ᑯᕉᓂᑲ ᐂᑉᐸᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑕᒥ ᐊᖓᔪᖅᑳᕐᔪᐊᖅ ᐊᒪᔧᐊ

¹ ᐊᒪᔧᐊ ᐊᕐᕌᒍᖃᓚᐅᕐᐳᖅ 25ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᓂᒃ 29ᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᔨᕼᐅ-ᐊᑎᓐᒥᒃ ᔨᕉᓴᓕᒥᐅᑕᐅᔪᖅ.

² ᐊᑕᓂᐅᑉ ᑕᑯᓐᓇᕐᑕᖓᒍᑦ ᓈᒻᒪᒋᔭᖓᓂᒃ ᐱᓇᓱᐊᓚᐅᕐᐳᖅ, ᐆᒻᒪᑎᒥᒍᓪᓕ ᐸᓯᔭᒃᓴᐅᖏᑦᑑᓚᐅᓐᖏᓚᖅ.

³ ᐃᒤᓚᐅᕐᐳᖅ, ᐊᖓᔪᖅᑲᐅᕕᖓ ᐋᖅᑭᑦᓯᐊᑐᐊᕐᒪᑦ ᐱᔨᓂ ᑐᖁᓚᐅᕐᐰᑦ ᐊᑖᑕᖓᓂᒃ ᐊᖓᔪᖅᑳᕐᔪᐊᕐᒥᒃ ᑐᖁᑦᓯᓚᐅᕐᑐᑦ.

⁴ ᕿᑐᕐᖓᖏᓪᓕ ᑐᖁᓚᐅᓐᖏᓔᑦ, ᐱᖁᔧᑦ ᒨᓯᓯᐅᑉ ᐊᒡᓚᖏᑦ ᒪᓕᒡᓗᒋᑦ, ᐊᑕᓂᖅ ᐱᖁᔨᓚᐅᕐᒪᑦ ᐅᖃᕐᓗᓂ, “ᐊᑖᑕᐅᔪᑦ ᑐᖁᑕᐅᔪᒃᓴᐅᓐᖏᓚᑦ ᕿᑐᕐᖓᖏᑦ ᐱᓪᓗᒋᑦ, ᕿᑐᕐᖓᐅᔪᓪᓗ ᑐᖁᑕᐅᔪᒃᓴᐅᓐᖏᓚᑦ ᐊᑖᑕᖏᑦ ᐱᓪᓗᒋᑦ; ᐃᓄᒡᓕ ᓇᓪᓕᐊᑦ ᑐᖁᑕᐅᔪᒃᓴᐅᕗᖅ ᐃᒻᒥᓂᒃ ᐊᔪᕐᑐᓕᓂᕐᒥᓄᑦ.”

ᐅᓇᑕᕐᓂᖅ ᐄᑐᒥᒥᐅᓂᒃ

⁵ ᐊᒪᔧᐊᓗ ᑲᑎᕐᓱᐃᓚᐅᕐᐳᖅ ᔫᑕᒥ 1,000ᓄᑦ ᐊᖓᔪᖅᑲᐅᔪᓂᒃ 100ᓄᓪᓗ ᐊᖓᔪᖅᑲᐅᔪᓂᒃ, ᓯᕗᓕᖏᑕ ᑭᖑᕚᖏᑦ ᒪᓕᒡᓗᒋᑦ, ᔫᑕᒥᐅᓕᒫᑦ ᐱᓐᔭᒥᓂᒥᐅᓕᒫᓪᓗ, ᓈᓴᕐᐰ ᐊᕐᕌᒍᓖᑦ 20ᒥᑦ ᐅᖓᑖᓄᑦ, ᖃᐅᔨᓚᐅᕐᐳᕐᓗ 300,000 ᐊᖑᑏᑦ ᐊᑐᐃᓐᓇᐅᓂᖏᓐᓂᒃ, ᐅᓇᑕᕈᓐᓇᕐᑐᑦ, ᖃᓗᒋᐊᓄᑦ ᓴᐴᓗᑕᓄᓪᓗ.

⁶ ᑎᓕᓯᒋᕗᖅ 100,00ᓂᒃ ᐊᖑᑎᓂᒃ ᐱᔪᓐᓇᑦᓯᐊᕐᑐᓂᒃ ᓯᕘᕋᖏᑦᑐᓂᒃ ᐃᓴᕆᐊᓕᒥᐅᓂᑦ, ᐊᑭᓕᕐᓗᒋᓪᓗ 100ᓂᒃ ᑖᓚᓐᑎᓂᒃ ᓯᐅᓪᕕᕆᓂᒃ.

⁷ ᒎᑎᐅᓪᓕ ᐃᓄᖁᑎᖓᑕ ᐅᐸᒃᐹ ᐅᖃᐅᑎᓪᓗᒍᓗ, “ᐊᖓᔪᖅᑳᕐᔪᐊᖅ, ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖏᑦ ᐱᖃᑎᒋᑦᑍᓕᒃᑭᑦ, ᐊᑕᓂᖅ ᐃᓴᕆᐊᓕᒥᐅᓂᒃ ᐃᓚᖃᖏᒻᒪᑦ ᐃᕗᕅᑎᒥᐅᑦ ᑭᖑᕚᓕᒫᖏᓐᓂᒃ.

⁸ ᐃᓱᒪᖃᕈᕕᑦ ᓲᖑᓂᖃᕐᓂᐊᕋᓱᒋᓗᑎᑦ ᐅᓇᑕᕐᓂᕐᒥ, ᑕᕝᕙ ᒎᑎᐅᑉ ᐅᕐᕈᑎᑦᓱᒫᕐᐹᑎᑦ ᐊᑭᕋᕕᑦ ᓵᖓᓄᑦ; ᒎᑎ ᐱᔪᓐᓇᕐᓂᖃᕐᒪᑦ ᐃᑲᔪᕐᓗᓂ ᐅᕐᕈᑎᑦᓯᓗᓂᓘᓐᓃᑦ.”

⁹ ᐊᒪᔧᐊᓗ ᐅᖃᕐᐳᖅ ᒎᑎᐅᑉ ᐃᓄᖁᑎᖓᓄᑦ, “ᖃᓄᐃᓕᐅᕐᑐᒃᓴᐅᓕᕐᐱᑕᓕ ᐊᑭᓕᐅᑎᒋᓚᐅᕐᑕᒃᑲ 100 ᑖᓚᓐᑏᑦ ᐅᓇᑕᕐᑐᒃᓴᓄᑦ ᐃᓴᕆᐊᓕᒥᐅᓅᑦ ᐱᑦᔪᑎᒋᓗᒋᑦ?” ᒎᑎᐅᑉ ᐃᓄᖁᑎᖓ ᑭᐅᕗᖅ, “ᐊᑕᓂᐅᑉ ᑖᒃᑯᓇᓐᖓᑦ ᐅᓄᕐᓂᕐᓴᓂᒃ ᑐᓂᓯᕕᒋᔪᓐᓇᕐᐹᑎᑦ.”

¹⁰ ᑕᕝᕙ ᐊᒪᔧᐊᐅᑉ ᐅᓇᑕᕐᑐᒃᓮᑦ ᐅᑎᕐᑎᑉᐰᑦ ᐃᕗᕅᑎᒥᐅᑦ, ᐅᑎᖁᓪᓗᒋᓪᓗ ᐊᖏᕐᕋᖏᓐᓄᑦ. ᑍᒤᒻᒪᑦ ᑖᒃᑯᐊ ᓂᓐᖓᕕᒡᔪᐊᕐᐳᑦ ᔫᑕᒥᐅᓄᑦ, ᐅᑎᓚᐅᕐᐳᓪᓗ ᐊᖏᕐᕋᒥᖕᓄᑦ ᓂᓐᖓᐅᒪᒻᒪᕆᒡᓗᑎᒃ.

¹¹ ᐊᒪᔧᐊᓕ ᓴᐱᓕᓚᐅᓐᖏᓚᖅ, ᐃᓄᖁᑎᓂᓗ ᓯᕗᓕᕐᓗᒋᑦ, ᐊᐅᓪᓚᓚᐅᕐᐳᑦ ᓇᕐᓴᒧᑦ ᑕᕆᐅᕐᒧᑦ ᑕᕝᕙᓂᓗ ᑐᖁᑦᓯᕗᖅ 10,000ᓂᒃ ᓰᐊᕆᐅᑉ ᐃᓄᖏᓐᓂᒃ.

¹² ᔫᑕᐅᓪᓗ ᐃᓄᖏᑦ ᑎᒍᓯᕗᑦ ᐃᓄᖕᓂᒃ 10,000ᒋᐊᓪᓚᖕᓂᒃ ᐃᓅᑎᓪᓗᒋᑦ, ᐂᑎᑉᐰᓪᓗ ᐃᓐᓈᕉᑉ ᖄᖓᓄᑦ, ᑕᕝᕙᓐᖓᓪᓗ ᐃᔪᒃᑲᕐᑎᑉᐰᑦ ᑐᖁᔪᐃᓐᓇᐅᕗᓪᓗ ᓱᓇᒃᓴᐅᔪᓐᓃᕐᓗᑎᒃ.

¹³ ᐅᓇᑕᕐᑐᒃᓮᓪᓕ ᐊᒪᔧᐊᐅᑉ ᐅᑎᕐᑎᓚᐅᕐᑕᖏᑦ, ᐃᓚᐅᖁᓇᒋᑦ ᐅᓇᑕᕐᑐᓄᑦ, ᐋᑎᕆᔭᕐᑐᕐᐳᑦ ᔫᑕᐅᑉ ᐃᒡᓗᒐᓴᖏᓐᓄᑦ, ᓴᒥᐊᕆᐊᒥᑦ ᐱᒋᐊᕐᓗᑎᒃ ᐱᑦ-ᕼᐅᕋᓐ ᑎᑭᓪᓗᒍ, ᑐᖁᑦᓯᕗᓪᓗ 3,000ᓂᒃ ᑖᒃᑯᓇᓂ, ᐱᖁᑎᖏᓐᓂᒡᓗ ᐅᓄᕐᑐᓂᒃ ᑎᒍᓯᓪᓗᑎᒃ.

¹⁴ ᐊᒪᔧᐊᓕ ᐅᑎᕋᒥ ᑐᖁᕅᓚᐅᕐᓗᓂ ᐄᑐᒥᒥᐅᓂᒃ, ᓰᐊᕆᐅᑉ ᐃᓄᖏᑕ ᒎᑎᓐᖑᐊᖏᑦ ᓇᒃᓴᓚᐅᕐᐰᑦ, ᒎᑎᒥᑕᓗ ᐃᓚᖏᓐᓄᑦ ᐃᓚᓕᐅᑎᕔᑦ, ᐹᒻᒪᒃᑎᕐᕕᒋᕔᑦ, ᐃᑯᐊᓪᓔᕕᒋᓪᓗᒋᓪᓗ ᑎᐱᑦᓯᐊᕆᒃᓴᐅᒻᒥᒃ.

¹⁵ ᑍᒤᒻᒪ ᐊᑕᓂᐅᑉ ᓂᓐᖓᒡᕕᒋᕚ ᐊᒪᔧᐊ ᐅᖃᕐᑎᓂᓗ ᑎᓕᕚ ᑖᑦᓱᒧᖓ ᐅᖃᕐᓗᓂᓗ, “ᓱᖕᒪᑦ ᐋᖅᑭᒃᓯᓚᐅᕐᐲᑦ ᐃᓄᐃᑦ ᒎᑎᖏᓐᓂᒃ, ᐃᓄᖁᑎᒥᓂᒃ ᐱᐅᓕᒃᓯᔪᓐᓇᓚᐅᖏᑦᑐᓂᒃ ᐃᓕᖕᓂᑦ?”

¹⁶ ᓱᓕ ᐅᖃᓪᓚᒃᑎᓪᓗᒍ ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᐊᖓᔪᖅᑳᕐᔪᐊᒨᑦ ᐅᖃᐅᑦᔨᒋᐊᕐᑎᓐᖑᕐᑎᓚᐅᕐᐱᒌᑦ? ᓄᖅᑲᓕᕆ! ᓱᖕᒪᑦ ᑐᖁᑕᐅᔪᒃᓴᐅᕖᑦ?” ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᓄᖅᑲᕐᐳᖅ, ᐅᖃᕐᓗᓂᓗ, “ᒫᓐᓇ ᖃᐅᔨᕗᖓ ᒎᑎᐅᑉ ᐊᓯᕈᕐᓂᐊᓕᕐᒪᑎᑦ, ᑍᒫᒃ ᐱᓇᓱᐊᕐᓃᑦ ᐱᓪᓗᒍ ᐅᖃᐅᓯᓐᓂᒃ ᓈᓚᓚᐅᖏᓐᓇᕕᑦ.”

ᐅᓇᑕᕐᓃᑦ ᐃᓴᕆᐊᓕᒥᐅᓂᒃ

¹⁷ ᐊᒪᔧᐊᓕ ᔫᑕᐅᑉ ᐊᖓᔪᖅᑳᕐᔪᐊᖓ ᐃᓱᒪᓕᐅᕐᑕᐅᒐᒥ ᑎᓕᓯᕗᖅ ᔪᐊᓯᒧᑦ ᔨᕼᐅᐊᕼᐊᓯᐅᑉ ᐃᕐᓂᖓᓄᑦ, ᔨᕼᐆᑉ ᐃᕐᓂᖓᓄᑦ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐅᖃᕐᓗᓂᓗ, “ᕾᓗᑎᑦ ᓵᓐᖓᐅᑎᓗᓄᒃ ᐅᓇᑕᓚᐅᕐᓗᒃ.”

¹⁸ ᔪᐊᓯᓗ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑎᓕᓯᕗᖅ ᐊᒪᔧᐊᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, ᐅᖃᕐᓗᓂ, “ᐅᕐᐱᒐᖅ ᑲᑭᓐᓇᕐᑐᓕᒃ ᓕᐸᓇᒦᑦᑐᖅ ᑎᓕᓯᓚᐅᕐᐳᖅ ᓰᑕᕆᒧᑦ ᓕᐸᓇᓂᒦᑦᑐᒧᑦ, ᐅᖃᕐᓗᓂ, ‘ᐸᓃᑦ ᑐᓂᓚᐅᕈᒃ ᐃᕐᓂᓐᓄᑦ ᓄᓕᐊᕐᑖᖑᖁᓪᓗᒍ.’ ᐃᕐᓯᓇᕐᑐᒥᓪᓗ ᐆᒪᔪᐊᓗᖕᒥᑦ ᓕᐸᓇᓂᒦᑦᑐᒧᑦ ᐊᖅᑯᓵᕐᑕᐅᒐᒥ ᐅᕐᐱᒐᖅ ᑲᑭᓐᓇᕐᑐᓕᒃ ᑐᓪᓕᕋᕐᑕᐅᕗᖅ.

¹⁹ ᐃᓛᒃ ᐅᖃᕋᓗᐊᕐᐳᑎᑦ, ‘ᐄᑐᒥᒥᐅᓂᒃ ᓵᓚᖃᓚᐅᕐᐳᖓ,’ ᐆᒻᒪᑏᓪᓗ ᐱᐅᔪᕆᓂᕐᒧᑦ ᖁᕝᕙᕐᑎᑕᐅᕗᖅ. ᒫᓐᓇᓕ ᐊᖏᕐᕋᕐᓯᒪᑐᐃᓐᓇᓕᕆᑦ; ᓱᖕᒪᑦ ᐊᑲᐅᖏᑦᑐᒥᒃ ᓴᖅᑭᑦᑎᓇᓱᐊᕐᐲᑦ ᐅᕐᕈᑦᔪᑎᒃᓴᕐᓂᒃ? ᐃᕝᕕᑦ ᔫᑕᒥᐅᓪᓗ ᐃᓚᒋᓗᒋᑦ.”

²⁰ ᐊᒪᔧᐊᓕ ᓈᓚᒍᒪᓚᐅᓐᖏᓚᖅ; ᑕᒪᓐᓇ ᒎᑎᐅᑉ ᐋᖅᑭᓚᐅᕐᒪᒍ, ᐊᑭᕋᖏᓐᓄᑦ ᑐᓂᔪᒪᓪᓗᒍ, ᐄᑐᒥᒥᐅᑦ ᒎᑎᓐᖑᐊᖏᓐᓂᒃ ᐱᓚᐅᕐᓂᖏᑦ ᐱᑦᔪᑎᒋᓪᓗᒋᑦ.

²¹ ᑕᕝᕙ ᔪᐊᓯ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐊᐅᓪᓚᕐᐳᖅ; ᑖᒃᑯᐊᒃ ᐊᒪᔧᐊᒃᑯᒃ ᔫᑕᒥᐅᓪᓗ ᐊᖓᔪᖅᑳᕐᔪᐊᖓ ᐅᓇᑕᓕᕐᐴᒃ ᐱᑦ-ᓯᒥᔅᒥ, ᔫᑕᐅᑉ ᓄᓇᖓᓂ.

²² ᔫᑕᒥᐅᓪᓗ ᓵᓚᐅᕗᑦ ᐃᓴᕆᐊᓕᒥᐅᓄᑦ, ᐊᖑᑎᓕᒫᓪᓗ ᕿᒪᒃᓯᕗᑦ ᐊᖏᕐᕋᒥᖕᓄᑦ.

²³ ᑕᕝᕙ ᔪᐊᓯ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑎᒍᓯᕗᖅ ᐊᒪᔧᐊᒥᒃ ᔫᑕᐅᑉ ᐊᖓᔪᖅᑳᕐᔪᐊᖓᓂᒃ, ᔪᐊᓯᐅᑉ ᐃᕐᓂᖓᓂᒃ, ᔨᕼᐅᐊᕼᐊᔨᐅᑉ ᐃᕐᖑᑕᖓᓂᒃ, ᐱᑦ-ᓯᒥᔅᒥ; ᔨᕉᓴᓕᒧᐊᕈᑎᕚᓗ, ᐊᕙᓗᕐᔪᐊᖓᓗ ᔨᕉᓴᓕᐅᑉ ᓱᕋᒃᑎᕐᐹ ᐃᕗᕅᒻ ᐃᑎᕐᑕᕐᕕᖓᓂᑦ ᑎᕆᖅᑯᒥᒃ ᐊᑎᓕᖕᒧᑦ ᐃᑎᕐᑕᕐᕕᖕᒧᑦ ᑎᑭᓪᓗᒍ 200ᓂᒃ ᐆᒃᑑᑎᓂᒃ ᑕᑭᓂᓕᖕᒥᒃ.

²⁴ ᒎᓗᓕᒫᓪᓗ ᓯᐅᓪᕕᕆᓕᒫᓪᓗ ᑎᒍᕔᑦ, ᐱᖁᑎᓕᒫᓪᓗ ᓇᓂᔪᓐᓇᕐᑕᓂ ᒎᑎᐅᑉ ᐃᒡᓗᖓᓃᑦᑐᑦ, ᐅᐱᑦ-ᐄᑕᒻ ᐱᖃᓯᐅᑎᓪᓗᒍ; ᐊᖓᔪᖅᑳᕐᔪᐊᓪᓗ ᐱᖁᑎᖏᑦ ᐃᒡᓗᖓᓃᑦᑐᑦ ᑎᒍᒋᕔᑦ, ᐃᓄᖕᓂᒡᓗ ᑎᒍᓯᒋᕗᖅ, ᐅᑎᕐᓗᓂᓗ ᓴᒥᐊᕆᐊᒧᑦ.

²⁵ ᐊᒪᔧᐊ ᔪᐊᓯᐅᑉ ᐃᕐᓂᖓ ᔫᑕᐅᑉ ᐊᖓᔪᖅᑳᕐᔪᐊᖓ ᐃᓅᓚᐅᕐᐳᖅ ᐊᕐᕌᒍᓂᒃ 15ᓂᒃ ᔪᐊᓯᐅᑉ ᔨᕼᐅᐊᕼᐊᓯᐅᑉ ᐃᕐᓂᖓᑕ ᑐᖁᓂᖓᑕ ᑭᖑᓂᖓᓂ, ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑕ.

²⁶ ᐊᒪᔧᐊᐅᓪᓕ ᐱᓂᐊᕐᓂᖏᑕ ᐃᓚᖏᑦ ᐱᒋᐊᕐᓂᖓᓂᑦ ᐃᓱᐊᓄᑦ ᑎᑭᓪᓗᒍ, ᑎᑎᕋᕐᓯᒪᕗᑦ ᐊᖓᔪᖅᑳᕐᔪᐊᑦ ᔫᑕᒥ ᐃᓴᕆᐊᓕᒥᐅᓪᓗ ᑎᑎᕋᕐᓯᒪᕕᖏᓐᓂ.

²⁷ ᑍᒪᓐᖓᓂᑦ ᐊᒪᔧᐊᐅᑉ ᐊᑕᓂᕐᒥᒃ ᕿᒤᓂᖓᓂᑦ ᔨᕉᓴᓕᒥᐅᑦ ᐊᑭᕋᕐᑐᓕᓚᐅᕐᐹᑦ, ᕿᒫᓚᐅᕐᐳᕐᓗ ᓚᑮᓯᒧᑦ. ᐊᑭᕋᕐᑐᕐᑎᖏᑕᓕ ᑕᕝᕗᖓ ᒪᓕᒃᐹᑦ ᓚᑮᓯᒧᑦ, ᑕᕝᕙᓂᓗ ᑐᖁᓪᓗᒍ.

²⁸ ᑎᒥᖓᓗ ᓇᒃᓴᕐᐹᑦ ᕿᒻᒥᕐᔪᐊᕐᒦᑎᓪᓗᒍ; ᐃᓗᕕᕐᓗᒍᓗ ᓯᕗᓕᖏᑕ ᑍᕕᑎᐅᑉ ᐃᒡᓗᒐᓴᖏᓐᓂ.