ᑯᕉᓂᑲ ᐂᑉᐸᖏᑦ 33 - ᐊᒡᓔᑦ ᐃᑦᔪᕐᖕᓁᑦᑐᑦᐊᖓᔪᖅᑳᕐᔪᐊᖅ ᒫᓇᓯ ᔫᑕᒥᐅᑕᖅ ᐊᑕᓃᑦ ᐂᑉᐸᖏᑦ 21:1-9 1 ᒫᓇᓯ ᐊᕐᕌᒍᖃᓚᐅᕐᐳᖅ 12ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 55ᓂᒃ ᔨᕉᓴᓕᒥ. 2 ᐱᐅᖏᑦᑐᓕᓚᐅᕐᐳᖅ ᐊᑕᓂᐅᑉ ᑕᑯᓐᓇᑕᖓᒍᑦ, ᓄᓇᓖᑦ ᐱᐅᖏᑦᑐᓂ ᓇᕐᕈᓇᕐᑐᓕᓂᖏᓐᓂᒃ ᒪᓕᓚᐅᕐᒪᑦ ᐊᑕᓂᐅᑉ ᐊᓂᑎᓚᐅᕐᑕᖏᓐᓂᒃ ᐃᓴᕆᐊᓕᒥᐅᑦ ᐃᓄᖏᓐᓄᑦ ᐃᓇᖏᕐᑕᐅᑎᓚᐅᕐᑕᖏᑕ. 3 ᓴᓇᒋᐊᓪᓚᓚᐅᕐᒪᑦ ᒎᑎᓐᖑᐊᓄᑦ ᑐᒃᓯᐊᕐᕕᖕᓂᒃ ᐊᑖᑕᖓᑕ ᕼᐃᓯᑬᐊᐅᑉ ᓱᕋᓚᐅᕐᑕᖏᓐᓂᒃ, ᑐᓂᕐᕈᓯᕐᕖᓪᓗ ᐰᓕᒧᑦ ᐋᖅᑭᒃᓱᕆᐊᓪᓚᒃᓗᒋᑦ, ᕿᔪᖕᓂᒡᓗ ᒎᑎᓐᖑᐊᓂ ᐊᓯᕋᓂᒃ ᐊᑎᓕᖕᓂᒃ ᓴᓇᕗᖅ, ᑐᒃᓯᐊᕐᕕᒋᖃᑦᑕᕐᐰᓪᓗ ᒎᑎᒋᔭᐅᔪᑦ ᐅᓪᓗᕆᐊᑦ ᕿᓚᖕᒦᑦᑐᑦ ᐱᔨᑦᓯᕐᓗᒋᓪᓗ. 4 ᑐᓂᕐᕈᓯᕐᕕᓕᐅᓚᐅᕐᐳᕐᓗ ᐊᑕᓂᐅᑉ ᐃᒡᓗᖓᓂ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓᓂ ᐃᒫᒃ, “ᐊᑎᕋ ᔨᕉᓴᓕᒥ ᑐᒃᓯᐊᕐᕕᐅᑦᓮᓐᓇᕐᑐᒃᓴᐅᕗᖅ ᐃᓱᖃᖏᑦᑐᒧᑦ.” 5 ᑐᓂᕐᕈᓯᕐᕕᓕᐅᓚᐅᕆᕗᕐᓗ ᐅᓪᓗᕆᐊᓄᑦ ᐊᑕᓂᐅᑉ ᐃᒡᓗᖓᑕ ᐃᓗᐊᓂ ᑐᕐᓲᖑᔭᖏᖕᓂ ᑕᒪᖏᖕᓂ. 6 ᐃᕐᓂᓂᓗ ᐃᑯᐊᓪᓚᒡᓗᒋᑦ ᑐᓂᕐᕈᑎᒋᕔᑦ ᓇᕐᓴᒥ ᕼᐃᓇᒻ ᐃᕐᓂᖓᓂᒃ ᐊᑎᓕᖕᒥ, ᐱᓇᓱᐊᖃᑦᑕᓚᐅᕐᐳᕐᓗ ᓇᓚᐅᑦᑍᓇᓱᐊᕈᑎᓂᒃ ᐊᖓᒃᑰᓇᓱᐊᕈᑎᓂᒡᓗ ᓯᕗᓂᒃᓴᒥᓗ ᖃᐅᔨᒪᓇᓱᐊᕈᑎᓂᒃ, ᖃᐅᔨᓇᓱᐊᕐᑎᑦᓯᖃᑦᑕᕐᓗᓂᓗ ᑐᖁᖓᔪᓂᒃ ᐊᓂᕐᓂᓕᕆᓲᓂᒃ. ᐱᐅᖏᑦᑐᒻᒪᕆᐊᓗᖕᓂᒃ ᐱᓇᓱᐊᓚᐅᕐᐳᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓂᓐᖓᒃᓮᑦᔪᑎᐅᔪᓂᒃ ᑖᑦᓱᒧᖓ. 7 ᐃᓕᓯᓚᐅᕆᕗᕐᓗ ᒎᑎᐅᑉ ᐃᒡᓗᖓᓄᑦ ᓴᓇᓐᖑᐊᕐᓯᒪᔪᒥᒃ ᒎᑎᓐᖑᐊᒥᒃ ᓴᓇᓚᐅᕐᑕᒥᓂᒃ, ᒎᑎᐅᑉ ᐅᖃᐅᓯᕆᓚᐅᕐᑕᖓᓂᒃ ᑍᕕᑎᒧᑦ ᐃᕐᓂᖓᓄᓪᓗ ᓲᓗᒨᓂᒧᑦ, “ᑖᓐᓇ ᐃᒡᓗ ᔨᕉᓴᓕᒦᑦᑐᖅ, ᓂᕈᐊᓚᐅᕐᐸᕋ ᐃᓅᖃᑎᒌᒡᔪᐊᓂᑦ ᐃᓴᕆᐊᓕᒥᐅᓂᑦ, ᐊᑎᕋ ᑕᕝᕙᓂ ᑐᒃᓯᐊᕐᕕᐅᖃᑦᑕᖁᓪᓗᒍ ᐃᓱᖃᖏᑦᑐᒧᑦ; 8 ᐃᓴᕆᐊᓕᒥᐅᓪᓗ ᐊᕐᓵᕐᓂᐊᕈᓐᓃᕐᐸᒃᑲ ᓄᓇᖓᓂᒃ ᓯᕗᓕᖏᓐᓄᑦ ᑐᓂᓚᐅᕐᑕᓐᓂᒃ, ᑲᒪᑦᓯᐊᕋᔭᕐᐸᑕ ᑎᓕᓯᑦᔪᑎᒋᓚᐅᕐᑕᓐᓂᒃ, ᐱᖁᔭᓕᒫᓂᒃ, ᒪᓕᒐᒃᓴᐅᖁᔭᓐᓂᒃ ᐊᑐᕐᑕᐅᖁᔭᓐᓂᒡᓗ ᑐᓂᓚᐅᕐᑕᓐᓂᒃ ᒨᓯᓯᑯᑦ.” 9 ᒫᓇᓯᐅᑉ ᔫᑕᒥᐅᑦ ᔨᕉᓴᓕᒥᓗ ᓄᓇᖃᕐᑐᑦ ᓯᓔᕐᕆᓪᓗᒋᑦ ᐊᔪᕐᑐᓕᑎᓚᐅᕐᐰᑦ, ᓄᓇᖃᕐᑐᑐᖃᐅᓚᐅᕐᑐᓂᑦ ᐱᐅᖏᓐᓂᕐᓴᓂᒃ ᐱᓇᓱᐊᕐᑎᓪᓗᒋᑦ ᐊᑕᓂᐅᑉ ᐊᓯᕈᓚᐅᕐᑕᖏᓐᓂᑦ ᐃᓴᕆᐊᓕᒥᐅᑦ ᐃᓄᖏᓐᓄᑦ ᓄᓇᑖᕆᔭᐅᖔᕐᑎᓪᓗᒍ. ᒫᓇᓯᐅᑉ ᓵᒋᐊᕐᓂᖓ 10 ᐊᑕᓂᖅ ᐅᖃᓚᐅᕐᐳᖅ ᒫᓇᓯᒧᑦ ᐃᓄᖁᑎᖏᓐᓄᓪᓗ, ᑖᒃᑯᐊᓕ ᓈᓚᓚᐅᓐᖏᓚᑦ. 11 ᑍᒤᒻᒪ ᐊᑕᓂᐅᑉ ᐱᔭᐅᑎᓚᐅᕐᐰᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑎᖏᓐᓄᑦ, ᑖᒃᑯᐊ ᒫᓇᓯᒥᒃ ᑎᒍᓯᕗᑦ ᓴᕕᕋᔭᖕᓄᓪᓗ ᓂᒃᓯᒃᓯᒪᓪᓗᒍ ᐊᕐᓵᕐᑑᔭᓄᑦ ᑲᓐᓄᔭᓄᑦ ᕿᓚᒃᓱᕐᐹᑦ ᐊᐅᓪᓚᐅᑎᓪᓗᒍᓗ ᐹᐱᓘᓂᒧᑦ. 12 ᐅᖁᒤᑦᑐᒦᓕᕋᒥᓗ ᐊᑕᓂᖅ ᒎᑎᓂ ᓵᕝᕕᒋᕚ ᐃᒻᒥᓂᒡᓗ ᒥᑭᒡᓕᑎᕕᒡᔪᐊᕐᓗᓂ ᓯᕗᓕᖏᑕ ᒎᑎᖓᑕ ᓵᖓᓂ. 13 ᑐᒃᓯᐊᕐᕕᒋᕚᓗ, ᒎᑎᐅᓪᓗ ᕿᓄᑦᔪᑎᖏᑦ ᐃᓚᓕᐅᕐᐰᑦ ᑐᒃᓯᐊᕐᓂᖓᓗ ᑐᓴᕐᓗᒍ ᐅᑎᕐᑎᑉᐹᓗ ᔨᕉᓴᓕᒧᑦ ᐊᖓᔪᖅᑲᐅᕕᖓᓄᑦ. ᒫᓇᓯᓗ ᖃᐅᔨᕗᖅ ᐊᑕᓂᖅ ᒎᑎᐅᖕᒪᑦ. 14 ᑕᒪᑐᒪ ᑭᖑᕐᖓᒍᑦ ᐊᕙᓗᕐᔪᐊᖅ ᓯᓚᓪᓕᖅ ᓴᓇᕚ ᑍᕕᑎᐅᑉ ᐃᒡᓗᒐᓴᖓᓂ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᒋᕼᐅᓂᒥ, ᓇᕐᓴᒦᑦᑐᖅ, ᐃᑎᕐᑕᕐᕕᒃ ᐃᖃᓗᖕᒥᒃ ᐊᑎᓕᒃ ᑎᑭᓪᓗᒍ; ᑲᔪᓯᓪᓗᓂ ᐅᐱᐅᓪ ᐃᒡᓗᒐᓴᖏᓐᓂᒃ ᑍᔭᐅᔪᖅ ᐱᖃᓯᐅᑎᕚ, ᐳᕐᑐᓯᒋᐊᕐᐹᓗ ᐳᕐᑐᔪᕐᔪᐊᓐᖑᕐᓗᒍ; ᖃᐅᔨᓴᕐᑏᓪᓗ ᐅᓇᑕᕐᑏᑦ ᐊᖓᔪᖅᑳᖏᑦ ᐃᓂᑖᕐᑎᑉᐰᑦ ᔫᑕᐅᑉ ᐃᒡᓗᒐᓴᖏᓐᓂ ᐊᕙᓗᓕᐅᕐᓯᒪᔪᓂ. 15 ᓄᓇᖅᑲᑎᒋᓐᖏᑕᖏᑕᓗ ᒎᑎᓐᖑᐊᖏᑦ ᐲᔭᕐᐰᑦ ᒎᑎᓐᖑᐊᓪᓗ ᐊᑕᓂᐅᑉ ᐃᒡᓗᖓᓃᑦᑐᑦ, ᑐᓂᕐᕈᓯᕐᕕᓕᒫᓪᓗ ᓴᓇᓚᐅᕐᑕᓂ ᐊᑕᓂᐅᑉ ᐃᒡᓗᖓᓂᑦᑐᑦ ᔨᕉᓴᓕᒥ, ᖃᖅᑲᓂᓗ ᐃᒋᑉᐰᑦ ᐃᒡᓗᒐᓮᑦ ᓯᓚᑖᓄᑦ. 16 ᐊᑕᓂᐅᓪᓗ ᑐᓂᕐᕈᓯᕐᕕᐊ ᐋᖅᑭᒋᐊᕐᐹ, ᑕᕝᕙᓂᓗ ᑐᓂᕐᕈᓯᕐᐳᖅ ᓮᒻᒪᕐᑎᑕᐅᓂᕐᒧᑦ ᖁᔭᓕᓂᕐᒧᓪᓗ ᑐᓂᕐᕈᑎᓂᒃ; ᔫᑕᒥᐅᓪᓗ ᐱᖁᕔᑦ ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ ᐱᔨᑦᓯᖁᓪᓗᒋᑦ. 17 ᐃᓚᖏᓪᓕ ᑲᔪᓯᒐᓗᐊᕐᑎᓪᓗᒋᑦ ᒎᑎᓐᖑᐊᒧᑦ ᑐᒃᓯᐊᕐᕕᖕᓂ ᑐᓂᕐᕈᓯᖃᑦᑕᕐᓗᑎᒃ, ᐊᑕᓂᕐᒧᓪᓕ ᒎᑎᒥᖕᓄᑦ ᑐᓂᕐᕈᓯᕐᕕᑐᐊᖃᖃᑦᑕᓕᓚᐅᕐᐳᑦ. ᒫᓇᓯᐅᑉ ᐊᖓᔪᖅᑳᖑᓂᖓᑕ ᐃᓱᓕᓐᓂᖓ ᐊᑕᓃᑦ ᐂᑉᐸᖏᑦ 21:17-18 18 ᒫᓇᓯᐅᓪᓕ ᐱᓂᐊᕐᓂᖏᑕ ᐊᓯᖏᑦ, ᑐᒃᓯᐊᕐᓂᖓᓗ ᒎᑎᒥᓄᑦ, ᒎᑎᐅᓪᓗ ᐅᖃᕐᑎᖓᓄᑦ ᐅᖃᐅᑦᔭᐅᑦᔪᑎᒋᓚᐅᕐᑕᖏᑦ ᐊᑕᓂᐅᑉ ᐊᑎᖓᓂ ᐃᓴᕆᐊᓕᒥᐅᑦ ᒎᑎᖓᓄᑦ, ᑕᑯᒋᑦ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᑎᑎᕋᕐᑕᐅᕙᓪᓕᐊᓯᒪᕕᖏᓐᓂ. 19 ᑐᒃᓯᐊᕐᓂᖓᓗ, ᖃᓄᕐᓗ ᒎᑎᒧᑦ ᑭᐅᔭᐅᓚᐅᕐᓂᖓ ᕿᓄᓂᖓᓄᑦ, ᐊᔪᕐᑐᓕᓂᓕᒫᖏᓪᓗ ᐅᒃᐱᓚᐅᖏᓐᓂᖓᓗ, ᓇᓂᓗ ᑐᒃᓯᐊᕐᕕᓕᐅᓚᐅᕐᓂᖓ ᒎᑎᓐᖑᐊᓄᑦ ᐋᖅᑭᒃᓱᐃᓚᐅᕐᓂᖓᓗ ᕿᔪᖕᓂᒃ ᐊᓯᕋᒥᒃ ᐊᑎᓕᖕᒥᒃ ᐃᓄᓐᖑᐊᓂᒡᓗ ᓴᓇᓚᐅᕐᓂᖓ, ᒥᑭᒡᓕᑎᓚᐅᖏᓐᓂᕐᒥᓂ, ᑕᑯᒋᑦ, ᑎᑎᕋᕐᓯᒪᕗᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑎᑎᕋᕐᓯᒪᔪᖁᑎᖏᓐᓂ. 20 ᒫᓇᓯ ᑕᕾᕐᓯᓕᓚᐅᕐᐳᖅ ᓯᕗᓕᕆᓚᐅᕐᑕᒥᓄᐊᕐᓗᓂ, ᐃᓗᕕᕐᐹᓗ ᓇᖕᒥᓂᖅ ᐃᒡᓗᖓᓂ; ᐃᕐᓂᖓᓗ ᐋᒪᓐ ᐃᓇᖐᓚᐅᕐᐳᖅ ᑖᑦᓱᒥᖓ ᐊᖓᔪᖅᑳᕐᔪᐊᓐᖑᕐᓗᓂ. ᐂᒪᓐ ᐊᖓᔪᖅᑳᕐᔪᐊᖑᓂᖓ ᔫᑕᒥ ᐊᑕᓃᑦ ᐂᑉᐸᖏᑦ 21:19-26 21 ᐋᒪᓐ ᐊᕐᕌᒍᖃᓚᐅᕐᐳᖅ 22ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒎᖕᓂᒃ ᒪᕐᕉᖕᓂᒃ ᔨᕉᓴᓕᒥ. 22 ᐱᐅᖏᑦᑐᓕᓚᐅᕐᐳᕐᓕ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐊᑖᑕᖓᑕ ᒫᓇᓯᐅᑉ ᐱᓂᐊᕐᓂᕆᓚᐅᕐᑕᖏᓐᓂᒃ ᐱᓇᓱᐊᓚᐅᕐᒥᖕᒪᑦ; ᐋᒪᓐᓗ ᑐᓂᕐᕈᓯᓚᐅᕐᐳᖅ ᓴᓇᓐᖑᐊᕐᓯᒪᔪᓄᑦ ᐊᑖᑕᖓᑕ ᓴᓇᓚᐅᕐᑕᖏᓐᓄᑦ, ᐱᔨᑦᓯᕐᓗᒋᓪᓗ. 23 ᐃᒻᒥᓂᒃ ᒥᑭᒡᓕᑎᓚᐅᓐᖏᓚᖅ ᐊᑕᓂᐅᑉ ᓵᖓᓂ, ᐊᑖᑕᖓᑕ ᒫᓇᓯᐅᑉ ᒥᑭᒡᓕᑎᕐᓂᕆᓚᐅᕐᑕᖓᑐᑦ; ᐋᒪᓐᓕ ᕿᒤᕙᓪᓕᐊᑐᐃᓐᓇᓚᐅᕐᐳᖅ ᐸᓯᔭᒃᓴᕈᕐᐸᓪᓕᐊᑐᐃᓐᓇᕐᓗᓂᓗ. 24 ᐱᔨᖏᑕᓗ ᐊᑭᕋᕐᑐᓕᓚᐅᕐᐹᑦ ᑐᖁᓪᓗᒍᓗ ᐃᒡᓗᖓᓂ. 25 ᐃᓄᐃᓪᓕ ᓄᓇᖃᕐᑐᑦ ᑐᖁᕅᓚᐅᕐᐳᑦ ᐋᒪᓐᒥᒃ ᐊᖓᔪᖅᑳᕐᔪᐊᒥᒃ ᐊᑭᕋᕐᑐᓕᓚᐅᕐᑐᓕᒫᓂᒃ; ᐃᓄᐃᓪᓗ ᓄᓇᖃᕐᑐᑦ ᐃᕐᓂᖓᓂᒃ ᐊᖓᔪᖅᑳᕐᔪᐊᕈᕐᑎᑦᓯᕗᑦ ᔫᓮᐊᒥᒃ ᑖᑦᓱᒥᖓ ᐃᓇᖐᓪᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society