ᑯᕆᓐᑎᐊᒥᐅᓄᑦ ᐂᑉᐸᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓂᕐᑎᕆᓃᑦ ᑭᖑᓪᓕᕐᐹᑦ

¹ ᑕᕝᕙ ᐱᖓᔪᒋᓕᕐᑕᖓᓂᒃ ᐃᓕᑦᓯᓐᓄᑦ ᑎᑭᓛᓕᕐᐳᖓ. “ᒪᕐᕉᒃᐸᑎᒃ ᖃᐅᔨᓯᒪᔫᒃ ᐱᖓᓱᓪᓘᓐᓃᑦ, ᐸᓯᔭᒃᓴᓐᖑᕐᑎᑦᓯᔪᓐᓇᕐᐳᑦ.”

² ᐅᖃᐅᑎᔭᕇᓚᐅᕐᐸᑦᓯ ᐃᓂᕐᑎᕐᓗᓯ ᑭᖑᓪᓕᕐᒥᒃ ᐃᓕᑦᓯᓐᓄᑦ ᑎᑭᓯᒪᓪᓗᖓ, ᐃᓂᕐᑎᒃᑲᓐᓂᓕᕐᐸᑦᓯ ᓇᔫᑎᓇᖓ ᐃᓕᑦᓯᓐᓄᑦ, ᑎᑭᓕᕐᒥᒍᒪ ᐊᑦᑕᕆᓂᐊᓐᖏᓚᒃᑲ ᓯᕗᓂᖓᓂ ᐊᔪᕐᑐᓕᓚᐅᕐᑐᑦ ᐊᓯᖏᓪᓘᓐᓃᑦ,

³ ᖃᐅᔨᑎᑕᐅᔪᒪᒐᑦᓯᓕ ᙭ᔅᑑᓯ ᐅᕙᒃᑯᑦ ᐅᖃᓪᓚᖕᒪᖔᑦ. ᑖᓐᓇ ᓵᓐᖐᑦᑐᓐᖏᓚᖅ ᐃᓕᑦᓯᓐᓄᑦ ᐱᓇᓱᐊᓕᕈᓂ; ᐱᔪᓐᓇᕐᓂᕐᒥᓂᒡᓕ ᑕᑯᑎᓐᓂᐊᕐᐹᓯ.

⁴ ᓴᓐᖐᓐᓂᕐᒥ ᑭᑭᐊᒃᑐᕐᑕᐅᓚᐅᕐᐳᖅ, ᐆᒪᕗᕐᓕ ᒎᑎᐅᑉ ᐱᔪᓐᓇᕐᓂᖓᒍᑦ. ᑍᒫᒃᑕᐅᖅ ᑖᑦᓱᒪᓂ ᓴᓐᖐᑦᑑᕗᒍᑦ, ᒎᑎᐅᓪᓕ ᐱᔪᓐᓇᕐᓂᖓᒍᑦ ᑖᓐᓇ ᐃᓅᖃᑎᒋᓂᐊᕐᐸᕗᑦ ᐱᓇᓱᐊᓕᕈᑦᑕ ᐃᓕᑦᓯᓐᓄᑦ.

⁵ ᐃᓕᑦᓯᓐᓂᒃ ᖃᐅᔨᓴᕆᑦᓯ ᐅᒃᐱᕐᓂᕐᒦᒻᒪᖔᑦᓯ. ᐆᒃᑐᕆᑦᓯ ᐃᓕᑦᓯᓐᓂᒃ; ᖃᐅᔨᒪᓐᖏᓚᓰ ᔩᓱᓯ ᙭ᔅᑑᓯ ᐃᓗᑦᓯᓐᓃᒻᒪᑦ? ᐅᒃᐱᕐᓂᕐᒥ ᓱᓕᖏᒃᑯᑦᓯ ᑭᓯᐊᓂ ᖃᐅᔨᒐᔭᓐᖏᓚᓯ.

⁶ ᖃᐅᔨᓂᐊᕋᓱᒋᕙᑦᓯ ᐅᒃᐱᕐᓂᕐᒥᒃ ᓱᓕᖏᑦᑐᒥᒃ ᐱᓯᒪᖏᓐᓂᑦᑎᓐᓂᒃ.

⁷ ᒫᓐᓇᓗ ᑐᒃᓯᐊᕐᐳᒍᑦ ᒎᑎᒧᑦ ᑕᒻᒪᖁᓇᓯ ᓱᓇᑐᐃᓐᓇᕐᒥᒃ; ᐃᓄᖕᓄᑦ ᖃᐅᔨᔭᐅᔪᒪᑐᐃᓐᓇᕐᓂᕐᒧᑦ ᓇᔪᕐᑕᐅᓂᑦᑎᓐᓂᒃ ᐱᓇᑕ, ᓈᒻᒪᓈᕐᑐᒥᒡᓕ ᐱᖁᓪᓗᓯ, ᐅᕙᒍᑦ ᑲᔪᓯᖏᑦᑑᔮᕋᓗᐊᕐᑎᓪᓗᑕ.

⁸ ᓱᓕᓂᖅ ᐊᑭᕋᕐᑐᕈᓐᓇᓐᖏᓚᕗᑦ, ᓱᓕᓂᒃᑯᓪᓕ ᑭᓯᐊᓂ ᐱᓇᓱᐊᕈᓐᓇᕐᐳᒍᑦ.

⁹ ᖁᕕᐊᓱᒃᐳᒍᑦ ᓴᓐᖐᑦᑑᓕᕌᖓᑦᑕ ᓴᓐᖏᔫᑎᓪᓗᓯ. ᑐᒃᓯᐊᕐᐳᒍᓪᓗ ᓈᒻᒪᒃᓯᑎᑕᐅᑦᓯᐊᖁᓪᓗᓯ.

¹⁰ ᑍᒫᒃ ᑎᑎᕋᕐᐳᖓ ᐊᑦᓯᒪᓪᓗᖓ ᐃᓕᑦᓯᓐᓂᑦ, ᑎᑭᒃᑯᒪ ᐃᓕᕋᓇᕈᒪᓇᖓ ᐱᔪᓐᓇᕐᓂᖃᕐᑎᑕᐅᓂᓐᓄᑦ, ᐱᔪᓐᓇᕐᓂᕐᒧᑦ ᐊᑕᓂᕐᒥᑦ ᐱᓯᒪᔭᓐᓄᑦ ᐋᖅᑭᒃᐸᓪᓕᐊᖁᓪᓗᓯ ᓱᕋᒍᑎᒃᓴᑦᓯᓐᓅᖏᑦᑐᖅ.

¹¹ ᒫᓐᓇᓕ ᙭ᔅᑑᓯᒥᐅᑕᐅᑎᒃᑲ ᑕᕝᕙᐅᕗᓯ. ᐃᓅᓯᓯ ᐋᖅᑭᒃᓱᕐᓯᐅᒃ, ᐱᖁᔨᓂᒃᑲ ᓈᓚᒃᓯᒋᒃ, ᐃᓱᒪᖃᖃᑎᒌᒋᑦᓯ ᐊᑭᕋᕐᑑᑎᖏᓪᓗᓯ, ᒎᑎᐅᓪᓗ ᓇᒡᓕᖕᓂᖓᑕ ᓮᒻᒪᕐᑎᑦᓯᓂᖓᑕᓗ ᐃᓚᒋᓂᐊᕐᐹᓯ.

¹² ᑕᕝᕙᐅᕗᑏᖃᑎᒌᒋᑦᓯ ᑯᓂᖕᓂᕐᒧᑦ ᐃᑦᔪᕐᓁᑦᑐᒧᑦ.

¹³ ᐃᑦᔪᕐᓁᑎᑕᐅᓯᒪᔪᓕᒫᑦ ᑕᕝᕙᐅᕗᑏᕐᐹᓯ.

¹⁴ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᒎᑎᐅᓪᓗ ᓇᒡᓕᖕᓂᖓᑕ ᐊᓂᕐᓂᐅᓪᓗ ᐃᑦᔪᕐᓁᑦᑑᑉ ᐃᓚᖃᕐᓂᖓᑕ ᐃᓚᒋᓕᓯ ᑕᒪᑦᓯ.