ᓴᒧᐃᓕ ᓯᕗᓪᓖᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᐱᓕᔅᑏᓂᒧᐊᕐᑕᐅᓂᖓ

¹ ᐱᓕᔅᑍᓂᒥᐅᑦ ᑎᒍᓯᒐᒥᒃ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ, ᐊᒡᔭᕐᐹ ᐃᐱᓂᓯᕆᒥᑦ ᐃᒡᓗᒐᓴᖁᑎᒥᓄᑦ ᐋᔅᑖᑦᒧᑦ;

² ᑕᕝᕙ ᐱᓕᔅᑍᓂᒥᐅᑦ ᑐᒃᓯᐊᕐᕕᖕᒥᓅᕈᑎᓚᐅᕐᐹᑦ ᒎᑎᓐᖑᐊᒧᑦ ᑍᒐᓐᒧᑦ, ᓴᓇᓐᖑᐊᕐᓯᒪᔪᒧᑦ ᑖᑦᓱᒪᓗ ᓴᓂᐊᓄᐊᕐᐹᑦ.

³ ᐅᓪᓛᒻᒪᕆᒃᑯᒃ ᖃᐅᑎᓪᓗᒍ ᐋᔅᑖᑦᒥᐅᑦ ᐃᓄᖏᑦ ᒪᑭᓐᓇᒥᒃ, ᑕᑯᕗᑦ ᒎᑎᓐᖑᐊᖓ ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ. ᑕᕝᕙ ᑎᒍᕚᑦ ᐅᑎᕐᑎᓪᓗᒍᓗ ᐃᓂᖓᓄᑦ.

⁴ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᒻᒥᒐᒥᒃ, ᑕᑯᒋᕗᑦ, ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ, ᓂᐊᖁᐊ ᑕᓕᖏᒡᓗ ᓇᑲᓯᒪᓪᓗᑎᒃ ᓇᑎᕐᒦᑦᑑᒃ; ᑎᒥᖓ ᑭᓯᐊᓂ ᐊᒥᐊᒃᑰᓕᕐᑐᖅ.

⁵ ᑍᒤᒻᒪᑦ ᑍᒐᓐ ᑐᓂᕐᕈᓯᕐᑎᑦᓯᔨᖏᑦ ᑐᒃᓯᐊᕐᑎᖏᓪᓗ ᐃᑎᕐᑐᓕᒫᑦ ᐋᔅᑖᑦᒥ ᑐᒃᓯᐊᕐᕕᖕᒧᐊᕌᖓᒥᒃ ᐃᓂᒋᓚᐅᕐᑕᖓᒍᑦ ᐱᓱᒍᓐᓇᓐᖏᓚᑦ ᐅᓪᓗᒥᒧᑦ ᑎᑭᓪᓗᒍ.

⁶ ᐊᑕᓂᐅᑉ ᐱᔪᓐᓇᕐᓂᖓᑕ ᐋᔅᑖᑦᒥᐅᑦ ᑲᑉᐱᐊᓱᒃᑎᓚᐅᕐᐰᑦ ᓱᒋᐊᕐᓗᒋᓪᓗ, ᐋᔅᑖᑦᒥᐅᑦ ᖃᓂᒋᔭᖓᓃᑦᑐᓪᓗ ᐋᓐᓂᐊᓇᕐᑐᓄᑦ ᐋᖅᑭᒃᑕᐅᔪᓐᓇᖏᑦᑐᓄᑦ.

⁷ ᐋᔅᑖᑦᒥᐅᓪᓗ ᖃᐅᔨᒐᒥᒃ ᖃᓄᐃᓕᐅᕐᕕᐅᓂᕐᒥᖕᓂᒃ ᐅᖃᕐᐳᑦ, “ᐃᓴᕆᐊᓕᒥᐅᑦ ᒎᑎᖓᑦᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐅᕙᑦᑎᓐᓃᖏᓐᓇᕆᐊᖃᓐᖏᓚᖅ, ᑖᑦᓱᒪ ᐱᔪᓐᓇᕐᓂᖓᓄᑦ ᐊᐅᓚᑕᐅᒻᒪᕆᓕᕋᑦᑕ ᒎᑎᕗᓪᓗ ᑍᒐᓐ ᐱᖃᓯᐅᑎᓪᓗᒍ.”

⁸ ᑍᒤᒻᒪᑦ ᐅᖃᕆᐊᕐᑐᕐᑎᑦᓯᕗᑦ ᑲᑎᖃᑎᖃᕐᓗᑎᒡᓗ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ ᐊᐱᕆᓪᓗᒋᓪᓗ, “ᖃᓄᐃᓕᐅᕐᑐᒃᓴᐅᕕᑖ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓᓅ?” ᑖᒃᑯᐊ ᑭᐅᕗᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᓚᐅᕐᓯᐅᒃ,” ᑍᒤᒻᒪᑦ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᕚᑦ.

⁹ ᑭᓯᐊᓂᓕ ᑕᕝᕗᓐᖓᕐᑕᐅᓯᒪᓕᕐᒪᑦ, ᐊᑕᓂᐅᑉ ᐱᔪᓐᓇᕐᓂᖓᑕ ᓱᒋᐊᕆᕔᑦ ᑕᕝᕙᓂ ᐃᒡᓗᒐᓴᖕᓃᑦᑐᑦ, ᐅᐃᒪᔮᕐᑎᓪᓗᒋᓪᓗ, ᐋᓐᓂᐊᓇᕐᑐᕐᑖᕐᐳᓪᓗ ᐃᒡᓗᒐᓴᖕᓃᑦᑐᓕᒫᑦ, ᐃᓅᓱᒃᑐᑦ ᐃᓄᑐᕾᓪᓗ ᐊᑦᔨᒌᓂᒃ, ᖃᓂᒪᓇᕐᑐᓄᑦ ᑎᑭᑕᐅᔪᐃᓐᓇᐅᓚᐅᕐᐳᑦ.

¹⁰ ᑕᕝᕙ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐃᑯᕋᓂᒧᐊᕈᑎᕚᑦ. ᑍᑯᖓᓗ ᑎᑭᐅᑦᔭᐅᖕᒪᑦ, ᐃᑯᕋᓂᒥᐅᑦ ᐃᓄᖏᑦ ᐅᖃᓕᕐᐳᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒪᐅᓐᖓᕐᑕᐅᕗᖅ ᐅᕙᑦᑎᓐᓂᒃ ᑐᖁᑦᓯᖁᔭᐅᓪᓗᓂ ᐃᓄᖁᑎᑦᑎᓐᓂᒡᓗ!”

¹¹ ᑍᒤᒻᒪᑦ ᐱᓕᔅᑍᓂᒥᐅᑦ ᐊᖓᔪᖅᑳᓕᒫᖏᓐᓂᒃ ᕾᖁᔨᓚᐅᕐᐳᑦ ᑲᑎᖕᒪᑕᓗ ᐅᖃᐅᑎᕔᑦ, “ᐃᓴᕆᐊᓕᒥᐅᑉ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒫᓐᖓᑦ ᐊᐅᓪᓚᕐᑎᑕᐅᓚᐅᕐᓕ ᐃᓂᖓᓄᓪᓗ ᐅᑎᕐᑎᑕᐅᓗᓂ, ᑐᖁᑕᐅᓂᐊᖏᓐᓇᑦᑕ ᐃᓚᕗᓪᓗ.” ᐃᒡᓗᒐᓴᓕᒫᓂᓗ ᑕᕝᕙᓂ ᐅᐃᒪᔮᕐᓂᖃᕐᐳᖅ ᑐᖁᑕᐅᓂᐊᕋᓱᒋᓪᓗᑎᒃ.

¹² ᑍᒃᑯᐊᓗ ᑐᖁᖏᑦᑑᒐᓗᐊᑦ ᐋᓐᓂᐊᓇᕐᑐᕐᑖᓚᐅᕐᐳᑦ ᐋᖅᑭᒃᑕᐅᔪᓐᓇᖏᑦᑐᓂᒃ, ᐃᓄᐃᓪᓗ ᐃᒡᓗᒐᓴᓃᑦᑐᑦ ᐃᓗᖏᕐᓱᕐᓗᑎᒃ ᓂᓪᓕᐊᓂᖏᑦ ᕿᓚᖕᒧᑦ ᑎᑭᐅᒪᓕᓚᐅᕐᐳᑦ.