᑦᓯ ᑖᒃᑯᓇᓐᖓᑦ ᐱᑎᑕᐅᒐᔭᕋᑦᓯ, ᑍᒫᒃ ᑕᕝᕙ ᐊᑦᔨᒌᒥᒃ ᐱᒐᔭᕐᐳᓯ.

¹⁵ ᑎᑎᕋᕐᓯᒪᖕᒪᑦ, “ᐊᒥᓱᓂᒃ ᑲᑎᕐᓱᐃᓚᐅᕐᑐᖅ ᐊᒥᐊᒃᑯᖃᓐᖏᓚᖅ, ᒥᑭᔪᓂᒡᓗ ᑲᑎᕐᓱᐃᓚᐅᕐᑐᖅ ᐊᔪᕐᓴᓕᓐᖏᓚᖅ.”

ᑍᑑᓯᓗ ᐃᓚᒋᔭᖏᑕᓗ ᑎᓕᔭᐅᓂᖏᑦ

¹⁶ ᒎᑎ ᖁᔭᒋᔭᐅᓕ ᑍᑑᓯ ᐅᕙᑦᑎᑐᑦ ᐃᓗᖏᕐᓱᕐᓗᓂ ᐃᑲᔪᕈᒪᓂᕐᑖᕐᑎᓚᐅᕐᒪᒍ ᐃᓕᑦᓯᓐᓂᒃ.

¹⁷ ᑎᓕᓯᓂᕗᑦ ᐃᓚᓕᐅᑐᐃᓐᓇᖏᒻᒪᒍ, ᐃᓕᑦᓯᓐᓄᐊᕈᒪᕗᕐᓕ ᑲᑦᓱᖎᕐᓯᒪᒻᒪᕆᒡᓗᓂ ᐱᔪᒪᓂᕐᒥᒍᑦ.

¹⁸ ᐅᒃᐱᖃᑎᑦᑎᓐᓂᒃ ᐃᓚᖃᕐᑎᑉᐸᕗᑦ ᐅᒃᐱᕐᑑᖃᑎᒌᓕᒫᓂᑦ ᐅᐱᒋᔭᐅᑦᓯᐊᕐᑐᒥᒃ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᑐᐃᓂᖓᒍᑦ;

¹⁹ ᑕᒪᑐᒧᖓᑑᓐᖏᓚᕐᓗ, ᐅᒃᐱᕐᑑᖃᑎᒌᓂᓪᓕ ᓂᕈᐊᕐᑕᐅᓯᒪᒋᕗᖅ ᐅᕙᑦᑎᓐᓄᑦ ᐃᖏᕐᕋᖃᑕᐅᖁᓪᓗᒍ ᑐᓂᕐᕈᑎᓂᒃ ᓇᒃᓴᕐᓗᑕ ᐊᑕᓂᐅᑉ ᓂᕐᑐᕐᑕᐅᑦᔪᑎᒃᓴᖓᓄᑦ, ᐃᑲᔪᕈᒪᓂᑦᑎᓐᓂᒡᓗ ᓴᖅᑭᑎᑦᓯᑦᔪᑎᒋᔭᑦᑎᓐᓄᑦ.

²⁰ ᐃᒃᐱᒍᓱᑦᓯᐊᕋᓱᐊᕐᐳᒍᑦ ᑖᒃᑯᐊ ᑐᓂᕐᕈᑏᑦ ᐊᒥᓱᑦ ᖃᓄᖅ ᐊᐅᓚᒻᒪᖔᑦᑎᒍᑦ; ᓇᓪᓕᐊᓐᓄᓪᓘᓐᓃᑦ ᐸᓯᔭᒃᓴᐅᓕᕈᒪᓇᑕ.

²¹ ᐊᒃᓱᕈᒻᒪᕆᒃᑲᑦᑕ ᐅᐱᓐᓇᕐᑐᒥᒃ ᐱᓇᓱᐊᕈᒪᓪᓗᑕ ᐊᑕᓂᐅᑉ ᓵᖓᓂᑐᐃᓐᓇᐅᖏᑦᑐᖅ ᐃᓄᐃᓪᓗᑦᑕᐅᖅ ᓵᖏᓐᓂ.

²² ᑍᒤᒻᒪᑦ ᐅᒃᐱᕐᑑᖃᑎᕗᑦ ᑎᓕᖃᓯᐅᑎᕙᕗᑦ ᖃᐅᔨᓴᖃᑦᑕᕐᓯᒪᒐᑦᑎᒍ ᓴᖅᑭᑎᑦᓯᖃᑦᑕᕐᓯᒪᖕᒪᑦ ᐅᓄᕐᑐᐃᕐᓱᕐᓗᓂ ᐃᑲᔪᕈᒪᑦᓯᐊᕐᓂᕐᒥᓂᒃ, ᒫᓐᓇᓗ ᐃᑲᔪᕈᒪᒋᐊᓪᓚᓕᕆᕗᖅ ᐃᓕᑦᓯᓐᓂᒃ ᖁᓚᕈᑎᖃᖏᑦᓯᐊᓕᕋᒥ.

²³ ᑍᑑᓯᓕ ᐱᓇᓱᐊᖃᑎᒐ, ᐃᑲᔪᕐᑎᒋᕙᒃᑕᕋᓗ ᐱᑦᔪᑎᒋᓪᓗᓯ; ᐅᒃᐱᕐᑑᖃᑎᕗᓪᓗ ᐃᓚᒋᔭᖏᑦ, ᑖᒃᑯᐊ ᐅᒃᐱᕐᑑᖃᑎᒌᓂᑦ ᑎᓕᔭᐅᓯᒪᕗᑦ, ᙭ᔅᑑᓯ ᓂᕐᑐᕐᑕᐅᖁᓪᓗᒍ.

²⁴ ᑍᒤᒻᒪᑦ, ᑖᒃᑯᐊ ᓇᒡᓕᖕᓂᑦᓯᓐᓂᒃ ᓴᖅᑭᑎᑦᓯᕕᒋᓯᐅᒃ, ᓇᒡᓕᖕᓂᓯ ᐅᒃᐱᕐᑑᖃᑎᒌᓄᑦ ᑕᒤᓐᓄᑦ ᖃᐅᔨᔭᐅᖁᓪᓗᒍ ᓱᓕᓪᓗᑕᓗ ᐃᓕᑦᓯᓐᓂᒃ ᐅᐱᒋᔭᖃᕐᓂᕗᑦ ᖃᐅᔨᔭᐅᖁᓪᓗᒍ.