ᑎᒧᑎᒧᑦ ᓯᕗᓪᓖᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐱᔨᑲᑖᕆᔭᐅᔪᑦ ᐊᖓᔪᖅᑳᒥᖕᓂᒃ ᑕᒤᑎᒍᑦ ᐅᐱᒋᔭᖃᑦᓯᐊᕐᑐᒃᓴᐅᕗᑦ, ᒎᑎ ᐊᔪᕆᕐᑐᐃᑦᔪᑎᒋᔭᕗᓪᓗ ᐅᖃᐅᑕᐅᓂᕐᓗᖁᓇᒋᑦ.

² ᐱᔨᑲᑖᕆᔭᐅᔪᖅ ᐅᒃᐱᕐᑐᓂᒃ ᐊᖓᔪᖅᑳᓖᑦ ᐊᖓᔪᖅᑳᒥᖕᓂᒃ ᓇᕐᕈᔪᒃᓴᐅᓐᖏᓚᑦ ᐅᒃᐱᕐᑑᖃᑎᒋᖕᒪᒋᑦ; ᐱᔨᑦᓯᑦᓯᐊᖔᕐᓗᒋᓪᓕ ᐱᓇᓱᐊᕐᑐᒃᓴᐅᕗᑦ ᐱᓇᓱᐊᕐᓂᖏᑎᒍᑦ ᐃᑲᔪᕐᑕᐅᔪᑦ ᐅᒃᐱᕐᒪᑕ ᓇᒡᓕᒋᔭᐅᓪᓗᑎᒡᓗ. ᑕᒪᒃᑯᐊ ᐊᔪᕆᕐᑐᐃᑦᔪᑎᒋᔭᒃᓴᕆᕙᑎᑦ ᐃᓕᓮᑦᔪᑎᒋᓗᒋᓪᓗ.

ᐊᔪᕆᕐᑐᐃᓃᑦ ᓱᓕᖏᑦᑐᑦ ᐊᔪᕐᓴᓐᖏᔪᑎᒃᓮᓪᓗ ᓱᓕᔪᑦ

³ ᐊᔪᕆᕐᑐᐃᔪᖃᕐᐸᑦ ᑕᒪᑐᒪ ᐊᔪᕆᕐᑐᐃᑦᔪᓯᐅᑉ ᐊᑦᔨᒋᓐᖏᑕᖓᓂᒃ ᐊᖏᖃᑎᖃᖏᑉᐸᑕᓗ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐅᖃᐅᓯᖏᓐᓄᑦ ᐊᔪᕆᕐᑑᓯᕐᓄᓪᓗ ᐅᒃᐱᕐᓂᑦᑎᓐᓄᑦ ᐊᖏᖃᑕᐅᓯᒪᖏᑦᑐᓂᒃ,

⁴ ᑖᓐᓇ ᐱᐅᔪᕆᓂᖃᓗᐊᕐᓂᕐᒦᑉᐳᖅ ᖃᐅᔨᒪᓇᓂᓗ; ᐂᕙᑦᔪᑎᒃᓴᕐᓯᐅᑐᐃᓐᓇᕐᐳᖅ ᐅᖃᐅᓯᑐᐃᓐᓁᑦ ᐱᓪᓗᒋᑦ, ᑕᒪᓐᓇ ᓴᖅᑭᑎᑦᓯᕗᖅ ᐱᓂᕐᓴᐅᔪᒪᓂᕐᒥᒃ, ᐊᑭᕋᕐᑐᕈᒪᓂᕐᒥᒃ, ᐃᓅᖃᑎᒥᒃ ᓇᕐᕈᓇᕐᓯᑎᑎᓇᓱᖕᓂᕐᒥᒃ, ᐱᐅᓐᖏᓕᕐᑎᑎᓇᓱᖕᓂᕐᒥᒡᓗ,

⁵ ᐂᕙᓕᕐᑎᑦᓯᕙᒃᐳᑦ ᐃᓄᖕᓂᒃ ᐃᓱᒪᖃᑦᓯᐊᕋᓱᐊᖏᑦᑐᓂᒃ ᓱᓕᓂᕐᒦᖏᑦᑐᓂᒡᓗ, ᐅᒃᐱᕐᓂᖅ ᐊᔪᕐᓴᓐᖏᑦᔪᑎᒃᓴᐅᓇᓱᒋᒃᓯᕐᑐᓂᒃ.

⁶ ᐅᒃᐱᕐᓂᕐᓕ ᐊᖏᔪᒥᒃ ᐊᔪᕐᓴᓐᖏᓕᓇᕐᐳᖅ ᐱᓯᒪᔭᒥᓂᒃ ᓈᒻᒪᒃᓴᕐᑐᓄᑦ.

⁷ ᓇᒃᓴᓚᐅᖏᓐᓇᑦᑕ ᓱᓇᒥᒃ ᓯᓚᕐᔪᐊᕐᒧᑦ, ᑍᒫᒃᑕᐅᖅ ᓱᓇᒥᒃ ᓇᒃᓴᕐᓂᐊᖏᓐᓂᕗᒍᑦ ᓯᓚᕐᔪᐊᕐᒥᑦ;

⁸ ᓂᕿᖃᕈᑦᑕ ᐊᓐᓄᕌᖃᕐᓗᑕᓗ, ᑖᒃᑯᐊ ᓈᒻᒪᒋᔭᒃᓴᕆᕙᕗᑦ.

⁹ ᐊᒃᓗᐃᑦᑐᒪᔪᓪᓕ ᐱᐅᓐᖏᑦᑐᒧᑦ ᐱᔪᒥᓵᕐᑕᐅᓂᕐᓄᑦ ᑎᑭᐅᑎᓂᐊᕐᐳᑦ, ᓂᒐᕐᑎᑕᐅᓗᑎᒃ, ᓯᓔᓐᓂᕐᓄᑦ ᖃᓄᐃᑦᑐᑐᐃᓐᓇᕐᓄᑦ ᐃᒃᖠᒎᕐᓂᕐᓄᓪᓗ ᐊᔪᓕᕐᓇᕐᑐᓄᑦ ᑕᒪᓐᓇ ᑕᕝᕙ ᐃᓄᖕᓂᒃ ᑲᑕᒃᑎᑦᓯᕙᒃᑐᖅ ᐊᓯᕈᕐᑕᐅᑎᑦᓯᕙᒡᓗᓂᓗ.

¹⁰ ᑮᓇᐅᔭᖃᕈᒪᓗᐊᕐᓂᖅ ᐱᐅᖏᑦᑐᓄᑦ ᖃᓄᐃᑦᑐᑐᐃᓇᕐᓄᑦ ᐱᒋᐊᕐᕕᐅᖕᒪᑦ; ᑕᒪᓐᓇ ᐱᔪᒪᓗᐊᕐᓂᖅ ᐃᓚᖏᑕ ᐊᑐᓚᐅᕋᒥᑦᔪᒃ ᐅᒃᐱᕐᓂᕐᒥᒃ ᕿᒤᓯᒪᕗᑦ ᕿᒃᓵᖕᓇᕐᑐᓄᓪᓗ ᐅᓄᕐᑐᓄᑦ ᐃᒻᒥᖕᓂᒃ ᑎᑭᑎᓯᒪᓕᕐᓗᑎᒃ.

ᐅᖃᐅᑦᔪᐃᓂᖅ

¹¹ ᐃᕝᕕᓪᓕ ᒎᑎᐅᑉ ᐃᓄᖁᑎᖓ, ᑕᒪᒃᑯᐊ ᐱᓇᓱᐊᕐᓂᐊᕐᓇᒋᑦ; ᐱᓇᓱᐊᓕᕆᓪᓕ ᐃᓗᐊᕐᑐᓕᓂᕐᒥᒃ, ᒎᑎᒧᑦ ᐅᒃᐱᕐᓂᕐᒥᒃ, ᐅᒃᐱᕐᓂᕐᒥᒃ, ᓇᒡᓕᖕᓂᕐᒥᒃ, ᕿᓄᐃᓵᕐᓂᕐᒥᒃ, ᐃᓕᕋᑦᑖᖏᓐᓂᕐᒥᒃ.

¹² ᐅᒃᐱᕐᓂᒃᑯᑦ ᐅᓇᑕᕐᑎᐅᑦᓯᐊᕆᑦ; ᐃᓅᓯᖅ ᓄᖑᓱᐃᑦᑐᖅ ᐱᓯᒪᓗᒍ ᑕᒪᑐᒧᖓ ᕾᖁᔭᐅᓯᒪᓃᑦ ᓇᓗᓁᓚᐅᕋᕕᐅᒃ ᐃᓄᐃᑦ ᐊᒥᓱᑦ ᓵᖏᓐᓂ.

¹³ ᒎᑎᐅᑉ ᓵᖓᓂ ᐃᓅᓯᖃᕐᑎᑦᓯᔫᑉ ᑕᒤᓐᓂᒃ, ᙭ᔅᑑᓯ ᔩᓱᓯᐅᓪᓗ ᓵᖓᓂ ᑖᑦᓱᒪ ᓇᓗᓁᕐᓯᓚᐅᕐᑑᑉ ᐴᓐᑎᐅᓯ ᐰᓛᑑᓯᐅᑉ ᓵᖓᓂ, ᒪᓕᖁᓪᓗᑎᑦ ᐅᖃᐅᑎᕙᒋᑦ,

¹⁴ ᒪᓕᒃᑕᐅᖁᔭᐅᔪᑦ ᐃᓕᖕᓄᑦ ᒪᓕᑦᓯᐊᒃᑭᑦ ᐸᓯᔭᒃᓴᐅᑦᑍᓕᓗᑎᑦ ᓱᕐᕋᔪᐃᓪᓗᑎᑦ ᐅᓪᓗᖅ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᓴᖅᑭᕝᕕᒋᔪᒫᕐᑕᖓ ᑎᑭᓪᓗᒍ.

¹⁵ ᑖᓐᓇ ᓴᖅᑭᑦᓱᒫᕐᒪᑦ ᒎᑎᐅᑉ ᓈᒻᒪᒋᔭᖓᒍᑦ; ᓮᒻᒪᕐᑎᑕᐅᓯᒪᔪᖅ ᐊᐅᓚᑦᓯᔨᑑᓪᓗᓂᓗ, ᐊᖓᔪᖅᑳᕐᔪᐊᖅ ᐊᖓᔪᖅᑳᕐᔪᐊᓄᑦ ᐊᑕᓂᐅᔪᕐᓗ ᐊᑕᓂᕐᓄᑦ.

¹⁶ ᑖᓐᓇ ᑭᓯᒥ ᑐᖁᓱᐃᑦᑑᔪᖅ ᖃᐅᒪᔪᒦᑦᑐᖅ ᑭᓇᑐᐃᓐᓇᕐᒧᑦ ᑎᑭᑕᐅᔪᓐᓇᖏᑦᑐᒥᒃ, ᑭᓇᒧᓪᓘᓐᓃᑦ ᑕᑯᔭᐅᓚᐅᕐᓯᒪᖏᑦᑐᖅ ᑕᑯᔭᐅᔪᓐᓇᖏᑦᑐᕐᓗ. ᑖᓐᓇ ᐅᐱᒋᔭᐅᓕ ᐃᓂᖃᕐᓗᓂᓗ ᐃᓱᖃᖏᑦᑐᒥ. ᐋᒥᓐ.

¹⁷ ᓯᓚᕐᔪᐊᑉ ᐱᖏᓐᓄᑦ ᐊᔪᕐᓴᓐᖏᑦᑐᑦ, ᐱᐅᔪᕆᖁᖏᓪᓗᒋᑦ ᐅᖃᐅᑎᒃᑭᑦ, ᓂᕆᐅᖁᖏᓪᓗᒋᓪᓗ ᐊᔪᕐᓴᖏᑦᑐᒪᓂᑐᐃᓐᓇᒧᑦ ᐊᐅᓚᑕᐅᔪᒥᒃ, ᒎᑎᒥᓪᓕ ᑖᑦᓱᒪ ᐊᓐᓂᕈᓱᒐᓂ ᓱᓇᓕᒫᓂᒃ ᑐᓂᓯᕕᒋᖕᒪᑎᒍᑦ ᖁᕕᐊᓲᑎᒋᓗᒋᑦ ᐃᓅᖁᓪᓗᑕ.

¹⁸ ᐱᐅᔪᒥᒃ ᐱᓇᓱᐊᖁᒃᑭᑦ, ᐱᓇᓱᐊᑦᓯᐊᕐᓂᒃᑯᑦ ᐊᔪᕐᓴᓐᖏᑦᑑᖁᓪᓗᒋᑦ, ᐊᓐᓂᕈᓱᖁᓇᒋᑦ ᐱᒋᔭᒥᖕᓂᒃ ᐃᑲᔪᖁᓪᓗᒋᓪᓗ ᐃᓅᖃᑎᒥᖕᓄᑦ.

¹⁹ ᑍᒤᓕᐅᕈᑎᒃ ᐱᒃᑯᒥᓇᕐᑐᕐᔪᐊᓂᒃ ᑐᓐᖓᕕᓕᐅᕐᓂᐊᕐᐳᑦ ᓯᕗᓂᒃᓴᒥᖕᓂ, ᐃᓅᓯᕐᒥᒃ ᓵᓚᖃᐅᑎᒃᓴᕐᑖᕈᒫᕐᐳᑦ ᐃᓅᓯᓪᓚᕆᖕᒥᒃ.

²⁰ ᑎᒧᑏ, ᐃᓕᖕᓄᑦ ᐱᓯᒪᖁᔭᐅᓯᒪᔪᖅ ᐱᓯᒪᑦᓯᐊᕈᒃ. ᐅᖄᕈᓘᔭᕐᓃᑦ ᓯᓔᑦᑐᑦ ᖃᐅᔨᒪᓂᐅᓂᕋᕐᑕᐅᔪᕐᓗ ᓱᓕᖏᑦᑐᖅ ᐃᓚᐅᕕᒋᖏᓪᓗᒍ,

²¹ ᐃᓚᖏᑕ ᑕᒪᓐᓇ ᐱᓯᒪᓕᕋᒥᑦᔪᒃ ᐅᒃᐱᕐᓂᕐᒥᒃ ᕿᒤᑦᔪᑎᒋᓯᒪᕚᑦ. ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ.