ᑯᕆᓐᑎᐊᒥᐅᓄᑦ ᐂᑉᐸᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓇᒡᓕᒋᔭᒃᑳ, ᑖᒃᑯᐊ ᐅᕙᑦᑎᓐᓄᑦ ᐊᖏᕈᑕᐅᓯᒪᖕᒪᑕ, ᑍᒤᒻᒪᑦ ᐅᕙᑦᑎᓐᓂᒃ ᓴᓗᒻᒪᕐᓴᓕᕐᑕ ᓱᓇᓕᒫᓂᑦ ᐅᒃᐱᕐᓂᒃᑯᑦ ᓴᓗᒪᑎᑦᓯᖏᑦᑐᓂᑦ ᑎᒥᒥᒃ ᑕᕐᓂᕐᒥᒡᓗ, ᐃᑦᔪᕐᓁᓕᕙᓪᓕᐊᓕᕐᑕᓕ ᒎᑎᒥᒃ ᐃᒃᐱᒍᓱᑦᓯᐊᕐᓂᑦᑎᒍᑦ.

ᐸᐅᓗᓯᐅᑉ ᖁᕕᐊᓲᑎᖃᕐᓂᖓ ᐅᒃᐱᕐᑑᖃᑎᒌᑦ ᖃᕿᐊᓕᕐᓂᖓᓐᓂᒃ

² ᐆᒻᒪᑎᑦᓯᓐᓂ ᐃᓂᒃᓴᖃᕐᑎᑎᒍᑦ, ᑭᓇᒥᒡᓘᓐᓃᑦ ᐊᑲᐅᖏᑦᑐᓕᕕᖃᓚᐅᓐᖏᓚᒍᑦ, ᐱᐅᔪᓐᓃᕐᑎᑦᓯᓚᐅᕋᑕᓗ, ᓵᓚᓯᐊᖃᓚᐅᕋᑕᓘᓐᓃᑦ.

³ ᐸᓯᓗᓯ ᑍᒫᒃ ᐅᖃᓐᖏᓚᖓ; ᐅᖃᕐᓯᒪᕗᖓᓕ ᐱᓐᓇᕆᔭᒻᒪᕆᐊᓗᒋᒐᑦᓯ ᑍᒪᓐᖓᑦ ᐃᓚᒌᖏᓐᓇᕐᓂᐊᕐᐳᒍᑦ ᐃᓅᖃᑎᒋᓗᓯ ᑐᖁᖃᑎᒋᓗᓯᓘᓐᓃᑦ.

⁴ ᐃᓕᑦᓯᓐᓂᒃ ᖁᓚᕈᑎᖃᖏᑦᓯᐊᕋᒪ; ᖁᕕᐊᒋᒻᒪᕆᒃᓗᓯᓗ. ᒪᓂᒍᕐᑕᐅᓂᕐᒥᒃ ᐃᓗᒻᒥᕐᑕᐅᕗᖓ; ᖁᕕᐊᓱᓗᐊᕐᓗᖓ ᐊᒡᓛᑦ, ᐅᖁᒤᑦᑐᑎᒎᕋᓗᐊᕐᑎᓪᓗᑕ.

⁵ ᒫᓯᑑᓂᐊᒧᓪᓕ ᑎᑭᓐᓇᑦᑕ, ᑎᒥᕗᑦ ᐃᓂᓪᓚᖓᔪᓐᓇᓚᐅᓐᖏᓚᖅ, ᐅᖁᒤᒃᓴᕐᓇᕐᑐᓄᑦ ᐊᕙᓗᔭᐅᓯᒪᓚᐅᕋᑦᑕ ᓯᓚᑎᑦᑎᒍᑦ, ᐂᕙᔭᕆᐊᖃᖃᑦᑕᕐᓗᑕ ᐃᓗᑦᑎᒍᑦ ᓯᕘᕋᓂᖃᕐᓗᑕ.

⁶ ᒎᑎᐅᓪᓕ, ᒪᓂᒍᕐᑎᑦᓯᔨᐅᑉ ᓴᓐᖐᓕᓯᒪᔪᓂᒃ, ᒪᓂᒍᓚᐅᕐᐹᑎᒍᑦ ᑍᑑᓯᐅᑉ ᑎᑭᓐᓂᖓᒍᑦ,

⁷ ᑎᑭᓐᓂᖓᓄᑐᐃᓐᓇᐅᖏᑦᑐᕐᓕ; ᑖᑦᓱᒪᓕ ᐅᓐᓂᕐᓯᐅᕐᓂᖓᒍᑦ ᐃᓕᑦᓯᓐᓄᑦ ᒪᓂᒍᕐᑕᐅᓚᐅᕐᓂᕐᒥᓂᒃ. ᐅᖃᐅᑎᓚᐅᕐᒪᑎᒍᑦ ᐅᕙᓐᓂᒃ ᑕᑯᔪᒪᓕᕐᓂᑦᓯᓐᓂᒃ, ᕿᒃᓵᕕᒡᔪᐊᕐᓂᑦᓯᓐᓂᒃ, ᐅᕙᓐᓂᒡᓗ ᓴᐳᓐᓂᐊᕈᒪᓂᑦᓯᓐᓂᒃ, ᑕᒪᑐᒧᖓ ᐊᖏᔪᒥᒃ ᖁᕕᐊᓱᒃᑎᑕᐅᒃᑲᓐᓂᓚᐅᕐᐳᖓ.

⁸ ᕿᒃᓵᒃᑎᓚᐅᕋᓗᐊᕈᑦᓯ ᑎᑎᕋᓚᐅᕐᑕᓐᓄᑦ, ᐅᒡᒍᐊᕈᑎᒋᓐᖏᓚᒃᑲ. ᐅᒡᒍᐊᓚᐅᕋᓗᐊᕐᐳᖓ ᖃᐅᔨᒐᒪ ᑎᑎᕋᕐᑕᓐᓄᑦ ᐋᓐᓂᕐᑕᐅᓚᐅᕋᑦᓯ, ᐊᑯᓂᐅᖏᑦᑐᕐᓕ ᕿᒃᓵᓚᐅᕐᐳᓯ.

⁹ ᒫᓐᓇᓕ ᖁᕕᐊᓱᓕᕐᐳᖓ, ᕿᒃᓵᒃᑎᑕᐅᓚᐅᕐᓂᓯ ᐱᓇᒍ, ᕿᒃᓵᓂᑦᓯᒍᓪᓕ ᖃᕿᐊᓕᓚᐅᕋᑦᓯ. ᕿᒃᓵᖕᓂᓯ ᒎᑎᐅᑉ ᐊᑐᓚᐅᕐᒪᒍ, ᐊᓯᕈᕐᑕᐅᓚᐅᓐᖏᓐᓇᑦᓯᓗ ᑍᒤᑎᑦᓯᓂᑦᑎᓐᓄᑦ.

¹⁰ ᕿᒃᓵᒃᑎᑕᐅᓂᖅ ᒎᑎᒥᑦ ᐱᔪᖅ ᖃᕿᐊᓕᕐᓂᖃᕐᑎᑦᓯᖕᒪᑦ ᐱᐅᓕᔭᐅᓂᕐᒧᑦ ᑭᖑᓂᖓᒍᓪᓗ ᐅᒡᒍᐊᕐᓇᕐᓂᖃᕋᓂ, ᕿᒃᓵᒃᑎᑕᐅᓂᕐᓕ ᓯᓚᕐᔪᐊᕐᒥᑦ ᐱᔪᖅ ᑐᖁᑎᑦᓯᕗᖅ.

¹¹ ᑕᕝᕙ ᖃᐅᔨᓕᕆᑦᓯ ᑕᒪᓐᓇ ᕿᒃᓵᒃᑎᑕᐅᓂᓯ ᖃᓄᖅ ᒎᑎᒧᑦ ᐊᑐᕐᑕᐅᓯᒪᓂᖓᓂᒃ; ᐱᒋᐊᒃᑲᓐᓂᕈᑎᒋᒐᑦᓯᐅᒃ ᐸᓯᔭᒃᓴᐅᔪᒪᖏᓐᓂᑦᓯᓐᓄᓪᓗ ᓇᓗᓁᕐᓯᑦᔪᑎᒋᓪᓗᒍ, ᓯᕘᕋᓂᖃᕐᑎᓚᐅᕐᒪᓯ ᓇᒡᓕᒍᓱᖕᓂᖃᕐᑎᒻᒪᓯᓗ ᐃᓱᒪᔮᕈᑎᖃᕐᑎᒻᒪᓯᓗ, ᐊᑲᐅᔪᒥᒃ ᐃᖅᑲᕐᑐᐃᓂᖅ ᓴᖅᑭᖁᓪᓗᒍ. ᑕᕝᕙ ᑕᒤᑎᒍᑦ ᓇᓗᓁᕐᐳᓯ ᐸᓯᔭᒃᓴᐅᖏᓐᓂᑦᓯᓐᓂᒃ.

¹² ᑎᑎᕋᕐᕕᒋᓚᐅᕋᓗᐊᕐᐸᑦᓯ, ᐊᔪᕐᑐᓕᔪᕐᓕ ᑎᑎᕋᕈᑎᒋᓚᐅᓐᖏᓚᕋ, ᐊᔪᕐᑐᓕᕕᐅᔪᕐᓘᓐᓃᑦ, ᓇᖕᒥᓂᕐᓕ ᓇᓗᓁᕐᓯᕕᐅᖁᓪᓗᓯ ᐅᕙᑦᑎᓐᓄᑦ ᑐᓂᓯᒪᑦᓯᐊᓪᓚᕆᖕᓂᑦᓯᓐᓂᒃ ᒎᑎᐅᑉ ᓵᖓᓂ.

¹³ ᑍᒤᒻᒪᑦ ᑕᒪᑐᒨᓇ ᐱᕙᓪᓕᕐᑎᑕᐅᕗᒍᑦ. ᐱᕙᓪᓕᕐᑎᑕᐅᒐᓗᐊᕋᑦᑕ ᐊᖏᓂᕐᓴᒥᒡᓕ ᖁᕕᐊᓱᒃᑎᑕᐅᕗᒍᑦ ᑍᑑᓯᐅᑉ ᖁᕕᐊᓱᖕᓂᖓᓄᑦ, ᑖᑦᓱᒪ ᐊᓂᕐᓂᖓ ᑕᒪᑦᓯ ᖁᕕᐊᓱᒃᑎᓚᐅᕋᑦᓯᐅᒃ.

¹⁴ ᑖᑦᓱᒧᖓ ᐅᖃᐅᑎᒋᓚᐅᕋᑦᓯ ᐃᓕᑦᓯᓐᓂᒃ ᐅᐱᒍᓲᑎᖃᕐᓂᕋᕐᓗᖓ, ᑲᓐᖑᓱᒃᑎᓚᐅᓐᖏᓚᑦᓯᓐᖓ, ᐃᓕᑦᓯᓐᓄᑦ ᐅᖃᐅᓯᕆᓚᐅᕐᑕᕗᑦ ᑕᒪᕐᒥᒃ ᓱᓕᖕᒪᑕ, ᐃᓕᑦᓯᓐᓂᒃ ᐅᐱᒍᓲᑎᖃᓚᐅᕐᓂᕗᑦ ᑍᑑᓯᒧᑦ ᓴᖅᑭᑕᐅᕗᑦ ᓴᒡᓗᓯᒪᖏᓐᓇᑦᑕ.

¹⁵ ᑍᑑᓯᓗ ᐃᓕᑦᓯᓐᓂᒃ ᓇᒡᓕᒍᓱᓕᒃᑲᓐᓂᕐᐳᖅ, ᐃᖅᑬᔭᕌᖓᒥ ᑕᒪᑦᓯ ᓈᓚᑦᓯᐊᓚᐅᕋᑦᓯ, ᓯᕘᕋᓪᓗᓯᓗ ᓴᔪᒡᓗᓯ ᐃᓚᓕᐅᓚᐅᕋᑦᓯᐅᒃ.

¹⁶ ᖁᕕᐊᓲᑎᖃᕐᐳᖓ, ᐱᔪᓐᓇᑦᓯᐊᓕᕐᓂᑦᓯᓐᓂᒃ ᐃᓘᓐᓈᒍᑦ.