ᑯᕉᓂᑲ ᐂᑉᐸᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᔨᕼᐆᓴᐸᑦ ᑐᖁᒐᒥ ᓯᕗᓕᒥᓄᑦ ᐃᓚᓕᐅᑎᕗᖅ, ᐃᓗᕕᕐᑕᐅᕗᕐᓗ ᓯᕗᓕᖏᑕ ᐃᓗᕕᖃᕐᕕᖏᓐᓄᑦ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᔨᕼᐅᕌᒻ ᐃᓇᖏᐅᑎᕗᖅ ᐃᓂᖓᓂ.

ᔨᕼᐅᕋᒻ ᐊᖓᔪᖅᑳᕐᔪᐊᓐᖑᕐᓂᖓ ᔫᑕᒥ

² ᖃᑕᓐᖑᑎᖃᓚᐅᕐᐳᖅ ᔨᕼᐆᓴᐸᐅᑉ ᐃᕐᓂᖏᓐᓂᒃ: ᐊᔭᕅᐊ, ᔨᕼᐃᐅᓪ, ᓴᑲᕅᐊ, ᐊᔭᕅᐊ, ᒤᑯ, ᓯᕚᑍᐊᓗ; ᑖᒃᑯᐊᓕᒫᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᔨᕼᐆᓴᐸᐅᑉ ᐃᕐᓂᕆᕔᑦ.

³ ᐊᑖᑕᖓᑕ ᑐᓂᓚᐅᕐᐰᑦ ᐱᒻᒪᕆᓂᒃ, ᓯᐅᓪᕕᕆᓂᒃ, ᒎᓗᓂᒃ, ᐱᖁᑎᓂᒡᓗ ᐱᕕᐊᕐᓇᕐᑐᓂᒃ, ᐃᒡᓗᒐᓴᖕᓂᒃ ᓴᐴᓗᑕᓕᖕᓂᒃ ᔫᑕᒥ; ᐊᖓᔪᖅᑲᐅᕕᓂᓗ ᑐᓂᓚᐅᕐᐹ ᔨᕼᐅᕌᒻᒧᑦ ᐊᖓᔪᒃᓯᕐᐹᖑᓂᖓᓄᑦ.

⁴ ᔨᕼᐅᕌᒻᓕ ᐊᑖᑕᖓᑕ ᐊᖓᔪᖅᑲᐅᕕᖓᓄᑦ ᐃᓂᑖᑦᓯᐊᕋᒥ, ᖃᑕᓐᖑᑎᓕᒫᓂ ᑐᖁᑉᐰᑦ ᓴᕕᒡᔪᐊᒧᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓᑕ ᕿᑐᕐᖓᖏᑦ ᑐᖁᖃᓯᐅᑎᓪᓗᒋᑦ.

⁵ ᔨᕼᐅᕌᒻ ᐊᕐᕌᒍᖃᓪᓗᓂ 32ᓂᒃ ᐊᖓᔪᖅᑳᕐᔪᐊᓐᖑᓚᐅᕐᐳᖅ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ ᓯᑕᒪᐅᔪᕐᑐᓂᒃ ᔨᕉᓴᓕᒥ.

⁶ ᐱᓂᐊᕐᓂᖃᓚᐅᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑎᑐᑦ, ᐂᕼᐊᑉ ᐱᓂᐊᕐᓂᕆᓚᐅᕐᑕᖓᑐᑦ; ᐂᕼᐊᑉ ᐸᓂᖓᓂᒃ ᓄᓕᐊᖃᓚᐅᕐᒪᑦ. ᐱᐅᖏᑦᑐᓕᓚᐅᕐᐳᕐᓗ ᐊᑕᓂᐅᑉ ᑕᑯᓐᓇᕐᑕᖓᒍᑦ.

⁷ ᐊᑕᓂᐅᓪᓕ ᑍᕕᑎᐅᑉ ᑭᖑᕚᖏᑦ ᐊᓯᕈᕈᒪᓚᐅᓐᖏᓔᑦ, ᐊᖏᖃᑎᖃᕐᓯᒪᓂᕐᒥᓂᒃ ᑍᕕᑎᒧᑦ ᐱᑦᔪᑎᖃᕐᓗᓂ, ᐊᖏᕐᕕᒋᓚᐅᕋᒥᐅᒃ ᑭᖑᕚᖏᑦ ᐊᐅᓚᑦᓯᔨᐅᖁᓪᓗᒋᑦ ᐃᓱᖃᖏᑦᑐᒧᑦ.

⁸ ᔨᕼᐅᕌᒻ ᐊᐅᓚᑦᓯᔨᐅᑎᓪᓗᒍ ᐄᑐᒥᐅᑦ ᐊᑭᕋᕐᑐᓕᓚᐅᕐᐳᖅ ᔫᑕᒧᑦ ᐊᐅᓚᑕᐅᓂᕐᒥᖕᓂᒃ, ᐃᒻᒥᖕᓂᒡᓗ ᐊᖓᔪᖅᑳᕐᔪᐊᕐᑖᕐᓗᑎᒃ.

⁹ ᑕᕝᕙ ᔨᕼᐅᕌᒻ ᐊᐅᓪᓚᕐᐳᖅ ᐊᖓᔪᖅᑳᖁᑎᓂ ᐃᓚᒋᓪᓗᒋᑦ, ᕿᒧᒃᓯᐅᑏᑦ ᐊᒃᓴᓗᐊᓕᖁᑎᓕᒫᓂᓗ ᐃᓚᒋᓪᓗᒋᑦ, ᐅᓐᓄᐊᒃᑯᓪᓗ ᒪᑭᑉᐳᖅ ᐄᑐᒥᐅᓪᓗ ᐊᕙᓗᓯᓯᒪᔪᑦ ᑐᖁᕋᕐᐰᑦ ᕿᒧᒃᓯᐅᑎᓂ ᐊᒃᓴᓗᐊᓕᖕᓂᒃ ᐊᖓᔪᖅᑳᖁᑎᒥᓂᒡᓗ ᐃᓚᖃᕐᓗᓂ.

¹⁰ ᑍᒤᒻᒪᑦ ᐄᑐᒥᐅᑦ ᔫᑕᒧᑦ ᐊᐅᓚᑕᐅᓂᕐᒥᖕᓂᒃ ᐊᑭᕋᕐᑐᐃᓐᓇᓕᕐᐳᑦ ᐅᓪᓗᒥᒧᑦ ᑎᑭᓪᓗᒍ. ᑍᑦᓱᒪᓂᐅᑎᓪᓗᒍᑦᑕᐅᖅ ᓄᓇᓕᒃ ᓕᑉᓇ ᐊᑭᕋᕐᑐᓕᓚᐅᕆᕗᖅ ᐊᐅᓚᑕᐅᓂᕐᒥᓂᒃ, ᔨᕼᐅᕌᒻ ᐊᑕᓂᕐᒥᒃ ᓯᕗᓕᖏᑕ ᒎᑎᖓᓂᒃ ᕿᒤᓯᒪᓂᖓᓂᒃ ᐱᑦᔪᑎᖃᕐᓗᑎᒃ.

¹¹ ᓱᓕᓗ ᓴᓇᓚᐅᕆᕗᖅ ᒎᑎᓐᖑᐊᒧᑦ ᑐᒃᓯᐊᕐᕕᖕᓂᒃ ᔫᑕᐅᑉ ᖃᖅᑲᖏᓐᓂ, ᔨᕉᓴᓕᒥᓗ ᓄᓇᖃᕐᑐᑦ ᐊᔪᕐᑐᓕᑎᓚᐅᕐᐰᑦ, ᔫᑕᒥᐅᓪᓗ ᑕᒻᒪᕐᑎᓪᓗᒋᑦ.

¹² ᑎᑎᖅᑲᐅᓯᐊᓚᐅᕐᐳᕐᓗ ᐃᓔᑦᔭᒥᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᑦ, ᐃᒤᓕᔪᓂᒃ, “ᐊᑕᓂᖅ ᐃᒫᒃ ᐅᖃᕐᐳᖅ, ᑍᕕᑎᐅᑉ ᓯᕗᓕᕕᑦ ᒎᑎᖓ, ᐱᓂᐊᕐᓂᖃᖏᓐᓇᕕᑦ ᐊᑖᑕᒃᑐᑦ ᔨᕼᐆᓴᐸᑦᑐᑦ, ᐂᓴᑐᓪᓗ ᔫᑕᐅᑉ ᐊᖓᔪᖅᑳᕐᔪᐊᖓᑐᑦ.

¹³ ᐱᓂᐊᕐᓂᖃᕋᕕᓪᓕ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑎᑐᑦ, ᔫᑕᒃᑯᑦ ᔨᕉᓴᓕᒥᓗ ᓄᓇᖃᕐᑐᑦ ᒎᑎᒧᑦ ᒪᓕᒍᓐᓃᕐᑎᑉᐸᑎᑦ, ᐂᕼᐊᐱᐅᑦᑕᐅᖅ ᐃᓚᖏᑕᓗ ᒪᓕᒍᓐᓃᕐᑎᑦᓯᓂᕆᓚᐅᕐᑕᖏᑎᑐᑦ, ᖃᑕᓐᖑᑎᑎᓪᓗ ᑐᖁᓚᐅᕋᕕᒋᑦ, ᐊᑖᑕᕕᑦ ᐃᓚᓪᓚᕆᖏᑦ, ᑖᒃᑯᐊ ᐃᓕᖕᓂᑦ ᐱᐅᓂᕐᓴᐅᑎᓪᓗᒋᑦ;

¹⁴ ᑕᑯᒋᑦ, ᐊᑕᓂᐅᑉ ᐃᓄᖁᑎᑎᑦ ᑎᑭᑕᐅᑎᓐᓂᐊᕐᐰᑦ ᐊᓐᓂᐊᓇᕐᑐᕐᔪᐊᒧᑦ, ᕿᑐᕐᖓᑎᑦ, ᓄᓕᐊᑎᑦ, ᐱᖁᑎᓕᒫᑎᓪᓗ,

¹⁵ ᖃᓂᒪᓇᕐᑐᕐᔪᐊᕐᒧᓪᓗ ᑎᑭᑕᐅᔪᒫᕐᐳᑎᑦ ᐋᓐᓂᐊᓇᕐᑐᒥᒃ ᐃᕐᕋᕕᒃᑯᑦ, ᐃᕐᕋᕕᑎᑦ ᐊᓂᔪᒫᕐᐳᖅ ᖃᓂᒻᒪᓯᕐᓄᑦ ᐊᓂᑎᑕᐅᓗᑎᒃ, ᖃᐅᑕᒫᑦ ᐱᐅᔪᓐᓃᕐᐸᓪᓕᐊᑐᐃᓐᓇᕐᓗᑎᑦ.”

¹⁶ ᐊᑕᓂᐅᓪᓗ ᐱᓕᔅᑍᓂᒥᐅᑦ ᐋᕋᑉᒥᐅᓪᓗ ᐃᑎᐅᐱᐊᑉ ᖃᓂᒋᔮᓂ ᓄᓇᖃᕐᑐᑦ ᐊᐅᓚᑦᔭᒃᑎᑉᐰᑦ ᓂᓐᖓᐅᑦᔨᓗᑎᒃ ᐊᑭᕋᕐᑐᓕᖁᓪᓗᒋᑦ ᔨᕼᐅᕌᒻᒥᒃ;

¹⁷ ᑕᕝᕙ ᒪᔪᐊᕋᒥᒃ ᔫᑕᒧᑦ, ᓵᓚᒋᓪᓗᒍ ᑎᒍᕚᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓᓂ ᐱᖁᑎᓕᒫᖏᑦ ᓇᓂᔭᑎᒃ ᐊᐅᓪᓚᕈᑎᕔᑦ, ᐃᕐᓂᖏᓪᓗ ᓄᓕᐊᖏᓪᓗ, ᐃᕐᓂᖏᓐᓂᒃ ᐊᒥᐊᑯᓚᐅᓐᖏᓛᑦ ᓄᑲᕐᓕᕐᐹᖅ ᔨᕼᐅᐊᕼᐊᔾ ᑖᓐᓇᑐᐊᖅ ᐊᒥᐊᒃᑯᑐᐊᕆᕚᑦ.

¹⁸ ᑕᒪᑐᒪ ᑭᖑᕐᖓᒍᑦ ᐊᑕᓂᐅᑉ ᑎᑭᑕᐅᑎᑉᐹ ᐃᕐᕋᕕᖏᑎᒍᑦ ᐋᖅᑭᒃᑕᐅᔪᓐᓇᖏᑦᑐᒥᒃ ᐋᓐᓂᐊᒥᒃ.

¹⁹ ᐊᑯᓂᐅᓕᕐᑎᓪᓗᒍ, ᐊᕐᕌᒎᒃ ᒪᕐᕉᒃ ᐊᓂᒍᕐᑎᓪᓗᒋᒃ, ᐃᕐᕋᕕᖏᑦ ᐊᓂᕗᑦ ᐋᓐᓂᐊᖃᕐᓂᕐᒥᓄᑦ, ᑐᖁᕗᕐᓗ ᐋᓐᓂᐊᔪᐊᓘᓪᓗᓂ. ᐃᓄᖁᑎᖏᓪᓗ ᑎᐱᑦᓯᐊᕆᒃᑐᓂᒃ ᐅᐱᒍᓲᑎᓂᒃ ᐃᑯᐊᓪᓔᓚᐅᓐᖏᓚᑦ ᑖᑦᓱᒧᖓ, ᓯᕗᓕᖏᓐᓄᑦ ᑍᒤᖃᑦᑕᓚᐅᕐᓂᕐᒥᑐᑦ.

²⁰ 32ᓂᒃ ᐊᕐᕌᒍᖃᓕᕐᓗᓂ ᐊᖓᔪᖅᑳᕐᔪᐊᓐᖑᓚᐅᐳᖅ, ᔨᕉᓴᓕᒥ ᐊᐅᓚᑦᓯᓚᐅᕐᐳᖅ ᐊᕐᕌᒍᓂᒃ ᓯᑕᒪᐅᔪᕐᑐᓂᒃ; ᑐᖁᓚᐅᕐᐳᖅ ᓇᓪᓕᐊᓐᓄᓪᓘᓐᓃᑦ ᐅᒡᒍᐊᕆᔭᐅᓇᓂ. ᐃᓗᕕᕐᐹᑦ ᑍᕕᑎᐅᑉ ᐃᒡᓗᒐᓴᖏᓐᓂ, ᐊᖓᔪᖅᑳᕐᔪᐊᑦ ᐃᓗᕕᕐᑕᐅᕕᖏᑦᑕ ᐊᓯᐊᓄᑦ.