ᑎᒧᑎᒧᑦ ᓯᕗᓪᓖᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐸᐅᓗᓯᒥᑦ ᙭ᔅᑑᓯ ᔩᓱᓯᐅᑉ ᐋᐴᓯᑕᓕᖓᓂᑦ ᒎᑎᐅᑉ ᐱᖁᔨᓂᖓᒍᑦ ᔩᓱᓯ ᙭ᔅᑑᓯᒃᑯᓪᓗ ᐱᐅᓕᔨᑦᑎᒍᑦ ᓂᕆᐅᒋᔭᒃᓴᖃᕐᕕᒋᔭᑦᑎᒍᑦ.

² ᑎᒧᑎᒧᑦ, ᐅᒃᐱᕐᓂᒃᑯᑦ ᐃᕐᓂᓪᓚᕆᒋᔭᓐᓄᑦ: ᒎᑎ ᐊᑖᑕᐅᑉ ᙭ᔅᑑᓯ ᔩᓱᓯᐅᓪᓗ ᐊᑕᓂᑦᑕ ᑐᓂᓯᕕᒋᓕᑎᑦ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᒥᓂᒃ, ᓂᑲᒍᓱᖕᓂᕐᒥᓂᒡᓗ, ᓮᓕᑎᑦᓯᓂᕐᒥᓂᒃᓗ.

ᐊᔪᕆᕐᑐᐃᓂᕐᓗᒃᑐᓂᒃ ᖃᐅᔨᒪᓇᓱᖁᔨᓃᑦ

³ ᐃᒫᒃ ᐱᖁᓚᐅᕋᒃᑭᑦ ᒫᓯᑑᓂᐊᒧᐊᓕᕐᑎᓪᓗᖓ ᐃᐱᓲᓯᒦᖏᓐᓇᖁᓪᓗᑎᑦ ᐃᓂᕐᑎᕆᖁᓪᓗᑎᑦ ᐃᓄᐃᑦ ᐃᓚᖏᓐᓂᒃ ᐊᔪᕆᕐᓱᐃᑦᔪᑎᒋᕙᑕᑦᑕ ᐊᓯᖏᓐᓂᒃ ᐊᔪᕆᕐᓱᐃᖁᓇᒋᑦ.

⁴ ᐅᓂᒃᑳᕐᑐᐊᓂᒃ ᑭᖑᕚᖑᖃᑎᒌᓪᓗ ᑭᓇᒃᑰᓂᖏᒃᓂᒃ ᐱᓇᓱᐊᑐᐃᓐᓇᖁᓇᒋᑦ ᐅᓄᕐᑐᐊᓗᖕᓂᒃ ᐅᖃᓪᓚᑐᐃᓐᓇᖃᑦᑕᖁᖏᓪᓗᒋᑦ, ᑕᒪᒃᑯᐊ ᓇᓚᐅᑦᑖᕐᑎᑦᓯᑐᐃᓐᓇᕐᒪᑕ; ᒎᑎᒥᑦ ᐱᔪᓂᒃ ᐱᓇᓱᐊᕐᑎᑦᓯᓇᑎᒃ, ᐅᒃᐱᕐᓂᑯᑦ ᐃᓕᓐᓂᐊᕐᓂᐅᒐᔭᕐᑐᓂᒃ.

⁵ ᑕᒪᓐᓇ ᐃᓂᕐᑎᕆᑦᔪᑕᐅᖁᔭᕗᑦ ᓇᒡᓕᖕᓂᖅ ᓴᖅᑭᖁᓪᓗᒍ ᐆᒻᒪᑎᒥᑦ ᐃᑦᔪᕐᓁᑦᑐᒥᑦ ᐃᓱᒪᒥᓪᓗ ᐸᓯᔭᒃᓴᐅᓂᖃᖏᑦᑐᒥᑦ ᐱᓯᒪᔪᖅ, ᐅᒃᐱᕐᓂᒥᒡᓗ ᓱᓕᔪᒥᑦ.

⁶ ᐃᓄᐃᑦ ᐃᓚᖏᑦ ᑖᒃᑯᓇᓐᖓᑦ ᕿᒪᕉᑎᓚᐅᕋᒥᒃ ᐅᖃᓪᓚᖕᓂᑐᐃᓐᓇᕐᓂᒃ ᐊᑑᑎᖃᖏᑦᑐᓂᒃ ᐊᑐᓕᕐᒪᑕ.

⁷ ᐱᖁᔭᓂᒃ ᐃᓕᓮᔨᐅᔪᒪᒐᓗᐊᕐᐳᑦ, ᐅᖃᐅᓯᕆᓇᓱᐊᕐᑕᒥᖕᓂᓗ ᑐᑭᓯᐅᒪᓐᖏᓚᑦ ᑐᑭᓯᐅᒪᔫᔮᕐᓗᒋᑦ ᐅᖃᕈᓐᓇᕋᓗᐊᕐᓗᒋᑦ.

⁸ ᖃᐅᔨᒪᕗᒍᑦ ᐱᖁᔭᑦ ᐱᐅᖕᒪᑕ, ᐱᖁᔨᓂᖏᑦ ᒪᓕᒃᑕᐅᒃᐸᑕ,

⁹ ᖃᐅᔨᒪᒋᕗᒍᑦ, ᐱᖁᔭᑦ ᐋᖅᑭᒃᑕᐅᓯᒪᖏᒻᒪᑕ ᓈᒪᑦᓯᐊᕐᑐᒥᒃ ᐃᓅᔪᓄᑦ ᐱᖁᔭᖃᖏᑦᑐᓄᓪᓕ ᓈᓚᖏᑦᑐᓄᓪᓗ, ᒎᑎᖃᖏᑦᑐᓄᑦ ᐊᔪᕐᑐᓕᔪᓄᓪᓗ, ᐅᒃᐱᕋᓱᐊᓐᖏᑦᑐᓄᑦ ᒎᑎᒥᒡᓗ ᓇᕐᕈᓇᕐᑎᑦᓯᔪᓄᑦ, ᐊᑖᑕᒥᖕᓂᒃ ᐊᓈᓇᒥᖕᓂᒡᓗ ᑐᖁᑦᓯᔪᓄᑦ, ᐃᓄᐊᕐᑎᐅᔪᓄᓪᓗ,

¹⁰ ᓄᓕᐊᕐᓂᒃᑯᑦ ᐊᔪᕐᑐᓕᔪᑦ, ᐊᑦᔨᒥᖕᓅᕐᑐᑦ, ᑎᒡᓕᒃᐸᒃᑐᑦ, ᓴᒡᓗᕙᒃᑐᑦ, ᓱᓕᖏᑦᑐᒥᒡᓗ ᐊᖏᕈᑎᖃᕐᐸᒃᑐᑦ, ᖃᓄᑐᐃᓐᓇᕐᓗ ᓱᓕᔪᒥᒃ ᐊᔪᕆᕐᑑᓯᕐᒥᒃ ᐊᑭᕋᕐᑐᕐᐸᒃᑐᑦ.

¹¹ ᑕᒪᓐᓇ ᐊᔪᕆᕐᑑᓯᖅ ᐅᖃᐅᓯᕐᓂ ᑐᓴᕈᒥᓇᕐᑐᓃᑉᐳᖅ ᐅᖃᐅᓯᕆᔭᐅᖁᔭᐅᓯᒪᔪᓂᑦ ᐅᕙᓐᓄᑦ, ᐱᓐᓇᕐᓇᕐᑐᕐᔪᐊᕐᒥᑦ ᒎᑎᒥᑦ ᓂᕐᑐᕐᑕᐅᔪᒃᓴᐅᔪᒥᑦ.

ᖁᔭᓕᑦᔪᑎᖃᕐᓂᖅ ᒎᑎᐅᑉ ᓈᒃᑭᒍᓱᖕᓂᖓᓂᒃ

¹² ᖁᔭᒋᕙᕋ ᙭ᔅᑑᓯ ᔩᓱᓯ ᐊᑕᓂᕗᑦ, ᐱᔪᓐᓇᕐᓂᖃᕐᑎᒻᒪᖓ ᐱᓇᓱᐊᕆᐊᖃᕐᑕᓐᓄᑦ, ᐱᔪᒥᓇᕐᑑᑎᓐᓇᖓ ᑎᓕᓚᐅᕐᒪᖓ, ᐱᔨᑦᓯᕐᑎᒋᔪᒪᓪᓗᖓ.

¹³ ᓯᕗᕐᖓᒍᑦ ᐅᖃᕐᓂᕐᓘᑎᖃᕐᐸᓚᐅᕐᑎᓪᓗᖓ ᑖᑦᓱᒥᖓ, ᐊᑭᕋᕐᑐᕐᑎᐅᓪᓗᖓ, ᐃᓴᒍᓱᖃᕐᓇᖓᓗ. ᒎᑎᐅᓪᓕ ᓂᑲᒋᓚᐅᕐᐹᖓ ᑍᑦᓱᒪᓂ ᐅᒃᐱᕐᓂᖃᓚᐅᖏᓐᓇᒪ ᖃᓄᐃᓕᐅᕐᓂᒃᑲᓗ ᖃᐅᔨᒪᓚᐅᕐᓇᒋᑦ.

¹⁴ ᐊᑕᓂᑦᑕᓕ ᐱᑦᓯᐊᕐᓂᒧᑦ ᐱᔪᓐᓇᕐᑎᑦᓯᓂᓂ ᐅᕙᓐᓄᑦ ᑯᕕᓚᐅᕐᐹ ᐅᒃᐱᕐᓂᕐᒥᒃ ᓇᒡᓕᖕᓂᕐᒥᒡᓗ ᐱᑖᕆᔭᑦᑎᓐᓂᑦ ᙭ᔅᑑᓯ ᔩᓱᓯᒥ.

¹⁵ ᐅᖃᐅᓯᖅ ᐃᒤᓕᔪᖅ ᓱᓕᕗᖅ ᓈᒻᒪᒋᔭᐅᔭᕆᐊᓕᒃ ᐅᒃᐱᕆᔭᐅᓗᓂᓗ, ᙭ᔅᑑᓯ ᔩᓱᓯ ᓯᓚᕐᔪᐊᕐᒧᑦ ᑎᑭᓚᐅᕐᒪᑦ ᐊᔪᕐᑐᓕᔪᑦ ᐱᐅᓕᔭᕐᑐᕐᓗᒋᑦ; ᐅᕙᖓᓕ ᑖᒃᑯᓇᓐᖓᑦ ᐊᔪᕐᑐᓕᔪᓂᑦ ᐱᐅᖏᓐᓂᕐᐹᖑᕗᖓ.

¹⁶ ᑍᒤᒻᒪᓪᓕ ᒎᑎᐅᑉ ᓂᑲᒋᓚᐅᕐᐹᖓ, ᓇᓗᓇᕈᓐᓃᖁᓪᓗᒍ ᔩᓱᓯ ᙭ᔅᑑᓯᐅᑉ ᕿᓄᐃᓵᕈᓐᓇᕐᓂᖓ ᐅᕙᓐᓂᑦ ᐱᒋᐊᕐᕕᖃᕐᓗᓂ ᐱᐅᖏᓐᓂᕐᐹᖑᔪᒥᒃ, ᑐᑭᓯᑦᔪᑎᒃᓴᐅᓕᖁᓪᓗᖓ ᑭᖑᓂᒃᑯᑦ ᙭ᔅᑑᓯᒧᑦ ᐅᒃᐱᕈᒫᕐᑐᓄᑦ ᐃᓅᓯᕐᑖᕐᓂᐊᕐᓗᑎᒡᓗ ᓄᖑᓱᐃᑦᑐᒥᒃ.

¹⁷ ᐊᖓᔪᖅᑳᕐᔪᐊᖑᔪᖅ ᐃᓱᖃᖏᑦᑐᒧᑦ, ᑐᖁᓱᐃᑦᑐᖅ, ᑕᑯᒃᓴᐅᖏᑦᑐᖅ, ᒎᑎᑑᔪᖅ, ᑖᓐᓇ ᐅᐱᒋᔭᐅᓕ ᓂᕐᑐᕐᓇᕐᓯᑎᑕᐅᓗᓂᓗ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ ᐋᒥᓐ.

¹⁸ ᐃᕝᕕᓪᓕ ᑎᒧᑏ ᕿᑐᕐᖓᕋ, ᐱᓇᓱᐊᕐᑕᐅᖁᔭᓐᓂᒃ ᐅᖃᐅᑎᕙᒋᑦ, ᓇᓚᐅᑦᑍᑦᔪᑕᐅᓯᒪᔪᑦ ᐃᓕᖕᓂᒃ ᒪᓕᒡᓗᒋᑦ, ᑖᒃᑯᐊ ᐅᖃᐅᓰᑦ ᒪᓕᒃᑯᕕᒋᑦ ᐱᐅᔪᒥᒃ ᐱᑦᔪᑎᖃᕐᓗᑎᑦ ᐅᓇᑕᕐᑎᐅᓂᐊᕐᐳᑎᑦ.

¹⁹ ᐅᒃᐱᕐᓂᖃᕐᓗᑎᑦ ᐃᓱᒪᒃᑯᓪᓗ ᐸᓯᔭᐅᖏᓪᓗᑎᑦ. ᐃᓄᐃᑦ ᐃᓱᒪᒥᒃᑎᒍᑦ ᐸᓯᔭᒃᓴᐅᓂᕐᒥᒃ ᐃᒃᐱᒍᓱᖏᓗᐊᕐᓂᕐᒧᑦ, ᐅᒃᐱᕐᓂᖏᑦ ᓯᖁᒥᑕᐅᓯᒪᖕᒪᑕ;

²⁰ ᑖᒃᑯᐊᒃ ᕼᐂᒥᓂᐅᓯᓗ ᐊᓕᒃᓵᓐᑐᕆᓗ ᑍᒤᓯᒪᕘᒃ, ᑖᒃᑯᐊᒃ ᑐᓂᓚᐅᕐᐹᒃᑲᒃ ᓵᑖᓇᓯᒧᑦ, ᒎᑎᒥᒃ ᐅᖃᕐᓂᕐᓘᑎᖃᕆᐊᖃᖏᓐᓂᕐᒥᒃ ᖃᐅᔨᖁᓪᓗᒋᒃ.