ᑯᕆᓐᑎᐊᒥᐅᓄᑦ ᐂᑉᐸᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᓂᕐᓂᕐᒥ ᐱᒃᑯᒥᓇᕐᑐᑦ ᒪᕐᕋᕐᓂ ᐴᕐᓯᒪᔪᑦ

¹ ᑍᒤᒻᒪᑦ ᑕᒪᑐᒥᖓ ᐱᔨᑦᓯᕐᓂᕐᒥᒃ ᒎᑎᐅᑉ ᓂᑲᒍᓱᖕᓂᕐᔪᐊᖓᓄᑦ ᐱᑎᑕᐅᓯᒪᒐᑦᑕ, ᓴᐱᓕᕐᓂᐊᓐᖏᓚᒍᑦ,

² ᑲᓐᖑᓇᕐᑐᓪᓕ ᐱᓂᐊᕐᓃᑦ ᐃᔨᕐᓯᒪᔪᑦ ᐊᑐᕈᒪᔪᓐᓃᕐᓯᒪᕙᕗᑦ; ᓯᓔᕐᕆᒃᓯᓂᕐᒥᒡᓗ ᐃᓕᖅᑯᓯᖃᕐᓇᑕ, ᒎᑎᐅᓪᓗ ᐅᖃᐅᓯᖏᑦ ᑐᑭᖃᕈᓐᓃᕐᑎᓐᖏᓚᕗᑦ, ᓱᓕᑦᓯᐊᕐᓂᕐᒥᒡᓕ ᓴᖅᑭᑎᑦᓯᕗᒍᑦ ᒎᑎᐅᑉ ᓵᖓᓂ ᐃᓄᖕᓄᑦ ᐃᓱᒪᖃᕐᕕᐅᔪᒪᓇᑕ ᓈᒻᒪᖏᑦᑐᒥᒃ.

³ ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᑎᒋᔭᕗᑦ ᒪᑐᓯᒪᒃᐸᑕ, ᐊᓯᐅᓂᐊᕐᑐᓄᑦ ᑭᓯᐊᓂ ᒪᑐᓯᒪᕗᑦ.

⁴ ᑕᒪᑐᒪ ᓯᓚᕐᔪᐊᑉ ᒎᑎᖓᑕ ᐅᒃᐱᖏᑦᑐᑦ ᐃᓱᒪᖏᑦ ᑐᑭᓯᔪᓐᓇᕐᑎᓐᖏᓔᑦ, ᐅᖃᐅᓰᑦ ᑐᓴᕈᒥᓇᕐᑐᑦ ᖃᐅᒪᓂᖓᓂᒃ ᑕᑯᖁᓇᒋᑦ ᙭ᔅᑑᓯᐅᑉ ᓂᕐᑐᕐᓇᕐᓂᕐᔪᐊᖓᓂᒃ, ᑖᑦᓱᒥᖓ ᒎᑎᐅᑉ ᐊᑦᔨᖓᓂᒃ.

⁵ ᓇᖕᒥᓂᖅ ᐅᕙᑦᑎᓐᓂᒃ ᐊᔪᕆᕐᑐᐃᑦᔪᑎᒋᖏᓐᓇᑦᑕ, ᔩᓱᓯᐅᓪᓕ ᙭ᔅᑑᓯᐅᑉ ᐊᑕᓂᐅᓂᖓ ᐊᔪᕆᕐᑐᐃᑦᔪᑎᒋᕙᕗᑦ, ᐅᕙᑦᑎᓐᓂᒡᓗ ᐱᔨᐅᑎᓪᓗᑕ ᐃᓕᑦᓯᓐᓄᑦ ᔩᓱᓯ ᐱᑦᔪᑎᒋᓪᓗᒍ.

⁶ ᐃᒫᒃ ᒎᑎ ᐅᖃᕐᓯᒪᖕᒪᑦ, “ᖃᐅᒪᔪᖅ ᖃᐅᒻᒤᓕᕐᓕ ᑖᕐᑐᒥ,” ᑖᑦᓱᒪ ᖃᐅᒪᓂᓂ ᖃᐅᒻᒪᒃᑎᑉᐹ ᐆᒻᒪᑎᑦᑎᓐᓄᑦ ᖃᐅᔨᑎᑕᐅᖁᓪᓗᑕ ᒎᑎᐅᑉ ᓂᕐᑐᕐᓇᕐᓂᕐᔪᐊᖓᓂᒃ ᙭ᔅᑑᓯᐅᑉ ᖃᐅᒻᒪᒃᑎᑦᓯᓂᖓᓂᑦ ᐱᔪᒥᒃ.

⁷ ᐅᕙᒍᓪᓕ ᐊᓂᕐᓂᒃᑯᑦ ᐱᒃᑯᒥᓇᕐᑐᒥᒃ ᑕᒪᑐᒥᖓ ᐱᖃᕐᑐᒍᑦ ᐃᒥᖃᐅᑎᑎᑐᑦ ᒪᕐᕋᕐᑎᑐᑦ ᑍᒤᑉᐳᒍᑦ, ᓴᖅᑭᑎᑦᓯᖁᓪᓗᑕ ᐱᔪᓐᓇᕐᓂᕐᔪᐊᖅ ᑕᒪᓐᓇ ᒎᑎᒥᑦ ᐱᓯᒪᓂᖓᓂᒃ ᐅᕙᑦᑎᓐᓂᐅᖏᑦᑐᖅ.

⁸ ᖃᓄᑐᐃᓐᓇᖅ ᐅᑯᒤᒃᓴᕐᑎᑕᐅᕗᒍᑦ, ᐊᔪᓕᕐᑎᑕᐅᓇᑕᓕ; ᖁᓚᕐᓇᕐᑐᒦᑎᑕᐅᕗᒍᑦ, ᓴᐱᓕᕐᑎᑕᐅᓇᑕᓕ;

⁹ ᐊᑭᕋᕐᑐᕐᑎᖃᕐᐳᒍᑦ, ᐃᓚᖃᕈᓐᓁᓪᓕᓇᑕᓕ; ᐋᓐᓂᐊᑎᑕᐅᒐᓗᐊᕐᐳᒍᑦ, ᑐᖁᑕᐅᓇᑕᓕ;

¹⁰ ᑎᒥᒥᐅᑕᕾᓐᓇᕐᐳᒍᑦ ᔩᓱᓯᐅᑉ ᑐᖁᖓᓂᒃ, ᑖᑦᓱᒪ ᐃᓅᓯᖓ ᓴᖅᑭᔮᖁᓪᓗᒍ ᑎᒥᑦᑎᓐᓂ.

¹¹ ᐃᓅᓂᑦᑎᓐᓂ ᑐᖁᒦᖏᓐᓇᕐᐳᒍᑦ ᔩᓱᓯ ᐱᑦᔪᑎᒋᓪᓗᒍ, ᐃᓅᓯᖓᑦᑕᐅᖅ ᓴᖅᑭᔮᖁᓪᓗᒍ ᑎᒥᑦᑎᓐᓂ ᑐᖁᔪᒃᓴᒥ.

¹² ᑕᕝᕙ ᑐᖁ ᐅᕙᑦᑎᓐᓂᒃ ᐱᓇᓱᐊᖏᓐᓇᕐᐳᖅ; ᐃᓅᓯᕐᓕ ᐃᓕᑦᓯᓐᓂ ᐱᓇᓱᐊᕐᑎᓪᓗᒍ.

¹³ ᐊᑦᔨᒌᒥᒃ ᐅᒃᐱᕐᓂᒃᑯᑦ ᐊᓂᕐᓂᖃᒃᓂᑦᑎᓐᓄᑦ ᒎᑎᐅᑉ ᐅᖃᐅᓯᖏᑦ ᒪᓕᒃᓗᒋᑦ, “ᐅᒃᐱᕋᒪ ᐅᖃᓚᐅᕐᐳᖓ”, ᐅᕙᒍᑦᑕᐅᖅ ᐅᒃᐱᕋᑦᑕ ᑍᒪᒃ ᐅᖃᓪᓚᑭᕗᒍᑦ,

¹⁴ ᖃᐅᔨᒪᒐᑦᑕ ᒎᑎᐅᑉ ᐊᑕᓂᕐᒥᒃ ᔩᓱᓯᒥᒃ ᐆᒻᒪᕐᑎᑦᓯᔫᑉ, ᐆᒻᒪᕐᑎᑦᓱᒫᕐᒥᖕᒪᑎᒍᑦ ᔩᓱᓯᒃᑯᑦ, ᐃᓚᒋᓗᓯᓗ ᓴᖅᑭᑎᓪᓗᓂᑎᒍᑦ ᓇᔪᒐᒥᓄᑦ.

¹⁵ ᑕᒪᓐᓇ ᑍᒤᑉᐳᖅ ᐱᑦᔪᑎᒋᓪᓗᓯ, ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐃᓄᖕᓄᑦ ᐅᓄᕐᑐᓄᑦ ᑎᑭᐸᓪᓕᐊᖏᓐᓇᖁᓪᓗᒍ, ᖁᔭᓕᕙᓪᓕᐊᖏᓐᓇᖁᓪᓗᒋᑦ, ᒎᑎᐅᑉ ᓂᕐᑐᕐᓇᐅᑎᒃᓴᖓᓄᑦ.

ᐅᒃᐱᕐᓂᒃᑯᑦ ᐃᓅᓯᖃᕐᓂᖅ

¹⁶ ᑍᒤᒻᒪᑦ ᓴᐱᓕᓐᖏᓚᒍᑦ. ᑕᑯᒃᓴᐅᔪᒃᑯᑦ ᐃᓅᓯᑦᑎᒍᑦ ᐊᔪᓕᕐᐸᓪᓕᐊᒐᓗᐊᕐᓗᑕ, ᐃᓗᑦᑎᒍᓪᓕ ᖃᐅᑕᒫᑦ ᓄᑖᓐᖑᕐᑎᑕᐅᖏᓐᓇᕐᐳᒍᑦ.

¹⁷ ᒪᑯᐊ ᐊᑯᓂᐅᖏᑦᑐᖅ ᐅᖁᒻᒤᒃᓴᕐᑎᑕᐅᓂᕆᕙᒃᑕᕗᑦ ᐅᕙᑦᑎᓐᓂᒃ ᐅᐸᓗᖕᒊᔧᖕᒪᑕ ᐱᓐᓇᕐᓇᕐᑐᕐᔪᐊᒧᑦ ᐃᓱᖃᖏᑦᑐᒧᑦ; ᐊᑦᔨᒋᔭᐅᑎᑕᒃᓴᐅᖏᑦᑐᒧᓪᓘᓐᓃᑦ,

¹⁸ ᐃᓱᒪᒋᔭᖃᕋᑦᑕ ᑕᑯᒃᓴᐅᖏᑦᑐᓂᒃ, ᑕᑯᒃᓴᐅᔪᑦ ᐱᓇᒋᑦ; ᑕᑯᒃᓴᐅᔪᑦ ᐃᓱᖃᕐᒪᑕ; ᑕᑯᒃᓴᐅᖏᑐᓪᓕ ᐃᓱᖃᓐᖏᓚᑦ.