ᑯᕉᓂᑲ ᐂᑉᐸᖏᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦᐅᐸᓗᖎᔭᕐᓂᖅ ᖄᖏᕐᑕᐅᕕᖕᒧᑦ 1 ᕼᐃᓯᑬᐊᓗ ᑎᓕᓯᕗᖅ ᐃᓴᕆᐊᓕᒥᐅᓕᒫᓄᑦ ᔫᑕᒥᐅᓕᒫᓄᓪᓗ, ᑎᑎᕋᕐᓗᓂᓗ ᐃᕗᕅᑎᒥᐅᓄᑦ ᒫᓇᓯᒃᑯᓐᓄᓪᓗ, ᕾᖁᓪᓗᒋᑦ ᐊᑕᓂᐅᑉ ᐃᒡᓗᖓᓄᑦ ᔨᕉᓴᓕᒧᑦ, ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᖁᓪᓗᒋᑦ ᐊᑕᓂᕐᒧᑦ ᐃᓴᕆᐊᓕᒥᐅᑦ ᒎᑎᖓᓄᑦ. 2 ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᖏᓪᓗ ᐃᓄᓕᒫᓪᓗ ᔨᕉᓴᓕᒥ ᐊᖏᖃᑎᒌᓚᐅᕐᒪᑕ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᒪᓪᓗᑎᒃ ᑕᖅᑭᐅᑉ ᐂᑉᐸᖓᓂ. 3 ᑍᑦᓱᒪᓂᐅᑎᓪᓗᒍ ᓇᓪᓕᐅᓐᓂᖓᓂ ᑲᔪᓯᔪᓐᓇᓚᐅᖏᒻᒪᑕ ᑐᓂᕐᕈᓯᕐᑎᑦᓯᔩᑦ ᐅᓄᕐᑐᑦ ᐃᒻᒥᖕᓂᒃ ᐃᑦᔪᕐᓁᓕᑎᓯᒪᓚᐅᖏᒻᒪᑕ, ᐃᓄᐃᓪᓗ ᑲᑎᓯᒪᓚᐅᖏᒻᒪᑕ ᔨᕉᓴᓕᒥ. 4 ᑕᒪᓐᓇᓗ ᐸᕐᓁᕐᑕᐅᔪᖅ ᐊᖓᔪᖅᑳᕐᔪᐊᕐᒧᑦ ᐃᓄᓕᒫᓄᓪᓗ ᑲᑎᒪᔪᓄᑦ ᓈᒻᒪᓈᕋᓱᒋᔭᐅᓚᐅᕐᐳᖅ. 5 ᑕᕝᕙ ᑎᑎᕋᓚᐅᕐᐳᑦ ᓇᓗᓁᕐᓯᑦᔪᑎᓂᒃ ᐃᓴᕆᐊᓕᒥᐅᓕᒫᓄᑦ, ᐱᐊᕐᓯᐸᒥᑦ ᐱᒋᐊᕐᓗᒍ ᑖᓐᒧᑦ ᑎᑭᓪᓗᒍ, ᐃᓄᐃᑦ ᖄᖏᑦᑕᐅᕕᖕᒥᒃ ᓇᓪᓕᐅᓐᓂᕐᓯᐅᕆᐊᕐᑐᖁᓪᓗᒋᑦ ᐊᑕᓂᕐᒧᑦ ᐃᓴᕆᐊᓕᒥᐅᑦ ᒎᑎᖓᓄᑦ, ᔨᕉᓴᓕᒥ; ᓇᓪᓕᐅᓐᓂᕐᓯᐅᕐᑕᐅᓚᐅᕐᓯᒪᔪᓐᓃᕐᓂᖓᓄᑦ ᐊᑯᓂ ᓇᓗᓁᕐᑕᐅᓯᒪᔪᒥᒃ. 6 ᑕᕝᕙ ᑐᓴᕐᑎᑦᓯᔭᕐᑐᕐᑐᑦ ᐂᓚᐅᕐᐳᑦ ᐃᓴᕆᐊᓕᒥᐅᓕᒫᓄᑦ ᔫᑕᒥᐅᓕᒫᓄᓪᓗ ᑎᑎᖅᑲᓂᒃ ᓇᒃᓴᕐᓗᑎᒃ ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖏᑕᓗ ᑎᑎᕋᖏᓐᓂᒃ, ᐊᖓᔪᖅᑳᕐᔪᐊᑉ ᐱᖁᔨᓚᐅᕐᒪᑦ ᐅᖃᕐᓗᓂ: “ᐃᓴᕆᐊᓕᒥᐅᑦ ᐃᓄᖏᑦ, ᐊᑕᓂᕐᒧᑦ ᐅᑎᓚᐅᕆᑦᓯ, ᐂᑉᕋᕼᐋᒻ, ᐂᓴᑭᐅᓪᓗ ᐃᓴᕆᐊᓕᐅᓪᓗ ᒎᑎᖓᓄᑦ; ᑖᑦᓱᒪ ᐅᑎᕐᕕᒋᔪᓐᓇᕐᓂᐊᕐᒪᓯ ᐊᒥᐊᒃᑰᔪᓯ ᐊᓐᓇᓚᐅᕐᑐᓯᓗ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᑦ. 7 ᓯᕗᓕᓯ ᖃᑕᓐᖑᑎᓯᓗ ᐊᑦᔨᒋᑦᑍᓕᓯᐅᒃ, ᑖᒃᑯᐊ ᐊᑕᓂᕐᒥᒃ ᐅᒃᐱᕈᓐᓃᓚᐅᕐᒪᑕ ᓯᕗᓕᑦᓯ ᒎᑎᖓᓂᒃ, ᑖᑦᓱᒪᓗ ᑕᕝᕙ ᐃᓄᖃᕈᓐᓃᕐᑎᓚᐅᕐᐰᑦ, ᑕᒪᓐᓇ ᑕᑯᓯᒪᒐᑦᓯᐅᒃ. 8 ᒫᓐᓇ ᓯᑎᔫᒐᓱᐊᕐᑍᓕᒋᑦᓯ ᓯᕗᓕᑦᓯᑐᑦ, ᐃᓕᑦᓯᓐᓂᒡᓕ ᑐᓂᓕᕆᑦᓯ ᐊᑕᓂᕐᒧᑦ, ᐃᑎᕐᓗᓯᓗ ᐃᑦᔪᕐᓁᑦᑐᕕᖁᑎᖓᓄᑦ, ᑖᑦᓱᒪ ᐃᑦᔪᕐᓁᑎᓚᐅᕐᑕᖓᓄᑦ ᐃᓱᖃᖏᑦᑐᒧᑦ, ᐊᑕᓂᕐᓗ ᒎᑎᓯ ᐱᔨᑦᓯᓕᕐᓯᐅᒃ, ᑖᑦᓱᒪ ᓂᓐᖓᐅᓯᖓᓄᑦ ᓯᕘᕋᓇᕐᑐᒧᑦ ᕿᒪᒃᑕᐅᖁᓪᓗᓯ. 9 ᐊᑕᓂᕐᒧᑦ ᐅᑎᕈᑦᓯ, ᖃᑕᓐᖑᑎᓯ ᕿᑐᕐᖓᓯᓗ ᓇᒡᓕᒋᔭᐅᔪᓐᓇᕐᓯᓂᐊᕐᐳᑦ ᑎᒍᓯᓯᒪᔪᓂᑦ, ᐅᑎᕐᑎᑕᐅᓗᑎᒡᓗ ᑕᒪᐅᖓ ᓄᓇᒧᑦ. ᐊᑕᓂᖅ ᒎᑎᓯ ᐱᑦᓯᐊᕐᒪᑦ ᓂᑲᒍᓱᒡᓗᓂᓗ, ᑮᓇᒥᓄᓪᓗ ᐊᓚᕐᓂᐊᓐᖏᓛᓯ, ᑖᑦᓱᒧᖓ ᐅᑎᕐᓂᐊᕈᑦᓯ.” 10 ᑕᕝᕙ ᐅᖃᕆᐊᕐᑐᕐᑏᑦ ᐊᐅᓪᓚᓚᐅᕐᐳᑦ ᐃᒡᓗᒐᓴᖕᓂᑦ ᐃᒡᓗᒐᓴᖕᓄᑦ ᓄᓇᓕᖕᓄᓪᓗ ᐃᕗᕅᑎᒥᐅᓄᑦ ᒫᓇᓯᒃᑯᓐᓄᓪᓗ, ᐊᒡᓛᑦ ᓯᐳᓗᓂ ᑎᑭᓪᓗᒍ; ᑖᒃᑯᐊᓕ ᐃᔪᕆᔭᐅᓚᐅᕐᐳᑦ ᓱᐊᒃᑕᐅᓪᓗᑎᒃ, ᒥᑕᐅᑎᒋᔭᐅᓪᓗᑎᒡᓗ. 11 ᐅᓄᖏᑦᑐᓪᓕ ᐃᓚᖏᑦ ᐋᓱᕆᒥᐅᑦ, ᒫᓇᓯᒥᐅᓪᓗ, ᓯᐳᓗᓂᒥᐅᓪᓗ ᐃᒻᒥᖕᓂᒃ ᒥᑭᒡᓕᑎᕐᓗᑎᒃ ᔨᕉᓴᓕᒧᐊᓚᐅᕐᐳᑦ. 12 ᒎᑎᐅᓪᓗ ᐱᔪᓐᓇᕐᓂᖓᑕ ᑎᑭᑉᐰᑦ ᔫᑕᒥᐅᑦ ᐊᑕᐅᓯᕐᒥᒃ ᐆᒻᒪᑎᑖᕐᑎᓪᓗᒋᑦ ᐊᖓᔪᖅᑳᕐᔪᐊᑉ ᐊᖓᔪᖅᑳᓪᓗ ᐱᖁᔨᓂᖏᓐᓂᒃ ᒪᓕᖁᓪᓗᒋᑦ ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ. ᖄᖏᕐᑕᐅᕕᐅᑉ ᓇᓪᓕᐅᓐᓂᕐᓯᐅᕐᑕᐅᓂᖓ 13 ᐃᓄᒐᓮᓪᓗ ᐅᓄᕐᑐᕐᔪᐊᑦ ᑲᑎᓕᕐᐳᑦ ᔨᕉᓴᓕᒥ ᑕᖅᑭᐅᑉ ᐂᑉᐸᖓᓂ ᓇᓪᓕᐅᓐᓂᕐᓯᐅᕈᒪᓪᓗᑎᒃ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ, ᐃᓄᒐᓴᒡᔪᐊᖑᓕᕐᓗᑎᒃ. 14 ᑐᓂᕐᕈᓯᕐᕖᓪᓗ ᔨᕉᓴᓕᒦᑦᑐᑦ ᐲᔭᕆᐊᕐᑐᓚᐅᕐᐰᑦ, ᑎᐱᑦᓯᐊᕆᒃᑐᒥᒡᓗ ᑐᓂᕐᕈᓯᕐᕕᓕᒫᑦ ᐲᔭᕐᐰᑦ ᐃᒋᓪᓗᒋᓪᓗ ᓇᕐᓴᒧᑦ ᑭᑐᕌᓂᒧᑦ. 15 ᓰᐱᐅᓪᓗ ᓄᕐᕋᖏᓐᓂᒃ ᑐᖁᕅᕗᑦ ᖄᖏᕐᑕᐅᕕᒃᓯᐅᕈᑎᓂᒃ ᐅᓪᓘᑉ 14ᖓᓂ ᑕᖅᑭᐅᑉ ᐂᑉᐸᖓᓂ. ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᐃᑦᔪᕐᓁᑎᓯᒪᖏᓐᓇᒥᒃ ᑲᓐᖑᓱᓕᕐᐳᑦ, ᑕᕝᕙ ᐃᒻᒥᖕᓂᒃ ᐃᑦᔪᕐᓁᓕᑎᓕᕐᐳᑦ, ᑐᓂᕐᕈᓯᕐᐳᓪᓗ ᐃᑯᐊᓚᑎᑕᒃᓴᓂᒃ ᐊᑕᓂᐅᑉ ᐃᒡᓗᖓᓂ. 16 ᐃᓂᒋᔭᕆᐊᖃᕐᑕᒥᖕᓄᐊᓚᐅᕐᐳᑦ ᐱᐅᓯᕆᔭᕆᐊᖃᕐᑕᑎᒃ ᒪᓕᒡᓗᒍ ᒎᑎᐅᑉ ᐃᓄᖁᑎᖓᑕ ᒨᓯᓯᐅᑉ ᐱᖁᔭᖏᑦ ᒪᓕᒡᓗᒋᑦ; ᑐᓂᕐᕈᓯᕐᑎᑦᓯᔩᓪᓗ ᐊᐅᖕᒥᒃ ᓯᕐᐸᕐᓮᕗᑦ ᓕᕔᑎᓂᑦ ᑐᓂᔭᐅᔪᓂᒃ ᑖᒃᑯᓄᖓ. 17 ᑲᑎᒪᔪᓂ ᐅᓄᕐᑐᑦ ᐃᒻᒥᖕᓂᒃ ᐃᑦᔪᕐᓁᓕᑎᓯᒪᓚᐅᖏᒻᒪᑕ; ᑍᒤᒻᒪᑦ ᓕᕔᑏᑦ ᑐᖁᑦᓯᓚᐅᕐᐳᑦ ᓰᐱᐅᑉ ᓄᕐᕋᖏᓐᓂᒃ ᖄᖏᕐᑕᐅᕕᒃᓯᐅᕈᑎᒃᓴᓂᒃ ᐊᓯᓕᒫᖏᑦ ᓴᓗᒻᒪᕐᓯᒪᓚᐅᖏᒻᒪᑕ, ᐃᑦᔪᕐᓁᑎᑕᐅᖁᓪᓗᒋᑦ ᐊᑕᓂᕐᒧᑦ. 18 ᐃᓄᒋᐊᒃᑐᕐᔪᐊᑦ, ᐃᕗᕅᑎᒥᐅᑦ, ᒫᓇᓯᒥᐅᑦ, ᐃᓴᑳᕆᒥᐅᑦ, ᓯᐳᓗᓂᒥᐅᑦ, ᐃᒻᒥᖕᓂᒃ ᓴᓗᒻᒪᕐᓴᓚᐅᖏᒻᒪᑕ, ᓂᕆᖃᑕᐅᓚᐅᕐᐳᓪᓕ ᖄᖏᕐᑕᐅᕕᒃᓯᐅᕈᑎᒥᒃ ᒪᓕᖕᓇᑎᒃ ᑎᑎᕋᕐᓯᒪᔪᓂᒃ. ᕼᐃᓯᑬᐊᐅᓪᓕ ᑐᒃᓯᐅᑎᕔᑦ, ᐅᖃᕐᓗᓂ, “ᐊᑕᓂᐅᑉ ᐱᐅᔫᑉ ᑕᒤᑕ ᐃᓱᒪᒋᔪᓐᓁᕐᕕᒋᓕᒋᑦ 19 ᐆᒻᒪᑎᒥᒍᑦ ᕿᓂᕐᑐᑦ ᒎᑎᒥᒃ, ᐊᑕᓂᕐᒥᒃ ᓯᕗᓕᖏᑕ ᒎᑎᖓᓂᒃ, ᐃᑦᔪᕐᓁᓕᑎᑕᐅᑦᔪᑏᑦ ᒪᓕᒡᓗᒋᑦ ᓴᓗᒻᒪᕐᑎᑕᐅᓯᒪᖏᒃᑲᓗᐊᕐᑎᓪᓗᒋᑦ.” 20 ᐊᑕᓂᐅᓪᓗ ᕼᐃᓯᑬᐊ ᑐᓴᕐᐹ, ᐃᓄᐃᓪᓗ ᐋᖅᑭᒡᓗᒋᑦ. 21 ᐃᓴᕆᐊᓕᒥᐅᓪᓗ ᔨᕉᓴᓕᒦᑦᑐᑦ ᓇᓪᓕᐅᓐᓂᕐᓯᐅᓚᐅᕐᐳᑦ ᓂᐊᖂᔭᒥᑦ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᓪᓗᓂᒃ 7ᓂᒃ ᖁᕕᐊᓱᒻᒪᕆᒡᓗᑎᒃ; ᓕᕔᑏᓪᓗ ᑐᓂᕐᕈᓯᕐᑎᑦᓯᔩᓪᓗ ᐊᑕᓂᕐᒥᒃ ᓂᕐᑐᐃᓚᐅᕐᐳᑦ ᖃᐅᑕᒫᑦ, ᐃᓐᖏᕐᓗᑎᒃ ᐊᑕᓂᕐᒧᑦ ᐱᔪᓐᓇᕐᓂᓕᒫᒥᖕᓄᑦ. 22 ᕼᐃᓯᑬᐊᐅᓪᓗ ᐅᖃᐅᑎᓪᓗᒋᑦ ᑲᔪᖏᕐᓴᕐᐰᑦ ᓕᕔᑎᓕᒫᑦ ᐱᔪᓐᓇᑦᓯᐊᕐᓗᑎᒃ ᐱᓕᕆᔪᑦ ᐱᓇᓱᐊᕆᐊᓕᖕᒥᖕᓂᒃ ᐊᑕᓂᕐᒧᑦ. ᑕᕝᕙ ᐃᓄᐃᑦ ᓂᕆᓚᐅᕐᐳᑦ ᓇᓪᓕᐅᓐᓂᕐᓯᐅᕐᓗᑎᒃ ᐅᓪᓗᓂᒃ 7ᓂᒃ, ᑐᓂᕐᕈᓯᕐᓗᑎᒃ ᓮᒻᒪᕐᑎᑕᐅᑦᔪᑎᒃᓴᒧᑦ ᑐᓂᕐᕈᓯᕐᐳᓪᓗ ᖁᔭᓕᓪᓗᑎᒃ ᐊᑕᓂᕐᒧᑦ ᓯᕗᓕᖏᑕ ᒎᑎᖓᓄᑦ. ᓇᓪᓕᐅᓐᓂᕐᓯᐅᕐᓂᐅᑉ ᐂᑉᐸᖓ 23 ᑲᑎᒪᔪᓕᒫᓪᓗ ᐊᖏᖃᑎᒌᓚᐅᕐᐳᑦ ᓇᓪᓕᐅᓐᓂᕐᓯᐅᒃᑲᓐᓂᕈᒪᓪᓗᑎᒃ ᐅᓪᓗᓂᒃ 7ᓂᒃ; ᑕᕝᕙ ᑲᔪᓯᒃᑲᓐᓂᓚᐅᕐᐳᑦ ᐅᓪᓗᓂᒃ 7ᓂᒃ ᖁᕕᐊᓱᒡᓗᑎᒃ. 24 ᕼᐃᓯᑬᐊ ᔫᑕᐅᑉ ᐊᖓᔪᖅᑳᕐᔪᐊᖓ ᑲᑎᒪᔪᓄᑦ ᑐᓂᓯᓚᐅᕐᐳᖅ 1,000ᓂᒃ ᐃᒻᒧᒃᓯᐅᒊᑦ ᐸᖕᓂᖏᓐᓂᒃ 7,000ᓂᒡᓗ ᓰᐱᓂᒃ. ᐊᖓᔪᖅᑳᓪᓗ ᑐᓂᓯᓚᐅᕆᕗᑦ ᑲᑎᒪᔪᓄᑦ 1,000ᓂᒃ ᐃᒻᒧᒃᓯᐅᒊᑦ ᐸᖕᓂᖏᓐᓂᒃ 10,000ᓂᒡᓗ ᓰᐱᓂᒃ. ᑐᓂᕐᕈᓯᕐᑎᑦᓯᔩᓪᓗ ᐅᓄᕐᑐᕐᔪᐊᑦ ᐃᒻᒥᖕᓂᒃ ᐃᑦᔪᕐᓁᓕᑎᓚᐅᕐᐳᑦ. 25 ᔫᑕᐅᑉ ᐃᓄᓕᒫᖏᑦ ᑲᑎᒪᔭᕐᑐᕐᓯᒪᔪᑦ, ᑐᓂᕐᕈᓯᕐᑎᑦᓯᔩᓪᓗ ᓕᕔᑏᓪᓗ, ᐃᓴᕆᐊᓕᐅᓪᓗ ᓄᓇᖓᓂᑦ ᑲᑎᒪᔭᕐᑐᕐᓯᒪᔪᓕᒫᑦ, ᓂᐅᕐᕈᐊᓪᓗ ᐃᓴᕆᐊᓕᒃᑯᑦ ᓄᓇᖏᓐᓂᑦ ᐱᓯᒪᔪᑦ, ᔫᑎᐅᖏᑦᑐᓪᓗ ᔫᑕᒥ ᓄᓇᖃᕐᑐᑦ, ᖁᕕᐊᓱᖃᑎᒌᓚᐅᕐᐳᑦ. 26 ᖁᕕᐊᓱᖕᓂᕐᔪᐊᖃᓚᐅᕐᐳᑦ ᔨᕉᓴᓕᒥ, ᑍᒪᓐᖓᓂᑦ ᓲᓗᒨᓂ ᑍᕕᑎᐅᑉ ᐊᖓᔪᖅᑳᕐᔪᐊᑉ ᐃᕐᓂᖓ ᐃᓅᑎᓪᓗᒍᓂᑦ ᑍᒫᒃ ᐃᓴᕆᐊᓕᒥ ᑍᒤᑦᑐᖃᓚᐅᕐᓯᒪᓐᖏᓚᖅ ᔨᕉᓴᓕᒥ. 27 ᑕᕝᕙ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᒪᑭᓪᓗᑎᒃ ᐃᓄᐃᑦ ᓮᒻᒪᕐᑎᑉᐰᑦ, ᓂᐱᖏᓪᓗ ᑐᓴᕐᑕᐅᕗᑦ, ᑐᒃᓯᐊᕐᓂᖏᓪᓗ ᑎᑭᐅᑎᕗᑦ ᐃᑦᔪᕐᓁᑦᑑᑉ ᐃᓂᖓᓄᑦ ᕿᓚᖕᒧᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society