ᑯᕉᓂᑲ ᐂᑉᐸᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᓴᐅᑉ ᐋᖅᑭᒃᓱᐃᒋᐊᕐᓂᖓ

¹ ᒎᑎᐅᑉ ᐊᓂᕐᓂᖓ ᐊᔭᕅᐊᒧᐊᕐᐳᖅ ᐅᐱᑎᐅᑉ ᐃᕐᓂᖓᓄᑦ.

² ᐂᓴᓗ ᐸᕐᕆᐊᓕᕐᐹ, ᑲᑎᒐᒥᐅᒡᓗ ᐅᖃᐅᑎᕚ, “ᐂᓵ ᓈᓚᓐᖓ, ᔫᑕᒥᐅᓕᒫᑦ ᐱᓐᔭᒥᓂᒃᑯᓕᒫᓪᓗ: ᐊᑕᓂᐅᑉ ᐃᓚᒋᕚᓯ, ᑖᑦᓱᒪᓃᓐᓂᑦᓯᓐᓂ. ᕿᓂᕈᑦᓯᐅᒃ ᓇᓂᓂᐊᕐᐸᓯ, ᕿᒪᒍᑦᓯᐅᒃ ᑖᑦᓱᒪᑦᑕᐅᖅ ᕿᒪᖕᓂᐊᕆᕚᓯ.

³ ᐃᓴᕆᐊᓕᒥᐅᑦ ᐊᑯᓂᐊᓗᒃ ᒎᑎᒥ ᓱᓕᔪᒦᓚᐅᖏᒻᒪᑕ, ᑐᓂᕐᕈᓯᕐᑎᑦᓯᔨᒥᒡᓗ ᐃᓕᓮᔨᖃᕋᑎᒃ, ᐱᖁᔭᖃᕋᑎᒡᓗ;

⁴ ᕿᒃᓵᖕᓇᕐᑐᒃᑰᓕᕋᖕᒥᒃ ᓵᒋᐊᓚᐅᕐᐳᖅ ᐊᑕᓂᕐᒧᑦ, ᐃᓴᕆᐊᓕᐅᑉ ᒎᑎᖓᓄᑦ, ᕿᓂᓕᕋᒥᑦᔪᒃ, ᓇᓂᓚᐅᕐᐹᑦ.

⁵ ᑍᑦᓱᒪᓂᐅᑎᓪᓗᒍ ᐃᓱᒫᓗᓇᖏᑦᑐᒥ ᐱᔪᖃᕈᓐᓇᓚᐅᓐᖏᓚᖅ ᐊᓂᔪᓄᑦ ᐃᑎᕐᑐᓄᓪᓘᓐᓃᑦ, ᐊᑲᐅᖏᑦᔪᑎᒃᓴᕐᑕᖃᓚᐅᕐᒪᑦ ᐊᖏᔪᒥᒃ ᓄᓇᖃᕐᑐᓕᒫᓄᑦ.

⁶ ᐃᓅᖃᑎᒌᒡᔪᐊᑦ ᐃᒻᒥᖕᓄᑦ ᐊᓯᕈᖃᑦᑕᐅᑎᖃᑦᑕᓚᐅᕐᐳᑦ, ᐃᒡᓗᒐᓮᓪᓗ ᐃᒡᓗᒐᓴᐅᖃᑎᒥᖕᓄᑦ, ᒎᑎᐅᑉ ᐊᒃᓱᕈᕐᓇᕐᑐᒃᑰᕐᑎᓚᐅᕐᒪᒋᑦ ᐅᖁᒤᑦᑐᒃᑯᑦ.

⁷ ᐃᕝᕕᓪᓕ, ᓴᐱᓕᕐᑍᓕᒋᑦ! ᐱᔪᓐᓇᕐᓃᓪᓗ ᓴᓐᖐᓕᑎᑦᑍᓕᒍᒃ, ᐱᓂᐊᕐᓂᑎᑦ ᐊᑭᓕᕐᑕᐅᔪᒫᕐᒪᑕ.”

⁸ ᐂᓴᐅᑉ ᑕᒪᓐᓇ ᑐᓴᕋᒥᐅᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐊᔭᕅᐊᑉ ᐅᐱᑎᐅᑉ ᐃᕐᓂᖓᑕ ᐅᖃᐅᓯᕆᔭᖏᑦ, ᓴᐱᕈᓐᓂᕐᐳᖅ, ᒎᑎᓐᖑᐊᓪᓗ ᓇᕐᕈᓇᕐᑐᑦ ᐲᔭᕐᐰᑦ ᓄᓇᓕᓕᒫᓂᑦ ᔫᑕᒥ ᐱᓐᔭᒥᓂᒥᓗ ᐃᒡᓗᒐᓴᖕᓂᓗ ᓇᒡᕚᕐᑕᕐᕕᒋᓚᐅᕐᑕᒥᓂ ᐃᕗᕅᒥᐅᑦ ᖃᖅᑲᖏᓐᓂᑦ, ᐊᑕᓂᐅᓪᓗ ᑐᓂᕐᕈᓯᕐᕕᖁᑎᖓ ᓴᓇᒋᐊᕐᓗᒍ ᐅᑎᕐᑎᑉᐹ ᐊᑕᓂᐅᑉ ᐃᒡᓗᖓᑕ ᑐᕐᓲᖑᔭᖓᑕ ᓯᕗᕌᓄᑦ.

⁹ ᔫᑕᒃᑯᓕᒫᓪᓗ ᐱᓐᔭᒥᓂᒃᑯᓕᒫᓪᓗ ᑲᑎᖁᕔᑦ, ᐃᕗᕅᒥᓗ, ᒫᓇᓯᒥ, ᓯᒥᐅᓂᒥᓗ ᓄᓇᓖᑦ, ᐅᓄᕐᑐᕐᔪᐊᓪᓗ ᐃᓴᕆᐊᓕᒥᐅᑦ ᑕᕝᕗᓐᖓᕆᕗᑦ ᑕᑯᒐᒥᒃ ᐊᑕᓂᐅᑉ ᑖᑦᓱᒪ ᒎᑎᖓᑕ ᐃᓚᒋᖕᒪᒍ.

¹⁰ ᔨᕉᓴᓕᒥ ᑲᑎᕗᑦ ᑕᖅᑮᑦ ᐱᖓᔪᐊᓐᓂ ᐂᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 15ᓂᒃ.

¹¹ ᐊᑕᓂᕐᒧᑦ ᑐᓂᕐᕈᓯᕐᐳᑦ ᐅᓪᓗᒥ ᑕᕝᕙᓂ, ᓇᒡᕚᕐᑖᕕᓂᕐᒥᖕᓂᒃ ᐃᒻᒧᒃᓯᐅᒊᑦ ᐊᖑᓴᓪᓗᖏᓐᓂᒃ 700ᓂᒃ ᓰᐱᓂᒡᓗ 7,000ᓂᒃ.

¹² ᐊᖏᖃᑎᒌᒃᐳᓪᓗ ᐊᑕᓂᕐᒥᒃ ᓯᕗᓕᖏᑕ ᒎᑎᖓᓂᒃ ᖃᐅᔨᓇᓱᖃᑦᑕᕈᒪᓪᓗᑎᒃ, ᐆᒻᒪᑎᒥᖕᓄᑦ ᑕᕐᓂᕐᒥᖕᓄᓪᓗ ᐃᓘᓐᓈᓄᑦ.

¹³ ᓇᓪᓕᐊᓪᓗ ᐊᑕᓂᕐᒥᒃ ᖃᐅᔨᓇᓱᐊᖃᑦᑕᕈᒪᖏᑦᑐᖅ ᐃᓴᕆᐊᓕᐅᑉ ᒎᑎᖓᓂᒃ, ᑐᖁᑕᐅᔪᒃᓴᐅᕗᖅ, ᐃᓅᓱᒃᑑᒐᓗᐊᕐᐸᑦ ᐃᓄᑐᖃᐅᒃᐸᓪᓘᓐᓃᑦ, ᐊᖑᑕᐅᒃᐸᑦ ᐊᕐᓇᐅᒃᐸᓪᓘᓐᓃᑦ.

¹⁴ ᐊᖏᒻᒪᕆᒡᓗᑎᒡᓗ ᐅᖃᕕᒃᐳᑦ ᐊᑕᓂᕐᒧᑦ ᓂᐱᖅᑯᕐᑐᓪᓗᑎᒃ, ᕾᒐᓛᕐᓗᑎᒃ, ᑎᑦᑐᓚᐅᓯᔭᕐᓗᑎᒡᓗ, ᐊᖑᓴᓪᓗᐃᓪᓗ ᓇᒡᔪᖏᓐᓄᑦ ᑎᑦᑐᓛᕐᓗᑎᒃ.

¹⁵ ᔫᑕᒥᐅᓕᒫᓪᓗ ᖁᕕᐊᓱᒃᐳᑦ ᐅᖃᕕᒃᓗᑎᒃ ᐊᖏᕈᑎᒋᔭᒥᖕᓂᒃ; ᐊᖏᒻᒪᕆᓚᐅᕋᒥᒃ ᐆᒻᒪᑎᒥᖕᓄᑦ ᐃᓘᓐᓈᓄᑦ, ᖃᐅᔨᓇᓱᓚᐅᕋᒥᑦᔪᒡᓗ ᐱᔪᓐᓇᕐᓂᓕᒫᒥᖕᓄᑦ, ᓇᓂᓚᐅᕋᒥᑦᔪᒡᓗ, ᐊᑕᓂᐅᓪᓗ ᐸᒡᕕᓴᒃᑕᐅᑎᓚᐅᓐᖏᓔᑦ ᐊᕙᑎᒥᐅᑕᓕᒫᖏᓐᓂᑦ.

¹⁶ ᒫᑲᓗ ᐊᒡᓛᑦ ᐲᕐᑎᑉᐹ ᑯᐃᖑᓂᕐᒥᑦ, ᐊᓈᓇᖓ ᓇᕐᕈᓇᕐᑐᒥᒃ ᒎᑎᓐᖑᐊᒥᒃ ᓴᓇᓚᐅᕐᓂᖓᓄᑦ ᐊᓯᕋᒥᒃ ᐊᕐᓇᓐᖑᐊᒥᒃ ᓇᐸᔪᒥᒃ. ᐂᓴᐅᓪᓗ ᒎᑎᓐᖑᐊᖅ ᓱᕋᒃᓗᒍ ᐅᕐᕈᑎᑉᐹ, ᓯᖁᑦᑎᕐᓗᒍᓗ, ᐃᑯᐊᓪᓚᒡᓗᒍᓗ ᑭᑐᕌᓂᐅᑉ ᑰᖓᑕ ᓴᓂᐊᓂ.

¹⁷ ᐱᓪᓚᕆᒋᔭᐅᔪᓪᓕ ᑐᒃᓯᐊᕐᕖᑦ ᐲᔭᕐᑕᐅᓚᐅᓐᖏᓚᑦ ᐃᓴᕆᐊᓕᒥ. ᑍᒤᒃᑲᓗᐊᕐᒪᑦ ᐂᓴ ᐆᒻᒪᑎᒥᒍᑦ ᓇᓛᒎᖏᓐᓇᓚᐅᕐᐳᖅ ᐃᓅᓯᓕᒫᒥᓂ.

¹⁸ ᒎᑎᐅᓪᓗ ᐃᒡᓗᖓᓄᑦ ᐃᑎᕐᑎᑦᓯᓚᐅᕐᐳᖅ ᐊᑖᑕᖓᑕ ᐊᐰᔭᐅᑉ ᐃᑦᔪᕐᓁᑎᓚᐅᕐᑕᖏᓐᓂᒃ ᐃᒻᒥᓂᒡᓗ ᐃᑦᔪᕐᓁᑎᓚᐅᕐᑕᒥᓂᒃ ᑐᓂᓪᓗᒋᓪᓗ ᒎᑎᒧᑦ, ᓯᐅᓪᕕᕇᑦ ᒎᓗᐃᓪᓗ, ᓂᕿᓕᕆᐅᑏᓪᓗ.

¹⁹ ᐅᓇᑕᕐᓂᖃᓚᐅᓐᖏᓚᖅ ᐊᕐᕌᒍᐃᑦ 35 ᓈᓪᓗᒋᑦ ᐂᓴ ᐊᖓᔪᖅᑳᕐᔪᐊᖑᑎᓪᓗᒍ.