ᓴᒧᐃᓕ ᓯᕗᓪᓖᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑍᒤᒻᒪᑦ ᑭᕆᐊᑦ-ᔨᕆᐅᑉ ᐃᓄᖏᑕ ᐂᓚᐅᕐᐹᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖁᑎᖓ, ᑐᓂᕚᓪᓗ ᐊᖑᒻᒧᑦ ᐊᐱᓇᑕᑉᒥᒃ ᐊᑎᓕᖕᒧᑦ ᓄᓇᖃᕐᑐᒧᑦ ᐱᖑᐊᕐᔫᑉ ᖄᖓᓂ; ᐃᕐᓂᖓᓗ ᐃᓕᓯᕆ ᑲᒪᔨᐅᖁᔭᐅᓪᓗᓂ ᑐᒃᓯᐅᑦᔭᐅᓚᐅᕐᐳᖅ ᐃᑦᔪᕐᓁᓕᑎᑕᐅᓪᓗᓂ.

ᓴᒧᐃᓕᐅᑉ ᐊᐅᓚᑦᓯᓂᖓ ᐃᓴᕆᐊᓕᒥᐅᓂᒃ

² ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑭᕆᐊᑦ-ᔨᕆᒻᒦᓚᐅᕐᐳᖅ ᐊᑯᓂ, ᐊᕐᕌᒍᓂᒃ 20ᓂᒃ, ᑍᑦᓱᒪᓂᐅᑎᓪᓗᒍ ᐃᓴᕆᐊᓕᒥᐅᑦ ᐃᓄᖏᑦ ᐃᓗᖏᕐᓱᕐᓗᑎᒃ ᓂᓪᓕᐊᖃᑦᑕᓚᐅᕐᐳᑦ ᐊᑕᓂᕐᒧᑦ ᐃᑲᔪᕐᑕᐅᔪᒪᓪᓗᑎᒃ.

³ ᓴᒧᐃᓕᓕ ᐅᖃᕐᐳᖅ ᐃᓴᕆᐊᓕᒥᐅᑦ ᐃᓄᓕᒫᖏᓐᓄᑦ, “ᐊᑕᓂᕐᒧᑦ ᐅᑎᕐᓂᐊᕈᑦᓯ ᐆᒻᒪᑎᑦᓯᓐᓄᑦ ᐊᑕᖏᕐᑐᒧᑦ, ᑕᕝᕙ ᒎᑎᓐᖑᐊᑦ ᐱᒃᓴᔭᕆᓐᖏᑕᓯ ᐃᒋᑕᒃᓴᕆᕙᓯ ᒎᑎᓐᖑᐊᓪᓗ ᐊᕐᓇᐅᑉ ᐋᔅᑕᕉᑎᐅᑉ ᐊᑦᔨᓐᖑᐊᖏᑦ, ᐆᒻᒪᑎᑦᓯᒍᑦ ᑐᓂᒃᑲᓐᓂᓕᕆᑦᓯ ᐊᑕᖏᕐᑐᒧᑦ ᐊᑕᓂᖅ ᐱᔨᑦᓯᕐᑕᑐᐊᕆᓕᕐᓗᒍ, ᑕᕝᕙ ᐱᐅᓕᓂᐊᕐᐹᓯ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ.”

⁴ ᑕᕝᕙ ᐃᓴᕆᐊᓕᒥᐅᑦ ᒎᑎᓐᖑᐊᓂᒃ ᐰᓕᒥᒃ ᐋᔅᑕᕉᑎᒥᒡᓗ ᐃᒋᑦᓯᓚᐅᕐᐳᑦ, ᐊᑕᓂᕐᓗ ᐱᔨᑦᓯᕐᑕᑐᐊᕆᓕᕐᓗᒍ.

⁵ ᑭᖑᓂᐊᒍᑦ ᓴᒧᐃᓕ ᐅᖃᕐᐳᖅ, “ᐃᓴᕆᐊᓕᒥᐅᓕᒫᑦ ᑲᑎᓚᐅᕆᑦᓯ ᒥᔅᐸᒥ, ᑐᒃᓯᐅᑎᓂᕐᐸᑦᓯᓗ ᐊᑕᓂᕐᒧᑦ ᑍᑲᓂ.”

⁶ ᑍᒤᒻᒪᑦ ᑲᑎᓚᐅᕐᐳᑦ ᒥᔅᐸᒥ, ᐃᒪᕐᒥᒃ ᖃᓗᓯᓪᓗᑎᒃ ᑯᕕᓪᓗᒍᓗ ᐂᑦᑑᑎᒋᓚᐅᕐᐹᑦ ᐊᑕᓂᕐᒧᑦ, ᓂᕆᑦᑍᓕᓚᐅᕐᐳᓪᓗ ᐅᓪᓗᒥ ᑕᕝᕙᓂ, ᐅᖃᕐᓗᑎᒡᓗ, “ᐊᑕᓂᕐᒧᑦ ᐊᔪᕐᑐᓕᓚᐅᕐᐳᒍᑦ.” ᑕᕝᕙᓂᓗ ᒥᔅᐸᒥ ᓴᒧᐃᓕᐅᑉ ᐃᓴᕆᐊᓕᒥᐅᑦ ᐃᓗᐊᖏᑦᔪᑎᖏᓐᓂᑦ ᐃᓱᐊᕐᓯᑎᓚᐅᕐᐰᑦ.

⁷ ᐱᓕᔅᑍᓂᒥᐅᓪᓕ ᑐᓴᕋᒥᒃ ᐃᓴᕆᐊᓕᒥᐅᑦ ᑲᑎᓐᓂᖏᓐᓂᒃ ᒥᔅᐸᒥ, ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑕᓪᓕᒪᑦ ᐅᓇᑕᕆᐊᕐᓕᕐᐳᑦ ᐃᓴᕆᐊᓕᒥᓂᒃ. ᐃᓴᕆᐊᓕᒥᐅᓪᓕ ᑕᒪᑐᒥᖓ ᑐᓴᕋᒥᒃ ᑲᑉᐱᐊᓱᓕᕐᐳᑦ ᐱᓕᔅᑍᓂᒥᐅᓂᒃ.

⁸ ᐅᖃᕐᓗᑎᒡᓗ ᓴᒧᐃᓕᒧᑦ, “ᑐᒃᓯᐊᖏᓐᓇᕆᑦ ᐊᑕᓂᕐᒧᑦ ᒎᑎᑦᑎᓐᓄᑦ, ᐱᐅᓕᔭᐅᖁᓪᓗᑕ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ.”

⁹ ᑕᕝᕙ ᓴᒧᐃᓕ ᑐᖁᑦᓯᕗᖅ ᓰᐱᐅᑉ ᓄᕐᕋᖓᓂᒃ ᐊᑕᖏᕐᓗᒍᓗ ᐃᑯᐊᓪᓚᒡᓗᒍ ᑐᓂᕐᕈᑎᒋᕚ ᐊᑕᓂᕐᒧᑦ; ᑐᒃᓯᐊᕐᐳᕐᓗ ᐊᑕᓂᕐᒧᑦ ᐃᓴᕆᐊᓕᒥᐅᑦ ᐃᑲᔪᕐᑕᐅᖁᓪᓗᒋᑦ, ᐊᑕᓂᐅᓪᓗ ᑭᐅᕚ ᑐᒃᓯᐊᕈᑎᖓᓂᒃ.

¹⁰ ᓴᒧᐃᓕᓕ ᐃᑯᐊᓚᑦᓯᓪᓗᓂ ᑐᓂᓯᑎᓪᓗᒍ ᑐᓂᕐᕈᑎᒥᓂᒃ, ᐱᓕᔅᑍᓂᒥᐅᑦ ᖃᒡᓕᕗᑦ ᐅᓇᑕᕆᐊᓕᕐᓗᑎᒃ ᐃᓴᕆᐊᓕᒥᐅᓄᑦ; ᐊᑕᓂᕐᓕ ᑲᓪᓕᓕᕐᑎᑦᓯᕗᖅ ᓂᐱᖅᑯᕐᑐᔪᕐᔪᐊᕐᒥᒃ ᐱᓕᔅᑍᓂᒥᐅᑦ ᐱᓪᓗᒋᑦ ᑖᒃᑯᐊᓗ ᐅᐃᒻᒪᑦᓯᐊᓚᐅᕐᐳ ᓇᓗᓕᕐᓗᑎᒡᓗ; ᕿᒪᒃᓯᓪᓗᑎᒡᓗ ᐃᓴᕆᐊᓕᒥᐅᓂᒃ.

¹¹ ᐃᓴᕆᐊᓕᒥᐅᓪᓕ ᒥᔅᐸᒥᑦ ᐊᐅᓪᓚᕋᒥᒃ ᒪᓕᒃᓴᕐᐳᑦ ᐱᓕᔅᑍᓂᒥᐅᓂᒃ, ᑐᖁᕅᓚᐅᕐᐳᑦ, ᐱᑦ-ᑳᕐᒧᑦ ᐊᒡᓛᑦ ᑎᑭᓗᑎᒃ.

¹² ᑕᕝᕙ ᓴᒧᐃᓕ ᐅᔭᕋᖕᒥᒃ ᑎᒍᓯᓪᓗᓂ ᐃᓕᕚ ᒥᔅᐸᐅᑉ ᔨᓴᓇᐅᓪᓗ ᐊᑯᓐᓂᖓᓄᑦ, ᐊᑦᓯᕐᐹᓗ ᐃᐱᓂᓯᕆᒥᒃ ᐅᖃᕐᓗᓂ, “ᑕᒪᐅᖓ ᑎᑭᓪᓗᒍ ᐊᑕᓂᐅᑉ ᐃᑲᔪᓚᐅᕐᐹᑎᒍᑦ.”

¹³ ᐱᓕᔅᑍᓂᒥᐅᑦ ᓵᓚᐅᓚᐅᕐᐳᑦ ᐃᓴᕆᐊᓕᒥᐅᓪᓗ ᓄᓇᖓᓄᑦ ᐃᑎᒃᑲᓐᓂᓚᐅᕈᓐᓃᕐᓗᑎᒃ. ᐊᑕᓂᐅᓪᓗ ᐱᔪᓐᓇᕐᓂᖓᑕ ᐱᓕᔅᑏᓂᒥᐅᑦ ᓵᓐᖎᓐᓇᓚᐅᕐᐰᖅ ᓴᒧᐃᓕᐅᑉ ᐃᓅᓂᓕᒫᖓᓂ.

¹⁴ ᐃᒡᓗᖓᓮᑦ ᐱᓕᔅᑍᓂᒥᐅᑦ ᑎᒍᓚᐅᕐᑕᖏᑦ ᐃᓴᕆᐊᓕᒥᐅᓂᑦ ᐅᑎᕐᑎᑕᐅᓚᐅᕐᐳᑦ, ᐃᑯᕋᓂᓗ ᒑᑎᓗ ᐊᑯᓐᓂᖓᓃᑦᑐᑦ; ᐃᓴᕆᐊᓕᒥᐅᑦ ᐅᑎᕐᑎᓚᐅᕐᐰᑦ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ. ᐅᓇᑕᕐᓂᖃᕈᓐᓃᓚᐅᕐᐳᓪᓗ ᐃᓴᕆᐊᓕᒥᐅᑦ ᐊᒧᕅᑎᒥᐅᓪᓗ.

¹⁵ ᓴᒧᐃᓕ ᐊᐅᓚᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ ᐃᓅᓂᓕᒫᒥᓂ.

¹⁶ ᐊᕐᕌᒍᑕᒫᑦ ᐂᖃᑦᑕᓚᐅᕐᐳᖅ ᓄᓇᓕᖕᓄᑦ ᐱᑎᓕᒧᑦ, ᒋᐅᓪᒐᐅᓪᒧᑦ, ᒥᔅᐸᒧᓪᓗ; ᑖᒃᑯᓇᓂᓗ ᐊᑲᐅᖏᑦᔪᑕᐅᔪᑦ ᐋᖅᑭᒃᓱᖃᑦᑕᓚᐅᕐᐰᑦ.

¹⁷ ᐱᔭᕇᕌᖓᒥ ᐊᖏᕐᕋᖃᑦᑕᓚᐅᕆᕗᖅ ᕌᒪᒧᑦ, ᑕᕝᕙᓂ ᐊᖏᕐᕋᖃᕋᒥ, ᑕᕝᕙᓂᓗ ᐃᓴᕆᐊᓕᒥᐅᓄᑦ ᐃᓱᒪᓕᐅᕐᑎᒋᔭᐅᓚᐅᕐᐳᖅ, ᑕᕝᕙᓂᓗ ᑐᓂᕐᕈᓯᕐᕕᓕᐅᓚᐅᕐᐳᖅ ᐊᑕᓂᕐᒧᑦ.