ᑯᕉᓂᑲ ᐂᑉᐸᖏᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓮᐊᐅᑉ ᓇᓪᓕᐅᓐᓂᕐᓯᐅᕐᓂᖓ ᖄᖏᕐᑕᐅᕕᖕᒥᒃ

¹ ᐊᖓᔪᖅᑳᕐᔪᐊᑉ ᔫᓮᐊᐅᑉ ᖄᖏᕐᑕᐅᕕᐅᑉ ᓇᓪᓕᐅᓐᓂᕐᓯᐅᕐᑕᐅᓂᖓ ᐊᑕᓂᕐᒧᑦ ᑲᔪᓯᑎᑉᐹ ᔨᕉᓴᓕᒥ; ᑐᖁᑦᓯᕗᓪᓗ ᖄᖏᕐᑕᐅᕕᒃᓯᐅᕈᑎᓂᒃ ᓄᕐᕋᐅᔭᕐᓂᒃ ᐅᓪᓘᑉ 14ᖓᓂ ᑕᖅᑭᐅᑉ ᓯᕗᓪᓕᕐᐹᖓᓂ.

² ᑐᓂᕐᕈᓯᕐᑎᑦᓯᔩᑦ ᑎᓕᕔᑦ ᐱᔭᒃᓴᒥᖕᓂᒃ ᐱᓇᓱᐊᖁᓪᓗᒋᑦ ᑲᔪᖏᕐᓴᕐᐰᓪᓗ ᐱᔨᑦᓯᖁᓪᓗᒋᑦ ᐊᑕᓂᐅᑉ ᐃᒡᓗᖓᓂ.

³ ᓕᕔᑏᓪᓗ ᐅᖃᐅᑎᕔᑦ ᐃᓴᕆᐊᓕᒥᐅᓕᒫᓂᒃ ᐃᓕᓮᕙᒃᑐᑦ ᑖᒃᑯᐊ ᐃᑦᔪᕐᓁᑦᑐᒥᒃ ᐱᓇᓱᐊᕐᑐᑦ ᐊᑕᓂᕐᒧᑦ, “ᐊᖏᕈᑕᐅᓯᒪᔪᑦ ᐃᒃᓯᕐᕕᖁᑎᖓ ᐃᑦᔪᕐᓁᑦᑐᖅ ᐃᒡᓗᒧᐊᕐᓯᐅᒃ ᓲᓗᒨᓂᐅᑉ ᑍᕕᑎᐅᑉ ᐃᕐᓂᖓᑕ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ, ᓴᓇᓚᐅᕐᑕᖓ; ᐊᒡᔭᖃᑦᑕᕐᓂᐊᕈᓐᓃᕐᐸᓯ ᐃᕐᓱᒡᓗᒍ. ᒫᓐᓇᓕ ᐊᑕᓂᖅ ᒎᑎᓯ ᐱᔨᑦᓯᓕᕐᓯᐅᒃ ᐃᓴᕆᐊᓕᒥᐅᓪᓗ.

⁴ ᓇᖕᒥᓂᖅ ᐅᐸᓗᖎᓕᕆᑦᓯ ᓯᕗᓕᑦᓯ ᑭᖑᕚᖏᑕ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ, ᑍᕕᑎᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ ᐊᑐᕐᑕᐅᖁᓯᒪᔭᖏᑦ ᒪᓕᒡᓗᒋᑦ ᐃᕐᓂᖓᑕᓗ ᓲᓗᒨᓂᐅᑉ.

⁵ ᓇᖏᕐᓗᓯ ᐃᑦᔪᕐᓁᑦᑐᒥ ᓯᕗᓕᑦᓯ ᑭᖑᕚᖏᑕ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ ᖃᑕᓐᖑᑎᑦᓯᓐᓂᒃ ᐃᑲᔪᕈᓐᓇᖁᓪᓗᓯ, ᓕᕔᑏᓪᓗ ᓯᕗᓕᖏᑕ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ.

⁶ ᖄᖏᕐᑕᐅᕕᒃᓯᐅᕈᑎᒃᓴᒥᒃ ᓄᕐᕋᐅᔭᒥᒃ ᑐᖁᑦᓯᓗᓯ, ᐃᓕᑦᓯᓐᓂᒃ ᐃᑦᔪᕐᓁᓕᑎᕆᑦᓯ, ᐊᑐᐃᓐᓇᕈᕐᑎᓪᓗᒋᓪᓗ ᖃᑕᓐᖑᑎᑦᓯᓐᓄᑦ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᒨᓯᓯᒃᑯᑦ ᑐᓂᓚᐅᕐᑕᖏᑦ.”

⁷ ᔫᓮᐊᐅᓪᓗ ᐃᓄᐃᑦ ᑐᓂᕔᑦ ᓄᕐᕋᐅᔭᕐᓂᒃ ᒎᑦᓯᓪᓗ ᓄᕐᕋᖏᓐᓂᒃ ᑕᕝᕙᓂ ᓇᔫᑎᔪᓕᒫᑦ ᖄᖏᕐᑕᐅᕕᒃᓯᐅᕈᑎᒃᓴᒧᑦ ᑐᓂᕐᕈᓯᖁᓪᓗᒋᑦ, ᐆᒪᔪᖁᑎᒥᓂᒃ ᑲᑎᓪᓗᒋᑦ 30,000ᓂᒃ, ᐃᒻᒧᒃᓯᐅᒊᓪᓗ ᐊᖑᓴᓪᓗᖏᓐᓂᒃ 3,000ᓂᒃ; ᑕᒪᒃᑯᐊ ᐊᖓᔪᖅᑲᕐᔪᐊᑉ ᓇᖕᒥᓂᖅ ᐆᒪᔪᖁᑎᖏᓐᓂᑦ ᐱᓚᐅᕐᐳᑦ.

⁸ ᐊᖓᔪᖅᑳᖁᑎᖏᓪᓗ ᑐᓂᓯᕗᑦ ᑲᑦᓱᖎᑦᓯᐊᕐᓗᑎᒃ ᐃᓄᖕᓄᑦ, ᑐᓂᕐᕈᓯᕐᑎᑦᓯᔨᓄᑦ, ᓕᕔᑎᓄᓪᓗ. ᕼᐃᓪᑬᐊ, ᓴᑲᕅᐊ, ᔨᕼᐃᐅᓗ, ᐊᖓᔪᖅᑳᖑᔪᑦ ᒎᑎᐅᑉ ᐃᒡᓗᖓᓂ, ᑖᒃᑯᐊ ᑐᓂᓯᕗᑦ ᑐᓂᕐᕈᓯᕐᑎᑦᓯᔨᓄᑦ ᖄᖏᕐᑕᐅᕕᒃᓯᐅᕐᓂᕐᒧᑦ ᑐᓂᕐᕈᑎᒃᓴᓂᒃ ᓄᕐᕋᐅᔭᕐᓂᒃ ᒎᑦᓰᓪᓗ ᓄᕐᕋᖏᓐᓂᒃ 2,600ᓂᒃ ᐃᒻᒧᒃᓯᐅᒊᓪᓗ ᐊᖑᓴᓪᓗᖏᓐᓂᒃ 300ᓂᒃ;

⁹ ᑯᓇᓁᐊᑦᑕᐅᖅ, ᖃᑕᓐᖑᑎᖏᓪᓗ ᓯᒤᐊ, ᓇᑖᓂᐅᓪ, ᕼᐊᓴᐰᐊ, ᔨ-ᐂᓕ, ᔫᓴᐸᓪᓗ, ᐊᖓᔪᖅᑳᖑᔪᑦ ᓕᕔᑎᓄᑦ, ᑐᓂᓯᓚᐅᕐᐳᑦ ᓕᕔᑎᓄᑦ ᖄᖏᕐᑕᐅᕕᓯᐅᕈᑎᒧᑦ ᑐᓂᕐᕈᑎᒃᓴᓂᒃ ᓄᕐᕋᐅᔭᕐᓂᒃ ᒎᑦᓰᓪᓗ ᓄᕐᕋᖏᓐᓂᒃ 5,000ᓂᒃ ᐃᒻᒧᒃᓯᐅᒊᓪᓗ ᐊᖑᓴᓪᓗᖏᓐᓂᒃ 500ᓂᒃ.

¹⁰ ᑐᒃᓯᐊᖃᑎᒌᖕᓂᐅᓂᐊᕐᑐᖅ ᐅᐸᓗᒊᔭᕐᑕᐅᔭᕇᕐᒪᑦ, ᑐᓂᕐᕈᓯᕐᑎᑦᓯᔩᑦ ᐃᓂᒋᔭᕆᐊᖃᕐᑕᒥᓄᐊᕐᐳᑦ, ᓕᕔᑏᓪᓗ ᐊᒡᒍᕐᓯᒪᓪᓗᑎᒃ ᐊᖓᔪᖅᑳᕐᔪᐊᑉ ᑎᓕᓯᓯᒪᓂᖓ ᒪᓕᒡᓗᒍ.

¹¹ ᑐᖁᑦᓯᕗᓪᓗ ᖄᖏᕐᑕᐅᕕᒃᓯᐅᕈᑎᒥᒃ ᓄᕐᕋᐅᔭᒥᒃ, ᑐᓂᕐᕈᓯᕐᑎᑦᓯᔩᓪᓗ ᐊᐅᖕᒥᒃ ᓯᕐᐸᕐᓮᕗᑦ ᑐᓂᕐᕈᓯᕐᕕᖕᒧᑦ ᓕᕔᑏᑦ ᐋᒃᑐᕐᐸᓪᓕᐊᔭᖏᓐᓂᒃ.

¹² ᑐᓂᕐᕈᑎᒃᓮᓪᓗ ᐃᑯᐊᓪᓚᒐᒃᓴᑦ ᓴᓂᕐᕙᒃᐰᑦ ᐊᒡᒍᕐᑕᐅᖁᓪᓗᒋᑦ ᐃᓄᖕᓄᑦ ᓯᕗᓕᖏᑦᑕ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ, ᐊᑕᓂᕐᒧᑦ ᑐᓂᕐᕈᑕᐅᖁᓪᓗᒋᑦ, ᒨᓯᓯᐅᑉ ᐊᒡᓚᖏᓐᓂ ᐊᒡᓚᒃᑕᐅᓯᒪᔪᑦ ᒪᓕᒡᓗᒋᑦ. ᑍᒤᓕᐅᓚᐅᕆᕗᑦᑕᐅᖅ ᐃᒻᒧᒃᓯᐅᒊᑦ ᐊᖑᓴᓪᓗᖏᓐᓂᒃ.

¹³ ᖄᖏᕐᑕᐅᕕᒃᓯᐅᕈᑎᒧᑦ ᑐᓂᕐᕈᑏᑦ ᐆᑉᐰᑦ ᐃᑯᒪᒧᑦ ᐊᑐᕐᑕᐅᖁᔭᐅᓯᒪᔪᑦ ᒪᓕᒡᓗᒋᑦ; ᐃᑦᔪᕐᓁᑦᑐᓪᓕ ᑐᓂᕐᕈᑏᑦ ᐃᒐᕔᑦ ᐅᒃᑯᓯᖕᓄᑦ, ᖃᓪᓗᑎᓄᑦ, ᓵᑦᑑᔭᐅᑎᓄᓪᓗ, ᐊᕕᒃᑐᕐᓗᒋᓪᓗ ᑐᐊᕕᕐᓗᑎᒃ ᐂᑦᑑᑎᒋᕔᑦ ᐃᓄᓕᒫᓄᑦ.

¹⁴ ᑕᒪᑐᒪ ᑭᖑᕐᖓᒍᑦ ᐃᒻᒥᖕᓄᑦ ᐊᑐᐃᓐᓇᕈᐃᕗᑦ ᑐᓂᕐᕈᓯᕐᑎᑦᓯᔨᓄᓪᓗ, ᑐᓂᕐᕈᓯᕐᑎᑦᓯᔩᑦ ᐂᕉᓂᐅᑉ ᑭᖑᕚᖏᑦ ᐱᔭᒃᓴᖃᕐᒪᑕ ᑐᓂᕐᕈᑎᒃᓴᓂᒃ ᐃᑯᐊᓪᓚᒐᒃᓴᓂᒃ ᑐᓐᓄᖏᓐᓂᒡᓗ ᐅᓐᓄᐊᖅ ᑎᑭᓪᓗᒍ; ᑍᒤᒻᒪᑦ ᓕᕔᑏᑦ ᐃᒻᒥᓄᑦ ᐊᑐᐃᓐᓇᕈᐃᓚᐅᕐᐳᑦ ᑐᓂᕐᕈᓯᕐᑎᑦᓯᔨᓄᓪᓗ ᐂᕉᓂᐅᑉ ᑭᖑᕚᖏᓐᓄᑦ.

¹⁵ ᐃᓐᖏᕐᑏᑦ, ᐊᓴᐸᐅᑉ ᑭᖑᕚᖏᑦ, ᐃᓂᒋᔭᒥᓃᑉᐳᑦ ᑍᕕᑎᐅᑉ ᐱᖁᔨᓯᒪᓂᖓ ᒪᓕᒡᓗᒍ, ᐊᓴᐸᓗ, ᕼᐃᒪᓐᓗ, ᔨᑐᑕᓐᓗ ᐊᖓᔪᖅᑳᕐᔪᐊᑉ ᐅᖃᕐᑎᖁᑎᖏᑦ; ᐃᑎᕐᑕᕐᕕᖕᒥᓗ ᑲᒪᔩᑦ ᐊᑐᓂᑦ ᐃᑎᕐᑕᕐᕕᖕᓂ ᐃᓂᒥᖕᓃᓚᐅᕐᐳᑦ; ᑖᒃᑯᐊ ᐱᓇᓱᐊᕐᕕᖕᒥᖕᓂᑦ ᓅᑦᓴᕆᐊᖃᖏᒻᒪᑕ, ᐃᓚᒥᖕᓄᑦ ᓕᕔᑎᓄᑦ ᐊᑐᐃᓐᓇᕈᐃᕕᐅᓚᐅᕐᐳᑦ.

¹⁶ ᐅᓪᓗᒥ ᑕᕝᕙᓂ ᑐᒃᓯᐊᕐᓂᓕᒫᑦ ᐊᑕᓂᕐᒧᑦ ᐊᑐᐃᓐᓇᕈᕐᑕᐅᕗᖅ ᐅᓪᓗᒥ ᑕᕝᕙᓂᑦᓮᓐᓇᖅ, ᖄᖏᕐᑕᐅᕕᖕᒧᑦ ᐃᑯᐊᓪᓚᒋᐊᓖᑦ ᑐᓂᕐᕈᑎᒃᓮᑦ ᑐᓂᕐᕈᓯᕐᕕᖕᒧᑦ ᐊᑕᓂᕐᒧᑦ ᑲᔪᓯᑦᓯᐊᖁᓪᓗᒋᑦ, ᐊᖓᔪᖅᑳᕐᔪᐊᑉ ᔫᓮᐊᐅᑉ ᐱᖁᔨᓂᖓ ᒪᓕᒡᓗᒍ.

¹⁷ ᐃᓴᕆᐊᓕᒥᐅᓪᓗ ᐃᓄᖏᑦ ᓇᔫᑎᔪᑦ ᓇᓪᓕᐅᓐᓂᕐᓯᐅᓚᐅᕐᐳᑦ ᖄᖏᕐᑕᐅᕕᖕᒥᒃ ᑍᑦᓱᒪᓂᐅᑎᓪᓗᒍ, ᓂᐊᖂᔭᒥᒡᓗ ᐳᕙᓪᓚᕐᓴᐅᑎᖃᖏᑦᑐᒥᒃ ᓇᓪᓕᐅᓐᓂᕐᓯᐅᕐᐳᑦ ᐅᓪᓗᓂᒃ 7ᓂᒃ.

¹⁸ ᖄᖏᕐᑕᐅᕕᒃ ᑍᒫᒃ ᑲᒪᒋᔭᐅᓚᐅᕐᓯᒪᓚᐅᓐᖏᓚᖅ ᐃᓴᕆᐊᓕᒥᐅᓂᑦ ᓴᒧᐃᓕᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐃᓅᓂᖓᓂ ᑭᓯᐊᓂ ᓇᓪᓕᐅᓐᓂᕐᓯᐅᕐᑕᐅᕙᓚᐅᕐᒪᑦ; ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᑦ ᓇᓪᓕᐅᓐᓂᕐᓯᐅᓚᐅᕐᓯᒪᓚᐅᓐᖏᓚᑦ ᖄᖏᕐᑕᐅᕕᖕᒥᒃ ᐊᖓᔪᖅᑳᕐᔪᐊᑐᑦ ᔫᓮᐊᑐᑦ, ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ, ᔫᑕᒥᐅᓕᒫᓪᓗ ᐃᓴᕆᐊᓕᒥᐅᓕᒫᓪᓗ ᓇᔫᑎᔪᑦ, ᔨᕉᓴᓕᒥᓗ ᓄᓇᖃᕐᑐᑦ ᐃᓚᒋᓗᒋᑦ.

¹⁹ ᔫᓮᐊ ᐊᐅᓚᑦᓯᓕᕐᑎᓪᓗᒍ ᐊᕐᕌᒍᓂᒃ 18ᓂᒃ ᖄᖏᕐᑕᐅᕕᐅᑉ ᓇᓪᓕᐅᓐᓂᕐᓯᐅᕐᑕᐅᓂᖓ ᒪᓕᒃᑕᐅᓕᑍᓐᓇᓚᐅᕐᐳᖅ.

ᔫᓮᐊᐅᑉ ᑐᖁᓂᖓ

²⁰ ᑕᒪᒃᑯᐊᓕᒫᑦ ᑭᖑᕐᖓᒍᑦ, ᔫᓮᐊᐅᑉ ᐊᑐᐃᓐᓇᕈᕇᕐᑎᓪᓗᓂᐅᒃ ᑐᒃᓯᐊᕐᕕᒡᔪᐊᖅ, ᓂᑯ ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓ ᐂᓚᐅᕐᐳᖅ ᐅᓇᑕᕆᐊᕐᓗᓂ ᑳᕐᓯᒥᔅᓯᒧᑦ ᐃᕗᕅᑎᒦᑦᑐᒧᑦ ᔫᓮᐊᓗ ᐅᐸᒍᑎᕗᖅ ᐅᓇᑕᕆᐊᕐᓗᒍ.

²¹ ᓂᑯᓕ ᐅᖃᕆᐊᕐᑐᕐᑎᑦᓯᕗᖅ ᔫᓮᐊᒧᑦ ᐅᖃᕐᓗᓂ, “ᓱᔪᒃᓴᐅᕗᖔ ᐃᓕᖕᓄᑦ, ᔫᑕᒥᐅᑉ ᐊᖓᔪᖅᑳᕐᔪᐊᖓ? ᐅᓪᓗᒥ ᐃᓕᖕᓄᑦ ᐅᓇᑕᕆᐊᓐᖏᓚᖓ, ᑖᒃᑯᓄᖓᑐᐊᕐᓕ ᐅᓇᑕᕐᑕᑦᑎᓐᓄᑦ; ᒎᑎᐅᑉ ᑎᓕᓚᐅᕐᒪᖓ ᑐᐊᕕᖁᓪᓗᖓ. ᐱᔭᕆᐊᖃᓐᖏᑕᕐᓂᒃ ᒎᑎᒥᑦ ᐱᔪᓂᒃ ᐱᓇᓱᐊᕐᓂᐊᕐᓇᒃ, ᑖᑦᓱᒪ ᐃᓚᒋᖕᒪᖓ, ᐊᓯᕈᐃᖁᓇᒍ ᐃᓕᖕᓂᒃ.”

²² ᔫᓮᐊᓕ ᓵᓐᖓᔭᒥᓂᒃ ᑐᓄᐃᔪᒪᓚᐅᓐᖏᓚᖅ, ᐃᒻᒥᓂᒃ ᐃᓕᑕᕐᓇᕈᓐᓃᕐᑎᓪᓗᓂ ᑖᑦᓱᒥᖓ ᐅᓇᑕᕆᐊᓚᐅᕐᐳᖅ. ᓂᑰᑉ ᐅᖃᐅᓯᖏᑦ ᒪᓕᓚᐅᓐᖏᓔᑦ ᒎᑎᐅᑉ ᖃᓂᖓᓂᑦ ᐱᔪᑦ, ᐅᓇᑕᕆᐊᖃᑕᐅᕗᕐᓕ ᒥᒌᑑᑉ ᓇᕐᓴᖓᑕ ᓇᑎᕐᓇᖓᓂ.

²³ ᐱᓯᒃᑕᕐᑏᓪᓗ ᐱᓯᒃᓯᕗᑦ ᐊᖓᔪᖅᑳᕐᔪᐊᒥᒃ ᔫᓮᐊᒥᒃ; ᐊᖓᔪᖅᑳᕐᔪᐊᓪᓗ ᐱᔨᓂ ᐅᖃᐅᑎᕔᑦ, “ᑕᒫᓐᖓᑦ ᐊᐅᓪᓚᐅᑎᓯᓐᖓ, ᐊᖏᔪᒥᒃ ᐃᑭᓕᕐᑕᐅᒐᒪ.”

²⁴ ᐱᔨᖏᑕᓗ ᐊᖅᑲᕐᑎᑉᐹ ᐃᑭᒪᕕᖕᒥᑦ ᐊᒃᓴᓗᐊᓕᖕᒥᑦ ᐂᑉᐸᖓᓄᐊᕐᓗᒍᓗ ᐱᖁᑎᖓᑕ ᐂᑉᐸᖓᓄᑦ ᔨᕉᓴᓕᒧᐊᕈᑎᓪᓗᒍᓗ. ᑐᖁᕗᕐᓗ, ᐃᓗᕕᕐᐹᓪᓗ ᓯᕗᓕᖏᑕ ᐃᓗᕕᖃᕐᕕᖓᓄᑦ. ᔫᑕᒥᐅᓕᒫᓪᓗ ᔨᕉᓴᓕᒥᐅᓪᓗ ᐅᒡᒍᐊᕈᑎᒋᕚᑦ ᕿᒃᓵᒡᓗᑎᒃ ᔫᓮᐊ ᐱᓪᓗᒍ.

²⁵ ᔨᕆᒤᐊᓗ ᐅᒡᒍᐊᕐᓗᓂ ᕿᒃᓵᒃᐳᖅ ᔫᓮᐊ ᐱᓪᓗᒍ; ᐊᖑᑎᑦ ᐊᕐᓁᓪᓗ ᐃᓐᖏᕐᑏᑦ ᔫᓮᐊᒥᒃ ᐅᖃᐅᓯᖃᕐᐳᑦ ᐅᒡᒍᐊᕈᑎᒋᓪᓗᒍ ᕿᒃᓵᓂᒃᑯᑦ ᐅᓪᓗᒥᒧᑦ ᑎᑭᓪᓗᒍ. ᐃᓴᕆᐊᓕᒥᐅᓂᑦ ᑕᒪᓐᓇ ᐱᐅᓯᕐᑖᕆᔭᐅᑎᑕᐅᓚᐅᕐᐳᖅ; ᑕᑯᒋᑦ, ᑕᒪᒃᑯᐊ ᐊᒡᓚᒃᓯᒪᕗᖅ ᐅᒡᒍᐊᕈᑎᐅᓪᓗᑎᒃ.

²⁶ ᔫᓮᐊᐅᓪᓕ ᐱᓂᐊᕐᓂᕕᓂᖏᑕ ᐃᓚᖏᑦ, ᐱᑦᓯᐊᕐᓂᕕᓂᖏᓪᓗ ᐊᑕᓂᐅᑉ ᐱᖁᔭᖏᓐᓂ ᐊᒡᓚᒃᓯᒪᔪᑦ ᒪᓕᒡᓗᒋᑦ,

²⁷ ᐱᓂᐊᕐᓂᖏᓪᓗ, ᓯᕗᓪᓕᕐᐹᒥᑦ ᑭᖑᓪᓕᕐᐹᒧᑦ, ᑕᑯᒋᑦ, ᐊᒡᓚᒃᓯᒪᕗᑦ ᐃᓴᕆᐊᓕᒥᐅᑉ ᔫᑕᒥᐅᓪᓗ ᐊᖓᔪᖅᑳᕐᔪᐊᖏᑕ ᐊᒡᓚᒃᓯᒪᔪᖁᑎᖏᓐᓂ.