ᑯᕉᓂᑲ ᐂᑉᐸᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦᐊᑐᐃᓐᓇᕈᐃᕙᓪᓕᐊᓂᖅ ᑐᒃᓯᐊᕐᕕᒡᔪᐊᑉ ᓴᓇᔭᐅᓂᒃᓴᖓᓄᑦ ᐊᑕᓃᑦ ᓯᕗᓪᓖᑦ 5:1-18 1 ᓲᓗᒨᓂᓕ ᓴᓇᕙᓪᓕᐊᔪᒪᓕᕐᐳᖅ ᑐᒃᓯᐊᕐᕕᒡᔪᐊᒥᒃ ᐊᑕᓂᕐᒧᑦ ᑐᒃᓯᐊᕐᕕᒃᓴᒥᒃ, ᐃᒡᓗᒃᓴᒥᓂᒡᓗ ᐊᖓᔪᖅᑳᕐᔪᐊᒃᑯᕕᒃᓴᒥᒃ. 2 ᓲᓗᒨᓂᓗ ᑲᑎᕐᓱᐃᕗᖅ 70,000ᓂᒃ ᐊᒃᔭᕐᑐᕐᑐᒃᓴᓂᒃ 80,000ᓂᒡᓗ ᐅᔭᕋᖕᓂᒃ ᓇᑲᑎᕆᔪᒃᓴᓂᒃ ᖃᖅᑲᒥᑦ, 3,600ᓂᒡᓗ ᑖᒃᑯᓄᖓ ᑲᒪᔨᐅᓂᐊᕐᑐᓂᒃ. 3 ᓲᓗᒨᓂᓗ ᑎᑎᕋᕐᐳᖅ ᕼᐅᕋᒻᒧᑦ ᑍᕆᐅᑉ ᐊᖓᔪᖅᑳᕐᔪᐊᓄᑦ, ᐅᖃᕐᓗᓂ: “ᐊᑖᑕᒐ ᑍᕕᑎ ᐱᓇᓱᐊᖃᑎᒋᓚᐅᕋᕕᐅᒃ ᕿᔪᖕᓂᒡᓗ ᓰᑕᕆᓂᒃ ᐃᒻᒥᓄᑦ ᐃᒡᓗᓕᐅᕈᑎᒃᓴᖏᓐᓂᒃ ᑐᓂᓚᐅᕋᕕᐅᒃ, ᑍᒫᒃᑕᐅᖅ ᐱᓇᓱᐊᕐᕕᒋᓐᖓ. 4 ᑕᑯᒋᑦ, ᑐᒃᓯᐊᕐᕕᒡᔪᐊᓕᐅᕈᒪᓕᕋᒪ ᐊᑕᓂᐅᑉ ᐅᐱᒋᔭᐅᓂᒃᓴᖓᓄᑦ ᒎᑎᒪ, ᑖᑦᓱᒧᖓᓗ ᑐᓂᓂᐊᕐᓗᒍ ᐃᑯᐊᓪᓔᓗᖓᓗ ᑎᐱᑦᓯᐊᕆᒃᑐᓂᒃ ᑖᑦᓱᒧᖓ ᑎᐱᑦᓯᐊᕆᒃᑑᖁᓪᓗᒋᑦ, ᑐᓂᕐᕈᓯᕐᕕᒋᖃᑦᑕᕐᓗᒍᓗ ᓂᐊᖂᔭᓂᒃ ᑕᑯᔭᒃᓴᓂᒃ, ᑐᓂᕐᕈᑎᓂᒡᓗ ᐃᑯᐊᓚᑎᑕᒃᓴᓂᒃ ᐅᓪᓛᒃᑯᑦ ᐅᓐᓄᒃᑯᓪᓗ, ᓴᐸᑎᒥ ᑕᖅᑭᓂᕋᑖᒥᓗ ᐊᑕᓂᑦᑕᓗ ᒎᑎᑦᑕ ᓇᓪᓕᐅᓐᓂᕐᓯᐅᕕᖁᑎᖏᓐᓂ, ᐊᑐᕐᑕᐅᖃᑦᑕᕐᓂᐊᓕᕐᓗᓂᓗ ᐃᓱᖃᖏᑦᑐᒧᑦ ᐃᓴᕆᐊᓕᒥᐅᓄᑦ. 5 ᑐᒃᓯᐊᕐᕕᒡᔪᐊᕐᓗ ᓴᓇᔪᒫᕐᑕᕋ ᐊᖏᔪᕐᔪᐊᖑᔪᒫᕐᐳᖅ, ᒎᑎᕗᑦ ᐊᖏᓂᕐᐸᐅᖕᒪᑦ ᒎᑎᒋᔭᐅᔪᓕᒫᓂᑦ. 6 ᑭᐊᓕ ᑐᒃᓯᐊᕐᕕᒡᔪᐊᓕᐅᕈᓐᓇᕐᐸᐅᒃ, ᕿᓚᒃ, ᕿᓔᓪᓗ ᖁᑦᓯᖕᓂᕐᐹᖏᑕ ᐱᓯᒪᔪᓐᓇᓐᖏᑎᓪᓗᓂᐅᒃ? ᖃᓄᐃᑦᑑᒐᒪᓕ ᑐᒃᓯᐊᕐᕕᒡᔪᐊᓕᐅᕐᑐᒃᓴᐅᕗᖓ ᑖᑦᓱᒧᖓ, ᑎᐱᑦᓯᐊᕆᒃᑐᓂᒃ ᐃᑯᐊᓚᑎᑦᓯᔪᓐᓇᑐᐃᓐᓇᕐᓗᖓ ᑖᑦᓱᒪ ᓵᖓᓂ? 7 ᑍᒤᒻᒪᑦ ᐊᖑᒻᒥᒃ ᑎᓕᓯᓚᐅᕆᑦ ᓴᓇᔪᓐᓇᕐᑐᒥᒃ ᒎᓗᓂᒃ ᓯᐅᓪᕕᕆᓂᒃ, ᑲᓐᓄᔭᓂᒃ, ᓴᕕᕋᔭᖕᓂᒡᓗ, ᐃᑦᓯᐅᔭᓂᒃ ᐊᐅᐸᓪᓚᕆᑦᑐᓂᒡᓗ, ᑐᖑᔪᕐᑐᓂᒡᓗ ᖃᓪᓗᓈᕐᑕᓂᒃ ᓴᓇᔪᓐᓇᕐᑐᒥᒃ, ᐃᑎᕐᓴᓕᐅᕐᓗᓂᓗ ᑎᑎᕋᕈᓐᓇᕐᑐᒥᒃ, ᐱᔪᓐᓇᕐᑐᓂᒃ ᐅᕙᓐᓃᑦᑐᓂᒃ ᓴᓇᖃᑎᖃᕈᓐᓇᕐᑐᒥᒃ ᔫᑕᒥ ᔨᕉᓴᓕᒥᓗ, ᐊᑖᑕᒪ ᑍᕕᑎᐅᑉ ᐊᑐᐃᓐᓇᕈᕐᑎᓚᐅᕐᑕᖏᓐᓂᒃ. 8 ᓇᒃᓯᐅᑦᔨᓗᑎᓪᓗ ᓰᑕᕆᓂᒃ, ᓮᐳᕋᔅᓂᒡᓗ, ᓇᐹᕐᑐᕕᓂᕐᓂᒡᓗ ᐰᓂᓂᒃ ᓕᐸᓇᓂᒥᐅᑕᕐᓂᒃ, ᖃᐅᔨᒪᒐᒪ ᓴᓇᔨᑎᑦ ᓇᑲᑎᕆᔪᓐᓇᕐᒪᑕ ᓇᐹᕐᑐᓂᒃ ᓕᐸᓇᓂᒥ. ᓴᓇᔨᖁᑎᒃᑲᓗ ᑎᓕᔪᒫᕐᐸᒃᑲ ᓴᓇᔨᖁᑎᖕᓂᒃ ᐃᑲᔪᖁᓗᒋᑦ. 9 ᐊᑐᐃᓐᓇᕈᐃᓗᑎᒃ ᕿᔪᖕᓂᒃ ᐊᒥᒐᖏᑦᑐᓂᒃ, ᑖᓐᓇ ᐃᒡᓗᕐᔪᐊᖅ ᓴᓇᔪᒫᕐᑕᕋ ᐊᔪᐊᓘᔪᒫᕐᒪᑦ ᐱᐅᔫᓗᓂᓗ. 10 ᐱᔨᑎᓪᓗ ᕿᔪᖕᓂᒃ ᓇᑲᑎᕆᔩᑦ, ᑐᓂᔪᒫᕐᐸᒃᑲ 20,000ᓂᒃ ᐅᖁᒤᓐᓂᓕᖕᓂᒃ ᓂᐊᖂᔭᒃᓴᓂᒃ ᓇᕿᑎᕐᓯᒪᔪᓂᒃ, 20,000ᓂᒡᓗ ᐅᖁᒤᓐᓂᓕᖕᓂᒃ ᐹᕐᓕᓂᒃ, 20,000ᓂᒡᓗ ᖃᓪᓗᑎᓂᒃ ᕔᓂᓂᒃ, 20,000ᓂᒡᓗ ᖃᓪᓗᑎᓂᒃ ᐅᕐᓱᒥᒃ.” 11 ᑭᖑᓂᖓᒍᑦ ᕼᐅᕋᒻ ᑍᕆᒥ ᐊᖓᔪᖅᑳᕐᔪᐊᖅ ᑭᐅᕗᖅ ᑎᑎᕋᕐᓗᓂ, ᓲᓗᒨᓂᒧᑦ: “ᐊᑕᓂᐅᑉ ᐃᓄᖁᑎᓂ ᓇᒡᓕᒋᖕᒪᒋᑦ ᑖᑦᓱᒪ ᐊᖓᔪᖅᑳᕐᔪᐊᓐᖑᕐᑎᓚᐅᕐᐹᑎᑦ.” 12 ᕼᐅᕋᒻ ᐅᖃᓚᐅᕆᕗᖅ: “ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᓂᕐᑐᕐᑕᐅᓕ, ᕿᓚᖕᒥᒃ ᓄᓇᒥᒡᓗ ᓴᓇᓚᐅᕐᑐᖅ, ᐊᖓᔪᖅᑳᕐᔪᐊᖅ ᑍᕕᑎ ᐃᕐᓂᕐᑖᕐᑎᓚᐅᕐᒪᒍ ᓯᓚᑐᔪᒥᒃ, ᓇᓗᓁᕐᓯᑦᓯᐊᕈᓐᓇᕐᑐᒥᒃ ᑐᑭᓯᓯᒪᑦᓯᐊᕐᑐᒥᒡᓗ, ᓴᓇᓂᐊᕐᑐᒥᒃ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓂᒃ, ᐃᒡᓗᕐᔪᐊᒃᓴᒥᓂᒡᓗ ᓴᓇᓂᐊᕐᑐᒥᒃ. 13 ᒫᓐᓇᓕ ᑎᓕᓯᕕᒋᕙᒋᑦ ᐱᔪᓐᓇᑦᓯᐊᕐᑐᒥᒃ ᓯᓚᑐᔪᒥᒃ ᑐᑭᓯᓯᒪᑦᓯᐊᕐᑐᒥᒡᓗ, ᕼᐅᕋᒪᐱᒥᒃ. 14 ᑖᓐᓇ ᑖᓐ ᑭᖑᕚᖏᓐᓄᑦ ᐸᓂᒋᔭᐅᔫᑉ ᐃᕐᓂᖓ, ᐊᑖᑕᖓᓗ ᑍᕋᒥᐅᑕᐅᕗᖅ. ᑖᓐᓇ ᐃᓕᓐᓂᐊᕐᓯᒪᑦᓯᐊᕐᐳᖅ ᒎᓗᓕᕆᓂᕐᒥᒃ ᓯᐅᓪᕙᓕᕆᓂᕐᒥᒃ, ᑲᓐᓄᔭᓂᒃ ᓴᕕᕋᔭᖕᓂᒡᓗ, ᐅᔭᕋᖕᓂᒃ ᕿᔪᖕᓂᒡᓗ, ᐃᑦᓯᐅᔭᓂᒃ ᑐᖑᔪᕐᑐᓂᒡᓗ, ᕿᑐᒪᔪᓂᒃ ᖃᓪᓗᓈᕐᑕᓂᒡᓗ ᓵᑦᑐᓂᒃ, ᐃᑎᕐᓴᓕᐅᕐᓯᒪᔪᓂᒡᓗ ᑎᑎᕋᕈᓐᓇᕐᑐᖅ ᓴᓇᖁᔭᐅᔪᓕᒫᓂᒡᓗ ᐱᓇᓱᐊᕈᓐᓇᕐᑐᖅ, ᐃᓄᖁᑎᑎᑦ ᓴᓇᔪᓐᓇᕐᑐᑦ ᐊᑖᑕᕕᓪᓗ ᐊᖓᔪᖅᑳᒪ ᑍᕕᑎᐅᑉ ᐃᓄᖁᑎᖏᓐᓂᒃ ᓴᓇᔪᓐᓇᕐᑐᓂᒃ ᓴᓇᖃᑎᖃᑦᓯᐊᕈᓐᓇᕐᑐᖅ. 15 ᒫᓐᓇ ᑍᒤᒻᒪᑦ ᓂᐊᖂᔭᒃᓮᑦ ᐹᕐᓖᓪᓗ, ᐅᕐᓱᐃᑦ ᕔᓃᓪᓗ, ᐊᖓᔪᖅᑳᒪ ᐅᖃᐅᓯᕆᓚᐅᕐᑕᖏᑦ, ᓇᒃᓯᐅᑎᓕᒃᑭᑦ ᐱᔨᖕᓄᑦ; 16 ᕿᔪᖕᓂᒡᓗ ᓇᑲᑎᕆᔪᓐᓇᕐᐳᒍᑦ ᓕᐸᓇᓂᒥᑦ ᐱᔭᕆᐊᖃᕐᑕᓕᒫᕐᓂᒃ, ᓇᒃᓯᐅᑎᔪᓐᓇᕐᐸᕗᑦ ᐃᒪᒃᑯᑦ ᐅᓯᑲᕐᑕᐅᑎᒃᑰᕐᑎᓪᓗᒋᑦ ᔮᐸᒧᑦ, ᑍᑲᓐᖓᓪᓕ ᔨᕉᓴᓕᒧᐊᕈᑎᔪᒫᕋᕕᒋᑦ.” ᑐᒃᓯᐊᕐᕕᒡᔪᐊᑉ ᓴᓇᔭᐅᒋᐊᓯᓂᖓ ᐊᑕᓃᑦ ᓯᕗᓪᓖᑦ 6:1-38 17 ᑕᕝᕙ ᓲᓗᒨᓂᐅᑉ ᐃᓄᐃᑦ ᓈᓴᕐᐰᑦ ᓄᓇᓕᑐᖃᐅᖏᑦᑐᑦ ᐃᓴᕆᐊᓕᒥᐅᑉ ᓄᓇᖓᓃᑦᑐᑦ, ᐊᑖᑕᖓᑕ ᑍᕕᑎᐅᑉ ᓈᓮᓚᐅᕐᓂᖓᑐᑦ; ᑖᒃᑯᐊ ᓄᓇᓕᑐᖃᐅᖏᑦᑐᑦ 153,600ᐅᕗᑦ. 18 ᑖᒃᑯᐊ 70,000ᐅᓮᑦ ᐊᒡᔭᕐᓯᔨᓐᖑᕐᑎᑉᐰ, 80,000ᐅᓮᑦ ᐅᔭᕋᖕᓂᒃ ᓇᑲᑎᕆᔨᓐᖑᕐᑎᓪᓗᒋᑦ ᖃᖅᑲᓂ, 3,600ᐃᑦ ᑲᒪᔨᓐᖑᕐᑎᓪᓗᒋᑦ ᓴᓇᔪᓄᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society