ᑯᕉᓂᑲ ᐂᑉᐸᖏᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦᐊᓯᕆᐊᒥᐅᑦ ᓯᕘᕋᓵᕆᓂᖏᑦ ᔨᕉᓴᓕᒧᑦ ᐊᑕᓃᑦ ᐂᑉᐸᖏᑦ 18:13-37 ; 19:14-19 , 35-37 ; ᐂᓮᐊᓯ 36:1-22 ; 37:8-38 1 ᐱᑦᓯᐊᕐᓃᑦ ᑕᒪᒃᑯᐊ ᑭᖑᕐᖓᒍᑦ, ᐊᓯᕆᐊᑉ ᐊᖓᔪᖅᑳᕐᔪᐊᖓ ᓯᓇᑯᕆᑉ ᑎᑭᓐᓇᒥ ᓵᓚᖃᕐᐳᖅ ᔫᑕᒥᒃ, ᑕᖕᒫᕐᐳᕐᓗ ᓴᐴᓗᑕᓖᑦ ᐃᒡᓗᒐᓮᑦ ᓴᓂᐊᓄᑦ, ᐃᓱᒪᓪᓗᓂ ᓵᓚᒋᔪᒪᓪᓗᒋᑦ ᐃᒻᒥᓄᐃᓐᓇᖅ ᐱᑦᔪᑎᒋᓗᓂ. 2 ᕼᐃᓯᑬᐊᓕ ᑕᑯᒐᒥ ᓯᓇᑯᕆᐅᑉ ᑎᑭᓐᓂᖓᓂᒃ, ᐅᓇᑕᕈᒪᓂᖓᓂᒡᓗ ᔨᕉᓴᓕᒥᒃ, 3 ᐋᖅᑭᒃᓱᐃᖃᑎᖃᓕᕐᐳᖅ ᐊᖓᔪᖅᑳᖁᑎᒥᓂᒃ ᐊᔪᖏᑦᑐᕐᔪᐊᖁᑎᒥᓂᒡᓗ ᐃᒥᕐᒥᒃ ᓄᓇᒥᑦ ᑰᒃᑐᒥᒃ ᓄᖅᑲᕐᑎᑦᓯᔪᒪᓪᓗᑎᒃ ᐃᒡᓗᒐᓮᑦ ᓯᓚᑖᓃᑦᑐᒥᒃ; ᑖᒃᑯᐊᓗ ᐃᑲᔪᕐᐹᑦ. 4 ᑕᕝᕙ ᐃᓄᒋᐊᒃᑐᕐᔪᐊᑦ ᑲᑎᕗᑦ, ᓄᖅᑲᕐᑎᑦᓯᓚᐅᕐᐳᓪᓗ ᓄᓇᐅᑉ ᐃᓗᐊᓂᑦ ᑰᒃᑐᓂᒃ ᑰᖕᒥᒡᓗ ᓄᓇᓕᖕᓄᐊᖓᔪᒥᒃ, ᐅᖃᕐᓗᑎᒡᓗ, “ᓱᖕᒪ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᑎᑭᑦᑐᒃᓴᐅᕚ ᐃᒪᓕᐊᓗᖕᒧᐊᕐᓗᓂᓗ?” 5 ᐊᖓᔪᖅᑳᕐᔪᐊᑉ ᑕᕝᕙ ᓲᓐᖑᓯᑎᑦᓯᒋᐊᕐᓗᓂ ᐊᕙᓗᕐᔪᐊᒥ ᓯᖁᒥᓯᒪᔪᑦ ᓴᓇᒋᐊᕐᑕᐅᑎᑉᐰᑦ, ᓇᐸᔪᕐᔪᐊᒥᒡᓗ ᓇᑉᐰᕕᒋᓪᓗᒋᑦ, ᓯᓚᑖᒍᓪᓗ ᐊᕙᓗᕐᔪᐊᓕᐅᒃᑲᓐᓂᕐᐳᖅ; ᓲᖑᓯᑎᒋᐊᕐᐹᓗ ᒥᓗᒥᒃ ᐊᑎᓕᒃ ᓴᐴᓗᑕᖅ ᑍᕕᑎᐅᑉ ᐃᒡᓗᒐᓴᖏᓐᓃᑦᑐᖅ, ᓴᓇᑎᑦᓯᕗᕐᓗ ᐅᓇᑕᐅᑎᓂᒃ ᖃᓗᒋᐊᓂᒃ ᓴᐴᓗᑕᕐᓂᒡᓗ ᐅᓄᕐᑐᓂᒃ. 6 ᐅᓇᑕᕐᑐᒃᓴᓄᓪᓗ ᐊᖓᔪᖅᑳᓂᒃ ᐃᓄᖕᓄᑦ ᐊᖓᔪᖅᑳᖑᓂᐊᕐᑐᓂᒃ ᐋᖅᑭᒃᓱᐃᕗᖅ, ᑲᑎᑎᑉᐰᓪᓗ ᐃᒡᓗᒐᓮᑦ ᐃᑎᕐᑕᕐᕕᖓᑕ ᐱᕕᑐᓂᖓᓂ, ᑲᔪᖏᕐᓴᕐᓗᒋᓪᓗ ᐅᖃᐅᑎᕔᑦ, 7 “ᓲᖑᒋᑦᓯ ᓴᐱᖏᓪᓗᓯᓗ, ᑲᑉᐱᐊᓱᒃᑍᓕᒋᑦᓯ ᓴᓐᖐᓕᕐᓂᐊᕋᓯᓗ ᐊᓯᕆᐊᑉ ᐊᖓᔪᖅᑳᕐᔪᐊᖓᓂᒃ ᐃᓄᒋᐊᒃᑐᕐᔪᐊᓂᒡᓘᓐᓃᑦ ᐃᓚᒋᔭᖏᓐᓂᒃ; ᐊᔪᖏᓐᓂᕐᓴᕐᔪᐊᒥᒃ ᐃᓚᖃᕋᑦᑕ ᑖᑦᓱᒪᓐᖓᑦ. 8 ᐱᔪᓐᓇᐅᑎᖃᕐᒪᑦ ᑎᒥᒃᑯᑦ ᐅᓇᑕᕐᑎᓂᒃ; ᐅᕙᒍᓪᓕ ᐱᔪᓐᓇᐅᑎᖃᕐᐳᒍᑦ ᐊᑕᓂᕐᒥᒃ ᒎᑎᑦᑎᓐᓂᒃ, ᐃᑲᔪᕐᓂᐊᕐᑐᖅ ᐅᓇᑕᐅᑦᔨᓗᓂᓗ ᐅᕙᑦᑎᓐᓂᒃ.” ᐃᓄᐃᓪᓗ ᓴᐱᕈᓐᓃᕐᑎᑕᐅᕗᑦ ᕼᐃᓯᑬᐊᐅᑉ ᔫᑕᒥ ᐊᖓᔪᖅᑳᕐᔪᐊᑉ ᐅᖃᐅᓯᖏᓐᓄᑦ. 9 ᑕᒪᑐᒪ ᑭᖑᕐᖓᒍᑦ ᓯᓇᑯᕆᑉ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐅᓇᑕᕐᑎᓕᒫᖏᓪᓗ ᓚᑮᓯᒦᓪᓗᓂ ᐱᕖᕈᑎᓯᒪᓪᓗᒍ, ᑎᓕᓯᕗᖅ ᐱᔨᒥᓂᒃ ᐅᖃᕆᐊᕐᑐᖁᓪᓗᒍ ᔨᕉᓴᓕᒧᑦ ᕼᐃᓯᑬᐊᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, ᔫᑕᒥᐅᓕᒫᓄᑦ ᔨᕉᓴᓕᒦᑦᑐᓄᓪᓗ, ᐅᖃᕐᓗᓂ, 10 “ᐃᒫᒃ ᓯᓇᑯᕆᑉ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐅᖃᕐᐳᖅ: ‘ᓱᓇᒦᒃ ᑕᑎᖃᕐᐱᓯ, ᓱᒋᐊᓪᓚᕖᕈᑎᓯᒪᔪᓯ ᔨᕉᓴᓕᒥ? 11 ᕼᐃᓯᑬᐊᒧᑦ ᓯᓔᕐᕆᔭᐅᓯᒪᕕᓰ ᑐᖁᖁᓪᓗᓯ ᑳᖕᓂᕐᒧᑦ ᐃᒥᕈᖕᓂᕐᒧᓪᓗ, ᐅᖃᐅᑎᓪᓗᓂᓯ, “ᐊᑕᓂᐅᑉ ᒎᑎᑦᑕ ᓴᐳᑎᓂᐊᕐᐹᑎᒍᑦ ᐊᓯᕆᐊᑉ ᐊᖓᔪᖅᑳᕐᔪᐊᖓᓂᑦ”? 12 ᕼᐃᓯᑬᐊ ᑖᓐᓇᑦᓮᓐᓇᐅᓐᖏᓛᖅ ᑐᒃᓯᐊᕐᕕᖕᓂᒃ ᑐᓂᕐᕈᓯᕐᕕᖕᓂᒡᓗ ᐲᔧᓚᐅᕐᑐᖅ ᔫᑕᒥᐅᑉ ᔨᕉᓴᓕᒥᐅᓪᓗ ᑎᓕᓚᐅᕐᐰᑦ ᐅᖃᕐᓗᓂ, “ᑐᒃᓯᐊᕐᕕᖃᕐᑐᒃᓴᐅᕗᓯ ᐊᑕᐅᓯᕐᒥᒃ ᑐᓂᕐᕈᓯᕐᕕᖕᒥᒃ ᑕᕝᕙᓂᓗ ᐃᑯᐊᓪᓔᓗᓯ ᑐᓂᕐᕈᓯᖃᑦᑕᕐᓗᓯ”? 13 ᖃᐅᔨᒪᓐᖏᓚᓰ ᐅᕙᖓᓗ ᓯᕗᓕᒃᑲᓗ ᖃᓄᐃᓕᐅᓚᐅᕐᒪᖔᑕ ᐃᓄᖕᓄᑦ ᐊᓯᐊᓂ ᓄᓇᖃᕐᑐᓄᑦ? ᐃᓅᖃᑎᒌᒡᔪᐊᑦ ᒎᑎᖏᓐᓂᑦ ᐃᑲᔪᕐᑕᐅᓚᐅᐹᑦ ᓴᐳᑎᓪᓗᒋᓪᓗ ᐱᔪᓐᓇᕐᓂᓐᓂᑦ? 14 ᑭᓇᓕ ᑍᑲᓃᓚᐅᕐᐹ ᐃᓅᖃᑎᒌᒡᔪᐊᑦ ᒎᑎᖏᓐᓂ ᓯᕗᓕᒪ ᓯᕗᓕᖏᑕ ᓵᓚᒋᒻᒪᕆᓚᐅᕐᑕᖏᑦ ᓴᐳᑎᔭᐅᓚᐅᐹᑦ ᐊᑖᑕᒪ ᐊᒡᒐᖏᓐᓃᑦ, ᒎᑎᑦᓯᓗ ᓴᐳᑎᔪᓐᓇᕋᓗᐊᕐᐹᓰ ᐱᔪᓐᓇᕐᓂᓐᓂᑦ? 15 ᒫᓐᓇ ᑍᒤᒻᒪᑦ ᕼᐃᓯᑬᐊᒧᑦ ᓯᓔᕐᕆᔭᐅᑦᑍᓕᒋᑦᓯ ᒪᓕᒃᓴᕐᑎᑦᑍᓕᓛᓯᓗ ᑕᒪᑐᒧᖓ, ᐅᒃᐱᕆᑦᑍᓕᓯᐅᒃ, ᐃᓅᖃᑎᒌᒡᔪᐊᑦ ᒎᑎᖏᑕ ᓇᓪᓕᐊᓐᓄᑦ ᐊᑕᓂᐅᕖᓪᓘᓐᓃᑦ ᓴᐳᑎᔭᐅᔪᖃᓚᐅᕐᓯᒪᖏᒻᒪᑕ ᐱᔪᓐᓇᕐᓂᓐᓂᑦ ᐅᕝᕙᓗ ᐊᑖᑕᒪ ᐱᔪᓐᓇᕐᓂᖓᓂᑦ. ᖃᓄᕐᓕ ᓴᐳᑎᔭᐅᓂᕐᓴᐅᔪᓐᓇᕐᐱᓰ ᒎᑎᑦᓯᓐᓄᑦ ᐱᔪᓐᓇᕐᓂᓐᓃᑦ?’” 16 ᐱᔨᖏᓪᓗ ᐅᖃᕐᓂᕐᓘᑎᖃᕆᐊᓪᓚᒃᐳᑦ ᐊᑕᓂᕐᒥᒃ ᒎᑎᒥᒃ ᐱᔨᖓᓂᒡᓗ ᕼᐃᓯᑬᐊᒥᒃ. 17 ᐊᖓᔪᖅᑳᕐᔪᐊᕐᓗ ᑎᑎᕋᓚᐅᕐᐳᖅ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᒥᑕᐅᑎᒋᓪᓗᒍ, ᐅᖃᕐᓂᕐᓘᑎᒋᕚᓗ, ᐅᖃᕐᓗᓂ, “ᐃᓅᖃᑎᒌᒡᔪᐊᑦ ᒎᑎᒥᖕᓄᑦ ᐃᓄᖏᑦ ᓴᐳᑎᔭᐅᓚᐅᖏᒻᒪᑕ ᐱᔪᓐᓇᕐᓂᓐᓂᑦ, ᑍᒫᒃᑕᐅᖅ ᕼᐃᓯᑬᐊᐅᑉ ᒎᑎᖓᑕ ᐃᓄᖁᑎᓂ ᓴᐳᑎᔪᓐᓇᕐᓂᐊᓐᖏᓔᑦ ᐱᔪᓐᓇᕐᓂᓐᓂᑦ.” 18 ᑖᒃᑯᐊᓗ ᕾᒐᓛᕐᓗᑎᒃ ᓂᓪᓕᕐᐳᑦ ᓂᐱᖅᑯᕐᑐᓪᓗᑎᒃ ᔫᑕᒥᐅᑎᑐᑦ ᔨᕉᓴᓕᒥᐅᑦ ᐃᓄᖏᓐᓄᑦ ᐊᕙᓗᕐᔪᐊᑉ ᑭᒡᓕᖓᓃᑦᑐᓄᑦ, ᑲᑉᐱᐊᓱᒃᑎᑦᓱᒪᓪᓗᒋᑦ ᐱᕖᕈᑎᔪᒪᓪᓗᒋᓪᓗ, ᐃᒡᓗᒐᓴᖓᑦ ᓵᓚᒋᓗᒍ ᐱᔪᒪᓪᓗᒍ. 19 ᔨᕉᓴᓕᒥᐅᓪᓗ ᒎᑎᖓᑦ ᐅᖃᕐᓂᕐᓘᑎᒋᕚᑦ, ᐊᑭᕋᕐᑐᓚᐅᕐᓂᕐᒥᒃᑎᑐᑦ ᐃᓄᐃᑦ ᓄᓇᒦᑦᑐᑦ ᒎᑎᖏᓐᓂᒃ, ᐃᓄᐃᑦ ᐊᒡᒐᖏᓐᓄᑦ ᓴᓇᐅᔭᐅᓯᒪᔪᓂᒃ. 20 ᑕᒪᓐᓇ ᐱᓪᓗᒍ ᐊᖓᔪᖅᑳᕐᔪᐊᖅ ᕼᐃᓯᑬᐊ ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖓ ᐂᓮᐊᓯ ᐂᒨᓯᐅᑉ ᐃᕐᓂᖓ, ᑐᒃᓯᐊᓕᕐᐴᒃ ᐃᓗᖏᕐᓱᕐᓗᑎᒃ ᕿᓚᖕᒧᑦ. 21 ᐊᑕᓂᕐᓗ ᑎᓕᓯᕗᖅ ᐂᖏᓕᒥᒃ, ᑖᑦᓱᒪ ᑐᖁᑉᐰᑦ ᐊᖑᑎᓕᒫᑦ ᓯᕘᕋᖏᑦᑐᑦ ᐊᖓᔪᖅᑳᖏᓪᓗ, ᐊᖓᔪᖅᑳᐅᔪᓪᓗ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᑕᖕᒫᕐᓯᒪᕕᖓᓃᑦᑐᑦ. ᑍᒤᒻᒪ ᓇᖕᒥᓂᖅ ᓄᓇᒥᓄᑦ ᐅᑎᕐᐳᖅ ᑲᓐᖑᓱᒡᓗᓂ. ᒎᑎᖓᑕᓗ ᑐᒃᓯᐊᕐᕕᖁᑎᖓᓄᐊᕋᒥ, ᓇᖕᒥᓂᖏᑕ ᐃᕐᓂᖏᑕ ᑐᖁᑉᐹᑦ ᓴᕕᒡᔪᐊᒧᑦ ᑕᕝᕙᓂ ᓇᔪᕐᑕᖓᓂ. 22 ᐊᑕᓂᐅᓪᓗ ᕼᐃᓯᑬᐊ ᔨᕉᓴᓕᒥᓗ ᓄᓇᖃᕐᑐᑦ ᐱᐅᓕᕔᑦ ᓯᓇᑯᕆᑉᒥᑦ ᐊᓯᕆᐊᑉ ᐊᖓᔪᖅᑳᕐᔪᐊᖓᓂᑦ, ᐊᑭᕋᓕᒫᖏᑕᓗ ᐱᔪᓐᓇᕐᓂᖏᓐᓂᑦ; ᐊᕙᑎᒥᐅᑕᖏᓐᓂᓪᓗ ᐅᓇᑕᕐᑕᐅᑎᓚᐅᓐᖏᓔᑦ. 23 ᐅᓄᕐᑐᕐᔪᐊᓪᓗ ᑐᓂᓯᕗᑦ ᐊᑕᓂᕐᒧᑦ ᔨᕉᓴᓕᒥ ᐱᐅᔪᒻᒪᕆᖕᓂᒡᓗ ᑐᓂᓯᕗᑦ ᕼᐃᓯᑬᐊᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, ᑕᒪᑐᒪᖓᑦ ᐱᒋᐊᕐᓗᓂ ᑭᖑᕐᖓᒍᑦ ᐃᓅᖃᑎᒌᒡᔪᐊᓕᒫᑦ ᐅᐱᒋᓪᓗᒍ ᐊᖏᒡᓕᑎᓕᓚᐅᕐᐹᑦ. ᕼᐃᓯᑬᐊᑉ ᖃᓂᒻᒪᖕᓂᖓ ᐱᐅᔪᕆᓂᖓᓗ ᐊᑕᓃᑦ ᐂᑉᐸᖏᑦ 20:1-3 , 12-19 ; ᐂᓮᐊᓯ 38:1-3 ; 39:1-8 24 ᑍᑦᓱᒪᓂᐅᑎᓪᓗᒍ ᐅᓪᓗᓂ ᕼᐃᓯᑬᐊ ᖃᓂᒻᒪᒃᐳᖅ ᑐᖁᓕᒑᓕᕐᓗᓂᓗ, ᐊᑕᓂᕐᒧᓪᓗ ᑐᒃᓯᐊᕐᐳᖅ; ᑖᑦᓱᒪᓗ ᑭᐅᕚ ᑕᑯᑎᓪᓗᒍᓗ ᓇᓗᓁᒃᑯᑕᒃᓴᒥᒃ. 25 ᕼᐃᓯᑬᐊᓕ ᖃᕿᐊᓕᓚᐅᓐᖏᓚᖅ ᑍᒫᑎᒋ ᐱᑦᓯᐊᕐᕕᐅᒐᓗᐊᕋᒥ, ᐆᒻᒪᑎᖓ ᐱᐅᔪᕆᓕᓚᐅᕐᒪᑦ. ᑍᒤᒻᒪᑦ ᓂᓐᖓᐅᓯᕐᒧᑦ ᑎᑭᑕᐅᓚᐅᕐᐳᖅ ᔫᑕᓗ ᔨᕉᓴᓕᓗ ᐱᖃᓯᐅᑎᓪᓗᒋᒃ. 26 ᕼᐃᓯᑬᐊᓕ ᐃᒻᒥᓂᒃ ᒥᑭᒡᓕᑎᓕᓚᐅᕐᐳᖅ ᐆᒻᒪᑎᒥᒍᑦ ᐱᐅᔪᕆᓂᕐᒥᓂᑦ, ᔨᕉᓴᓕᒥᓗ ᓄᓇᖃᕐᑐᓕᒫᑦ, ᑍᒤᒻᒪᑦ ᐊᑕᓂᐅᑉ ᓂᓐᖓᐅᓯᖓ ᑖᒃᑯᓄᖓ ᑎᑭᓚᐅᓐᖏᓚᖅ ᕼᐃᓯᑬᐊ ᐃᓅᑎᓪᓗᒍ. ᕼᐃᓯᑬᐊᐅᑉ ᐊᔪᕐᓴᖏᑦᑐᕐᔪᐊᓐᖑᕐᓂᖓ 27 ᕼᐃᓯᑬᐊ ᐊᒃᓱᐃᑦᑐᕐᔪᐊᓐᖑᓚᐅᕐᐳᖅ ᐃᓄᖕᓄᓪᓗ ᐅᐱᒋᔭᐅᓪᓗᓂ; ᐃᒻᒥᓄᓪᓗ ᑮᓇᐅᔭᒃᑯᕕᓕᐅᓚᐅᕐᐳᖅ ᐃᓂᒃᓴᐅᖁᓪᓗᒋᑦ ᓯᐅᓪᕕᕆᓄᑦ, ᒎᓗᓄᑦ, ᑕᑯᒥᓇᕐᑐᓄᓪᓗ ᐅᔭᕋᖕᓄᑦ, ᒪᒪᕐᓴᐅᑎᓄᑦ ᑎᐱᑦᓯᐊᕆᒃᑐᓄᑦ, ᓴᐴᓗᑕᕐᓄᑦ, ᐊᓯᓕᒫᖏᓐᓄᓪᓗ ᐱᔪᒥᓇᕐᑐᓄᑦ; 28 ᓯᕐᓗᐊᓕᐅᓚᐅᕆᕗᖅ ᓂᐊᖂᔭᒃᓴᓄᑦ ᑲᑎᕐᓱᕐᑕᐅᓯᒪᔪᓄᑦ, ᕔᓂᓄᑦ, ᐅᕐᓱᓄᓪᓗ; ᐆᒪᔪᖃᐅᑎᓂᒡᓗ ᐆᒪᔪᓕᒫᓄᑦ, ᓰᐱᓄᓪᓗ ᓮᒍᓕᐅᓚᐅᕆᕗᖅ. 29 ᐃᒡᓗᒐᓴᓕᐅᓚᐅᕆᕗᖅ ᐃᒻᒥᓄᑦ, ᐅᓄᕐᑐᕐᔪᐊᓂᒃ ᐆᒪᔪᖁᑎᖃᕋᒥ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ; ᒎᑎᐅᑉ ᑐᓂᓯᕕᒋᓚᐅᕐᒪᒍ ᐊᔪᕐᓴᖏᑦᔪᑎᒃᓴᕐᔪᐊᓂᒃ. 30 ᑖᓐᓇᑦᓮᓐᓇᖅ ᕼᐃᓯᑬᐊ ᓄᖅᑲᕐᑎᑦᓯᓚᐅᕆᕗᖅ ᐃᒥᐅᑉ ᐊᖅᑯᑖᓂᒃ ᒋᕼᐅᓂᒥᑦ ᖁᑦᑎᖕᓂᕐᓴᒥᑦ ᐱᔪᒥᒃ, ᐃᒥᕐᓗ ᐃᑎᕐᓴᒃᑯᑦ ᑍᕕᑎᐅᑉ ᐃᒡᓗᒐᓴᖓᓄᑦ ᐱᑎᑉᐹ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒃᑯᑦ. ᕼᐃᓯᑬᐊᓗ ᐱᓂᐊᕐᓂᕐᒥᒍᑦ ᑕᒤᑎᒍᑦ ᐱᕙᓪᓕᐊᓂᖃᑦᓯᐊᓚᐅᕐᐳᖅ. 31 ᐹᐱᓘᓂᐅᓪᓕ ᐊᖓᔪᖅᑳᕐᔪᐊᖓᑕ ᐃᕐᓂᖏᑦ ᑎᑭᒻᒪᑕ, ᑖᑦᓱᒪ ᑎᓕᔭᖏᑦ ᖃᐅᔨᒋᐊᖁᓪᓗᒋᑦ ᑲᒪᓇᕐᑐᓂᒃ ᓄᓇᖓᓂ ᐱᓂᐊᕐᓂᐅᓯᒪᔪᓂᒃ, ᒎᑎᐅᑉ ᕿᒪᓚᐅᕐᐹ, ᖃᐅᔨᓴᕈᒪᓪᓗᒍ, ᖃᐅᔨᔪᒪᓪᓗᓂ ᐆᒻᒪᑎᒥᐅᑕᓕᒫᖓᓂᒃ. ᕼᐃᓯᑬᐊᐅᑉ ᑐᖁᓂᖓ ᐊᑕᓃᑦ ᐂᑉᐸᖏᑦ 20:20-21 32 ᕼᐃᓯᑬᐊᐅᓪᓕ ᐱᓂᐊᕐᓂᕆᓯᒪᔭᖏᑕ ᐃᓚᖏᑦ, ᐱᓂᐊᑦᓯᐊᕐᓂᖏᓪᓗ, ᑎᑎᕋᕐᓯᒪᕗᑦ ᐂᓮᐊᓯᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᒨᓯᐅᑉ ᐃᕐᓂᖓᑕ ᑕᑯᑎᑕᐅᓂᖏᓐᓂ, ᔫᑕᐅᓪᓗ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᑕ ᑎᑎᕋᕐᑕᐅᓯᒪᔪᖁᑎᖏᓐᓂ. 33 ᕼᐃᓯᑬᐊᓗ ᑕᕾᕐᓯᓕᕐᐳᖅ ᓯᕗᓕᖏᑕ ᐃᓂᖏᓐᓂ, ᐃᓗᕕᕐᐹᓪᓗ ᐃᓗᕕᕐᓂ ᖁᑦᑎᖕᓂᕐᓴᓂ ᑍᕕᑎᐅᑉ ᐃᕐᓂᖏᑕ ᐃᓂᖏᓐᓂ; ᔫᑕᒥ ᔨᕉᓴᓕᒥᓗ ᓄᓇᖃᕐᑐᓕᒫᑦ ᐅᐱᓐᓇᕐᑎᓚᐅᕐᐹᑦ ᑐᖁᑎᓪᓗᒍ. ᐃᕐᓂᖓᓗ ᒫᓇᓯ ᐊᖓᔪᖅᑳᓐᖑᓚᐅᕐᐳᖅ ᑖᑦᓱᒥᖓ ᐃᓇᖐᓪᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society