ᑯᕉᓂᑲ ᐂᑉᐸᖏᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐃᓯᑬᐊᐅᑉ ᐋᖅᑮᒋᐊᕐᓂᖓ ᐅᒃᐱᕐᓂᒃᑯᑦ ᐃᓅᓯᕆᔭᐅᔪᓂᒃ

¹ ᑕᒪᒃᑯᐊᓕᒫᑦ ᐱᔭᕇᕐᒪᑕ, ᐃᓴᕆᐊᓕᒥᐅᓕᒫᑦ ᑍᑲᓃᓚᐅᕐᑐᑦ ᐂᕗᑦ ᔫᑕᐅᑉ ᐃᒡᓗᒐᓴᖏᓐᓄᑦ ᓇᐸᔪᐃᓪᓗ ᒎᑎᓐᖑᐊᑦ ᓯᖁᑦᑎᕐᐰᑦ ᕿᔪᐃᓪᓗ ᓴᓇᓐᖑᐊᕐᓯᒪᔪᑦ ᒎᑎᓐᖑᐊᑦ ᐊᓯᕅᑦ ᓇᑲᑎᕐᐰᑦ ᐃᒋᓪᓗᒋᓪᓗ ᑐᓂᕐᕈᓯᕐᕕᖁᑎᖏᑦ ᔫᑕᒦᑦᑐᑦ ᐱᓐᔭᒥᓂᒦᑦᑐᓪᓗ, ᐃᕗᕅᑎᒦᑦᑐᓪᓗ ᒫᓇᓯᒦᑦᑐᓪᓗ, ᐊᑕᖏᕐᓗᒋᑦ ᓯᖁᑦᑎᕐᐰᑦ. ᐃᓴᕆᐊᓕᒥᐅᓪᓗ ᐃᒡᓗᒐᓴᖕᒥᓄᑦ ᐅᑎᕐᐳᑦ, ᐊᑐᓂᑦ ᓄᓇᒥᖕᓄᐊᕐᓗᑎᒃ.

² ᕼᐃᓯᑬᐊᐅᓪᓗ ᑐᓂᕐᕈᓯᕐᑎᑦᓯᔩᑦ ᑎᓕᕔᑦ ᐊᕕᒃᑐᕐᓯᒪᔪᑦ ᓕᕔᑎᓪᓗ ᐊᒡᒍᕐᓯᒪᓂᖏᑦ ᒪᓕᒡᓗᒋᑦ, ᐃᓘᓐᓇᑎᒃ ᐱᓕᕆᐊᕆᔭᕆᐊᖃᕐᑕᖏᑦ ᒪᓕᒡᓗᒋᑦ, ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ, ᐃᑯᐊᓪᓚᒋᐊᓕᖕᓄᑦ ᓮᒻᒪᕐᑎᑕᐅᓂᕐᒧᓪᓗ ᑐᓂᕐᕈᑎᓂᒃ ᐱᔨᑦᓯᖁᓪᓗᒋᑦ, ᖁᔭᓕᖁᓪᓗᒋᑦ ᓂᕐᑐᐃᖁᓪᓗᒋᓪᓗ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖏᓐᓂ.

³ ᐊᖓᔪᖅᑳᕐᔪᐊᕐᓗ ᑐᓂᓯᕗᖅ ᐱᖁᑎᒥᑕ ᐃᓚᖏᓐᓂᒃ ᐃᑯᐊᓪᓚᒋᐊᓕᖕᓄᑦ ᑐᓂᕐᕈᑎᒃᓴᐅᖁᓪᓗᒋᑦ: ᐅᓪᓛᒧᑦ ᐅᓐᓄᖕᒧᓪᓗ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᒃᓴᓂᒃ, ᑐᓂᕐᕈᑎᒃᓮᓪᓗ ᐃᑯᐊᓚᑎᑕᒃᓮᑦ ᓴᐸᑎᒧᑦ, ᑕᖅᑭᓂᕋᑖᕐᑐᒧᓪᓗ, ᓇᓪᓕᐅᓐᓂᕐᓯᐅᕐᓂᕐᓄᓪᓗ ᓇᓗᓁᕐᑕᐅᓯᒪᔪᓄᑦ, ᑎᑎᕋᕐᑕᐅᓯᒪᔪᑦ ᐊᑕᓂᐅᑉ ᐱᖁᔭᖏᓐᓂ ᒪᓕᒡᓗᒋᑦ.

⁴ ᑎᓕᓯᒋᕗᕐᓗ ᔨᕉᓴᓕᒥ ᓄᓇᖃᕐᑐᑦ ᐃᑲᔪᖃᑦᑕᖁᓪᓗᒋᑦ ᑐᓂᕐᕈᓯᕐᓗᑎᒃ ᑐᓂᕐᕈᓯᕐᑎᑦᓯᔨᓄᑦ ᓕᕔᑎᓄᓪᓗ ᐱᔭᐅᔪᒃᓴᓂᒃ, ᑖᒃᑯᐊ ᐃᒻᒥᖕᓂᒃ ᑐᓂᓯᒪᔪᓐᓇᖁᓪᓗᒋᑦ ᐊᑕᓂᐅᑉ ᐱᖁᔭᖏᓐᓄᑦ.

⁵ ᐱᖁᔭᕐᓗ ᑕᒪᓐᓇ ᑐᓂᔭᐅᖕᒪᑦ, ᐃᓴᕆᐊᓕᒥᐅᑦ ᑐᓂᓯᕗᑦ ᐅᓄᕐᑐᕐᔪᐊᓂᒃ ᓂᐊᖂᔭᒃᓴᓂᒃ ᐱᕈᕆᐊᕐᖓᕐᑐᕕᓂᕐᓂᒃ, ᕔᓂᓂᒡᓗ, ᐅᕐᓱᓂᒃ, ᐃᒍᑦᓴᐅᔮᕐᑐᓪᓗ ᓰᕐᓇᐅᑎᖏᓐᓂᒃ, ᐱᕈᕐᓰᕕᖕᓂᓗ ᐱᕈᕐᑐᕕᓂᓕᒫᓂᒃ; ᑐᓂᓯᕗᓪᓗ ᐅᓄᕐᑐᕐᔪᐊᓂᒃ ᑕᓪᓕᒪᐅᔪᐃᕈᑎᒥᖕᓂᒃ.

⁶ ᐃᓴᕆᐊᓕᒥᐅᑦ ᔫᑕᒥᐅᓪᓗ ᐃᓄᖏᑦ ᓄᓇᖃᕐᑐᑦ ᔫᑕᐅᑉ ᐃᒡᓗᒐᓴᖏᓐᓂ ᑐᓂᓯᓚᐅᕆᕗᑦ ᑕᓪᓕᒪᐅᔪᐃᕈᑎᒥᖕᓂᒃ ᐃᒻᒧᒃᓯᐅᒐᕐᓂᒃ ᓰᐱᓂᒡᓗ, ᐃᑦᔪᕐᓁᑎᑕᐅᓯᒪᔪᓂᒡᓗ ᑕᓪᓕᒪᐅᔪᐃᕐᐳᑦ ᐊᑕᓂᕐᒧᑦ ᒎᑎᒥᖕᓄᑦ, ᐃᓕᓪᓗᒋᓪᓗ ᖃᓕᕇᒃᓯᑎᓪᓗᒋᑦ ᓄᐊᑉᐰᑦ.

⁷ ᑕᖅᑭᐅᑉ ᐱᖓᔪᐊᓐᓂ ᐃᓕᐅᖅᑬᓪᓚᕆᓕᓚᐅᕐᐳᑦ ᖃᓕᕇᓕᕐᑎᓪᓗᒋᑦ, ᑕᖅᑭᐅᓪᓗ 7ᖓᓐᓂ ᐱᔭᕇᓚᐅᕐᐳᑦ.

⁸ ᕼᐃᓯᑬᐊᓕ ᐊᖓᔪᖅᑳᓪᓗ ᑕᕝᕗᓐᖓᕋᒥᒃ ᑕᑯᒐᒥᒡᓗ ᖃᓕᕇᒃᓯᓯᒪᔪᓂᒃ, ᐊᑕᓂᖅ ᓂᕐᑐᕐᐹᑦ ᐃᓄᖁᑎᖏᓪᓗ ᐃᓴᕆᐊᓕᒥᐅᑦ.

⁹ ᕼᐃᓯᑬᐊᐅᓪᓗ ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᐊᐱᕆᕔᑦ ᑖᒃᑯᐊ ᖃᓕᕇᒃᓯᓯᒪᔪᑦ ᐱᓪᓗᒋᑦ.

¹⁰ ᐊᔭᕅᐊ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ, ᔭᑑᒃᑯᑦ ᐃᓚᖏᓐᓂᑦ ᐱᓯᒪᔫᑉ ᑭᐅᕚ ᐅᖃᕐᓗᓂᓗ, “ᐃᓄᐃᑦ ᑐᓂᓯᖃᑦᑕᓕᕐᑎᓪᓗᒋᑦ ᑐᓂᕐᕈᑎᒃᓴᓂᒃ ᐊᑕᓂᐅᑉ ᐃᒡᓗᖓᓄᑦ ᓂᕆᖃᑦᑕᓕᓚᐅᕐᐳᒍᑦ ᐊᒥᐊᒃᑯᔪᐊᓘᓪᓗᑕᓗ; ᐊᑕᓂᐅᑉ ᐃᓄᖁᑎᓂ ᓮᒻᒪᕐᑎᓚᐅᕐᒪᒋᑦ, ᐊᒥᐊᒃᑯᖏᑦ ᑕᕝᕙ ᖃᓕᕇᒃᑐᑦ ᐅᓄᕐᑐᕐᔪᐊᖑᕗᑦ.”

¹¹ ᕼᐃᓯᑬᐊᐅᓪᓗ ᑎᓕᕔᑦ ᓯᕐᓗᐊᓕᐅᖁᓪᓗᒋᑦ ᐊᑕᓂᐅᑉ ᐃᒡᓗᖓᓂ; ᑕᕝᕙ ᐊᑐᐃᓐᓇᕈᐃᓕᓚᐅᕐᐳᑦ.

¹² ᑲᔪᓯᑦᓯᐊᕐᓗᑎᒡᓗ ᑕᕝᕗᓐᖓᐅᑦᔨᖃᑦᑕᓕᓚᐅᕐᐳᑦ ᑐᓂᕐᕈᑎᓂᒃ, ᑕᓪᓕᒪᐅᔪᐃᕈᑕᐅᔪᓂᒃ ᐃᑦᔪᕐᓁᑎᑕᐅᓯᒪᔪᓂᒡᓗ. ᑖᒃᑯᓄᖓ ᐊᖓᔪᖅᑳᓐᖑᕐᑎᑕᐅᓚᐅᕐᐳᖅ ᑯᓇᓁᐊ ᓕᕔᑎᑯᓐᓂᑦ ᐱᓯᒪᔪᖅ, ᖃᑕᓐᖑᑎᖓᓗ ᓯᒥᐂ ᐃᑲᔪᕐᑎᒋᕚ ᑐᖓᓕᕆᓪᓗᓂᐅᒃ.

¹³ ᐅᑯᓂᖓ ᐃᑲᔪᕐᑎᖃᕐᓗᑎᒃ ᔨᕼᐃᐅᓪ, ᐊᔭᔧᐊ, ᓇᕼᐊᑎ, ᐊᓴᕼᐃᐅᓪ, ᔨᕆᒪᑎ, ᔫᓴᐸᑦ, ᐃᓔᐅᓪ, ᐃᔅᒪᑬᐊ, ᒪᕼᐊᑕ, ᐱᓁᐊᓗ ᐊᐅᓚᑦᓯᔨᐅᓚᐅᕐᐳᑦ ᐃᑲᔪᕐᑎᐅᓪᓗᑎᒃ ᑯᓇᓁᐊᒧᑦ ᖃᑕᓐᖑᑎᖓᓄᓪᓗ ᓯᒥᐂᒧᑦ, ᕼᐃᓯᑬᐊᑉ ᐊᖓᔪᖅᑳᕐᔪᐊᑉ ᑎᓕᓚᐅᕐᑕᖏᖕᓄᑦ ᐊᔭᕅᐊᐅᓪᓗ ᒎᑎᐅᑉ ᐃᒡᓗᖓᓂ ᐊᖓᔪᖅᑳᑉ.

¹⁴ ᑯᕆᓗ ᐃᒻᓇᐅᑉ ᐃᕐᓂᖓ ᓕᕔᑎ, ᐃᑎᕐᑕᕐᕕᖕᒥᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ ᑲᒪᔨᐅᔪᖅ, ᑖᓐᓇ ᑲᒪᔨᐅᕗᖅ ᑐᓂᕐᕈᓯᕈᒪᑐᐃᓐᓇᕐᓂᕐᒧᑦ ᑐᓂᕐᕈᑎᐅᔪᓂᒃ ᒎᑎᒧᑦ, ᑐᓂᓯᔨᐅᖁᓪᓗᒍ ᑐᓂᕐᕈᑎᓂᒃ ᐃᑦᔪᕐᓁᓐᓂᕐᐹᓂᒃ ᐊᑕᓂᕐᒧᑦ.

¹⁵ ᐃᑲᔪᕐᑎᖏᑦ ᐅᑯᐊᖑᕗᑦ ᐄᑕᓐ, ᒥᓂᐊᒥᓐ, ᔩᓱᐊ, ᓯᒤᐊ, ᐊᒪᕅᐊ, ᓯᑲᓁᐊᓗ, ᑖᒃᑯᐊ ᑲᔪᓯᑦᓯᐊᕐᓗᑎᒃ ᐃᑲᔪᖃᑦᓚᐅᕐᐳᑦ ᑐᓂᕐᕈᓯᕐᑎᑦᓯᔨᓂᒃ ᐃᒡᓗᒐᓴᖕᓃᑦᑐᓂᒃ, ᐂᑦᑐᐃᔨᐅᖁᓪᓗᒋᑦ ᖃᑕᓐᖑᑎᖏᑕ ᐱᒃᓴᖏᓐᓂᒃ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ, ᐊᖓᔪᒃᓯᓄᑦ ᓄᑲᕐᓯᓄᓪᓗ.

¹⁶ ᐊᖑᑏᑦ ᐊᕐᕌᒍᓖᑦ ᐱᖓᓱᓂᒃ ᐅᖓᑖᓄᓪᓗ ᑎᑎᕋᕐᓯᒪᔪᑦ ᐃᓚᒌᖕᓂᖏᑦ ᒪᓕᒡᓗᒋᑦ, ᐊᑕᓂᐅᑉ ᐃᒡᓗᖓᓄᑦ ᐃᑎᕐᑐᓕᒫᑦ ᖃᐅᑕᒫᑦ ᐱᓇᓱᐊᕈᑕᐅᔭᕆᐊᓖᑦ, ᐱᓇᓱᐊᕐᕕᐅᖃᑦᑕᓚᐅᕐᐳᑦ ᐱᓇᓱᐊᕆᐊᓖᑦ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ.

¹⁷ ᑐᓂᕐᕈᓯᕐᑎᑦᓯᔩᓪᓗ ᐱᓕᕆᐊᒃᓴᖃᕐᑎᑕᐅᓚᐅᕐᐳᑦ ᑎᑎᕋᕐᑕᐅᓯᒪᓂᖏᑦ ᓯᕗᓕᖏᑕ ᐃᓚᒌᖕᓂᖏᑦ ᒪᓕᒡᓗᒋᑦ; ᓕᕔᑏᓪᓗ ᐊᕐᕌᒍᓖᑦ 20ᒥᑦ ᐅᖓᑖᓄᑦ ᐱᓇᓱᐊᕆᐊᖃᕐᓂᖏᑦ ᒪᓕᒡᓗᒋᑦ, ᐊᕕᒃᑐᕐᓯᒪᓂᖏᑎᒍᑦ.

¹⁸ ᑐᓂᕐᕈᓯᕐᑎᑦᓯᔩᑦ ᑎᑎᕋᕐᑕᐅᓯᒪᓚᐅᕐᐳᑦ ᐃᓚᒌᖕᓂᖏᑦ ᒪᓕᒡᓗᒋᑦ ᕿᑐᕐᖓᖏᑦ, ᓄᓕᐊᖏᓪᓗ, ᐃᕐᓂᖏᑦ, ᐸᓂᖏᓪᓗ, ᐃᓚᓕᒫᖏᓪᓗ; ᑖᒃᑯᐊᓗ ᑲᔪᓯᑦᓯᐊᕐᓗᑎᒃ ᐃᒻᒥᖕᓂᒃ ᐃᑦᔪᕐᓁᓕᑎᓯᒪᑦᓯᐊᓚᐅᕐᐳᑦ.

¹⁹ ᐂᕉᓂᐅᓪᓗ ᐃᕐᓂᖏᑦ ᑐᓂᕐᕈᓯᕐᑎᑦᓯᔩᑦ, ᐱᕈᕐᓰᕕᖁᑎᖃᓚᐅᕐᐳᑦ ᐃᒡᓗᒐᓴᖁᑎᒥᖕᓂ, ᐃᒡᓗᒐᓴᓕᒫᓂ ᐊᖑᑏᑦ ᑎᓕᔭᐅᓯᒪᓚᐅᕐᐳᑦ ᐊᑎᖏᑦ ᒪᓕᒡᓗᒋᑦ ᐂᑦᑐᕐᑐᐃᔨᐅᖁᓪᓗᒋᑦ ᐊᖑᑎᓕᒫᓄᑦ ᑐᓂᕐᕈᓯᕐᑎᑦᓯᔨᓄᑦ ᓕᕔᑎᓄᓪᓗ ᐃᓚᒌᖕᓂᖏᑕ ᑎᑎᕋᕐᑕᐅᓯᒪᓂᖏᑦ ᒪᓕᒡᓗᒋᑦ.

²⁰ ᕼᐃᓯᑬᐊ ᑍᒫᒃ ᐱᓇᓱᐊᓚᐅᕐᐳᖅ ᔫᑕᓕᒫᒥ; ᐱᐅᔪᒥᒃ ᓈᒻᒪᒃᑐᒥᒡᓗ ᑲᔪᓯᑦᓯᐊᕐᓗᓂ ᐱᓇᓱᐊᓚᐅᕐᐳᖅ ᐊᑕᓂᐅᑉ ᒎᑎᖓᑕ ᑕᑯᓐᓇᕐᑕᖓᒍᑦ.

²¹ ᐱᓇᓱᐊᕐᑕᓕᒫᒥᓂ ᐱᓇᓱᐊᕐᑎᓪᓗᒍ ᒎᑎᐅᑉ ᐃᒡᓗᖓᓂ ᐱᓇᓱᐊᕐᑕᐅᔭᕆᐊᓕᖕᓂᒃ ᐱᖁᔭᓂᓗ, ᒎᑎᒥᓂᒃ ᖃᐅᔨᒋᐊᑦᓯᐊᖃᑦᑕᓚᐅᕐᐳᖅ, ᐱᓇᓱᐊᓚᐅᕐᐳᕐᓗ ᐆᒻᒪᑎᒥᒍᑦ ᑐᓂᓯᒪᓪᓚᕆᒃᓗᓂ, ᑍᒤᒻᒪᑦ ᐱᕙᓪᓕᐊᓂᖃᑦᓯᐊᓚᐅᕐᐳᖅ.