ᑎᓴᓗᓁᑲᒥᐅᓄᑦ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᓯᖅ ᒎᑎᐅᑉ ᖁᕕᐊᒋᔭᖓ

¹ ᑭᖑᓪᓕᕐᐹᒥᒡᓕ, ᙭ᔅᑑᓯᒥᐅᑕᐅᖃᑎᒃᑲ, ᕿᓄᕕᒋᓪᓗᓯ ᐃᓇᑉᐸᑦᓯ ᐊᑕᓂᑦᑎᓐᓂ ᔩᓱᓯᒥ, ᐅᕙᑦᑎᓐᓂᑦ ᐃᓕᓐᓂᐊᓚᐅᕋᑦᓯ ᖃᓄᖅ ᐃᓅᔪᒃᓴᐅᖕᒪᖔᑦᓯ ᒎᑎᒧᑦ ᖁᕕᐊᒋᔭᐅᔪᒥᒃ. ᑍᒫᒃᓗ ᐃᓅᓯᖃᓚᐅᕋᑦᓯ, ᑭᓯᐊᓂᓕ ᐃᓅᓯᖃᑦᓯᐊᓕᖁᕙᑦᓯ.

² ᖃᐅᔨᒪᒐᑦᓯ ᖃᓄᐃᓕᐅᕆᐊᖃᕐᓂᑦᓯᓐᓂᒃ ᐊᔪᕆᕐᓲᑦᔨᓯᒪᒐᑦᑕ ᐊᑕᓂᑦᑎᓐᓂᑦ ᔩᓱᓯᒥᑦ ᐱᔪᓂᒃ.

³ ᑕᒪᑦᔭ ᒎᑎᐅᑉ ᐱᔪᒪᔭᖓ, ᐃᑦᔪᕐᓁᖁᓪᓗᓯ: ᐊᕐᓇᕐᓂᐊᕐᓂᖅ ᐊᖑᓐᓂᐊᕐᓂᕐᓗ ᐊᑐᕐᑍᓕᓗᒍ;

⁴ ᐃᓕᑦᓯ ᐊᑐᓂᑦ ᖃᐅᔨᒪᒐᑦᓯ ᖃᓄᖅ ᐊᑐᓂ ᐱᑦᑍᓕᔪᓐᓇᕐᓂᕐᒥᒃ ᐃᑦᔪᕐᓁᖁᓪᓗᓯ ᐅᐱᓐᓇᑦᓯᐊᕐᓗᓯᓗ,

⁵ ᐃᒃᖠᒎᕐᓂᕐᒧᑦ ᐱᔪᒪᓗᐊᕐᓂᖅ ᐊᑐᖏᓪᓗᒍ ᐅᒃᐱᖏᑦᑐᑎᑐᑦ ᒎᑎᒥᒡᓗ ᖃᐅᔨᒪᖏᑦᑐᑎᑐᑦ,

⁶ ᑍᒤᒻᒪᑦ ᐃᓄᒃ ᐅᒃᐱᕐᑑᖃᑎᒥᓂᒃ ᙭ᔅᑑᓯᒥ ᐅᖁᒤᑎᑦᓯᑦᑍᓕᓕ ᓄᓕᐊᕐᓂᕐᒧᑦ ᐅᐃᕕᕐᕆᓇᒍᓗ ᓱᓇᑐᐃᓐᓇᕐᒧᑦ, ᑕᒪᑐᒥᖓ ᐅᖃᐅᑎᓚᐅᕐᐸᑦᓯ, ᐅᓗᕆᐊᓇᕐᓂᖓᓂᒃ ᐊᑕᓂᖅ ᓱᒋᐊᕐᓯᕙᖕᒪᑦ ᑍᒤᓕᐅᕐᑐᓕᒫᓂᒃ.

⁷ ᒎᑎᐅᑉ ᕾᖁᓚᐅᖏᒻᒪᑎᒍᑦ ᐊᑐᕈᒥᓇᖏᑦᑐᓂᒃ ᑕᒪᒃᑯᓂᖓ ᐃᓕᖅᑯᓯᖃᖁᓗᑕ, ᐃᑦᔪᕐᓁᖁᓪᓗᑕᓕ.

⁸ ᑍᒤᒻᒪᑦ ᑕᒪᑐᒥᖓ ᐊᔪᕆᕐᑑᓯᕐᒥᒃ ᓇᕐᕈᔪᖅ, ᐃᓄᖕᒥᒃ ᓇᕐᕈᖏᓚᖅ ᒎᑎᒥᒡᓕ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓕᑦᓯᓐᓄᑦ ᑐᓂᓯᔪᒥᒃ.

⁹ ᐅᒃᐱᕐᑑᖃᑎᒌᓄᓪᓕ ᓇᒡᓕᒃᑎᒌᖕᓂᕐᒥᒃ ᑎᑎᕋᕐᕕᒋᔭᕆᐊᖃᓐᖏᓚᑦᓯ, ᓇᖕᒥᓂᖅ ᒎᑎᒧᑦ ᐊᔪᕆᕐᑐᕐᑕᐅᓯᒪᒐᑦᓯ ᖃᓄᖅ ᓇᒡᓕᒃᑎᒌᒃᑐᒃᓴᐅᖕᒪᖔᑦᓯ.

¹⁰ ᐅᒃᐱᕐᑑᖃᑎᓕᒫᕗᓪᓗ ᒫᓯᑑᓂᐊᒦᑦᑐᑦ ᑍᒫᒃ ᐱᓂᐊᕐᕕᒋᑦᓯᐊᓚᐅᕐᐸᓯ, ᓱᓕᓕ ᙭ᔅᑑᓯᒥ ᐅᒃᐱᕐᑑᖃᑎᕗᑦ, ᐃᓇᑦᓯᒃᑲᓐᓂᕐᐳᒍᑦ ᑍᒤᓕᐅᑲᓐᓂᖁᓪᓗᓯ ᓱᓕ.

¹¹ ᐃᓅᓯᑦᓯᓐᓂ ᑐᕌᒐᖃᕋᓱᐊᕆᑦᓯ ᐅᐃᒪᔮᖏᓪᓗᓯ, ᐱᓂᐊᕋᒃᓴᓯ ᓇᖕᒥᓂᖅ ᐱᓇᓱᐊᕐᓗᒋᑦ, ᓇᖕᒥᓂᕐᓗ ᐱᓇᓱᐊᕐᓂᑦᓯᓐᓄᑦ ᐃᓅᑦᔪᑎᒃᓴᕐᓯᓗᓯ, ᓲᕐᓗ ᑍᒫᒃ ᐱᖁᓚᐅᕋᑦᓯ;

¹² ᑍᒤᓕᐅᕐᑎᓪᓗᓯ ᑕᕝᕙ ᐃᒃᐱᒋᔭᐅᑦᓯᐊᕈᓐᓇᕐᓯᓂᐊᕐᐳᓯ ᐅᒃᐱᖏᑦᑐᓄᑦ, ᐊᓯᑦᓯᓐᓄᑦ ᐅᑕᖅᑭᑐᐃᓐᓇᕐᓂᐊᓐᖏᓚᓯ.

ᐊᑕᓂᐅᑉ ᑎᑭᑦᑐᒫᕐᓂᖓ

¹³ ᙭ᔅᑑᓯᒥᐅᑕᐅᖃᑎᒃᑲ, ᖃᐅᔨᒪᖏᑦᑑᖁᓐᖏᓚᑦᓯ ᓯᓂᓕᕐᓯᒪᔪᓂᒃ, ᕿᒃᓵᒍᑎᖃᓗᐊᖁᓇᓯ ᐊᓯᑦᓯᑐᑦ ᓂᕆᐅᒋᔭᒃᓴᖃᖏᑦᑐᑎᑐᑦ.

¹⁴ ᐅᒃᐱᕋᑦᑕ ᔩᓱᓯ ᑐᖁᓚᐅᕐᒪᑦ ᒪᑭᓚᐅᕆᓪᓗᓂᓗ, ᑍᒫᒃᑕᐅᖅ, ᐅᒃᐱᕆᕗᒍᑦ ᒎᑎᐅᑉ ᔩᓱᓯᒥ ᐅᒃᐱᕈᓱᒃᓗᑎᒃ ᑐᖁᓯᒪᔪᑦ ᓇᒃᓴᕈᒫᕐᒪᒋᑦ ᐃᓚᒋᓕᕐᓗᒋᑦ.

¹⁵ ᒫᓐᓇᓕ ᐅᖃᐅᑦᔨᓕᕐᐳᒍᑦ ᐃᓕᑦᓯᓐᓂᒃ ᐊᑕᓂᕐᒥᑦ ᐱᔪᓂᒃ, ᐅᕙᒍᑦ ᐃᓅᔪᒍᑦ ᐃᓅᑎᓪᓗᑕ ᓱᓕ ᐊᑕᓂᖅ ᑎᑭᓕᕐᐸᑦ, ᑐᖁᖓᔪᓂᒃ ᓯᕗᓕᐅᕆᔪᒫᓐᖏᓚᒍᑦ.

¹⁶ ᐊᑕᓂᖅ ᓇᖕᒥᓂᖅ ᕿᓚᖕᒥᑦ ᐊᖅᑲᕈᒫᕐᒪᑦ, ᓂᐱᕐᔪᐊᒧᑦ ᕾᖁᔨᔪᒧᑦ, ᐂᖏᓖᑦ ᐊᖓᔪᖅᑳᖓᑦᑕ ᓂᐱᖓᓄᑦ, ᒎᑎᐅᓪᓗ ᑎᑦᑐᓚᐅᑎᖁᑎᖓᓄᑦ, ᙭ᔅᑑᓯᒥᓗ ᑐᖁᖓᔪᑦ ᐃᓅᓯᕐᒧᑦ ᓯᕗᓪᓕᐅᓗᑎᒃ ᒪᑭᖅᑳᕈᒫᕐᐳᑦ;

¹⁷ ᑕᕝᕙ ᑭᖑᕐᖓᒍᑦ ᐅᕙᒍᑦ ᐃᓅᔪᒍᑦ, ᑕᒪᓐᓇ ᓇᓪᓕᐅᑎᒃᐸᑦ, ᑍᒃᑯᐊ ᐃᓚᒋᓕᕐᓗᒋᑦ ᖁᒻᒧᐊᖃᑎᒋᔪᒫᕐᐸᕗᑦ ᓄᕗᔭᑎᒍᑦ ᐸᕐᕆᐊᓕᕐᓗᑕ ᐊᑕᓂᕐᒥᒃ ᑲᑎᓯᔭᕐᑐᓕᕐᓗᑕ ᓯᓚᒃᑯᑦ ᖁᒻᒧᐊᒡᓗᑕ; ᑕᕝᕙᓗ ᐊᑕᓂᖅ ᓇᔪᑦᓮᓐᓇᓕᕈᒫᕐᐸᕗᑦ.

¹⁸ ᑍᒤᒻᒪᑦ ᑕᒪᒃᑯᓄᖓ ᐅᖃᐅᓯᕐᓄᑦ ᒪᓂᒍᕐᑎᒌᒋᑦᓯ.