ᑯᕉᓂᑲ ᐂᑉᐸᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦᐅᓇᑕᕐᓃᑦ ᐄᑐᒥᒥᒃ 1 ᑕᒪᑐᒪ ᑭᖑᕐᖓᒍᑦ ᒧᐊᐱᒥᐅᑦ ᐊᒧᓁᑎᒥᐅᓪᓗ, ᐃᓚᖃᕐᓗᑎᒃ ᒥ-ᔪᓁᑎᓂᒃ, ᑲᑎᑉᐳᑦ ᐅᓇᑕᕆᐊᕐᓗᑎᒃ ᔨᕼᐆᓴᐸᑦᒥᒃ. 2 ᑕᕝᕙ ᐃᓚᖏᓐᓂᒃ ᐅᖃᕆᐊᕐᑐᕐᑐᖃᕐᐳᖅ ᔨᕼᐆᓴᐸᑦᒧᑦ, ᐅᖃᕐᓗᓂ, “ᐃᓄᒋᐊᒃᑐᕐᔪᐊᑦ ᐃᓕᖕᓂᒃ ᐅᓇᑕᕆᐊᓕᕐᐳᑦ ᐄᑐᒥᒥᑦ, ᑕᕆᐅᓪᓗ ᐊᑭᐊᓂᑦ; ᑕᑯᒋᓪᓗ, ᑖᒃᑯᐊ ᑎᒍᓯᓯᒪᓕᕇᕐᐳᑦ ᕼᐊᔭᔭᓐ-ᑕᒫᕆᒥᒃ” (ᑍᔭᐅᖕᒥᔪᖅ ᐃᓐ-ᒋᑎᒥᒃ). 3 ᑕᕝᕙ ᔨᕼᐆᓴᐸᑦ ᑲᑉᐱᐊᓱᓕᕐᐳᖅ, ᐊᑕᓂᕐᒥᒡᓗ ᖃᐅᔨᓴᕈᒪᓕᕐᓗᓂ, ᓂᕆᑦᑍᓕᖁᔨᓕᕐᐳᕐᓗ ᔫᑕᒥᐅᓕᒫᓂᒃ. 4 ᔫᑕᒥᐅᓪᓗ ᑲᑎᕗᑦ ᐊᑕᓂᕐᒥᑦ ᐃᑲᔪᕐᑕᐅᔪᒪᓪᓗᑎᒃ; ᔫᑕᐅᓪᓗ ᐃᒡᓗᒐᓴᓕᒫᖏᓐᓂᑦ ᐱᓯᒪᔪᑦ ᑲᑎᕗᑦ ᐊᑕᓂᕐᒥᒃ ᖃᐅᔨᓴᕈᒪᓪᓗᑎᒃ. 5 ᔨᕼᐆᓴᐸᑦᓗ ᓂᑯᕕᑉᐳᖅ ᔫᑕᒥᐅᑦ ᔨᕉᓴᓕᒥᐅᓪᓗ ᑲᑎᒪᔪᑦ ᓵᖏᓐᓂ, ᐊᑕᓂᐅᑉ ᐃᒡᓗᖓᓂ, ᓂᕈᑐᓂᐅᔭᖓᓂ ᓄᑖᒥ. 6 ᐅᖃᕐᓗᓂᓗ, “ᐊᑕᓃᖅ ᓯᕗᓕᑦᑕ ᒎᑎᖓᑦ, ᒎᑎᐅᓐᖏᓚᑏᑦ ᕿᓚᖕᒥ? ᐊᐅᓚᑦᓯᓐᖏᓚᑏᑦ ᐊᑕᓂᐅᕕᓕᒫᓂᒃ ᐃᓅᖃᑎᒌᒡᔪᐊᓂᒡᓗ? ᐱᔪᓐᓇᕐᓂᕐᔪᐊᖅ ᐊᔪᖏᑦᑐᕐᔪᐊᖑᓂᕐᓗ ᐊᒡᒐᖕᓃᑉᐳᑦ, ᓇᓪᓕᐊᓐᓄᓪᓘᓐᓃᑦ ᐊᑭᒪᔭᐅᔪᓐᓇᓐᖏᓚᑎᑦ. 7 ᒎᑎᒋᓐᖏᓚᑦᑎᒌᑦ, ᐃᓅᖃᑎᒌᒡᔪᐊᓂᒃ ᑕᒫᓂ ᓄᓇᖃᕐᑐᓂᒃ ᓯᖏᑦᓯᓚᐅᕐᑐᑎᑦ ᐃᓄᖁᑎᕕᑦ ᐃᓴᕆᐊᓕᒥᐅᑦ ᓵᖓᓂ, ᑐᓂᓪᓗᒍᓗ ᐂᑉᕋᕼᐋᒻ ᐱᖃᓐᓇᕆᔭᕕᑦ ᑭᖑᕚᖏᓐᓄᑦ ᐃᓱᖃᖏᑦᑐᒧᑦ? 8 ᑖᒃᑯᐊᓗ ᓄᓇᖃᓕᕐᐳᑦ ᑕᒫᓂ, ᓴᓇᓚᐅᕐᐳᓪᓗ ᐃᑦᔪᕐᓁᑦᑐᕕᖁᑎᖕᓂᒃ ᐊᑎᕐᓄᑦ, ᐅᖃᕐᓗᑎᒃ, 9 ‘ᑲᑉᐱᐊᓇᕐᑐᒧᑦ ᓴᕕᒡᔪᐊᒧᑦ ᑎᑭᑕᐅᒍᑦᑕ, ᐃᖅᑲᕐᑐᕐᑕᐅᓂᕐᒧᑦ, ᐋᓐᓂᐊᓇᕐᑐᒧᓪᓘᓐᓃᑦ, ᑳᖕᓇᕐᑐᒧᓪᓘᓐᓃᑦ, ᓇᖏᕈᒫᕐᐳᒍᑦ ᐆᒪ ᑐᒃᓯᐊᕐᕕᐅᑉ ᓇᔪᒐᕐᐱᑦ ᓵᖓᓂ, ᐊᑏᑦ ᑕᕝᕙᓃᒻᒪᑦ ᐃᒡᓗᒥ, ᕿᓄᒍᑦᑕᓗ ᐋᓐᓂᐊᕈᑎᕗᑦ ᐱᓪᓗᒋᑦ, ᑐᓴᕈᒫᕐᐳᑎᑦ ᐱᐅᓕᓗᑕᓗ.’ 10 “ᒫᓐᓇᓕ ᑕᑯᒋᑦ, ᐊᒧᓁᒥᐅᑦ, ᒧᐊᐱᒥᐅᑦ ᖃᖅᑲᒥᐅᑦ ᓰᐊᕆᐊᒥᐅᓪᓗ ᐃᓄᖏᑦ, ᐃᓴᕆᐊᓕᒥᐅᓄᑦ ᓄᖑᑕᐅᖁᓚᐅᓐᖏᑕᑎᑦ ᐄᑦᔨᑉᑎᒥᐅᑦ ᓄᓇᖓᓂᑦ ᐊᐅᓪᓚᕐᑎᓪᓗᒋᑦ, ᑖᒃᑯᐊ ᓴᓂᖅᑯᓚᐅᕐᐰᑦ ᐊᓯᕈᕐᑕᐅᓇᑎᒃ. 11 ᑕᑯᒋᑦ, ᑕᒫᓃᓕᕐᐳᑦ ᐊᑭᓂᐊᕈᒪᓪᓗᑕ ᓯᖏᑦᑐᒪᓪᓗᑕᓗ ᐱᖁᑎᖕᓂᑦ, ᑐᓂᓚᐅᕐᑕᕐᓂᑦ ᐅᕙᑦᑎᓐᓄᑦ ᑭᖑᕐᖑᑦᔭᐅᖁᓪᓗᒍ. 12 ᒎᑎᕗᑦ, ᐃᖅᑲᕐᑐᕈᓐᓇᕐᐱᒌᑦ? ᐱᔪᓐᓇᕐᓂᖃᖏᓐᓇᑦᑕ ᐃᓄᒋᐊᒃᑐᕐᔪᐊᑦ ᐅᕙᑦᑎᓐᓄᑦ ᐅᓇᑕᕆᐊᕐᓂᖏᓐᓄᑦ. ᖃᓄᐃᓕᐅᕐᑐᒃᓴᐅᖕᒪᖔᑦᑕᓗ ᖃᐅᔨᒪᓇᑕ, ᐃᔨᑦᑎᓐᓄᓪᓕ ᐃᓕᖕᓄᑦ ᑕᑯᓴᕐᐳᒍᑦ ᐅᑕᖅᑭᓪᓗᑕ.” 13 ᔫᑕᒥᐅᓕᒫᓪᓗ ᐊᖑᑎᑦ ᓄᓕᐊᑎᒃ ᕿᑐᕐᖓᑎᒡᓗ ᐃᓚᒋᓪᓗᒋᑦ ᓇᖏᓚᐅᕐᐳᑦ ᐊᑕᓂᐅᑉ ᓵᖓᓂ. 14 ᑕᕝᕙ ᐊᑕᓂᐅᑉ ᐊᓂᕐᓂᖓ ᑎᑭᑉᐳᖅ ᔭᕼᐊᔨᐅᓪᒧᑦ ᓴᑲᕅᐊᐅᑉ ᐃᕐᓂᖓᓄᑦ, ᐱᓁᐊᑉ ᑭᖑᕚᖓᓄᑦ, ᔨ-ᐂᓕᐅᓪᓗ ᑭᖑᕚᖓᓄᑦ, ᒪᑕᓁᐊᐅᓪᓗ ᑭᖑᕚᖓᓄᑦ, ᓕᕔᑏᓪᓗ ᐊᓴᐸᐅᑉ ᐃᕐᓂᖏᑦ ᑲᑎᒪᖃᑕᐅᕗᑦ ᑲᑎᒪᔪᑦ ᐊᑯᕐᖓᓐᓂ. 15 ᐅᖃᕐᐳᕐᓗ, “ᓈᓚᒋᑦᓯ, ᔫᑕᒥᐅᓕᒫᑦ ᔨᕉᓴᓕᒥᐅᓕᒫᓪᓗ, ᐊᖓᔪᖅᑳᕐᔪᐊᕐᓗ ᔨᕼᐆᓴᐸᑦ: ᐊᑕᓂᖅ ᐅᖃᕐᐳᖅ ᐃᓕᑦᓯᓐᓄᑦ, ‘ᑲᑉᐱᐊᓱᖏᓪᓗᓯ, ᓴᐱᖏᓪᓗᓯᓗ ᐃᓄᒋᐊᒃᑐᕐᔪᐊᓂᒃ; ᐃᓕᑦᓯ ᑕᒪᓐᓇ ᐅᓇᑕᕐᓂᕆᖏᓐᓇᑦᓯᐅᒃ, ᒎᑎᐅᓪᓕ. 16 ᖃᐅᒃᐸᑦ ᐊᑎᕐᕕᒋᓛᕐᐸᓯ ᐅᓇᑕᕆᐊᕐᓗᒋᑦ; ᑕᑯᒋᑦ, ᒪᔪᕋᓛᕐᐳᑦ ᒪᔪᖅᑲᒥ ᔨᑦᔨᒥ; ᑕᑯᓛᕐᐸᓯ ᓇᕐᓴᐅᑉ ᐃᓱᐊᓂ, ᐃᓄᖃᖏᑦᑐᒥ ᔨᕈᐃᓕᐅᑉ ᖃᓂᒋᔮᓂ. 17 ᐅᓇᑕᕆᐊᖃᓛᓐᖏᓚᓯ ᐅᓇᑕᕐᓂᕐᒥ ᐊᑐᐃᓐᓇᕈᕐᓗᓯ ᓄᖅᑲᖓᑐᐃᓐᓇᓛᕐᐳᓯ, ᑕᑯᓗᓯᓗ ᐊᑕᓂᐅᑉ ᓵᓚᖃᕐᓂᖓᓂᒃ ᐱᑦᔪᑎᒋᓗᓯ, ᔫᑖ ᔨᕉᓴᓕᒻᓗ.’ ᑲᑉᐱᐊᓱᖏᓪᓗᓯ, ᓴᐱᕐᑍᓕᒋᓯᓗ; ᖃᐅᒃᐸᑦ ᐅᐸᓛᕐᐸᑦᓯ ᐅᓇᑕᕆᐊᕐᓗᒋᑦ, ᐊᑕᓂᐅᓪᓗ ᐃᓚᒋᓂᐊᕐᐹᓯ.” 18 ᑕᕝᕙ ᔨᕼᐆᓴᐸᑦ ᐅᑯᕗᖅ ᑮᓇᓂᓗ ᒪᓂᖅᑲᒧᑦ ᐊᒃᑐᕐᑎᓪᓗᒍ, ᔫᑕᒥᐅᓕᒫᓪᓗ ᔨᕉᓴᓕᒥᓗ ᓄᓇᖃᕐᑐᑦ ᐅᑯᕗᑦ ᐊᑕᓂᐅᑉ ᓵᖓᓄᑦ, ᐊᑕᓂᖅ ᑐᒃᓯᐊᕐᕕᒋᓪᓗᒍ. 19 ᓕᕔᑏᓪᓗ ᑰᕋᕼᐂᑎᒃᑯᑦ ᑭᖑᕚᖏᑦ ᑰᕋᕼᐂᑎᓪᓗ ᑭᖑᕚᖏᑦ, ᓂᑯᕕᓪᓗᑎᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᓂᕐᑐᕐᐹᑦ, ᓂᐱᖅᑯᕐᑐᔪᐊᓘᓪᓗᑎᒃ. 20 ᐅᓪᓛᒻᒪᕆᒃᑯᓪᓗ ᒪᑭᑉᐳᑦ ᐂᓗᑎᒡᓗ ᐃᓄᖃᔪᐃᑦᑐᒧᑦ ᑎᑯᐊᒧᑦ; ᐊᐅᓪᓚᕐᑎᓪᓗᒋᑦ, ᔨᕼᐆᓴᐸᑦ ᓂᑯᕕᓪᓗᓂ ᐅᖃᕐᐳᖅ, “ᑐᓴᕐᓯᓐᖓ ᔫᑕᒥᐅᑦ ᔨᕉᓴᓕᒥᓗ ᓄᓇᖃᕐᑐᓯ! ᐅᒃᐱᕆᑦᓯ ᐊᑕᓂᕐᒥᒃ ᒎᑎᑦᓯᓐᓂᒃ, ᑕᕝᕙ ᐃᓂᓪᓚᒃᑎᑕᐅᓂᐊᕐᐳᓯ; ᐅᖃᕐᑎᖏᑦ ᐅᒃᐱᕆᓯᒋᒃ, ᑕᕝᕙ ᒪᑭᑎᑕᐅᓂᐊᕐᐳᓯ.” 21 ᐃᓄᐃᑦ ᐅᖃᐅᑎᔭᕇᕋᒥᒋᑦ, ᑎᓕᓯᕗᖅ ᐊᑕᓂᕐᒧᑦ ᐃᓐᖏᕐᓂᐊᕐᑐᓂᒃ ᓂᕐᑐᐃᔪᒃᓴᓂᒡᓗ ᑖᑦᓱᒪ ᐃᓂᖁᓇᕐᓂᖓᑕ ᐃᑦᔪᕐᓁᓐᓂᖓᓂᒃ, ᑖᒃᑯᐊ ᐅᓇᑕᕐᑐᒃᓮᑦ ᓯᕗᓂᐊᓃᑉᐳᑦ ᐅᖃᕐᓗᑎᒃ: “ᐊᑕᓂᖅ ᖁᔭᒋᔭᐅᓕ, ᑖᑦᓱᒪ ᓇᒡᓕᖕᓂᖓ ᓱᖁᓯᔪᐃᑦᑑᖕᒪᑦ ᐃᓱᖃᖏᑦᑑᖕᒧᑦ.” 22 ᐃᓐᖏᓕᕐᒪᑕ ᓂᕐᑐᐃᓪᓗᑎᒃ, ᑕᕝᕙ ᐊᑕᓂᖅ ᐅᐃᒻᒪᖕᓇᕐᑐᒥᒃ ᑎᑭᑎᑦᓯᕗᖅ ᐊᒧᓁᑎᓄᑦ, ᒧᐊᐱᒥᐅᓄᓪᓗ, ᖃᖅᑲᒧᑦ ᓰᐊᕆᒥᐅᓄᓪᓗ, ᔫᑕᒥᐅᓄᑦ ᐅᓇᑕᕆᐊᓚᐅᕐᑐᓄᑦ, ᑖᒃᑯᐊᓗ ᑐᑮᕈᑎᓚᐅᕐᐳᑦ. 23 ᐊᒧᓁᒥᐅᑦ ᒧᐊᐱᒥᐅᓪᓗ ᐅᓇᑕᓕᓚᐅᕐᐳᑦ ᖃᖅᑲᒥ ᓰᐊᕆᒥᐅᓂᒃ, ᑐᖁᕋᕐᐰᓪᓗ ᓄᖑᑦᓯᐊᕐᓗᒋᑦ, ᓯᐊᕆᒥᐅᑦ ᓄᖑᓐᓇᒥᒋᑦ, ᑕᕝᕙ ᐃᒻᒥᖕᓄᑦ ᓵᓪᓗᑎᒃ ᑐᖁᕋᖃᑦᑕᐅᑎᓕᓚᐅᕆᕗᑦ. 24 ᔫᑕᒥᐅᑦ ᑎᑭᓐᓇᒥᒃ ᐃᓄᖃᔪᐃᑦᑐᒧᑦ ᐳᕐᑐᔪᒧᑦ, ᑕᑯᓴᕐᐳᑦ ᐃᓄᒋᐊᒃᑐᕐᔪᐊᓄᑦ; ᑕᑯᒋᓪᓗ, ᑎᒦᑦ ᑐᖁᖓᔪᑦ ᓄᓇᒥ ᓇᓪᓚᖓᐅᓚᐅᕐᐳᑦ ᓇᓂᑐᐃᓐᓇᖅ; ᐊᑕᐅᓯᕐᒥᒡᓘᓐᓃᑦ ᐊᓐᓇᒃᑐᖃᓐᖏᓚᖅ. 25 ᔨᕼᐆᓴᐸᑦᑯᑦ ᐃᓚᖏᓪᓗ ᑎᑭᓐᓇᒥᒃ ᓇᒡᕚᕐᑕᕆᐊᓕᓚᐅᕐᐳᑦ ᑖᒃᑯᓇᓐᖓᑦ, ᓇᓂᓯᕗᓪᓗ ᐃᒻᒧᒃᓯᐅᒐᕐᓂᒃ ᐅᓄᕐᑐᕐᔪᐊᓂᒃ, ᓂᕿᓂᒃ, ᐊᓐᓄᕌᓂᒡᓗ, ᐱᔪᒥᓇᕐᑐᓂᒡᓗ ᐱᖁᑎᓂᒃ, ᓄᐊᑦᓯᓚᐅᕐᐳᑦ ᐱᑖᕆᓂᐊᕐᑕᒥᖕᓂᒃ ᐅᓄᕐᑐᕐᔪᐊᓂᒃ ᐊᒡᔭᕐᓯᔪᓐᓁᓪᓕᑐᐃᓐᓇᕐᓗᑎᒃ. ᐅᓪᓗᓂᒃ ᐱᖓᓱᓂᒃ ᓇᒡᕚᕐᑕᓚᐅᕐᐳᑦ ᐱᑖᕐᑐᕐᓗᑎᒃ, ᐅᓄᕐᑐᕐᔪᐊᖑᓚᐅᕐᒪᑕ. 26 ᐅᓪᓗᐃᑦ ᓯᑕᒪᖓᓐᓂ ᑲᑎᕗᑦ ᓇᕐᓴᒥ ᐱᕋᑲᒥ ᓮᒻᒪᕐᑎᑕᐅᕕᖕᒥ, ᑕᕝᕙᓂ ᐊᑕᓂᖅ ᓂᕐᑐᕐᐹᑦ; ᑍᒤᒻᒪᑦ ᑖᓐᓇ ᓇᕐᓴᖅ ᑍᔭᐅᖃᑦᑕᓕᕐᐳᖅ ᓇᕐᓴᒥᒃ ᐱᕋᑲᒥᒃ ᓮᒻᒪᕐᑎᑕᐅᕕᖕᒥᒃ ᐅᓪᓗᒥᒧᑦ ᑎᑭᓪᓗᒍ. 27 ᑭᖑᓂᖓᒍᑦ ᐅᑎᕐᐳᑦ, ᐊᖑᑎᓕᒫᑦ ᔫᑕᒧᑦ ᔨᕉᓴᓕᒧᓪᓗ, ᔨᕼᐆᓴᐸᑦᓗ ᓯᕗᓕᕐᑎᒋᔭᐅᓪᓗᓂ, ᔨᕉᓴᓕᒧᑦ ᐅᑎᕐᐳᑦ ᖁᕕᐊᓱᒡᓗᑎᒃ, ᐊᑕᓂᐅᑉ ᖁᕕᐊᓱᒃᑎᓚᐅᕐᒪᒋᑦ ᐊᑭᕋᖏᑦ ᓵᓚᒋᓪᓗᒋᑦ. 28 ᔨᕉᓴᓕᒧᑦ ᑎᑭᓐᓇᒥᒃ, ᓂᓪᓕᐊᑎᑦᓯᓚᐅᕐᐳᑦ ᕼᐊᕐᐱᓂᒃ ᑯᑭᑦᑕᐸᐅᑎᐅᔭᓂᒡᓗ ᓄᖃᕐᑎᓕᖕᓂᒃ ᑎᑦᑐᓚᐅᑎᓂᒡᓗ, ᐊᑕᓂᐅᑉ ᐃᒡᓗᖓᓄᑦ ᑎᑭᓪᓗᑎᒃ. 29 ᒎᑎᓗ ᓯᕘᕋᒋᔭᐅᓕᓚᐅᕐᐳᖅ ᓄᓇᖃᕐᑐᓄᑦ ᐊᖓᔪᖅᑲᐅᕕᓕᒫᓄᑦ ᑐᓴᕋᒥᒃ ᐊᑕᓂᖅ ᐅᓇᑕᓚᐅᕐᓂᖓᓂᒃ ᐃᓴᕆᐊᓕᒥᐅᑦ ᐊᑭᕋᖏᓐᓂᒃ. 30 ᑕᕝᕙ ᔨᕼᐆᓴᐸᐅᑉ ᐊᖓᔪᖅᑲᐅᕕᖓ ᐅᓇᑕᕐᑕᐅᓇᓱᐊᕈᓐᓁᓚᐅᕐᐳᖅ, ᒎᑎᖓᑕ ᐅᓇᑕᕐᑕᐅᖏᓐᓂᕐᒥᒃ ᑐᓂᓚᐅᕐᒪᒍ. ᔨᕼᐆᓴᐸᐅᑉ ᐊᖓᔪᖅᑲᐅᓂᖓᑕ ᐃᓱᓕᓐᓂᖓ ᐊᑕᓃᑦ ᓯᕗᓪᓖᑦ 22:41-50 31 ᔨᕼᐆᓴᐸᑦ ᐊᖓᔪᖅᑳᕐᔪᐊᓐᖑᓚᐅᕐᐳᕐᖅ ᔫᑕᒧᑦ, 35ᓂᒃ ᐊᕐᕌᒍᖃᕐᓗᓂ ᐊᖓᔪᖅᑳᓐᖑᓚᐅᕐᐳᖅ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 25ᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᐊᔪᐸᒥᒃ ᓮᕼᐂᑉ ᐸᓂᖓ. 32 ᐊᑖᑕᒥᑐᑦ ᐂᓴᑐᑦ ᐃᓅᓯᖃᓚᐅᕐᐳᖅ ᐊᓯᐊᓄᓪᓗ ᓴᖑᓚᐅᕋᓂ; ᐃᓱᐊᕐᑐᒥᒃ ᐱᓂᐊᕐᓂᖃᓚᐅᕐᐳᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ. 33 ᑭᓯᐊᓂᓕ ᒎᑎᓐᖑᐊᓄᑦ ᑐᒃᓯᐊᕐᕖᑦ ᐲᕐᑕᐅᓚᐅᓐᖏᓚᑦ; ᐃᓄᐃᑦ ᓱᓕ ᐆᒻᒪᑎᒥᒍᑦ ᑐᓂᓪᓚᕆᒃᓯᒪᓚᐅᖏᒻᒪᑕ ᓯᕗᓕᖏᑕ ᒎᑎᖓᓄᑦ. 34 ᔨᕼᐆᓴᐸᐅᓪᓕ ᐱᓂᐊᕐᓂᕕᓂᖏᑕ ᐃᓚᖏᑦ, ᐱᒋᐊᕐᓂᖓᓂᑦ ᑭᖑᓪᓕᕐᐹᒧᑦ, ᑎᑎᕋᕐᓯᒪᕗᑦ ᔨᕼᐆᑉ ᕼᐊᓇᓁᑉ ᐃᕐᓂᖓᑕ ᑎᑎᕋᕐᐸᓪᓕᐊᓯᒪᔭᖏᓐᓂ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᑎᑎᕋᕐᑕᐅᕙᓪᓕᐊᓯᒪᕕᖏᓐᓂ. 35 ᑕᒪᑐᒪ ᑭᖑᕐᖓᒍᑦ ᔨᕼᐆᓴᐸᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑕᑉᐱᐅᑎᓚᐅᕐᐳᖅ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓄᑦ ᐊᕼᐊᔧᐊᒧᑦ, ᑖᑦᓱᒧᖓ ᐱᐅᖏᑦᑐᓕᓚᐅᕐᑐᒧᑦ. 36 ᐊᖏᖃᑎᒋᓚᐅᕐᐹᓗ ᐅᒥᐊᕐᔪᐊᓂᒃ ᓴᓇᖃᑎᒋᔪᒪᓪᓗᓂᐅᒃ ᑖᕐᓯᓯᒧᐊᕐᑐᒃᓴᓂᒃ, ᐅᒥᐊᕐᔪᐊᓕᐅᓚᐅᕐᐳᑦ ᓄᓇᒥ ᐃᔨᐅᓂ-ᒋᐱᕆᒥ. 37 ᐃᓔᓯᕆ ᑐᑕᕙᕼᐅᑉ ᐃᕐᓂᖓ ᒪᕇᓴᒥᐅᑕᖅ ᐅᖃᕐᑎᑕᐅᓚᐅᕐᐳᖅ ᔨᕼᐆᓴᐸᑦᒥᒃ ᐊᑭᕋᕐᑐᕐᓗᓂ, ᐅᖃᕐᓗᓂ, “ᑕᑉᐱᐅᑎᓚᐅᕐᓃᑦ ᐊᕼᐊᔧᐊᒧᑦ ᐱᓪᓗᒍ, ᐊᑕᓂᐅᑉ ᓴᓇᓚᐅᕐᑕᑎᑦ ᓄᖑᑎᑦᓱᒫᓕᕐᐰᑦ.” ᐅᒥᐊᕐᔪᐊᓕᐊᖏᓪᓗ ᑕᕝᕙ ᓱᕋᒃᐳᑦ, ᑖᕐᓯᓯᒧᐊᕈᓐᓇᕐᓯᓚᐅᕋᑎᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society