ᑯᕉᓂᑲ ᐂᑉᐸᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐊᓯ ᐊᖓᔪᖅᑳᕐᔪᐊᖅ ᔫᑕᒥ

¹ ᔪᐊᓯ 7ᓂᒃ ᐊᕐᕌᒍᖃᓚᐅᕐᐳᖅ ᐊᖓᔪᖅᑳᕐᔪᐊᓐᖑᕐᑎᑕᐅᑎᓪᓗᒍ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 40ᓂᒃ ᔨᕉᓴᓕᒥ; ᐊᓈᓇᖓ ᐊᑎᖃᕐᐳᖅ ᔨᐱᐊᒥᒃ ᐱᐊᕐᓯᐸᒥᐅᑕᖅ.

² ᔪᐊᓯ ᐃᓱᐊᕐᑐᒥᒃ ᐱᓇᓱᐊᓚᐅᕐᐳᖅ ᐊᑕᓂᐅᑉ ᓵᖓᓂ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐃᓅᓂᓕᒫᖓᓂ.

³ ᔨᕼᐅᐃᐊᑕᐅᓪᓗ ᓄᓕᐊᓂᒃᑎᑉᐹ ᒪᕐᕉᖕᓂᒃ, ᐃᕐᓂᕐᑖᓚᐅᕐᐳᖅ ᐸᓂᒃᑖᕐᓗᓂᓗ ᐅᓄᕐᑐᓂᒃ.

⁴ ᑕᒪᑐᒪ ᑭᖑᕐᖓᒍᑦ ᔪᐊᓯ ᐆᒻᒪᑎᒥᒍᑦ ᐃᓱᒪᖃᓕᕐᐳᖅ ᐊᑕᓂᐅᑉ ᐃᒡᓗᖓ ᐋᖅᑭᒋᐊᕈᒪᓪᓗᒍ.

⁵ ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ ᑲᑎᖁᕔᑦ, ᐅᖃᐅᑎᓪᓗᒋᓪᓗ, “ᔫᑕᐅᑉ ᐃᒡᓗᒐᓴᖏᓐᓄᑦ ᐂᓚᐅᕆᑦᓯ, ᑮᓇᐅᔭᓂᒡᓗ ᑲᑎᕐᓱᐃᓗᓯ ᐃᓴᕆᐊᓕᒥᐅᓕᒫᓂᑦ ᒎᑎᑦᓯ ᐃᒡᓗᖓ ᐋᖅᑭᒋᐊᕐᑕᐅᔪᓐᓇᕐᓯᖁᓪᓗᒍ ᐊᕐᕌᒍᑕᒫᑦ; ᑕᒪᓐᓇ ᑐᐊᕕᕐᓗᓯ ᐱᓇᓱᐊᓕᕐᓯᐅᒃ.” ᓕᕔᑎᓪᓕ ᐱᒋᐊᓴᐅᑎᒋᓚᐅᓐᖏᓚᑦ ᑕᒪᑐᒥᖓ.

⁶ ᑕᕝᕙ ᐊᖓᔪᖅᑳᕐᔪᐊᑉ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓ ᔨᕼᐅᐃᐊᑕ ᕾᖁᕚ, ᐅᖃᐅᑎᒡᓗᒍᓗ, “ᓱᖕᒪᑦ ᐱᖁᔨᓚᐅᓐᖏᓚᑎᑦ ᓕᕔᑎᓂᒃ ᐂᒃᓯᖁᓪᓗᒋᑦ ᔫᑕᒥᑦ ᔨᕉᓴᓕᒥᓪᓗ ᑲᑎᕐᓱᐃᖁᓪᓗᒋᑦ ᑮᓇᐅᔭᓂᒃ ᒎᑎᐅᑉ ᐱᔨᖓᑕ ᒨᓯᓯᐅᑉ ᑐᓂᔭᐅᖃᑦᑕᖁᓯᒪᔭᖏᓐᓂᒃ, ᐃᓴᕆᐊᓕᒥᐅᓂᑦ ᑐᒃᓯᐊᕆᐊᕐᐸᒃᑐᓂᑦ ᑐᐱᕐᒧᑦ ᐊᑕᓂᐅᑉ ᓇᔪᕐᑕᖓᓄᑦ?”

⁷ ᐊᑕᓔᐊᐅᑉ ᐃᕐᓂᖏᑦ, ᑖᑦᓱᒪ ᐱᐅᖏᑦᑐᓕᔫᑉ, ᒎᑎᐅᑉ ᐃᒡᓗᖓᓄᑦ ᐃᑎᓚᐅᕐᒪᑕ ᐃᓵᕐᓗᑎᒃ; ᐃᑦᔪᕐᓁᑦᑑᑎᑕᐅᔪᓪᓗ ᐅᓄᕐᑐᑦ ᐊᑕᓂᐅᑉ ᐃᒡᓗᖓᓃᑦᑐᑦ ᐊᑐᓕᓚᐅᕐᐰᑦ ᑐᒃᓯᐊᓕᕌᖓᒥᒃ ᐰᓕᒧᑦ.

⁸ ᑕᕝᕙ ᐊᖓᔪᖅᑳᕐᔪᐊᑉ ᐱᖁᔨᓂᖓᒍᑦ, ᐃᒃᓯᕐᕕᓕᐅᕐᐳᑦ, ᐃᓕᓪᓗᒍᓗ ᐃᑎᕐᑕᕐᕕᖕᒧᑦ ᐊᑕᓂᐅᑉ ᐃᒡᓗᖓᑕ ᓯᓚᑖᓄᑦ.

⁹ ᓇᓗᓁᕐᓯᕗᓪᓗ ᑐᓴᕐᑎᑦᓯᓪᓗᑎᒃ ᔫᑕᒥᐅᓕᒫᓄᑦ ᔨᕉᓴᓕᒥᐅᓕᒫᓄᓪᓗ, ᐊᑕᓂᕐᒧᐊᕐᓯᖃᑦᑕᖁᓪᓗᒋᑦ ᑲᑎᕐᓱᐃᓗᑎᒃ ᒎᑎᐅᑉ ᐱᔨᖓᑕ ᒨᓯᓯᐅᑉ ᑐᓂᔭᐅᖃᑦᑕᖁᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ ᐊᑐᕐᑕᐅᓚᐅᕐᓯᒪᔪᓂᒃ ᐃᓄᖃᔪᐃᑦᑐᒦᑎᓪᓗᒋᑦ.

¹⁰ ᐊᖓᔪᖅᑳᑦ ᐃᓄᓕᒫᓪᓗ ᖁᕕᐊᓱᒡᓗᑎᒃ ᑐᓂᓯᓚᐅᕐᐳᑦ ᑖᒃᓰᕈᑎᒥᖕᓂᒃ ᐃᓕᓪᓗᒋᓪᓗ ᐃᒃᓯᕐᕕᖕᒧᑦ ᑕᑕᓚᐅᖏᓐᓂᖓᓂ.

¹¹ ᐃᒃᓯᕐᕕᒡᓗ ᓕᕔᑎᓂᑦ ᑐᓂᔭᐅᔭᕌᖓᑦ ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖏᓐᓄᑦ, ᑕᑯᔭᕌᖓᒥᒃ ᑮᓇᐅᔧᑦ ᐅᓄᕐᓂᖏᓐᓂᒃ, ᐊᖓᔪᖅᑳᕐᔪᐊᑉ ᑎᑎᕋᕐᑎᖏᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ ᕾᖃᑦᑕᓚᐅᕐᐳᑦ ᐃᒃᓯᕐᕕᒡᓗ ᓈᕕᖃᑦᑕᓚᐅᕐᐹᑦ, ᐅᑎᕐᑎᓪᓗᒍᓗ ᐃᓂᖓᓄᑦ. ᑍᒤᓕᐅᖃᑦᑕᓚᐅᕐᐳᓪᓗ ᖃᐅᑕᒫᑦ, ᑲᑎᕐᓱᐃᓚᐅᕐᐳᓪᓗ ᑮᓇᐅᔭᓂᒃ ᐅᓄᕐᑐᕐᔪᐊᓂᒃ.

¹² ᐊᖓᔪᖅᑳᕐᔪᐊᓪᓗ ᔨᕼᐅᐃᐊᑕᐅᓪᓗ ᑐᓂᖃᑦᑕᓚᐅᕐᐰᑦ ᐱᓇᓱᐊᕐᑎᓄᑦ ᐊᖓᔪᖅᑳᖑᔪᓄᑦ ᐊᑕᓂᐅᑉ ᐃᒡᓗᖓᓂ, ᐱᓇᓱᐊᕐᑐᒃᓴᓂᒡᓗ ᑎᓕᓯᕗᑦ ᐅᔭᕋᓕᕆᔨᓂᒃ ᕿᔪᓕᕆᔨᓂᒡᓗ ᐊᑕᓂᐅᑉ ᐃᒡᓗᖓᓂᒃ ᐋᖅᑭᒋᐊᕐᓯᖁᓪᓗᒋᑦ, ᓴᕕᕋᔭᓕᕆᔨᓂᒡᓗ ᑲᓐᓄᔭᓕᕆᔨᓂᒡᓗ ᐱᓇᓱᐊᕐᓂᐊᕐᑐᓂᒃ ᐊᑕᓂᐅᑉ ᐃᒡᓗᖓ ᐋᖅᑭᒋᐊᕐᑕᐅᖁᓪᓗᒍ.

¹³ ᑕᕝᕙ ᑎᓕᔭᐅᔪᑦ ᐱᓇᓱᐊᓕᓚᐅᕐᐳᑦ, ᐱᓇᓱᐊᕐᑕᖓᓪᓗ ᑲᔪᓯᕙᓪᓕᐊᑦᓯᐊᕐᓗᓂ ᑖᒃᑯᑎᒎᓇᖅ, ᒎᑎᐅᓪᓗ ᐃᒡᓗᖓ ᐱᐅᓯᕆᓚᐅᕐᑕᖓᓄᑦ ᐋᖅᑭᑦᓯᐊᓚᐅᕐᐹᑦ ᖃᓄᐃᓕᖓᓂᕆᔭᕆᐊᖃᕐᑕᖏᓪᓗ ᐃᓂᖓᓅᖅᑲᑦᓯᐊᕐᓗᒋᑦ ᐊᑦᑕᕐᓁᓕᑦᓯᐊᕐᓗᒍᓗ ᐱᔭᕇᑦᓯᐊᓚᐅᕐᐹᑦ.

^14a ᐱᔭᕇᕐᓯᒪᓕᕋᒥᒡᓗ, ᑮᓇᐅᔧᑦ ᐊᒥᐊᒃᑯᖏᑦ ᑐᓂᕔᑦ ᐊᖓᔪᖅᑳᕐᔪᐊᕐᒧᑦ ᔨᕼᐅᐃᐊᑕᒧᓪᓗ, ᑖᒃᑯᓇᓐᖓᓪᓗ ᓴᓇᑎᑦᓯᕗᑦ ᐊᑕᓂᐅᑉ ᐃᒡᓗᖓᑕ ᐱᒃᓴᖏᓐᓂᒃ, ᐱᖁᑎᓂᒃ ᐱᔨᑦᓯᕈᑎᒃᓴᓂᒃ ᑐᓂᕐᕈᓯᕐᓂᕐᒧᑦ, ᐃᓯᕐᓗᐊᕐᓂᑎᑦᓯᓂᕐᒧᑦ ᐃᓂᒃᓴᓂᒃ, ᐴᒍᑕᕐᓂᒡᓗ ᒎᓗᓂᒃ ᓯᐅᓪᕕᕆᓂᒡᓗ.

ᔨᕼᐅᐃᐊᑕᐅᑉ ᑐᖁᓂᖓ

^14b ᐃᑯᐊᓚᒋᐊᓕᖕᓂᒡᓗ ᑐᓂᕐᕈᓯᖃᑦᑕᓕᓚᐅᕐᐳᑦ ᑲᔪᓯᑦᓯᐊᕐᓗᑎᒃ ᔨᕼᐅᐃᐊᑕᐅᑉ ᐃᓅᓂᓕᒫᖓᓂ.

¹⁵ ᔨᕼᐅᐃᐊᑕᓕ ᐃᓐᓇᕈᓚᐅᕐᐳᖅ ᐅᓪᓗᖏᑦ ᓈᖕᒪᑕ, ᑐᖁᕗᖅ; ᐊᕐᕌᒍᖃᓕᓚᐅᕐᐳᖅ 130ᓂᒃ ᑐᖁᑎᓪᓗᒍ.

¹⁶ ᐃᓗᕕᕐᐹᓪᓗ ᑍᕕᑎᐅᑉ ᐃᒡᓗᒐᓴᖏᓐᓂ ᐊᖓᔪᖅᑳᕐᔪᐊᑦ ᐊᑯᕐᖓᓐᓄᑦ, ᐱᑦᓯᐊᓚᐅᕐᓂᖓ ᐱᓪᓗᒍ ᐃᓴᕆᐊᓕᒥ, ᒎᑎᒧᑦ ᐃᒡᓗᖁᑎᖓᓄᓪᓗ.

¹⁷ ᔨᕼᐅᐃᐊᑕᐅᓪᓕ ᑐᖁᓂᖓᑕ ᑭᖑᕐᖓᒍᑦ ᐊᖓᔪᖅᑳᑦ ᔫᑕᒥᐅᑦ ᐊᖓᔪᖅᑳᕐᔪᐊᕐᒧᐊᕐᐳᑦ ᓈᓚᒃᑕᐅᔪᒪᓪᓚᕆᒃᓗᑎᒃ; ᑕᕝᕙ ᐊᖓᔪᖅᑳᕐᔪᐊᑉ ᓈᓚᓕᕐᐰᑦ.

¹⁸ ᐊᑕᓂᐅᓪᓗ ᐃᒡᓗᖓ ᓯᕗᓕᖏᑦᑕ ᒎᑎᖓᑦ ᑲᒪᒋᔪᓐᓃᕐᐹᑦ, ᐱᔨᑦᓯᖔᓕᕐᓗᑎᒡᓗ ᕿᔪᖕᓄᑦ ᓴᓇᓯᒪᔪᓄᑦ ᒎᑎᓐᖑᐊᓄᓪᓗ ᐊᓯᕋᒧᑦ. ᓂᓐᖓᒡᕕᐅᓂᕐᒧᓪᓗ ᑎᑭᑕᐅᕗᑦ ᔫᑕ ᔨᕉᓴᓕᓗ ᐊᔪᕐᑐᓕᓂᕐᒧᑦ ᐸᓯᔭᒃᓴᐅᓂᖏᑦ ᐱᓪᓗᒋᑦ.

¹⁹ ᑍᒤᒃᑲᓗᐊᕐᑎᓪᓗᒋᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᓂ ᑎᓕᓚᐅᕐᐰᑦ ᑖᒃᑯᓄᖓ ᐅᑎᖁᓪᓗᒋᑦ ᐊᑕᓂᕐᒧᑦ; ᐅᖃᐅᑦᔨᒋᐊᕈᑕᐅᔪᓪᓕ ᑖᒃᑯᓄᖓ, ᓈᓚᒃᑕᐅᓚᐅᓐᖏᓚᑦ ᑖᒃᑯᓇᓐᖓᑦ.

²⁰ ᑕᕝᕙ ᒎᑎᐅᑉ ᐊᓂᕐᓂᖓ ᐃᑎᕐᐳᖅ ᓴᑲᕅᐊᒧᑦ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐃᕐᓂᖓᓄᑦ ᐊᐅᓚᓕᕐᓗᒍ; ᓂᑯᕕᑉᐳᕐᓗ ᐳᕐᑐᓂᕐᓴᒧᑦ, ᐃᓄᐃᓪᓗ ᐅᖃᐅᑎᓪᓗᒋᑦ, “ᒎᑎ ᐃᒫᒃ ᐅᖃᕐᐳᖅ, ‘ᓱᖕᒪᑦ ᐊᑕᓂᐅᑉ ᐱᖁᔭᖏᓐᓂᒃ ᓈᓚᓐᖏᓚᓯ? ᐃᓕᑦᓯᓐᓂᒃ ᐱᔪᓐᓇᕐᓯᕙᓪᓕᐊᑎᖏᓐᓇᑦᓯ, ᐊᑕᓂᕐᒥᒃ ᕿᒤᓚᐅᕋᑦᓯ, ᑕᕝᕙ ᑖᑦᓱᒪ ᕿᒪᓚᐅᕆᕚᓯ.’”

²¹ ᑖᑦᓱᒥᖓᓕ ᐊᑭᕋᕐᑐᓕᕐᐳᑦ, ᐊᖓᔪᖅᑲᕐᔪᐊᓪᓗ ᑎᓕᓯᓂᖓ ᒪᓕᒡᓗᒍ ᒥᓪᓗᕐᐹᑦ ᐊᑕᓂᐅᑉ ᐃᒡᓗᖓᑕ ᓯᓚᓪᓕᐅᔭᖓᓂᑦ.

²² ᐊᖓᔪᖅᑳᕐᔪᐊᖅ ᔪᐊᓯ ᐃᖅᑲᐅᒪᓚᐅᓐᖏᓚᖅ ᐱᑦᓯᐊᕐᕕᐅᓚᐅᕐᓂᕐᒥᓂᒃ ᔨᕼᐅᐃᐊᑕᒧᑦ ᓴᑲᕅᐊᐅᑉ ᐊᑖᑕᖓᓄᑦ, ᐃᕐᓂᖓᓕ ᑐᖁᑉᐹᑦ; ᑐᖁᓕᕐᓗᓂ ᐅᖃᕐᐳᖅ, “ᐊᑕᓂᐅᑉ ᑕᒪᓐᓇ ᑕᑯᓕᐅᒃ, ᐊᑭᓂᐊᕐᓗᓯᓗ!”

ᔪᐊᓯᐅᑉ ᐊᐅᓚᑦᓯᓂᖓᑕ ᐃᓱᐊ

²³ ᐊᕐᕌᒎᑉ ᓄᕐᖑᐊᓂ ᓯᕆᐊᒥᐅᑦ ᐅᓇᑕᕐᑐᒃᓴᖏᑦ ᑎᑭᑉᐳᑦ ᔪᐊᓯᒥᒃ ᐅᓇᑕᕆᐊᕐᓗᑎᒃ. ᔫᑕᒧᑦ ᔨᕉᓴᓕᒧᓪᓗ ᑎᑭᑉᐳᑦ, ᐊᖓᔪᖅᑳᓕᒫᓪᓗ ᑐᖁᑉᐰᑦ ᐃᓄᐃᑦ ᐊᑯᕐᖓᓐᓂ, ᐱᖁᑎᓪᓗ ᐱᑖᕆᔭᓕᒫᑎᒃ ᑐᔫᑎᒋᕔᑦ ᐊᖓᔪᖅᑳᕐᔪᐊᕐᒧᑦ ᑕᒫᓯᑰᓯᒧᑦ.

²⁴ ᓯᕆᐊᒥᐅᑦ ᐅᓇᑕᕐᑎᖏᑦ ᐅᓄᓚᐅᓐᖏᓚᑦ, ᐊᑕᓂᐅᓪᓕ ᐅᓇᑕᕐᑐᒃᓮᑦ ᐅᓄᕐᑐᕐᔪᐊᑦ ᑖᒃᑯᓄᖓ ᓵᓚᐅᑎᓚᐅᕐᐰᑦ, ᐊᑕᓂᕐᒥᒃ ᕿᒤᓚᐅᕐᒪᑕ, ᓯᕗᓕᖏᑕ ᒎᑎᖓᓂᒃ. ᑖᒃᑯᐊᓗ ᑍᒤᓕᐅᕐᑕᐅᓂᖏᑦ ᓱᒋᐊᕐᓯᓂᐅᓚᐅᕐᐳᑦ ᔪᐊᓯᒥᒃ.

²⁵ ᑖᑦᓱᒥᖓᓕ ᕿᒤᓚᐅᕐᐳᑦ, ᐃᑭᓕᕐᑕᐅᓯᒪᓕᕐᑎᓪᓗᒍ ᑐᖁᑲᓴᒃᑎᓪᓗᒍ, ᑖᑦᓱᒪ ᓇᖕᒥᓂᖅ ᐱᔨᖏᑕ ᐊᑭᕋᕐᑐᓕᕐᐹᑦ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐃᕐᓂᖓᑕ ᐊᐅᖓ ᐱᑦᔪᑎᒋᓪᓗᒍ, ᑲᐱᕚᓪᓗ ᐃᒡᓕᖓᓃᑎᓪᓗᒍ. ᑖᓐᓇᓗ ᑐᖁᕗᖅ; ᐃᓗᕕᕐᐹᓪᓗ ᑍᕕᑎᐅᑉ ᐃᒡᓗᒐᓴᖏᓐᓂ, ᐃᓕᓚᐅᓐᖏᓛᓪᓕ ᐊᖓᔪᖅᑳᕐᔪᐊᑉ ᐃᓗᕕᖏᓐᓄᑦ.

²⁶ ᐅᑯᐊ ᑕᕝᕙ ᑖᑦᓱᒥᖓ ᐊᑭᕋᕐᑐᓕᓚᐅᕐᑐᑦ: ᔧᐹᑦ ᓯᒥᐊᑎᐅᑉ ᐃᕐᓂᖓ ᐊᒧᓁᑎᒥᐅᑕᖅ, ᔨᕼᐅᔭᐸᓗ ᓯᒻᕆᑎᐅᑉ ᐃᕐᓂᖓ ᒧᐊᐱᒥᐅᑕᖅ.

²⁷ ᑖᑦᓱᒪᓕ ᐃᕐᓂᖏᑕ ᐅᓂᒃᑲᐅᓯᐅᓂᖏᑦ, ᓈᒻᒪᒃᓴᓐᖏᐅᑎᒃᓮᓪᓗ ᑖᑦᓱᒧᖓ ᐅᖃᐅᓯᐅᓚᐅᕐᑐᑦ, ᒎᑎᐅᓪᓗ ᐃᒡᓗᖓᑕ ᐋᖅᑭᒋᐊᕐᑕᐅᓂᖓ, ᐊᖓᔪᖅᑳᕐᔪᐊᑉ ᐅᓂᒃᑲᐅᓯᐅᓂᖏᓐᓂ ᑎᑎᕋᕐᓯᒪᕗᑦ. ᐊᒪᔧᐊᓗ ᑖᑦᓱᒪ ᐃᕐᓂᖓ ᐃᓂᖓᓂ ᐊᖓᔪᖅᑳᓐᖑᖔᓚᐅᕐᐳᖅ.