ᑯᕉᓂᑲ ᐂᑉᐸᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦᐊᖓᔪᖅᑳᕐᔪᐊᖅ ᕼᐃᓯᑬᐊ ᔫᑕᒥ ᐊᑕᓃᑦ ᐂᑉᐸᖏᑦ 18:1-3 1 ᕼᐃᓯᑬᐊ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐊᕐᕌᒍᖃᕐᓗᓂ 25ᓂᒃ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 29ᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᐊᐰᔭᒥᒃ ᓴᑲᕅᐊᐅᑉ ᐸᓂᖓ. 2 ᐱᓂᐊᕐᓂᖃᑦᓯᐊᓚᐅᕐᐳᕐᓗ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓯᕗᓕᖓᑕ ᑍᕕᑎᐅᑉ ᐱᓂᐊᕐᓂᕆᓚᐅᕐᑕᓕᒫᖏᑦ ᒪᓕᒡᓗᒋᑦ. ᑐᒃᓯᐊᕐᕕᐅᑉ ᐃᑦᔪᕐᓁᓯᑎᑕᐅᓂᖓ 3 ᐊᖓᔪᖅᑳᖑᓂᖓᑕ ᐊᕐᕌᒎᑉ ᓯᕗᓪᓕᕐᐹᖓᓂ, ᑕᖅᑭᐅᑉ ᓯᕗᓪᓕᕐᐹᖓᓂ, ᐊᑕᓂᐅᑉ ᐃᒡᓗᖓᑕ ᐅᒃᑯᐊᖏᑦ ᒪᑐᐃᕐᐰᑦ, ᐋᖅᑭᒋᐊᕐᓗᒋᓪᓗ ᓴᓇᕔᑦ. 4 ᑐᓂᕐᕈᓯᕐᑎᑦᓯᔩᓪᓗ ᓕᕔᑏᓪᓗ ᐃᑎᖁᕔᑦ, ᑲᑎᑎᓪᓗᒋᓪᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑑᑉ ᐱᕕᑐᓂᖓᓂ, 5 ᐅᖃᐅᑎᓪᓗᒋᓪᓗ, “ᓈᓚᒃᓯᓐᖓ, ᓕᕔᑎᐅᔪᓯ! ᐃᓕᑦᓯᓐᓂᒃ ᐃᑦᔪᕐᓁᑎᓕᕆᑦᓯ, ᐊᑕᓂᐅᓪᓗ ᓯᕗᓕᑦᓯ ᒎᑎᖓᑕ ᐃᒡᓗᖓ ᐃᑦᔪᕐᓁᓯᑎᓪᓗᓯᐅᒃ, ᓴᓗᒪᖏᑦᑐᓪᓗ ᐃᒋᓪᓗᒋᑦ ᐃᑦᔪᕐᓁᑦᑐᕕᖕᒥᑦ. 6 ᓯᕗᓕᕗᑦ ᐱᐅᖏᑦᑐᓕᓚᐅᕐᒪᑕ ᐊᑕᓂᐅᑉ ᒎᑎᑦᑕ ᓵᖓᓂ; ᑖᑦᓱᒥᖓᓗ ᕿᒤᓚᐅᕐᒪᑕ, ᐊᑕᓂᐅᓪᓗ ᐊᓯᐊᓄᑦ ᑕᑯᓐᓇᖔᓕᓚᐅᕐᒪᑕ; ᑐᓄᐃᓪᓗᑎᒡᓗ ᑖᑦᓱᒥᖓ. 7 ᐅᒃᑯᐊᖏᓪᓗ ᒪᑐᓚᐅᕐᒪᒋᑦ ᓱᓪᓗᑯᑖᖓᓃᑦᑐᑦ, ᓇᓂᕈᐊᖏᓪᓗ ᖃᒥᓪᓗᒋᑦ, ᑎᐱᑦᓯᐊᕆᒃᑐᓂᒡᓗ ᐃᑯᐊᓪᓔᖃᑦᑕᕈᓐᓃᕐᓗᑎᒃ ᑐᓂᕐᕈᓯᖃᑦᑕᕈᓐᓃᕐᓗᑎᒡᓗ ᐃᑯᐊᓚᑎᑕᒃᓴᓂᒃ ᐃᑦᔪᕐᓁᑦᑐᕕᖕᒥ ᐃᓴᕆᐊᓕᒥᐅᑦ ᒎᑎᖓᓄᑦ. 8 ᑍᒤᒻᒪᑦ ᐊᑕᓂᐅᑉ ᓂᓐᖓᐅᓯᖓ ᑎᑭᑉᐳᖅ ᔫᑕᒧᑦ ᔨᕉᓴᓕᒧᓪᓗ, ᐃᓱᐊᖏᑦᑐᑦ ᑲᑉᐱᐊᓇᕐᑐᓪᓗ ᑖᒃᑯᓄᖓ ᑎᑭᑎᓚᐅᕐᐰᑦ, ᑕᑕᒥᓐᓇᕐᑐᑦ, ᒥᑕᐅᑎᒋᔭᐅᓇᕐᑐᑦ ᑕᑯᓯᒪᔭᓯ ᓇᖕᒥᓂᖅ ᐃᔨᑦᓯᓐᓄᑦ. 9 ᑕᕝᕙ ᓯᕗᓕᕗᑦ ᑐᖁᑕᐅᓚᐅᕐᐳᑦ ᓴᕕᒡᔪᐊᒧᑦ ᐃᕐᓂᕗᓪᓗ ᐸᓂᕗᓪᓗ ᓄᓕᐊᕗᓪᓗ ᑎᒍᔭᐅᓪᓗᑎᒃ ᐊᐅᓪᓚᕈᑦᔭᐅᓯᒪᕗᑦ. 10 “ᐆᒻᒪᑎᒃᑯᑦ ᐊᖏᖃᑎᒌᒍᑎᓕᐅᕐᕕᒋᔪᒪᕙᕋ ᐊᑕᓂᖅ, ᐃᓴᕆᐊᓕᒥᐅᑦ ᒎᑎᖓᑦ, ᑖᑦᓱᒪ ᓂᓐᖓᐅᒪᓂᕐᔪᐊᖓ ᐅᕙᑦᑎᓐᓂᒃ ᐊᓔᖁᓪᓗᒍ. 11 ᐃᕐᓂᒃᑳ, ᒫᓐᓇ ᐃᒃᐱᒍᓱᖏᑦᑑᑦᑍᓕᒋᑦᓯ, ᐊᑕᓂᐅᑉ ᓂᕈᐊᓚᐅᕐᒪᓯ ᓇᖏᖁᓪᓗᓯ ᑖᑦᓱᒪ ᓵᖓᓂ, ᐱᔨᑦᓯᕐᕕᒋᓗᒍ, ᑖᑦᓱᒧᖓᓗ ᐱᔨᑦᓯᕐᑎᒋᔭᐅᖁᓪᓗᓯ ᐃᑯᐊᓪᓔᖁᓪᓗᓯ ᑎᐱᑦᓯᐊᕆᒃᑐᒥᒃ.” 12 ᑕᕝᕙ ᓕᕔᑏᑦ ᓂᑯᕕᑉᐳᑦ, ᒪᕼᐊᑕ ᐊᒪᓮᑉ ᐃᕐᓂᖓ, ᔪᐃᓕᓗ ᐊᔭᕅᐊᐅᑉ ᐃᕐᓂᖓ, ᑯᕼᐊᑍᑎᐅᑉ ᐃᕐᓂᖏᓐᓂᑦ ᐱᓯᒪᔪᑦ; ᒥᕋᕆᐅᓪᓗ ᐃᕐᓂᖏᓐᓂᑦ ᐱᔪᑦ ᐅᑯᐊ, ᑭᔅ ᐊᑉᑍᑉ ᐃᕐᓂᖓ, ᐊᔭᕅᐊᓗ ᔨᕼᐊᓕᓕᐅᑉ ᐃᕐᓂᖓ; ᒌᕐᓲᓁᑎᓂᑦ ᐱᔪᑦ, ᔪᐊ ᔨᒪᐅᑉ ᐃᕐᓂᖓ, ᐄᑕᓐᓗ ᔪᐊᑉ ᐃᕐᓂᖓ; 13 ᐃᓔ-ᓴᐸᓇᒃᑯᓐᓂᑦ ᐱᔪᑦ, ᓯᒻᕆ ᔨ-ᐂᓕᓗ; ᐊᓴᐸᒥᑦ ᐱᔪᑦ, ᓴᑲᕅᐊ ᒪᑕᓁᐊᓗ; 14 ᕼᐃᒪᓐᑯᓐᓂᑦ ᐱᔪᑦ, ᔨᕼᐃᐅᓪ ᓯᒥᐂᓗ; ᔨᑐᑕᓐᑯᓐᓂᑦ ᐱᔪᑦ, ᓯᒤᐊ ᐊᑦᔧᐅᓗ. 15 ᑖᒃᑯᐊ ᑲᑎᕐᓱᐃᓚᐅᕐᐳᑦ ᖃᑕᓐᖑᑎᒥᖕᓂᒃ, ᐃᒻᒥᖕᓂᒡᓗ ᐃᑦᔪᕐᓁᑎᑉᐳᑦ, ᐊᖓᔪᖅᑳᕐᔪᐊᓪᓗ ᐱᖁᔭᖏᓐᓂᒃ ᒪᓕᒡᓗᑎᒃ ᐃᑎᓚᐅᕐᐳᑦ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᐅᑉ ᐃᒡᓗᖓᓂᒃ ᓴᓗᒻᒪᕐᓮᖁᓪᓗᒋᑦ. 16 ᑐᓂᕐᕈᓯᕐᑎᑦᓯᔩᑦ ᐊᑕᓂᐅᑉ ᐃᒡᓗᖓᓄᑦ ᐃᓗᐊᓃᓐᓂᕐᓴᒧᑦ ᐃᑎᕐᐳᑦ ᓴᓗᒻᒪᕐᓴᕆᐊᕐᑐᕐᓗᒍ, ᓇᓂᔭᓕᒫᑎᒡᓗ ᓴᓗᒤᑦᑐᑦ ᐊᓂᑉᐰᑦ ᐊᑕᓂᐅᑉ ᐃᒡᓗᖓᓂᑦ ᑐᒃᓯᐊᕐᕕᐅᓪᓗ ᐱᕕᑐᓂᖓᓄ ᐊᓂᓪᓗᒋᑦ; ᓕᕔᑏᓪᓗ ᑖᒃᑯᐊ ᑎᒍᓪᓗᒋᑦ ᐊᒡᔭᕐᐰᑦ ᑰᖕᒧᑦ ᑭᑐᕌᓂᒧᑦ ᓇᕐᓴᒧᑦ. 17 ᑖᒃᑯᐊ ᐃᑦᔪᕐᓁᑎᑦᓯᓂᕐᒥᒃ ᐱᒋᐊᕐᐳᑦ ᐅᓪᓘᑉ ᓯᕗᓪᓕᕐᐹᖓᓂ ᑕᖅᑭᐅᑉ ᓯᕗᓪᓕᕐᐹᖓᓂ, ᐅᓪᓘᑉ ᓯᑕᒪᐅᔪᕐᑐᖓᓐᓂ ᐃᑎᕐᐳᑦ ᓱᓪᓗᑯᑖᖓᑕ ᐃᑎᕆᐊᕐᕕᖓᓄᑦ; ᑕᕝᕙ ᐅᓪᓗᓂᒃ ᓯᑕᒪᐅᔪᕐᑐᓂᒃ ᐊᑕᓂᐅᑉ ᐃᒡᓗᖓ ᐃᑦᔪᕐᓁᓕᕐᑎᑉᐹᑦ, ᑕᖅᑭᐅᓪᓗ ᓯᕗᓪᓕᕐᐹᑉ ᐅᓪᓗᖏᑕ 16ᖓᓐᓂ ᐱᔭᕇᕐᐳᑦ. ᑐᒃᓯᐊᕐᕕᐅᑉ ᑐᓂᒋᐊᒃᑲᓐᓂᕐᑕᐅᓂᖓ 18 ᑕᕝᕙ ᐊᖓᔪᖅᑳᕐᔪᐊᒧᑦ ᕼᐃᓯᑬᐊᒧᐊᕐᐳᑦ ᐅᖃᐅᑎᓪᓗᒍᓗ, “ᐊᑕᓂᐅᑉ ᐃᒡᓗᓕᒫᖓ ᓴᓗᒻᒪᕐᓴᓚᐅᕐᐸᕗᑦ, ᑐᓂᕐᕈᓯᕐᕕᒡᓗ ᐃᑯᐊᓚᑦᓯᕕᒃ ᐱᓇᓱᐊᕈᑎᓕᒫᖏᓪᓗ, ᓂᐊᖂᔭᓄᓪᓗ ᐃᓕᓯᕕᐅᑉ ᓵᖓ ᐱᓇᓱᐊᕈᑎᓕᒫᖏᓪᓗ. 19 ᐱᓇᓱᐊᕈᑎᓕᒫᓪᓗ ᐊᖓᔪᖅᑳᕐᔪᐊᑉ ᐂᕼᐊᔅ ᐊᐅᓚᑦᓯᑎᓪᓗᒍ ᓴᓂᕐᕙᓚᐅᕐᑕᖏᑦ ᑕᒻᒪᐅᒪᑎᓪᓗᒍ ᐊᑐᐃᓐᓇᕈᓚᐅᕐᐸᕗᑦ ᐃᑦᔪᕐᓁᓕᕐᑎᓪᓗᒋᓪᓗ; ᑕᑯᒋᓪᓗ, ᑕᕝᕙ ᐊᑕᓂᐅᑉ ᑐᓂᕐᕈᓯᕐᕕᐊᑕ ᓯᕗᕌᓃᓕᕐᐳᑦ.” 20 ᑕᕝᕙ ᐊᖓᔪᖅᑳᕐᔪᐊᖅ ᕼᐃᓯᑬᐊ ᐅᓪᓛᒻᒪᕆᒃᑯᑦ ᒪᑭᑉᐳᖅ ᐃᒡᓗᒐᓴᖕᓂᓗ ᐊᐅᓚᑦᓯᔩᑦ ᑲᑎᕐᓱᕐᐰᑦ, ᑕᑉᐸᐅᓐᖓᕐᓗᑎᒡᓗ ᐊᑕᓂᐅᑉ ᐃᒡᓗᖓᓄᑦ. 21 ᐃᒻᒧᒃᓯᐅᒊᓪᓗ ᐸᖕᓂᖏᓐᓂᒃ 7ᓂᒃ ᓇᒃᓴᕐᐳᑦ, ᓰᐲᓪᓗ ᐊᖑᓴᓪᓗᖏᓐᓂᒃ 7ᓂᒃ, ᓄᕐᕋᕐᓂᒡᓗ 7ᓂᒃ, ᒎᑦᓰᓪᓗ ᐊᖑᓴᓪᓗᖏᓐᓂᒃ 7ᓂᒃ ᐊᔪᕐᑐᓕᓂᕐᒧᑦ ᑐᓂᕐᕈᑎᒃᓴᓂᒃ ᐊᖓᔪᖅᑳᒃᑯᕕᖓᓄᑦ ᐃᑦᔪᕐᓁᑦᑐᒃᑯᕕᖕᒧᓪᓗ ᔫᑕᒥᐅᑦ ᐱᓪᓗᒋᑦ. ᑐᓂᕐᕈᓯᕐᑎᑦᓯᔩᓪᓗ ᑎᓕᕔᑦ ᐂᕉᓂᐅᑉ ᐃᕐᓂᖏᑦ ᑐᓂᕐᕈᓯᖁᓪᓗᒋᑦ ᑐᓂᕐᕈᓯᕐᕕᖕᒥ ᐊᑕᓂᕐᒧᑦ. 22 ᑕᕝᕙ ᐃᒻᒧᒃᓯᐅᒊᑦ ᐸᖕᓂᖏᑦ ᑐᖁᑉᐰᑦ, ᑐᓂᕐᕈᓯᕐᑎᑦᓯᔩᓪᓗ ᐊᐅᖕᒥᒃ ᐱᒐᒥᒃ ᑐᓂᕐᕈᓯᕐᕕᒃ ᓯᕐᐸᕐᓴᕐᐹᑦ; ᑍᒫᒃᑕᐅᖅ ᓰᐱᐅᑉ ᐊᖑᓴᓪᓗᖏᑦ ᑐᖁᓐᓇᒥᒋᑦ ᐊᐅᖕᒧᓪᓗ ᑐᓂᕐᕈᓯᕐᕕᒃ ᓯᕐᐸᕐᓴᕐᐹᑦ; ᓱᓕᓗ ᓄᕐᕅᑦ ᑐᖁᓐᓇᒥᒋᑦ ᐊᐅᖏᓐᓄᓪᓗ ᑐᓂᕐᕈᓯᕐᕕᒃ ᓯᕐᐸᕐᓴᕐᐹᑦ. 23 ᒎᑦᓯᓪᓗ ᐊᖑᓴᓪᓗᖏᑦ ᐂᑦᔪᑎᕔᑦ ᑐᓂᕐᕈᑎᐅᖁᓪᓗᒋᑦ ᐊᔪᕐᓂᕐᒧᑦ ᐊᖓᔪᖅᑳᕐᔪᐊᑉ ᐃᓄᐃᓪᓗ ᓵᖓᓂ, ᑐᓂᕐᕈᑎᒃᓮᓪᓗ ᑖᒃᑯᐊ ᐸᑎᒻᒥᕔᑦ. 24 ᑕᕝᕙ ᑐᓂᕐᕈᓯᕐᑎᑦᓯᔩᑦ ᑖᒃᑯᓂᖓ ᑐᖁᑦᓯᕗᑦ ᐊᐅᖏᓪᓗ ᑐᓂᕐᕈᓯᕐᕕᖕᒧᐊᕈᑎᕔᑦ ᐊᔪᕐᓂᕐᒧᑦ ᑐᓂᕐᕈᑎᐅᖁᓪᓗᒋᑦ, ᐃᓴᕆᐊᓕᒥᐅᓕᒫᑦ ᐊᔪᕐᓂᖏᑦ ᐲᔭᕐᑕᐅᖁᓪᓗᒋᑦ. ᐊᖓᔪᖅᑳᕐᔪᐊᖅ ᑎᓕᓯᓚᐅᕐᒪᑦ ᐃᑯᐊᓪᓔᓂᕐᒧᑦ ᑐᓂᕐᕈᑏᑦ ᐊᔪᕐᓂᕐᒧᓪᓗ ᑐᓂᕐᕈᑏᑦ ᐃᓴᕆᐊᓕᒥᐅᓕᒫᓄᑦ ᑐᕌᖓᖁᓪᓗᒋᑦ. 25 ᓕᕔᑏᓪᓗ ᐃᓂᖃᕐᑎᑉᐰᑉ ᐊᑕᓂᐅᑉ ᐃᒡᓗᖓᓂ ᓯᕙᓂᕋᐅᓯᔭᕐᑏᑦ, ᕼᐊᕐᐱᓖᑦ, ᓄᖃᕐᑎᓕᖕᓄᑦ ᓂᑦᔭᐅᑎᓖᑦ, ᑍᕕᑎᐅᑉ ᐱᖁᔭᖏᑦ ᒪᓕᒡᓗᒋᑦ ᒑᑦᓗ ᐊᖓᔪᖅᑳᕐᔪᐊᑉ ᐊᖓᔪᖅᑲᐅᔪᖁᑎᖓᑕ, ᓁᑕᐅᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ; ᐊᑕᓂᐅᑉ ᐱᖁᔭᖏᑦ ᒪᓕᒡᓗᒋᑦ ᐅᖃᕐᑎᒥᒍᑦ ᐅᖃᕐᓯᒪᔭᖏᑦ. 26 ᓕᕔᑏᑦ ᓇᖏᕐᐳᑦ ᓂᑦᔭᐅᓯᔭᕐᓗᑎᒃ ᑍᕕᑎᐅᑉ ᐱᖏᓐᓂᒃ, ᑐᓂᕐᕈᓯᕐᑎᑦᓯᔩᓪᓗ ᑎᑦᑐᓚᐅᓯᔭᕐᓗᑎᒃ. 27 ᕼᐃᓯᑬᐊᐅᓪᓗ ᑎᓕᕔᑦ ᑐᓂᕐᕈᓯᖁᓪᓗᒋᑦ ᐃᑯᐊᓪᓚᒋᐊᓕᖕᓂᒃ ᑐᓂᕐᕈᓯᕐᕕᖕᒥ. ᐃᑯᐊᓪᓚᒋᐊᓖᓪᓗ ᑐᓂᕐᕈᑏᑦ ᐱᒋᐊᕐᒪᑕ, ᐊᑕᓂᕐᒧᑦ ᐃᓐᖏᕐᓂᖅ ᐱᒋᐊᕆᕗᑦ, ᑎᑦᑐᓚᐅᑏᓪᓗ, ᓂᑦᔭᐅᑏᓪᓗ ᑍᕕᑎᐅᑉ ᐊᖓᔪᖅᑳᕐᔪᐊᑉ ᐃᓴᕆᐊᓕᒥᐅᓄᑦ ᐱᖁᑎᖏᑦ ᐱᒋᐊᕐᑎᑕᐅᒋᕗᑦ. 28 ᑕᕝᕙ ᑲᑎᒪᔪᓕᒫᑦ ᓂᕐᑐᐃᓕᕐᐳᑦ ᑐᒃᓯᐊᕐᓗᑎᒃ, ᐃᓐᖏᕐᑏᓪᓗ ᐃᓐᖏᕐᓗᑎᒃ, ᑎᑦᑐᓚᐅᓯᔭᕐᑐᓪᓗ ᓂᓪᓕᐊᕗᑦ; ᑍᒫᒃ ᑖᒃᑯᐊ ᑲᔪᓯᓚᐅᕐᐳᑦ ᐃᑯᐊᓪᓚᒋᐊᓕᒃ ᑐᓂᕐᕈᑏᑦ ᐱᔭᕇᓚᐅᖏᓐᓂᖏᓐᓂ. 29 ᑐᓂᕐᕈᓯᕐᓂᕐᒥᒡᓗ ᐱᔭᕇᕐᒪᑕ, ᐊᖓᔪᖅᑳᕐᔪᐊᖅ ᐃᓚᒋᔭᖏᓪᓗ ᑍᑲᓃᑦᑐᓕᒫᑦ ᐹᒻᒪᒃᑎᕐᐳᑦ ᑐᒃᓯᐊᕐᓗᑎᒡᓗ. 30 ᐊᖓᔪᖅᑳᕐᔪᐊᕐᓗ ᕼᐃᓯᑬᐊ ᐊᖓᔪᖅᑳᓪᓗ ᑎᓕᓯᕗᑦ ᓕᕔᑎᓂᒃ ᐃᓐᖏᕐᓗᑎᒃ ᓂᕐᑐᐃᖁᓪᓗᒋᑦ ᐊᑕᓂᕐᒥᒃ ᑍᕕᑎᐅᑉ ᐊᓴᐸᐅᓪᓗ ᓇᓚᐅᑦᑍᔫᑉ ᐅᖃᐅᓯᖏᖅ ᒪᓕᒡᓗᒋᑦ. ᐃᓐᖏᓚᐅᕐᐳᓪᓗ ᓂᕐᑐᐃᓪᓗᑎᒃ ᖁᕕᐊᓱᒡᓗᑎᒃ, ᐅᑯᓪᓗᑎᒡᓗ ᑐᒃᓯᐊᕐᐳᑦ. 31 ᑕᕝᕙ ᕼᐃᓯᑬᐊ ᐅᖃᕐᐳᖅ, “ᒫᓐᓇ ᐃᑦᔪᕐᓁᑎᑦᓴᕇᕋᑦᓯ ᐊᑕᓂᕐᒧᑦ; ᖃᒡᓕᒋᐊᕆᑦᓯ, ᑐᓂᕐᕈᓯᕐᓗᓯ ᑐᓂᕐᕈᑎᓂᒃ ᖁᔭᓕᓂᕐᒧᑦ ᐊᑕᓂᐅᑉ ᐃᒡᓗᖓᓄᑦ.” ᑲᑎᓐᖓᔪᓪᓗ ᑐᓂᕐᕈᓯᕐᐳᑦ ᖁᔭᓕᑦᔪᑎᓂᒡᓗ ᑐᓂᕐᕈᓯᕐᓗᑎᒃ; ᐆᒻᒪᑎᒥᒍᓪᓗ ᑲᔪᖏᕐᑐᓕᒫᑦ ᐃᑯᐊᓪᓚᒃᑎᑕᒃᓴᓂᒃ ᑐᓂᕐᕈᓯᕐᐳᑦ. 32 ᐃᑯᐊᓚᑎᑕᒃᓴᓪᓗ ᑐᓂᕐᕈᑎᒋᔭᐅᔪᑦ ᐃᓄᖕᓂᑦ ᑲᑎᓪᓗᒋᑦ ᐃᒻᒧᒃᓯᐅᒊᑦ ᐸᖕᓂᖏᑦ 70ᐅᕗᑦ, ᓰᐲᑦ ᐊᖑᓴᓪᓗᖏᑦ 100ᐅᕗᑦ, ᓰᐲᓪᓗ ᓄᕐᕋᖏᑦ 200ᐅᕗᑦ; ᑖᒃᑯᐊᓕᒫᑦ ᐃᑯᐊᓚᑎᑕᒃᓴᐅᓪᓗᑎᒃ ᑐᓂᕐᕈᑎᒋᔭᐅᕗᑦ ᐊᑕᓂᕐᒧᑦ. 33 ᐃᑦᔪᕐᓁᓕᑎᑕᐅᔪᑦ ᑐᓂᕐᕈᑏᑦ ᐃᒻᒧᒃᓯᐅᒊᑦ ᐊᖑᓴᓪᓗᖏᑦ 600ᐅᓚᐅᕐᐳᑦ ᓰᐲᓪᓗ 3,000ᐅᓪᓗᑎᒃ. 34 ᑐᓂᕐᕈᓯᕐᑎᑦᓯᔩᓪᓕ ᐅᓄᓐᖏᓗᐊᕐᒪᑕ ᑐᖁᕅᔪᓐᓇᓚᐅᓐᖏᓚᑦ ᑐᓂᕐᕈᑎᒃᓴᓕᒫᓂᒃ ᐃᑯᐊᓪᓚᒋᐊᓕᖕᓂᒃ; ᑍᒤᒻᒪᑦ ᐃᓅᖃᑎᖏᑕ ᐃᓚᖏᑦ ᓕᕔᑏᑦ ᐃᑲᔪᓕᓚᐅᕐᐳᑦ ᐱᔭᕇᓚᐅᕐᑎᓐᓇᒋᑦ ᑐᓂᕐᕈᓯᕐᑎᑦᓯᔩᑦ ᐊᓯᖏᑦ ᐃᒻᒥᖕᓂᒃ ᐃᑦᔪᕐᓁᓕᑎᓚᐅᖏᓐᓂᖏᓐᓂ, ᓕᕔᑏᑦ ᐊᔪᐃᓐᓇᕐᓂᕐᓴᐅᓚᐅᕐᒪᑕ ᐃᑦᔪᕐᓁᑎᑕᐅᓯᒪᓂᕐᓴᐅᓚᐅᕐᐳᑦ ᐆᒻᒪᑎᒥᒃᑎᒍᑦ ᑐᓂᕐᕈᓯᕐᑎᑦᓯᔨᓂᑦ ᐃᒻᒥᖕᓂᒃ ᐃᑦᔪᕐᓁᓕᑎᑦᓴᕆᐊᓕᖕᓂᑦ. 35 ᐃᑯᐊᓪᓚᒋᐊᓖᑦ ᑐᓂᕐᕈᑏᑦ ᐅᓄᕐᓂᖏᓐᓄᑦ ᑐᓐᓄᖏᓐᓂᒃ ᓮᒪᖃᑎᒌᖕᓂᕐᒧᑦ ᑐᓂᕐᕈᑎᒃᓴᓂᒃ ᐊᑐᐃᓐᓇᖃᓕᓚᐅᕐᐳᑦ, ᐃᒥᒐᒃᓮᓪᓗ ᑐᓂᕐᕈᑏᑦ ᐃᑯᐊᓪᓚᒋᐊᓖᓪᓗ ᑐᓂᕐᕈᑏᑦ. ᑍᒤᓕᐅᕐᓗᑎᒃ ᐊᑕᓂᐅᑉ ᐃᒡᓗᖓᓄᑦ ᐱᔨᑦᓯᐅᑕᐅᔭᕆᐊᓖᑦ ᐅᑎᕐᑎᑕᐅᓚᐅᕐᐳᑦ. 36 ᕼᐃᓯᑬᐊᓗ ᐃᓄᓕᒫᓪᓗ ᖁᕕᐊᓱᓚᐅᕐᐳᑦ ᒎᑎᐅᑉ ᐱᓂᐊᕐᓂᕆᔭᖏᑦ ᐃᓄᖁᑎᒥᓄᑦ ᐱᑦᔪᑎᒋᓪᓗᒋᑦ; ᑕᒪᒃᑯᐊ ᐱᓂᐊᕐᓃᑦ ᕿᓚᒥᑯᓗᒃ ᐱᓇᓱᐊᕐᑕᐅᓚᐅᕐᒪᑕ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society