ᑯᕉᓂᑲ ᐂᑉᐸᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᐱᓇᓱᐊᓚᐅᕐᑕᖏᑦ

¹ ᐊᕐᕌᒍᐃ 20 ᐊᓂᒍᕐᑎᓪᓗᒋᑦ, ᓲᓗᒨᓂ ᐊᑕᓂᐅᑉ ᐃᒡᓗᖓᓂᒃ ᐃᒡᓗᒥᓂᒡᓗ ᓴᓇᓚᐅᕐᓂᖓᑕ ᑭᖑᓂᖓᓂ,

² ᓲᓗᒨᓂᐅᑉ ᐃᒡᓗᒐᓮᑦ ᓴᓇᒃᑲᓐᓂᓚᐅᕐᐰᑦ ᕼᐅᕋᒥᐅᑉ ᑐᓂᓚᐅᕐᑕᖏᑦ ᑖᑦᓱᒧᖓ, ᐃᓴᕆᐊᓕᒃᑯᓪᓗ ᐃᓄᖏᑦ ᑕᕝᕙᓂ ᐃᓂᑖᕐᑎᓪᓗᒋᑦ.

³ ᓲᓗᒨᓂᓗ ᐅᓇᑕᕆᐊᕋᒥ ᕼᐊᒫᑎ ᔫᐸᒧᑦ, ᓵᓚᒋᕚ ᓄᓇᖁᑎᑖᕆᓪᓗᒍᓗ.

⁴ ᓴᓇᓚᐅᕆᕗᖅ ᑖᑦᒧᕆᒥᒃ ᐃᓄᖃᔪᐃᑦᑐᒥ ᐃᒡᓗᒐᓮᓪᓗ ᓯᕐᓗᐊᖃᕐᕖᑦ ᓴᓇᕔᑦ ᕼᐊᒫᑎᒥ.

⁵ ᐃᒡᓗᒐᓴᓕᐅᕆᕗᖅ ᖁᕝᕙᓯᖕᓂᕐᓴᐅᔪᓂᒃ ᐱᑦ-ᕼᐅᕋᓐᒥ ᐊᓪᓕᐅᓂᕐᓴᒥᓗ ᐱᑦ-ᕼᐅᕋᓐᒥᒃ, ᑖᒃᑯᐊᓗ ᓴᐴᓗᑕᓕᐅᕐᐰᑦ ᐊᕙᓗᕐᔪᐊᓕᐅᕐᓗᒋᑦ, ᐃᑎᕐᑕᕐᕕᖃᕐᓗᑎᒃ, ᓴᓐᓂᕈᐊᖃᕐᓗᑎᒡᓗ.

⁶ ᐹᓛᑎᓗ, ᐃᒡᓗᒐᓴᓕᒫᓪᓗ ᓯᕐᓗᐊᖃᕐᕕᒋᕔᑦ, ᐃᒡᓗᒐᓮᓪᓗ ᐊᒃᓴᓗᐊᓕᖁᑎᖏᓐᓄᑦ ᕿᒧᒃᓯᐅᑎᖃᕐᕕᖏᑦ, ᐃᒡᓗᒐᓮᓪᓗ ᕿᒻᒥᕐᔪᐊᒃᑰᕐᑎᖏᑕ ᐃᓂᒋᔭᖏᑦ, ᓲᓗᒨᓂᐅᓪᓗ ᓴᓇᔪᒪᔭᓕᒫᓂ ᓴᓇᕔᑦ ᔨᕉᓴᓕᒥ, ᓕᐸᓇᓂᒥ, ᓄᓇᓕᖕᓂᓗ ᐊᐅᓚᑦᓯᕕᒋᔭᓕᒫᒥᓂ.

⁷ ᐃᓄᓕᒫᑦ ᐊᒥᐊᑰᔪᑦ ᕼᐃᑍᑎᒥᐅᑦ, ᐊᒧᕅᑎᒥᐅᑦ, ᐱᕆᔧᑎᒥᐅᑦ, ᕼᐃᕔᑎᒥᐅᑦ, ᔨᐳᓮᑎᒥᐅᓪᓗ, ᐃᓴᕆᐊᓕᒥᐅᑕᐅᖏᑦᑐᑦ,

⁸ ᑖᒃᑯᓇᓐᖓᑦ ᓄᓇᓕᑐᕾᑦ ᑭᖑᕚᖏᓐᓂᑦ, ᐃᓴᕆᐊᓕᒥᐅᑦ ᓄᖑᓚᐅᓐᖏᑕᖏᓐᓂᑦ, ᓲᓗᒨᓂ ᓯᐊᓛᖃᓕᓚᐅᕐᐳᖅ ᐊᑭᓕᕐᓱᕐᓇᒋᑦ, ᐅᓪᓗᒥᒧᑦ ᑎᑭᓪᓗᒍ.

⁹ ᓲᓗᒨᓂᐅᓪᓕ ᐃᓴᕆᐊᓕᒥᐅᑦ ᓯᐊᓛᖑᔪᑎᑐᑦ ᓴᓇᑎᓐᖏᓔᑦ; ᐅᓇᑕᕐᑐᒃᓴᐅᑎᓚᐅᕐᐰᓪᓕ, ᐊᖓᔪᖅᑳᐅᑎᓪᓗᒋᓪᓗ, ᐊᖓᔪᖅᑲᐅᑎᑉᐰᓪᓗ ᐊᒃᓴᓗᐊᓕᖕᓄᑦ ᕿᒧᒃᓯᐅᑎᓄᑦ, ᕿᒻᒥᕐᔪᐊᑰᕐᑎᖁᑎᒥᓄᓪᓗ.

¹⁰ ᐃᓚᖏᓪᓗ ᐊᖓᔪᖅᑳᓄᑦ ᐊᖓᔪᖅᑲᐅᑎᑉᐰᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐊᖓᔪᖅᑳᖁᑎᖏᓐᓄᑦ 250ᓄᑦ, ᑖᒃᑯᐊ ᐊᐅᓚᑦᓯᔨᐅᑎᑉᐰᑦ ᐃᓄᖕᓄᑦ.

¹¹ ᓲᓗᒨᓂᐅᑉ ᐰᕉᑉ ᐸᓂᖓ ᐊᐅᓪᓚᐅᑎᕚ ᑍᕕᑎᐅᑉ ᐃᒡᓗᒐᓴᖏᓐᓂᑦ ᐃᒡᓗᓕᐊᕆᓚᐅᕐᑕᒥᓄᑦ ᑖᑦᓱᒧᖓ, ᐅᖃᕐᓗᓂ, “ᓄᓕᐊᕋ ᐃᒡᓗᖃᕐᑐᒃᓴᐅᓐᖏᓚᖅ ᑍᕕᑎᐅᑉ ᐊᖓᔪᖅᑳᕐᔪᐊᑉ ᐃᒡᓗᒐᓴᖏᓐᓂ ᐃᓴᕆᐊᓕᒥ, ᑖᓐᓇ ᐊᑕᓂᐅᑉ ᐃᒃᓯᕐᕕᖓᑕ ᐃᓂᖓ ᐃᑦᔪᕐᓁᑦᑑᖕᒪᑦ.”

¹² ᑭᖑᓂᖓᒍᑦ ᓲᓗᒨᓂ ᑐᓂᕐᕈᓯᕐᐳᖅ ᐊᑕᓂᕐᒧᑦ ᐃᑯᐊᓚᑎᑕᒃᓴᓂᒃ ᐊᑕᓂᐅᑉ ᑐᓂᕐᕈᓯᕐᕕᖁᑎᖓᓂ ᓴᓇᓚᐅᕐᑕᒥᓂ ᑐᒃᓯᐊᕐᕕᒡᔪᐊᑉ ᓯᓚᓪᓕᖓᓃᑦᑐᒥ.

¹³ ᖃᐅᑕᒫᕐᓯᐅᑎᑦ ᒪᓕᒡᓗᒋᑦ, ᑐᓂᕐᕈᓯᕐᐳᖅ ᒨᓯᓯᐅᑉ ᐱᖁᔭᖏᑦ ᒪᓕᒡᓗᒋᑦ ᓴᐸᑎᓯᐅᑎᓂᒃ, ᑕᖅᑭᓂᕋᑖᕐᑐᕐᓯᐅᑎᓂᒃ, ᐊᕐᕌᒍᑕᒫᓪᓗ ᐱᖓᓱᓄᑦ ᓇᓪᓕᐅᓐᓂᕐᓯᐅᕕᖕᓄᑦ ᓂᐊᖂᔭᓄᑦ ᐳᕙᓪᓚᕐᓴᐅᑎᖃᖏᑦᑐᓂᒃ ᓇᓪᓕᐅᓐᓂᕐᓯᐅᕐᕕᖕᓄᑦ, ᐱᕈᕐᑐᓪᓗ ᑲᑎᕐᓱᕐᑕᐅᓂᖏᓐᓄᑦ ᓇᓪᓕᐅᓐᓂᕐᓯᐅᕐᕕᖕᓄᑦ, ᑐᐱᕐᒦᖃᑦᑕᓚᐅᕐᓂᕐᒧᓪᓗ ᓇᓪᓕᐅᓐᓂᕐᓯᐅᕐᕕᖕᓄᑦ.

¹⁴ ᐊᑖᑕᖓᑕ ᑍᕕᑎᐅᑉ ᐊᑐᕐᑕᐅᖃᕐᑕᖁᓚᐅᕐᑕᖏᑦ ᒪᓕᒡᓗᒋᑦ, ᑎᓕᓯᕗᖅ ᑐᓂᕐᕈᓯᕐᑎᑦᓯᔩᑦ ᐊᕕᒃᑐᕐᓗᒋᑦ ᐱᓂᐊᒐᒃᓴᖏᓐᓄᑦ, ᓕᕔᑏᓪᓗ ᐱᓂᐊᒐᒃᓴᖏᓐᓄᑦ ᓂᕐᑐᐃᔨᐅᖁᓪᓗᒋᑦ ᐱᔨᑦᓯᕐᓗᑎᒃ ᑐᓂᕐᕈᓯᕐᑎᑦᓯᔨᓂᒃ ᐅᓪᓗᑕᒫᑦ ᐱᔭᒃᓴᖏᑦ ᒪᓕᒡᓗᒋᑦ, ᐃᑎᕐᑕᕐᕕᖕᒥᐅᑍᓪᓗ ᐊᕕᒃᑐᕐᓯᒪᓂᖏᑦ ᐃᑎᕐᑕᕐᕕᖕᓂ ᒪᓕᒡᓗᒋᑦ; ᑍᕕᑎᐅᑉ ᒎᑎᐅᑉ ᐃᓄᖁᑎᖓᑕ ᐱᖁᔨᑦᔪᑎᒋᓚᐅᕐᑕᖏᑦ ᒪᓕᒡᓗᒋᑦ.

¹⁵ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐱᖁᓯᒪᔭᖏᓐᓂᒃ ᒪᓕᑦᓯᐊᓚᐅᕐᐳᑦ ᑐᓂᕐᕈᓯᕐᑎᑦᓯᔩᓪᓗ ᓕᕔᑏᓪᓗ ᐱᔭᕆᐊᖃᕐᑕᓕᒫᖏᑦ ᐱᓪᓗᒋᑦ ᑮᓇᐅᔭᑐᕆᐊᖃᕐᓂᖏᓪᓘᓐᓃᑦ.

¹⁶ ᑕᒪᒃᑯᐊ ᑕᕝᕙ ᓲᓗᒨᓂᐅᑉ ᐱᓇᓱᐊᓚᐅᕐᑕᖏᑦ ᑲᔪᓯᑎᑕᐅᑦᓯᐊᓚᐅᕐᐳᑦ ᐊᑕᓂᐅᑉ ᐃᒡᓗᖓᑕ ᑐᓐᖓᕕᓕᕐᑕᐅᓂᖓᓂᑦ ᐱᔭᕇᕐᑕᐅᓂᖓᓄᑦ. ᑕᕝᕙ ᐊᑕᓂᐅᑉ ᐃᒡᓗᖓ ᐱᔭᕇᕐᑕᐅᑦᓯᐊᓚᐅᕐᐳᖅ.

¹⁷ ᑭᖑᓂᖓᒍᑦ ᓲᓗᒨᓂ ᐊᐅᓪᓚᕐᐳᖅ ᐃᔨᐅᓂ-ᒋᐱᕆᒧᑦ ᐃᓗᑎᒧᓪᓗ ᐃᒪᐅᑉ ᓯᓈᓃᑦᑐᓄᑦ, ᐃᑑᒥᒥᐅᑦ ᓄᓇᖓᓄᑦ.

¹⁸ ᕼᐅᕋᒻᓗ ᑐᔪᐃᕗᖅ ᐅᒥᐊᕐᔪᐊᓂᒃ ᐱᔨᓂ ᐊᖅᑯᑎᒋᓪᓗᒋᑦ ᐃᒪᒃᑰᕆᐊᒥᒃ ᖃᐅᔨᒪᔪᓂᒃ, ᓲᓗᒨᓂᐅᑉ ᐱᔨᖏᑦ ᐱᖃᑎᒋᓪᓗᒋᑦ ᐅᐱᕼᐃᒧᐊᕐᐳᑦ, ᑕᕝᕙᓐᖓᓪᓗ ᒎᓗᓂᒃ 32,000ᐸᐅᓂᒃ ᐅᖁᒤᓐᓂᓕᖕᓂᒃ ᓇᒃᓴᕐᐳᑦ, ᐂᑦᑑᑎᒋᓪᓗᒋᓪᓗ ᐊᖓᔪᖅᑳᕐᔪᐊᒧᑦ ᓲᓗᒨᓂᒧᑦ.