ᑯᕆᓐᑎᐊᒥᐅᓄᑦ ᐂᑉᐸᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᔨᑦᓯᕐᑎᐅᓂᖅ ᐊᖏᖃᑎᒌᖕᓂᕐᒧᑦ ᓄᑖᒧᑦ

¹ ᑍᒤᓕᐅᕐᑎᓪᓗᑕ ᐅᕙᑦᑎᓐᓂᒃ ᓂᕐᑑᑎᔫᔮᓕᕐᐱᑖ? ᐅᕝᕙᓗ ᐊᓯᑦᑎᑐᑦ ᑎᑎᖅᑲᓂᒃ ᐱᔭᕆᐊᖃᕐᐱᑖ? ᓂᕐᑐᕐᓇᕐᓂᕅᔪᓂᒃ ᐃᓕᑦᓯᓐᓄᑦ, ᐅᕝᕙᓗ ᐃᓕᑦᓯᓐᓂᑦ ᐱᑎᑕᐅᔭᕆᐊᖃᕐᐱᑖ?

² ᐃᓕᑦᓯᓕ ᑕᕝᕙ ᑎᑎᖅᑲᐅᕗᓯ ᐅᕙᑦᑎᓐᓂᒃ ᓂᕐᑐᕐᓇᕐᓂᕅᔪᑦ, ᐃᓗᑦᑎᓐᓂ ᑎᑎᕋᕐᓯᒪᔪᑦ, ᖃᐅᔨᔭᒃᓴᐅᖁᓪᓗᓯ ᐅᖃᓕᒫᒐᒃᓴᐅᓪᓗᓯᓗ ᐃᓄᓕᒫᓄᑦ;

³ ᓇᓗᓇᖏᑦᓯᐊᕐᑐᒥᒡᓗ ᙭ᔅᑑᓯᒥ ᑎᑎᖅᑲᐅᕗᓯ ᐱᓇᓱᐊᕐᓂᑦᑎᒍᑦ ᓴᖅᑭᑎᑕᐅᓯᒪᓪᓗᓯ, ᑎᑎᕋᐅᒻᒧᑦ ᑎᑎᕋᕐᓯᒪᓐᖏᓚᓯ; ᒎᑎᐅᓪᓕ ᐆᒪᔫᑉ ᐊᓂᕐᓂᖓᓄᑦ, ᐅᔭᖅᑲᑎᒍᑦ ᑎᑎᕋᕐᓯᒪᖏᑦᑐᑦ ᐃᓅᓪᓕ ᐆᒻᒪᑎᖓᒍᑦ ᑎᑎᕋᕐᓯᒪᔪᑦ.

⁴ ᑍᒤᓕᕗᒍᓪᓕ ᒎᑎᒧᑦ ᖁᓚᖏᓐᓇᑦᑕ ᙭ᔅᑑᓯᒃᑯᑦ.

⁵ ᐅᕙᑦᑎᓐᓂᒡᓕ ᓱᓇᒥᒡᓘᓐᓃᑦ ᐱᔪᓐᓇᕐᓂᕋᕐᓗᑕ ᖃᓄᐃᑦᑐᑐᐃᓐᓇᕐᓂᒃ ᑍᒤᓕᑦᔪᑎᖃᓐᖏᓚᒍᑦ; ᐱᔪᓐᓇᕐᑎᑕᐅᓂᕗᓪᓕ ᒎᑎᒥᑦ ᐱᕗᖅ;

⁶ ᑖᑦᓱᒪ ᐱᔪᓐᓇᕐᑎᒻᒪᑎᒍᑦ ᐱᔨᑦᓯᕐᑎᐅᖁᓪᓗᑕ ᐊᖏᖃᑎᒌᒍᑎᒥᒃ ᓄᑖᒥᒃ, ᐱᖁᔭᑎᒍᑦ ᑎᑎᕋᕐᓯᒪᔪᑎᒎᖏᑦᑐᖅ ᐊᓂᕐᓂᑯᓪᓕ; ᐱᖁᔧᑦ ᑐᖁᑎᑦᓯᖕᒪᑕ, ᐊᓂᕐᓂᕐᓕ ᐃᓅᓯᕐᒥᒃ ᑐᓂᓯᕗᖅ.

⁷ ᐱᖁᔧᑦ ᑐᖁᑎᑦᓯᔪᑦ ᑐᓂᔭᐅᑎᓪᓗᒋᑦ ᑎᑎᕋᕐᓯᒪᓚᐅᕐᐳᑦ ᐅᔭᖅᑲᓂ, ᒎᑎᐅᓪᓗ ᑕᑯᒥᓇᕐᓂᕐᔪᐊᖓ ᓴᖅᑭᓚᐅᕐᐳᖅ ᐱᖁᔭᑦ ᑐᓂᔭᐅᓕᕐᑎᓪᓗᒋᑦ, ᐃᓴᕆᐊᓔᑎᑦ ᑕᑯᓐᓇᕈᓐᓇᓚᐅᓐᖏᓚᑦ ᒨᓯᓯᐅᑉ ᑮᓇᖓᓂᒃ ᖃᐅᒪᓗᐊᕐᓂᖓᓄᑦ, ᓄᖑᑦᑐᒃᓴᐅᒐᓗᐊᕐᑎᓪᓗᒍ,

⁸ ᐊᖏᓂᕐᓴᒥᒡᓕ ᑕᑯᒥᓇᕐᓂᕐᓴᐅᒐᔭᓐᖏᓛᖅ ᐊᓂᕐᓂᐅᑉ ᐱᓇᓱᐊᕐᓂᖓ?

⁹ ᐃᓄᖕᓂᒃ ᐃᖅᑲᕐᑐᒐᒃᓴᓐᖑᕐᑎᑦᓯᔪᖅ ᑕᑯᒥᓇᕐᓂᖃᓚᐅᕐᐸᑦ; ᐊᖏᓂᕐᓴᒻᒪᕆᖕᒥᒃ ᑕᑯᒥᓇᕐᓂᖃᕐᑐᒃᓴᐅᕗᖅ ᒎᑎᒧᑦ ᐃᖅᑲᕐᑐᒐᒃᓴᐅᔪᓐᓃᕐᓂᕐᒥᒃ ᐱᑎᑦᓯᔪᖅ.

¹⁰ ᑍᓐᓇ ᑕᑯᒥᓇᕐᓂᖃᓚᐅᕐᑐᖅ ᓄᖑᑦᑐᒃᓴᖅ ᑕᑯᒥᓇᕐᓂᕐᓴᐅᖏᒻᒪᑦ ᒫᓐᓇ ᑕᒪᑐᒪᓐᖓᑦ ᑕᑯᒥᓇᕐᑐᕐᔪᐊᕐᒥᑦ.

¹¹ ᓴᖅᑭᔮᑬᓐᓇᑐᐃᓐᓇᕐᑐᖅ ᑕᑯᒥᓇᕐᓂᖃᓚᐅᕐᐸᑦ, ᓇᓗᓇᓐᖏᓚᖅ ᐊᖏᓂᕐᓴᒻᒪᕆᐊᓗᖕᒥᒃ ᑕᑯᒥᓇᕐᓂᖃᕋᔭᕐᒪᑦ ᐃᓱᖃᖏᑦᑐᒧᐊᖓᔪᖅ.

¹² ᑍᒤᑦᑐᒥᒃ ᑕᕝᕙ ᓂᕆᐅᖕᓂᖃᕋᑦᑕ, ᓱᓇᒥᒡᓘᓐᓃᑦ ᓯᕘᕋᓐᖏᓚᒍᑦ.

¹³ ᒨᓯᓯ ᐊᑦᔨᒋᖏᓐᓇᑦᑎᒍ, ᑮᓇᕐᒥᓂᒃ ᒪᑐᐊᕐᓯᓚᐅᕐᑐᖅ ᐃᓴᕆᐊᓔᑎᑦ ᑕᑯᖁᓇᒋᑦ ᑮᓇᖓᑕ ᖃᐅᒪᓂᖓᓂᒃ ᓄᖑᓐᓂᐊᕐᑐᒥᒃ.

¹⁴ ᑍᒃᑯᐊᓕ ᐃᓱᒪᖏᑦ ᓱᓕ ᒪᑐᓯᒪᕗᑦ ᐅᓪᓗᒥᒧᑦ ᑎᑭᓪᓗᒍ; ᐅᖃᓕᒫᓕᕌᖓᒥᒃ ᐊᖏᖃᑎᒌᖕᓂᑐᖃᕐᓃᑦᑐᓂᒃ, ᒪᑐᐊᕆᔭᐅᓚᐅᕐᑐᖅ ᓱᓕ ᐲᕐᑕᐅᓯᒪᓐᖏᓚᖅ, ᑖᓐᓇ ᒪᑐᐊᖅ ᙭ᔅᑑᓯᒃᑯᑦ ᑭᓯᐊᓂ ᐲᕐᑕᐅᔪᓐᓇᕐᒪᑦ.

¹⁵ ᐊᒡᓛᑦ ᐅᓪᓗᒥᒧᑦ ᑎᑭᓪᓗᒍ ᒨᓯᓯᐅᑉ ᐊᒡᓚᖏᓐᓂᒃ ᐅᖃᓕᒫᓕᕌᖓᒥᒃ ᓱᓕ ᐃᓱᒪᖏᑦ ᒪᑐᐊᕐᓯᒪᖃᑦᑕᕐᐳᑦ;

¹⁶ ᐊᑕᓂᕐᒧᓪᓕ ᐃᓄᒃ ᓵᒋᐊᕐᐸᑦ ᒪᑐᐊᖅ ᑕᕝᕙ ᐲᕐᑕᐅᒐᔭᕐᐳᖅ.

¹⁷ ᐊᑕᓂᕐᓕ ᐊᓂᕐᓂᐅᖕᒪᑦ; ᐊᑕᓂᐅᓪᓗ ᐊᓂᕐᓂᖓ ᓇᔫᑎᓕᕌᖓᑦ, ᑕᕝᕙᓂ ᕿᓚᕈᑦᔮᕐᓯᒪᓂᖃᕐᐳᖅ.

¹⁸ ᐅᕙᒍᓪᓗ ᑕᒪᑦᑕ ᑭᓇᑦᑎᓐᓂᒃ ᒪᑐᐊᕐᓯᓯᒪᖏᑦᑐᒍᑦ, ᐊᑕᓂᐅᑉ ᓂᕐᑐᕐᓇᕐᓂᖓ ᑕᑯᒃᓴᐅᑎᑉᐸᕗᑦ, ᐊᓯᑦᔨᕐᑕᐅᓪᓗᑕᓗ ᑖᑦᓱᒪ ᑕᐅᑦᑐᖓᓄᑦ ᓂᕐᑐᕐᓇᕐᓯᕙᓪᓕᐊᑎᑦᓯᔪᒧᑦ ᐱᓐᓇᕐᓇᕐᑐᒥᑦ ᐱᓐᓇᕐᓇᕐᑐᒧᑦ; ᑕᒪᓐᓇᓗ ᐊᑕᓂᕐᒥᑦ ᐱᕗᖅ ᐊᓂᕐᓂᐅᔪᒥᑦ.