ᑯᕉᓂᑲ ᐂᑉᐸᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦᐊᖓᔪᖅᑳᕐᔪᐊᖅ ᐂᕼᐊᔅ ᔫᑕᒥ ᐊᑕᓃᑦ ᐂᑉᐸᖏᑦ 16:1-4 1 ᐂᕼᐊᔅ ᐊᕐᕌᒍᖃᓚᐅᕐᐳᖅ 20ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 16ᓂᒃ ᔨᕉᓴᓕᒥ; ᐱᐅᔪᓂᒃ ᐱᓂᐊᕐᓂᖃᓚᐅᓐᖏᓚᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓯᕗᓕᕐᒥᑐᑦ ᑍᕕᑎᐅᑉ ᐱᓂᐊᕐᓂᖓᑐᑦ ᐱᓇᓱᐊᓚᐅᓐᖏᓚᖅ. 2 ᐱᓂᐊᕐᓂᖃᓚᐅᕐᐳᕐᓕ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑎᑐᑦ, ᐊᒡᓛᑦ ᓴᓇᓚᐅᕐᐳᖅ ᓴᕕᕋᔭᖕᒥᒃ ᒎᑎᓐᖑᐊᒥᒃ ᐰᓕᒧᑦ. 3 ᐃᑯᐊᓪᓔᓚᐅᕐᐳᕐᓗ ᑎᐱᑦᓯᐊᕆᒃᑐᓂᒃ ᕼᐃᓇᒻ ᐃᕐᓂᖓᑕ ᓇᕐᓴᖓᓂ ᐊᑎᓕᖕᒥ, ᐃᕐᓂᓂᓗ ᐃᑯᐊᓪᓚᒃᐰᑦ ᑐᓂᕐᕈᓯᐅᑎᒋᓪᓗᒋᑦ, ᑕᒪᓐᓇ ᓇᕐᕈᓇᕐᓂᕋᕐᑕᐅᔪᖅ ᐱᓂᐊᕐᓂᕆᓚᐅᕐᐹ ᐃᓅᖃᑎᒌᒡᔪᐊᑦ ᐱᐅᓯᖏᑦ ᒪᓕᒡᓗᒋᑦ ᐊᑕᓂᐅᑉ ᐃᓇᖏᕐᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ. 4 ᑐᓂᕐᕈᓯᕐᐳᖅ ᐃᑯᐊᓪᓔᓪᓗᓂᓗ ᑎᐱᑦᓯᐊᕆᒃᑐᓂᒃ ᒎᑎᓐᖑᐊᓖᑦ ᑐᒃᓯᐊᕐᕕᖏᓐᓂ, ᖃᖅᑬᓪᓗ ᖄᖏᓐᓂ, ᓇᐹᕐᑐᐃᓪᓗ ᑐᖑᔪᕐᑐᑦ ᐊᑖᓂ. ᐅᓇᑕᕐᓃᑦ ᓯᕆᐊᒥᒃ ᐃᓴᕆᐊᓕᒥᐅᓂᒡᓗ ᐊᑕᓃᑦ ᐂᑉᐸᖏᑦ 16:5 5 ᑍᒤᒻᒪ ᐊᑕᓂᐅᑉ ᑖᑦᓱᒪ ᒎᑎᖓᑕ ᑐᓂᕚ ᓯᕆᐊᒥᐅᑉ ᐊᖓᔪᖅᑳᕐᔪᐊᖏᓐᓄᑦ, ᑖᒃᑯᐊᓗ ᓵᓚᒋᕚᑦ, ᐅᓄᕐᑐᕐᔪᐊᓪᓗ ᐊᐅᓪᓚᕈᑎᕔᑦ ᑎᒍᓪᓗᒋᑦ ᐂᑎᓪᓗᒋᓪᓗ ᑕᒫᓯᑰᓯᒧᑦ. ᑖᓐᓇᓗ ᑐᓂᔭᐅᕗᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ, ᑖᑦᓱᒪᓗ ᓵᓚᒋᕚ ᐅᓄᕐᑐᕐᔪᐊᓂᒃ ᑐᖁᕅᓪᓗᓂ. 6 ᐲᑲ ᕆᒪᓔᐊᐅᑉ ᐃᕐᓂᖓ ᑐᖁᑦᓯᓚᐅᕐᐳᖅ 120,000ᓂᒃ ᔫᑕᒥ ᐅᓪᓗᒥ ᐊᑕᐅᓯᕐᒥ, ᑖᒃᑯᐊᓕᒫᑦ ᓯᕘᕋᖏᑦᑐᑦ ᐊᖑᑏᑦ, ᐊᑕᓂᕐᒥᒃ ᕿᒤᓯᒪᓂᖏᓐᓄᑦ, ᓯᕗᓕᖏᑕ ᒎᑎᖓᓂᒃ. 7 ᔨᒃᕆᓗ, ᐊᔪᖏᑦᑐᕐᔪᐊᖅ ᐃᕗᕅᑎᒥᐅᑕᖅ, ᑐᖁᑦᓯᕗᖅ ᒫ-ᐊᓯᐊᒥᒃ ᐊᖓᔪᖅᑳᕐᔪᐊᑉ ᐃᕐᓂᖓᓂᒃ ᐊᔾᕆᑳᒥᒡᓗ ᐊᖓᔪᖅᑳᑉ ᐃᒡᓗᖓᓂ ᐊᖓᔪᖅᑳᖑᔪᒥᒃ ᐃᐅᓪᑳᓇᒥᒡᓗ ᐊᖓᔪᖅᑳᕐᔪᐊᑉ ᑐᖓᓕᖓᓂᒃ. 8 ᐃᓴᕆᐊᓕᒥᐅᓪᓗ ᐊᐅᓪᓚᐅᑦᔨᕗᑦ ᑎᒍᓪᓗᒋᑦ ᖃᑕᓐᖑᑎᑎᒃ 200,000, ᐊᕐᓁᑦ, ᐃᕐᓂᖏᑦ, ᐸᓂᖏᓪᓗ; ᐱᖁᑎᓂᒡᓗ ᐅᓄᕐᑐᕐᔪᐊᓂᒃ ᐊᐅᓪᓚᐅᑦᔨᕗᑦ, ᑐᓂᓪᓗᒋᓪᓗ ᓴᒥᐊᕆᐊᒥᐅᓄᑦ. ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐅᐱᑎ 9 ᐊᑕᓂᐅᓪᓕ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᑍᑲᓃᑦᑐᖃᕐᐳᖅ, ᐅᐱᑎᒥᒃ ᐊᑎᓕᖕᒥᒃ; ᐅᓇᑕᕐᑐᒃᓮᓪᓗ ᐸᕐᕆᐊᕐᐰᑦ ᓴᒥᐊᕆᐊᒧᑦ ᑎᑭᑦᑐᑦ, ᐅᖃᐅᑎᓪᓗᒋᓪᓗ, “ᑕᑯᒋᑦ, ᐊᑕᓂᐅᑉ ᓯᕗᓕᑦᓯ ᒎᑎᖓᑕ ᔫᑕᒥᐅᑉ ᓂᓐᖓᐅᑎᓯᒪᖕᒪᒋᑦ, ᑕᕝᕙ ᑐᓂᓚᐅᕐᐰᑦ ᐃᓕᑦᓯᓐᓄᑦ, ᑭᓯᐊᓂᓕ ᑐᖁᓚᐅᕐᐸᓯ ᓂᓐᖓᐅᑎᓪᓗᓯᐅᒃ ᑕᒪᓐᓇᓗ ᕿᓚᖕᒧᑦ ᑎᑭᐅᑎᕗᖅ. 10 ᒫᓐᓇᓗ ᐃᒤᓐᓇᓱᐊᕐᐳᓯ ᔫᑕᒥᐅᑦ ᔨᕉᓴᓕᒥᐅᓪᓗ ᐃᓄᖏᑦ ᓯᐊᓛᕐᑕᕆᔪᒪᓪᓗᒋᑦ, ᐊᖑᑏᑦ ᐊᕐᓁᓪᓗ, ᑕᕝᕙ ᐊᔪᕐᑐᓕᓐᖏᓚᓰ ᓇᖕᒥᓂᑦᓯᓐᓄᑦ ᐊᑕᓂᐅᑉ ᒎᑎᑦᓯ ᓵᖓᓂ? 11 ᒫᓐᓇ ᓈᓚᒃᓯᓐᖓ, ᑎᒍᓚᐅᕐᑕᓯ ᐅᑎᕐᑎᓯᐅᒃ ᓇᖕᒥᓂᖅ ᖃᑕᓐᖑᑎᑦᓯᓐᓂᑦ ᐱᒐᑦᓯᐅᒃ, ᐊᑕᓂᐅᑉ ᓂᓐᖓᐅᓯᕐᔪᐊᒥᓄᑦ ᖁᓚᖏᐊᓕᕐᒪᓯ.” 12 ᐃᕗᕅᑎᒥᐅᑉ ᐃᓄᖏᑕ ᐊᖓᔪᖅᑳᖏᑦ ᐅᑯᐊᖑᕗᑦ, ᐊᔭᕅᐊ ᔨᕼᐅᕼᐊᓇᐅᑉ ᐃᕐᓂᖓ, ᐱᕆᑬᐊ ᒥᓯᓕᒫᔅ ᐃᕐᓂᖓ, ᔨᕼᐃᓯᑬᐊ ᓴᓗᒻ ᐃᕐᓂᖓ, ᐊᒪᓴᓗ ᕼᐊᑦᓔᑉ ᐃᕐᓂᖓ, ᑖᒃᑯᐊ ᓵᓐᖓᓯᓚᐅᕐᐳᑦ ᐅᓇᑕᕐᑐᕕᓂᕐᓂᒃ ᐅᑎᕐᑐᓂᒃ, 13 ᐅᖃᕐᓗᑎᒡᓗ, “ᑎᒍᔭᓯ ᑕᒪᐅᓐᖓᐅᑎᔭᒃᓴᕆᓐᖏᓚᓯ, ᐊᑕᓂᐅᑉ ᓂᓐᖓᐅᓯᖓᓂᒃ ᕾᑎᑦᓯᓂᐊᕋᑦᓯ ᒫᓐᓇ ᐊᔪᕐᑐᓕᓂᕗᑦ ᐸᓯᔭᒃᓴᐅᓂᕗᓪᓗ ᐃᓚᓕᐅᑎᓗᒋᑦ. ᐸᓯᔭᒃᓴᐅᓂᕗᑦ ᐊᖏᓗᐊᓕᕇᕐᐳᑦ, ᓂᓐᖓᐅᓯᕐᔪᐊᒧᓪᓗ ᐃᓴᕆᐊᓕᒥᐅᑦ ᓵᓐᖓᔭᐅᓕᕇᕐᓗᑎᒃ.” 14 ᑕᕝᕙ ᐅᓇᑕᕐᑐᒃᓮᑦ ᑎᒍᓯᒪᔭᑎᒃ ᐃᓄᐃᑦ ᐱᖁᑏᓪᓗ ᕿᒪᒃᐰᑦ ᐊᖓᔪᖅᑳᓄᑦ ᐃᓄᖕᓄᓪᓗ ᑲᑎᓐᖓᔪᓄᑦ. 15 ᐊᖑᑏᓪᓗ ᑎᓕᔭᐅᔪᑦ ᐊᑎᖏᑎᒍᑦ ᒪᑭᓪᓗᑎᒃ ᑎᒍᔭᐅᓯᒪᔪᑦ ᐱᕔᑦ, ᐱᖁᑏᓪᓗ ᐃᓚᖏᓐᓂᑦ ᐊᓐᓄᕌᖃᖏᑦᑐᓕᒫᑦ ᐊᓐᓄᕌᕐᑎᑉᐰᑦ; ᐊᓐᓄᕌᕐᓗᒋᑦ ᐃᑎᒐᒍᑎᓂᒡᓗ ᑐᓂᓪᓗᒋᑦ, ᓂᕆᑎᑉᐰᑦ ᐃᒥᕐᑎᓪᓗᒋᓪᓗ, ᐅᕐᓱᕐᑎᕐᐰᓪᓗ; ᐊᔪᓗᐊᕐᑐᓕᒫᓪᓗ ᐃᑭᒪᑎᑉᐰᑦ ᓯᐅᑎᖅᑯᕐᑐᔪᓂ, ᖃᑕᓐᖑᑎᖏᓐᓄᓪᓗ ᐂᑎᑉᐰᑦ ᔨᕆᑯᒧᑦ, ᐃᒡᓗᒐᓴᖕᓄᑦ ᐹᒥᓂᒃ ᓇᐹᕐᑐᓕᖕᒧᑦ. ᑕᕝᕙ ᐅᑎᕐᐳᑦ ᓴᒥᐊᕆᐊᒧᑦ. ᐂᕼᐊᓯᐅᑉ ᐃᑲᔪᕐᑕᐅᔪᒪᓂᖓ ᐊᓯᕆᐊᒥᐅᓄᑦ ᐊᑕᓃᑦ ᐂᑉᐸᖏᑦ 16:7-9 16 ᑍᑦᓱᒪᓂᐅᑎᓪᓗᒍ ᐊᖓᔪᖅᑳᕐᔪᐊᖅ ᐂᕼᐊᔅ ᑎᓕᓯᕗᖅ ᐊᖓᔪᖅᑳᕐᔪᐊᒧᑦ ᐊᓯᕆᐊᒥᐅᑕᒧᑦ ᐃᑲᔪᕐᑕᐅᔪᒪᓪᓗᓂ. 17 ᐄᑐᒥᒥᐅᓪᓗ ᐅᐸᒍᑎᒋᐊᓪᓚᒃᑲᒥᒃ ᐅᓇᑕᕆᐊᕐᓗᑎᒃ ᔫᑕᒧᑦ ᓵᓚᒋᕔᑦ, ᑎᒍᔭᑎᒡᓗ ᐊᐅᓪᓚᕈᑎᓪᓗᒋᑦ. 18 ᐱᓕᔅᑍᓂᒥᐅᓪᓗ ᑎᑭᑉᐳᑦ ᐃᒡᓗᒐᓴᖕᓄᑦ ᓄᓇᓄᑦ ᐊᑦᑎᖕᓂᕐᓴᓃᑦᑐᓄᑦ ᔫᑕᐅᓪᓗ ᓯᕿᓂᐊᓃᑦᑐᓄᑦ, ᓄᓇᓖᓪᓗ ᐅᑯᐊ ᑎᒍᕔᑦ ᐱᑦ-ᓯᒥᔅ, ᐂᔭᓚᓐ, ᒋᑎᕉᑎ, ᓲᑯ ᓄᓇᓕᖏᓪᓗ, ᑎᒻᓇ ᓄᓇᓕᖏᓪᓗ, ᒋᒻᔪ ᓄᓇᓕᖏᓪᓗ, ᑍᑲᓂᓗ ᓄᓇᑖᕐᓗᑎᒃ. 19 ᐊᑕᓂᐅᑉ ᔫᑕ ᓴᓐᖐᓕᑎᓚᐅᕐᐹ ᐊᖓᔪᖅᑳᕐᔪᐊᖅ ᐂᕼᐊᔅ ᐱᓪᓗᒍ, ᑖᓐᓇ ᐃᓱᒪᕐᓱᕐᓗᓂ ᐊᑐᕐᓂᕐᓗᓚᐅᕐᒪᑦ ᔫᑕᒥᐅᓄᑦ ᐅᒃᐱᕐᓂᖃᓚᐅᖏᒻᒪᓪᓗ ᐊᑕᓂᕐᒧᑦ. 20 ᑍᒤᒻᒪᑦ ᑎᓪᒐᑦ-ᐱᓪᓂᓯᕆ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᑎᑭᓚᐅᕐᐳᖅ ᑖᑦᓱᒧᖓ ᐊᑭᕋᕐᑐᕐᓗᓂ, ᐋᓐᓂᐊᑎᖔᓚᐅᕐᐹᓗ ᓲᖑᓯᑎᓐᓇᓂᐅᒃ. 21 ᑕᕝᕙ ᐂᕼᐊᔅ ᑎᒍᓯᓚᐅᕐᐳᖅ ᐊᑕᓂᐅᑉ ᐃᒡᓗᖓᑕ ᐱᖁᑎᖏᓐᓂᒃ ᐊᖓᔪᖅᑳᕐᔪᐊᓪᓗ ᐃᒡᓗᖓᑕ ᐊᖓᔪᖅᑳᖁᑎᖑᖏᑕᓗ ᐱᖁᑎᖏᓐᓂᒃ, ᑐᓂᕐᕈᑎᒋᓪᓗᒋᓪᓗ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓄᑦ; ᑕᒪᑐᒧᖓᓕ ᐃᑲᔪᕐᑕᐅᓚᐅᓐᖏᓚᖅ. ᐂᕼᐊᔅ ᐊᔪᕐᑐᓕᓂᖏᑦ 22 ᐅᖁᒤᑦᑐᒃᑰᕐᑎᓪᓗᒍ ᐊᖓᔪᖅᑳᕐᔪᐊᖅ ᐂᕼᐊᔅ ᐅᒃᐱᓕᓚᓐᖏᓚᖅ ᐊᑕᓂᕐᒧᑦ; ᓱᕐᕋᓚᐅᓐᖏᓚᖅ ᐊᖓᔪᖅᑳᕐᔪᐊᖅ ᐂᕼᐊᔅ ᐱᐅᓯᕐᒥᓂᒃ. 23 ᑐᓂᕐᕈᓯᖃᑦᑕᓚᐅᕐᐳᖅ ᑕᒫᓯᑰᓯᐅᑉ ᒎᑎᓐᖑᐊᖏᓐᓄᑦ ᓵᓚᒋᔨᒋᓚᐅᕐᑕᒥᓄᑦ, ᐅᖃᕐᓗᓂ, “ᓯᕆᐊᒥᐅᑦ ᐊᖓᔪᖅᑳᕐᔪᐊᖏᑦ ᐃᑲᔪᓚᐅᕐᒪᒋᑦ, ᑐᓂᕐᕈᓯᕐᕕᒋᔪᒪᕙᒃᑲ ᐃᑲᔪᕐᑕᐅᓂᐊᕐᒪᖔᕐᒪ ᑖᒃᑯᓄᖓ.” ᑖᒃᑯᐊᓕ ᓱᒃᑯᑕᐅᑦᔪᑎᒋᖔᓚᐅᕐᐰᑦ, ᐃᓴᕆᐊᓕᒥᐅᓕᒫᓪᓗ. 24 ᐂᕼᐊᔅᓗ ᐱᖁᑏᑦ ᑲᑎᕐᓱᕐᐰᑉ ᒎᑎᐅᑉ ᐃᒡᓗᖓᓃᑦᑐᑦ ᓱᕋᕐᑎᕐᓗᒋᓪᓗ, ᐅᒃᑯᐊᓪᓗ ᒎᑎᐅᑉ ᐃᒡᓗᖓᓃᑦᑐᑦ ᒪᑐᕔᑦ; ᐃᒻᒥᓂᒡᓗ ᓴᓇᓚᐅᕐᐳᖅ ᑐᓂᕐᕈᓯᕐᕕᒃᓴᖕᓂᒃ ᔨᕉᓴᓕᐅᑉ ᑎᕆᖅᑯᓕᒫᖏᓐᓂ. 25 ᔫᑕᐅᓪᓗ ᐃᒡᓗᒐᓴᓕᒫᖏᓐᓂ ᒎᑎᓐᖑᐊᓄᑦ ᑐᒃᓯᐊᕐᕕᖕᓂᒃ ᓴᓇᕗᖅ ᑎᐱᑦᓯᐊᕆᒃᑐᓂᒃ ᐃᑯᐊᓚᑎᑦᓯᕕᒃᓴᓂᒃ ᒎᑎᓐᖑᐊᓄᑦ, ᑕᒪᑐᒧᖓᓗ ᐊᑕᓂᖅ ᓂᓐᖓᒃᓴᓚᐅᕐᐹ, ᓯᕗᓕᖏᑕ ᒎᑎᖓᑦ. 26 ᐱᓂᐊᕐᓂᖏᑕᓕ ᐃᓚᖏᑦ ᐱᓇᓱᐊᕐᓂᕆᓚᐅᕐᑕᖏᓪᓗ, ᓯᕗᓪᓕᕐᐹᒥᑦ ᑭᖑᓪᓕᕐᐹᒧᑦ, ᑕᑯᒋᑦ, ᑎᑎᕋᕐᓯᒪᕗᑦ ᐊᖓᔪᖅᑳᕐᔪᐊᑦ ᔫᑕᒥ ᐃᓴᕆᐊᓕᒥᐅᓪᓗ ᑎᑎᕋᕐᑕᐅᓯᒪᕕᖏᓐᓂ. 27 ᐂᕼᐊᔅᓗ ᑐᖁᖕᒪᑦ ᓯᕗᓕᒥᓄᐊᓚᐅᕐᐳᖅ, ᐃᓗᕕᕐᐹᓪᓗ ᐃᒡᓗᒐᓴᖕᓂ, ᔨᕉᓴᓕᒥ, ᐊᖓᔪᖅᑳᕐᔪᐊᓪᓕ ᐃᓴᕆᐊᓕᒥᐅᑦ ᐃᓗᕕᖏᓐᓄᐊᓚᐅᓐᖏᓛᑦ. ᐃᕐᓂᖓᓕ ᕼᐃᓯᑬᐊ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑖᑦᓱᒥᖓ ᐃᓇᖐᓪᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society