ᑯᕉᓂᑲ ᐂᑉᐸᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓮᐊ ᐊᖓᔪᖅᑳᕐᔪᐊᖅ ᔫᑕᒥ

¹ ᔫᓮᐊ ᐊᕐᕌᒍᖃᓚᐅᕐᐳᖅ ᓯᑕᒪᐅᔪᕐᑐᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 31ᓂᒃ ᔨᕉᓴᓕᒥ.

² ᐱᐅᔪᒥᒡᓗ ᐱᓇᓱᐊᓚᐅᕐᐳᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐱᓂᐊᕐᓂᖃᓚᐅᕐᐳᕐᓗ ᓯᕗᓕᖓᑕ ᑍᕕᑎᐅᑉ ᐱᓂᐊᕐᓂᕆᓚᐅᕐᑕᖏᑎᑐᑦ; ᓴᖑᓚᐅᓐᖏᓚᕐᓗ ᑕᓕᕐᐱᖕᒧᑦ ᓴᐅᒥᒧᓪᓘᓐᓃᑦ.

ᔫᓮᐊᑉ ᐊᓯᕈᐃᓂᖓ ᒎᑎᓐᖑᐊᓂᒃ

³ ᐊᖓᔪᖅᑳᖑᓂᖓᑕ ᐊᕐᕌᒎᑉ ᓯᑕᒪᐅᔪᕐᑐᖓᓂ, ᐃᓅᓱᒃᑑᓪᓗᓂ ᓱᓕ, ᓯᕗᓕᖓᑕ ᑍᕕᑎᐅᑉ ᒎᑎᖓ ᖃᐅᔨᓇᓱᐊᓕᓚᐅᕐᐹ; ᐊᕐᕌᒎᑉ 12ᖓᓂ ᔫᑕᐅᑉ ᔨᕉᓴᓕᐅᓪᓗ ᑐᒃᓯᐊᕐᕕᖏᑦ ᓴᓗᒻᒪᕐᓴᓕᕐᐰᑦ, ᓴᓇᓐᖑᐊᕐᓯᒪᔪᖅ ᐊᓯᕋᒥᒃ ᐊᑎᓕᒃ, ᓴᓇᐅᒊᓪᓗ ᐊᐅᒃᑎᓯᒪᔪᓪᓗ ᒎᑎᓐᖑᐊᑦ.

⁴ ᐱᖁᔨᓂᖓᓗ ᒪᓕᒡᓗᒍ ᑐᓂᕐᕈᓯᕐᕕᒃ ᐰᓕᒧᑦ ᓯᖁᒥᑉᐹᑦ; ᐳᔫᕐᑎᑦᓯᕕᒡᓗ ᖃᖓᓃᑦᑐᖅ ᓯᖁᑦᑎᕐᑕᐅᕗᖅ, ᕿᔪᒡᓗ ᓴᓇᓐᖑᐊᕐᓯᒪᔪᖅ ᐊᓯᕋᒥᒃ ᐊᑎᓕᒃ ᓴᓇᓐᖑᐊᕐᓯᒪᔪᓪᓗ ᐊᐅᒃᑎᓯᒪᔪᓪᓗ ᐃᓄᓐᖑᐊᑦ ᓯᖁᒥᑉᐰᑦ, ᐳᔪᕋᓐᖑᕐᑎᓪᓗᒋᑦ ᓈᕕᑉᐰᓪᓗ ᑐᓂᕐᕈᓯᕐᐸᓚᐅᕐᑐᑦ ᐃᓗᕕᖏᓐᓄᑦ.

⁵ ᑐᓂᕐᕈᓯᕐᑎᑦᓯᔩᓪᓗ ᓴᐅᓂᖏᑦ ᐃᑭᑉᐰᑦ ᑐᓂᕐᕈᓯᕐᕕᖏᓐᓂ, ᔫᑕᓗ ᔨᕉᓴᓕᒻᓗ ᑍᒤᓕᐅᕐᓗᑎᒃ ᓴᓗᒻᒪᕐᑎᑉᐹᑦ.

⁶ ᑍᒫᒡᓗ ᐱᓇᓱᐊᕆᕗᖅ ᐃᒡᓗᒐᓴᖕᓂ ᒫᓇᓯᒥᐅᓂ, ᐃᕗᕅᑎᒥᐅᓂ, ᓯᒥᐅᓂᒥᐅᓂᓗ, ᐊᒡᓛᑦ ᓈᑉᑕᓕᐅᑉ ᓄᓇᖓ ᑎᑭᓪᓗᒍ ᖃᓂᒋᔭᖓᓃᑦᑐᓪᓗ.

⁷ ᑐᓂᕐᕈᓯᕐᕖᑦ ᓯᖁᑦᑎᕐᐰᑦ, ᕿᔪᒡᓗ ᓴᓇᓐᖑᐊᕐᓯᒪᔪᖅ ᐊᓯᕋᓐᖑᐊᖅ ᓯᖁᑦᑎᕐᐹ ᓯᖃᓪᓕᓪᓗᒍ ᓴᓇᓐᖑᐊᕐᓯᒪᔪᓕᒫᓪᓗ ᐳᔪᕋᓐᖑᕐᑎᑉᐰᑦ, ᑎᐱᑦᓯᐊᕆᒃᑐᓂᒡᓗ ᐃᑯᐊᓚᑦᓯᕖᑦ ᓯᖁᑦᑎᕐᐰᑦ ᐃᓴᕆᐊᓕᒥᐅᑦ ᓄᓇᓕᒫᖏᓐᓂ. ᑕᕝᕙ ᐅᑎᕐᐳᖅ ᔨᕉᓴᓕᒧᑦ.

ᐱᖁᔧᑦ ᐊᒡᓚᓯᒪᔪᑦ ᓇᓂᔭᐅᓂᖏᑦ

⁸ ᐊᖓᔪᖅᑳᖑᓂᖓᑕ ᐊᕐᕌᒍᐃᑦ 18ᖓᓂ, ᓴᓗᒻᒪᕐᓮᓚᐅᕐᑎᓪᓗᒍ ᓄᓇᒥᒃ ᑐᒃᓯᐊᕐᕕᖕᓂᒡᓗ, ᓴᕙᓂ ᐊᔭᓔᐊᐅᑉ ᐃᕐᓂᖓ ᑎᓕᕚ, ᒫ-ᐊᓯᐊᓗ ᐊᐅᓚᑦᓯᔨᐅᔪᖅ ᐃᒡᓗᒐᓴᖕᓂ, ᔪᐊᓗ ᔪᐊᕼᐊᔨᐅᑉ ᐃᕐᓂᖓ ᑎᑎᕋᕐᑎ, ᑖᒃᑯᐊ ᑎᓕᕔᑦ ᐊᑕᓂᐅᑉ ᒎᑎᖓᑕ ᐃᒡᓗᖓ ᐋᖅᑭᒋᐊᕐᑕᐅᖁᓪᓗᒍ.

⁹ ᑖᒃᑯᐊ ᑎᑭᓐᓇᒥᒃ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓄᑦ ᕼᐃᐅᓪᑬᐊᒧ ᑮᓇᐅᔭᓂᒃ ᑐᓂᓯᕗᑦ ᒎᑎᐅᑉ ᐃᒡᓗᖓᓄᐊᕐᑐᓂᒃ, ᓕᕔᑎᑦ ᐅᒃᑯᐊᓂᒃ ᑲᒪᔩᑦ ᓄᐊᓚᐅᕐᑕᖏᓐᓂᒃ ᒫᓇᓯᒃᑯᓐᓂᑦ ᐃᕗᕅᑎᒥᐅᓂᓪᓗ, ᐃᓴᕆᐊᓕᒥᐅᓕᒫᓪᓗ ᐃᓄᖏᓐᓂᑦ ᐊᒥᐊᑰᔪᓂᑦ, ᔫᑕᒥᑦ ᐱᓐᔭᒥᓂᒃᑯᓐᓂᓪᓗ, ᔨᕉᓴᓕᒥᐅᓂᓪᓗ.

¹⁰ ᑖᒃᑯᐊ ᑐᓂᕔᑦ ᐱᓇᓱᐊᕐᑎᓄᑦ ᐊᖓᔪᖅᑲᐅᑎᑕᐅᔪᓄᓪᓗ ᐊᑕᓂᐅᑉ ᐃᒡᓗᖓᓂ; ᐱᓇᓱᐊᕐᑎᐅᔪᓄᓪᓗ ᑐᓂᒋᕔᑦ ᐊᑕᓂᐅᑉ ᐃᒡᓗᖓᓂ, ᐋᖅᑭᒋᐊᕐᑕᐅᖁᓪᓗᒍ ᓴᓇᒋᐊᕐᑕᐅᖁᓪᓗᒍᓗ.

¹¹ ᕿᔪᓕᕆᔨᓄᓪᓗ ᐃᒡᓗᓕᐅᕐᑎᓄᓪᓗ ᑐᓂᔭᐅᒋᕗᑦ ᓂᐅᕕᖁᓪᓗᒋᑦ ᐅᔭᕋᖕᓂᒃ, ᕿᔪᖕᓂᒡᓗ ᕿᒥᕈᑎᒃᓴᓂᒃ, ᓇᑎᓕᐅᖁᓪᓗᒋᓪᓗ ᐊᖓᔪᖅᑳᕐᔪᐊᑉ ᔫᑕᒥᐅᑕᐅᑉ ᑲᒪᖏᓐᓂᖓᓄᑦ ᓱᒃᑯᔨᐊᕆᔭᐅᓚᐅᕐᑐᓂᒃ.

¹² ᐊᖑᑏᓪᓗ ᓴᓇᓚᐅᕐᐳᑦ ᑲᔪᓯᑦᓯᐊᕐᓗᑎᒃ. ᐊᖓᔪᖅᑳᖃᕐᐳᑦ ᐅᑯᓂᖓ ᔭᕼᐊᑕᒥᒃ ᐅᐸᑍᐊᒥᒡᓗ ᓕᕔᑎᐅᔫᖕᓂᒃ, ᒥᕋᕆᐅᑉ ᐃᕐᓂᖏᖕᓂᒃ, ᓴᑲᕅᐊᓗ ᒥᓱᓚᒻᓗ ᑯᕼᐋᑍᑎᐅᑉ ᑭᖑᕚᖏᓐᓂᑦ ᐱᔫᒃ ᑲᒪᔨᐅᓚᐅᕐᐳᑦ. ᓕᕔᑏᓪᓗ ᐊᓯᖏᑦ, ᐱᔪᓐᓇᑦᓯᐊᕐᑐᑦ ᓂᑦᔭᐅᓯᔭᐅᑎᓂᒃ,

¹³ ᑖᒃᑯᐊ ᓴᓇᔨᓄᑦ ᐊᖓᔪᖅᑲᐅᕗᑦ ᐱᓇᓱᐊᕐᑕᐅᔪᓕᒫᓄᑦ; ᓕᕔᑏᓪᓗ ᐃᓚᖏᑦ ᐱᖁᔭᓂᒃ ᐃᓕᓯᒪᔪᑦ, ᐊᖓᔪᖅᑳᖑᔪᑦ, ᐃᑎᕐᑕᕐᕕᖕᒥᓗ ᑲᒪᔨᐅᔪᑦ.

¹⁴ ᑖᒃᑯᐊᓗ ᑮᓇᐅᔧᑦ ᐊᑕᓂᐅᑉ ᐃᒡᓗᖓᓄᑦ ᑐᓂᔭᐅᓯᒪᔪᑦ ᐊᓐᓂᑦᔭᐅᓕᕐᑎᓪᓗᒋᑦ, ᕼᐃᐅᓪᑬᐊ ᑐᓂᕐᕈᓯᕐᑎᑦᓯᔨ ᓇᓂᓯᕗᖅ ᐊᒡᓚᖕᓂᒃ ᐱᖁᔭᓂᒃ ᐊᑕᓂᐅᑉ ᑐᓂᓚᐅᕐᑕᖏᓐᓂᒃ ᒨᓯᓯᒃᑯᑦ.

¹⁵ ᑕᕝᕙ ᕼᐃᓪᑬᐊ ᐅᖃᕐᐳᖅ ᓴᕙᓂᒧᑦ ᑎᑎᕋᕐᑎᒧᑦ, “ᐊᒡᓔᑦ ᓇᓂᕙᒃᑲ ᐱᖁᔧᑦ ᐊᑕᓂᐅᑉ ᐃᒡᓗᖓᓂ.” ᕼᐃᐅᓪᑬᐊᐅᓪᓗ ᐊᒡᓔᑦ ᑐᓂᕔᑦ ᓮᕙᓐᒧᑦ.

¹⁶ ᓴᕙᓂᐅᓪᓗ ᐊᒡᓔᑦ ᐋᑉᐰᑦ ᐊᖓᔪᖅᑳᕐᔪᐊᕐᒧᑦ, ᐅᖃᐅᑎᓪᓗᒍᓗ, “ᑎᓕᓯᑦᔪᑎᒋᓚᐅᕐᑕᓕᒫᑎᑦ ᐱᔨᖕᓄᑦ ᐱᓇᓱᐊᕐᑕᐅᕗᑦ.

¹⁷ ᑮᓇᐅᔭᓪᓗ ᑲᑎᕐᓱᓚᐅᕐᐰᑦ ᐊᑕᓂᐅᑉ ᐃᒡᓗᖓᓃᑦᑐᑦ, ᑐᓂᓪᓗᒋᓪᓗ ᐊᖓᔪᖅᑲᐅᑎᑕᐅᔪᓄᑦ ᐱᓇᓱᐊᕐᑎᓄᓪᓗ.”

¹⁸ ᓴᕙᓂᐅᓪᓗ ᑎᑎᕋᕐᑎᐅᑉ ᐊᖓᔪᖅᑳᕐᔪᐊᖅ ᐅᖃᐅᑎᕚ, “ᑐᓂᕐᕈᓯᕐᑎᑦᓯᔨᐅᑉ ᕼᐃᓪᑬᐊᐅᑉ ᐊᒡᓚᖕᓂᒃ ᑐᓂᓚᐅᕐᐹᖓ.” ᓴᕙᓂᓗ ᑖᒃᑯᓂᖓ ᐅᖃᓕᒫᓕᕐᐳᖅ ᐊᖓᔪᖅᑳᕐᔪᐊᕐᒧᑦ.

¹⁹ ᐊᖓᔪᖅᑳᕐᔪᐊᑉ ᐅᖃᐅᓰᑦ ᐱᖁᔭᓃᑦᑐᑦ ᑐᓴᕋᒥᒋᑦ ᐊᓐᓄᕌᓂ ᐊᓕᒃᐰᑦ.

²⁰ ᐊᖓᔪᖅᑳᕐᔪᐊᕐᓗ ᑎᓕᓯᕗᖅ ᕼᐃᓪᑬᐊᒥᒃ, ᐊᕼᐂᑲᒻ ᓴᕙᓂᐅᑉ ᐃᕐᓂᖓᓂᒃ, ᐊᑉᑖᓐᒥᒃ ᒤᑲᐅᑉ ᐃᕐᓂᖓᓂᒃ, ᓮᕙᓐᓗ ᑎᑎᕋᕐᑎ, ᐊᓮᐊᓗ ᐊᖓᔪᖅᑳᕐᔪᐊᑉ ᐱᔨᖓ, ᐅᖃᕐᓗᓂ,

²¹ “ᐂᓕᕆᑦᓯ ᐊᑕᓂᖅ ᖃᐅᔨᒋᐊᕐᕕᒋᓗᒍ ᐱᓪᓗᖓ ᔫᑕᐅᓪᓗ ᐃᓴᕆᐊᓕᒥᐅᓪᓗ ᐊᒥᐊᒃᑯᖏᑦ, ᑖᒃᑯᐊ ᐅᖃᐅᓰᑦ ᐊᒡᓚᖕᓂᑦ ᐱᔪᑦ ᓇᓂᔭᐅᓚᐅᕐᑐᑦ ᐱᓪᓗᒋᑦ; ᐊᑕᓂᐅᑉ ᓂᓐᖓᐅᓯᖓ ᐊᖏᔫᕗᖅ ᐅᕙᑦᑎᓐᓄᑦ ᑯᕕᔭᐅᓯᒪᔪᖅ, ᓯᕗᓕᕆᓚᐅᕐᑕᕗᑦ ᐊᑕᓂᐅᑉ ᐅᖃᐅᓯᖓᓂᒃ ᒪᓕᓚᐅᖏᒻᒪᑕ, ᐱᓇᓱᐊᓚᐅᕋᑎᒡᓗ ᑖᒃᑯᓂᖓ ᐊᒡᓚᒃᓯᒪᔪᑦ ᒪᓕᒡᓗᒋᑦ.”

²² ᕼᐃᓪᑬᐊᓗ ᐊᖓᔪᖅᑳᕐᔪᐊᓪᓗ ᑎᓕᓚᐅᕐᑕᖏᑦ ᐂᕗᑦ ᕼᐅᓪᑕᒧᑦ ᐊᕐᓇᒧᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᓴᓗᒻ ᓄᓕᐊᖓᓄᑦ ᑐᑲᑕᐅᑉ ᐃᕐᓂᖓᑕ, ᕼᐊᔅᕋᓪᓗ ᐃᕐᓂᖓ ᐊᓐᓄᕌᓂᒃ ᑐᒃᓯᐊᕐᕕᖕᒥ ᑲᒪᔨ (ᑖᓐᓇ ᐊᕐᓇᖅ ᐊᖏᕐᕋᖃᓚᐅᕐᒪᑦ ᔨᕉᓴᓕᐅᑉ ᐊᕝᕙᖓᑕ ᐂᑉᐸᖓᓂ.) ᑖᓐᓇᓗ ᐊᕐᓇᖅ ᐅᖃᕐᕕᒋᕚᑦ ᐱᓂᐊᕐᓂᐅᔪᓂᒃ.

²³ ᑖᑦᓱᒪᓗ ᐅᖃᐅᑎᕔᑦ, “ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓ; ‘ᐊᖑᑦ ᑍᓐᓇ ᐅᖃᐅᑎᒍᒃ ᐅᕙᓐᓄᐊᕐᑎᑦᓯᔪᖅ,

²⁴ ᐊᑕᓂᖅ ᐃᒫᒃ ᐅᖃᕐᐳᖅ, ᑕᑯᒋᑦ, ᓱᒋᐊᕐᑕᐅᓂᕐᒥᒃ ᑕᒪᓐᓇ ᑎᑭᑕᐅᑎᑦᓱᒫᕐᐸᕋ ᓄᓇᖃᕐᑐᓪᓗ ᑕᒫᓂ, ᐊᒡᓚᒃᓯᒪᔪᑦ ᐊᒡᓚᖕᓂ ᐃᖅᑲᕐᑐᕐᑕᐅᑦᔪᑎᒃᓴᑦ ᒪᓕᒡᓗᒋᑦ ᐅᖃᓕᒫᕐᑕᐅᓚᐅᕐᑐᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᓵᖓᓂ.

²⁵ ᐅᕙᓐᓂᒃ ᕿᒤᓚᐅᕐᒪᑕ ᑎᐱᑦᓯᐊᕆᒃᑐᓂᒡᓗ ᐃᑯᐊᓪᓔᖃᑦᑕᓕᕐᓗᑎᒃ ᒎᑎᓐᖑᐊᓄᑦ, ᐅᕙᓐᓂᒡᓗ ᓂᓐᖓᒃᓮᓚᐅᕐᒪᑕ ᐱᓂᐊᕐᓂᕐᒥᖕᓄᑦ, ᑍᒤᒻᒪᑦ ᓂᓐᖓᐅᓯᕋ ᑯᕕᓂᐊᕐᐳᖅ ᑕᕝᕗᖓ ᖃᒥᑎᑕᐅᓂᐊᕋᓂᓗ.

²⁶ ᔫᑕᐅᓪᓕ ᐊᖓᔪᖅᑳᕐᔪᐊᖓ, ᐃᓕᑦᓯᓐᓂᒃ ᑎᓕᓯᓚᐅᕐᑐᖅ ᐊᑕᓂᕐᒥᒃ ᖃᐅᔨᒋᐊᖁᔨᓪᓗᓂ, ᐃᒫᒃ ᐅᖃᐅᑎᔭᒃᓴᕆᕙᓯ, ᐊᑕᓂᖅ ᐃᒫᒃ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ: ᐅᖃᐅᓰᑦ ᑐᓴᓚᐅᕐᑕᑎᑦ ᐱᑦᔪᑎᒋᓪᓗᒋᑦ,

²⁷ ᐆᒻᒪᑎᒃᑯᑦ ᖃᕿᐊᓕᓚᐅᕋᕕᑦ ᐃᒻᒥᓂᒡᓗ ᒥᑭᒡᓕᑎᕐᓗᑎᑦ ᒎᑎᐅᑉ ᓵᖓᓂ ᑐᓴᕐᑎᓪᓗᑎᑦ ᐅᖃᐅᓯᖏᓐᓂᒃ ᑖᒃᑯᐊ ᐃᖅᑲᕐᑐᒐᒃᓴᐅᓕᕐᑎᓪᓗᒋᑦ ᓄᓇᖃᕐᑐᓪᓗ ᑕᒫᓂ, ᐃᓕᖕᓂᒃ ᒥᑭᒡᓕᑎᓚᐅᕋᕕᑦ ᓵᓐᓂ, ᐊᓐᓄᕌᑎᓪᓗ ᐊᓕᓚᐅᕋᕕᒋᑦ ᕿᐊᓪᓗᑎᓪᓗ ᓵᓐᓂ, ᑕᕝᕙ ᑐᓴᓚᐅᕐᐸᒋᑦ, ᐊᑕᓂᖅ ᐅᖃᕐᐳᖅ.

²⁸ ᑕᑯᒋᑦ, ᓯᕗᓕᕕᑦ ᐃᓂᖏᓐᓄᐊᕈᒫᕐᐳᑎᑦ, ᐃᓗᕕᕐᑕᐅᔪᒫᕐᐳᑎᓪᓗ ᐃᓱᒫᓗᓇᖏᑦᑐᒦᓪᓗᑎᑦ, ᓇᖕᒥᓂᕐᓗ ᑕᒪᓐᓇ ᐋᓐᓂᐊᓇᕐᑐᖅ ᑕᑯᔪᒫᓐᖏᓚᑦ ᑎᑭᑎᑦᓱᒫᕐᑕᕋ ᑕᒫᓂ ᓄᓇᖃᕐᑐᓄᑦ.’” ᑖᒃᑯᐊᓗ ᐅᑎᓚᐅᕐᐳᑦ ᐅᖃᐅᓯᖃᕐᓗᑎᒃ ᐅᖃᐅᓯᕐᓂᒃ ᑖᒃᑯᓂᖓ ᐊᖓᔪᖅᑳᕐᔪᐊᕐᒧᑦ.

ᔫᓮᐊᐅᑉ ᐊᖏᕈᑎᖃᕐᓂᖓ ᐊᑕᓂᕐᒥᒃ ᓈᓚᒍᒪᓪᓗᓂ

²⁹ ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᕗᖅ ᑲᑎᖁᔨᓪᓗᓂ ᔫᑕᒥᐅᑦ ᔨᕉᓴᓕᒥᐅᓪᓗ ᐊᖓᔪᖅᑳᖏᓐᓂᒃ ᓯᕗᓕᕐᑎᓕᒫᓂᒃ.

³⁰ ᐊᖓᔪᖅᑳᕐᔪᐊᕐᓗ ᐊᑕᓂᐅᑉ ᐃᒡᓗᖓᓄᐊᕐᐳᖅ, ᔫᑕᒥ ᔨᕉᓴᓕᒥᓗ ᓄᓇᖃᕐᑐᓕᒫᑦ ᐊᖑᑎᑦ ᐃᓚᒋᓪᓗᒋᑦ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ, ᐃᓄᓕᒫᓪᓗ ᐊᒃᓗᐃᑦᑐᑦ ᐊᒃᓗᔪᓪᓗ; ᑐᓵᑎᓪᓗᒋᓪᓗ ᐅᖃᓕᒫᕐᕕᒋᕔᑦ ᐊᒡᓚᖕᓂᒃ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ ᓇᓂᔭᐅᓚᐅᕐᑐᓂᒃ ᐊᑕᓂᐅᑉ ᐃᒡᓗᖓᓂᑦ.

³¹ ᐊᖓᔪᖅᑳᕐᔪᐊᕐᓗ ᓇᖏᕐᐳᖅ ᐃᓂᒥᓂ ᐊᖏᖃᑎᒌᒍᑎᓕᐅᕐᓗᓂ ᐊᑕᓂᐅᑉ ᓵᖓᓂ, ᐊᑕᓂᕐᒥᒃ ᒪᓕᒍᒪᓪᓗᓂ ᐱᖁᔭᖏᓐᓂᒃ ᒪᓕᒃᑕᐅᖁᔭᖏᓐᓂᒡᓗ ᐆᒻᒪᑎᒥᓄᑦ ᑕᕐᓂᕐᒥᓄᓪᓗ ᑕᒤᓐᓄᑦ, ᐊᖏᖃᑎᒌᒍᑕᐅᓯᒪᔪᑦ ᐅᖃᐅᓯᖏᑦ ᐊᒡᓚᖕᓂ ᐊᒡᓚᒃᓯᒪᔪᑦ ᒪᓕᒡᓗᒋᑦ.

³² ᑕᕝᕙ ᐃᓚᒋᔭᓕᒫᓂ ᔨᕉᓴᓕᒥᐅᑦ ᐱᓐᔭᒥᓂᒥᐅᓪᓗ ᐃᓚᓕᐅᕆᖁᕔᑦ ᒪᓕᖁᓪᓗᒋᓪᓗ ᑕᒪᒃᑯᓂᖓ. ᔨᕉᓴᓕᒥᓗ ᓄᓇᖃᕐᑐᓕᒫᑦ ᐊᖏᖃᑎᒌᒍᑎᓕᐅᕐᐳᑦ ᒪᓕᒍᒪᓪᓗᑎᒃ ᐊᖏᖃᑎᒌᒍᑎᓃᑦᑐᓂᒃ ᒎᑎᒧᑦ, ᓯᕗᓕᖏᑕ ᒎᑎᖓᓄᑦ.

³³ ᔫᓮᐊᐅᓪᓗ ᓇᕐᕈᓇᕐᑐᓕᒫᑦ ᐲᔭᕐᐰᑦ ᐃᓴᕆᐊᓕᒥᐅᑦ ᓄᓇᖏᓐᓃᑦᑐᑦ, ᐃᓴᕆᐊᓕᒦᑦᑐᓕᒫᓪᓗ ᐱᔨᑦᓯᖁᕔᑦ ᐊᑕᓂᕐᒥᒃ ᒎᑎᒥᖕᓂᒃ. ᐃᓅᓂᓕᒫᖓᓂ ᐃᓄᐃᑦ ᕿᒤᓚᐅᓐᖏᓚᑦ ᐊᑕᓂᕐᒥᒃ ᓯᕗᓕᖏᑦᑕ ᒎᑎᖓᓂᒃ.