ᑯᕆᓐᑎᐊᒥᐅᓄᑦ ᐂᑉᐸᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑖᑦᓱᒥᖓ ᐱᓇᓱᐊᖃᑎᖃᕋᑦᑕ, ᑍᒤᒻᒪᑦ, ᐃᓇᑉᐸᑦᓯ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐃᓚᓕᐅᕐᓯᒪᔭᓯ ᑕᒪᐅᖓᑐᐃᓐᓈᕐᑎᑦᑍᓕᓯᐅᒃ.

² ᒎᑎ ᐅᖃᕐᓯᒪᖕᒪᑦ, “ᓇᓪᓕᐅᓐᓂᖅ ᐊᑲᐅᓈᑦᓯᐊᓕᕐᑎᓪᓗᒍ ᑐᓴᓚᐅᕐᐸᒋᑦ, ᐃᑲᔪᓚᐅᕐᐸᒋᓪᓗ ᐅᓪᓗᖅ ᐱᐅᓕᔭᐅᕕᒃ ᓇᓪᓕᐅᑎᑎᓪᓗᒍ.” ᑕᑯᒋᑦ, ᒫᓐᓇ ᐊᑲᐅᓈᑦᓯᐊᕐᑐᖅ ᓇᓪᓕᐅᑎᕗᖅ; ᑕᑯᒋᑦ, ᒫᓐᓇ ᐅᓪᓗᖅ ᐱᐅᓕᔭᐅᕕᒃ ᓇᓪᓕᐅᑎᕗᖅ.

³ ᐊᒡᕕᐊᕈᑎᒃᓴᒥᒃ ᐃᓕᓯᔪᒪᖏᓐᓇᑦᑕ ᐊᖅᑯᑎᒋᔭᐅᓂᐊᕐᑐᒧᑦ, ᐱᓇᓱᐊᕐᓂᕗᑦ ᐸᓯᔭᐅᑦᔪᑎᒃᓴᖃᖁᓇᒍ ᓱᓇᑐᐃᓐᓇᒧᑦ.

⁴ ᖃᓄᓕᒫᕐᓕ ᒎᑎᒧᑦ ᐱᔨᐅᓂᑦᑎᓐᓂᒃ ᓴᖅᑭᔮᕐᑎᑦᓯᕗᒍᑦ: ᕿᓄᐃᓵᒻᒪᕆᒃᓗᑕ ᑲᑉᐱᐊᓇᕐᑐᒃᑰᓕᕌᖓᑦᑕ, ᐊᒃᓱᕈᕐᓇᕐᑐᒃᑰᓕᕌᖓᑦᑕ, ᕿᒃᓵᓕᕌᖓᑦᑕᓗ,

⁵ ᐋᓐᓂᕐᓯᕐᑕᐅᓕᕌᖓᑦᑕ, ᑎᒍᔭᐅᓯᒪᕕᖕᒦᓕᕌᖓᑦᑕ, ᒥᑕᐅᑎᒋᔭᐅᓕᕌᖓᑦᑕ; ᐊᒃᓱᕈᕐᑎᑕᐅᓪᓗᑕ ᐱᓇᓱᐊᕐᑎᑕᐅᓗᐊᓕᕌᖓᑦᑕ, ᓯᓂᓱᐃᑦᑑᓕᕌᖓᑦᑕ, ᓂᕿᒃᓴᖃᕈᓐᓃᕌᖓᑦᑕᓗ;

⁶ ᐃᒃᖠᒎᕐᓂᕐᒧᑦ ᓵᓚᐅᑦᑍᓕᓪᓗᑕ, ᖃᐅᔨᒪᑦᓯᐊᕐᓗᑕ, ᕿᓄᐃᓵᕐᓗᑕ, ᐱᑦᓯᐊᕐᓗᑕ, ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ, ᓱᓕᔪᒥᒃ ᓇᒡᓕᖕᓂᖃᕐᓗᑕ,

⁷ ᓱᓕᔪᒥᒃ ᐅᖃᐅᓯᖃᕐᓗᑕ, ᒎᑎᒥᓪᓗ ᐱᔪᓐᓇᕐᓂᖃᕐᑎᑕᐅᓪᓗᑕ; ᐃᓗᐊᕐᑐᓕᓂᕐᒥᒃ ᐅᓇᑕᐅᑎᖃᕐᓗᑕ ᑕᓕᕐᐱᑦᑎᒍᑦ ᓴᐅᒥᑦᑎᒍᓪᓗ;

⁸ ᐅᐱᒋᔭᐅᓕᕌᖓᑦᑕ ᓇᕐᕈᒋᔭᐅᓕᕌᖓᑦᑕᓗ, ᐊᔪᕐᓂᕋᕐᑕᐅᔭᕌᖓᑦᑕ ᐊᔪᖏᓐᓂᕋᕐᑕᐅᔭᕌᖓᑦᑕᓗ. ᓴᒡᓗᑐᓂᕋᕐᑕᐅᕙᒃᑐᒍᑦ, ᓱᓕᔪᒥᒃ ᐅᖃᓪᓚᖃᑦᑕᕋᓗᐊᕐᑐᒍᑦ;

⁹ ᐊᒡᓛᑦ ᖃᐅᔨᒪᔭᐅᖏᑦᑑᔮᕐᐸᒃᐳᒍᑦ, ᖃᐅᔨᒪᔭᐅᑦᓯᐊᕋᓗᐊᕐᓗᑕ ᑕᒤᓐᓄᑦ; ᑐᖁᓕᕐᑐᑎᑐᑦ ᐱᔭᐅᕙᒃᐳᒍᑦ, ᑕᑯᒋᓪᓗ ᐃᓅᕗᒍᑦ; ᓱᒋᐊᕐᑕᐅᕙᒃᐳᒍᑦ ᑐᖁᑕᐅᓇᑕᓕ;

¹⁰ ᕿᒃᓵᒃᑎᑕᐅᕙᒃᐳᒍᑦ, ᖁᕕᐊᓱᑦᓮᓐᓇᕐᐳᒍᓪᓕ; ᐊᔪᕐᓴᕋᓗᐊᕐᐳᒍᑦ, ᐊᓯᕗᓪᓕ ᐊᒥᓱᑦ ᐊᔪᕐᓴᕈᓐᓃᑎᑉᐸᕗᑦ; ᐱᖃᖏᑦᑑᔮᕐᐳᒍᑦ, ᑕᒤᓐᓂᒡᓕ ᐱᖃᕋᓗᐊᕐᐳᒍᑦ.

¹¹ ᐃᓕᑦᓯᓐᓄᑦ ᑯᕆᓐᑎᒥᐅᓄᑦ ᓱᓇᒥᒡᓘᓐᓃᑦ ᐃᔨᕐᓯᓯᒪᓇᑕ ᐅᖃᓪᓚᓚᐅᕐᐳᒍᑦ; ᐃᓕᑦᓯᓐᓄᑦ ᐅᒃᑯᐃᖓᑦᓯᐊᕐᓗᑕ.

¹² ᐅᕙᑦᑎᓐᓄᑦ ᓄᖅᑲᖓᑎᑕᐅᓐᖏᓚᓯ, ᐃᓕᑦᓯᓐᓂᒡᓕ ᓄᖅᑲᖓᑎᑉᐳᓯ.

¹³ ᐃᓕᑦᓯᓐᓄᑦ ᐅᖃᓪᓚᒃᐳᖓ ᓲᕐᓗ ᕿᑐᕐᖓᓐᓄᑦ; ᐅᕙᑦᑎᑐᑦᑕᐅᖅ ᐅᒃᑯᐃᖓᑦᓯᐊᕐᑐᒃᓴᐅᕗᓯ.

ᒎᑎᓐᖑᐊᓖᑦ ᐃᓕᖅᑯᓯᖏᓐᓂᒃ ᓯᕘᕋᓵᕆᓂᖅ

¹⁴ ᐅᒃᐱᖏᑦᑐᑦ ᐱᓂᐊᕐᓂᖏᑦ ᐃᓚᒋᓂᐊᕋᓯᒋᒃ, ᖃᓄᖅ ᐃᓗᐊᕐᑐᓕᓂᖅ ᐱᐅᖏᑦᑐᓕᓂᕐᓗ ᐃᓚᒌᒍᓐᓇᕐᐹᒃ? ᖃᓄᕐᓗ ᖃᐅᒪᔪᖅ ᑖᕐᑐᕐᓗ ᐃᓚᒌᒍᓐᓇᕐᐹᒃ?

¹⁵ ᖃᓄᕐᓕ ᙭ᔅᑑᓯᓗ ᐱᓔᐊᓕᓗ ᐊᑕᐅᓯᐅᖃᑎᒌᒍᓐᓇᕐᐹᒃ? ᐅᕝᕙᓗ ᖃᓄᖅ ᐅᒃᐱᕐᑐᕐᓗ ᐅᒃᐱᖏᑦᑐᕐᓗ ᑲᑐᑦᔨᖃᑎᒌᒍᓐᓇᕐᐹᒃ.

¹⁶ ᓱᓇᒥᒡᓗ ᐊᖏᖃᑎᒌᒍᓐᓇᕐᐹᒃ? ᒎᑎᐅᑉ ᑐᒃᓯᐊᕐᕕᒡᔪᐊᖁᑎᖓ ᒎᑎᓐᖑᐊᕐᓗ? ᐅᕙᒍᓪᓕ ᒎᑎᐅᑉ ᐃᓅᖏᓐᓇᕐᑑᑉ ᑐᒃᓯᐊᕐᕕᒡᔪᐊᖁᑎᒋᕚᑎᒍᑦ. ᒎᑎ ᐅᖃᕐᓯᒪᖕᒪᑦ: “ᐃᓂᒋᓂᐊᕐᐸᒃᑲ ᐃᓅᖃᑎᒋᓗᒋᓪᓗ, ᑖᒃᑯᓄᖓ ᒎᑎᒋᔭᐅᓂᐊᕐᐳᖓ, ᑖᒃᑯᐊᓗ ᐃᓄᖁᑎᒋᓂᐊᕐᐸᒃᑲ.”

¹⁷ ᑍᒤᒻᒪᑦ ᐊᑕᓂᖅ ᐅᖃᕐᐳᖅ, “ᑍᒃᑯᓇᓐᖓ ᐊᓂᒋᑦᓯ ᐃᓚᒋᔪᓐᓃᕐᓗᒋᓪᓗ. ᒎᑎᒧᑦ ᓇᕐᕈᓇᕐᑐᓂᒃ ᐱᓇᓱᐊᕐᓂᐊᕋᓯ, ᑕᕝᕙ ᐃᓚᓕᐅᕐᓂᐊᕐᐸᑦᓯ.

¹⁸ ᐃᓕᑦᓯᓐᓄᑦ ᐊᑖᑕᒋᔭᐅᓂᐊᕐᐳᖓ, ᐅᕙᖓᓕ ᐃᕐᓂᕆᓂᐊᕐᐸᑦᓯ ᐸᓂᒋᓗᓯᓗ, ᐊᑕᓂᖅ ᐊᔪᒐᖃᖏᑦᑐᖅ ᐅᖃᕐᐳᖅ.”