ᑯᕉᓂᑲ ᐂᑉᐸᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦᐊᐰᔭᐅᑉ ᐅᓇᑕᕐᓂᖓ ᔨᕈᐳᐊᒻᒥᒃ ᐊᑕᓃᑦ ᓯᕗᓪᓖᑦ 15:1-8 1 ᐊᖓᔪᖅᑳᕐᔪᐊᖅ ᔨᕈᐳᐊᒻ 18ᓂᒃ ᐊᕐᕌᒍᓂᒃ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᐰᔭ ᐊᖓᔪᖅᑳᕐᔪᐊᕈᓚᐅᕐᐳᖅ ᔫᑕᒥ. 2 ᐊᖓᔪᖅᑳᖑᓚᐅᕐᐳᖅ ᐊᕐᕌᒍᓂᒃ ᐱᖓᓱᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᒥᑬᐊᒥᒃ ᔪᕅᐅᓕᐅᑉ ᒋᐱᐊᒥᐅᑕᐅᑉ ᐸᓂᖓ. ᐅᓇᑕᕐᓂᖃᓚᐅᕐᐴᒃ ᐊᐰᔭᒃᑯᒃ ᔨᕈᐳᐊᒻᑯᒃ. 3 ᐊᐰᔭᐅᑉ ᐅᓇᑕᕐᑎᓂ ᐊᑐᐃᓐᓇᕈᕐᑎᕐᐰᑦ ᐅᓇᑕᕈᓐᓇᕐᑐᑦ, 400,000 ᐊᖑᑏᑦ ᓂᕈᐊᕐᑕᐅᓯᒪᔪᑦ; ᔨᕈᐳᐊᒻᑕᐅᖅ ᐅᓇᑕᕐᓂᕐᒧᑦ ᐊᑐᐃᓐᓇᕈᕆᕗᖅ ᑖᒃᑯᓄᖓ 800,000ᓂᒃ ᐊᖑᑎᓂᒃ ᓂᕈᐊᕐᑕᐅᓯᒪᔪᓂᒃ ᐃᓚᖃᕐᓗᓂ. 4 ᑕᕝᕙ ᐊᐰᔭ ᖃᖅᑲᒥ ᔨᒪᕅᒻᒥ ᓇᖏᕐᐳᖅ ᐃᕗᕅᑎᐅᑉ ᖃᖅᑲᖏᓐᓃᑦᑐᒥ, ᐅᖃᕐᓗᓂᓗ, “ᑐᓴᕐᓯᓐᖓ ᔨᕈᐳᐊᒻ ᐃᓕᑦᓯᓗ ᐃᓴᕆᐊᓕᒥᐅᓕᒫᑦ! 5 ᖃᐅᔨᒪᓐᖏᓚᓰ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑕ ᐃᓴᕆᐊᓕᒥᐅᑦ ᐊᐅᓚᑕᐅᓂᖓ ᑍᕕᑎᒧᑦ ᑐᓂᓚᐅᕐᒪᒍ ᐃᓱᖃᖏᑦᑐᒧᑦ ᐃᓕᖓᖁᓪᓗᒍ, ᑖᑦᓱᒧᖓ ᐃᕐᓂᖏᓐᓄᓪᓗ ᑐᓂᓚᐅᕐᒪᒍ, ᐊᖏᖃᑎᒌᖕᓂᒃᑯᑦ ᑕᕆᐅᒃᑯᑦ? 6 ᔨᕈᐳᐊᒻᓕ ᓂᐹᑎᐅᑉ ᐃᕐᓂᖓ, ᑍᕕᑎᐅᑉ ᐃᕐᓂᖓᑕ ᓲᓗᒨᓂᐅᑉ ᐱᔨᖓ, ᒪᑭᓚᐅᕐᐳᖅ ᐊᑭᕋᕐᑐᓕᕐᓗᓂᓗ ᐊᖓᔪᖅᑳᒥᓂᒃ. 7 ᐊᑑᑎᖃᖏᑦᑐᓪᓗ ᐃᓚᓕᐅᑎᓚᐅᕐᐳᑦ ᑖᑦᓱᒧᖓ, ᐊᔪᐃᓐᓇᓚᐅᕐᐳᑦ ᐊᑭᕋᕐᑐᕈᒪᓪᓗᑎᒃ ᕆᕼᐅᐳᐊᒻᒧᑦ ᓲᓗᒨᓂᐅᑉ ᐃᕐᓂᖓᓄᑦ, ᕆᕼᐅᐳᐊᒻ ᐃᓅᓱᒃᑑᑎᓪᓗᒍ ᖃᐅᔨᒪᓐᖏᓗᐊᕐᑎᓪᓗᒍᓗ ᑖᒃᑯᓂᖓ ᐊᑭᒪᔪᓐᓇᓚᐅᖏᒻᒪᑦ. 8 ᒫᓐᓇᓕ ᐊᑭᒪᔪᓐᓇᕋᓱᒋᕕᓰ ᐊᑕᓂᐅᑉ ᐊᑕᓂᐅᕕᖓᓄᑦ, ᑍᕕᑎᐅᑉ ᐃᕐᓂᖏᑕ ᐱᔪᓐᓇᕐᓂᖏᓐᓄᑦ; ᐅᓄᕐᑐᕐᔪᐊᖑᒐᑦᓯ ᐃᓚᖃᕐᓗᓯᓗ ᓄᕐᕋᐅᔭᓐᖑᐊᓂᒃ ᒎᓗᓂᒃ ᔨᕈᐳᐊᒻ ᓴᓇᓚᐅᕐᑕᖏᓐᓂᒃ ᒎᑎᓐᖑᐊᓂᒃ. 9 ᐊᓂᑦᑎᓚᐅᓐᖏᓚᓰ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖏᓐᓂᒃ, ᐂᕉᓂᐅᓪᓗ ᐃᕐᓂᖏᓐᓂᒃ, ᓕᕔᑎᓂᒡᓗ, ᓇᖕᒥᓂᕐᓗ ᑐᓂᕐᕈᓯᕐᑎᑦᓯᔨᒃᓴᑦᓯᓐᓂᒃ ᑎᓕᓯᓪᓗᓯ, ᐃᓅᖃᑎᒌᒡᔪᐊᑦ ᐊᓯᓯ ᒪᓕᒡᓗᒋᑦ? ᓇᓪᓕᐊᑦ ᑐᓂᕐᕈᓯᕆᐊᖃᕐᑎᓪᓗᒍ ᐃᒻᒥᓂᒃ ᐃᑦᔪᕐᓁᓕᑎᓪᓗᓂ ᐊᖑᓴᓪᓗᕐᒥᒃ ᐅᕝᕙᓗ 7ᓂᒃ ᓰᐱᐅᑉ ᐊᖑᓴᓪᓗᖏᓐᓂᒃ ᑐᓂᕐᕈᓯᕐᑎᑦᓯᔨᓐᖑᕐᑎᑉᐱᓯᐅᒃ ᒎᑎᐅᖏᑦᑐᓄᑦ? 10 “ᐅᕙᒍᓪᓕ ᐊᑕᓂᖅ ᒎᑎᒋᕙᕗᑦ, ᕿᒪᓚᐅᕐᓇᒍᓗ. ᑐᓂᕐᕈᓯᕐᑎᑦᓯᔨᐊᕐᐳᒍᓪᓗ ᐱᓇᓱᐊᕐᑐᓂᒃ ᐊᑕᓂᕐᒧᑦ ᐂᕉᓂᐅᑉ ᐃᕐᓂᖏᓐᓂᒃ, ᓕᕔᑏᓪᓗ ᐱᔭᒃᓴᒥᓂᒃ ᐱᓇᓱᐊᕐᓗᑎᒃ. 11 ᐃᑯᐊᓪᓔᖃᑦᑕᕐᐳᑦ ᐊᑕᓂᕐᒧᑦ ᐅᓪᓛᑕᒫᑦ ᐅᓐᓄᑕᒫᓪᓗ ᐃᑯᐊᓚᑎᑕᒃᓴᓂᒃ ᑐᓂᕐᕈᓯᖃᑦᑕᕐᐳᑦ ᑎᐱᑦᓯᐊᕆᒃᓴᐅᑎᓂᒡᓗ ᐳᔫᕐᑎᑦᓯᓪᓗᑎᒃ. ᓂᐊᖂᔧᓪᓗ ᐃᓕᖃᑦᑕᕐᐰᑦ ᓵᒧᑦ ᒎᓗᓪᓚᕆᖕᒧᑦ, ᓇᓂᕈᐊᓪᓗ ᐃᓂᖏᑦ ᒎᓗᐃᑦ ᓴᓇᓯᒪᔪᑦ ᓇᓂᕈᐊᖏᓪᓗ ᐃᑯᐊᓚᖃᑦᑕᕐᐳᑦ ᐅᓐᓄᑕᒫᑦ; ᐊᑕᓂᐅᑉ ᒎᑎᑦᑕ ᐱᖁᔭᖏᑦ ᒪᓕᒃᐸᕗᑦ, ᐃᓕᑦᓯᓕ ᕿᒪᓚᐅᕐᐸᓯ. 12 ᑕᑯᒋᑦ, ᒎᑎᐅᑉ ᐃᓚᒋᕚᑎᒍᑦ ᓂᐊᖁᕆᒐᑦᑎᒍ, ᑐᓂᕐᕈᓯᕐᑎᑦᓯᔨᖏᓪᓗ ᑎᑦᑐᓚᐅᑎᓄᑦ ᓂᓪᓕᕐᑎᑦᓯᕗᑦ ᐅᓇᑕᕆᐊᕐᑐᕐᓯᐅᒻᒥᒃ ᐃᓕᑦᓯᓐᓄᑦ. ᐃᓴᕆᐊᓕᐅᑉ ᑭᖑᕚᖏᑦ, ᐊᑕᓂᕐᒥᒃ ᐅᓇᑕᕐᑍᓕᒋᑦᓯ, ᓯᕗᓕᑦᓯ ᒎᑎᖓᓂᒃ; ᓵᓚᖃᕐᓂᐊᖏᓐᓇᑦᓯ.” 13 ᔨᕈᐳᐊᒻ ᐃᔨᕋᕐᑐᕐᓗᓂ ᑭᖑᓂᖓᓐᓂᑦ ᐱᒋᐊᕐᑐᒃᓴᓂᒃ ᑎᓕᓯᓯᒪᓚᐅᕐᐳᖅ; ᓇᖕᒥᓂᖅ ᐅᓇᑕᕐᑐᒃᓴᖁᑎᖏᑦ ᔫᑕᒃᑯᑦ ᓯᕗᕌᓃᑎᓪᓗᒋᑦ, ᐱᒋᐊᕐᑐᒃᓮᑦ ᑐᓄᐊᓃᑎᓪᓗᒋᑦ. 14 ᔫᑕᒃᑯᓪᓗ ᑕᑯᓴᕋᒥᒃ, ᖃᐅᔨᓕᕐᐳᑦ, ᐅᓇᑕᕐᑐᑦ ᓯᕗᕋᓃᑦ ᑐᓄᐊᓂᓗ ᐊᕙᑕᖏᕐᑕᐅᓯᒪᓂᕐᒥᖕᓂᒃ; ᐊᑕᓂᕐᒧᓪᓗ ᑐᒃᓯᐊᓕᕐᐳᑦ, ᑐᓂᕐᕈᓯᕐᑎᑦᓯᔩᓪᓗ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᕗᑦ. 15 ᔫᑕᒃᑯᓪᓗ ᐅᓇᑕᕆᐊᕐᑐᕐᓯᐅᒻᒥᒃ ᕾᒐᓛᓕᕐᐳᑦ. ᔫᑕᐅᓪᓗ ᐃᓄᖏᑦ ᓂᓪᓕᕐᒪᑕ, ᒎᑎᐅᑉ ᔨᕈᐳᐊᒻ ᓵᓚᒋᕚ ᐃᓴᕆᐊᓕᒥᐅᓕᒫᓪᓗ ᐊᐰᔭᐅᑉ ᔫᑕᐅᓪᓗ ᓵᖏᓐᓂ. 16 ᐃᓴᕆᐊᓕᒥᐅᓪᓗ ᕿᒪᒃᓯᕗᑦ ᔫᑕᒃᑯᓐᓂᒃ, ᒎᑎᐅᓪᓗ ᑐᓂᕔᑦ ᔫᑕᒃᑯᑦ ᐱᔪᓐᓇᕐᓂᖏᓐᓄᑦ. 17 ᐊᐰᔭᒃᑯᑦ ᐅᓇᑕᕐᑐᒃᓴᖏᑕᓗ ᐃᓴᕆᐊᓕᒥᐅᑦ ᑐᖁᕋᕐᐰᑦ ᑐᖁᕅᕐᔪᐊᕐᓗᑎᒃ; ᑍᑦᓱᒪᓂ 500,000ᓮᑦ ᐅᓇᑕᕐᑐᒃᓮᑦ ᓂᕈᐊᕐᑕᐅᓯᒪᔪᑦ ᑐᖁᑕᐅᕗᑦ. 18 ᑍᒫᒃ ᐃᓴᕆᐊᓕᒥᐅᑦ ᓵᓚᐅᓚᐅᕐᐳᑦ ᑍᑦᓱᒪᓂ, ᔫᑕᒃᑯᓪᓗ ᓵᓚᖃᕐᐳᑦ, ᑕᑎᖃᓚᐅᕋᒥᒃ ᐊᑕᓂᕐᒥᒃ, ᓯᕗᓕᖏᑕ ᒎᑎᖓᓂᒃ. 19 ᐊᐰᔭᐅᑉ ᔨᕈᐳᐊᒻ ᒪᓕᒃᐹ, ᐊᕐᓵᕐᓗᒍᓗ ᐃᒡᓗᒐᓴᖁᑎᖏᓐᓂᒃ, ᐱᑎᓕᓗ ᓄᓇᓕᖏᓪᓗ ᔨᓴᓇ ᓄᓇᓕᖏᓪᓗ, ᐃᐸᕋᓐᓗ ᓄᓇᓕᖏᓪᓗ. 20 ᔨᕈᐳᐊᒻ ᓲᖑᓯᒃᑲᓐᓂᓚᐅᓐᖏᓚᖅ ᐊᖓᔪᖅᑳᖑᕕᖕᒥᓂ ᐊᐰᔭ ᐃᓅᑎᓪᓗᒍ; ᐊᑕᓂᐅᓪᓗ ᐊᓇᐅᖕᒪᒍ, ᔨᕈᐳᐊᒻ ᑐᖁᕗᖅ. 21 ᐊᐰᔭᓕ ᐱᔪᓐᓇᕐᓯᕙᓪᓕᐊᓚᐅᕐᐳᖅ ᐊᔪᖏᑦᑐᕐᔪᐊᖑᓕᕐᓗᓂ. ᓄᓕᐊᖃᓚᐅᕐᐳᕐᓗ 14ᓂᒃ, ᐃᕐᓂᖃᕐᓗᓂ 22ᓂᒃ ᐸᓂᖃᕐᓗᓂᓗ 16ᓂᒃ. 22 ᐊᐰᔭᐅᑉ ᐱᓂᐊᕐᓂᕆᓯᒪᔭᖏᑦ, ᐱᓇᓱᐊᓚᐅᕐᑕᖏᑦ ᐅᖃᐅᓯᕆᓯᒪᔭᖏᓪᓗ, ᑎᑎᕋᕐᑕᐅᓯᒪᕗᑦ ᐃᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᓂᒃᑲᐅᓯᖏᓐᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society