ᑯᕉᓂᑲ ᐂᑉᐸᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᖅ ᔪᐅᐊᕼᐊᔅ ᔫᑕᒥ

¹ ᐃᓄᐃᑦ ᓄᓇᓖᑦ ᔨᕼᐅᐊᕼᐊᔨ ᓂᕈᐊᕐᐹᑦ ᔫᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᑎᓪᓗᒍᓗ ᐊᑖᑕᖓᑕ ᐃᓂᖓᓄᑦ ᔨᕉᓴᓕᒥ.

² ᔪᐊᕼᐊᔾ ᐊᕐᕌᒍᖃᓚᐅᕐᐳᖅ 23ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ; ᐊᐅᓚᑦᓯᓚᐅᕐᐳᕐᓗ ᑕᖅᑭᓂᒃ ᐱᖓᓱᓂᒃ ᔨᕉᓴᓕᒥ.

³ ᐄᑦᔨᑉᑎᒥᐅᓪᓕ ᐊᖓᔪᖅᑳᕐᔪᐊᖓᑕ ᐊᖓᔪᖅᑲᐅᕕᖓᓂᑦ ᐲᕐᑎᑉᐹ ᔨᕉᓴᓕᒥᑦ ᓄᓇᓖᓪᓗ ᐊᑭᓕᒐᒃᓴᓕᐅᕐᐰᑦ ᑐᓂᓯᖃᕐᑕᖁᓪᓗᒋᑦ 100ᓂᒃ ᑖᓚᓐᑎᓂᒃ ᓯᐅᓪᕕᕆᓂᒃ ᐊᑕᐅᓯᕐᒥᒡᓗ ᑖᓚᓐᑎᒥᒃ ᒎᓗᒥᒃ.

⁴ ᐄᑦᔨᑉᑎᒥᐅᓪᓗ ᐊᖓᔪᖅᑳᕐᔪᐊᖓᑕ ᐃᓔᐊᑭᒻ ᔪᐅᕼᐊᔅ ᖃᑕᓐᖑᑖ ᐊᖓᔪᖅᑳᕐᔪᐊᓐᖑᕐᑎᑉᐹ ᔫᑕᒧᑦ ᔨᕉᓴᓕᒧᓪᓗ, ᐊᑎᖓᓗ ᐊᓯᑦᔨᕐᐹ ᔨᕼᐅᐃᐊᑭᒻᒥᒃ; ᓂᑰᓪᓗ ᔪᐊᕼᐊᔾ ᑖᑦᓱᒪ ᖃᑕᓐᖑᑎᖓ ᐊᐅᓪᓚᕈᑎᕚ ᐄᑦᔨᑉᑎᒧᑦ.

ᐊᖓᔪᖅᑳᕐᔪᐊᖅ ᔨᕼᐅᐃᐊᑭᒻ ᔫᑕᒥ

⁵ ᔨᕼᐅᐃᐊᑭᒻ ᐊᕐᕌᒍᖃᓚᐅᕐᐳᖅ 25ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 11ᓂᒃ ᔨᕉᓴᓕᒥ. ᐱᓂᐊᕐᓂᖃᓚᐅᕐᐳᕐᓗ ᐱᐅᖏᑦᑐᓂᒃ ᐊᑕᓂᐅᑉ ᒎᑎᖓᑕ ᑕᑯᓐᓇᕐᑕᖓᒍᑦ.

⁶ ᑕᕝᕙ ᓂᐱᑯᓁᓴ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᑎᑭᑉᐳᖅ ᐅᓇᑕᕆᐊᕐᓗᓂ ᑖᑦᓱᒥᖓ, ᐊᑦᓱᖏᕐᓱᕐᐹᓗ ᐊᕐᓵᕐᑑᔭᓄᑦ ᐊᑦᓱᖏᐅᑎᓄᑦ ᐊᐅᓪᓚᕈᑎᓪᓗᒍᓗ ᐹᐱᓘᓂᒧᑦ.

⁷ ᓂᐱᑯᓁᓴᐅᓪᓗ ᐱᖁᑏᑦ ᐃᓚᖏᑦ ᐊᑕᓂᐅᑉ ᐃᒡᓗᖓᓃᑦᑐᑦ ᐹᐱᓘᓂᒧᑦ ᐊᐅᓪᓚᕈᑎᕔᑦ ᐃᓕᓪᓗᒋᓪᓗ ᐊᖓᔪᖅᑳᕐᔪᐊᒃᑯᕕᖕᒥᓄᑦ ᐹᐱᓘᓂᒦᑦᑐᒧᑦ.

⁸ ᔨᕼᐅᐃᐊᑭᐅᓪᓕ ᐱᓂᐊᕐᓂᖏᑕ ᐃᓚᖏᑦ, ᓇᕐᕈᓇᕐᑐᓪᓗ ᐱᓂᐊᕐᓂᕆᓚᐅᕐᑕᖏᑦ, ᑖᑦᓱᒪᓗ ᓈᒻᒪᖏᑦᑐᓕᓂᖏᑦ, ᑕᑯᒋᑦ, ᐊᒡᓚᒃᓯᒪᕗᑦ ᐃᓴᕆᐊᓕᒥᐅᑉ ᔫᑕᒥᐅᓪᓗ ᐊᖓᔪᖅᑳᕐᔪᐊᖏᑕ ᐊᒡᓚᓯᒪᔪᖁᑎᖏᓐᓂ; ᐃᕐᓂᖓᓗ ᔨᕼᐅᐃᐊᑭᓐ ᐊᖓᔪᖅᑳᕐᔪᐊᓐᖑᕐᐳᖅ ᑖᑦᓱᒪ ᐃᓂᖓᓂ.

ᐊᖓᔪᖅᑳᕐᔪᐊᖅ ᔨᕼᐅᐃᐊᑭᓐ ᔫᑕᒥ

⁹ ᔨᕼᐅᐃᐊᑭᓐ ᐊᕐᕌᒍᖃᓚᐅᕐᐳᖅ 8ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᐅᓚᑦᓯᓚᐅᕐᐳᕐᓗ ᔨᕉᓴᓕᒥ ᑕᖅᑭᓂᒃ ᐱᖓᓱᓂᒃ ᐅᓪᓗᓂᒡᓗ 10ᓂᒃ. ᐱᐅᖏᑦᑐᓕᓚᐅᕐᐳᕐᓗ ᐊᑕᓂᐅᑉ ᑕᑯᓐᓇᕐᑕᖓᒍᑦ.

¹⁰ ᐊᕐᕌᒎᑉ ᐱᒋᐊᕐᓂᖓᓂ ᐊᖓᔪᖅᑳᕐᔪᐊᖅ ᓂᐱᑯᓁᓴ ᑎᓕᓯᓪᓗᓂ ᑎᒍᔭᐅᑎᑉᐹ ᐹᐱᓘᓂᒧᐊᕈᑦᔭᐅᑎᓪᓗᒍᓗ, ᐱᒃᑯᒥᓇᕐᑐᑦ ᐱᖁᑏᑦ ᐊᑕᓂᐅᑉ ᐃᒡᓗᖓᓂᑦ ᓇᒃᓴᕐᑕᐅᑎᓪᓗᒋᑦ, ᔨᑎᑬᐊᓗ, ᔨᕼᐅᐃᐊᑭᐅᑉ ᖃᑕᓐᖑᑎᖓ ᐊᖓᔪᖅᑳᕐᔪᐊᓐᖑᕐᑎᑉᐹ ᔫᑕᒧᑦ ᔨᕉᓴᓕᒧᓪᓗ.

ᐊᖓᔪᖅᑳᕐᔪᐊᖅ ᔨᑎᑬᐊ ᔫᑕᒥ

¹¹ ᔨᑎᑬᐊ ᐊᕐᕌᒍᖃᓚᐅᕐᐳᖅ 21ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 11ᓂᒃ ᔨᕉᓴᓕᒥ.

¹² ᑖᓐᓇᑦᑕᐅᖅ ᐱᐅᖏᑦᑐᓕᓚᐅᕐᐳᖅ ᐊᑕᓂᐅᑉ ᒎᑎᖓᑕ ᑕᑯᓐᓇᕐᑕᖓᒍᑦ. ᐃᒻᒥᓂᒃ ᒥᑭᒡᓕᑎᓚᐅᓐᖏᓚᖅ ᔨᕆᒤᐊᒧᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᑖᑦᓱᒧᖓ ᐅᖃᓪᓚᖃᑦᑕᓚᐅᕐᑐᒧᑦ ᐊᑕᓂᐅᑉ ᐅᖃᕐᑕᐅᖁᔭᖓᓂᒃ.

ᔨᕉᓴᓕᐅᑉ ᐊᖓᔪᖅᑳᕐᔪᐊᖃᕐᓂᖓᑕ ᑲᑕᖕᓂᖓ

¹³ ᑖᓐᓇᑦᑕᐅᖅ ᐊᑭᕋᕐᑐᓕᓚᐅᕐᐳᖅ ᐊᖓᔪᖅᑳᕐᔪᐊᒥᒃ ᓂᐱᑯᓁᓴᒥᒃ, ᑖᑦᓱᒪ ᐊᖏᒻᒪᕆᒃᑎᓗᓂᐅᒃ ᐅᖃᕕᒃᑎᓚᐅᕐᑎᓪᓗᓂᐅᒃ ᒎᑎᒃᑯᑦ ᓈᓚᑦᓯᐊᕐᓂᐊᕐᓂᕋᕐᓗᓂ; ᐃᒻᒥᓂᒃ ᐅᓗᕆᐊᑦᑍᑦᑑᑎᓪᓗᓂ ᐆᒻᒪᑎᓂ ᓯᑎᔪᕈᕐᑎᓪᓗᒍ ᓵᑦᑐᒪᓚᐅᓐᖏᓚᖅ ᐊᑕᓂᕐᒧᑦ, ᐃᓴᕆᐊᓕᒥᐅᑦ ᒎᑎᖓᓄᑦ.

¹⁴ ᑐᓂᕐᕈᓯᕐᑎᑦᓯᔩᑦᑕᐅᖅ ᓯᕗᓕᕐᑎᖏᑦ ᐃᓄᐃᓪᓗ ᓈᒻᒪᖏᑦᑐᓕᕙᓪᓕᐊᓚᐅᕐᐳᑦ, ᐃᓅᖃᑎᒌᒡᔪᐊᑦ ᓇᕐᕈᓇᕐᑐᓕᓂᖏᓐᓂᒃ ᒪᓕᒃᓗᑎᒃ; ᐊᑕᓂᐅᓪᓗ ᐃᒡᓗᖓ ᓴᓗᒤᓕᕐᑎᓚᐅᕐᐹᑦ ᑖᑦᓱᒪ ᐃᑦᔪᕐᓁᓕᑎᓚᐅᕐᑕᖓ ᔨᕉᓴᓕᒥ.

¹⁵ ᑖᑦᓱᒪ ᐊᑕᓂᐅᑉ, ᓯᕗᓕᖏᑕ ᒎᑎᖓᑕ ᑎᓕᓯᕕᒋᓪᓗᒋᑦ ᐃᓂᕐᑎᖃᑦᑕᓚᐅᕐᐰᑦ ᐅᖃᕐᑎᒥᒍᑦ, ᐃᓄᖁᑎᓂ ᐃᓚᑦᓱᒋᒐᒥᒋᑦ ᐃᒡᓗᓗ ᐃᓂᒃᓴᕆᔭᓂ ᓴᐳᑎᔪᒪᓪᓗᒍ.

¹⁶ ᑖᒃᑯᐊᓕ ᒥᑕᐅᑎᖃᖃᑦᑕᓚᐅᕐᐳᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ, ᐅᖃᐅᓯᖏᓪᓗ ᓈᓚᒍᒪᓇᒋᑦ, ᐅᖃᕐᑎᖏᑦ ᒥᑕᐅᑎᒋᓪᓗᒋᑦ ᐅᖃᕐᓂᕐᓗᒡᕕᒋᖃᑦᑕᓚᐅᕐᐰᑦ, ᐊᑕᓂᐅᑉ ᓂᓐᖓᐅᓯᖓ ᐃᓄᖁᑎᒥᓄᑦ ᑎᑭᓚᐅᕐᑎᓐᓇᒍ, ᑖᒃᑯᐊᓗ ᐱᐅᓕᔭᐅᕕᒃᓴᖃᕈᓐᓃᓚᐅᕐᐳᑦ.

¹⁷ ᑍᒤᒻᒪᑦ ᑎᑭᑕᐅᑎᓚᐅᕐᐰᑦ ᑲᐅᓪᑎᐊᒥᐅᑦ ᐊᖓᔪᖅᑳᕐᔪᐊᖓᓄᑦ, ᑖᑦᓱᒪ ᐊᖑᑏᑦ ᐃᓅᓱᒃᑐᖁᑎᖏᑦ ᑐᖁᓚᐅᕐᐰᑦ ᓴᕕᒡᔪᐊᒧᑦ ᐃᒡᓗᖏᓐᓂ ᐃᑦᔪᕐᓁᑦᑐᕕᖕᒥᓗ, ᐃᓚᑦᓱᒋᓇᒋᑦ ᐊᖑᑏᑦ ᐃᓅᓱᒃᑐᑦ ᐊᕐᓁᓪᓗ ᐅᐃᒡᒐᓱᐃᑦ, ᐃᑦᑐᐃᑦ ᐃᓄᑐᕾᓪᓗ; ᑖᑦᓱᒪ ᑐᓂᔧᓐᓇᕆᓚᐅᕐᐰᑦ ᑖᑦᓱᒧᖓ.

¹⁸ ᒎᑎᐅᑉ ᐃᒡᓗᖓᓃᑦᑐᑦ ᐱᖁᑎᓕᒫᑦ, ᒥᑭᔪᑦ ᐊᖏᔪᓪᓗ, ᐊᑕᓂᐅᓪᓗ ᐃᒡᓗᖓᓂ ᑮᓇᐅᔭᖃᐅᑏᑦ, ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖏᑕᓗ ᑮᓇᐅᔭᖃᐅᑎᓕᒫᖏᑦ, ᐊᑕᖏᕐᓗᒋᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ.

¹⁹ ᒎᑎᐅᓪᓗ ᐃᒡᓗᖓ ᐃᑯᐊᓪᓚᓚᐅᕐᐹᑦ, ᔨᕉᓴᓕᐅᓪᓗ ᐊᕙᓗᕐᔪᐊᖓ ᓯᖁᑦᑎᕐᓗᒍ, ᐊᖓᔪᖅᑳᕐᔪᐊᓪᓗ ᐃᒡᓗᕐᔪᐊᓕᒫᖏᑦ ᐃᑯᐊᓪᓚᒃᐰᑦ, ᐱᒋᔭᐅᔪᓪᓗ ᐱᔪᒥᓇᕐᑐᓕᒫᑦ ᐊᓯᕈᕐᓗᒋᑦ.

²⁰ ᓴᕕᒡᔪᐊᒧᓪᓗ ᑐᖁᑕᐅᖏᑦᑐᓕᒫᑦ ᐊᐅᓪᓚᕈᑎᕔᑦ ᐹᐱᓘᓂᒧᑦ, ᑖᑦᓱᒧᖓᓗ ᐱᔨᐅᓕᕐᐳᑦ ᐃᕐᓂᖏᓐᓄᓪᓗ ᐴᕐᓯᐊᒥᐅᑉ ᐊᖓᔪᖅᑲᐅᕕᖓ ᐊᐅᓚᑦᓯᓕᓚᐅᕐᑎᓐᓇᒍ.

²¹ ᑕᕝᕙ ᐊᑕᓂᐅᑉ ᐅᖃᐅᓯᖏᑦ ᓇᓚᐅᑦᓯᓚᐅᕐᐳᑦ ᔨᕆᒤᐊᒃᑯᑦ ᐅᖃᐅᓯᕆᓚᐅᕐᑕᖏᑦ, “ᓄᓇ ᖁᕕᐊᓲᑎᖃᕈᒫᕐᐳᖅ ᓴᐸᑎᒥᒃ. ᓵᓚᐅᓯᒪᓂᓕᒫᒥᖕᓂ ᐅᓪᓗᓂᒃ ᓴᐸᑎᒥᒃ ᐊᑐᕈᒫᕐᐳᑦ, ᐊᕐᕌᒍᐃᑦ 70 ᓈᓗᒋᑦ.”

ᓮᕋᓯᐅᑉ ᐅᑎᖁᔨᓂᖓ ᔫᑎᓂᒃ

²² ᐊᕐᕌᒍᒥ ᓯᕗᓪᓕᕐᐹᒥ ᐊᖓᔪᖅᑳᕐᔪᐊᖅ ᓮᕋᓯ ᐴᕐᓯᐊᒥ ᐊᖓᔪᖅᑳᕐᔪᐊᖑᓕᕐᑎᓪᓗᒍ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᔨᕆᒤᐊᒃᑯᑦ ᓇᓚᐅᑦᓯᖁᓪᓗᒍ, ᐴᕐᓯᐊᑉ ᐊᖓᔪᖅᑳᕐᔪᐊᖓᑕ ᓮᕋᓯᐅᑉ ᐊᓂᕐᓂᖓ ᐊᑕᓂᐅᑉ ᐊᐅᓚᑦᔭᒃᑎᑉᐹ ᐅᖃᐅᓯᖃᓚᐅᕐᐳᖅ ᓇᓗᓁᕐᓯᓪᓗᓂ ᐊᖓᔪᖅᑲᐅᕕᓕᒫᒥᓄᑦ ᐊᒡᓚᒃᑕᐅᑎᑦᓯᓪᓗᓂᓗ:

²³ “ᐊᖓᔪᖅᑳᕐᔪᐊᖅ ᓮᕋᓯ ᐴᕐᓯᐊᒥᐅᑕᖅ ᐃᒫᒃ ᐅᖃᕐᐳᖅ, ‘ᐊᖓᔪᖅᑲᐅᕕᓕᒫᑦ ᓄᓇᒦᑦᑐᑦ ᐊᑕᓂᐅᑉ ᕿᓚᐅᑉ ᒎᑎᖓᑕ, ᐅᕙᓐᓄᑦ ᑐᓂᓚᐅᕐᐰᑦ, ᑖᑦᓱᒪᓗ ᑎᓕᕚᖓ ᐃᒡᓗᓕᐅᖁᓪᓗᖓ ᔨᕉᓴᓕᒥ ᔫᑕᒦᑦᑐᒥ. ᑖᑦᓱᒪ ᐃᓄᖁᑎᓕᒫᖏᑦ ᓄᓇᖅᑲᑎᒋᒍᑦᓯᐅᒃ, ᑍᒃᑯᐊ ᐂᔪᒃᓴᐅᕗᑦ ᑕᑉᐸᐅᖓ, ᐊᑕᓂᐅᑉ ᒎᑎᖏᑦᑕ ᐃᓚᒋᓗᓂᒋᑦ.’”