ᑯᕆᓐᑎᐊᒥᐅᓄᑦ ᐂᑉᐸᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᖃᐅᔨᒪᒐᑦᑕ ᓄᓇᒥ ᑐᐱᕗᑦ ᓇᔪᕐᑕᕗᑦ ᐊᓯᕈᕐᐸᑦ, ᐃᒡᓗᒃᓴᖃᕋᑦᑕ ᒎᑎᒥᑦ ᐱᔪᒥᒃ, ᐊᒡᒐᓄᑦ ᓴᓇᔭᐅᓯᒪᖏᑦᑐᒥᒃ, ᕿᓚᖕᒥ ᐃᒡᓗᒋᔪᒫᕐᑕᑦᑎᓐᓂᒃ ᐃᓱᖃᖏᑦᑐᒧᑦ.

² ᒫᓂ ᐃᓛᒃ ᐊᓂᕐᓴᐅᒥᕗᒍᑦ, ᐊᑯᓂᒍᓱᒃᓗᑕ ᐊᑎᔭᒃᓴᑦᑎᓐᓂᒃ ᕿᓚᖕᒥ ᐃᓂᒃᓴᑦᑎᓐᓂᒃ;

³ ᑕᕝᕙ ᐊᑎᒍᑦᑎᒍ ᑕᑯᔭᐅᓂᐊᓐᖏᓚᒍᑦ ᐊᓐᓄᕌᖃᓐᖏᑎᓪᓗᑕ.

⁴ ᑐᐱᕐᒥ ᑕᒫᓃᑎᓪᓗᑕ ᓇᔪᕐᑕᑦᑎᓐᓂ, ᐊᓂᕐᓴᐅᒥᕙᒃᐳᒍᑦ ᐃᓱᒪᔮᕐᓗᑕ; ᑎᒥᑦᑎᓐᓂᒃ ᕿᒤᔪᒪᓂᕐᒧᑦ ᐱᓇᑕ, ᕿᓚᖕᒥᐅᑕᕐᒥᒡᓕ ᐊᑎᑎᑕᐅᔪᒪᓂᕐᒧᑦ, ᑐᖁᔪᒃᓴᖅ ᐄᔭᐅᖁᓪᓗᒍ ᐃᓅᓯᕐᒧᑦ.

⁵ ᐅᕙᑦᑎᓐᓂᒡᓕ ᐅᐸᓗᖕᒊᔧᓯᒪᔪᖅ ᑕᒪᑐᒥᖓ ᑕᕝᕙ ᒎᑎ, ᑖᑦᓱᒪ ᐊᓂᕐᓂᕐᒥᒃ ᑐᓂᓯᕕᒋᓯᒪᕚᑎᒍᑦ ᓇᓗᓁᒃᑯᑕᒃᓴᑦᑎᓐᓂᒃ ᖁᓚᕐᓁᕈᑎᒃᓴᒥᒃ.

⁶ ᑕᕝᕙ ᑍᒪᓐᖓᑦ ᓴᐱᓕᓐᖏᓚᒍᑦ; ᖃᐅᔨᒪᒐᑦᑕ ᑎᒥᑦᑎᓐᓃᑎᓪᓗᑕ ᐊᑕᓂᐅᑉ ᐊᖏᕐᕋᖓᓂᑦ ᐊᕝᕗᑎᓯᒪᒐᑦᑕ.

⁷ ᐅᒃᐱᕐᓂᑯᑦ ᐃᓅᕗᒍᑦ, ᑕᐅᑐᒃᑕᕗᑦ ᐅᒃᐱᕈᑎᒋᓇᒋᑦ.

⁸ ᓴᐱᓐᖏᓚᒍᑦ, ᑎᒥᕗᑦ ᕿᒪᖔᕐᓗᒍ ᐊᖏᕐᕋᕈᒪᓪᓗᑕ ᐊᑕᓂᕐᒧᑦ.

⁹ ᑍᒤᒻᒪᑦ ᐊᖏᕐᕋᕐᓯᒪᒍᑦᑕ ᐊᖏᕐᕋᕐᓯᒪᖏᒃᑯᑦᑕᓘᓐᓃᑦ, ᐊᑕᓂᐅᑉ ᖁᕕᐊᒋᔭᖓᓂᒃ ᐃᓅᓇᓱᐊᕐᐳᒍᑦ.

¹⁰ ᑕᒪᑦᑕ ᓴᖅᑭᑦᑕᕆᐊᖃᕈᒫᕋᑦᑕ ᙭ᔅᑑᓯᐅᑉ ᐃᖅᑲᕐᑐᐃᕕᖓᑕ ᓵᖓᓂ, ᑕᒪᕐᒥᒃ ᐊᑐᓂᑦ ᐱᓂᐊᕐᕕᐅᖁᓪᓗᒋᑦ ᑎᒥᒦᓪᓗᑎᒃ ᐊᑐᓚᐅᕐᑕᖏᑦ ᒪᓕᒡᓗᒋᑦ, ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ.

ᒎᑎᒧᑦ ᐃᓚᓐᓇᕆᔭᐅᓂᖅ ᙭ᔅᑑᓯᒃᑯᑦ

¹¹ ᑍᒤᒻᒪᑦ ᐊᑕᓂᕐᒥᒃ ᓯᕘᕋᒋᔭᖃᕐᓂᕐᒥᒃ ᖃᐅᔨᒪᒐᑦᑕ, ᐃᓄᐃᑦ ᐃᓇᓐᓇᓱᐊᕐᐸᕗᑦ; ᒎᑎᐅᓪᓕ ᖃᐅᔨᒪᕚᑎᒍᑦ, ᐃᓕᑦᓯᓐᓄᓪᓕᑦᑕᐅᖅ ᖃᐅᔨᔭᐅᓂᐊᕐᑐᒃᓴᐅᒐᓗᐊᕐᐳᒍᑦ.

¹² ᐅᕙᑦᑎᓐᓂᒃ ᐱᐅᓯᑎᓐᓇᓱᓐᖏᓚᒍᑦ ᐃᓕᑦᓯᓐᓄᑦ ᐱᕕᒃᓴᖃᕐᑎᑦᓯᓇᓱᐊᕐᐳᒍᓪᓕ ᐅᕙᑦᑎᓐᓂᒃ ᐅᐱᒍᓲᑎᖃᖁᓪᓗᓯ, ᑭᒡᒍᓯᒃᓴᖃᖁᓪᓗᓯ ᑍᒃᑯᓄᖓ ᑕᑯᒃᓴᐅᔪᓂᒃ ᐱᐅᔪᕆᑦᔪᑎᖃᕐᑐᓄᑦ, ᐃᓅᑉ ᐃᓅᓯᖓᓂᒃ ᐃᓱᒪᖏᑦᑐᓄᑦ.

¹³ ᐃᓱᒤᕈᑎᔫᔮᕈᑦᑕ, ᒎᑎ ᐱᑦᔪᑎᒋᓪᓗᒍ ᑍᒤᑉᐳᒍᑦ; ᐃᓱᒪᖃᑦᓯᐊᕈᑦᑕ, ᐃᓕᑦᓯ ᐱᓪᓗᓯ ᑍᒤᑉᐳᒍᑦ.

¹⁴ ᙭ᔅᑑᓯᐅᑉ ᓇᒡᓕᖕᓂᖓᑕ ᐊᐅᓚᒻᒪᑎᒍᑦ, ᐅᒃᐱᕈᓱᒃᑲᑦᑕ ᐃᒫᒃ ᐊᑕᐅᓯᖅ ᑐᖁᓚᐅᕐᒪ ᐃᓄᓕᒫᑦ ᐱᓪᓗᒋᑦ; ᑍᒤᒻᒪᑦ ᐃᓄᓕᒫᑦ ᑖᑦᓱᒧᖓ ᑐᖁᖃᑕᐅᕗᑦ.

¹⁵ ᑖᓐᓇ ᑐᖁᓚᐅᕐᐳᖅ ᐃᓄᓕᒫᑦ ᐱᑦᔪᑎᒋᓪᓗᒋᑦ, ᑖᒃᑯᐊ ᐃᓅᔪᑦ ᐃᒻᒥᓃᓐᓇᖅ ᐃᓱᒪᒋᓗᑎᒃ ᐃᓅᓯᖃᕈᓐᓃᖁᓪᓗᒋᑦ, ᑖᑦᓱᒧᖓᓕ ᐱᑦᔪᑎᒋᓪᓗᒋᑦ ᑐᖁᓚᐅᕐᑐᒧᑦ ᒪᑭᓚᐅᕐᑐᒧᓪᓗ ᐃᓅᖔᓕᖁᓪᓗᒋᑦ.

¹⁶ ᒫᓐᓇᓕ ᑕᕝᕙ, ᑍᒤᒻᒪᑦ, ᑭᓇᒥᒡᓘᓐᓃᑦ ᐃᓱᒪᒋᔭᖃᕈᓐᓃᕐᐳᒍᑦ ᓯᓚᕐᔪᐊᕐᒥᐅᑦ ᐃᓱᒪᒋᔭᖃᕐᓂᖏᑎᑐᑦ; ᑍᑦᓱᒪᓂᑦᑕᐅᖅ ᙭ᔅᑑᓯ ᓯᓚᕐᔪᐊᕐᒥᐅᑎᑐᑦ ᐃᓱᒪᒋᓚᐅᕋᓗᐊᕋᑦᑎᒍ, ᒫᓐᓇᓕ ᑍᒫᒃ ᐃᓱᒪᒋᓐᖏᓕᕐᐸᕗᑦ.

¹⁷ ᑍᒤᒻᒪᑦ, ᙭ᔅᑑᓯᒧᐊᕐᑐᖃᕐᐸᑦ, ᑖᓐᓇ ᓄᑖᓐᖑᕐᑎᑕᐅᕗᖅ; ᐃᓅᓯᑐᖃᖓ ᐲᕐᑕᐅᕗᖅ, ᑕᑯᒋᑦ, ᓄᑖᖅ ᐱᒋᐊᓕᕐᐳᖅ.

¹⁸ ᑕᒪᓐᓇᓕ ᑕᒪᕐᒥᒃ ᒎᑎᒥᑦ ᐱᕗᖅ, ᑖᑦᓱᒪ ᙭ᔅᑑᓯᒃᑯᑦ ᐊᓯᑦᔨᕐᐹᑎᒍᑦ ᐃᒻᒥᓄᑦ ᐃᓚᓐᓇᕆᔭᐅᓕᕐᑎᓪᓗᑕ, ᐱᔭᒃᓴᕐᑖᕐᑎᑉᐹᑎᒍᓪᓗ ᐃᓄᖕᓄᑦ ᑖᒃᑯᐊᑦᑕᐅᖅ ᒎᑎᒧᑦ ᐃᓚᓐᓇᕆᔭᐅᓕᖁᓪᓗᒋᑦ;

¹⁹ ᑕᕝᕙ, ᒎᑎ ᙭ᔅᑑᓯᒃᑯᑦ ᓯᓚᕐᔪᐊᕐᒥᐅᓂᒃ ᐃᓚᓐᓇᕆᔭᕐᑖᕐᓯᒪᖕᒪᑦ, ᐊᔪᕐᑐᓕᓂᖏᓐᓂᒃ ᐃᓱᒪᒋᔪᓐᓁᕐᕕᒋᓪᓗᒋᑦ, ᐃᓄᖕᓄᓪᓗ ᐅᖃᓪᓚᖁᕚᑎᒍᑦ ᐃᓚᓐᓇᕆᔭᐅᓕᕈᓐᓇᕐᓂᖏᓐᓂᒃ.

²⁰ ᑍᒤᒻᒪᑦ ᑎᓕᔭᐅᓯᒪᕗᒍᑦ ᙭ᔅᑑᓯ ᐃᓇᖏᕐᓗᒍ, ᒎᑎ ᐅᕙᑦᑎᒍᑦ ᐃᓄᖕᓂᒃ ᐃᓇᑦᓯᕗᖅ. ᑍᒤᒻᒪᑦ ᐃᓇᑉᐸᑦᓯ ᙭ᔅᑑᓯᒃᑯᑦ, ᒎᑎᒥᒃ ᐃᓚᓐᓇᕆᔭᕐᑖᓕᕆᑦᓯ.

²¹ ᐊᔪᕐᑐᓕᓂᕐᒥᒃ ᖃᐅᔨᓚᐅᕐᓯᒪᖏᑦᑐᖅ ᒎᑎᐅᑉ ᐊᔪᕐᑐᓕᔪᓐᖑᕐᑎᓚᐅᕐᐹ ᐱᑦᔪᑎᒋᓪᓗᑕ, ᐅᕙᒍᑦ ᑖᑦᓱᒨᓇ ᒎᑎᒧᑦ ᐃᓗᐊᕐᑐᓐᖑᕐᑎᑕᐅᖁᓪᓗᑕ.