ᑯᕉᓂᑲ ᐂᑉᐸᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥᐅᑦ ᐅᓇᑕᕆᐊᕐᓂᖓ ᔫᑕᒥᒃ

¹ ᑕᒪᑐᒪ ᑭᖑᕐᖓᒍᑦ ᕆᕼᐅᐳᐊᒻ ᐊᐅᓚᑦᓯᑦᓯᐊᓕᕐᑎᓪᓗᒍ ᐊᖓᔪᖅᑳᕐᔪᐊᖃᕐᕕᖕᒥᓂᓗ ᓲᖑᓂᖃᑦᓯᐊᓕᕋᒥ, ᐊᑕᓂᐅᑉ ᐱᖁᔭᖏᓐᓂᒃ ᕿᒤᕗᖅ, ᐃᓴᕆᐊᓕᒥᐅᓕᒫᓪᓗ ᒪᓕᒃᑎᒋᓪᓗᒋᑦ.

² ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐊᖓᔪᖅᑳᖑᓕᕐᑎᓪᓗᒍ ᐊᕐᕌᒍᓂᒃ ᑕᓪᓕᒪᓂᒃ, ᐊᑕᓂᕐᒧᑦ ᒪᓕᑦᓯᐊᖏᓐᓂᖓ ᐱᑦᔪᑎᒋᓪᓗᒍ, ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓ ᓰᓵᒃ ᐅᓇᑕᕆᐊᕐᐳᖅ ᔨᕉᓴᓕᒧᑦ.

³ 12,000ᓂᒃ ᐃᓚᖃᕐᓗᓂ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ, 60,000ᓂᒡᓗ ᕿᒻᒥᕐᔪᐊᕐᑎᓂᒃ, ᐃᓄᐃᓪᓗ ᓈᓴᒐᒃᓴᐅᖏᑦᑐᑦ ᐃᓚᒋᕔᑦ ᐄᑦᔨᑉᑎᒥᑦ ᓕᐱᐊᓐᒥᐅᑦ, ᓱᑮᒻᒥᐅᑦ, ᐃᑎᐅᐱᐊᒥᐅᓪᓗ.

⁴ ᐃᒡᓗᒐᓮᓪᓗ ᓴᐴᓗᑕᓖᑦ ᔫᑕᒦᑦᑐᑦ ᓵᓚᒋᕔᑦ ᔨᕉᓴᓕᒧᓪᓗ ᑎᑭᓕᕐᓗᓂᖅ.

⁵ ᑕᕝᕙ ᓯᒤᐊ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᕆᕼᐅᐳᐊᒧᐊᕐᐳᖅ ᔫᑕᐅᓪᓗ ᐊᖓᔪᖅᑳᖏᓐᓄᑦ, ᑲᑎᒪᑎᓪᓗᒋᑦ ᔨᕉᓴᓕᒥ ᓰᓵᒃ ᐱᑦᔪᑎᒋᓪᓗᒍ, ᐅᖃᐅᑎᕔᓪᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᕿᒪᓚᐅᕋᑦᓯᓐᖓ, ᑍᒤᒻᒪᑦ ᕿᒪᓚᐅᕐᐸᑦᓯ ᑐᓂᕙᑦᓯᓗ ᓰᓵᒃ ᐱᔪᓐᓇᕐᓂᖓᓄᑦ.’”

⁶ ᑍᒤᒻᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐊᖓᔪᖅᑳᕐᔪᐊᕐᓗ ᐃᒻᒥᖕᓂᒃ ᒥᑭᒡᓕᑎᕐᐳᑦ; ᐅᖃᕐᓗᑎᒡᓗ, “ᐊᑕᓂᖅ ᓇᓛᒎᕐᑐᑑᕗᖅ.”

⁷ ᐊᑕᓂᐅᑉ ᑕᒪᓐᓇ ᑕᑯᒐᒥᐅᒃ ᐃᒻᒥᖕᓂᒃ ᒥᑭᒡᓕᑎᕐᓂᖏᑦ, ᐊᑕᓂᐅᑉ ᓯᒤᐊ ᐅᖃᕐᕕᒋᕚ ᐅᖃᕐᓗᓂ, “ᐃᒻᒥᖕᓂᒃ ᒥᑭᒡᓕᑎᕐᒪᑕ; ᐊᓯᕈᕐᓂᐊᓐᖏᓚᒃᑲ, ᓴᐳᑦᔭᐅᕕᒃᓴᖃᕐᑎᓐᓂᐊᕐᐸᒃᑲ, ᓂᓐᖓᐅᓯᕋ ᔨᕉᓴᓕᒧᑦ ᑎᑭᓐᓂᐊᓐᖏᓚᖅ ᓰᓵᒃ ᐱᔪᓐᓇᕐᓂᖓᓂᒃ ᐊᑐᕐᓗᖓ,

⁸ ᑖᑦᓱᒪᓕ ᐱᔨᑖᕆᔪᒫᕐᐰᑦ, ᖃᐅᔨᖁᓪᓗᒋᑦ ᐱᔨᑦᓯᕐᓂᕐᒥᒃ ᐅᕙᓐᓄᑦ ᓄᓇᓖᓪᓗ ᐊᖓᔪᖅᑲᐅᕕᖏᓐᓄᑦ.”

⁹ ᑕᕝᕙ ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓ ᓰᓵᒃ ᔨᕉᓴᓕᒧᐊᕐᐳᖅ; ᐊᑕᓂᐅᓪᓗ ᐃᒡᓗᖓᓃᑦᑐᑦ ᐱᕕᐊᕐᓇᕐᑐᑦ ᑎᒍᕔᑦ ᐊᖓᔪᖅᑳᕐᔪᐊᓪᓗ ᐃᒡᓗᕐᔪᐊᖓᓃᑦᑐᑦ ᐱᕕᐊᕐᓇᕐᑐᖁᑎᓕᒫᖏᑦ, ᓴᐴᓗᑍᓪᓗ ᒎᓗᐃᑦ ᑎᒍᒋᕔᑦ ᓲᓗᒨᓂᐅᑉ ᓴᓇᓚᐅᕐᑕᖏᑦ;

¹⁰ ᐊᖓᔪᖅᑳᕐᔪᐊᕐᓗ ᕆᕼᐅᐳᐊᒻ ᓴᓇᕗᖅ ᑲᓐᓄᔭᓂᒃ ᓴᐴᓗᑕᕐᓂᒃ ᑖᒃᑯᐊ ᑭᖑᕝᕕᐅᑎᖏᓐᓂᒃ, ᑐᓂᓪᓗᒋᓪᓗ ᖃᐅᔨᓴᕐᑏᑦ ᐊᖓᔪᖅᑳᖏᓐᓄᑦ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕆᐊᕐᕕᖓᓂᒥᐅᑕᕐᓄᑦ.

¹¹ ᐊᖓᔪᖅᑳᕐᔪᐊᕐᓗ ᐃᑎᕌᖓᑦ ᐊᑕᓂᐅᑉ ᐃᒡᓗᖓᓄᑦ, ᖃᐅᔨᓴᕐᑏᑦ ᑖᒃᑯᓂᖓ ᑎᒍᓯᖃᑦᑕᕐᐳᑦ ᐊᑐᓕᕐᓗᒋᓪᓗ; ᑭᖑᓂᖓᒍᓪᓗ ᐅᑎᕐᑎᑉᐸᒡᓗᒋᑦ ᖃᐅᔨᓴᕐᑏᑦ ᐃᒡᓗᐊᕈᓯᖓᓐᓄᑦ.

¹² ᐃᒻᒥᓂᒃ ᒥᑭᒡᓕᑎᕐᒪᑦ ᐊᑕᓂᐅᑉ ᓂᓐᖓᐅᓯᖓᑕ ᕿᒪᒃᐹ, ᐊᓯᕈᕐᑕᐅᓪᓚᕆᒍᓐᓁᕐᓗᓂᓗ; ᔫᑕᓗ ᖃᓄᐃᓐᓇᖏᑦᓯᐊᕐᑐᒦᓕᕐᓗᓂ.

ᕆᕼᐅᐳᐊᒻ ᐊᐅᓚᑦᓯᓂᖏᑦ ᓁᓕᒋᐊᕐᓗᒋᑦ ᐃᒤᓕᖓᕗᑦ

¹³ ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐃᒻᒥᓂᒃ ᐊᐅᓚᑦᓯᑦᓯᐊᓕᓚᐅᐳᖅ ᔨᕉᓴᓕᒥ ᐊᖓᔪᖅᑲᐅᕕᖕᒥᓂ. ᕆᕼᐅᐳᐊᒻ 41ᓂᒃ ᐊᕐᕌᒍᖃᓕᕐᓗᓂ ᐊᖓᔪᖅᑳᕐᔪᐊᓐᖑᓚᐅᕐᐳᖅ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 17ᓂᒃ ᔨᕉᓴᓕᒥ, ᐃᒡᓗᒐᓴᖕᓂ ᑕᕝᕙᓂ ᐊᑕᓂᐅᑉ ᓂᕈᐊᓚᐅᕐᑕᖓᓂ ᐃᓴᕆᐊᓕᒥᐅᑦ ᓄᓇᓕᒫᖓᓐᓂ ᐊᑎᓂ ᑕᕝᕙᓂ ᑐᒃᓯᐊᕐᕕᐅᖃᑦᑕᖁᓪᓗᒍ. ᐊᓈᓇᖓ ᐊᑎᖃᕐᐳᖅ ᓈᒪᒥᒃ ᑖᓐᓇ ᐊᒧᓁᑎᒥᐅᑕᖅ.

¹⁴ ᐱᐅᖏᑦᑐᓕᓚᐅᕐᐳᕐᓗ, ᐊᑕᓂᐅᑉ ᐱᔪᒪᔭᖓᓂᒃ ᐆᒻᒪᑎᒥᒍᑦ ᕿᓂᓚᐅᖏᒻᒪᑦ.

¹⁵ ᕆᕼᐅᐳᐊᒻ ᐱᓂᐊᕐᓂᖏᑦ ᓯᕗᓪᓕᕐᐹᒥᑦ ᑭᖑᓪᓕᕐᐹᒧᑦ, ᑎᑎᕋᕐᓯᒪᕗᑦ ᓯᒤᐊᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑎᑎᕋᕐᓯᒪᔭᖏᓐᓂ, ᐃᑑᓪᓗ ᐅᓂᒃᑳᖏᓐᓂ. ᐅᓇᑕᕐᓂᕾᓐᓇᓚᐅᕐᐳᒡᓗ ᕆᕼᐅᐳᐊᒻ ᔨᕈᐳᐊᒻᓗ ᐃᓅᓂᓕᒫᒥᖕᓂ.

¹⁶ ᕆᕼᐅᐳᐊᒻ ᑐᖁᖕᒪᑦ ᐃᓕᔭᐅᕗᖅ ᓯᕗᓕᖏᑕ ᐃᓂᖏᓐᓄᑦ, ᐃᓗᕕᕐᑕᐅᓪᓗᓂᓗ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᐊᐰᔭ ᐊᖓᔪᖅᑳᕐᔪᐊᖑᓕᕐᐳᖅ ᑖᑦᓱᒥᖓ ᐃᓇᖐᓪᓗᓂ.