ᑯᕉᓂᑲ ᐂᑉᐸᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦᐊᖓᔪᖅᑳᕐᔪᐊᖅ ᐊᕼᐊᔧᐊ ᔫᑕᒥᐅᑕᖅ ᐊᑕᓃᑦ ᐂᑉᐸᖏᑦ 8:25-29 ; 9:21-28 1 ᔨᕉᓴᓕᒥᐅᑦ ᐃᓄᖏᑦ ᐊᖓᔪᖅᑳᕐᔪᐊᕈᕐᑎᑦᓯᕗᑦ ᐊᕼᐊᔧᐊᒥᒃ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᑦ ᓄᑲᕐᓕᕐᐹᒥᒃ, ᐊᕐᓵᕐᑎᕆᔩᑦ ᐋᕋᑉᒥᐅᑦ ᑐᖁᕅᓚᐅᕐᒪᑕ ᐊᖓᔪᓕᒫᖏᓐᓂᒃ. ᑍᒤᒻᒪᑦ ᐊᕼᐊᔧᐊ ᔨᕼᐅᕌᒻᒥᐅᑉ ᐃᕐᓂᖓ ᐊᖓᔪᖅᑳᕐᔪᐊᕈᕐᐳᖅ ᔫᑕᒧᑦ ᐊᐅᓚᑦᓯᓕᕐᓗᓂᓗ. 2 ᐊᕼᐊᔧᐊ ᐊᖓᔪᖅᑳᕐᔪᐊᕈᓚᐅᕐᐳᖅ 42ᓂᒃ ᐊᕐᕌᒍᖃᕐᓗᓂ, ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᐊᕐᕌᒍᒥᒃ ᐊᑕᐅᓯᕐᒥᒃ. ᐊᓈᓇᖓ ᐊᑎᖃᕐᐳᖅ ᐊᑕᓔᐊᒥᒃ, ᐅᒻᕆᐅᑉ ᐃᕐᖑᑕᖓ. 3 ᑖᓐᓇᓗ ᐂᕼᐊᑉᑯᑎᑐᑦ ᐱᓇᓱᐊᓚᐅᕐᐳᖅ, ᐊᓈᓇᖓᑕ ᐃᓱᒻᒥᕐᑐᖃᑦᑕᓚᐅᕐᒪᒍ ᐃᓱᐃᑦᑐᓕᓚᐅᕐᐳᖅ. 4 ᑖᓐᓇ ᐱᐅᖏᑦᑐᓕᓚᐅᕐᐳᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐂᕼᐊᑉ ᐱᓇᓱᐊᓚᐅᕐᓂᖓᑐᑦ; ᑖᒃᑯᐊ ᑕᓯᐅᕐᑎᒋᓚᐅᕐᒪᒋᑦ ᐊᑖᑕᖓ ᑐᖁᖓᓕᕐᑎᓪᓗᒍ, ᐃᒻᒥᓄᓪᓗ ᑖᒃᑯᐊ ᑲᑕᒍᑎᒋᓚᐅᕐᐰ. 5 ᑖᒃᑯᐊᓗ ᐃᓱᒻᒥᕐᑐᐃᓂᖏᑦ ᒪᓕᒡᓗᒋᑦ, ᔨᕼᐅᕌᒻ ᐂᕼᐊᑉ ᐃᕐᓂᖓ ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖅ ᐃᓚᒋᓚᐅᕐᐹ ᐅᓇᑕᕆᐊᕐᓗᑎᒃ ᐊᖓᔪᖅᑳᕐᔪᐊᕐᒧᑦ ᕼᐊᔧᐅᓪᒧᑦ ᓯᕆᐊᒥᐅᑕᒧᑦ ᕌᒪᑦ-ᒋᓖᑎᒧᑦ. ᓯᕆᐊᒥᐅᓪᓗ ᔪᕌᒻ ᐃᑭᓕᕐᐹᑦ. 6 ᐅᑎᕐᐳᕐᓗ ᔨᔭᕆᐅᓪᒧᑦ ᐃᑭᓕᕐᑕᐅᓯᒪᓂᕐᒥᓂᑦ ᒪᒥᑦᓯᕈᒪᓪᓗᓂ ᕌᒪᒥ, ᐅᓇᑕᕐᑎᓪᓗᒋᑦ ᐊᖓᔪᖅᑳᕐᔪᐊᕐᒥᒃ ᕼᐊᔧᐅᓪᒥᒃ ᓯᕆᐊᒥᐅᑕᕐᒥᒃ. ᐊᕼᐊᔧᐊᐅᓪᓗ ᔫᑕᒥ ᐊᖓᔪᖅᑳᕐᔪᐊᑉ ᔨᕼᐅᕌᒻ ᐃᕐᓂᖓᑕ ᔨᕼᐅᕌᒻ ᐂᕼᐊᑉ ᐃᕐᓂᖓ ᑕᑯᔭᕐᑐᕐᐹ ᔨᔭᕆᐅᓪᒧᑦ, ᖃᓂᒪᓂᖓᓄᑦ. 7 ᔨᕼᐅᕌᒻᒧᑦ ᐳᓛᕆᐊᕐᓂᖓ ᒎᑎᐅᑉ ᐋᖅᑭᒃᓯᒪᓚᐅᕐᐹ ᐊᕼᐊᔧᐊᐅᑉ ᑲᑕᒍᑎᒃᓴᖓᓄᑦ. ᑎᑭᓐᓇᒥᓗ ᑕᕝᕗᖓ ᔨᕼᐅᕋᒻ ᑲᑎᓯᔭᕐᑐᖃᑎᒋᕚ ᔨᕼᐆᒥᒃ ᓂᒻᓮᑉ ᐃᕐᓂᖓᓂᒃ, ᑖᓐᓇ ᐊᑕᓂᐅᑉ ᐱᔪᓐᓇᕐᓂᕐᑖᕐᑎᓚᐅᕐᒪᒍ ᐊᓯᕈᐃᖁᓪᓗᒍ ᐂᕼᐊᑉ ᐃᓚᖏᓐᓂᒃ. 8 ᔨᕼᐆᓗ ᖃᐅᔨᓇᓱᐊᓕᕐᑎᓪᓗᒍ ᐂᕼᐊᑉ ᐃᓚᖏᓐᓂᒃ, ᔫᑕᐅᑉ ᐊᖓᔪᖅᑲᕐᔪᐊᖓᑕ ᐃᕐᓂᖏᑦ ᑲᑎᕔᑦ ᐊᕼᐊᔧᐊᐅᓪᓗ ᖃᑕᓐᖑᑎᖏᑦ ᐃᓚᖃᕐᑐᑦ ᐊᕼᐊᔧᐊᒥᒃ, ᑖᑦᓱᒪᓗ ᑐᖁᑉᐰᑦ. 9 ᐊᕼᐊᔧᐊᒥᒡᓗ ᕿᓂᕐᑎᑦᓯᓕᕋᒥ, ᐃᔨᕐᓯᒪᑎᓪᓗᒍ ᓴᒥᐊᕆᐊᒥ ᓇᓂᔭᐅᕗᖅ, ᐂᑎᑉᐹᓗ ᔨᕼᐆᒧᑦ ᑕᕝᕙᓂᓗ ᑐᖁᑉᐹ. ᐃᓗᕕᕐᐹᓪᓗ, ᐅᖃᕐᓗᑎᒃ, “ᔨᕼᐆᓴᐸᐅᑉ ᐃᕐᖑᑕᕆᖕᒪᒍ, ᐊᑕᓂᕐᒥᒃ ᕿᓂᓚᐅᕐᑑᑉ ᐆᒻᒪᑎᒥᓄᑦ ᐊᑕᖏᕐᑐᒧᑦ.” ᐊᕼᐊᔧᐊᐅᓪᓗ ᐃᓚᖏᑦ ᐊᒥᐊᒃᑯᖃᕈᓐᓃᓚᐅᕐᐳᖅ ᐃᓇᖐᔪᓐᓇᕐᑐᒥᒃ ᐊᖓᔪᖅᑳᖑᓂᕐᒥᒃ ᐊᑕᓂᐅᕕᖓᓄᑦ. ᑯᐃᓐ ᐊᑕᓔᐊᐅᑉ ᐊᐅᓚᑦᓯᓂᖓ ᔫᑕᒥ ᐊᑕᓃᑦ ᐂᑉᐸᖏᑦ 11:1-3 10 ᐊᑕᓔᐊᓕ ᐊᕼᐊᔧᐊᐅᑉ ᐊᓈᓇᖓ ᖃᐅᔨᒐᒥ ᐃᕐᓂᖓᑕ ᑐᖁᑕᐅᓂᖓᓂᒃ, ᑎᓕᓯᕗᖅ ᐊᖓᔪᖅᑲᕐᔪᐊᑉ ᐃᓚᓕᒫᖏᑦ ᑐᖁᕋᕐᑕᐅᖁᓪᓗᒋᑦ ᔫᑕᒦᑦᑐᑦ. 11 ᔨᕼᐆᓯᐱᓪᓕ, ᐊᖓᔪᖅᑳᕐᔪᐊᑉ ᐸᓂᖓ, ᔪᐊᓯᒥᒃ ᑎᒍᓯᕗᖅ ᐊᕼᐊᔧᐊᑉ ᐃᕐᓂᖓᓂᒃ, ᕿᒪᐅᑎᕚᓪᓗ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᑦ ᑐᖁᕋᕐᑕᐅᓕᒑᓕᕐᑐᓂᑦ, ᐱᕈᕐᓯᐊᕆᓕᕐᐹᓗ ᑐᒃᓯᐊᕐᕕᒡᔪᐊᑉ ᐃᒡᓗᕈᓯᖓᓂ. ᑕᕝᕙ ᔨᕼᐆᓯᐱᑦ, ᐊᖓᔪᖅᑳᕐᔪᐊᑉ ᔨᕼᐅᕌᒻ ᐸᓂᖓ, ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᓄᓕᐊᖓᑕ ᑖᓐᓇ ᓇᔭᒋᔭᐅᔪᖅ ᐊᕼᐊᔧᐊᒧᑦ, ᐃᔨᕐᓯᒪᓚᐅᕐᐹ ᐊᑕᓔᐊᒥᑦ, ᑖᓐᓇᓗ ᑐᖁᑕᐅᓚᐅᓐᖏᓚᖅ; 12 ᐃᔨᕐᓯᒪᓚᐅᕐᐹᓗ ᐊᕐᕌᒍᓂᒃ ᐱᖓᓲᔪᕐᑐᓂᒃ ᒎᑎᐅᑉ ᐃᒡᓗᖓᓂ, ᐊᑕᓔᐊ ᐊᐅᓚᑦᓯᔨᐅᑎᓪᓗᒍ ᓄᓇᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society