ᑯᕉᓂᑲ ᐂᑉᐸᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᒤᐊᐅᑉ ᐅᖃᕐᑎᑕᐅᓂᖓ

¹ ᕆᕼᐅᐳᐊᒻ ᔨᕉᓴᓕᒧᐊᕋᒥ, ᔫᑕᐅᑉ ᐱᓐᔭᒥᓂᐅᓪᓗ ᑭᖑᕚᖏᑦ ᑲᑎᑎᑉᐰᑦ 180,000 ᐊᖑᑏᑦ ᐅᓇᑕᕐᑏᑦ ᓂᕈᐊᕐᑕᐅᓯᒪᔪᑦ, ᐅᓇᑕᕆᐊᖁᓪᓗᒋᑦ ᐃᓴᕆᐊᓕᒥᐅᓂᒃ, ᕆᕼᐅᐳᐊᒻ ᐊᖓᔪᖅᑲᐅᕕᖓ ᐅᑎᕐᑎᑕᐅᖁᓪᓗᒍ.

² ᐊᑕᓂᐅᓪᓕ ᐅᖃᐅᓯᖓᑕ ᒎᑎᐅᑉ ᐃᓄᖁᑎᖓ ᓯᒤᐊ ᑎᑭᑉᐹ ᐅᖃᕐᓗᓂ,

³ “ᕆᕼᐅᐳᐊᒻ ᓲᓗᒨᓂᐅᑉ ᐃᕐᓂᖓ ᔫᑕᐅᑉ ᐊᖓᔪᖅᑳᕐᔪᐊᖓ ᐅᖃᐅᑎᒍᒃ, ᐃᓴᕆᐊᓕᒥᐅᓕᒫᓪᓗ ᔫᑕᒃᑯᑦ ᐱᓐᔭᒥᓂᒃᑯᓪᓗ,

⁴ ‘ᐊᑕᓂᖅ ᐃᒫᒃ ᐅᖃᕐᐳᖅ: ᐅᓇᑕᕆᐊᕐᑐᒃᓴᐅᓐᖏᓚᓯ ᖃᑕᓐᖑᑎᑦᓯᓐᓄᑦ. ᐊᑕᖏᕐᓗᓯ ᐅᑎᓕᕆᑦᓯ ᐊᖏᕐᕋᑦᓯᓐᓄᑦ, ᑕᒪᓐᓇ ᐱᓂᐊᕐᓂᖅ ᐅᕙᓐᓂᑦ ᐱᖕᒪᑦ.’” ᑕᕝᕙ ᐊᑕᓂᐅᑉ ᐅᖃᐅᓯᖏᓐᓂᒃ ᓈᓚᒃᐳᑦ, ᐅᑎᕐᓗᑎᒡᓗ ᐅᓇᑕᕆᐊᕋᑎᒃ ᔨᕈᐳᐊᒻᒥᒃ.

ᕆᕼᐅᐳᐊᒻ ᓴᐴᓗᑕᓕᐅᕐᓂᖓ ᐃᒡᓗᒐᓴᖕᓂᒃ

⁵ ᕆᕼᐅᐳᐊᒻ ᔨᕉᓴᓕᒥ ᓄᓇᖃᓚᐅᕐᐳᖅ, ᐃᒡᓗᒐᓮᓪᓗ ᓴᐴᓗᑕᓕᐅᕐᐰᑦ ᔫᑕᒦᑦᑐᑦ.

⁶ ᐃᒡᓗᒐᓮᑦ ᓴᓇᒋᕔᑦ ᐱᑦᓕᐊᒻ, ᐃᑖᒻ, ᑎᑯᐊ,

⁷ ᐱᑦ-ᔪᕆ, ᓲᑯ, ᐊᑑᓚᒻ,

⁸ ᒑᑎ, ᒪᕇᓴ, ᔨᑉ,

⁹ ᐊᑐᕅᒻ, ᓚᑮᓯ, ᐊᔨᑲ,

¹⁰ ᔫᕋ, ᐂᔭᓚᓐ, ᕼᐃᐸᕋᓐᓗ, ᑖᒃᑯᐊ ᔫᑕᒦᑦᑐᑦ ᐱᓐᔭᒥᓂᒥᓗ ᐃᒡᓗᒐᓮᑦ ᓴᐴᓗᑕᖃᓕᕐᐳᑦ.

¹¹ ᓴᐴᓗᑕᕐᑖᕐᑎᓚᐅᕐᐰᑦ ᓲᖑᓯᑎᓪᓗᒋᑦ, ᐊᖓᔪᖅᑳᕐᑖᕐᑎᑉᐰᓪᓗ ᐊᑐᓂᑦ, ᓂᐅᕕᕐᕕᖃᕐᓗᑎᒡᓗ ᓂᕿᒃᓴᓕᖕᓂᒃ, ᐅᕐᓱᓂᒃ, ᕔᓂᓂᒡᓗ.

¹² ᐃᒡᓗᒐᓮᓪᓗ ᐊᑐᓂᑦ ᓴᐴᓗᑕᕐᓂᒃ ᖃᓗᒋᐊᓂᒡᓗ ᐊᑐᐃᓐᓇᖃᕐᑎᑉᐰᑦ, ᓲᖑᓯᑎᒻᒪᕆᒡᓗᒋᑦ. ᑕᕝᕙ ᑍᒫᒃ ᔫᑕᒃᑯᑦ ᐱᓐᔭᒥᓂᒃᑯᓪᓗ ᐊᐅᓔᓐᓇᕈᓐᓇᓚᐅᕐᐰᑦ.

ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᔫᑕᒧᐊᕐᓂᖏᑦ

¹³ ᓄᓇᓕᓕᒫᓂ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᐃᓴᕆᐊᓕᒦᑦᑐᑦ ᐃᓚᓕᐅᑎᕗᑦ ᑖᑦᓱᒧᖓ.

¹⁴ ᓕᕔᑏᑦ ᓄᓇᖁᑎᒥᖕᓂᒃ ᐱᖁᑎᒥᖕᓂᒡᓗ ᕿᒤᓪᓗᑎᒃ ᔫᑕᒧᐊᕐᐳᑦ ᔨᕉᓴᓕᒧᓪᓗ, ᔨᕈᐳᐊᒻ ᐃᕐᓂᖏᑕᓗ ᐊᓂᑎᓚᐅᕐᒪᒋᑦ ᐱᔨᑦᓯᕐᕕᖏᓐᓂᑦ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᐊᑕᓂᕐᒧᑦ,

¹⁵ ᔨᕈᐳᐊᒻᓗ ᑎᓕᓯᕗᖅ ᓇᖕᒥᓂᖅ ᑐᓂᕐᕈᓯᕐᑎᑦᓯᔨᒋᓂᐊᕐᑕᒥᓂᒃ ᐱᒻᒪᕆᒋᔭᐅᔪᓂ ᒎᑎᓐᖑᐊᓄᑦ, ᓄᓕᐊᕐᓂᐅᓪᓗ ᐊᓂᕐᓂᕐᓗᖏᓐᓄᑦ ᓴᑍᕋᓄᑦ, ᓄᕐᕋᓐᖑᐊᓄᓪᓗ ᓴᓇᓚᐅᕐᑕᒥᓄᑦ.

¹⁶ ᐃᓴᕆᐊᓕᒥᐅᓪᓕ ᑭᖑᕚᖏᓐᓂᑦ ᐱᔪᑦ ᐱᔪᒪᓪᓚᕆᒃᓗᑎᒃ ᕿᓂᕐᑐᑦ ᐊᑕᓂᕐᒥᒃ, ᐃᓴᕆᐊᓕᒥᐅᑦ ᒎᑎᖓᓂᒃ, ᓕᕔᑎᓂᒃ ᒪᓕᒃᐳᑦ ᔨᕉᓴᓕᒧᑦ ᑐᓂᕐᕈᓯᕆᐊᕐᓗᑎᒃ ᐊᑕᓂᕐᒧᑦ ᓯᕗᓕᖏᑕ ᒎᑎᖓᓄᑦ.

¹⁷ ᓲᖑᓯᑎᑦᓯᕗᓪᓗ ᐃᑲᔪᕐᑐᕐᓗᒍ ᔫᑕᐅᑉ ᐊᖓᔪᖅᑳᕐᔪᐊᖃᕐᕕᖓᓂᒃ, ᐊᕐᕌᒍᓂᒃ ᐱᖓᓱᓂᒃ ᓇᔫᑎᓪᓗᑎᒃ ᕆᕼᐅᐳᐊᒻ ᓲᓗᒨᓂᐅᑉ ᐃᕐᓂᖓ ᓲᖑᓯᑎᑉᐹᑦ, ᐱᓇᓱᐊᓚᐅᕐᒪᑕ ᑍᕕᑎᑐᑦ ᓲᓗᒨᓂᑐᓪᓗ ᐊᕐᕌᒍᓂᒃ ᐱᖓᓱᓂᒃ.

ᕆᕼᐅᐳᐊᒻ ᐃᓚᖏᑦ–ᓇᖕᒥᓂᖏᑦ

¹⁸ ᕆᕼᐅᐳᐊᒻ ᓄᓕᐊᓂᒃᐳᖅ ᒪᕼᐊᓚᑕᒥᒃ ᔨᕆᒪᑎᐅᑉ ᑍᕕᑎᐅᑉ ᐃᕐᓂᖓᑕ ᐸᓂᖓᓂᒃ, ᐊᓈᓇᖃᕐᓗᓂ ᐊᐱᕼᐂᓕᒥᒃ ᐃᓔᐊᑉ ᔨᓯᐅᑉ ᐃᕐᓂᖓᑕ ᐸᓂᖓᓂᒃ;

¹⁹ ᑖᒃᑯᐊᒡᓗ ᐃᕐᓂᕐᑖᕐᐴᒃ, ᔨᐅᔅᒥᒃ, ᓯᒪᕅᐊᒥᒃ, ᔭᕼᐊᒻᒥᒡᓗ.

²⁰ ᑖᑦᓱᒪᓗ ᑭᖑᓂᐊᒍᑦ ᓄᓕᐊᓂᒃᐳᖅ ᒫᑲᒥᒃ ᐋᑉᓴᓚᐅᑉ ᐸᓂᖓᓂᒃ; ᕿᑐᕐᖓᕐᑖᕐᐳᒡᓗ ᐊᐰᔭᒥᒃ, ᐊᑦᑍᒥᒃ, ᔨᔭᒥᒃ, ᓯᓗᒥᑎᒥᒡᓗ.

²¹ ᕆᕼᐅᐳᐊᒻ ᓇᒡᓕᒋᓚᐅᕐᐹ ᒫᑲ ᐋᑉᓴᓚᐅᑉ ᐸᓂᖓ ᓇᒡᓕᒋᓂᕐᓴᕆᓗᒍ ᓄᓕᐊᓕᒫᒥᓂᑦ ᓄᓕᐊᒃᑲᓐᓂᕐᒥᓂᓪᓗ ᓄᓕᐊᖃᓚᐅᕐᒪᑦ 18ᓂᒃ ᓄᓕᐊᖃᕆᐊᓪᓚᒃᓗᓂᓗ 60ᓂᒃ, ᐃᕐᓂᖃᕐᐳᖅ 28ᓂᒃ ᐸᓂᖃᕐᓗᓂᓗ 60ᓂᒃ.

²² ᕆᕼᐅᐳᐊᒻᓗ ᐊᐰᔭ ᒫᑲᐅᑉ ᐃᕐᓂᖓ ᐊᖓᔪᖅᑳᖑᖁᕚ ᖃᑕᓐᖑᑎᒥᓄᑦ, ᐊᖓᔪᖅᑳᔪᐊᓐᖑᕐᑐᓴᐅᑎᓪᓗᒍ ᐃᓱᒪᒋᓚᐅᕋᒥᐅᒃ.

²³ ᕆᕼᐅᐳᐊᒻ ᓯᓚᑐᓪᓗᓂ ᐱᓇᓱᐊᓚᐅᕐᐳᖅ, ᐃᕐᓂᓂᓗ ᑲᒪᒋᔭᖃᕐᑎᑉᐰᑦ ᔫᑕᐅᑉ ᐱᓐᔭᒥᓂᐅᓪᓗ ᓄᓇᓕᒫᖓᓂ ᐃᒡᓗᒐᓴᖕᓂᒃ ᓴᐴᓗᑕᓕᖕᓂᒃ; ᓂᕿᒃᓴᖏᓐᓂᒡᓗ ᐊᒥᒐᖏᑦᑐᓂᒃ ᑐᓂᓯᕕᒋᖃᑦᑕᕐᐰᑦ, ᓄᓕᐊᒃᓴᖏᓐᓂᒡᓗ ᑐᓂᓯᕕᒋᓪᓗᒋᑦ ᐅᓄᕐᑐᓂᒃ.