ᑯᕉᓂᑲ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᑐᒃᓯᐊᕐᓂᖓ ᓯᓚᑐᓂᖃᕈᒪᓪᓗᓂ

¹ ᓲᓗᒨᓂ ᑍᕕᑎᐅᑉ ᐃᕐᓂᖓ ᐊᐅᓚᑦᓯᓕᓚᐅᕐᐳᖅ ᐊᑕᓂᐅᕕᖕᒥᓂ, ᐊᑕᓂᐅᓪᓗ ᓲᓗᒨᓂᐅᑉ ᒎᑎᖓᑕ ᓇᔪᓚᐅᕐᐹ ᐊᔪᖏᑦᑐᕐᔪᐊᓐᖑᕐᑎᓪᓗᒍᓗ.

² ᓲᓗᒨᓂ ᐃᓴᕆᐊᓕᒥᐅᓕᒫᓄᑦ ᐅᖃᓪᓚᓚᐅᕐᐳᖅ ᐊᖓᔪᖅᑳᐅᑎᓄᑦ 1,000ᓄᑦ 100ᓄᓪᓗ, ᐃᓱᐊᕐᓮᔨᓄᑦ, ᓯᕗᓕᕐᑎᓕᒫᓄᓪᓗ ᐃᓴᕆᐊᓕᒦᑦᑐᓄᑦ, ᐊᖓᔪᖅᑳᖑᔪᓄᓪᓗ ᐃᓚᒌᓄᑦ.

³ ᓲᓗᒨᓂᓗ, ᑲᑎᒪᔪᓕᒫᓪᓗ ᐃᓚᒋᓪᓗᒋᑦ ᒋᐱᐅᓂᒧᑦ ᐂᕗᑦ ᐱᓪᓗᐊᑕᕆᔭᐅᔪᒧᑦ; ᑐᐱᕐᒧᑦ ᒎᑎᒧᑦ ᑐᒃᓯᐊᕐᕕᐅᕙᒃᑐᒧᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᓴᓇᓚᐅᕐᑕᖓᓄᑦ ᐃᓄᖃᔪᐃᑦᑐᒥ.

⁴ (ᑍᕕᑎᐅᑉ ᑕᒪᐅᓐᖓᓚᐅᕐᒪᒍ ᒎᑎᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᑭᕆᐊᑦ-ᔨᕆᒻᒥᑦ ᐃᓂᒃᓴᓕᐅᕐᓗᒍ ᑐᐱᓕᐅᓚᐅᕐᒪᑦ ᑖᑦᓱᒪ ᐃᓂᒃᓴᖓᓂᒃ ᔨᕉᓴᓕᒥ.)

⁵ ᑐᓂᕐᕈᓯᕐᕕᒃ ᑲᓐᓄᔭ ᐱᔭᓕᐅᑉ ᐅᕆᐅᑉ ᐃᕐᓂᖓᑕ, ᕼᐊᕆᐅᑉ ᐃᕐᖑᑕᖓᑕ ᓴᓇᓚᐅᕐᑕᖓ, ᑕᕝᕙᓃᑉᐳᖅ ᐊᑕᓂᐅᑉ ᑐᐱᖓᓂ. ᓲᓗᒨᓂᓗ ᑲᑎᒪᔪᓕᒫᓪᓗ ᑕᕝᕙᓂ ᑐᒃᓯᐊᕐᓗᑎᒃ ᐊᑕᓂᖅ ᐊᐱᕐᓱᕐᐹᑦ.

⁶ ᓲᓗᒨᓂᓗ ᒪᔪᕋᕐᐳᖅ ᑐᓂᕐᕈᓯᕐᕕᖕᒧᑦ ᑲᓐᓄᔭᒧᑦ ᐊᑕᓂᐅᑉ ᓵᖓᓄᑦ, ᑐᐱᕐᒥ ᑐᒃᓯᐊᕐᕕᐅᖃᑦᑕᕐᑐᒥ, ᑕᕝᕙᓂᓗ ᑐᓂᕐᕈᓯᕐᐳᖅ 1,000ᓂᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᒃᓴᓂᒃ.

⁷ ᑕᒪᑐᒪᓂᓗ ᐅᓐᓄᐊᒥ ᒎᑎ ᓴᖅᑭᑉᐳᖅ ᓲᓗᒨᓂᒧᑦ, ᐅᖃᐅᑎᓪᓗᒍᓗ, “ᑐᒃᓯᐊᓚᐅᕆᑦ ᓱᓇᒥᒃ ᐅᕙᓐᓄᑦ ᑐᓂᓯᕕᐅᔪᒪᖕᒪᖔᕐᐱᑦ.”

⁸ ᓲᓗᒨᓂᐅᓪᓗ ᒎᑎ ᐅᖃᐅᑎᕚ, “ᓈᒃᑭᒍᓱᕕᒡᔪᐊᕐᓯᒪᒐᕕᑦ ᓇᒡᓕᒍᓱᒃᓗᑎᓪᓗ ᐊᑖᑕᓐᓂᒃ ᑍᕕᑎᒥᒃ, ᐊᖓᔪᖅᑳᕐᔪᐊᓐᖑᕐᑎᓯᒪᕙᕐᒪᓗ ᑖᑦᓱᒥᖓ ᐃᓇᖐᑎᓪᓗᖓ.

⁹ ᐊᑕᓃᕐᓕ ᒎᑏ, ᐊᖏᕈᑎᒋᓚᐅᕐᑍᑦ ᑍᕕᑎᒧᑦ ᐊᑖᑕᓐᓄᑦ ᑲᔪᓯᑎᓕᕈᒃ, ᐊᖓᔪᖅᑳᕐᔪᐊᓐᖑᕐᑎᓚᐅᕋᕕᓐᖓ ᐃᓄᖕᓄᑦ ᐃᓄᒋᐊᒃᑐᕐᔪᐊᓄᑦ ᐳᔪᕋᕐᑎᑐᑦ ᐅᓄᕐᑎᒋᔪᓄᑦ ᓄᓇᕐᔪᐊᒥ.

¹⁰ ᒫᓐᓇᓕ ᓯᓚᑐᓂᕐᒥᒃ ᖃᐅᔨᒪᓂᕐᒥᒡᓗ ᑐᓂᓯᕕᒋᓚᐅᓐᖓ ᐃᓄᐃᑦ ᓵᖓᓄᐊᖃᑦᑕᖁᓪᓗᖓ, ᑭᐊᓕ ᐊᐅᓚᑦᓯᐊᕈᓐᓇᕐᐰᑦ ᐃᓄᖁᑎᑎᑦ, ᐃᓄᒋᐊᒃᑐᕐᔪᐊᖑᖕᒪᑕ?”

¹¹ ᒎᑎᐅᑉ ᓲᓗᒨᓂ ᑭᐅᕚ, “ᑕᒪᓐᓇ ᐆᒻᒪᒻᒥᐅᑕᕆᒐᕕᐅᒃ, ᑐᒃᓯᐊᕈᑎᖃᕐᓇᒡᓗ ᐱᖁᑎᖃᕐᓂᕐᒥᒃ, ᐊᒃᓗᐃᓐᓂᕐᒥᒃ, ᐅᐱᒋᔭᐅᓂᕐᒥᒃ, ᐊᑭᕋᑎᓪᓘᓐᓃᑦ ᓄᖑᑕᐅᖁᓗᒋᑦ, ᐅᕝᕙᓘᓐᓃᑦ ᐃᓅᑯᑖᒍᒪᓂᕐᒥᒃ, ᓯᓚᑐᓂᕐᒥᒡᓕ ᖃᐅᔨᒪᓂᕐᒥᒡᓗ ᑐᒃᓯᐊᕈᑎᖃᕋᕕᑦ ᐊᐅᓚᑦᓯᑦᓯᐊᕈᒪᓪᓗᑎᑦ ᐃᓄᖁᑎᓐᓂᒃ ᐊᖓᔪᖅᑳᕐᔪᐊᓐᖑᕐᑎᑕᐅᕕᒋᔭᕐᓂᒃ,

¹² ᓯᓚᑐᓂᖅ ᖃᐅᔨᒪᓂᕐᓗ ᐃᓕᖕᓄᑦ ᑐᓂᔭᐅᕗᑦ. ᐊᒃᓗᐃᓐᓂᕐᒥᒃ ᐱᖁᑎᖃᕐᓂᕐᒥᒡᓗ ᐅᐱᒋᔭᐅᓂᕐᒥᒡᓗ ᑐᓂᓯᕕᒋᒋᕙᒋᑦ, ᐊᖓᔪᖅᑳᕐᔪᐊᓄᑦ ᓯᕗᓪᓕᕐᓄᑦ ᑐᓂᔭᐅᓚᐅᕐᓯᒪᖏᑦᑐᒥᒃ, ᑭᖑᓂᕐᓂᓗ ᑍᒤᓪᓗᐊᕐᑐᒥᒃ ᑐᓂᔭᐅᔪᖃᓚᐅᕐᓯᒪᓂᐊᓐᖏᓚᖅ.”

ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐱᔪᓐᓇᕐᓂᖓ ᐊᔪᕐᓴᖏᓐᓂᖓᓗ

¹³ ᑕᕝᕙ ᓲᓗᒨᓂ ᒋᐱᐅᓂᒥᑦ ᐱᓪᓚᕆᐅᑎᑕᐅᔪᒥᓐᖔᕐᓗᓂ, ᑐᐱᕐᒥᑦ ᑲᑎᒪᕕᖕᒥᑦ, ᔨᕉᓴᓕᒧᐊᕐᐳᖅ. ᐃᓴᕆᐊᓕᒥᐅᓂᒡᓗ ᐊᐅᓚᑦᓯᓕᕐᓗᓂ.

¹⁴ ᓲᓗᒨᓂᐅᑉ ᑲᑎᕐᓱᕐᐰᑦ ᑲᓕᒊᑦ ᐊᒃᓴᓗᐊᓖᑦ ᕿᒻᒥᕐᔪᐊᒃᑰᕐᑏᓪᓗ; 1,400ᓂᒃ ᑲᓕᒐᖁᑎᖃᓕᕐᐳᖅ ᐊᒃᓴᓗᐊᓕᖕᓂᒃ 12,000ᓂᒡᓗ ᕿᒻᒥᕐᔪᐊᒃᑰᕐᑎᖃᕐᓗᓂᒃ, ᑲᓕᒊᓪᓗ ᐊᒃᓴᓗᐊᓖᑦ ᐃᓂᑖᕐᑎᑉᐰᑦ ᐃᒡᓗᒐᓴᖕᓂ ᐃᓚᖏᓪᓗ ᔨᕉᓴᓕᒥ ᐊᖓᔪᖅᑳᕐᔪᐊᒃᑯᕕᖕᒦᑎᓪᓗᒋᑦ.

¹⁵ ᐊᖓᔪᖅᑳᕐᔪᐊᕐᓗ ᓴᓇᔭᐅᑎᑦᓯᕗᖅ ᓯᐅᓪᕕᕆᓂᒃ ᒎᓗᓂᒡᓗ ᑕᑯᒃᓴᐅᖏᓐᓇᓕᕐᓗᑎᒃ ᔨᕉᓴᓕᐅᑉ ᐅᔭᕋᖏᑎᑐᑦ, ᕿᔪᐃᓪᓗ ᓰᑕᕇᑦ ᐅᓄᕐᑐᕐᔪᐊᑦ ᐊᑐᐃᓐᓇᐅᑎᑉᐰᑦ ᓇᐹᕐᑐᑎᑐᑦ ᓯᑲᒧᐊᑎᑐᑦ ᓇᑎᕐᓇᒦᑦᑐᑎᑐᑦ.

¹⁶ ᓲᓗᒨᓂᓗ ᑎᑭᑎᑦᓯᖃᑦᑕᓚᐅᕐᐳᖅ ᕿᒻᒥᕐᔪᐊᓂᒃ ᐄᑦᔨᑉᑎᒥᑦ ᑭᕕᒥᓪᓗ, ᐊᖓᔪᖅᑳᕐᔪᐊᓪᓗ ᓂᐅᕕᕐᑎᖏᑦ ᑕᒪᒃᑯᓄᖓ ᐊᑭᓖᖃᑦᑕᓚᐅᕐᐳᑦ ᓂᐅᕕᕈᑎᒋᔭᒥᖕᓂᒃ ᑭᕕᒥᒃᑯᓐᓂᒃ.

¹⁷ ᑎᑭᑎᑦᓯᖃᑦᑕᓚᐅᕆᕗᑦ ᐄᑦᔨᑉᑎᒥᑦ ᑲᓕᒐᕐᓂᒃ ᐊᒃᓴᓗᐊᓕᖕᓂᒃ ᑲᓕᒐᖅ ᐊᒃᓴᓗᐊᓕᒃ ᐊᑕᐅᓯᖅ ᐊᑭᖃᕐᑎᓪᓗᒍ 600ᓂᒃ ᓯᐅᓪᕕᕆᓂᒃ, ᕿᒻᒥᕐᔪᐊᕐᓗ ᐊᑕᐅᓯᖅ ᐊᑭᑲᕐᑎᓪᓗᒍ 150ᓂᒃ; ᑕᒪᒃᑯᐊᑦᑕᐅᖅ ᓂᐅᕕᕐᑕᐅᑎᖃᑦᑕᓚᐅᕆᕔᑦ ᕼᐃᑍᑎᑦ ᐊᖓᔪᖅᑳᕐᔪᐊᖓᓄᑦ ᓯᕆᐊᓪᓗ ᐊᖓᔪᖅᑳᕐᔪᐊᖓᓄᑦ.