ᑯᕉᓂᑲ ᐂᑉᐸᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᑉ ᐃᓚᒃᓴᖏᑦ

¹ ᓴᓇᓚᐅᕆᕗᖅ ᑐᓂᕐᕈᓯᕐᕕᖕᒥᒃ ᑲᓐᓄᔭᒥᒃ, ᑕᑭᓂᖃᕐᑐᒥᒃ 30ᓂᒃ ᐃᑎᒐᖕᓂᒃ, ᓴᓂᒧᓪᓗ 30ᓂᒃ, ᐳᕐᑐᓂᖃᕐᓗᓂᓗ ᐃᑎᒐᖕᓂᒃ 15ᓂᒃ.

² ᓴᓇᒋᕗᖅ ᐃᒪᖃᐅᑎᒥᒃ ᐊᖕᒪᓗᑭᓵᒥᒃ ᑲᓐᓄᔭᒥᒃ 15ᓂᒃ ᐃᑎᒐᖕᓂᒃ ᓂᕈᑐᓂᖃᕐᓗᓂ, 45ᓂᒃ ᐃᑎᒐᖕᓂᒃ ᐳᕐᑐᓂᖃᕐᑐᒥᒃ.

³ ᐊᑖᒍᑦ ᐊᕙᑎᓕᒫᖓᓂ ᑐᓐᖓᕕᖃᕐᐳᖅ ᓴᓇᓐᖑᐊᕐᓯᒪᔪᓂᒃ ᐃᒻᒧᓕᐅᑏᑦ ᐊᖑᓴᓪᓗᓐᖑᐊᖏᓐᓂᒃ ᑲᓐᓄᔭᓂᒃ ᑬᕙᓪᓚᒃᓯᓯᒪᔪᓂᒃ; ᓯᓚᒻᒧᖔᖅ ᓵᓐᖓᐅᕐᑐᓂᒃ, ᐊᑐᓂᑦ ᐱᖓᓲᑦᑕᕐᓗᑎᒃ ᐃᒻᒥᖕᓄᑦ ᐊᒃᑐᐊᖃᑦᑕᐅᑎᔪᓂᒃ.

⁴ ᑖᓐᓇ ᐃᒪᖃᐅᑎᐊᓗᒃ ᐃᒻᒧᓕᐅᕐᑎᓐᖑᐊᑦ 12 ᖃᖓᓄᑦ ᐃᓕᓯᒪᕗᖅ, ᑖᒃᑯᐊ ᐊᕙᒻᒧᑦ ᓴᓐᖓᐅᕐᓗᑎᒃ, ᐱᖓᓱᑦ ᓵᓐᖓᕗᑦ ᐅᓐᓄᐊᓪᓗᐊᑉ ᓇᓛᓄᑦ, ᐱᖓᓱᑦ ᓵᓐᖓᕗᑦ ᓯᕿᓂᐅᑉ ᓂᐱᕕᐊᓄᑦ, ᐱᖓᓱᑦ ᓵᓐᖓᕗᑦ ᐅᓪᓗᓪᓗᐊᒧᑦ, ᐱᖓᓱᓪᓗ ᓵᓐᖓᒋᕗᑦ ᓯᕿᓂᐅᑉ ᓄᐃᕕᐊᓄᑦ; ᐃᒪᖃᐅᑎᒥᒃ ᑐᓄᓐᖓᖔᕐᓗᑎᒃ.

⁵ ᐃᑦᔪᓂᖓ ᐊᒡᒊᑦ ᓴᓂᒧᑐᓂᖓᑐᑦ ᐃᑦᔪᑎᒋᕗᖅ, ᐃᒪᖃᐅᑎᐅᑉ ᖁᓛᑕ ᓯᓇᕐᔪᖓ ᐃᒥᐅᑎᐅᑉ ᓯᓇᕐᔪᖓᑐᑦ ᓴᓇᓯᒪᕗᖅ, ᐱᕈᕐᓯᐊᑎᑐᑦ ᖁᒻᒧᑦ ᐊᖏᒡᓕᕙᓪᓕᐊᓯᒪᕗᖅ; ᐃᒪᖃᕈᓐᓇᕐᓗᓂ 15,000ᓂ ᖃᓪᓗᑎᓂᒃ.

⁶ ᖁᓕᓂᒡ ᖃᑦᑕᓕᐅᕆᕗᖅ ᐅᐊᓴᕐᕕᒃᓴᓂᒃ, ᑕᓪᓕᒪᑦ ᑕᓕᕐᐱᐊᓂ ᐅᓪᓗᓪᓗᐊᑉ ᓇᓛᓃᐳᑦ, ᑕᓪᓕᒪᑦ ᓴᐅᒥᐊᓂ ᐅᓐᓄᐊᓪᓗᐊᑉ ᓇᓛᓃᓪᓗᑎᒃ. ᑖᒃᑯᐊ ᐃᕐᕈᕐᑐᐃᕕᒃᓴᐅᕗᑦ ᑐᓂᕐᕈᑎᓄᑦ ᐃᑯᐊᓪᓚᒃᑎᑕᐅᔪᓄᑦ ᐊᑐᕐᑕᐅᔪᕕᓂᕐᓄᑦ, ᐃᒪᖃᐅᑎᐅᓪᓕ ᐃᒪᖓ ᑐᓂᕐᕈᓯᕐᑎᑦᓯᔨᓄᑦ ᐅᐊᓴᕈᑎᒃᓴᐅᕗᖅ.

⁷ ᖁᓕᓂᒃ ᓇᓂᕈᐊᖃᕐᕕᖕᓂᒃ ᓴᓇᒋᕗᖅ ᒎᓗᓂᒃ ᓴᓇᔭᐅᔭᕆᐊᖃᕐᓂᖏᑦ ᒪᓕᒡᓗᒋᑦ, ᑐᒃᓯᐊᕐᕕᒡᔪᐊᒧᓪᓗ ᐃᓕᓪᓗᒋᑦ, ᑕᓪᓕᒪᑦ ᐅᓪᓗᓪᓗᐊᑉ ᓇᓛᓄᐊᕐᐰᑦ ᑕᓪᓕᒪᓪᓗ ᐅᓐᓄᐊᓪᓗᐊᑉ ᓇᓛᓄᐊᕐᓗᒋᑦ.

⁸ ᓵᓂᒃ ᖁᓕᓂᒃ ᓴᓇᒋᕗᖅ, ᑐᒃᓯᐊᕐᕕᒡᔪᐊᒧᐊᕐᓗᒋᓪᓗ, ᑕᓪᓕᒪᑦ ᐅᓪᓗᓪᓗᐊᑉ ᓇᓛᓄᐊᕐᐰᑦ ᑕᓪᓕᒪᓪᓗ ᐅᓐᓄᐊᓪᓗᐊᑉ ᓇᓛᓄᐊᕐᓗᒋᑦ. ᐴᒍᑕᓂᓗ ᓴᓇᒋᕗᖅ 100ᓂᒃ ᒎᓗᓂᒃ.

⁹ ᐃᒡᓗᐊᕈᓯᓕᐅᕆᕗᖅ ᑐᓂᕐᕈᓯᕐᑎᑦᓯᔩᑦ ᐃᓂᒃᓴᖏᓐᓂᒃ, ᓯᓚᑖᒍᓪᓗ ᐃᓂᒃᓴᒋᐊᓪᓚᒥᒃ ᐊᓃᕋᔭᒡᕕᖕᒥᒃ, ᒪᑐᖏᓪᓗ ᖄᐹᕐᓗᒋᑦ ᑲᓐᓄᔭᒥᒃ.

¹⁰ ᐃᒪᖃᐅᑎᐊᓗᒡᓗ ᑐᒃᓯᐊᕐᕕᒡᔪᐊᑉ ᑕᓕᕐᐱᐊᓄᐊᕐᐹ ᑎᕆᖅᑯᐊᓄᑦ ᓯᕿᓂᐅᑉ ᓄᐃᕕᐊᑕ ᐅᓪᓗᓪᓗᐊᓪᓗ ᐊᑯᓐᓂᖓᓃᓪᓗᓂ.

¹¹ ᕼᐅᕋᒻ ᓴᓇᒋᕗᖅ ᖃᑦᑕᕐᓂᒃ, ᐳᐊᕐᕆᑎᓂᒃ, ᐴᒍᑕᕐᓂᒡᓗ. ᑕᕝᕙ ᕼᐅᕋᐅᑉ ᐱᔭᒃᓴᓂ ᐱᔭᕇᕐᐰᑦ ᑎᓕᓯᑦᔪᑕᐅᓯᒪᔪᑦ ᒎᑎᐅᑉ ᐃᒡᓗᖓᓂ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ:

¹² ᓇᐸᔫᒃ ᓱᑳᒃ ᒪᕐᕉᒃ ᖄᖓᓂ ᐴᒍᑕᕐᑕᖃᕐᐳᖅ ᓴᓇᓯᒪᔫᖕᓂᒃ, ᓱᕾᓪᓗ ᖄᖓᓂ ᐴᒍᑖᒃ ᒪᑐᓕᐅᕐᓯᒪᕘᒃ ᓄᓗᐊᓐᖑᐊᖑᔮᕐᑐᓂᒃ ᕿᓚᐅᕐᖑᔭᓂᒃ;

¹³ 400ᓂᒃ ᐹᒥᒍᕌᓐᖑᐊᖃᕐᐴᒃ ᐊᑐᓂᑦ ᓄᓗᐊᓐᖑᐊᖑᔭᖏᑦ, ᐱᕐᕋᐅᔭᕐᓯᒪᓪᓗᑎᒃ ᐹᒥᒍᕌᓐᖑᐊᖃᕐᐳᑦ ᒪᕐᕉᓕᖅᑲᖓᔪᓂᒃ, ᐴᒃᒍᑕᐅᔮᒃ ᒪᑐᖃᕐᐴᒃ ᓱᑲᐅᑉ ᖄᖓᓃᑦᑑᒃ;

¹⁴ ᑬᓪᓗᐊᒐᕐᓂᒃ ᓴᓇᒋᕗᖅ, ᖃᑦᑍᓪᓗ ᑬᓪᓗᐊᒐᕐᓃᒃᑭᓪᓗᑎᒃ,

¹⁵ ᐊᑕᐅᓯᕐᒥᒃ ᐃᒪᖃᐅᑎᕐᔪᐊᒥᒃ ᓴᓇᒋᕗᖅ ᐊᑖᒍᑦ 12ᓂᒃ ᐃᒻᒧᒃᓯᐅᒐᓐᖑᐊᓕᖕᓂᒃ.

¹⁶ ᖃᑦᑍᑦ, ᐳᐊᕐᕆᑏᑦ, ᑲᑭᐊᓪᓗ, ᐊᓯᓕᒫᖏᓪᓗ ᐊᑐᕐᑕᐅᔪᒃᓴᑦ ᓴᓇᓯᒪᔪᑦ ᕼᐅᕋᒪᐱᐅᑉ ᓴᓇᕔᑦ ᑲᓐᓄᔭᐅᓪᓗᑎᒃ ᕿᓪᓚᕆᒃᓴᕐᓯᒪᔪᑦ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ ᓴᓇᔭᐅᖁᔭᐅᓯᒪᔪ ᐊᑕᓂᐅᑉ ᐃᒡᓗᖓᓄᑦ.

¹⁷ ᔪᐊᕐᑕᓂᐅᑉ ᓇᑎᕐᓇᖓᓂ ᐊᖓᔪᖅᑳᕐᔪᐊᑉ ᓴᓇᔭᐅᑎᑉᐰᑦ ᑯᕕᓪᓗᒋᑦ ᒪᕐᕋᓄᑦ ᓴᓇᓯᒪᔪᓄᑦ ᐃᓗᓕᖕᓄᑦ, ᓄᓇᒥ ᒪᕐᕋᓕᖕᒥ ᓴᑰᑎᐅᑉ ᔨᕆᑕᐅᓪᓗ ᐊᑯᓐᓂᖓᓂ.

¹⁸ ᓲᓗᒨᓂ ᑕᒪᒃᑯᓂᖓ ᐊᖏᔪᐊᓗᖕᓂᒃ ᓴᓇᔭᐅᑎᑦᓯᕗᖅ, ᑲᓐᓄᔧᓪᓗ ᐊᖏᓗᐊᕐᓂᖏᓐᓄᑦ ᐅᖁᒤᓐᓂᖏᑦ ᖃᐅᔨᒪᔭᐅᓚᐅᓐᖏᓚᑦ.

¹⁹ ᓲᓗᒨᓂᐅᑉ ᑕᒪᒃᑯᐊᓕᒫᑦ ᓴᓇᔭᐅᑎᑉᐰᑉ ᒎᑎᐅᑉ ᐃᒡᓗᖓᓃᑦᑐᑦ; ᑐᓂᕐᕈᓯᕐᕕᒃ ᒎᓗ, ᓵᓪᓗ ᓂᐊᖂᔭᒃᑯᕖᑦ ᑐᓂᕐᕈᑕᐅᓯᒪᔪᑦ ᐃᓂᒃᓴᖏᑦ.

²⁰ ᓇᓂᕈᐊᑦ ᐃᓂᖏᓪᓗ ᒎᓗᓪᓚᕆᐅᕗᑦ ᐃᑯᒪᔪᒃᓮᑦ ᐃᓂᓕᐅᕐᑕᐅᓯᒪᕗᑦ ᐃᑦᔪᕐᓁᑦᑐᕕᐅᑉ ᐃᓗᐊᓂ, ᑖᒃᑯᐊ ᓇᓗᓁᕐᑕᐅᓯᒪᕗᑦ.

²¹ ᐱᕈᕐᓯᐊᓐᖑᐊᑦ, ᓇᓂᕈᐊᓐᖑᐊᓪᓗ, ᐃᐸᕋᓐᖑᐊᖏᓪᓗ, ᒎᓗᐃᓐᓇᕗᑦ ᐃᓚᓯᒪᖏᑦᓯᐊᕐᓗᑎᒃ;

²² ᐃᐸᕅᑦ, ᐴᒍᑍᑦ, ᐃᓯᕐᓗᐊᕐᓂᑎᑦᓯᕖᓪᓗ ᐃᓗᓕᖁᑎᖏᑦ, ᓵᓪᓗ ᐊᐅᒪᒃᑯᕖᑦ, ᓴᓇᓯᒪᕗᑦ ᒎᓗᓪᓚᕆᖕᒥᑦ ᐃᓚᓯᒪᓇᑎᒃ; ᐃᑦᔪᕐᓁᑦᑐᕕᐅᓪᓗ ᐃᑎᕆᐊᕐᕕᖓ, ᐃᑦᔪᕐᓁᓐᓂᕐᐹᓪᓗ ᐹᖏᑦ, ᑐᒃᓯᐊᕐᕕᒡᔪᐊᓪᓗ ᐃᑎᕐᑕᕐᕕᖏᑕ ᐹᖏᑦ ᒎᓗᒥᒃ ᖄᐹᓕᕐᓯᒪᕗᑦ.