ᑯᕉᓂᑲ ᐂᑉᐸᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦᐊᖏᖃᑎᒌᖕᓂᐅᑉ ᐃᒃᓯᕐᕕᖓᑕ ᐃᓕᔭᐅᓂᖓ ᑐᒃᓯᐊᕐᕕᒡᔪᐊᒧᑦ ᐊᑕᓃᑦ ᓯᕗᓪᓖᑦ 8:1-9 1 ᑖᒃᑯᐊ ᓲᓗᒨᓂᐅᑉ ᓴᓇᓚᐅᕐᑕᓕᒫᖏᑦ ᐊᑕᓂᐅᑉ ᐃᒡᓗᖓᓄᑦ ᐱᔭᕇᓚᐅᕐᐳᑦ. ᓲᓗᒨᓂᓗ ᑕᕝᕗᓐᖓᐅᑦᔨᕗᖅ ᐊᑖᑕᖓᑕ ᑐᒃᓯᐊᕐᕕᒡᔪᐊᒧᑦ ᑐᕌᖓᑎᓚᐅᕐᑕᓕᒫᖏᓐᓂᒃ, ᓯᐅᓪᕕᕇᑦ, ᒎᓗᐃᑦ ᐱᖁᑎᓕᒫᓪᓗ ᐃᓕᕔᑦ ᐱᖁᑎᒃᑯᕕᖕᒧᑦ ᒎᑎᐅᑉ ᐃᒡᓗᖓᓄᑦ. 2 ᑕᕝᕙ ᓲᓗᒨᓂᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐃᓚᒌᓂᓗ ᐊᕕᒃᑐᕐᓯᒪᔪᓂ ᐊᖓᔪᖅᑳᑦ, ᐃᓴᕆᐊᓕᒥᐅᓪᓗ ᐃᓄᖏᑕ ᐊᖓᔪᖅᑳᖏᑦ ᑲᑎᖁᕔᑦ ᔨᕉᓴᓕᒧᑦ, ᑐᒃᓯᐊᕐᕕᒡᔪᐊᕐᒧᐊᕈᑦᔨᓯᖁᓪᓗᒋᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓᓂᒃ, ᑍᕕᑎᐅᑉ ᐃᒡᓗᒐᓴᖏᓐᓂᑦ ᓮᐅᓂᒦᑦᑐᒥᑦ. 3 ᐃᓴᕆᐊᓕᒥᓗ ᐊᖑᑎᓕᒫᑦ ᑲᑎᑉᐳᑦ ᐊᖓᔪᖅᑳᕐᔪᐊᖅ ᐃᓚᒋᓪᓗᒍ ᓇᓪᓕᐅᓐᓂᕐᓯᐅᕆᐊᕐᓗᑎᒃ ᑕᖅᑭᐅᑉ 7ᖓᓂ. 4 ᐃᓴᕆᐊᓕᒥᐅᑉ ᐊᖓᔪᖅᑳᓕᒫᖏᑦ ᑕᕝᕗᓐᖓᕐᐳᑦ, ᓕᕔᑎᓪᓗ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᑎᒍᕚᑦ. 5 ᐊᖏᖃᑎᒌᖕᓂᐅᓪᓗ ᐃᒃᓯᕐᕕᖓ ᐊᑭᕋᓕᕐᐹᑦ, ᑐᐱᕐᒥᑦ ᑲᑎᒪᕕᖕᒥᑦ, ᐃᑦᔪᕐᓁᑦᑐᓕᒫᓪᓗ ᐱᖁᑏᑦ ᑐᐱᕐᒥ ᑲᑎᒪᕕᖕᒦᑦᑐᑦ; ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᓇᒃᓴᕐᐰᑦ. 6 ᐊᖓᔪᖅᑳᕐᔪᐊᕐᓗ ᓲᓗᒨᓂ ᐃᓴᕆᐊᓕᒥᐅᓕᒫᓪᓗ ᑲᑎᒪᔪᑦ, ᐊᖏᖃᑎᒌᖕᓂᐅᑉ ᐃᒃᓯᕐᕕᖓᑕ ᓵᖓᓂ, ᑐᓂᕐᕈᓯᕐᐳᑦ ᓰᐱᓂᒃ ᐊᖑᓴᓪᓗᕐᓂᒡᓗ ᐅᓄᕐᑐᕐᔪᐊᓂᒃ ᖃᑦᓯᐅᓂᖏᑦ ᓈᓴᕐᑕᐅᓚᐅᓐᖏᓚᑦ. 7 ᑐᓂᕐᕈᓯᕐᑎᑦᓯᔩᓪᓗ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᐊᒡᔭᕐᐹᑦ ᑕᕝᕗᖓ ᐃᓂᒃᓴᖓᓄᑦ, ᐃᑦᔪᕐᓁᑦᑐᕕᐅᑉ ᐃᓗᐊᓄᑦ ᑐᒃᓯᐊᕐᕕᒡᔪᐊᕐᒧᑦ ᐃᑦᔪᕐᓁᓐᓂᕐᐹᒧᑦ, ᓯᕋᐱᐅᑉ ᐃᓴᕈᖏᑕ ᐊᑖᓅᐊᕐᓗᒍ. 8 ᓯᕋᐱᐅᑉ ᐃᓴᕈᖏᒃᑕ ᐅᓕᒃᓯᒪᕚ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ, ᓯᕋᐱᐅᓪᓗ ᑕᓕᑎᓯᒪᕚ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᐊᑭᕋᐅᑎᖏᓪᓗ. 9 ᐊᖏᖃᑎᒌᖕᓂᐅᑉ ᐊᑭᕋᐅᑎᖏᒃ ᑕᑭᔫᓂᖏᓐᓄᑦ ᐃᑦᔪᕐᓁᓐᓂᕐᐹᒥᑦ ᓄᐃᓵᖓᕘᒃ, ᑭᓯᐊᓂᓕ ᓯᓚᑖᓂᑦ ᑕᑯᒃᓴᐅᓐᖏᓛᒃ; ᑖᒃᑯᐊᓗ ᐊᑭᕋᐅᑏᒃ ᑍᑲᓃᑉᐳᑦ ᓱᓕ ᐅᓪᓗᒥᒧᑦ. 10 ᐃᒃᓯᕐᕕᒃ ᐃᓗᓕᖃᓚᐅᓐᖏᓚᖅ ᐱᖁᔧᑦ ᐅᔭᕌᒃ ᒪᕐᕉᒃ ᒨᓯᓯᐅᑉ ᕼᐆᕆᑉᒥ ᐃᓕᓚᐅᕐᑕᖏᒃᑕ ᐊᓯᖏᓐᓂᒃ, ᑖᒃᑯᑎᒎᓇᖅ ᐊᑕᓂᖅ ᐊᖏᖃᑎᖃᓚᐅᕐᒪᑦ ᐃᓴᕆᐊᓕᒥᐅᓂᒃ, ᐄᑦᔨᑉᑎᒥᑦ ᐊᐅᓚᕐᑎᓪᓗᒋᑦ. ᐊᑕᓂᐅᑉ ᓂᕐᑐᕐᓇᕐᓂᖓ 11 ᑐᓂᕐᕈᓯᕐᑎᑦᓯᔩᓪᓕ ᐃᑦᔪᕐᓁᓐᓂᕐᐹᒥᑦ ᐊᓂᖕᒪᑕ (ᑐᓂᕐᕈᓯᕐᑎᑦᓯᔨᓕᒫᑦ ᐃᒻᒥᖕᓂᒃ ᐃᑦᔪᕐᓁᑎᓯᒪᓚᐅᕐᐳᑦ, ᐊᕕᒃᑐᕐᓯᒪᓂᑎᒃ ᐃᓱᒪᒋᓇᒋᑦ; 12 ᓕᕔᑏᓪᓗ ᐃᓐᖏᕐᑎᓕᒫᑦ, ᐊᓴᐸ, ᕼᐃᒪᓐ, ᔨᑐᑕᓐᓗ, ᐃᕐᓂᑎᒃ ᐃᓚᒋᓪᓗᒋᑦ ᖃᑕᓐᖑᑎᑎᒡᓗ, ᐊᓐᓄᕌᕐᓯᒪᓚᐅᕐᐳᑦ ᖃᓪᓗᓈᕐᑕᓂᒃ ᓵᑦᑐᓂᒃ, ᓂᑦᔭᐅᓯᔭᕐᓗᑎᒃ ᓯᕙᓂᕋᐅᑎᓄᑦ, ᕼᐊᕐᐱᓄᑦ, ᑯᑭᑦᑕᐸᐅᑎᐅᔭᓄᓪᓗ, ᓇᖏᕐᓗᑎᒃ ᑐᓂᕐᕈᓯᕐᕕᐅᑉ ᓴᓂᐊᓂ ᓯᕿᓂᐅᑉ ᓄᐃᕕᐊᑕ ᓇᓛᓂ 120ᐅᓪᓗᑎᒃ ᑐᓂᕐᕈᓯᕐᑎᑦᓯᔩᑦ ᑎᑦᑐᓚᐅᓯᔭᓚᐅᕐᐳᑦ; 13 ᑎᑦᑐᓚᐅᓯᔭᕐᑏᑦ ᐃᓐᖏᕐᑏᓪᓗ ᐊᑕᐅᓯᐅᖃᑎᒌᒡᓗᑎᒃ ᑐᓴᕐᓴᐅᑎᑦᓯᔭᕆᐊᖃᓚᐅᕐᒪᑕ ᓂᐱᖃᕐᓗᑎᒃ ᐊᑕᐅᓯᒃᑯᑦ ᓂᕐᑐᐃᓪᓗᑎᒃ ᖁᔭᓕᓪᓗᑎᒡᓗ ᐊᑕᓂᕐᒧᑦ), ᓂᐱᖅᑯᕐᑐᓪᓗᑎᒃ ᓂᓪᓕᐊᓕᕐᒪᑕ, ᑎᑦᑐᓚᐅᑎᓄᑦ ᓯᕙᓂᕋᐅᑎᓄᓪᓗ ᐊᓯᖏᓐᓄᓪᓗ ᓂᑦᔭᐅᑎᓄᑦ, ᓂᕐᑐᐃᓪᓗᑎᒃ ᐊᑕᓂᕐᒥᒃ, ᐅᖃᕐᓗᑎᒃ: “ᐊᑕᓂᖅ ᐱᐅᔫᕗᖅ, ᑖᑦᓱᒪ ᓇᒡᓕᖕᓂᖓ ᓱᖁᓯᔪᐃᑦᑑᕗᖅ ᐃᓱᖃᖏᑦᑐᒧᑦ.” ᑕᕝᕙ ᐃᒡᓗ, ᐊᑕᓂᐅᑉ ᐃᒡᓗᖓ ᑕᑕᑕᐅᕗᖅ ᓄᕗᔭᒧᑦ, 14 ᑐᓂᕐᕈᓯᕐᑎᑦᓯᔩᑦ ᑕᕝᕙ ᓇᖏᕈᓐᓁᓪᓕᕗᑦ ᐱᓇᓱᐊᕈᓐᓁᓪᓕᓪᓗᑎᒡᓗ ᓄᕗᔭᒧᑦ ᑎᑭᑕᐅᒐᒥᒃ; ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᑕ ᑕᑕᒻᒪᒍ ᒎᑎᐅᑉ ᐃᒡᓗᖓ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society