ᓴᒧᐃᓕ ᓯᕗᓪᓖᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐅᓕᐅᑉ ᑲᑎᓯᓂᖓ ᓴᒧᐃᓕᒥᒃ

¹ ᐊᔪᕐᓴᖏᑦᑐᕐᑕᖃᓚᐅᕐᐳᖅ ᒪᓕᒃᑕᐅᔪᓐᓇᕐᓗᓂᓗ ᐊᖑᒻᒥᒃ ᐊᑎᓕᖕᒥᒃ ᑭᔅᒥᒃ, ᐃᓅᖃᑎᒌᓂᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ; ᑖᓐᓇ ᑭᔅ ᐊᐰᓕᐅᑉ ᐃᕐᓂᖓ, ᑖᓐᓇ ᐊᐰᓕ ᔨᕈᕆᐅᑉ ᐃᕐᓂᖓ, ᑖᓐᓇ ᔨᕈᕆ ᐱᑯᕋᑦ ᐃᕐᓂᖓ, ᑖᓐᓇ ᐱᑯᕋᑦ ᐊᐱᐊᑉ ᐃᕐᓂᖓ.

² ᑭᔅ ᐃᕐᓂᖃᓚᐅᕐᐳᖅ ᓴᐅᓕᒥᒃ ᐊᑎᓕᖕᒥᒃ, ᑕᑯᒥᓇᕐᑑᓪᓗᓂ ᐊᖑᒻᒥᒃ ᐃᓅᓱᒃᑐᒥᒃ. ᓴᐅᓕᐅᑉ ᑕᑯᒥᓇᕐᑑᓂᖓ ᐃᓴᕆᐊᓕᒥᐅᓕᒫᓂᑦ ᑕᑯᒥᓇᕐᓂᕐᓴᕐᑕᖃᓚᐅᓐᖏᓚᖅ; ᓴᐅᓕᓗ ᐃᓴᕆᐊᓕᒥᐅᖑᖃᑎᒥᓂᑦ ᐊᖏᓂᕐᓴᐅᓚᐅᕐᐳᖅ ᐃᑎᒐᓪᓗᐊᒥᒃ.

³ ᑍᑦᓱᒪᓂ ᑮᔅ ᓯᐅᑎᖅᑯᕐᑐᔪᖁᑎᖏᑕ ᐃᓚᖏᑦ ᐊᓯᐅᓚᐅᕐᐳᑦ. ᑍᒤᒻᒪᑦ ᑭᔅ ᐃᕐᓂᒥᓄᑦ ᓴᐅᓕᒧᑦ ᐅᖃᕐᐳᖅ, “ᐱᔨᕕᑦ ᐃᓚᖓᓂᒃ ᐂᑉᐸᖃᕐᓗᑎᑦ ᕿᓂᕆᐊᓚᐅᕆᑦ ᓯᐅᑎᖅᑯᕐᑐᔪᖁᑎᑦᑎᓐᓂᒃ.”

⁴ ᑕᕝᕙ ᖃᖅᑲᑎᒎᓚᐅᕐᐳᑦ ᐃᕗᕅᒥᐅᑉ ᓄᓇᖓᒍᑦ ᓵᓕᓴᐅᓪᓗ ᓄᓇᖓᒍᑦ, ᑭᓯᐊᓂᓕ ᓇᓂᓯᓚᐅᓐᖏᓚᑦ. ᑲᔪᓯᓚᐅᕐᐳᑦ ᓵᓕᒻ ᓄᓇᖓᒍᑦ, ᑭᓯᐊᓂᓕ ᑕᕝᕙᓃᓚᐅᓐᖏᓐᓂᕗᑦ. ᐱᓐᔭᒥᓂᐅᓪᓗ ᓄᓇᖓᒎᓚᐅᕆᕗᑦ, ᑭᓯᐊᓂᓕ ᓇᓂᓯᖕᒥᓇᑎᒃ.

⁵ ᔪᐸᓗ ᓄᓇᖓᓄᐊᕋᒥᒃ, ᓴᐅᓕ ᐅᖃᕐᐳᖅ ᐱᔨᒥᓄᑦ, “ᐅᑎᓕᕐᑕ ᐊᖏᕐᕋᒧᑦ, ᐊᑖᑕᒐ ᓯᐅᑎᖁᕐᑐᔪᓂᒃ ᐃᓱᒪᔪᓐᓃᕐᓗᓂ ᐅᕙᑦᑎᓐᓂᒃ ᐱᖏᒐᓕᑐᐃᓐᓇᕆᐊᖃᕐᒪᑦ.”

⁶ ᐱᔨᖓ ᑭᐅᕗᖅ, “ᑕᑯᒋᑦ, ᑕᕝᕙᓂ ᐃᒡᓗᒐᓴᖕᓂ ᐊᖑᒻᒥᒃ ᒎᑎ ᐃᓄᖁᑎᖃᕐᐳᖅ, ᐃᒃᐱᒋᔭᐅᑦᓯᐊᕐᑐᒥᒃ; ᐅᖃᕐᑕᕕᓂᓕᒫᖏᓪᓗ ᓇᓪᓕᐅᑦᓯᕙᒃᓗᑎᒃ. ᑍᑯᓐᖓᓚᐅᕐᑕ; ᐃᒻᒪᖄ ᐅᖃᐅᑎᔪᓐᓇᕐᐹᑎᒍᑦ ᓇᒧᓐᖓᕐᑐᒃᓴᐅᓂᑦᑎᓐᓂᒃ.”

⁷ ᓴᐅᓕᓕ ᑭᐅᕗᖅ, “ᑕᑯᒋᑦ ᑖᑦᓱᒧᖓᓕ ᐂᒍᑦᑕ ᓱᓇᒦᒃ ᐂᑦᑑᑎᒃᓴᖃᕐᐱᑖ? ᓂᕿᖃᕈᓐᓃᕋᑦᑕ, ᐱᖁᑎᖃᕐᓇᑕᓗ ᓱᓇᒥᒡᓕ ᒎᑎᐅᑉ ᐃᓄᖁᑎᖓᓄᑦ ᑐᓂᓯᔪᓐᓇᕋᔭᕐᐱᑖ?”

⁸ ᐱᔨᖓ ᑭᐅᒃᑲᓐᓂᕐᐳᖅ ᓴᐅᓕᒧᑦ, “ᑕᑯᒋᑦ, ᐊᑕᐅᓯᕐᒥᒃ ᒥᑭᔪᒥᒃ ᓯᐅᓪᕕᕆᖃᕐᑐᖓ ᑐᓂᔪᓐᓇᕐᐸᕋ ᑖᑦᓱᒥᖓ ᒎᑎᐅᑉ ᐃᓄᖁᑎᖓ, ᐅᖃᐅᑎᔪᓐᓇᕐᐹᑎᒍᑦ ᓇᒧᑦ ᐂᔪᒃᓴᐅᖕᒪᖔᑦᑕ.”

⁹ (ᑍᑦᓱᒪᓂ ᐃᓴᕆᐊᓕᒥ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᑍᔭᐅᕙᓚᐅᕐᐳᑦ ᓇᓚᐅᑦᑍᔨᒥᒃ, ᓇᓪᓕᐊᑐᐃᓐᓇᖅ ᒎᑎᒧᑦ ᐊᐱᖅᑯᑎᒃᓴᖃᕈᓂ, ᐅᖃᕐᐸᓚᐅᕐᐳᑦ, “ᓇᓚᐅᑦᑍᔨᒧᑦ ᐂᓚᐅᕐᑕ.”)

¹⁰ ᓴᐅᓕᓗ ᑭᐅᕗᖅ, “ᐅᖃᑦᓯᐊᕐᐳᑎᑦ! ᐊᑏ ᐂᓕᕐᑕ.” ᑕᕝᕙ ᐃᒡᓗᒐᓴᖕᓄᐊᕐᐳᑦ ᒎᑎᐅᑉ ᐃᓄᖁᑎᖓᑕ ᓄᓇᖓᓄᑦ.

¹¹ ᒪᔪᕋᓕᕐᑎᓪᓗᒋᒃ ᐃᒡᓗᒐᓴᖕᓄᑦ, ᑲᑎᓯᕗᑦ ᐊᕐᓇᓂᒃ ᐃᒥᕐᑕᕐᑐᓂᒃ ᑖᒃᑯᐊᓗ ᐊᐱᕆᕔᑦ, “ᓇᓚᐅᑦᑍᔨ ᑕᒫᓃᑉᐹ?”

¹² ᑭᐅᕚᑦ, “ᐄ, ᑕᑯᒋᑦ ᐊᒡᓛᑦ ᓯᕗᓂᑦᑎᐊᑦᓯᓐᓃᑉᐳᖅ, ᑐᐊᕕᕈᑦᓯᒃ ᐊᖑᔪᓐᓇᕐᐸᓯᒃ; ᐃᒡᓗᒐᓴᖕᓄᐊᓕᓵᕐᒪᑦ ᐅᓪᓗᒥ ᑎᑭᖅᑲᐅᖕᒪᑦ, ᐃᓄᐃᑦ ᑐᓂᕐᕈᓯᖅᑲᐅᖕᒪᑕ ᐱᓪᓚᕆᐅᓂᕐᐹᒥ ᑐᓂᕐᕈᓯᕐᕕᖕᒥ.

¹³ ᐃᒡᓗᒐᓴᖕᓄᐊᑐᐊᕈᑦᓯ, ᑕᑯᓂᐊᕐᐸᓯ ᖃᖅᑲᒧᐊᓚᐅᕐᑎᓐᓇᒍ ᐱᓪᓚᕆᐅᓂᕐᐹᒧᑦ ᓂᕆᔭᕐᑐᕐᓗᓂ; ᐃᓄᐃᑦ ᕾᖁᔭᐅᓯᒪᔪᑦ ᓂᕆᑦᔮᖏᑦᑐᑦ ᑖᓐᓇ ᕾᓚᐅᖏᓐᓂᖓᓂ, ᑖᑦᓱᒪ ᓮᒻᒪᕐᑎᑦᓴᕆᐊᖃᕐᒪᒋᑦ ᑐᓂᕐᕈᑏᑦ; ᑭᖑᓂᖓᒍᑦ ᕾᖁᔭᐅᓯᒪᔪᑦ ᓂᕆᓕᕐᓂᐊᕐᐳᑦ. ᒫᓐᓇ ᐂᒍᑦᓯᒃ, ᐊᖑᓂᐊᕐᐸᓯᒃ ᑕᑉᐸᐅᓐᖓᑐᐊᕈᑦᓯᒃ.”

¹⁴ ᑍᒤᒻᒪᑦ ᑲᔪᓯᓚᐅᕐᐳᑦ ᐃᒡᓗᒐᓴᖕᓄᑦ, ᐃᑎᓕᕐᑎᓪᓗᒋᓪᓗ ᐃᒡᓗᒐᓴᖕᓄᑦ, ᑕᑯᕗᑦ ᓴᒧᐃᓕᒥᒃ ᐊᓂᓕᕐᑐᒥᒃ ᐂᓕᕐᓗᓂ ᒥᒃᓯᒧᑦ ᑐᒃᓯᐊᕆᐊᕐᑐᕐᕕᒋᓂᐊᕐᑕᒥᓄᑦ ᖁᑦᓯᖕᓂᕐᐹᒨᕐᐸᓪᓕᐊᓕᕐᑐᖅ.

¹⁵ ᐃᑉᐸᒃᓴᖓᓂᐅᑎᓪᓗᒍ ᓴᐅᓕ ᓱᓕ ᑎᑭᓚᐅᕐᑎᓐᓇᒍ, ᐊᑕᓂᐅᑉ ᓴᒧᐃᓕ ᖃᐅᔨᑎᓚᐅᕐᐹ ᐃᒫᒃ:

¹⁶ “ᖃᐅᒃᐸᑦ ᑍᒤᓪᓗᐊᓕᕐᑎᓪᓗᒍ ᑎᓕᓯᕕᒋᔪᒫᕐᐸᒋᑦ ᐊᖑᒻᒥᒃ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ; ᑖᓐᓇ ᐅᕐᓱᕐᑎᕈᒫᕐᐸᑦ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ. ᑖᑦᓱᒪ ᐃᓄᖁᑎᒃᑲ ᐱᐅᓕᔪᒫᕐᐰᑦ ᐱᓕᔅᑍᓂᒥᐅᓂᑦ; ᐃᓄᖁᑎᒪ ᐅᖁᒤᑦᑐᒦᓐᓂᖏᑦ ᑕᑯᓯᒪᓕᕋᒃᑭᑦ, ᓂᓪᓕᐊᓂᖏᑦ ᐅᕙᓐᓄᑦ ᑎᑭᓯᒪᓕᕐᒪᑕ.”

¹⁷ ᓴᒧᐃᓕᐅᑉ ᓴᐅᓕ ᑕᑯᖕᒪᒍ, ᐊᑕᓂᐅᑉ ᐅᖃᐅᑎᕚ, “ᑖᓐᓇ ᑕᕝᕙ ᐊᖑᑦ ᐅᖃᐅᑎᒋᓚᐅᕐᑕᕋ ᐃᓕᖕᓄᑦ! ᑖᓐᓇ ᐊᐅᓚᑦᓯᔪᒫᕐᐳᖅ ᐃᓄᖁᑎᓐᓂᒃ.”

¹⁸ ᓴᐅᓕᓗ ᐂᓕᕐᐳᖅ ᓴᒧᐃᓕᒧᑦ ᐃᑎᕐᑕᕐᕕᖕᒥ, ᐅᖃᐅᑎᓪᓗᒍᓗ, “ᐅᖃᐅᑎᓚᐅᓐᖓ ᓇᓚᐅᑦᑍᔨᐅᑉ ᐃᒡᓗᖓ ᓇᓃᑉᐹ?”

¹⁹ ᓴᒧᐃᓕᐅᑉ ᓴᐅᓕ ᑭᐅᕚ, “ᐅᕙᖓ ᓇᓚᐅᑦᑍᔨᐅᕗᖓ; ᐅᕙᓐᓂᑦ ᓯᕗᓪᓕᐅᓗᑎᑦ ᐂᓚᐅᕆᑦ ᖁᑦᓯᖕᓂᕐᐹᒧᑦ ᐅᓪᓗᒥ ᓂᕆᖃᑎᒋᔭᕆᐊᖃᕐᐸᒋᑦ, ᖃᐅᒃᐸᑦ ᐅᓪᓛᒃᑯᑦ ᐊᐅᓪᓚᕐᑎᑦᓱᒫᕐᐸᒋᑦ ᐅᖃᐅᑎᓗᑎᓪᓗ ᐃᓱᒪᒥᐅᑕᓕᒫᕐᓂᒃ.

²⁰ ᑍᒃᑯᐊᓗ ᓯᐅᑎᖅᑯᕐᑐᔪᖁᑎᑎᑦ ᐊᓯᐅᓚᐅᕐᑐᑦ ᐅᓪᓗᐃᑦ ᐱᖓᓱᑦ ᓯᕗᓂᖓᒍᑦ, ᐃᓱᒫᓘᑎᒋᑦᑍᓕᒃᑭᑦ, ᓇᓂᔭᐅᓯᒪᓕᕐᒪᑕ. ᑭᓇᒥᒡᓕ ᐃᓴᕆᐊᓕᒥᐅᑦ ᐃᓄᖏᑦ ᐱᔪᒪᕙ? ᐃᓕᖕᓂᒃ ᐊᑖᑕᕕᓪᓗ ᐃᓚᖏᓐᓃᒃ ᐱᔪᒪᓐᖏᓛᑦ?”

²¹ ᓴᐅᓕᐅᑉ ᑭᐅᕚ, “ᐱᓐᔭᒥᓂᐅᑉ ᑭᖑᕚᖏᓐᓄᑦ ᐃᓚᒋᔭᐅᓐᖏᓚᖔ, ᐃᓴᕆᐊᓕᒥᐅᑦ ᑭᖑᕚᖏᓐᓂᑦ ᒥᑭᓐᓂᕐᐸᐅᕗᑦ ᐃᓚᒃᑲᓗ ᒥᑭᓐᓂᕐᐸᐅᖏᓛᑦ ᐱᓐᔭᒥᓂᐅᑉ ᑭᖑᕚᕇᖏᓐᓂᑦ? ᖃᓄᐃᒻᒪᑦ ᑍᒫᒃ ᐅᕙᓐᓄᑦ ᐅᖃᕐᐲᑦ?”

²² ᓴᒧᐃᓕᐅᑉ ᓴᐅᓕ ᐱᔨᖓᓗ ᐂᑎᑉᐰᑦ ᐃᒡᓗᕈᓯᕐᒧᑦ ᓂᕈᑐᔪᒧᑦ ᐃᓂᑖᕐᑎᓪᓗᒋᒡᓗ ᐅᐱᓐᓇᕐᑐᒧᑦ ᓂᕐᕆᕕᖕᒥ ᕾᖁᔭᐅᓯᒪᔪᑦ ᐃᓂᖏᓐᓂ, ᕾᖁᔭᐅᓯᒪᔪᑦ 30ᒦᒐᓚᒃᑎᓪᓗᒋᑦ.

²³ ᓴᒧᐃᓕᐅᑉ ᓂᕿᓕᐅᕐᑎ ᐅᖃᐅᑎᕚ, “ᕾᓚᐅᕈᒃ ᓂᕿᐅᑉ ᐃᓚᖓ ᐃᓕᖕᓄᐊᓚᐅᕐᑕᕋ, ᐅᖃᐅᑎᒋᓚᐅᕐᑕᕋ, ‘ᐅᓇ ᓴᓂᕐᕙᒃᓯᒪᒍᒃ.’”

²⁴ ᑕᕝᕙ ᓂᕿᓕᐅᕐᑎᐅᑉ ᑎᒍᓪᓗᒍ ᓂᐅ ᒥᒥᖓᓗ ᐃᓕᕚ ᓴᐅᓕᐅᑉ ᓵᖓᓄᑦ; ᓴᒧᐃᓕᓗ ᐅᖃᕐᐳᖅ, “ᑕᑯᒋᑦ, ᐅᓇ ᐃᓕᖕᓄᑦ ᖁᒥᐅᑎᒋᓚᐅᕐᑕᕗᑦ. ᓂᕆᓕᕈᒃ; ᐅᓇ ᐃᓕᖕᓄᑦ ᖁᒥᐅᑎᒋᓚᐅᕐᐸᕋ ᓂᕆᔭᐅᖁᓪᓗᒍ ᑕᒪᑐᒪᓂ ᓇᓪᓕᐅᑦᑐᒥ, ᐃᓄᐃᑦ ᕾᖁᓚᐅᕐᑕᒃᑲ ᐃᓚᒋᓗᒋᑦ.” ᑕᕝᕙ ᓴᐅᓕᐅᑉ ᓴᒧᐃᓕ ᓂᕆᖃᑎᒋᓚᐅᕐᐹ ᐅᓪᓗᒥ ᑕᕝᕙᓂ.

²⁵ ᐊᑎᕋᒥᒡᓗ ᑐᒃᓯᐊᕐᕕᒋᔭᒥᖕᓂᑦ ᐃᒡᓗᒐᓴᖕᓄᑦ ᐂᕗᑦ, ᐃᒡᓕᕐᓗ ᐃᓂᓪᓚᒃᓴᕐᓯᒪᓚᐅᕐᐳᖅ ᓴᐅᓕᐅᑉ ᐃᓂᒋᓂᐊᕐᑕᖓ ᐃᒡᓘᑉ ᖁᓛᖓᓂ, ᑕᕝᕙᓂᓗ ᓴᐅᓕ ᓇᓪᓚᓚᐅᕐᐳᖅ ᓯᓂᒐᓱᓕᕐᓗᓂ.

²⁶ ᐅᓪᓛᒻᒪᕆᒃᑯᑦ ᖃᐅᒻᒪᓕᕐᑎᓪᓗᒍ ᓴᒧᐃᓕᐅᑉ ᓴᐅᓕ ᐅᐸᒃᐹ ᐃᒡᓘᑉ ᖄᖓᓄᑦ, ᐅᖃᐅᑎᓪᓗᒍᓗ, “ᒪᑭᓕᕆᑦ, ᐊᐅᓪᓚᕐᑎᓐᓂᐊᓕᕋᒃᑭᑦ.” ᑕᕝᕙ ᓴᐅᓕ ᒪᑭᑉᐳᖅ, ᓴᒧᐃᓕᒃᑯᒡᓗ ᐊᓂᕘᒃ ᐊᑕᐅᑦᓯᒃᑯᑦ ᐊᖅᑯᑎᒧᐊᕐᓗᑎᒃ.

²⁷ ᐃᒡᓗᒐᓮᓪᓗ ᑭᒡᓕᖓᓄᑦ ᑎᑭᓐᓇᒥᒃ, ᓴᒧᐃᓕᐅᑉ ᓴᐅᓕ ᐅᖃᐅᑎᕚ, “ᐱᔩᑦ ᐅᖃᐅᑎᓚᐅᕈᒃ ᑲᔪᓯᖁᓗᒍ ᐅᕙᑦᑎᓐᓂᒃ ᓯᕗᓪᓕᐅᓂᐊᕐᒪᑦ.” ᑕᕝᕙ ᐱᔨᖓ ᐊᓂᒎᑎᓕᕐᒪᑦ ᓴᐅᓕ ᐅᖃᐅᑎᕚ “ᑕᒫᓂ ᓄᖅᑲᖓᑬᓐᓇᕆᑦ, ᐅᖃᐅᑎᓂᐊᕋᒃᑭᑦ ᒎᑎᐅᑉ ᐅᖃᐅᓯᐅᖁᔭᖓᓂᒃ.”