ᑎᒧᑎᒧᑦ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕆᕐᑐᐃᓂᕐᓗᒃᑐᑦ

¹ ᐊᓂᕐᓂᖅ ᑐᑭᓯᓇᑦᓯᐊᕐᑐᒥᒃ ᓇᓗᓁᕐᓯᕗᖅ ᐅᓪᓗᐃᑦ ᑭᖑᓪᓕᖏᓐᓂ ᐃᓚᖏᑦ ᐅᒃᐱᕐᓂᕐᒥᒃ ᕿᒤᔪᒫᕐᒪᑕ, ᐊᓂᕐᓂᕐᓂᒃ ᓱᓕᖏᑦᑐᓂᒃ ᒪᓕᒍᒪᓂᕐᓴᐅᔪᓂᒃ ᐊᓂᕐᓂᕐᓗᐃᓪᓗ ᐊᔪᕆᕐᑑᑎᒋᓐᓂᒃ,

² ᑍᒤᑦᑐᑦ ᐊᔪᕆᕐᑐᐃᓃᑦ ᓯᐊᒻᒪᒃᑎᑕᐅᓯᒪᕗᑦ ᓱᓕᓐᖏᑦᑐᑎᒍᑦ ᐅᐃᕕᕆᒃᓯᓪᓗᑎᒃ ᐃᓱᒪᖏᑦ ᐃᒃᐱᖕᓂᐊᓂᖃᕈᓐᓃᕐᐳᑦ ᓴᕕᕋᔭᖕᒧᑦ ᐆᓇᕐᓯᑎᑕᐅᓯᒪᔪᒧᑦ ᐆᑕᕐᑕᐅᓯᒪᔪᑎᑐᑦ.

³ ᑖᒃᑯᐊ ᐊᔪᕆᕐᑐᐃᕗᑦ ᓄᓕᐊᓂᖃᑦᑕᖁᔨᓇᑎᒃ ᓂᕆᔭᕆᐊᖃᓐᖏᓂᕅᓪᓗᑎᒃᓗ ᓂᕿᑦ ᐃᓚᖏᓐᓂᒃ ᒎᑎᐅᓪᓕ ᓂᑭᑦ ᐱᓐᖑᕐᑎᓯᒪᕔᑦ ᓂᕿᒋᔭᐅᖁᓪᓗᒋᑦ ᑐᒃᓯᐊᕐᓂᒃᑯᑦ ᖁᔭᓕᑦᔪᑕᐅᓗᑎᒃ, ᐅᒃᐱᕐᑐᓄᑦ ᓱᓕᓂᕐᒥᒡᓗ ᖃᐅᔨᒪᔪᓄᑦ.

⁴ ᒎᑎᐅᑉ ᐱᓐᖑᕐᑎᓯᒪᔭᓐᖏᑦ ᑕᒪᕐᒥᒃ ᐱᐅᖕᒪᑕ, ᓇᕐᕈᒋᔭᒃᓴᐅᓐᖏᓚᑦ ᑐᒃᓯᐊᕐᓂᒃᑯᑦ ᖁᔭᓕᑦᔪᑕᐅᓗᑎᒃ ᑎᒍᔭᐅᒃᐸᑕ;

⁵ ᒎᑎᐅᑉ ᐅᖃᐅᓯᖓᓄᑦ ᑐᒃᓯᐅᑦᔭᐅᓂᕐᒧᓪᓗ ᐃᑦᔪᕐᓁᑎᑕᐅᖕᒪᑕ.

ᐱᔨᑦᓯᑦᓯᐊᕐᓂᖅ ᙭ᔅᑑᓯ ᔩᓱᓯᒥᒃ

⁶ ᑕᒪᒃᑯᐊ ᐅᖃᐅᑦᔪᐃᑦᔪᑎᒋᒍᕕᒋᑦ ᐅᒃᐱᕐᑑᖃᑎᒌᓄᑦ, ᐱᔨᑦᓯᕐᑎᐅᑦᓯᐊᕐᓂᐊᕐᐳᑎᑦ ᙭ᔅᑑᓯ ᔩᓱᓯᒥᒃ, ᓇᖕᒥᓂᖅ ᐱᒋᐅᕐᓴᓗᑎᑦ ᐅᖃᐅᓯᕐᓄᑦ ᐅᒃᐱᕐᓂᒃᑯᑦ ᐊᔪᕆᕐᑑᓯᕐᓄᓪᓗ ᓱᓕᔪᓄᑦ ᒪᓕᒃᓯᒪᔭᕐᓄᑦ.

⁷ ᐅᓂᒃᑳᕐᑐᐊᑦ ᒎᑎᒥᒃ ᐃᓱᒪᑎᑦᓯᖏᑦᑐᑦ ᑲᒪᒋᓂᐊᕐᓇᒋᑦ. ᐅᒃᐱᕐᓂᕐᒥᓕ ᐃᓅᓯᒃᓴᐅᔪᓐᓇᕐᑐᓂᒃ ᐃᓕᓐᓂᐊᖔᖃᑦᑕᕆᑦ.

⁸ ᑎᒥᒃᑯᑦ ᐱᔭᕆᐅᕐᓴᕐᓂᖅ ᐊᑐᕐᓇᕐᓂᖃᕋᓗᐊᕐᐳᖅ, ᐅᒃᐱᕐᓂᒃᑯᓪᓕ ᐱᔭᕆᐅᕐᓴᕐᓂᖅ ᖃᓄᓕᒫᖅ ᐊᑐᕐᓇᕐᓂᖃᕐᐳᖅ, ᐊᖏᕈᑕᐅᓯᒪᖕᒪᑦ ᒫᓐᓇᒧᑦ ᐊᑐᕐᑐᒥᒃ ᓯᕗᓂᕐᒥᓗ ᐊᑐᕈᒫᕐᑐᒥᒃ.

⁹ ᐅᖃᐅᓯᖅ ᐅᓇ ᐅᒃᐱᕆᔭᒃᓴᐅᕗᖅ ᑕᒪᒃᑭᕐᓗᓂ ᐃᓚᓕᐅᕐᑕᐅᔪᒃᓴᐅᓪᓗᓂ.

¹⁰ ᒫᓐᓇᒧᑦ ᑎᑭᓪᓗᒍ ᐱᓇᓱᐊᕐᐸᒃᐳᒍᑦ ᐊᒃᓱᕈᕐᓗᑕ, ᓂᕆᐅᖕᓂᖃᕋᑦᑕ ᒎᑎᒥᒃ ᑐᖁᓱᐃᑦᑐᒥᒃ, ᐱᐅᓕᔨᐅᔪᒥᒃ ᐃᓄᖕᓂᒃ ᑕᒤᓐᓂᒃ, ᐱᓗᐊᕐᓗᓂᓕ ᐅᒃᐱᕈᓱᒃᑐᓄᑦ.

¹¹ ᑕᒪᒃᑯᓂᖓ ᐊᔪᕆᕐᓱᒃᑭᑦ ᒪᓕᖁᓗᒋᑦ.

¹² ᓇᕐᕈᒋᔭᐅᑦᑍᓕᒋᑦ ᐃᓅᒃᓱᒃᑑᓃᑦ ᐱᑦᔪᑎᒋᓗᒍ, ᐅᒃᐱᕐᑐᓄᓪᓕ ᒪᓕᒐᒃᓴᐅᓕᕆᑦ ᐅᖃᐅᓯᒃᑯᑦ ᐱᓂᐊᕐᓂᒃᑯᓪᓗ, ᓇᒡᓕᖕᓂᒃᑯᑦ, ᐅᒃᐱᕐᓂᒃᑯᓪᓗ, ᐃᓗᐊᕐᑐᓕᓂᒃᑯᓪᓗ.

¹³ ᑎᑭᓚᐅᖏᓐᓂᓐᓂ, ᐱᔪᓐᓇᕐᓃᑦ ᐊᑐᕐᓗᒍ ᐊᒡᓔᑦ ᐃᓄᖕᓄᑦ ᐊᑐᐊᖃᑦᑕᒃᑭᑦ, ᐊᔪᕆᕐᑐᐃᖃᑦᑕᕐᓗᑎᑦ, ᐃᓕᓐᓂᐊᕐᑎᑦᓯᓗᑎᓪᓗ.

¹⁴ ᑐᓂᕐᕈᓯᐊᕆᓯᒪᔧᑦ ᑲᒪᒋᔪᓐᓃᕐᑍᓕᒍᒃ, ᑐᓂᕐᕈᓯᐊᕆᓚᐅᕐᑍᑦ ᐊᓂᕐᓂᒃᑯᑦ ᐅᖃᓪᓚᒡᕕᐅᑎᓪᓗᑎᑦ ᐅᒃᐱᕐᑑᖃᑎᒌᑦ ᐊᖓᔪᖅᑳᖏᓐᓄᑦ ᐸᑎᒻᒥᔭᐅᓪᓗᑎᑦ.

¹⁵ ᑕᒪᒃᑯᐊ ᐃᓱᒪᒃᓴᕐᓯᐅᕈᑎᒋᑦᓯᐊᑭᑦ, ᐃᓕᖕᓂᒃ ᑕᒪᑐᒧᖓ ᑐᓂᓯᒪᑦᓯᐊᕐᓗᑎᑦ, ᐱᕙᓪᓕᐊᓃᑦ ᑕᑯᔭᐅᖁᓪᓗᒍ ᑕᒤᓐᓄᑦ.

¹⁶ ᐃᓕᖕᓂᒃ ᐊᔪᕆᕐᓱᖃᓯᐅᔨᓴᑦᓯᐊᕆᑦ ᐊᔪᕆᕐᑐᐃᓂᕐᓂᒡᓗ. ᑕᒪᒃᑯᐊ ᐊᓯᐊᓄᐊᕐᑍᓕᒋᑦ, ᑍᒤᒃᑯᕕᑦ ᐃᓕᖕᓂᒃ ᐱᐅᓕᓂᐊᕐᐳᑎᑦ ᐊᔪᕆᕐᑐᕐᑕᕐᓂᒡᓗ.