ᑯᕉᓂᑲ ᐂᑉᐸᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᐃᓴᕆᐊᓕᒥᐅᑉ ᐊᑲᐅᖏᑦᔪᑎᒃᓴᖃᕐᓂᖏᑦ ᐊᑕᓃᑦ ᓯᕗᓪᓖᑦ 15:17-22 1 ᐊᕐᕌᒍᓂᒃ 36ᓂᒃ ᐂᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐹᓴ ᐅᓇᑕᕆᐊᕐᐳᖅ ᔫᑕᒃᑯᓐᓂᒃ ᓵᓚᒋᓪᓗᒋᓪᓗ, ᓴᐴᓗᑕᓕᕐᓗᒍᓗ ᕌᒪ, ᐊᓂᔪᖃᖁᓇᒍ ᐃᑎᕐᑐᖃᖁᓇᒍᓗ ᐊᖓᔪᖅᑳᕐᔪᐊᕐᒧᑦ ᐂᓴᒧᑦ ᔫᑕᒦᑦᑐᒧᑦ. 2 ᑕᕝᕙ ᐂᓴ ᓯᐅᓪᕕᕆᓂᒃ ᒎᓗᓂᒡᓗ ᐊᑕᓂᐅᑉ ᐃᒡᓗᖓᓂᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓂᑦ ᐱᓪᓗᓂ ᐱᖁᑎᓂᒃ, ᑖᒃᑯᐊ ᓇᒃᓯᐅᑎᕔᑦ ᐱᓐ-ᕼᐊᑖᑦᒧᑦ ᓯᕆᐊᑉ ᐊᖓᔪᖅᑳᕐᔪᐊᖓᓄᑦ, ᑕᒫᓯᑰᓯᒦᑦᑐᒧᑦ, ᐅᖃᕐᓗᓂ, 3 “ᐊᖏᖃᑎᒌᓚᐅᕐᓗᒃ ᐅᕙᑦᑎᖕᓄᑦ, ᓲᕐᓗ ᐊᑖᑕᒐ ᐊᑖᑍᓪᓗ ᐊᖏᖃᑎᒌᒃᓯᒪᓚᐅᕐᒪᑎᒃ, ᑕᑯᒋᑦ ᓯᐅᓪᕕᕆᓂᒃ ᒎᓗᓂᒡᓗ ᑐᓂᕙᒋᑦ; ᑕᐱᖃᕐᓃᑦ ᐹᓴᒥᒃ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓂᒃ ᓄᖅᑲᕐᑎᓚᐅᕈᒃ, ᐅᕙᓐᓂᒃ ᓵᓐᖓᔪᓐᓃᕐᓂᐊᕐᒪᑦ.” 4 ᐱᓐ-ᕼᐊᑖᓪᓗ ᐊᖓᔪᖅᑳᕐᔪᐊᕐᒧᑦ ᐂᓴᒧᑦ ᐊᖏᕐᐳᖅ, ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ ᑎᓕᕔᑦ ᐅᓇᑕᕆᐊᖁᓪᓗᒋᑦ ᐃᓴᕆᐊᓕᒥᐅᑦ ᐃᒡᓗᒐᓴᖏᓐᓄᑦ, ᐅᑯᐊᓗ ᓵᓚᒋᕔᑦ ᐃᔮᓐ, ᑖᓐ, ᐊᐱᐅᓪ-ᒤᒻ, ᐃᒡᓗᒐᓴᓕᒫᓪᓗ ᓈᑉᑕᓕᐅᑉ ᓱᓇᑐᐃᓐᓇᖃᕐᕕᖏᑦ. 5 ᐹᓴ ᑕᒪᑐᒥᖓ ᑐᓴᕋᒥ, ᕌᒪᒥᒃ ᓴᓇᔪᓐᓃᕐᐳᖅ, ᓴᓇᔭᓂᓗ ᓄᖅᑲᐅᑎᓪᓗᒍ. 6 ᑕᕝᕙ ᐊᖓᔪᖅᑳᕐᔪᐊᑉ ᐂᓴᐅᑉ ᔫᑕᓕᒫᖅ ᑎᒍᕙ, ᐅᔭᕅᓪᓗ ᕿᔪᐃᓪᓗ ᕌᒪᒥᑦ ᐊᐅᓪᓚᐅᑎᕔᑦ, ᐹᓴᐅᑉ ᓴᓇᑦᔪᑎᒋᓚᐅᕐᑕᖏᑦ, ᑖᒃᑯᓄᖓ ᒋᐸᒥᒃ ᒥᔅᐸᒥᓪᓗ ᓴᓇᓕᕐᐳᖅ. ᕼᐊᓇᓁᑉ ᐅᖃᐅᓯᖓ ᐂᓴᒧᑦ 7 ᑍᑦᓱᒪᓂᐅᑎᓪᓗᒍ ᕼᐊᓇᓁ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐂᕗᖅ ᐂᓴᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, ᐅᖃᐅᑎᓪᓗᒍᓗ, “ᑕᑎᖃᓚᐅᕋᕕᑦ ᓯᕆᐊᑉ ᐊᖓᔪᖅᑳᕐᔪᐊᖓᓂᒃ, ᐊᑕᓂᕐᒥᒃ ᒎᑎᖕᓂᒃ ᑕᑎᖃᓚᐅᕐᓇᒃ, ᑍᒤᒻᒪᑦ ᓯᕆᐊᑉ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᖏᑦ ᐃᓕᖕᓂᒃ ᕿᒤᕗᑦ. 8 ᐃᑎᐅᐱᐊᒥᐅᑦ ᓕᐱᐊᓐᒥᐅᓪᓗ ᐅᓄᕐᑐᕐᔪᐊᖑᓚᐅᓐᖏᓛᑦ? ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᕐᑎᓂᒡᓗ ᐃᓚᖃᕐᓗᑎᒃ? ᐊᑕᓂᕐᒥᒃ ᑕᑎᖃᓚᐅᕋᕕᑦ, ᑖᑦᓱᒪ ᐱᔪᓐᓇᕐᓂᖓᓄᑦ ᓵᓚᖃᕐᑎᑕᐅᓚᐅᕐᐳᑎᑦ. 9 ᐊᑕᓂᖅ ᒫᓐᖓᑦ ᑕᐅᕗᖓ ᓄᓇᕐᔪᐊᓕᒫᒥᒃ ᑕᑯᓐᓇᕐᒪᑦ, ᓲᖑᓂᕐᒥᓂᒃ ᑕᑯᑎᑦᓯᔪᒪᓪᓗᓂ ᐆᒻᒪᑎᒥᒍᑦ ᐃᒃᐱᒍᓱᑦᓯᐊᕐᑐᓄᑦ ᑖᑦᓱᒥᖓ. ᐱᓂᐊᕐᓃᑦ ᑕᒪᑐᒧᖓ ᓯᓔᑦᑑᓚᐅᕐᒪᑦ; ᑍᒤᒻᒪᑦ ᒫᓐᓇᒥᑦ ᐱᒋᐊᕐᓗᒍ ᐅᓇᑍᓐᓇᕐᓂᐊᓕᕐᐳᑎᑦ.” 10 ᐂᓴᓕ ᓂᓐᖓᒃᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᑎᒍᕚᓗ ᐊᑦᓱᖏᐅᑎᒧᐊᕐᓗᒍ, ᑎᒍᔭᐅᓯᒪᕕᖕᒧᐊᕐᐹ, ᓂᓐᖓᐅᑎᒻᒪᕆᒃᐹ ᑕᒪᓐᓇ ᐱᓪᓗᒍ. ᐃᓚᖏᓪᓗ ᐃᓄᐃᑦ ᓂᑲᒋᓇᒋᑦ ᐅᖁᒤᒃᓴᕐᑎᓕᕐᐰᑦ ᑍᑦᓱᒪᓂᐅᑎᓪᓗᒍ. ᐂᓴᐅᑉ ᐊᖓᔪᖅᑳᕐᔪᐊᖑᓂᖓᑕ ᐃᓱᓕᓐᓂᖓ ᐊᑕᓃᑦ ᓯᕗᓪᓖᑦ 15:23-24 11 ᐂᓴᐅᑉ ᐱᓂᐊᕐᓂᖏᑦ ᐱᒋᐊᕐᓂᖓᓂᑦ ᐃᓱᓕᓐᓂᖓᓄᑦ, ᑎᑎᕋᕐᓯᒪᕗᑦ ᔫᑕᐅᓪᓗ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᑕ ᐱᕙᓪᓕᐊᓂᖏᑕ ᑎᑎᕋᕐᓯᒪᔪᖁᑎᖏᓐᓂ. 12 ᐂᓴ ᐊᕐᕌᒍᓂᒃ 39ᓂᒃ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐋᓐᓂᐊᕐᑖᓚᐅᕐᐳᖅ ᐃᑎᒐᖕᒥᒍᑦ, ᐋᓐᓂᐊᓂᖓᓗ ᐱᐅᖏᒻᒪᕆᓕᕋᓗᐊᕐᒪᑦ; ᐋᓐᓂᐊᓂᕐᒥᓄᑦ ᐊᑕᓂᕐᒥᒃ ᐃᑲᔪᕐᑎᒃᓴᕐᓯᐅᓚᐅᓐᖏᓚᖅ, ᐋᓐᓂᐊᓯᐅᕐᑎᓄᓪᓕ ᑭᓯᐊᓂ ᐃᑲᔪᕐᑕᐅᑎᓐᓇᓱᓚᐅᕐᐳᖅ. 13 ᐂᓴᓗ ᑐᖁᕗᖅ ᓯᕗᓕᒥᓄᓪᓗ ᐂᓪᓗᓂ, ᐊᕐᕌᒍᓂᒃ 41ᓂᒃ ᐊᖓᔪᖅᑳᕐᔪᐊᖑᓕᕐᓗᓂ ᑐᖁᓚᐅᕐᐳᖅ. 14 ᐃᓗᕕᕐᑕᐅᕗᕐᓗ ᓇᖕᒥᓂᖅ ᐃᓗᕕᕐᕕᒃᓴᓕᐊᕕᓂᕐᒥᓄᑦ ᑍᕕᑎᐅᑉ ᐃᒡᓗᒐᓴᖏᓐᓂ. ᐃᓕᕚᓪᓗ ᐃᓗᕕᖃᕐᕕᖕᒧᑦ ᑎᐱᑦᓯᐊᕆᒃᓴᐅᑎᓄᑦ ᐊᑦᔨᒌᖏᑦᑐᓄᑦ ᑕᑕᑦᑐᒧᑦ ᐃᓚᓯᒪᔪᓂᒃ ᐅᕐᓱᕐᑎᕈᑎᓂᒃ; ᐃᑯᐊᓚᕕᒡᔪᐊᕐᑎᑦᓯᓪᓗᑎᒡᓗ ᑖᓐᓇ ᐅᐱᒋᓪᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society