ᓴᒧᐃᓕ ᓯᕗᓪᓖᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓄᐃᑦ ᐊᖓᔪᖅᑳᕐᔪᐊᕐᑖᕈᒪᓂᖓᑦ

¹ ᓴᒧᐃᓕ ᐃᑦᑑᓕᕐᓗᓂ, ᐃᕐᓂᓂ ᑎᓕᕔᑦ ᐃᓱᒪᓕᐅᕐᑎᐅᖁᓪᓗᒋᑦ ᐃᓴᕆᐊᓕᒥᐅᓄᑦ.

² ᐃᕐᓂᖓ ᐊᖓᔪᒃᓯᕐᐹᖅ ᐊᑎᖃᕐᐳᖅ ᔪᐃᓕᒥᒃ, ᓄᑲᖓᓗ ᐊᐰᔭᒥᒃ; ᑖᒃᑯᐊᒃ ᐃᓱᒪᓕᐅᕐᑎᐅᓚᐅᕐᐴᒃ ᐱᐊᕐᓯᐸᒥ.

³ ᐃᕐᓂᖏᒡᓕ ᐃᓅᓚᐅᓐᖏᓛᒃ ᑖᑦᓱᑐᓇᖅ; ᓴᖑᓚᐅᕐᐴᒡᓕ ᑮᓇᐅᔭᓕᐅᕈᒪᓂᕐᒧᑦ ᐱᓕᕆᓕᕐᓗᑎᒃ; ᓯᓔᕐᕆᒃᓯᓪᓗᑎᒃ ᐱᓇᓱᐊᖃᑦᑕᓚᐅᕐᒪᑎᒃ ᓱᓕᖏᑦᑐᒥᒃ ᐱᓂᐊᕐᓂᖃᓕᕐᓗᑎᒃ.

⁴ ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᓕᒫᖏᑦ ᑲᑎᓪᓗᑎᒃ ᓴᒧᐃᓕᒧᐊᕐᐳᑦ ᕌᒪᒦᑦᑐᒧᑦ,

⁵ ᐅᖃᐅᑎᓪᓗᒍᓗ, “ᑕᑯᓚᐅᕆᑦ, ᐃᑦᑑᓕᕐᑐᑎᑦ ᐃᕐᓃᒃᑭᒡᓕ ᐃᓕᖕᓂᒃ ᒪᓕᓐᖏᓛᒃ; ᑍᒤᒻᒪᑦ ᑎᓕᓯᓚᐅᕆᑦ ᐊᖓᔪᖅᑳᕐᔪᐊᕐᒥᒃ ᐊᐅᓚᑦᓯᓂᐊᕐᑐᒥᒃ ᐅᕙᑦᑎᓐᓂᒃ ᐃᓅᖃᑎᒌᒡᔪᐊᑎᑐᑦ ᑍᒤᓐᓂᐊᕋᑦᑕ.”

⁶ ᓴᒧᐃᓕᓕ ᑕᒪᑐᒥᖓ ᖁᕕᐊᓲᑎᖃᓚᐅᓐᖏᓚᖅ ᐊᖓᔪᖅᑳᕐᔪᐊᕐᑖᕈᒪᑎᓪᓗᒋᑦ; ᑍᒤᒻᒪ ᓴᒧᐃᓕ ᐊᑕᓂᕐᒧᑦ ᑐᒃᓯᐊᓚᐅᕐᐳᖅ.

⁷ ᐊᑕᓂᕐᓗ ᐅᖃᕐᐳᖅ ᓴᒧᐃᓕᒧᑦ, “ᒪᓕᒃᑭᑦ ᐃᓄᐃᑦ ᐅᖃᐅᓯᕆᔭᖏᑦ ᐃᓕᖕᓄᑦ; ᐃᓕᖕᓂᒃ ᓇᕐᕈᓕᖏᒻᒪᑕ; ᐅᕙᓐᓂᒡᓕ ᓇᕐᕈᓕᕐᐳᑦ ᐊᖓᔪᖅᑳᕐᔪᐊᒥᖕᓂᒃ.

⁸ ᑍᒪᓐᖓᓂᑦ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕋᒃᑭᑦ, ᐅᓪᓗᒥᒧᑦ ᑎᑭᓪᓗᒍ, ᐅᕙᓐᓂᒃ ᕿᒤᓚᐅᕐᐳᑦ ᑐᒃᓯᐊᓕᕐᓗᑎᒡᓗ ᒎᑎᓐᖑᐊᓄᑦ, ᐃᓕᖕᓄᓪᓗ ᑍᒤᓕᐅᓕᕆᕗᑦ.

⁹ ᒫᓐᓇᓕ, ᑍᒤᒻᒪᑦ ᐅᖃᐅᓯᕆᔭᖏᑦ ᒪᓕᓕᒃᑭᑦ; ᑭᓯᐊᓂ ᓯᕘᕋᒋᔭᒃᓴᖏᓐᓂᒃ ᐃᓂᕐᑎᒻᒪᕆᖕᓂᐊᕐᐸᑎᑦ, ᐅᖃᐅᑎᑦᓯᐊᕐᓗᒋᓪᓗ ᐊᖓᔪᖅᑳᕐᔪᐊᑉ ᐱᐅᓯᕆᔭᕆᐊᖃᓛᕐᑕᖓᓂᒃ ᐊᐅᓚᑦᓯᓕᕈᓂ ᑖᒃᑯᓂᖓ.”

¹⁰ ᓴᒧᐃᓕᐅᑉ ᐃᓄᐃᑦ ᐊᖓᔪᖅᑳᕐᔪᐊᕐᑖᕈᒪᔪᑦ ᐅᖃᐅᑎᓚᐅᕐᐰᑦ ᐊᑕᓂᐅᑉ ᐅᖃᐅᓯᕆᔭᓕᒫᖏᓐᓂᒃ ᑖᒃᑯᓄᖓ.

¹¹ ᓴᒧᐃᓕᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᑦᓯ ᐊᐅᓚᑦᓯᓕᕈᓂ ᐃᒫᒃ ᐱᐅᓯᖃᕐᕕᒋᔪᒫᕐᐹᓯ: ᐃᕐᓂᓯ ᐅᓇᑕᕐᑐᒃᓴᓐᖑᕐᑎᑦᓱᒫᕐᐰᑦ ᐃᓚᖏᓪᓗ ᐅᓇᑕᕐᑎᒋᓗᓂᒋᑦ ᕿᒧᒃᓯᐅᑎᓄᑦ ᐊᒃᓴᓗᐊᓕᖕᓄᑦ, ᐃᓚᖏᓪᓗ ᕿᒻᒥᕐᔪᐊᒃᑯᑦ ᐅᓇᑕᕐᑎᒋᓗᓂᒋᑦ, ᐃᓚᖏᓪᓗ ᐅᓪᓚᒃᑎᐅᓗᑎᒃ ᕿᒧᒃᓯᐅᑏᑦ ᐊᒃᓴᓗᐊᓖᑦ ᓯᕗᕌᓂ;

¹² ᐃᓚᖏᓪᓗ ᐊᖓᔪᖅᑲᐅᑎᑦᓱᒫᕐᐰᑦ ᐊᐅᓚᑦᓯᔨᐅᓗᑎᒃ 1,000ᓄᑦ, ᐃᓚᖏᓪᓗ 50ᓄᑦ, ᐃᓚᖏᓪᓗ ᐱᕈᕐᓰᕕᓕᕆᔨᖁᑎᒋᔪᒫᕐᐰᑦ, ᐃᓚᖏᓪᓗ ᐱᕈᕐᑐᓂᒡᓗ ᓄᐊᑦᓯᔨᒋᓗᓂᒋᑦ, ᐃᓚᖏᓪᓗ ᓴᓇᔨᒋᔪᒫᕐᐰᑦ ᐅᓇᑕᐅᑎᓂᒃ ᐃᓚᖏᓪᓗ ᕿᒧᒃᓯᐅᑎᓄᑦ ᑲᓕᒐᓕᐅᕐᑎᒋᓗᓂᒋᑦ ᐊᒃᓴᓗᐊᓕᖕᓂᒃ.

¹³ ᐸᓂᓯᓗ ᑎᐱᑦᓯᐊᕆᒃᓴᐅᑎᑎᑐᑦ ᐱᓇᓱᐊᕐᑎᒋᔪᒫᕐᐰᑦ ᓂᕿᓕᐅᕐᑎᒋᓗᓂᒋᑦ ᓂᐊᖂᔭᓕᐅᕐᑎᒋᓗᓂᒋᓪᓗ.

¹⁴ ᐱᕈᕐᓰᕖᓪᓗ ᐱᐅᓂᕐᐹᖁᑎᓯ ᐱᔪᒫᕐᐰᑦ ᕔᓂᓕᐅᕐᕕᓯᓗ ᓇᐹᕐᑐᐃᓪᓗ ᐅᕐᓱᒃᓴᓖᑦ ᐱᔪᒫᕐᐰᑦ ᑐᓂᓗᒋᓪᓗ ᐱᔨᒥᓄᑦ.

¹⁵ ᓂᐊᖂᔭᒃᓮᑦ ᕔᓂᒃᓮᓪᓗ ᑕᓪᓕᒪᐅᔪᖏᓐᓂᒃ ᑎᒍᓯᔪᒫᕐᐳᖅ ᑐᓂᓗᒋᓪᓗ ᐊᖓᔪᖅᑳᖁᑎᒥᓄᑦ ᐱᔨᒥᓄᓪᓗ.

¹⁶ ᐱᔨᓯᓗ ᐊᖑᑎᑦ ᐊᕐᓁᓪᓗ ᑎᒍᔪᒫᕐᐰᑦ, ᐆᒪᔪᓪᓗ ᓂᕿᑦᓯᐊᕙᐅᓂᕐᐹᑦ ᓯᐅᑎᖅᑯᕐᑐᔪᖁᑎᓯᓗ ᐱᔪᒫᕐᐰᑦ, ᐱᓇᓱᐊᕐᑎᓕᕐᓗᒋᓪᓗ ᐃᒻᒥᓄᑦ.

¹⁷ ᓰᐱᖁᑎᓯᓗ ᑕᓪᓕᒪᐅᔪᖏᑦ ᑎᒍᔪᒫᕐᐰᑦ, ᓯᐊᓛᕐᑖᕆᔪᒫᕐᐹᓯᓗ.

¹⁸ ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ ᓈᒻᒪᒃᓴᖏᓐᓂᕐᒧᑦ ᓂᓪᓕᐊᔪᒫᕐᐳᓯ ᐊᖓᔪᖅᑳᕐᔪᐊᑦᓯᓐᓂᒃ, ᐃᓕᑦᓯ ᓇᖕᒥᓂᖅ ᓂᕈᐊᓚᐅᕐᑕᑦᓯᓐᓂᒃ; ᐊᑕᓂᐅᓪᓕ ᑭᐅᔪᒫᓐᖏᓛᓯ ᐅᓪᓗᒥ ᑍᑲᓂ.”

¹⁹ ᐃᓄᐃᓪᓕ ᓈᓚᒍᒪᓚᐅᓐᖏᓚᑦ ᓴᒧᐃᓕᐅᑉ ᐅᖃᐅᓯᖏᓐᓂᒃ; ᐅᖃᕐᐳᓪᓕ, “ᐋᒃᑲ! ᐅᕙᒍᓪᓕ ᐊᖓᔪᖅᑳᕐᔪᐊᕐᑖᕈᒪᕗᒍᑦ,

²⁰ ᐃᓅᖃᑎᒌᒡᔪᐊᓕᒫᓂᒃ ᐊᑦᔨᖃᕐᓂᐊᕋᑦᑕ, ᓇᖕᒥᓂᖅ ᐊᖓᔪᖅᑳᕐᔪᐊᖃᕐᓗᑕ ᐊᐅᓚᑦᓯᔨᒋᓂᐊᕐᑕᑦᑎᓐᓂᒃ ᓯᕗᓕᕐᑎᒃᓴᑦᑎᓐᓂᒡᓗ ᐅᓇᑕᕐᓂᕐᒧᑦ ᐅᓇᑕᕐᑎᒋᓗᑎᒍᓗ.”

²¹ ᓴᒧᐃᓕᐅᓪᓕ ᐅᖃᐅᓯᐅᔪᓕᒫᑦ ᓈᓚᑦᓯᐊᕇᕋᒥᒋᑦ, ᐅᖃᐅᑎᒋᓚᐅᕐᐰᑦ ᐊᑕᓂᕐᒧᑦ.

²² ᐊᑕᓂᕐᓗ ᐅᖃᕐᐳᖅ ᓴᒧᐃᓕᒧᑦ, “ᐅᖃᐅᓯᖏᑦ ᒪᓕᓕᒃᑭᑦ, ᐊᖓᔪᖅᑳᕐᔪᐊᕐᑖᕐᑎᓪᓗᒋᓪᓗ.” ᓴᒧᐃᓕᐅᓪᓗ ᐃᓴᕆᐊᓕᒥᐅᓕᒫᑦ ᐅᖃᐅᑎᕔᑦ, “ᐃᒡᓗᒐᓴᑦᓯᓐᓄᑦ ᐊᑐᓂᑦ ᐊᖏᕐᕋᓕᕆᑦᓯ.”